Taim Famili i Wok Gut Wantaim Gutpela Samting i Painim Ol
1 Bipo tru ol manmeri i stap olsem ol famili famili. Ol famili i bikpela samting long ai bilong Jehova, long wanem, em i “Papa bilong olgeta lain i stap long heven na long graun, na em yet i givim nem long olgeta dispela lain.”—Ef 3:15.
2 Long taim bilong raitim Baibel, ol papa i gat bikpela wok long helpim famili bilong ol long lotuim God na bihainim ol lo bilong em. Na i wankain tu long nau. (Jos 24:15; Ef 6:1-4) Papa i gat bikpela wok tru long helpim famili bilong em long sindaun bilong ol na long ol samting bilong spirit. Olsem wanem em inap mekim ol wok bilong em? Famili i mas wok gut wantaim na ol i mas makim gut taim bilong mekim ol wok bilong ol.—1 Ko 14:40.
MEKIM GUTPELA WOK BOS
3 Famili i stap olsem wanem long samting bilong spirit, em bikpela samting. Ol i mas mekim famili-stadi long olgeta wik, na ol tok bilong dispela stadi i mas stret long famili bambai i ken helpim gut famili. Na ol i mas mekim olsem tu taim ol i skelim teks long olgeta wan wan de. Sapos yumi lukim tok bilong Baibel long olgeta moningtaim, em wanpela gutpela samting tru bilong helpim yumi! Long olgeta de, sapos yumi tingim gut long bel ol tok bilong teks bilong de, dispela samting bai helpim yumi long “tingting tasol long . . . ol klinpela pasin na ol naispela samting na ol samting i gutpela tru.” (Fl 4:8) Olsem wanem? Yupela famili inap mekim moa yet ol dispela pasin?
4 Olgeta famili i mas mekim famili-stadi, tasol olgeta wan wan long famili i mas mekim stadi bilong ol yet tu. Gutpela sapos yumi olgeta i bihainim tok bilong Josua 1:8, em i tok: “Yu no ken lusim tingting long dispela buk bilong lo. Long san na long nait yu mas skul gut long olgeta lo. Na yu mas was gut na bihainim tru olgeta tok i stap long lo. Sapos yu mekim olsem, orait olgeta arapela samting yu mekim bai i kamap gutpela tasol.”
5 I hatwok long kamap long miting long taim stret. Famili olgeta i mas wok gut wantaim bambai ol i no kam bihaintaim. Papa i mas soim rot na helpim famili bilong em bambai narapela inap helpim narapela long redi hariap. Sapos ol i mekim olsem, bai famili olgeta i kam hariap long ol miting, paslain long taim bilong mekim singsing na beten.
6 I gat planti samting i laik bagarapim famili na bai ol i no i stap wanbel, olsem na papa i mas i go pas long mekim beten bilong famili. (2 Ti 3:1-5) Long Rom 12:12 Pol i tok yumi mas “beten long olgeta taim.” Sapos long olgeta taim famili i beten wantaim, dispela samting bai helpim ol long pas gut wantaim. Famili i mas beten wantaim, na olgeta wan wan long famili i mas mekim beten bilong ol yet tu.
REDI
7 Wanpela hap wok lotu bilong yumi, em yumi mas tokim ol narapela man long nem bilong Jehova. Sapos famili i mekim traim pasin bilong autim tok, dispela samting bai helpim ol long redi gut long mekim dispela wok. Wanpela gutpela samting yumi inap mekim wok long en, em buk Reasoning. Long pes 9-15 i gat sampela gutpela tok i stap em yumi inap mekim wok long en bilong kirapim tok wantaim man, na i stret wantaim Stori Bilong Dispela Mun. Papa bilong famili inap mekim sampela tok bilong helpim famili bilong em long mekim ol gutpela tok taim ol i kirapim tok wantaim man.
8 Olsem wanem? Wanpela o tupela insait long famili inap mekim wok painia? (1 Ko 16:9) Sapos famili i laik bai wanpela i mekim wok painia, famili olgeta i mas wok gut wantaim na skelim gut taim bilong mekim ol wok bilong ol. Planti famili i bin stretim sindaun bilong ol na bai ol i no holim planti samting em ol i mas lusim bikpela hap taim long lukautim, na ol i mekim gutpela wok long liklik samting ol i holim, olsem na ol i kisim bikpela amamas long lukim wanpela o tupela long famili bilong ol i mekim wok painia.
9 Tru, papa em i mas i go pas long wok bilong famili, na sapos i no gat papa, orait mama i mas mekim, tasol olgeta wan wan long famili i mas save, ol i gat wok long helpim famili long lotuim Jehova. Olgeta wan wan i mas tingim laik bilong narapela long famili, na dispela samting bai helpim ol long pas gut wantaim na i stap amamas.
[Ol Askim]
1, 2. (a) Bilong wanem famili i bikpela samting long ai bilong Jehova? (b) I gat wanem tok bilong helpim ol papa long 1 Korin 14:40? Josua 24:15? Efesus 6:1-4?
3, 4. (a) Sapos famili i lukim teks long olgeta de, olsem wanem dispela bai helpim famili? (b) Kaunim tok bilong Filipai 4:8. Wanem samting bai helpim famili long bihainim dispela tok? (c) Yumi olgeta wan wan inap mekim wanem bilong bihainim tok bilong Josua 1:8?
5, 6. (a) Papa i mas mekim wanem bambai olgeta long famili i kamap long miting long taim stret? (b) Papa i mas mekim wanem bambai em inap bihainim tok bilong Rom 12:12? Olgeta wan wan long famili i mas mekim wanem?
7-9. Olgeta wan wan long famili, olsem papa na mama na ol pikinini, ol i mas mekim wanem na bai famili i stap wanbel na i stap amamas?