Ol Man i Askim
Ol Witnes Bilong Jehova Ol i Wanpela Lotu Protestan?
Ol Witnes Bilong Jehova ol i no tingim ol yet olsem lain bilong ol lotu Protestan, nogat. Bilong wanem?
Ol man i bin kirapim lotu Protestan long ol yia bihain long 1500 long Yurop, long wanem, ol i laik kamapim sampela nupela senis insait long Misin Katolik. Namba wan taim ol i bin yusim dispela tok “Protestan,” em long taim ol i toktok long lain bilong Martin Luther long wanpela kibung (Diet of Speyer) long 1529. Kirap long dispela taim, dispela tok i makim olgeta lain husat i bihainim ol stiatok na ol nupela senis em dispela nupela lotu i kamapim. Wanpela dikseneri (Merriam-Webster’s Collegiate Dictionary, 11th Edition) i kamapim mining bilong dispela tok Protestan olsem, “wanpela memba bilong ol lotu em ol i tok Pop i no gat namba bilong bosim olgeta man, na ol i bihainim ol bilip bilong dispela nupela lotu olsem man i kamap stretpela man long rot bilong bilip tasol, na olgeta bilipman inap mekim wok pris, na Baibel tasol em i nambawan rot bilong kamapim tok i tru.”
Tru, ol Witnes Bilong Jehova i no tingim pop olsem man i gat namba long bosim olgeta man, na ol i givim bel tru long sapotim Baibel olsem em i nambawan buk tru, tasol long planti samting ol i stap narapela kain long ol lotu Protestan. Wanpela ensaiklopidia (The Encyclopedia of Religion) i stori long ol Witnes Bilong Jehova olsem ol i “narapela kain long ol narapela lain.” Orait yumi ken skelim tripela samting i mekim na ol i narapela kain.
Namba wan: Maski ol Protestan i sakim sampela lotu pasin bilong Misin Katolik, ol bikman bilong ol i holim yet sampela bilip bilong Katolik, olsem God Triwan, helpaia, na man i gat spirit i no save dai. Tasol ol Witnes Bilong Jehova i sakim ol dispela bilip, long wanem, ol dispela bilip i pait wantaim ol tok bilong Baibel, na i kirapim man long kisim tingting kranki long God.—Lukim pes 4-7 long dispela nius.
Namba tu: Lotu bilong ol Witnes Bilong Jehova i no bilong sapotim pasin bilong daunim wanpela lotu, nogat, wok bilong ol em bilong skulim stret ol man long God. Ol i strong long bihainim tok bilong Baibel, olsem: “Wokman bilong Bikpela i no ken tok pait na tok kros. Nogat. Em i mas mekim gutpela pasin long olgeta man. Sapos ol man i bikhet long em, em i mas daunim belhat na painim ol gutpela rot bilong skulim ol manmeri long ol pasin God i laikim. Em i mas wok isi na stretim tingting bilong ol man bilong sakim tok.” (2 Timoti 2:24, 25) Planti lotu i skulim ol man long ol tok we i no stret wantaim ol tok bilong Baibel, tasol ol Witnes Bilong Jehova i save kamapim klia ol dispela samting. Taim ol i mekim olsem, ol i no gat tingting long senisim ol pasin bilong ol narapela lotu. Tasol ol i laik helpim wan wan man husat i gat gutpela bel long kisim stretpela save long God na long Tok bilong em, em Baibel. (Kolosi 1:9, 10) Taim ol man i gat narapela bilip ol i no wanbel long tok bilong ol Witnes Bilong Jehova, ol Witnes i save abrusim pasin bilong mekim tok pait we i no gat as bilong en.—2 Timoti 2:23.
Namba tri: Ol lotu Protestan i bin bruk na kamap planti handet narapela narapela lotu, tasol ol Witnes Bilong Jehova ol i save stap wanbel wantaim olsem wanpela lain brata ol i stap long olgeta hap bilong graun. Na long sait bilong bilip, ol Witnes Bilong Jehova long 230 samting kantri ol i bihainim tok bilong aposel Pol na ol i stap “wanbel long ol toktok [ol] i mekim.” Ol i no bruk bruk nabaut, nogat. Ol i stap “wanlain tru long wankain tingting na wankain laik.” (1 Korin 1:10) Olgeta wantaim i wok strong long ‘holimpas dispela pasin bilong i stap wanbel, na dispela pasin em i olsem rop i pasim ol na ol i stap wanlain.’—Efesus 4:3.