Pas i Kam Long Saut Afrika

“Husat i Laik Stop Long Kain Hap Olsem?”

“PLES NOGUT​—HANSAPIM MAN NA WOK PAMUK,” em tok i stap long sain bot i stap arere long wanpela rot long kantri sait. Mipela i go long sait bilong rot na joinim ol narapela ka i stop i stap aninit long bikpela sain bot i makim rot bilong i go long wanpela naispela hotel na haus bilong pilai laki i stap daunbilo long rot. Mipela i lukim olkain ka i gat bikpela pe ol i spit i go abrusim mipela, na ol man insait long ka i kirap nogut long lukim mipela na i olsem ol i tok: ‘Husat i laik stop long kain hap olsem?’

Taim ka bilong mipela i stop, mipela i kam ausait na joinim ol manmeri husat i bilas gut na i sanap aninit long sedo bilong sain bot. Long grup bilong mipela i gat ol manmeri bilong kain kain skin na ples, em samting yu no inap lukim tumas long Saut Afrika. Mipela i bin lusim Johannesburg na ron inap 100 kilomita i go long hap not wes, na mipela i laik autim ol tok i tru bilong Baibel long ol manmeri i sindaun long ol dispela ples.

Mipela i mekim liklik bung na skelim wanpela tok bilong Baibel na stretim rot bilong i go autim tok long ol haus. Wanpela brata i mekim beten, na mipela i go bek long ol ka bilong mipela. Longwe long hapsait bilong ples daun i gat ol haus na ol pipia haus i stap nabaut. Ol haus i luk liklik tru taim yu skelim wantaim ol traipela hip bilong pipia graun ol i rausim long main bilong ain platinum. Maski i gat ol ston i dia tumas i stap insait long graun long dispela hap, pasin bilong i stap rabis i bikpela tru.

Mi na meri bilong mi, na tupela visita i kam long Jemani, mipela 4-pela i kirap autim tok long ol haus. Inap olsem 33 pesen bilong ol manmeri i sindaun long dispela hap i no gat wok mani, olsem na ol i no gat ol gutpela haus. Planti haus ol i wokim long kapa na ol krungut timba i stap olsem bun bilong haus, na ol i yusim ol bikpela nil wantaim lid bilong bia botol olsem het bilong en bilong pasim ol kapa.

Taim mipela i kamap long olgeta wan wan haus, mipela i sanap long geit na tok gude, na planti taim mama bilong haus i save kam bungim mipela. Ol manmeri mipela i toktok wantaim, ol i save amamas long harim tok mipela i autim na ol i mekim gutpela pasin long mipela. San i hatim kapa bilong ol haus na i mekim ol haus i hat nogut tru. Ol i save salim ol pikinini i go insait long haus bilong bringim ol sia i kam putim aninit long diwai, na ol i save singautim mipela i go sindaun long en.

Famili i bung na ol i sindaun antap long ol fom na boks samting. Na ol i singautim tu ol liklik pikinini long lusim pilai na kam sindaun na harim tok. Mipela i skelim sampela skripsa na askim ol pikinini i save go long skul long ritim ol tok i stap long ol buk na nius bilong mipela em Baibel i as bilong en. Klostu olgeta man mipela i bungim, ol i amamas long kisim ol buk na nius bilong mipela, na planti i askim mipela long kam bek lukim ol.

Long belo, mipela i malolo liklik na kaikai sanwis na kisim koldring samting paslain long mipela i go bek lukim ol manmeri mipela i bin bungim bipo. Pastaim mipela i go lukim Jimmy, em wanpela man Malawi husat i bin kam sindaun long dispela hap na i wok long wanpela bilong ol platinum main. Mipela i bin visitim Jimmy inap sampela mun. Oltaim em i save amamas long lukim mipela, na mipela i bin lusim sampela hap taim bilong stori wantaim em long ol tok bilong Baibel. Jimmy i maritim wanpela meri Setswana na em i gat tupela pikinini. Lastaim mipela i kam em i no bin stap long haus, olsem na mipela i laik tru long bungim em na save em i stap olsem wanem.

Taim mipela i draiv i go antap long haus bilong Jimmy, wantu mipela i ken luksave olsem sampela samting i no stret. Gaden bilong em i save stap klin, tasol nau ol samting i stap nabaut, gaden kon bilong em i dai, na ol kakaruk bilong em i no stap moa. Na ol i lokim dua bilong haus long wanpela traipela sen. Wanpela neiba i kam bilong save mipela i kam mekim wanem long hia. Mipela i askim em long Jimmy i stap we. Em i tokim mipela long samting mipela i kirap nogut long en: Jimmy i dai, na meri i kisim ol pikinini na i go bek long stap wantaim famili bilong em.

Long dispela hap i no stret long mekim planti askim tumas, tasol mipela i askim em long stori long wanem samting i kamap. Em i tokim mipela: “Em i sik, na bihain em i dai. Long nau i gat planti kain kain sik na planti man i wok long i dai.” Em i no kolim stret wanem sik, long wanem, ol man i no save toktok tumas long kain samting olsem, maski planti nupela matmat long ples matmat i soim olsem tok bilong dispela meri i tru. Mipela i stori wantaim em long kirap bek, na mipela i bel hevi wantaim na i go mekim narapela gobek.

Mipela i go long narapela ples na draiv i go long ol laspela haus i stap long hap we bikpela hip pipia bilong main i stap long en. Mipela i baut na kisim narapela rot long pinis bilong strit. Antap long ston i stap insait long gaden, ol i raitim tok olsem: “Taim man i no wokim disisen hariap, em i save westim bikpela haptaim.” David,a em man husat i bin raitim dispela tok, em i apim het bilong em baksait long ensin bilong olpela ka bilong em. San i kisim ai bilong em na em i no inap lukluk gut, tasol em i smail taim em i luksave long mipela na san i holim gol long ol tit bilong em na i lait tru. Em i klinim han bilong em na i kam bungim mipela.

Em i tok: “Gude, ol pren bilong mi! Longtaim mi no bin lukim yupela.” Mipela i amamas long bungim gen David. Em i tok sori olsem em i no inap stori longpela taim wantaim mipela, em i bin kisim wok long main na klostu nau em i mas go long wok. Taim mipela i toktok wantaim, oltaim David i wok long smail. Em i amamas wantaim na i tok: “Namba wan taim yupela i bin bungim mi, dispela i senisim tru i stap bilong mi! Mi no save bai mi stap we long nau, sapos yupela i no bin kam.”

Nau mipela i pilim amamas gen na mipela i lusim David na i go. Taim san i wok long i go daun, mipela i draiv i go bek long haus. Taim mipela i lukluk i go bek long ol ples daun, mipela i lukim san i go daun na das bilong ples i haitim lait bilong en, na mipela i tingting long olsem wanem ol manmeri long dispela hap bai harim gutnius. Mipela i pilim tru insait bilong dispela tok bilong Jisas olsem: “Planti kaikai tumas i mau pinis long gaden, tasol i no gat planti wokman i stap bilong kisim.”​—Luk 10:2.

[Futnot]

[Piksa Kredit Lain long pes 17]

Kind permission given by the South African Post Office