Olsem Wanem Olgeta Long Famili i Ken Wok Wantaim—Long Mekim Wok Autim Tok
1 I gutpela tru long lukim man wantaim meri bilong em, ol papamama na ol pikinini, ol i wok wantaim long mekim wok autim tok na litimapim nem bilong Jehova long ai bilong ol man. (Sng 148:12, 13) Olgeta famili i mas bihainim gutpela sedyul bilong mekim wok autim tok long olgeta taim. Olsem wanem? Famili bilong yu i makim wanpela de stret long olgeta wik long mekim wok autim tok? Sapos olsem, olgeta bai save ol i mas redi long dispela na ol inap insait tru long wok autim tok.—Snd 21:5a.
2 Paslain long de bilong famili i autim tok wantaim, i gutpela sapos olgeta long famili i ken bung wantaim na redim ol tok yupela bai mekim taim yupela i autim tok. Sapos yupela i mekim traim ol dispela tok dispela bai helpim yupela long autim tok, na em inap helpim famili long wok gut wantaim. Em i gutpela tru taim olgeta long famili i wok wantaim long autim tok na olgeta i redi gut!
3 Wanpela wasman sekit i bin wok wantaim wanpela famili long mekim wok magasin. Taim em i autim tok long ol haus wantaim wanpela pikinini meri bilong ol, pikinini i askim em: “Bai yu wok wantaim mi i go inap wanem taim?” Nau em i tokim wasman sekit olsem bihain bai em i wok wantaim papa bilong em. Dispela i kamapim klia olsem em na papa bilong em i save amamas long wok wantaim long wok autim tok. Tru tumas, dispela famili i pas gut wantaim!
4 Ating long wanpela mun bilong yia, long sampela famili olgeta wantaim inap mekim wok painia haptaim. O ating wanpela tasol insait long famili inap mekim wok painia haptaim long olgeta taim o em inap insait long wok painia oltaim. Taim famili i stretim gut ol samting na wok gut wantaim, ating olgeta long famili inap mekim bikpela wok autim tok moa taim ol i wok long helpim wanpela bilong ol i mekim wok painia. Olsem bai famili inap kisim gutpela blesing long rot bilong ol gutpela ekspiriens na bikpela wok autim tok ol i mekim.—Mal 3:10.
5 Taim olgeta i insait tru long wok autim tok, dispela bai helpim famili long pas gut wantaim, na givim bel tru long mekim wok, na kamapim gutpela kaikai, na amamas long mekim wok bilong Jehova!—Skelim wantaim Filipai 2:1, 2.