Wok Bung Wantaim Bilong Kamap Strong Long Spirit
MAN na meri i mas wok bung wantaim sapos ol i laik bai famili bilong ol i kamap strong long ol samting bilong spirit. Taim Jehova i wokim namba wan man na meri, em i kamapim klia olsem tupela i mas wok gut wantaim. Iv i mas wok wantaim Adam olsem “poroman bilong helpim em.” (Stt. 2:18) Tupela marit i mas i stap olsem tupela poroman; man i helpim meri na meri i helpim man. (Sav. 4:9-12) Na tu, ol papamama na ol pikinini i mas wok gut wantaim bilong inapim ol wok Jehova i givim long ol.
Famili i Lotu Wantaim
Barry na Heidi i gat faivpela pikinini. Ol i lukim olsem taim ol i wok bung wantaim long mekim Baibel stadi bilong famili, dispela i save helpim famili long kamap strong long ol samting bilong spirit. Barry i tok: “Bilong mekim famili stadi, sampela taim mi save givim ol liklik asainmen long ol pikinini, olsem: Mi save askim ol long redim sampela tok i stap long Kirap! na stori long en. Na mipela i save mekim prektis long ol tok mipela bai autim long ol man bambai ol wan wan pikinini i redi long mekim tok long wanpela haus.” Na Heidi i tok: “Mipela olgeta i gat sampela mak bilong spirit mipela i laik winim, na sampela taim mipela i save skelim dispela samting long famili stadi bambai mipela i ken save olsem mipela i wok long winim dispela mak o olsem wanem.” Dispela tupela marit i makim sampela nait long olgeta wik we famili i no save lukim televisen, na ol i lukim olsem dispela i givim rot long olgeta insait long famili long ritim gut ol buk na nius samting.
Ol Miting Bilong Kongrigesen
Mike na Denise i bin mekim bikpela long fopela pikinini. Pasin bilong wok gut wantaim i bin helpim famili olsem wanem? Mike i tok: “Sampela taim, maski mipela i mekim olgeta samting bilong redi gut, mipela i save kamap leit long miting, tasol taim mipela i wok bung wantaim, dispela i helpim mipela long kamap long miting long taim stret.” Denise i tok: “Taim ol pikinini i wok long kamap bikpela, olgeta wan wan i gat wok bilong mekim. Pikinini meri, em Kim, em i helpim mi long kukim kaikai na putim ol plet samting long tebol.” Pikinini man, em Michael, i tingim bek na i tok: “Long Tunde nait mipela i gat miting bilong kongrigesen long haus bilong mipela. Olsem na mipela i save klinim haus, brumim plua, na lainim gut ol sia.” Narapela pikinini man, Matthew, em i tok: “Long ol de bilong miting, oltaim papa i save kam bek kwik long haus long apinun bilong helpim mipela long redi long miting.” Wanem gutpela samting i kamap long dispela?
Hatwok i Kamapim Gutpela Samting
Mike i tok: “Long 1987, mitupela Denise i kirap mekim wok painia. Long dispela taim, tripela pikinini i stap yet wantaim mipela long haus. Tupela i kamap painia na ol narapela i bin mekim wok konstraksen long ol haus Betel. Na narapela amamas mipela famili i kisim em olsem, mipela i bin helpim 40 manmeri na ol i dediket na kisim baptais. Na mipela i bin wok wantaim long wok konstraksen long ol narapela kantri tu.”
Tru tumas, taim famili i wok bung wantaim, hatwok bilong ol i save kamapim gutpela samting. Olsem wanem? Yu inap painim sampela rot moa bilong wok bung wantaim ol narapela insait long famili? Sapos famili bilong yu i gat pasin bilong wok bung wantaim, dispela bai helpim yupela long kamap strong moa yet long ol samting bilong spirit.
[Piksa long pes 28]
Pasin bilong mekim prektis bai mekim wok autim tok i kamap gutpela moa