Husat i Wokim God?

Piksaim long tingting olsem wanpela papa i toktok wantaim pikinini man bilong en husat i gat 7-pela krismas. Em i tok: “Bipo tru, God i wokim graun na olgeta samting i stap long en, na em i wokim san, mun na ol sta.” Pikinini i harim dispela tok bilong papa na em i askim papa olsem: “Papa, husat i wokim God?”

Papa i bekim tok olsem: “I no gat man i wokim God. Em i save stap oltaim.” Dispela tok i bekim askim bilong pikinini. Tasol taim em i go bikpela, em bai tingim yet dispela askim. Ating i hatwok long em i bilip olsem i no gat man i bin wokim God. Em i save olsem i gat man i bin wokim yunives. Olsem na em i tingting, ‘Husat i wokim God?’

Baibel i bekim dispela askim olsem wanem? Bekim bilong papa i wankain long tok Baibel i mekim. Moses i tok: “Bikpela, . . . oltaim oltaim yu stap God, long bipo na long bihain tu. Olgeta maunten i no kamap yet, na yu no bin wokim olgeta samting bilong graun yet, tasol yu stap.” (Song 90:1, 2) Na tu, Aisaia i tok: “Ating yupela i no save, a? Ating yupela i no harim, a? Bikpela em i God bilong i stap oltaim oltaim”! (Aisaia 40:28) Dispela tok i wankain long pas Jut i raitim, em i tok God i stap “long nau na long olgeta taim bihain.”—Jut 25.

Ol dispela skripsa i stret wantaim tok Pol i mekim long God olsem em i “King bilong oltaim oltaim.” (1 Timoti 1:17) Dispela i makim olsem God i stap oltaim oltaim, na i nogat kirap na pinis bilong en. (Revelesen 1:8) Olsem na dispela i soim olsem em God i Gat Olgeta Strong.

Wai na i hatwok long kliagut olsem God i save stap oltaim? Long wanem, yumi save stap laip inap sampela yia tasol na bihain yumi dai. Tasol God i save stap oltaim oltaim na em i tingim wan tausen yia i olsem wanpela de tasol. (2 Pita 3:8) Tingim, grasopa i save stap laip klostu 50 de, tasol yumi ol man i save stap laip inap 70 o 80 yia. Olsem tasol, Baibel i tok Nambawan Bikpela Krieta bilong yumi i tingim ol man i olsem grasopa tasol. Na tu, pasin bilong God long skelim ol samting i winim tru save bilong yumi. (Aisaia 40:22; 55:8, 9) Olsem na i hatwok long kliagut olsem i no gat man i wokim Jehova.

Maski i hatwok long ol man i kliagut long dispela, yumi inap ting olsem i gat God husat i stap oltaim oltaim. Sapos i gat man i bin wokim God, orait em bai stap olsem Krieta. Tasol olsem Baibel i kamapim, Jehova i “bin wokim olgeta samting.” (Revelesen 4:11) Na tu, yumi save olsem bipo tru yunives i no bin stap. (Stat 1:1, 2) Olsem na husat i wokim yunives? I mas i gat Krieta i stap paslain na em i wokim yunives. Na em i stap paslain long fesbon Pikinini bilong em na ol ensel. (Jop 38:4, 7; Kolosi 1:15) Olsem na i no gat wanpela man i bin wokim God, long wanem, em wanpela i stap pastaim tru.

Yumi stap laip na ol samting i stap long yunives i kamapim klia olsem i gat God husat i save stap oltaim oltaim. I klia tru olsem dispela Man husat i wokim yunives na putim ol lo bilong bosim em i bin stap long pastaim tru. Em tasol inap givim laip long olgeta arapela samting.—Jop 33:4.