Krieta i Gat Pasin Laikim i Tingim Yumi

1. KRIETA BILONG YUMI I MEKIM SAN I KAM ANTAP

Yu inap piksaim laip long graun i no gat san lait? San i save givim eneji long ol diwai bilong kamapim ol lip, plaua, prut, nat, na ol sid. Na tu, em i save mekim ol rop bilong diwai i kisim wara long graun i go antap long ol lip na bihain i go long win olsem ol liklik wara.

Ti plantesen i gro gut long arere bilong maunten.

2. KRIETA BILONG YUMI I MEKIM REN I PUNDAUN

Ren em wanpela gutpela presen i kam long God we i mekim graun i kamapim kaikai yumi save kisim. God i save mekim ren i lusim skai na i kam daun na mekim planti gutpela kaikai i kamap na mekim bel bilong yumi i amamas.

Pisin i sanap long brens, em i traim long kisim beri i laik pundaun.

3. KRIETA BILONG YUMI I GIVIM KAIKAI NA KLOS

Planti papa i save tingting planti long hau ol bai kisim kaikai na klos em famili i nidim. Lukim tok Baibel i mekim: “Lukim gut ol pisin long skai, ol i no save planim sid o kisim kaikai na bungim long ol bakstua. Nogat. Papa bilong yupela long heven i save givim kaikai long ol. Tasol yupela i winim tru ol pisin.”—Matyu 6:25, 26.

“Kisim skul long ol plaua lili long bus i kamap olsem wanem. . . . Tasol mi tokim yupela, maski [King] Solomon i pasim klos bilong king, bilas bilong em i no winim ol dispela plaua. God i save bilasim ol plaua bilong bus, . . . Olsem tasol, God bai amamas moa long givim ol klos samting long yupela.”—Matyu 6:28-30.

God i givim kaikai na klos long yumi, olsem na yumi inap bilip tru olsem em bai givim tu ol narapela samting yumi nidim. Sapos yumi bihainim laik bilong God, em inap blesim wok yumi mekim bilong planim kaikai o em inap helpim yumi long painim wok mani so yumi ken baim ol samting yumi nidim.—Matyu 6:32, 33.

Taim yumi skelim san, ren, ol pisin, na ol plaua, tru tumas, i gat gutpela risen na yumi laikim God. Neks atikol bai stori long hau Krieta bilong yumi i bin toktok wantaim ol man.