TINHLAYO
1 Hiloko Yehovha a vulavula na Muxe emananga ya Sinayi,+ etendeni ra nhlengeletano,+ hi siku ro sungula ra n’hweti ya vumbirhi, hi lembe ra vumbirhi endzhaku ka loko va hume etikweni ra Egipta.+ A ku: 2 “Hlayani+ Vaisrayele hinkwavo hi ku ya hi mindyangu ya vona, hi ku ya hi mavito ya vakokwa wa vona, hi ku ya hi nhlayo ya mavito ya vavanuna hinkwavo. 3 Wena na Aroni mi fanele mi tsala nhlayo ya hinkwavo lava nga ni malembe ya 20 ku ya ehenhla,+ lava nga vaka masocha eIsrayele.
4 “Tekani wanuna un’we eka nyimba ha yin’we, loyi a nga ta va ndhuna ya xivongo xa ka vona.+ 5 Hi lawa mavito ya vavanuna lava u nga ta tirha na vona: eka nyimba ya Rhuveni, Elizuri+ n’wana wa Xidewuru; 6 eka nyimba ya Simiyoni, Xelumiyele+ n’wana wa Zurixadayi; 7 eka nyimba ya Yuda, Nasoni+ n’wana wa Aminadaba; 8 eka nyimba ya Isakara, Nethanele+ n’wana wa Suwara; 9 eka nyimba ya Zebuloni, Eliyabu+ n’wana wa Heloni; 10 eka vana va Yosefa: nyimba ya Efrayimi,+ Elixama n’wana wa Amihudi; eka nyimba ya Manase, Gamaliyele n’wana wa Pedasuru; 11 eka nyimba ya Benjamini, Abidana+ n’wana wa Gidiyoni; 12 eka nyimba ya Dani, Ahiyezere+ n’wana wa Amixadayi; 13 eka nyimba ya Axere, Pagiyele+ n’wana wa Okirani; 14 eka nyimba ya Gadi, Eliyasafa+ n’wana wa Duwele; 15 eka nyimba ya Neftali, Ahira+ n’wana wa Enana. 16 Lava hi lava hlawuriweke eka Vaisrayele. I tindhuna+ ta tinyimba ta vakokwa wa vona, tindhuna ta magidi eIsrayele.”+
17 Hiloko Muxe na Aroni va teka vavanuna lava, lava hlawuriweke hi Xikwembu. 18 Va hlengeleta Vaisrayele hinkwavo hi siku ro sungula ra n’hweti ya vumbirhi, leswaku va tsarisa mavito hi ku ya hi mindyangu ya vona, ku sukela eka lava nga ni malembe ya 20 ku ya ehenhla,+ 19 hilaha Yehovha a leriseke Muxe hakona. A va tsarisa emananga ya Sinayi.+
20 Vana va Rhuveni, vatukulu va mativula ya Israyele,+ va xaxametiwe hi ku ya hi mavito ni mindyangu ya vona. Vavanuna hinkwavo lava nga ni malembe ya 20 ku ya ehenhla lava ringaneleke ku va masocha, va hlayiwe ha un’weun’we, 21 naswona nhlayo ya lava tsarisiweke eka nyimba ya Rhuveni, a ku ri 46 500.
22 Vana va Simiyoni+ va xaxametiwe hi ku ya hi mavito ni mindyangu ya vona. Vavanuna hinkwavo lava nga ni malembe ya 20 ku ya ehenhla lava ringaneleke ku va masocha, va hlayiwe ha un’weun’we, 23 naswona nhlayo ya lava tsarisiweke eka nyimba ya Simiyoni, a ku ri 59 300.
24 Vana va Gadi+ va xaxametiwe hi ku ya hi mavito ni mindyangu ya vona. Ku hlayiwe vavanuna hinkwavo lava nga ni malembe ya 20 ku ya ehenhla lava ringaneleke ku va masocha, 25 naswona nhlayo ya lava tsarisiweke eka nyimba ya Gadi, a ku ri 45 650.
26 Vana va Yuda+ va xaxametiwe hi ku ya hi mavito ni mindyangu ya vona. Ku hlayiwe vavanuna hinkwavo lava nga ni malembe ya 20 ku ya ehenhla lava ringaneleke ku va masocha, 27 naswona nhlayo ya lava tsarisiweke eka nyimba ya Yuda, a ku ri 74 600.
28 Vana va Isakara+ va xaxametiwe hi ku ya hi mavito ni mindyangu ya vona. Ku hlayiwe vavanuna hinkwavo lava nga ni malembe ya 20 ku ya ehenhla lava ringaneleke ku va masocha, 29 naswona nhlayo ya lava tsarisiweke eka nyimba ya Isakara, a ku ri 54 400.
30 Vana va Zebuloni+ va xaxametiwe hi ku ya hi mavito ni mindyangu ya vona. Ku hlayiwe vavanuna hinkwavo lava nga ni malembe ya 20 ku ya ehenhla lava ringaneleke ku va masocha, 31 naswona nhlayo ya lava tsarisiweke eka nyimba ya Zebuloni, a ku ri 57 400.
32 Vatukulu va Yosefa lava a va ri vana va Efrayimi,+ va xaxametiwe hi ku ya hi mavito ni mindyangu ya vona. Ku hlayiwe vavanuna hinkwavo lava nga ni malembe ya 20 ku ya ehenhla lava ringaneleke ku va masocha, 33 naswona nhlayo ya lava tsarisiweke eka nyimba ya Efrayimi, a ku ri 40 500.
34 Vana va Manase+ va xaxametiwe hi ku ya hi mavito ni mindyangu ya vona. Ku hlayiwe vavanuna hinkwavo lava nga ni malembe ya 20 ku ya ehenhla lava ringaneleke ku va masocha, 35 naswona nhlayo ya lava tsarisiweke eka nyimba ya Manase, a ku ri 32 200.
36 Vana va Benjamini+ va xaxametiwe hi ku ya hi mavito ni mindyangu ya vona. Ku hlayiwe vavanuna hinkwavo lava nga ni malembe ya 20 ku ya ehenhla lava ringaneleke ku va masocha, 37 naswona nhlayo ya lava tsarisiweke eka nyimba ya Benjamini, a ku ri 35 400.
38 Vana va Dani+ va xaxametiwe hi ku ya hi mavito ni mindyangu ya vona. Ku hlayiwe vavanuna hinkwavo lava nga ni malembe ya 20 ku ya ehenhla lava ringaneleke ku va masocha, 39 naswona nhlayo ya lava tsarisiweke eka nyimba ya Dani, a ku ri 62 700.
40 Vana va Axere+ va xaxametiwe hi ku ya hi mavito ni mindyangu ya vona. Ku hlayiwe vavanuna hinkwavo lava nga ni malembe ya 20 ku ya ehenhla lava ringaneleke ku va masocha, 41 naswona nhlayo ya lava tsarisiweke eka nyimba ya Axere, a ku ri 41 500.
42 Vana va Neftali+ va xaxametiwe hi ku ya hi mavito ni mindyangu ya vona. Ku hlayiwe vavanuna hinkwavo lava nga ni malembe ya 20 ku ya ehenhla lava ringaneleke ku va masocha, 43 naswona nhlayo ya lava tsarisiweke eka nyimba ya Neftali, a ku ri 53 400.
44 Hinkwavo ka vona va tsarisiwe hi Muxe na Aroni ni tindhuna ta 12 ta Israyele, ndhuna ha yin’we yi yimela nyimba ya yona. 45 Vaisrayele hinkwavo lava nga ni malembe ya 20 ku ya ehenhla lava ringaneleke ku va masocha, va tsarisiwe hi ku ya hi mindyangu ya vona, 46 naswona nhlayo ya lava tsarisiweke hinkwavo a ku ri 603 550.+
47 Kambe Valevhi+ a va tsarisiwanga hi ku ya hi tinyimba ta vatata wa vona.+ 48 Hikwalaho Yehovha a byela Muxe a ku: 49 “Nyimba ya Levhi hi yona ntsena u nga fanelangiki u yi tsarisa naswona a wu fanelanga u katsa nhlayo ya vona ni Vaisrayele lavan’wana.+ 50 U fanele u hlawula Valevhi leswaku va hlayisa tabernakela ya Vumbhoni+ ni swibya hinkwaswo leswi nga eka yona ni swilo hinkwaswo leswi nga eka yona.+ Va ta rhwala tabernakela ni swibya swa yona hinkwaswo+ naswona va ta tirhela eka yona,+ va ta dzima mixaxa ya vona va rhendzela tabernakela.+ 51 Nkarhi hinkwawo loko tabernakela yi fanele yi susiwa, Valevhi hi vona va faneleke va yi hahlula;+ loko tabernakela yi fanele yi yimisiwa, Valevhi va fanele va yi yimisa; munhu un’wana ni un’wana la nga ta yi tshinelela a nga ri muprista,* u fanele a dlayiwa.+
52 “Muisrayele un’wana ni un’wana u fanele a dzima tende rakwe enxaxeni lowu a averiweke wona, wanuna un’wana ni un’wana hi ku ya hi ntlawa wa ka vona wa tinyimba tinharhu,+ hi ku ya hi mavuthu ya vona. 53 Valevhi va fanele va dzima mixaxa va rhendzela tabernakela ya Vumbhoni, leswaku ndzi nga hlundzukeli Vaisrayele;+ naswona Valevhi va fanele va hlayisa ni ku khathalela tabernakela ya Vumbhoni.”+
54 Vaisrayele va endle hinkwaswo leswi Yehovha a swi leriseke Muxe. Va endle tano.
2 Yehovha a vulavula na Muxe na Aroni a ku: 2 “Vaisrayele va fanele va dzima mixaxa laha ntlawa wa vona wa tinyimba tinharhu+ wu averiweke kona, ekusuhi ni mfungho* wa mindyangu ya vona. Mixaxa ya vona yi fanele yi langutana ni tende ra nhlengeletano, yi ri rhendzela.
3 “Lava nga ta dzima mixaxa hi le vuxeni, ku ta va ntlawa wa tinyimba tinharhu leti rhangeriwaka hi Yuda hi ku ya hi mavuthu ya tona; ndhuna ya vana va Yuda i Nasoni+ n’wana wa Aminadaba. 4 Vuthu rakwe ri ni vanhu va 74 600.+ 5 Nyimba ya Isakara yi ta dzima mixaxa etlhelo ka yena; ndhuna ya vana va Isakara i Nethanele+ n’wana wa Suwara. 6 Vuthu rakwe ri ni vanhu va 54 400.+ 7 Kutani ku landzela nyimba ya Zebuloni; ndhuna ya vana va Zebuloni i Eliyabu+ n’wana wa Heloni. 8 Lava tsarisiweke evuthwini rakwe a va ri 57 400.+
9 “Hinkwavo lava tsarisiweke eka mavuthu lama rhangeriwaka hi Yuda i 186 400. Va ta va vo sungula ku suka.+
10 “Ntlawa wa tinyimba tinharhu lowu rhangeriwaka hi Rhuveni+ wu ta dzima mixaxa edzongeni hi ku ya hi mavuthu ya wona; ndhuna ya vana va Rhuveni i Elizuri+ n’wana wa Xidewuru. 11 Lava tsarisiweke evuthwini rakwe a va ri 46 500.+ 12 Lava nga ta dzima mixaxa etlhelo ka yena ku ta va nyimba ya Simiyoni; ndhuna ya vana va Simiyoni i Xelumiyele+ n’wana wa Zurixadayi. 13 Lava tsarisiweke evuthwini rakwe a va ri 59 300.+ 14 Ekusuhi na vona ku ta va ni nyimba ya Gadi; ndhuna ya vana va Gadi i Eliyasafa+ n’wana wa Rhuwele. 15 Lava tsarisiweke evuthwini rakwe a va ri 45 650.+
16 “Hinkwavo lava tsarisiweke eka mavuthu lama rhangeriwaka hi Rhuveni i 151 450. Va ta va va vumbirhi ku suka.+
17 “Loko ku rhurhisiwa tende ra nhlengeletano,+ nxaxa wa Valevhi wu fanele wu va exikarhi ka mixaxa leyin’wana.
“Va fanele ku famba hi ndlela leyi va dzimaka mixaxa ha yona,+ nyimba ha yin’we yi va laha yi averiweke kona, hi ku ya hi mintlawa ya vona ya tinyimba tinharhu.
18 “Ntlawa wa tinyimba tinharhu lowu rhangeriwaka hi Efrayimi wu ta dzima mixaxa evupeladyambu hi ku ya hi mavuthu ya wona; ndhuna ya vana va Efrayimi i Elixama+ n’wana wa Amihudi. 19 Lava tsarisiweke evuthwini rakwe a va ri 40 500.+ 20 Ekusuhi na yena ku ta va ni nyimba ya Manase;+ ndhuna ya vana va Manase i Gamaliyele+ n’wana wa Pedasuru. 21 Lava tsarisiweke evuthwini rakwe a va ri 32 200.+ 22 Kutani ku landzela nyimba ya Benjamini; ndhuna ya vana va Benjamini i Abidana+ n’wana wa Gidiyoni. 23 Lava tsarisiweke evuthwini rakwe a va ri 35 400.+
24 “Hinkwavo lava tsarisiweke eka mavuthu lama rhangeriwaka hi Efrayimi i 108 100, va ta va va vunharhu ku suka.+
25 “Ntlawa wa tinyimba tinharhu lowu rhangeriwaka hi Dani wu ta dzima mixaxa en’walungwini hi ku ya hi mavuthu ya wona; ndhuna ya vana va Dani i Ahiyezere+ n’wana wa Amixadayi. 26 Lava tsarisiweke evuthwini rakwe a va ri 62 700.+ 27 Lava nga ta dzima mixaxa ekusuhi na yena i nyimba ya Axere; ndhuna ya vana va Axere i Pagiyele+ n’wana wa Okirani. 28 Lava tsarisiweke evuthwini rakwe a va ri 41 500.+ 29 Kutani ku landzela nyimba ya Neftali; ndhuna ya vana va Neftali i Ahira+ n’wana wa Enana. 30 Lava tsarisiweke evuthwini rakwe a va ri 53 400.+
31 “Hinkwavo lava tsarisiweke eka mavuthu lama rhangeriwaka hi Dani i 157 600. Va ta va vo hetelela ku suka,+ hi ku ya hi mintlawa ya vona ya tinyimba tinharhu.”
32 Lava i Vaisrayele lava tsarisiweke hi ku ya hi mindyangu ya vona; nhlayo ya hinkwavo lava nga emixaxeni lava tsariseriweke nyimpi a ku ri 603 550.+ 33 Kambe Valevhi a va tsarisiwanga+ eka nhlayo ya Vaisrayele lava tsarisiweke,+ hilaha Yehovha a leriseke Muxe hakona. 34 Vaisrayele va endle hinkwaswo leswi Yehovha a swi leriseke Muxe. Yoleyo i ndlela leyi a va dzima mixaxa ha yona hi ku ya hi mintlawa ya vona ya tinyimba tinharhu,+ ni ndlela leyi a va hahlula mixaxa ya vona ha yona,+ ndyangu ha wun’we a wu endla tano hi ku landza mindyangu ya swivongo swa yona.
3 Lava a ku ri rixaka ra Aroni na Muxe hi nkarhi lowu Yehovha a vulavuleke na Muxe ha wona eNtshaveni ya Sinayi.+ 2 Lawa i mavito ya vana va Aroni: Mativula i Nadabu, ku landzela Abihu,+ Eliyazara+ na Ithamara.+ 3 Lawa i mavito ya vana va Aroni, lava cheriweke mafurha, va vekiwa ku va vaprista.+ 4 Hambiswiritano, Nadabu na Abihu va fe emahlweni ka Yehovha endzhaku ka loko va endle gandzelo* leri nga fambisaniki ni nawu wa Yehovha+ emananga ya Sinayi, naswona va fe va nga ri na vana. Kambe Eliyazara+ na Ithamara+ va ye emahlweni va va vaprista na Aroni tata wa vona.
5 Kutani Yehovha a byela Muxe a ku: 6 “Yisa nyimba ya Levhi+ eka muprista Aroni, leswaku yi ta n’wi pfuna hi mitirho.+ 7 Va fanele va n’wi pfuna hi mitirho yakwe ni mitirho ya hinkwavo lava tirhaka etendeni ra nhlengeletano, hi ku endla mitirho leyi endliwaka etabernakeleni. 8 Va fanele va hlayisa swibya+ hinkwaswo leswi nga etendeni ra nhlengeletano ni ku endlela Vaisrayele mitirho leyi va faneleke va endleriwa yona etabernakeleni.+ 9 U fanele u yisa Valevhi eka Aroni ni vana vakwe. A va ve va Aroni leswaku va ta n’wi pfuna, va huma eka Vaisrayele.+ 10 U fanele u hlawula Aroni ni vana vakwe leswaku va endla mitirho leyi endliwaka hi vaprista,+ loyi a nga ta tshinela, kambe a nga ri muprista* u fanele a dlayiwa.”+
11 Yehovha a ya emahlweni a vulavula na Muxe a ku: 12 “Loko ku ri mina, ndzi hlawula Valevhi exikarhi ka Vaisrayele ematshan’weni ya mativula hinkwawo ya Vaisrayele,+ Valevhi va ta va va mina. 13 Hikuva mativula hinkwawo i ya mina.+ Hi siku leri ndzi beke mativula hinkwawo etikweni ra Egipta,+ ndzi tihlawulekisele mativula hinkwawo eIsrayele ku sukela eka munhu ku ya eka swiharhi.+ Ma ta va ya mina. Hi mina Yehovha.”
14 Yehovha a ya emahlweni a vulavula na Muxe emananga ya Sinayi,+ a ku: 15 “Tsarisa vana va Levhi hi ku ya hi swivongo ni mindyangu ya vona. U fanele u tsarisa vaxinuna hinkwavo lava sukelaka eka n’hweti yin’we ku ya ehenhla.”+ 16 Xisweswo Muxe a va tsarisa hilaha Yehovha a n’wi leriseke hakona. 17 Hi lawa mavito ya vana va Levhi: Gerixoni, Kohata na Merari.+
18 Hi lawa mavito ya vana va Gerixoni ni mindyangu ya vona: Libni na Ximeyi.+
19 Vana va Kohata ni mindyangu ya vona a ku ri Amirama, Izihara, Hebroni na Uziyele.+
20 Vana va Merari ni mindyangu ya vona a ku ri Maheli+ na Muxi.+
Leyi a ku ri mindyangu ya Valevhi hi ku ya hi swivongo swa vona.
21 Eka Gerixoni ku hume ndyangu wa Valibni+ ni ndyangu wa Vaximeyi. Leyi a ku ri mindyangu ya Vagerixoni. 22 Nhlayo ya vaxinuna lava tsarisiweke lava sukelaka eka n’hweti yin’we ku ya ehenhla a ku ri 7 500.+ 23 Mindyangu ya Vagerixoni a yi dzime mixaxa endzhaku ka tabernakela+ hi le vupeladyambu. 24 Ndhuna ya ndyangu wa Vagerixoni a ku ri Eliyasafa n’wana wa Layele. 25 Ntirho wa vana va Gerixoni+ etendeni ra nhlengeletano a ku ri ku khathalela tabernakela+ ni tende+ ni swifunengeto swa yona ku katsa ni khetheni+ ra le nyangweni ya tende ra nhlengeletano, 26 malapi lama vambiweke+ ya xivava* xa tabernakela, khetheni+ leri pfalaka nyangwa ya xivava leri tabernakela ni altari a swi ri eka rona, tintambhu ta yona ni mitirho hinkwayo leyi fambisanaka na swona.
27 Eka Kohata ku hume ndyangu wa Vaamirama, wa Vaizihara, wa Vahebroni ni wa Vauziyele. Leyi a ku ri mindyangu ya Vakohata.+ 28 Nhlayo ya vaxinuna lava tsarisiweke lava sukelaka eka n’hweti yin’we ku ya ehenhla a ku ri 8 600; a va khathalela ndhawu yo kwetsima.+ 29 Mindyangu ya vana va Kohata a yi dzime mixaxa hi le tlhelo ra le dzongeni ra tabernakela.+ 30 Ndhuna ya mindyangu ya Vakohata a ku ri Elizafani n’wana wa Uziyele.+ 31 Ntirho wa vona a ku ri ku khathalela Areka,+ tafula,+ xo tlhoma timboni,+ tialtari,+ swibya+ leswi a swi tirhisiwa endhawini yo kwetsima, khetheni+ ni mitirho hinkwayo leyi fambisanaka na swona.+
32 Ndhunankulu ya Valevhi a ku ri Eliyazara+ n’wana wa muprista Aroni, loyi a ri murhangeri wa lava a va tirha endhawini yo kwetsima.
33 Eka Merari ku hume ndyangu wa Vamaheli ni ndyangu wa Vamuxi. Leyi a ku ri mindyangu ya Merari.+ 34 Nhlayo ya vaxinuna hinkwavo lava tsarisiweke lava sukelaka eka n’hweti yin’we ku ya ehenhla a ku ri 6 200.+ 35 Ndhuna ya mindyangu ya Merari a ku ri Suriyele n’wana wa Abihayili. A va dzime mixaxa hi le n’walungwini wa tabernakela.+ 36 Ntirho wa vana va Merari a ku ri ku khathalela tifureme+ ta tabernakela, tinsimbhi,+ tiphuphu,+ swo tlhoma tiphuphu, swibya+ hinkwaswo leswi nga eka yona ni mitirho hinkwayo leyi fambisanaka na swona,+ 37 ku katsa ni tiphuphu hinkwato ta xivava ni swo tlhoma tiphuphu swa tona,+ timhingu ni tintambhu ta yona.
38 Muxe na Aroni ni vana vakwe a va dzime mixaxa ekusuhi ni tabernakela hi le vuxeni, emahlweni ka tende ra nhlengeletano hi le vuxeni. A va khathalela ndhawu yo kwetsima, lowu a ku ri ntirho wa vona lowu a va wu endlela Vaisrayele. Loyi a a ta tshinela ekusuhi a nga ri muprista* a a ta dlayiwa.+
39 Valevhi hinkwavo lava sukelaka eka n’hweti yin’we ku ya ehenhla, lava Muxe na Aroni va va tsariseke hi ku ya hi mindyangu ya vona hilaha Yehovha a va leriseke hakona a va ri 22 000.
40 Kutani Yehovha a byela Muxe a ku: “Tsarisa mativula hinkwawo ya vaxinuna ya Vaisrayele, lava sukelaka eka n’hweti yin’we ku ya ehenhla,+ va hlaye u tllhela u tsala mavito ya vona. 41 U fanele u ndzi hlawulela Valevhi, ematshan’weni ya mativula hinkwawo ya Vaisrayele,+ hi mina Yehovha, u tlhela u ndzi hlawulela swifuwo swa Valevhi ematshan’weni ya mativula ya swifuwo hinkwaswo swa Vaisrayele.”+ 42 Hiloko Muxe a tsarisa mativula hinkwawo ya Vaisrayele, hilaha Yehovha a n’wi leriseke hakona. 43 Mativula hinkwawo ya xinuna lama tsarisiweke hi mavito, ku sukela eka loyi a nga ni n’hweti yin’we ku ya ehenhla, a ma ri 22 273.
44 Yehovha a ya emahlweni a vulavula na Muxe a ku: 45 “U fanele u hlawula Valevhi, ematshan’weni ya mativula ya Vaisrayele, u tlhela u hlawula swifuwo swa Valevhi ematshan’weni ya mativula ya swifuwo swa Vaisrayele, Valevhi va fanele va va va mina. Hi mina Yehovha. 46 Leswaku u kutsula+ mativula ya Vaisrayele ya 273 lama tlulaka Valevhi,+ 47 u ta humesela munhu ha un’we silivhere leyi nga tigiramu ta kwalomu ka 57*+ hi ku ya hi mpimo wa ndhawu yo kwetsima.* Xikele yin’we i tigera* ta 20.+ 48 U fanele u nyika Aroni ni vana vakwe mali leyi, leswaku yi va hakelo ya nkutsulo ya lava taleke ku va tlula.” 49 Kutani Muxe a teka mali ya nkutsulo leswaku yi va hakelo yo kutsula lava a va tele ku tlula Valevhi. 50 U teke mali eka mativula ya Vaisrayele, swiphemu swa silivhere swa 1 365,* hi ku ya hi mpimo wa ndhawu yo kwetsima. 51 Hiloko Muxe a nyika Aroni ni vana vakwe mali ya nkutsulo hi ku landza rito ra Yehovha, hilaha Yehovha a leriseke Muxe hakona.
4 Yehovha a vulavula na Muxe na Aroni a ku: 2 “Mi fanele mi hlaya vana va Kohata+ exikarhi ka vana va Levhi, hi ku ya hi mindyangu ni swivongo swa vona, 3 hinkwavo lava nga eka ntlawa lowu tirhaka etendeni ra nhlengeletano+ lava nga ni malembe lama sukelaka eka 30+ ku ya eka 50.+
4 “Lowu i ntirho wa vana va Kohata etendeni ra nhlengeletano.+ I ntirho wo kwetsima ngopfu: 5 Aroni ni vana vakwe va ta ta loko ku rhurhiwa, va hawula khetheni+ kutani va funengeta areka+ ya Vumbhoni hi rona. 6 Va ta yi funengeta hi dzovo ra ntini,* ni hi lapi ra wasi, kutani va tlhoma tinhonga to yi tlakula ha tona.+
7 “Va ta tlhela va andlala lapi ra wasi ehenhla ka tafula ra xinkwa xo kwetsima,+ kutani va tlhandleka tindyelo, swinwelo, swindhichana ni swo ka ha swona loko ku endliwa gandzelo ra swakunwa;+ xinkwa xo kwetsima lexi nyikeriwaka siku ni siku+ xi fanele xi sala etafuleni. 8 Va ta swi funengeta hi lapi ro tshwuka ni dzovo ra ntini,* kutani va ri tlhoma tinhonga to ri rhwala ha tona.+ 9 Kutani va ta teka lapi ra wasi va funengeta xo tlhoma timboni+ ni timboni ta xona,+ ni swo khoma ntambhu ya rivoni, swo khoma ndzilo+ ni swibya hinkwaswo swo chela mafurha lawa ma cheriwaka eka rivoni. 10 Va ta swi phutsela ni swibya swa swona hi dzovo ra ntini,* va swi tlhandleka eka nhonga leyi swi rhwariwaka ha yona. 11 Va ta funengeta altari ya nsuku+ hi lapi ra wasi, va yi phutsela hi dzovo ra ntini,* va tlhoma tinhonga to yi rhwala ha tona.+ 12 Endzhaku ka sweswo, va ta teka swibya+ hinkwaswo leswi va tirhaka ha swona endhawini yo kwetsima, va swi veka elapini ra wasi va swi funengeta hi dzovo ra ntini,* ivi va swi tlhandleka eka nhonga leyi swi rhwariwaka ha yona.
13 “Va fanele va susa nkuma* ealtarini,+ va yi funengeta hi lapi leri endliweke hi voya bya phephulu.* 14 Va ta veka nhundzu leyi va tirhaka ha yona ealtarini endzeni ka yona: swo khoma ndzilo, tiforoko, mafoxolo, swindhichana ni swibya hinkwaswo leswi tirhisiwaka ealtarini;+ ivi va yi funengeta hi dzovo ra ntini,* kutani va tlhoma tinhonga ta yona to yi rhwala.+
15 “Aroni ni vana vakwe va fanele va rhanga va heta ku funengeta ndhawu yo kwetsima+ ni nhundzu ya yona hinkwayo ku nga si rhurhiwa. Loko va hetile, vana va Kohata va ta ta, va fika va swi rhwala,+ kambe a va fanelanga va khumba ndhawu yo kwetsima hikuva va ta fa.+ Lowu hi wona ntirho* wa vana va Kohata etendeni ra nhlengeletano.
16 “Eliyazara+ n’wana wa muprista Aroni u ta va mulanguteri wa mafurha ya rivoni,+ murhi wo nun’hwela,+ gandzelo ra mavele leri endliwaka siku ni siku ni mafurha yo kwetsima.*+ U ta langutela tabernakela hinkwayo ni hinkwaswo leswi nga eka yona, ku katsa ni ndhawu yo kwetsima ni nhundzu ya yona.”
17 Yehovha a ya emahlweni a vulavula na Muxe na Aroni a ku: 18 “Mi nga tshiki nyimba ya mindyangu ya Vakohata+ yi herisiwa exikarhi ka Valevhi. 19 Kambe va endleleni leswi, leswaku va nga fi hambiloko va tshinelela swilo swo kwetsima ngopfu.+ Aroni ni vana vakwe va ta nghena, va avela un’wana ni un’wana wa vona ntirho ni leswi a faneleke a swi rhwala. 20 Va nga tshuki va nghena va vona swilo swo kwetsima hambi ko va swa xinkarhana, hikuva va ta fa.”+
21 Yehovha a vulavula na Muxe a ku: 22 “U fanele u hlaya vana va Gerixoni,+ hi ku ya hi swivongo ni mindyangu ya vona. 23 U ta tsala hinkwavo lava nga eka ntlawa lowu tirhaka etendeni ra nhlengeletano lava nga ni malembe lama sukelaka eka 30 ku ya eka 50. 24 Mindyangu ya Vagerixoni yi ta averiwa ku rhwala ni ku endla ntirho lowu:+ 25 Va ta rhwala malapi ya tabernakela,+ tende ra nhlengeletano, makhetheni ya rona ni dzovo ra ntini leri funengetaka ehenhla,+ khetheni leri pfalaka nyangwa ya tende ra nhlengeletano,+ 26 malapi ya xivava,*+ khetheni leri a ri pfala nyangwa ya xivava+ lexi tabernakela ni altari swi nga eka rona, tintambhu ta tende ni nhundzu ya kona hinkwayo ni hinkwaswo leswi tirhisiwaka etabernakeleni. Lowu wu ta va ntirho wa vona. 27 Mitirho hinkwayo ni mindzhwalo ya Vagerixoni+ swi fanele swi languteriwa hi Aroni ni vana vakwe; mi ta va avela mindzhwalo leyi hinkwayo, ku ta va vutihlamuleri bya vona. 28 Lowu i ntirho lowu nga ta endliwa hi mindyangu ya Vagerixoni etendeni ra nhlengeletano,+ ntirho wa vona wu ta languteriwa hi Ithamara+ n’wana wa muprista Aroni.
29 “Loko ku ri vana va Merari+ u ta va tsarisa hi ku ya hi swivongo ni mindyangu ya vona. 30 Tsala hinkwavo lava nga eka ntlawa lowu tirhaka etendeni ra nhlengeletano lava nga ni malembe lama sukelaka eka 30 ku ya eka 50. 31 Va ta va ni vutihlamuleri byo rhwala leswi landzelaka+ leswi tirhisiwaka etendeni ra nhlengeletano: tifureme+ ta tabernakela, tinsimbhi,+ tiphuphu,+ swo tlhoma tiphuphu;+ 32 tiphuphu+ to biyela xivava, swo tlhoma tiphuphu,+ timhingu ta tende,+ tintambhu ta tende ni switirhisiwa hinkwaswo leswi tirhisiwaka ku katsa ni mitirho ya kona. Un’wana ni un’wana wa vona u ta n’wi komba leswi a faneleke a swi rhwala hi ku ya hi mavito ya vona. 33 Lowu i ntirho lowu faneleke wu endliwa hi mindyangu ya vana va Merari+ etendeni ra nhlengeletano, wu ta languteriwa hi Ithamara n’wana wa muprista Aroni.”+
34 Hiloko Muxe na Aroni ni tindhuna+ va tsarisa Vakohata+ hi ku ya hi mindyangu ni swivongo swa vona, 35 hinkwavo lava a va ri eka ntlawa lowu tirhaka etendeni ra nhlengeletano lava nga ni malembe lama sukelaka eka 30 ku ya eka 50.+ 36 Nhlayo ya lava tsarisiweke hi mindyangu ya vona a ku ri 2 750.+ 37 Lava hi vona lava tsarisiweke eka mindyangu ya Vakohata, ku nga hinkwavo lava a va tirha etendeni ra nhlengeletano. Muxe na Aroni va va tsarisile hi ku landza xileriso xa Yehovha lexi a xi byeleke Muxe.+
38 Vana va Gerixoni+ va tsarisiwe hi ku ya hi mindyangu ni swivongo swa vona, 39 hinkwavo lava a va ri eka ntlawa lowu tirhaka etendeni ra nhlengeletano lava nga ni malembe lama sukelaka eka 30 ku ya eka 50. 40 Nhlayo ya lava tsarisiweke hi mindyangu ni swivongo swa vona a ku ri 2 630.+ 41 Lava hi vona lava tsarisiweke eka mindyangu ya vana va Gerixoni, hinkwavo lava a va tirha etendeni ra nhlengeletano. Muxe na Aroni va va tsarise hi ku landza xileriso xa Yehovha.+
42 Vana va Merari va tsarisiwe hi ku ya hi mindyangu ni swivongo swa vona, 43 hinkwavo lava a va ri eka ntlawa lowu tirhaka etendeni ra nhlengeletano lava nga ni malembe lama sukelaka eka 30 ku ya eka 50.+ 44 Nhlayo ya lava tsarisiweke hi mindyangu ya vona a ku ri 3 200.+ 45 Lava hi vona lava tsarisiweke eka mindyangu ya vana va Merari, lava Muxe na Aroni va va tsariseke hi ku landza xileriso xa Yehovha lexi a xi byeleke Muxe.+
46 Muxe na Aroni ni tindhuna ta Vaisrayele va tsarise Valevhi lava hinkwavo hi ku ya hi mindyangu ni swivongo swa vona; 47 a va ri ni malembe lama sukelaka eka 30 ku ya eka 50 naswona hinkwavo a va averiwe ku tirha ni ku rhwala mindzhwalo ya tende ra nhlengeletano.+ 48 Nhlayo ya lava tsarisiweke a ku ri 8 580.+ 49 Va tsarisiwe hi ku landza xileriso xa Yehovha lexi a xi byeleke Muxe, un’wana ni un’wana a a nyikiwa ntirho ni ndzhwalo wakwe; va tsarisiwe hilaha Yehovha a leriseke Muxe hakona.
5 Yehovha a ya emahlweni a vulavula na Muxe a ku: 2 “Lerisa Vaisrayele leswaku va n’wi humesela ehandle ka nxaxa munhu un’wana ni un’wana la nga ni nhlokonho+ ni un’wana ni un’wana loyi ku humaka thyaka eswirhweni swakwe swa rimbewu+ ni un’wana ni un’wana la nga basangiki hikwalaho ko khumba ntsumbu.+ 3 Mi fanele mi va humesela ehandle hambi i waxinuna kumbe i waxisati. Mi fanele mi va humesa emixaxeni leswaku va nga thyakisi+ mixaxa ya vanhu lava ndzi tshamaka exikarhi ka vona.”+ 4 Hikwalaho Vaisrayele va endla tano, va va humesela ehandle ka nxaxa. Va endle hilaha Yehovha a byeleke Muxe hakona.
5 Yehovha a ya emahlweni a vulavula na Muxe a ku: 6 “Byela Vaisrayele u ku, ‘Loko wanuna kumbe wansati o tshuka a endla xidyoho kumbe a nga tshembeki eka Yehovha, u ni nandzu.+ 7 U* fanele a* tivula+ xidyoho lexi a* xi endleke, a tlhela a humesa mali hinkwayo yo riha nandzu wakwe naswona u fanele a engetela 20 wa tiphesente eka mali yoleyo;+ u ta yi nyika loyi a n’wi dyoheleke. 8 Kambe loko loyi a n’wi dyoheleke a nga ri na xaka leri nga ta nyikiwa mali yo riha nandzu, mali yoleyo yi fanele yi yisiwa eka Yehovha, yi ta va ya muprista, handle ka khuna ra ku kombela ku rivaleriwa leri muprista a nga ta n’wi kombelela ku rivaleriwa ha rona.+
9 “‘Swilo hinkwaswo swo kwetsima+ leswi Vaisrayele va nga ta swi nyikela eka muprista swi ta va swa yena.+ 10 Lava nga ni swilo swo kwetsima swi ta tshama swi ri swa vona. Loyi a nga ta nyika muprista swo karhi, swi ta va swa muprista yoloye.’”
11 Yehovha a ya emahlweni a vulavula na Muxe a ku: 12 “Byela Vaisrayele u ku, ‘Leswi hi leswi faneleke swi endliwa loko nsati wa munhu o ka a nga tshembeki kutani a n’wi dyohela, 13 hi ku etlela ni wanuna un’wana,+ kambe nuna wakwe a nga swi tivi naswona swi nga tiviwi hi munhu, a tinyamisa kambe ku nga ri na mbhoni emhakeni leyi naswona a nga si tshama a kumiwa: 14 Loko nuna wakwe a va ni vukwele a ehleketelela nsati wakwe, ku ri hileswaku nsati wakwe u dyohile kumbe wanuna o va ni vukwele a ehleketelela nsati wakwe, ku ri hileswaku nsati wakwe a nga dyohanga nchumu, 15 wanuna u fanele a yisa nsati wakwe eka muprista ku katsa ni gandzelo ra yena ni mapa ya maxalana lama ringanaka ni omere* yin’we. A nga fanelanga a chela mafurha kumbe murhi wa risuna eka swona, hikuva i gandzelo ra mavele ra vukwele, gandzelo ra mavele ro tsundzuxa munhu xihoxo.
16 “‘Muprista u ta n’wi yimisa emahlweni ka Yehovha.+ 17 Muprista u ta ka mati yo kwetsima hi khuwana, a ma pfanganisa ni ritshuri leri nga laha ku nga ni tabernakela. 18 U ta yimisa wansati emahlweni ka Yehovha kutani a tshunxa misisi ya wansati yoloye, a veka gandzelo ra mavele ra xitsundzuxo eswandleni swakwe, ku nga gandzelo ra mavele ra vukwele+ naswona muprista u ta khoma mati yo bava lama vangaka ndzhukano.+
19 “‘Kutani muprista u ta hlambanyisa wansati a ku: “Loko ku ri hileswaku a wu etlelanga ni wanuna un’wana ku sukela loko u tekane ni nuna wa wena,+ naswona u tshembekile a wu dyohanga nchumu, mati lawa lama vangaka ndzhukano a ma nge ku endli nchumu. 20 Kambe loko ku ri hileswaku a wu tshembekanga eka nuna wa wena naswona u n’wi dyoherile hi ku etlela ni wanuna un’wana,”+ 21 Kutani muprista u ta hlambanyisa wansati hi xihlambanyo lexi katsaka ndzhukano, a tlhela a ku eka yena: “Onge Yehovha a nga endla leswaku vito ra wena ri va ndzhukano exikarhi ka vanhu va ka n’wina naswona Yehovha u ta endla leswaku khwiri ra wena ri pfimba u tlhela u nga ha kumi vana. 22 Mati lawa lama vangaka ndzhukano ma ta nghena emarhumbyini ya wena ma endla leswaku khwiri ra wena ri pfimba naswona a wu nge he kumi vana.” Kutani wansati u fanele a ku: “Amen! Amen!”*
23 “‘Xisweswo muprista u fanele a tsala marito lawa ya ndzhukano ebukwini a tlhela a ma sula hi mati yo bava. 24 U ta endla leswaku wansati a nwa mati yo bava lama vangaka ndzhukano naswona mati lama vangaka ndzhukano ma ta nghena endzeni ka yena kutani ma vanga switlhavi. 25 Muprista u fanele a teka gandzelo ra mavele ra vukwele+ evokweni ra wansati a ri ndziwita emahlweni ka Yehovha, kutani a ri tisa ekusuhi ni altari. 26 Muprista u ta nusa mavele yo endla gandzelo ra xitsundzuxo hi voko, a ma hisa ealtarini,+ endzhaku ka sweswo u ta endla leswaku wansati a nwa mati wolawo. 27 Loko a heta ku nwa mati wolawo, naswona a nga basanga hi leswi a nga tshembekangiki eka nuna wakwe, mati lama vangaka ndzhukano ma ta nghena endzeni ka yena ma vanga switlhavi, kutani khwiri ra yena ri ta pfimba a tlhela a nga ha kumi vana, wansati u ta va a rhukaniwile exikarhi ka vanhu varikwavo. 28 Hambiswiritano, loko wansati a nga dyohanga naswona a basile, a nge xupuriwi, swi ta koteka leswaku a tika a tlhela a kuma vana.
29 “‘Lowu i nawu wa vukwele,+ loko wansati a dyoha hi ku tinyamisa a ha tekane ni nuna wakwe, 30 kumbe loko wanuna a va ni vukwele a ehleketelela leswaku nsati wakwe a nga tshembekanga; u fanele a n’wi tisa emahlweni ka Yehovha kutani muprista u fanele a endla hinkwaswo leswi tsariweke eka nawu lowu. 31 Wanuna u ta va a nga ri na nandzu, kambe nsati wakwe u ta tihlamulela hikwalaho ka xidyoho xakwe.’”
6 Yehovha a ya emahlweni a vulavula na Muxe a ku: 2 “Byela Vaisrayele u ku, ‘Loko wanuna kumbe wansati a hlambanya leswaku u ta va Munaziri*+ wa Yehovha, 3 a nga fanelanga a nwa vhinyo kumbe byala. A nga tshuki a nwa ntsuvi wa vhinyo kumbe wa byala.+ A nga fanelanga a nwa leswi endliweke hi madiriva, kumbe a dya madiriva lama tsakamaka kumbe lama omeke. 4 Loko a ha ri Munaziri a nga fanelanga a dya swilo leswi endliweke hi madiriva, leswi endliweke hi madiriva lama nga wupfangiki ni makamba ya kona.
5 “‘A nga fanelanga a byevula nhloko loko a ha ri Munaziri.+ U fanele a tshika misisi yakwe yi kula kukondza masiku ya Vunaziri byakwe ma hela, ku komba leswaku u tibohile ku endla ntirho wa Yehovha. 6 A nga fanelanga a tshinela ekusuhi ni ntsumbu wa munhu masiku hinkwawo lama a tiboheke ku tirhela Yehovha. 7 Hambiloko ko fa tata wakwe kumbe mana wakwe kumbe makwavo wakwe wa xinuna kumbe wa xisati, a nga fanelanga a tinyamisa+ hikwalaho ka leswi a nga ni misisi leyi nga mfungho wa leswaku i Munaziri wa Xikwembu.
8 “‘U ta va a hlawulekile eka Yehovha masiku hinkwawo ya Vunaziri byakwe. 9 Kambe loko ko tshuka ku fa munhu ekusuhi na yena+ ivi a nyamisa misisi leyi kombaka leswaku u tibohe ku tirhela Xikwembu, u fanele a byevula nhloko yakwe+ hi siku leri a nga ta basisiwa ha rona. U fanele a byevula hi siku ra vunkombo. 10 Hi siku ra vunhungu u fanele a tisa magugurhwana* mambirhi kumbe swituvana swimbirhi eka muprista enyangweni ya tende ra nhlengeletano. 11 Muprista u ta teka rin’we a endla gandzelo ra xidyoho ivi lerin’wana a endla gandzelo ro hisiwa, a n’wi kombelela ku rivaleriwa hikwalaho ka xidyoho xa yena+ xo khumba ntsumbu wa munhu. Kutani u fanele a tibasisa nhloko hi siku rero. 12 U fanele a tlhela a tiboha leswaku u ta tirhela Yehovha hi ku ya emahlweni ni Vunaziri byakwe naswona u ta tisa khuna leritsongo leri nga ni lembe leswaku ri va gandzelo ra nandzu. Hambiswiritano, masiku lama hundzeke a ma nge he hlayiwi hikuva u nyamise Vunaziri byakwe.
13 “‘Hi lowu nawu mayelana ni Munaziri: Loko masiku yakwe ya Vunaziri+ ma hela, u ta yisiwa enyangweni ya tende ra nhlengeletano. 14 Loko a ri kwalaho u fanele a endlela Yehovha magandzelo: hi khuna leritsongo leri hanyeke kahle leri nga ni lembe, ri va gandzelo ro hisiwa,+ xinyimpfana xa ntswele lexi hanyeke kahle lexi nga ni lembe, xi va gandzelo ra xidyoho,+ khuna leri hanyeke kahle ri va gandzelo ro kombela ku rhula,+ 15 basikiti ya swinkwa leswi nga riki na comela leswi bakiweke hi mapa lama silekeke kahle lama hlanganisiweke ni mafurha leswi endliweke ku fana ni swingwavila, xinkwa xo oma lexi nga riki na comela, lexi totiweke mafurha, gandzelo ra swona ra mavele+ ni magandzelo ya swona ya swakunwa.+ 16 Muprista u ta swi nyikela eka Yehovha, a n’wi endlela gandzelo ra xidyoho ni gandzelo ro hisiwa. 17 U ta nyikela khuna eka Yehovha ri va gandzelo ro kombela ku rhula ku katsa ni basikiti ya swinkwa leswi nga riki na comela naswona muprista u ta humesa gandzelo ra mavele+ ni ra swakunwa swa rona.
18 “‘Munaziri u fanele a byevula misisi yakwe+ enyangweni ya tende ra nhlengeletano naswona u ta teka misisi leyi a yi fuweke hi nkarhi lowu a a ri Munaziri a yi hoxa endzilweni lowu ku endliwaka gandzelo ro kombela ku rhula eka wona. 19 Muprista u fanele a teka katla ra khuna leri swekiweke,+ xinkwa xin’we lexi nga riki na comela lexi bakiweke ku fana ni xingwavila lexi nga ebasikitini, xinkwa xin’we lexi omisiweke lexi nga riki na comela, a swi veka eswandleni swa Munaziri endzhaku ka loko a byevule misisi yakwe leyi a yi kombisa leswaku i Munaziri. 20 Kutani muprista u fanele a swi ndziwita emahlweni ka Yehovha+ swi va gandzelo leri ndziwitiwaka. I nchumu wo kwetsima wa muprista ku katsa ni xifuva xa gandzelo leri ndziwitiwaka ni nenge lowu nyikeriweke.+ Endzhaku ka sweswo loyi a a ri Munaziri a nga nwa vhinyo.
21 “‘Hi lowu nawu wa Munaziri+ loyi a hlambanyaka: Loko o hlambanya ku nyikela eka Yehovha leswi a nga swi kotaka ku engetela eka leswi nawu wu lavaka swona, u fanele a namarhela xihlambanyo xakwe hi ku xixima nawu wa Vunaziri byakwe.’”
22 Kutani Yehovha a vulavula na Muxe a ku: 23 “Byela Aroni ni vana vakwe u ku, ‘Mi ta katekisa+ Vaisrayele hi ndlela leyi:
24 “Onge Yehovha a nga mi katekisa+ a mi sirhelela.
25 Onge Yehovha a nga mi komba leswaku wa mi tsakela+ hi ku mi komba tintswalo.
26 Onge Yehovha a nga mi komba musa a mi nyika ku rhula.”’+
27 Va fanele va vitana vito ra mina eka Vaisrayele+ leswaku ndzi ta va katekisa.”+
7 Hi siku leri Muxe a heteke ku aka tabernakela+ ha rona, u yi chele hi mafurha+ a yi endla yi va yo hlawuleka ni nhundzu ya yona hinkwayo, altari ni swibya swa yona hinkwaswo.+ Loko a hete ku chela swilo leswi hi mafurha ni ku swi endla swi va swo hlawuleka,+ 2 tindhuna ta Israyele,+ leti a ti ri varhangeri va swivongo swa tona, ti tisa munyikelo. Tindhuna leti ta tinyimba leti a ti langutela ntirho wa ku tsarisiwa ka vanhu, 3 ti nyikela eka Yehovha hi tigolonyi* ta tsevu leti funengetiweke ni tihomu ta 12, tindhuna timbirhi ti tise golonyi yin’we, kasi ndhuna ha yin’we yi tise nkuzi yin’we; ti swi nyikela emahlweni ka tabernakela. 4 Hiloko Yehovha a byela Muxe a ku: 5 “Amukela swilo leswi hikuva swi ta tirhisiwa ku rhwala nhundzu ya tende ra nhlengeletano, u fanele u swi nyika Valevhi, ha un’we hi ku ya hi swilaveko swa ntirho wakwe.”
6 Hiloko Muxe a amukela tigolonyi ni tihomu a swi nyika Valevhi. 7 Vana va Gerixoni a va nyika tigolonyi timbirhi ni tihomu ta mune, hi ku ya hi swilaveko swa ntirho wa vona;+ 8 kasi vana va Merari, lava a va tirha ehansi ka Ithamara n’wana wa muprista Aroni, a va nyika tigolonyi ta mune ni tihomu ta nhungu, hi ku ya hi swilaveko swa ntirho wa vona.+ 9 Kambe vana va Kohata a nga va nyikanga nchumu, hikuva a va tirha endhawini yo kwetsima.+ A va rhwala swilo swo kwetsima hi makatla.+
10 Kutani tindhuna ti nyikela tinyiko ta tona hi siku leri altari yi cheriweke mafurha yi tlhela yi khanguriwa.*+ Loko tindhuna ti tisa minyikelo ya tona emahlweni ka altari, 11 Yehovha a byela Muxe a ku: “A ku te ndhuna yin’we hi siku hi ku landzelelana, yi ta nyikela leswi nga ta tirhisiwa loko ku khanguriwa* altari.”
12 Loyi a nyikeleke gandzelo rakwe hi siku ro sungula a ku ri Nasoni+ n’wana wa Aminadaba loyi a humaka eka nyimba ya Yuda. 13 U nyikele hi xibya xa silivhere, lexi tikaka 1 482 wa tikhilogiramu* ni xibya lexitsongo xa silivhere lexi tikaka 798 wa tigiramu,* hi ku ya hi mpimo wa ndhawu yo kwetsima,*+ swibya leswi haswimbirhi a swi tele hi mapa lama silekeke kahle lama pfanganisiweke ni mafurha, leswaku swi ta va gandzelo ra mavele;+ 14 xibya lexitsongo xa nsuku lexi tikaka 114 wa tigiramu,* xi tele hi murhi wo nun’hwela; 15 xinkuzana xin’we, khuna rin’we ni xinyimpfana xa xinuna lexi nga ni lembe swi va gandzelo ro hisiwa;+ 16 ximbutana xin’we xa gandzelo ra xidyoho;+ 17 kasi swa gandzelo ro kombela ku rhula+ a ku ri tihomu timbirhi, makhuna ya ntlhanu, swiphongo swa ntlhanu ni swinyimpfana swa xinuna swa ntlhanu, ha xin’we xi ri ni lembe rin’we. Leswi swi nyikeriwe hi Nasoni n’wana wa Aminadaba.+
18 Hi siku ra vumbirhi Nethanele+ n’wana wa Suwara, ndhuna ya vana va Isakara a tisa munyikelo. 19 U nyikele hi xibya xa silivhere, lexi tikaka 1 482 wa tikhilogiramu ni xibya lexitsongo xa silivhere lexi tikaka 798 wa tigiramu, hi ku ya hi mpimo wa ndhawu yo kwetsima,+ swibya leswi haswimbirhi a swi tele hi mapa lama silekeke kahle lama pfanganisiweke ni mafurha, leswaku swi ta va gandzelo ra mavele;+ 20 xibya lexitsongo xa nsuku lexi tikaka 114 wa tigiramu, xi tele hi murhi wo nun’hwela; 21 xinkuzana xin’we, khuna rin’we ni xinyimpfana xin’we xa xinuna lexi nga ni lembe swi va gandzelo ro hisiwa;+ 22 ximbutana xin’we xa gandzelo ra xidyoho;+ 23 kasi swa gandzelo ro kombela ku rhula+ a ku ri tihomu timbirhi, makhuna ya ntlhanu, swiphongo swa ntlhanu ni swinyimpfana swa ntlhanu swa xinuna, ha xin’we xi ri ni lembe rin’we. Leswi swi nyikeriwe hi Nethanele n’wana wa Suwara.
24 Hi siku ra vunharhu Eliyabu+ n’wana wa Heloni ndhuna ya vana va Zebuloni, 25 u nyikele hi xibya xa silivhere, lexi tikaka 1 482 wa tikhilogiramu ni xibya lexitsongo xa silivhere lexi tikaka 798 wa tigiramu, hi ku ya hi mpimo wa ndhawu yo kwetsima,+ swibya leswi haswimbirhi a swi tele hi mapa lama silekeke kahle lama pfanganisiweke ni mafurha, leswaku swi ta va gandzelo ra mavele;+ 26 xibya lexitsongo xa nsuku lexi tikaka 114 wa tigiramu, xi tele hi murhi wo nun’hwela; 27 xinkuzana xin’we, khuna rin’we ni xinyimpfana xin’we xa xinuna lexi nga ni lembe swi va gandzelo ro hisiwa;+ 28 ximbutana xin’we xa gandzelo ra xidyoho;+ 29 kasi swa gandzelo ro kombela ku rhula+ a ku ri tihomu timbirhi, makhuna ya ntlhanu, swiphongo swa ntlhanu ni swinyimpfana swa ntlhanu swa xinuna, ha xin’we xi ri ni lembe rin’we. Leswi swi nyikeriwe hi Eliyabu+ n’wana wa Heloni.
30 Hi siku ra vumune Elizuri+ n’wana wa Xidewuru ndhuna ya vana va Rhuveni, 31 u nyikele hi xibya xa silivhere, lexi tikaka 1 482 wa tikhilogiramu ni xibya lexitsongo xa silivhere lexi tikaka 798 wa tigiramu, hi ku ya hi mpimo wa ndhawu yo kwetsima,+ swibya leswi haswimbirhi a swi tele hi mapa lama silekeke kahle lama pfanganisiweke ni mafurha, leswaku swi ta va gandzelo ra mavele;+ 32 xibya lexitsongo xa nsuku lexi tikaka 114 wa tigiramu, xi tele hi murhi wo nun’hwela; 33 xinkuzana xin’we, khuna rin’we ni xinyimpfana xin’we xa xinuna lexi nga ni lembe swi va gandzelo ro hisiwa;+ 34 ximbutana xin’we xa gandzelo ra xidyoho;+ 35 kasi swa gandzelo ro kombela ku rhula+ a ku ri tihomu timbirhi, makhuna ya ntlhanu, swiphongo swa ntlhanu ni swinyimpfana swa ntlhanu swa xinuna, ha xin’we xi ri ni lembe rin’we. Leswi swi nyikeriwe hi Elizuri+ n’wana wa Xidewuru.
36 Hi siku ra vuntlhanu Xelumiyele+ n’wana wa Zurixadayi ndhuna ya vana va Simiyoni, 37 u nyikele hi xibya xa silivhere, lexi tikaka 1 482 wa tikhilogiramu ni xibya lexitsongo xa silivhere lexi tikaka 798 wa tigiramu, hi ku ya hi mpimo wa ndhawu yo kwetsima,+ swibya leswi haswimbirhi a swi tele hi mapa lama silekeke kahle lama pfanganisiweke ni mafurha, leswaku swi ta va gandzelo ra mavele;+ 38 xibya lexitsongo xa nsuku lexi tikaka 114 wa tigiramu, xi tele hi murhi wo nun’hwela; 39 xinkuzana xin’we, khuna rin’we ni xinyimpfana xin’we xa xinuna lexi nga ni lembe swi va gandzelo ro hisiwa;+ 40 ximbutana xin’we xa gandzelo ra xidyoho;+ 41 kasi swa gandzelo ro kombela ku rhula+ a ku ri tihomu timbirhi, makhuna ya ntlhanu, swiphongo swa ntlhanu ni swinyimpfana swa ntlhanu swa xinuna, ha xin’we xi ri ni lembe rin’we. Leswi swi nyikeriwe hi Xelumiyele+ n’wana wa Zurixadayi.
42 Hi siku ra vutsevu Eliyasafa+ n’wana wa Duwele ndhuna ya vana va Gadi, 43 u nyikele hi xibya xa silivhere, lexi tikaka 1 482 wa tikhilogiramu ni xibya lexitsongo xa silivhere lexi tikaka 798 wa tigiramu, hi ku ya hi mpimo wa ndhawu yo kwetsima,+ swibya leswi haswimbirhi a swi tele hi mapa lama silekeke kahle lama pfanganisiweke ni mafurha, leswaku swi ta va gandzelo ra mavele;+ 44 xibya lexitsongo xa nsuku lexi tikaka 114 wa tigiramu, xi tele hi murhi wo nun’hwela; 45 xinkuzana xin’we, khuna rin’we ni xinyimpfana xin’we xa xinuna lexi nga ni lembe leswaku swi ta va gandzelo ro hisiwa;+ 46 ximbutana xin’we xa gandzelo ra xidyoho;+ 47 kasi swa gandzelo ro kombela ku rhula+ a ku ri tihomu timbirhi, makhuna ya ntlhanu, swiphongo swa ntlhanu ni swinyimpfana swa ntlhanu swa xinuna, ha xin’we xi ri ni lembe rin’we. Leswi swi nyikeriwe hi Eliyasafa+ n’wana wa Duwele.
48 Hi siku ra vunkombo Elixama+ n’wana wa Amihudi ndhuna ya vana va Efrayimi, 49 u nyikele hi xibya xa silivhere, lexi tikaka 1 482 wa tikhilogiramu ni xibya lexitsongo xa silivhere lexi tikaka 798 wa tigiramu, hi ku ya hi mpimo wa ndhawu yo kwetsima,+ swibya leswi haswimbirhi a swi tele hi mapa lama silekeke kahle lama pfanganisiweke ni mafurha, leswaku swi ta va gandzelo ra mavele;+ 50 xibya lexitsongo xa nsuku lexi tikaka 114 wa tigiramu, xi tele hi murhi wo nun’hwela; 51 xinkuzana xin’we, khuna rin’we ni xinyimpfana xin’we xa xinuna lexi nga ni lembe leswaku swi ta va gandzelo ro hisiwa;+ 52 ximbutana xin’we xa gandzelo ra xidyoho;+ 53 kasi swa gandzelo ro kombela ku rhula+ a ku ri tihomu timbirhi, makhuna ya ntlhanu, swiphongo swa ntlhanu ni swinyimpfana swa ntlhanu swa xinuna, ha xin’we xi ri ni lembe rin’we. Leswi swi nyikeriwe hi Elixama+ n’wana wa Amihudi.
54 Hi siku ra vunhungu Gamaliyele+ n’wana wa Pedasuru ndhuna ya vana va Manase, 55 u nyikele hi xibya xa silivhere, lexi tikaka 1 482 wa tikhilogiramu ni xibya lexitsongo xa silivhere lexi tikaka 798 wa tigiramu, hi ku ya hi mpimo wa ndhawu yo kwetsima,+ swibya leswi haswimbirhi a swi tele hi mapa lama silekeke kahle lama pfanganisiweke ni mafurha, leswaku swi ta va gandzelo ra mavele;+ 56 xibya lexitsongo xa nsuku lexi tikaka 114 wa tigiramu, xi tele hi murhi wo nun’hwela; 57 xinkuzana xin’we, khuna rin’we ni xinyimpfana xin’we xa xinuna lexi nga ni lembe leswaku swi ta va gandzelo ro hisiwa;+ 58 ximbutana xin’we xa gandzelo ra xidyoho;+ 59 kasi swa gandzelo ro kombela ku rhula+ a ku ri tihomu timbirhi, makhuna ya ntlhanu, swiphongo swa ntlhanu ni swinyimpfana swa ntlhanu swa xinuna, ha xin’we xi ri ni lembe rin’we. Leswi swi nyikeriwe hi Gamaliyele+ n’wana wa Pedasuru.
60 Hi siku ra vukaye Abidana+ n’wana wa Gidiyoni ndhuna+ ya vana va Benjamini, 61 u nyikele hi xibya xa silivhere, lexi tikaka 1 482 wa tikhilogiramu ni xibya lexitsongo xa silivhere lexi tikaka 798 wa tigiramu, hi ku ya hi mpimo wa ndhawu yo kwetsima,+ swibya leswi haswimbirhi a swi tele hi mapa lama silekeke kahle lama pfanganisiweke ni mafurha, leswaku swi ta va gandzelo ra mavele;+ 62 xibya lexitsongo xa nsuku lexi tikaka 114 wa tigiramu, xi tele hi murhi wo nun’hwela; 63 xinkuzana xin’we, khuna rin’we ni xinyimpfana xin’we xa xinuna lexi nga ni lembe leswaku swi ta va gandzelo ro hisiwa;+ 64 ximbutana xin’we xa gandzelo ra xidyoho;+ 65 kasi swa gandzelo ro kombela ku rhula+ a ku ri tihomu timbirhi, makhuna ya ntlhanu, swiphongo swa ntlhanu ni swinyimpfana swa ntlhanu swa xinuna, ha xin’we xi ri ni lembe rin’we. Leswi swi nyikeriwe hi Abidana+ n’wana wa Gidiyoni.
66 Hi siku ra vukhume Ahiyezere+ n’wana wa Amixadayi ndhuna ya vana va Dani, 67 u nyikele hi xibya xa silivhere, lexi tikaka 1 482 wa tikhilogiramu ni xibya lexitsongo xa silivhere lexi tikaka 798 wa tigiramu, hi ku ya hi mpimo wa ndhawu yo kwetsima,+ swibya leswi haswimbirhi a swi tele hi mapa lama silekeke kahle lama pfanganisiweke ni mafurha, leswaku swi ta va gandzelo ra mavele;+ 68 xibya lexitsongo xa nsuku lexi tikaka 114 wa tigiramu, xi tele hi murhi wo nun’hwela; 69 xinkuzana xin’we, khuna rin’we ni xinyimpfana xin’we xa xinuna lexi nga ni lembe leswaku swi ta va gandzelo ro hisiwa;+ 70 ximbutana xin’we xa gandzelo ra xidyoho;+ 71 kasi swa gandzelo ro kombela ku rhula+ a ku ri tihomu timbirhi, makhuna ya ntlhanu, swiphongo swa ntlhanu ni swinyimpfana swa ntlhanu swa xinuna, ha xin’we xi ri ni lembe rin’we. Leswi swi nyikeriwe hi Ahiyezere+ n’wana wa Amixadayi.
72 Hi siku ra vu-11 Pagiyele+ n’wana wa Okirani ndhuna ya vana va Axere, 73 u nyikele hi xibya xa silivhere, lexi tikaka 1 482 wa tikhilogiramu ni xibya lexitsongo xa silivhere lexi tikaka 798 wa tigiramu, hi ku ya hi mpimo wa ndhawu yo kwetsima,+ swibya leswi haswimbirhi a swi tele hi mapa lama silekeke kahle lama pfanganisiweke ni mafurha, leswaku swi ta va gandzelo ra mavele;+ 74 xibya lexitsongo xa nsuku lexi tikaka 114 wa tigiramu, xi tele hi murhi wo nun’hwela; 75 xinkuzana xin’we, khuna rin’we ni xinyimpfana xin’we xa xinuna lexi nga ni lembe swi va gandzelo ro hisiwa;+ 76 ximbutana xin’we xa gandzelo ra xidyoho;+ 77 kasi swa gandzelo ro kombela ku rhula+ a ku ri tihomu timbirhi, makhuna ya ntlhanu, swiphongo swa ntlhanu ni swinyimpfana swa ntlhanu swa xinuna, ha xin’we xi ri ni lembe rin’we. Leswi swi nyikeriwe hi Pagiyele+ n’wana wa Okirani.
78 Hi siku ra vu-12 Ahira+ n’wana wa Enana ndhuna ya vana va Neftali, 79 u nyikele hi xibya xa silivhere, lexi tikaka 1 482 wa tikhilogiramu ni xibya lexitsongo xa silivhere lexi tikaka 798 wa tigiramu, hi ku ya hi mpimo wa ndhawu yo kwetsima,+ swibya leswi haswimbirhi a swi tele hi mapa lama silekeke kahle lama pfanganisiweke ni mafurha, leswaku swi ta va gandzelo ra mavele;+ 80 xibya lexitsongo xa nsuku lexi tikaka 114 wa tigiramu, xi tele hi murhi wo nun’hwela; 81 xinkuzana xin’we, khuna rin’we ni xinyimpfana xin’we xa xinuna lexi nga ni lembe swi va gandzelo ro hisiwa;+ 82 ximbutana xin’we xa gandzelo ra xidyoho;+ 83 kasi swa gandzelo ro kombela ku rhula+ a ku ri tihomu timbirhi, makhuna ya ntlhanu, swiphongo swa ntlhanu ni swinyimpfana swa ntlhanu swa xinuna, ha xin’we xi ri ni lembe rin’we. Leswi swi nyikeriwe hi Ahira+ n’wana wa Enana.
84 Leyi a ku ri minyikelo ya ku khanguriwa*+ ka altari, leyi humaka eka tindhuna ta Israyele loko altari yi cheriwa hi mafurha: Swibya swa silivhere swa 12, swibya leswitsongo swa silivhere swa 12 ni swibya leswitsongo swa nsuku swa 12;+ 85 xibya ha xin’we xa silivhere a xi tika 1 482 wa tikhilogiramu, kasi xibya ha xin’we lexitsongo xa silivhere a xi tika 798 wa tigiramu, swibya hinkwaswo swa silivhere a swi tika 27 360 wa tikhilogiramu* hi ku ya hi mpimo wa ndhawu yo kwetsima;+ 86 swibya swa nsuku swa 12 leswi a swi tele hi murhi wo nun’hwela, xibya ha xin’we a xi tika 114 wa tigiramu hi ku ya hi mpimo wa ndhawu yo kwetsima, nsuku hinkwawo lowu swibya leswi a swi endliwe ha wona a wu tika 1 368 wa tikhilogiramu.* 87 Tihomu hinkwato leti a ti ta tirhiseriwa ku endla gandzelo ro hisiwa a ku ri tinkuzi ta 12, makhuna ya 12, swinyimpfana swa xinuna swa 12, ha xin’we xi ri ni lembe rin’we ni magandzelo ya swona ya mavele ku katsa ni swimbutana swa 12 swa gandzelo ra xidyoho; 88 tihomu hinkwato ta gandzelo ra ku kombela ku rhula a ku ri tinkuzi ta 24, makhuna ya 60, swiphongo swa 60 ni swinyimpfana swa xinuna swa 60, ha xin’we xi ri ni lembe rin’we. Leswi a ku ri minyikelo ya ku khanguriwa*+ ka altari endzhaku ka loko yi cheriwe hi mafurha.+
89 Loko Muxe a nghena etendeni ra nhlengeletano leswaku a ya vulavula ni Xikwembu,+ a a twa rito ri vulavula na yena ku suka ehenhla ka xifunengeto+ xa areka ya Vumbhoni, ri huma exikarhi ka makerubu mambirhi;+ Xikwembu a xi vulavula na yena.
8 Yehovha a vulavula na Muxe a ku: 2 “Byela Aroni u ku, ‘Loko u lumeka timboni, timboni ta nkombo ti fanele ti voninga ndhawu leyi nga emahlweni ka xo tlhoma timboni.’”+ 3 Hiloko Aroni a endla leswi: A lumeka timboni leswaku ti voninga ndhawu leyi nga emahlweni ka xo tlhoma timboni,+ hilaha Yehovha a leriseke Muxe hakona. 4 Xo tlhoma timboni a xi endliwe hi ndlela leyi: A xi endliwe hi nsuku, ku suka ehansi ku ya fika laha xi nga khavisiwa hi swiluva.+ A xi endliwe hi ku ya hi leswi Yehovha a swi kombeke Muxe exivonweni.+
5 Yehovha a tlhela a vulavula na Muxe a ku: 6 “Humesa Valevhi exikarhi ka Vaisrayele, u ya va basisa.+ 7 U ta va basisa hi ndlela leyi: Va phuphutele hi mati,* kutani va byevula misisi ya miri hinkwawo hi xikaringana,* va hlantswa swiambalo swa vona va tlhela va basisa ni mimiri ya vona.+ 8 Kutani va ta teka xinkuzana+ ni gandzelo ra xona ra mavele+ ra mapa lama silekeke kahle lama pfanganisiweke ni mafurha, wena u ta teka xinkuzana xin’wana xi va gandzelo ra xidyoho.+ 9 Wena u ta yima ni Valevhi emahlweni ka tende ra nhlengeletano, kutani u hlengeleta Vaisrayele hinkwavo.+ 10 Loko u yima ni Valevhi emahlweni ka Yehovha, Vaisrayele va ta tlhandleka mavoko etinhlokweni ta Valevhi.+ 11 Kutani Aroni u fanele a nyikela Valevhi eka Yehovha, va va gandzelo leri ndziwitiwaka+ leri humaka eka Vaisrayele naswona va ta ya emahlweni va tirhela Yehovha.+
12 “Kutani Valevhi va ta tlhandleka mavoko ya vona etinhlokweni ta tinkuzi.+ Endzhaku ka sweswo va nyikela yin’we eka Yehovha va endla gandzelo ra xidyoho kasi leyin’wana va endla gandzelo ro hisiwa leswaku va ta rivaleriwa swidyoho.+ 13 Kutani u ta endla leswaku Valevhi va yima emahlweni ka Aroni ni vana vakwe, u va nyikela eka Yehovha va va gandzelo leri ndziwitiwaka. 14 U fanele u ndzi hlawulela Valevhi exikarhi ka Vaisrayele, Valevhi va ta va va mina.+ 15 Endzhaku ka sweswo, Valevhi va ta tirha etendeni ra nhlengeletano. U fanele u va basisa ni ku va nyikela va va gandzelo leri ndziwitiwaka hi ndlela yoleyo. 16 Hikuva va nyikeriwe eka mina, i nyiko leyi humaka eka Vaisrayele. Ndzi ta va teka va va va mina ematshan’weni ya hinkwavo lava nga mativula ya Vaisrayele.+ 17 Hikuva mativula hinkwawo ya Vaisrayele i ya mina, ya vanhu ni swiharhi.+ Ndzi ma basise hi siku leri ndzi beke mativula hinkwawo etikweni ra Egipta.+ 18 Ndzi ta teka Valevhi ematshan’weni ya mativula hinkwawo exikarhi ka Vaisrayele. 19 Ndzi ta nyikela Valevhi va va nyiko eka Aroni ni vana vakwe, leyi humaka eka Vaisrayele, leswaku va ta endlela Vaisrayele ntirho etendeni ra nhlengeletano+ ni ku va kombelela ku rivaleriwa, leswaku Vaisrayele va nga humeleriwi hi khombo+ loko vo tshinela endhawini yo kwetsima.”
20 Muxe na Aroni ni Vaisrayele hinkwavo va endle tano eka Valevhi. Vaisrayele va endle hinkwaswo leswi Yehovha a swi leriseke Muxe mayelana ni Valevhi. 21 Hiloko Valevhi va tibasisa va tlhela va hlantswa swiambalo swa vona,+ endzhaku ka sweswo Aroni a va nyikela eka Yehovha va va gandzelo leri ndziwitiwaka.+ Kutani Aroni a endla gandzelo leswaku va ta rivaleriwa swidyoho va basisiwa.+ 22 Endzhaku ka sweswo Valevhi va ya etendeni ra nhlengeletano leswaku va ya endla ntirho, va languteriwa hi Aroni ni vana vakwe. Va endle tano eka vona hilaha Yehovha a leriseke Muxe hakona mayelana ni Valevhi.
23 Yehovha a byela Muxe a ku: 24 “Mhaka yin’wana leyi khumbaka Valevhi hi leyi: Wanuna loyi a nga ni malembe lama sukelaka eka 25 ku ya ehenhla, u ta sungula ku tirha etendeni ra nhlengeletano. 25 Kambe u ta tshika ku tirha loko a ri ni malembe ya 50. 26 A nga pfuna vamakwavo lava tirhaka etendeni ra nhlengeletano, kambe a nga fanelanga a tirhela kwalaho. Leswi hi leswi u faneleke u swi endla mayelana ni Valevhi ni mitirho ya vona.”+
9 Yehovha a vulavula na Muxe emananga ya Sinayi hi n’hweti yo sungula+ ya lembe ra vumbirhi, endzhaku ka loko va hume etikweni ra Egipta a ku: 2 “Vaisrayele va fanele va lulamisa swifuwo swo tlangela Paseka+ hi nkarhi lowu vekiweke.+ 3 Hi siku ra vu-14 ra n’hweti leyi nimadyambu mi fanele mi yi lulamisa hi nkarhi lowu vekiweke. Mi ta yi lulamisa hi ku ya hi milawu ni maendlelo ya yona hinkwawo.”+
4 Hiloko Muxe a byela Vaisrayele leswaku va lulamisa swifuwo swo tlangela Paseka. 5 Kutani va lulamisa swifuwo swo tlangela Paseka hi n’hweti yo sungula, hi siku ra vu-14 ra n’hweti nimadyambu emananga ya Sinayi. Vaisrayele va endle hi ku pfumelelana ni hinkwaswo leswi Yehovha a swi leriseke Muxe.
6 A ku ri ni vanhu lava a va nyamile hikwalaho ka leswi va khumbeke ntsumbu,+ kutani a va swi kotanga ku lulamisa swifuwo swo tlangela Paseka hi siku rero. Hiloko vanhu volavo va ya eka Muxe na Aroni hi siku rero+ 7 va fika va ku: “Hi nyamile hikwalaho ka leswi hi khumbeke ntsumbu. Hikwalaho ka yini hi fanele hi siveriwa ku nyikela gandzelo ni Vaisrayele eka Yehovha hi nkarhi lowu vekiweke?”+ 8 Hiloko Muxe a ku eka vona: “Yimani kwalaho ndzi ya twa leswi Yehovha a nga ta swi lerisa mayelana na n’wina.”+
9 Kutani Yehovha a byela Muxe a ku: 10 “Byela Vaisrayele u ku, ‘Hambiloko munhu un’wana eka n’wina kumbe vatukulu va n’wina o nyama hikwalaho ko khumba ntsumbu,+ kumbe a endzele ekule, u fanele a lulamisa xifuwo xo endlela Yehovha nkhuvo wa Paseka. 11 Va fanele va xi lulamisa hi n’hweti ya vumbirhi+ hi siku ra vu-14 nimadyambu. Va fanele va xi dya ni swinkwa leswi nga riki na comela ni matsavu yo bava.+ 12 Va fanele va xi dya xi hela va nga siyeli mundzuku+ naswona a va fanelanga va tshova marhambu ya xona.+ Va fanele va tlangela Paseka hi ku ya hi milawu leyi vekiweke hinkwayo. 13 Loko munhu a nga nyamanga naswona a nga endzelanga ekule kambe a nga ri na mhaka no endla malunghiselelo ya Paseka, u fanele a dlayiwa,+ hikuva a nga n’wi endlelanga Yehovha gandzelo hi nkarhi lowu vekiweke. Munhu yoloye u ta tihlamulela hikwalaho ka xidyoho xakwe.
14 “‘Loko ku ri ni muluveri loyi a tshamaka na n’wina, na yena u fanele a lulamisa xifuwo xo endlela Yehovha nkhuvo wa Paseka.+ U fanele a endla hi ku ya hi nawu wa Paseka ni maendlelo ya kona.+ Ku ta tirha nawu wun’we eka n’wina ni le ka valuveri.’”+
15 Hi siku ra ku yimisiwa ka tabernakela,+ papa a ri funengeta tabernakela ku nga tende ra Vumbhoni, kambe nimadyambu a ri vonaka onge i ndzilo ehenhla ka tabernakela kukondza ri xa.+ 16 A swi ri tano nkarhi ni nkarhi: Papa a ri funengeta tabernakela ninhlikanhi kasi nimadyambu a ri vonaka ri ri ndzilo.+ 17 Loko papa ri suka ehenhla ka tende, Vaisrayele a va suka hi xihatla+ naswona laha papa a ri ta fika ri tshama kona, Vaisrayele a va ta fika va dzima mixaxa kona.+ 18 Loko Yehovha a humesa xileriso Vaisrayele a va suka naswona a va dzima mixaxa hi ku landza xileriso xa Yehovha.+ Loko papa ri tshame ehenhla ka tabernakela, na vona a va nga suki. 19 Loko papa ri tshama masiku yo tala ehenhla ka tabernakela, Vaisrayele na vona a va yingisa Yehovha va nga fambi.+ 20 Mikarhi yin’wana papa a ri tshama masikunyana ehenhla ka tabernakela. A va tshama emixaxeni hi ku landza xileriso xa Yehovha naswona a va suka hi ku landza xileriso xa Yehovha. 21 Mikarhi yin’wana papa a ri tshama ku sukela nimadyambu ku fikela nimixo ntsena naswona loko papa ri suka nimixo na vona a va suka. Loko papa ri suka, na vona a va suka ku nga khathariseki leswaku i nhlikanhi kumbe i vusiku.+ 22 Ku nga khathariseki leswaku papa a ri tshama masiku mambirhi, n’hweti kumbe masiku yo tala ehenhla ka tabernakela, Vaisrayele a va tshama va dzime mixaxa naswona a va nga suki. Kambe loko ri suka na vona a va suka. 23 A va dzima mixaxa hi ku landza xileriso xa Yehovha naswona a va suka hi ku landza xileriso xa Yehovha. Va yingise Yehovha hi ku endla leswi Yehovha a swi leriseke Muxe.
10 Hiloko Yehovha a byela Muxe a ku: 2 “Tiendlele timhalamhala timbirhi+ hi silivhere; u ta ti fula hi hamula, u ta ti tirhisa ku vitana vanhu ni ku va byela leswaku va hahlula mixaxa. 3 Loko ti chayiwa hi nkarhi wun’we, vanhu hinkwavo va fanele va hlangana na wena enyangweni ya tende ra nhlengeletano.+ 4 Loko ko chayiwa yin’we ntsena, ku fanele ku ta tindhuna ntsena ku nga varhangeri va magidi eIsrayele, ti ta hlangana na wena.+
5 “Loko mi ba mpfumawulo lowu cincacincaka, lava nga evuxeni+ va fanele va suka. 6 Loko mi ba mpfumawulo lowu cincacincaka ra vumbirhi, lava nga edzongeni+ va fanele va suka. Mhalamhala yi fanele ku chayiwa hi ndlela yoleyo loko ntlawa ha wun’we wu suka.
7 “Loko mi vitana vanhu hinkwavo, mi fanele mi chaya timhalamhala,+ kambe mpfumawulo wa kona wu nga cincacinci. 8 Vaprista ku nga vana va Aroni, hi vona va faneleke ku chaya timhalamhala,+ ku tirhisiwa ka timhalamhala ku ta va nawu lowu nga heriki eka n’wina ni vatukulu va n’wina.
9 “Loko mi fanele ku lwa ni loyi a mi tshikilelaka etikweni ra n’wina, mi fanele ku ba hungwe ra nyimpi hi timhalamhala,+ kutani Yehovha Xikwembu xa n’wina u ta mi tsundzuka a mi ponisa eka valala va n’wina.
10 “Mi ta endla tano ni hi mikarhi ya n’wina ya ntsako,+ hi mikarhi ya mikhuvo+ ya n’wina ni le ku sunguleni ka tin’hweti ta n’wina, mi ta chaya timhalamhala loko mi endla magandzelo yo hisiwa+ ni magandzelo yo kombela ku rhula;+ leswi swi ta endla leswaku Xikwembu xi mi tsundzuka. Hi mina Yehovha Xikwembu xa n’wina.”+
11 Hi siku ra vu-20 ra n’hweti ya vumbirhi,+ hi lembe ra vumbirhi, papa ri tlakuka ehenhla ka tabernakela+ ya Vumbhoni. 12 Hiloko Vaisrayele va suka emananga ya Sinayi, va famba hi ku landza ndlela leyi va lerisiweke ku suka ha yona,+ kutani papa ri fika ri tshama emananga ya Parani.+ 13 A ku ri ro sungula va suka hi ndlela yoleyo hi ku landza leswi Yehovha a swi leriseke Muxe.+
14 Ntlawa wa tinyimba tinharhu leti rhangeriwaka hi vana va Yuda, hi wona wu nga rhanga wu suka hi ku ya hi mavuthu ya wona, murhangeri wa wona a ku ri Nasoni+ n’wana wa Aminadaba. 15 Loyi a a rhangele vuthu ra nyimba ya Isakara a ku ri Nethanele+ n’wana wa Suwara. 16 Loyi a a rhangele vuthu ra nyimba ya vana va Zebuloni a ku ri Eliyabu+ n’wana wa Heloni.
17 Loko tabernakela yi hahluriwa,+ vana va Gerixoni+ ni vana va Merari+ lava rhwalaka tabernakela a va suka.
18 Hiloko ntlawa wa tinyimba tinharhu lowu rhangeriwaka hi vana va Rhuveni wu suka hi mavuthu ya wona, a wu rhangeriwa hi Elizuri+ n’wana wa Xidewuru. 19 Loyi a a rhangele vuthu ra nyimba ya vana va Simiyoni a ku ri Xelumiyele+ n’wana wa Zurixadayi. 20 Loyi a a rhangele vuthu ra nyimba ya vana va Gadi a ku ri Eliyasafa+ n’wana wa Duwele.
21 Kutani ku suka Vakohata lava a va rhwala swibya swa ndhawu yo kwetsima.+ Tabernakela a yi fanele ku va se yi dzimiwile loko va fika.
22 Endzhaku ka sweswo, ntlawa wa tinyimba tinharhu lowu rhangeriwaka hi vana va Efrayimi wu suka hi ku ya hi mavuthu ya wona, a wu rhangeriwa hi Elixama+ n’wana wa Amihudi. 23 Loyi a a rhangele vuthu ra nyimba ya vana va Manase a ku ri Gamaliyele+ n’wana wa Pedasuru. 24 Loyi a a rhangele vuthu ra nyimba ya vana va Benjamini a ku ri Abidana+ n’wana wa Gidiyoni.
25 Kutani ntlawa wa tinyimba tinharhu lowu rhangeriwaka hi vana va Dani wu suka hi ku ya hi mavuthu ya wona, a wu ri varindzi hikuva hi wona a wu sala endzhaku, a wu rhangeriwa hi Ahiyezere+ n’wana wa Amixadayi. 26 Loyi a a rhangele vuthu ra nyimba ya vana va Axere a ku ri Pagiyele+ n’wana wa Okirani. 27 Loyi a a rhangele vuthu ra nyimba ya vana va Neftali a ku ri Ahira+ n’wana wa Enana. 28 Yoleyo i ndlela leyi Vaisrayele ni mavuthu ya vona a va suka ha yona.+
29 Kutani Muxe a byela Hobabu n’wana wa Rhuwele*+ wa le Midiyani, tata wa nsati wa Muxe a ku: “Hi ya endhawini leyi Yehovha a hi byeleke a ku, ‘Ndzi ta mi nyika yona.’+ Famba na hina,+ hi ta ku khoma kahle hikuva Yehovha u tshembise Vaisrayele swilo leswinene.”+ 30 Kambe yena a ku: “A ndzi nge fambi na n’wina. Ndzi ta tlhelela etikweni ra ka hina ni le maxakeni ya mina.” 31 Hiloko Muxe a ku: “Ndza ku kombela, u nga hi siyi hikuva u ku tiva kahle laha hi faneleke hi dzima kona mixaxa emananga, u nga hi komba ndlela. 32 Naswona loko wo famba na hina,+ hinkwaswo leswinene leswi Yehovha a nga ta hi endlela swona, hi ta avelana na wena.”
33 Hiloko va sungula ku famba ku ringana masiku manharhu ku suka entshaveni ya Yehovha,+ areka+ ya ntwanano wa Yehovha a yi famba emahlweni ka vona masiku manharhu, yi va lavela ndhawu yo wisa.+ 34 Papa ra Yehovha+ a ri ri ehenhla ka vona ninhlikanhi loko va suka laha a va dzime mixaxa kona.
35 Nkarhi na nkarhi loko Areka yi suka, Muxe a a ku: “Humelela Yehovha Xikwembu xanga,+ u hangalasa valala va wena, lava ku vengaka a va baleke emahlweni ka wena.” 36 Kutani loko yi fika laha a va ya kona, a ku: “Vuya, Yehovha, eka vanhu va wena va Israyele va ntsandzavahlayi.”+
11 Hiloko vanhu va sungula ku gungula swinene, va gungulela Yehovha. Loko Yehovha a swi twa, a hlundzuka swinene, kutani ndzilo lowu humaka eka Yehovha wu va hisa wu dlaya van’wana va vona emakumu ka nxaxa. 2 Vanhu va sungula ku rilela Muxe, kutani a khongela eka Yehovha,+ hiloko ndzilo wu timeka. 3 Ndhawu yoleyo yi thyiwa Tabera,* hikuva va hisiwe hi ndzilo lowu humaka eka Yehovha.+
4 Vanhu lava humaka ematikweni man’wana*+ lava a va tshama na vona, va ve ni makwanga,+ hiloko Vaisrayele na vona va tlhela va sungula ku rila va ku: “I mani loyi a nga ta hi nyika nyama hi dya?+ 5 Hi tsundzuka tihlampfi leti a hi ti dya mahala eEgipta, marhakarhaka, makhalavatla, tinyala ni swinyalana!+ 6 Kambe sweswi hi dlawa hi ndlala. A ku na swin’wana leswi hi nga dyaka swona, handle ka manna leyi.”+
7 Manna+ a yi fana ni mbewu ya khoriyanda,+ yi languteka ku fana ni vurimba bya bedeliyamu. 8 Vanhu a va hangalaka va yi rholela, va yi sila kumbe va yi kandza hi tshuri. Kutani va yi sweka etimbiteni kumbe va endla swinkwa swa swirhendzevutana,+ a swi nandziha ku fana ni khekhe ro tsokombela leri nga ni mafurha. 9 Loko ku va ni mberha enxaxeni nivusiku, manna na yona a yi wela kwalaho.+
10 Hiloko Muxe a twa vanhu va ri karhi va rila emindyangwini ya vona, va yime ematendeni ya vona. Yehovha a hlundzuka swinene,+ Muxe na yena a swi n’wi tsakisanga nikatsongo. 11 Kutani Muxe a ku eka Yehovha: “Hikwalaho ka yini u vangele nandza wa wena maxangu? Hikwalaho ka yini u nga ndzi tweli vusiwana, lerova u ndzi rhwexa ndzhwalo wa vanhu lava hinkwavo?+ 12 Xana hi mina ndzi tswaleke vanhu lava hinkwavo? Xana hi mina ndzi va velekeke leswi u ndzi byelaka u ku, ‘Va tlakule ku fana ni nandza* loyi a tlakuleke n’wana loyi a ha mamaka,’ u va yisa etikweni leri u ri hlambanyeleke ku ri nyika vakokwa wa vona?+ 13 Xana ndzi ta yi kuma kwihi nyama yo nyika vanhu lava hinkwavo? Hikuva va tshamela ku ndzi rilela va ku, ‘Hi nyike nyama hi dya!’ 14 A ndzi nge swi koti ku rhwala vanhu lava ndzi ri ndzexe; swa ndzi tikela swinene.+ 15 Loko leyi ku ri ndlela leyi u nga ta ndzi khoma ha yona, ndzi kombela u ndzi dlaya sweswi.+ Kambe loko u ndzi rhandza, ndzi sirhelele leswaku ndzi nga ha voni maxangu.”
16 Hiloko Yehovha a byela Muxe a ku: “Ndzi kumele vavanuna va 70 eka vakulukumba va Israyele, lava u va tivaka leswaku i vakulukumba ni tindhuna ta vanhu,+ va yise etendeni ra nhlengeletano, mi fika mi yima kwalaho. 17 Ndzi ta rhelela+ ndzi ta vulavula na wena kwalaho,+ ndzi ta teka moya wun’wana wo kwetsima+ lowu nga eka wena ndzi va nyika wona kutani va ta ku pfuna ku rhangela vanhu lava leswaku ku nga vi vutihlamuleri bya wena u ri wexe.+ 18 U fanele u byela vanhu volavo u ku, ‘Lunghekani*+ hikuva mundzuku mi ta dya nyama, mi rilele Yehovha+ mi ku: “I mani loyi a nga ta hi nyika nyama hi dya? Hikuva a hi tiphina eEgipta.”+ Kunene Yehovha u ta mi nyika nyama mi dya.+ 19 A mi nge yi dyi, siku rin’we kumbe masiku mambirhi kumbe masiku ya ntlhanu kumbe masiku ya khume kumbe masiku ya 20, 20 kambe ku ringana n’hweti, kukondza yi huma hi tinhompfu, yi mi phirha,+ hikuva mi fularhele Yehovha loyi a nga exikarhi ka n’wina naswona a mi n’wi rilela mi ku: “Hikwalaho ka yini hi suke eEgipta?”’”+
21 Hiloko Muxe a ku: “Ndzi ni vavanuna va 600 000 lava nga tinhenha,+ kambe wena u ri, ‘Ndzi ta va nyika nyama, va ta yi dya ku ringana n’hweti’! 22 Xana loko vo tlhaveriwa mintlhambi hinkwayo ya tinyimpfu ni ya tihomu, yi ta va ringana? Kumbe loko vo phaseriwa tihlampfi hinkwato ta le lwandle ti ta va ringana?”
23 Hiloko Yehovha a byela Muxe a ku: “Xana voko ra Yehovha ri komile?+ Sweswi u ta swi vona loko leswi ndzi swi vulaka swi ta endleka kumbe swi ta ka swi nga endleki.”
24 Kutani Muxe a famba a ya byela vanhu leswi Yehovha a swi vuleke. A hlengeleta vavanuna va 70 va huma eka vakulukumba va tiko, a va yimisa va rhendzela tende.+ 25 Kutani Yehovha a rhelela a ri epapeni,+ a vulavula na yena,+ hiloko a teka moya wun’wana wo kwetsima+ lowu a a n’wi nyike wona a wu nyika vakulukumba va 70. Hi ku hatlisa loko va nyikiwe moya wo kwetsima, va sungula ku profeta,+ kambe a va ha tlhelanga va swi endla.
26 A ku ri ni vavanuna vambirhi lava saleke enxaxeni. Mavito ya vona a ku ri Elidadi na Medada. Hiloko moya wo kwetsima wu va eka vona, hikuva mavito ya vona a ma tsariwile, kambe a va nga yanga etendeni ra nhlengeletano. Kutani va sungula ku profeta enxaxeni. 27 Hiloko jaha rin’wana ri tsutsuma ri ya vikela Muxe ri ku: “Elidadi na Medada va le ku profeteni enxaxeni!” 28 Kutani Yoxuwa+ n’wana wa Nuni, loyi a a ri nandza wa Muxe ku sukela loko a ha ri muntshwa, a ku: “Muxe hosi yanga, va tshikise!”+ 29 Kambe Muxe a ku eka yena: “Xana u ringeta ku sirhelela mina hi mavondzo ya wena? Ndzi navela onge loko vanhu va Yehovha hinkwavo a va ri vaprofeta nileswaku Yehovha a va nyika moya wakwe!” 30 Hi ku famba ka nkarhi Muxe ni vakulukumba va Israyele va tlhelela enxaxeni.
31 Kutani Yehovha a endla leswaku xidzedze xi tisa tin’hwari,* ti huma hi le lwandle, ti phatsama enxaxeni,+ kwalomu ka mpfhuka wo ringana siku eka tlhelo lerin’wana ni mpfhuka wo ringana siku eka tlhelo lerin’wana, a ti rhendzele nxaxa hinkwawo, a ti fumbane kwalomu ka mitara* ku suka ehansi. 32 Kutani vanhu va hlengeleta tin’hwari siku rero hinkwaro ni vusiku byebyo hinkwabyo ni siku leri landzelaka hinkwaro. A nga kona loyi a hlengeleteke ehansi ka tihomere* ta khume naswona va ti aneke hinkwako va rhendzela nxaxa. 33 Loko nyama ya ha ri emenweni ya vona, va nga si yi cakunya, hiloko Yehovha a hlundzukela vanhu, kutani Yehovha a dlaya vanhu vo tala swinene.+
34 Kutani ndhawu yoleyo va yi thya Kibiroti-hatavha,*+ hikuva kwalaho hi laha va lahleke vanhu lava a va ri ni makwanga.+ 35 Loko va suka eKibiroti-hatavha va ye eHaseroti kutani va tshama eHaseroti.+
12 Hiloko Meriyamu na Aroni va pfukela Muxe hikwalaho ka leswi a a teke wansati wa Mukuxi, hikuva a a teke wansati wa Mukuxi.+ 2 Va ku: “Xana Yehovha u vulavula na vanhu hi ku tirhisa Muxe ntsena? Xana hina a nga hi tirhisanga ke?”+ Yehovha a a yingisile.+ 3 Muxe a a rhule swinene ku tlula vanhu hinkwavo*+ emisaveni.
4 Xikan’wekan’we Yehovha a byela Muxe na Aroni na Meriyamu a ku: “N’wina vanharhu humani mi ya etendeni ra nhlengeletano.” Hiloko va huma hi vunharhu bya vona. 5 Kutani Yehovha a rhelela a ri epapeni lerikulu,+ a fika a yima enyangweni ya tende a vitana Aroni na Meriyamu. Hiloko va tshinela hi vumbirhi bya vona. 6 A ku: “Ndzi kombela mi ndzi yingisa. Loko a ku ri ni muprofeta wa Yehovha exikarhi ka n’wina, a ndzi ta titivisa eka yena hi xivono+ naswona a ndzi ta vulavula na yena enorhweni.+ 7 Kambe a ndzi endlanga tano eka nandza wa mina Muxe! U langutela vanhu va mina hinkwavo.*+ 8 Ndzi vulavula na yena hi ku kongoma,+ a ndzi tirhisi mawetana;* naswona u vona ku vonakala ka Yehovha. Hikwalaho ka yini mi nga chavanga ku pfukela nandza wa mina Muxe?”
9 Hiloko Yehovha a va hlundzukela swinene, kutani a suka eka vona. 10 Papa ri suka ehenhla ka tende kutani waswivo, Meriyamu a a biwe hi nhlokonho, a lo paa, ku fana ni gamboko.+ Loko Aroni a languta Meriyamu, a vona a biwe hi nhlokonho.+ 11 Hi ku hatlisa Aroni a byela Muxe a ku: “Hosi yanga ndza ku kombela! Ndzi kombela leswaku u nga hi xupuli hikwalaho ka xidyoho lexi hi xi endleke! Leswi hi swi endleke i vuphukuphuku. 12 Ndza ku kombela, u nga n’wi tshiki a fana ni n’wana loyi a velekiweke a file, loyi hafu ya miri wakwe yi boleke!” 13 Hiloko Muxe a sungula ku huwelela eka Yehovha a ku: “Xikwembu xanga, ndzi kombela u n’wi horisa! Ndza ku kombela!”+
14 Yehovha a hlamula Muxe a ku: “Loko tata wakwe o n’wi tshwutela exikandzeni, xana a a nga ta khomiwa hi tingana ku ringana masiku ya nkombo? A humesiwe a ya tshama yexe ehandle ka nxaxa ku ringana masiku ya nkombo,+ endzhaku ka sweswo a nga vuya.” 15 Hiloko Meriyamu a humesiwa a ya tshama yexe ehandle ka nxaxa ku ringana masiku ya nkombo,+ naswona vanhu a va rhurhanga kukondza Meriyamu a vuyisiwa. 16 Kutani vanhu va suka eHaseroti+ va ya dzima mixaxa emananga ya Parani.+
13 Yehovha a byela Muxe a ku: 2 “Rhuma vavanuna va ya kambela tiko ra Kanana, leri ndzi ri nyikaka Vaisrayele. U ta rhuma wanuna un’we eka nyimba ha yin’we, loyi a nga ndhuna+ exikarhi ka vona.”+
3 Hiloko Muxe a va rhuma va suka emananga ya Parani+ hilaha Yehovha a leriseke hakona. Vavanuna lava hinkwavo a va ri tindhuna ta Vaisrayele. 4 Mavito ya vona hi lawa: eka nyimba ya Rhuveni, Xamuwa n’wana wa Zakuru; 5 eka nyimba ya Simiyoni, Xafati n’wana wa Hori; 6 eka nyimba ya Yuda, Kalebe+ n’wana wa Yefune; 7 eka nyimba ya Isakara, Igali n’wana wa Yosefa; 8 eka nyimba ya Efrayimi, Hoxeya+ n’wana wa Nuni; 9 eka nyimba ya Benjamini, Palati n’wana wa Rafu; 10 eka nyimba ya Zebuloni, Gadiyele n’wana wa Sodi; 11 eka nyimba ya Yosefa,+ ku nga nyimba ya Manase,+ Gadayi n’wana wa Susi; 12 eka nyimba ya Dani, Amiyele n’wana wa Gemali; 13 eka nyimba ya Axere, Setura n’wana wa Mikayele; 14 eka nyimba ya Neftali, Nahabi n’wana wa Vhofisi; 15 eka nyimba ya Gadi, Geyuwele n’wana wa Maki. 16 Lawa i mavito ya vavanuna lava Muxe a va rhumeke leswaku va ya kambela tiko. Kutani Muxe a thya Hoxeya n’wana wa Nuni a ku i Yoxuwa.*+
17 Loko Muxe a va rhuma ku ya kambela tiko ra Kanana u va byele leswi: “Fambani mi ya eNegebu, kutani mi tlhandlukela endhawini leyi nga ni tintshava.+ 18 Mi fanele mi vona leswi tiko ri nga xiswona,+ nileswaku vanhu lava tshamaka eka rona va ni matimba kumbe va tsanile, loko va ri vatsongo kumbe va tele, 19 loko tiko ri ri rinene kumbe ri bihile ni loko miti leyi va tshamaka eka yona yi ri matende kumbe yi biyeriwile. 20 Mi tlhela mi kamba leswaku tiko ri nonile kumbe a ri nonanga,+ ni loko ku ri ni mirhi kumbe yi nga ri kona. Mi fanele ni va ni xivindzi+ naswona mi kha yin’wana ya mihandzu ya tiko.” A ku ri nkarhi wa madiriva lama wupfaka ku sungula.+
21 Hiloko va famba va ya kambela tiko ku sukela emananga ya Zini+ ku ya eRehobo+ ekusuhi ni le Lebo-hamati.*+ 22 Loko va ya eNegebu, va fike eHebroni,+ laha a ku tshama Ahimani, Sexayi na Talimayi+ vana va Anaka.+ Ku kumeke leswaku muti wa Hebroni a wu akiwe malembe ya nkombo ku nga si akiwa muti wa Sowana wa le Egipta. 23 Loko va fika eNkoveni wa Exikoli,+ va tseme rhavi leri a ri ri ni xichocho xin’we xa madiriva, lexi nga rhwariwa hi vavanuna vambirhi hi nhonga, ku katsa ni magrenada ni makuwa.+ 24 Va thye ndhawu yoleyo va ku i Nkova wa Exikoli*+ hikwalaho ka xichocho lexi Vaisrayele va xi tsemeke kwalaho.
25 Endzhaku ka masiku ya 40,+ va vuya eku kambeleni ka tiko. 26 Va tlhelela eka Muxe na Aroni ni le ka Vaisrayele hinkwavo emananga ya Parani, eKadexi.+ Va byela vanhu leswi va swi voneke ni ku va komba mihandzu ya tiko. 27 Kutani va byela Muxe va ku: “Hi nghenile etikweni leri u hi rhumeke eka rona, hakunene ri khuluka ntswamba ni vulombe+ naswona mihandzu ya rona hi leyi.+ 28 Nilokoswiritano, vanhu lava tshamaka etikweni rero va ni matimba naswona miti leyi biyeriweke i yikulu ngopfu. Hi tlhele hi vona ni vana va Anaka kwalaho.+ 29 Vaamaleke+ va tshama etikweni ra Negebu,+ Vaheti, Vayebusi+ ni Vaamori+ va tshama endhawini ya tintshava, kasi Vakanana+ va tshama ekusuhi ni lwandle+ etlhelo ka Yordani.”
30 Hiloko Kalebe a ringeta ku miyeta vanhu lava a va yime emahlweni ka Muxe, a ku: “A hi fambeni sweswi, hakunene hi ta ri teka ri va ra hina, hi ta hlula.”+ 31 Kambe vavanuna lava a va fambe na yena va ku: “A hi nge swi koti ku lwa ni vanhu lavaya hikuva va ni matimba ku hi tlula.”+ 32 Hiloko va ya emahlweni va byela Vaisrayele swilo swo biha+ hi tiko leri va ri kambeleke va ku: “Tiko leri hi ri kambeleke, i tiko ro chavisa, a hi nge poni naswona vanhu hinkwavo lava hi va voneke kwalaho i swihontlovila.+ 33 Hi vone na Manefilimi, vana va Anaka+ vatukulu va Manefilimi, lerova a hi tivona hi fana ni tinjiya eka vona, na vona a va hi vona hi ri tano.”
14 Hiloko vanhu hinkwavo va sungula ku tlhava mukhosi, va kalakala vusiku byebyo hinkwabyo.+ 2 Vaisrayele hinkwavo va sungula ku gungulela Muxe na Aroni,+ kutani vanhu hinkwavo va sungula ku va pfukela va ku: “Loko a hi lo fela etikweni ra Egipta kumbe loko a hi lo fela kwala mananga! 3 Hikwalaho ka yini Yehovha a hi tisa etikweni leri leswaku hi ta dlawa hi banga?+ Vasati va hina ni vana va hina va ta phangiwa.+ Xana a swi antswi hi tlhelela eEgipta?”+ 4 Va kale va byelana va ku: “A hi hlawuleni murhangeri hi tlhelela eEgipta!”+
5 Hiloko Muxe na Aroni va khinsama emahlweni ka Vaisrayele hinkwavo swikandza swa vona swi languta ehansi. 6 Yoxuwa+ n’wana wa Nuni na Kalebe+ n’wana wa Yefune, lava a va ri van’wana va lava kambeleke tiko va handzula swiambalo swa vona, 7 va byela Vaisrayele hinkwavo va ku: “Tiko leri hi yeke ku ya ri kambela i tiko lerinene ngopfu.+ 8 Loko ho tsakisa Yehovha, kunene u ta hi yisa etikweni leri, a hi nyika rona, tiko leri khulukaka ntswamba ni vulombe.+ 9 Kambe a mi fanelanga mi xandzukela Yehovha naswona mi nga va chavi vanhu va tiko leriya,+ hikuva hi ta va hlula.* Xisirhelelo xa vona xi sukile eka vona naswona Yehovha u na hina.+ Mi nga va chavi.”
10 Hambiswiritano, vanhu hinkwavo va kanela ku va khandla hi maribye.+ Kambe ku vangama ka Yehovha ku humelela etendeni ra nhlengeletano ku voniwa hi Vaisrayele hinkwavo.+
11 Kutani Yehovha a byela Muxe a ku: “Xana vanhu lava va ta ndzi delela ku fikela rini+ naswona xana va ta pfumala ripfumelo eka mina ku fikela rini hambiloko ndzi va endlele masingita lawa hinkwawo?+ 12 Inge ndzi va ba hi ntungu ndzi va lovisa, kutani wena ndzi ku endla u va tiko lerikulu ni leri nga ni matimba ku va tlula.”+
13 Kambe Muxe a byela Yehovha a ku: “Vaegipta lava u humeseke vanhu lava etikweni ra vona hi matimba ya wena va ta twa hi mhaka leyi,+ 14 kutani va ta byela vaaki va tiko leri. Vanhu lava na vona va swi twile leswaku wena Yehovha u le xikarhi ka vanhu lava,+ naswona u humelele eka vona hi xiviri.+ Hi wena Yehovha, naswona papa ra wena ri yime ehenhla ka vona, kutani u famba emahlweni ka vona u ri epapeni lerikulu ninhlikanhi ni le ndzilweni lowukulu nivusiku.+ 15 Loko wo dlaya vanhu lava hi nkarhi wun’we, matiko lama tweke ndhuma ya wena ma ta ku: 16 ‘Yehovha u tsandzeke ku nghenisa vanhu lava etikweni leri a va hlambanyeleke ku va nyika rona, kutani u va dlaye emananga.’+ 17 Yehovha, ndza ku kombela, va kombe matimba ya wena hilaha u tshembiseke hakona u ku: 18 ‘Yehovha u hlwela ku hlundzuka, u ni rirhandzu,+ u rivalela swidyoho ni ku tlula nawu, kambe a nga ka a nga tshiki ku xupula loyi a dyohaka, u xupula vana hikwalaho ka swidyoho swa vatata wa vona, eka xitukulwana xa vunharhu ni le ka xitukulwana xa vumune.’+ 19 Ndzi kombela u rivalela vanhu lava xidyoho xa vona hikwalaho ka leswi u nga ni rirhandzu, hilaha u rivaleleke vanhu lava hakona ku sukela eEgipta ku ta fikela sweswi.”+
20 Hiloko Yehovha a ku: “Ndza va rivalela hilaha u kombelaka hakona.+ 21 Kambe ndza hlambanya hi mina leswaku misava hinkwayo yi ta tala hi ku vangama ka Yehovha.+ 22 Hambiswiritano, hinkwavo lava voneke ku vangama ka mina ni masingita ya mina,+ leswi ndzi swi endleke eEgipta ni le mananga kambe va yeke emahlweni va ndzi ringa+ ka khume, va tlhela va nga ndzi yingisi,+ 23 a va nge ngheni etikweni leri ndzi ri hlambanyeleke vatata wa vona. Hinkwavo lava ndzi delelaka a va nge ri voni.+ 24 Kambe leswi nandza wa mina Kalebe,+ a a hambane ni lavan’wana naswona a ndzi yingiseke hi mbilu hinkwayo, kunene ndzi ta n’wi yisa etikweni leri a yeke eka rona naswona ri ta va ndzhaka ya vana vakwe.+ 25 Leswi Vaamaleke ni Vakanana+ va tshamaka enkoveni, mundzuku mi fanele mi tlhela mi ya emananga hi ndlela leyi yaka eLwandle ro Tshwuka.”+
26 Hiloko Yehovha a byela Muxe na Aroni a ku: 27 “Xana vanhu lava vo homboloka va ta ndzi gungulela ku fikela rini?+ Ndzi swi twile leswi Vaisrayele va ndzi gungulelaka ha swona.+ 28 Va byele u ku, ‘“Ndza hlambanya hi mina,” ku vula Yehovha, “ndzi ta swi endla leswi ndzi mi tweke mi swi vula!+ 29 Mi ta fela kwala mananga,+ n’wina hinkwenu lava ndzi gunguleleke, hinkwenu lava tsarisiweke lava mi nga ni malembe ya 20 ku ya ehenhla.+ 30 Hinkwenu a mi nge ngheni etikweni leri ndzi hlambanyeke leswaku mi ta tshama eka rona,+ handle ka Kalebe n’wana wa Yefune na Yoxuwa n’wana wa Nuni.+
31 “‘“Ndzi ta nghenisa vana va n’wina lava mi vuleke leswaku va ta phangiwa,+ va ta ri tiva tiko leri mi ri nyenyeke.+ 32 Kambe mitsumbu ya n’wina yi ta wela kwala mananga. 33 Vana va n’wina va ta va varisi emananga malembe ya 40,+ va ta xaniseka hikwalaho ka leswi mi nga tshembekangiki,* kukondza hinkwenu ka n’wina mi fa mi hela emananga.+ 34 Hi ku landza nhlayo ya masiku lawa mi kambeleke tiko, ku nga masiku ya 40,+ siku rin’we ri ta yimela lembe rin’we, mi ta xaniseka hikwalaho ka swidyoho swa n’wina ku ringana malembe ya 40,+ mi ta vona vuyelo bya ku ndzi fularhela.*
35 “‘“Mina Yehovha ndzi swi vurile. Leswi hi leswi ndzi nga ta swi endla eka vanhu lava hinkwavo vo homboloka lava hlengeletaneke ku lwa na mina: Va ta hela kwala mananga naswona va ta fela kona.+ 36 Vavanuna lava Muxe a va rhumeke ku ya kambela tiko naswona va kuceteleke vanhu leswaku va n’wi gungulela loko va vuye ni xiviko xo biha mayelana ni tiko rero,+ 37 vavanuna lava vuyeke ni xiviko xo biha mayelana ni tiko rero, va ta xupuriwa va fa emahlweni ka Yehovha.+ 38 Kambe Yoxuwa n’wana wa Nuni na Kalebe n’wana wa Yefune, lava a va ri van’wana va lava yeke ku ya kambela tiko, kunene a va nge fi.”’”+
39 Loko Muxe a byele Vaisrayele hinkwavo marito wolawo, hiloko va sungula ku rila swinene. 40 Ku tlula kwalaho, va pfuka nimixo swinene va ringeta ku tlhandlukela entshaveni, va ku: “Hi lunghekile ku ya endhawini leyi Yehovha a vulavuleke ha yona, hikuva hi dyohile.”+ 41 Kambe Muxe a ku: “Hikwalaho ka yini mi tlula xileriso xa Yehovha? Sweswo a swi nge mi pfuni nchumu. 42 Mi nga tlhandluki hikuva Yehovha a nga na n’wina; valala va n’wina va ta mi hlula.+ 43 Hikuva Vaamaleke ni Vakanana va ta mi hlasela+ naswona mi ta dlayiwa hi banga. Leswi mi fularheleke Yehovha, Yehovha a nge vi na n’wina.”+
44 Hambiswiritano, va tiomise tinhloko va tlhandlukela entshaveni,+ kambe areka ya ntwanano wa Yehovha swin’we na Muxe a swi sukanga exikarhi ka nxaxa.+ 45 Hiloko Vaamaleke ni Vakanana lava a va tshama entshaveni yoleyo va rhelela va va hlasela ni ku va hlongorisa ku ya fika eHorma.+
15 Yehovha a ya emahlweni a vulavula na Muxe a ku: 2 “Byela Vaisrayele u ku, ‘Loko mi hetelela mi fika etikweni leri ndzi mi nyikaka rona leswaku mi ta tshama eka rona,+ 3 kutani mi endlela Yehovha gandzelo ra ndzilo hi homu kumbe hi nyimpfu—hambi i gandzelo ro hisiwa+ kumbe i gandzelo ra xihlambanyo xo hlawuleka kumbe i gandzelo ra ku tirhandzela+ kumbe i gandzelo leri mi ri endlaka hi mikarhi ya mikhuvo ya n’wina+ leswaku mi endlela Yehovha nun’hwelo lowu tsakisaka+— 4 loyi a nyikelaka gandzelo rakwe u fanele a tlhela a nyikela eka Yehovha gandzelo ra mavele ra mapa lama silekeke kahle,+ lama ringanaka ni omere* yin’we ma pfanganisiwe ni kotara ya hini* ya mafurha. 5 U fanele u nyikela ni kotara ya hini ya vhinyo yi va gandzelo ra swakunwa, swin’we ni gandzelo ro hisiwa+ kumbe ra xinyimpfana xin’wana ni xin’wana xa xinuna. 6 Kumbe eka khuna u fanele u endla gandzelo ra mavele hi mapa lama silekeke kahle lama ringanaka ni tiomere timbirhi ma pfanganisiwe ni mafurha lama nga ehenhlanyana ka litara. 7 U fanele u tlhela u nyikela hi vhinyo leyi nga ehenhlanyana ka litara yi va gandzelo ra swakunwa, leswaku yi va nun’hwelo lowu tsakisaka eka Yehovha.
8 “‘Kambe loko wo nyikela nkuzi yi va gandzelo ro hisiwa+ kumbe gandzelo ra xihlambanyo xo hlawuleka+ kumbe magandzelo yo kombela ku rhula eka Yehovha,+ 9 u fanele u tlhela u nyikela nkuzi ni gandzelo ra mavele+ ra mapa lama silekeke kahle lama ringanaka tiomere* tinharhu ma pfanganisiwe ni mafurha lama ringanaka ni hafu ya hini. 10 U fanele u tlhela u nyikela vhinyo leyi ringanaka ni hafu ya hini yi va gandzelo ra swakunwa,+ gandzelo leri endliweke hi ndzilo, leswaku ri va nun’hwelo lowu tsakisaka eka Yehovha. 11 Leswi hi leswi mi faneleke mi swi endla eka nkuzi yin’wana ni yin’wana kumbe khuna rin’wana ni rin’wana kumbe swinyimpfana swa xinuna kumbe timbuti. 12 Mi fanele mi endla tano hi ku ya hi nhlayo ya leswi mi swi nyikelaka. 13 Muisrayele un’wana ni un’wana u fanele a endla tano loko a endla gandzelo hi ndzilo, ri va nun’hwelo lowu tsakisaka Yehovha.
14 “‘Loko ku ri ni muluveri loyi a tshamaka na n’wina kumbe loyi ku nga khale a tshama na n’wina, kutani a endla gandzelo hi ndzilo, leswaku ri va nun’hwelo lowu tsakisaka Yehovha, u fanele a ri endla hilaha mi ri endlaka hakona.+ 15 Ku ta tirha nawu wun’we eka n’wina hinkwenu ni le ka muluveri loyi a tshamaka na n’wina. Nawu lowu, wu ta tirha ni le ka vatukulu va n’wina hilaha ku nga heriki. N’wina ni muluveri ma fana emahlweni ka Yehovha.+ 16 Ku ta tirha nawu wun’we ni xiboho xin’we eka n’wina ni valuveri lava tshamaka na n’wina.’”
17 Yehovha a ya emahlweni a byela Muxe a ku: 18 “Byela Vaisrayele u ku, ‘Loko mi fika etikweni leri ndzi mi yisaka eka rona, 19 ivi mi dya swakudya* swa tiko rero,+ mi fanele mi nyikela eka Yehovha. 20 Mi fanele mi nyikela hi mapa ya leswi tshoveriweke ku sungula+ mi endla swinkwa leswi endliweke ku fana ni swingwavila. Mi fanele mi swi nyikela ku fana ni munyikelo wa mavele ya le xivuyeni. 21 N’wina ni vatukulu va n’wina mi fanele mi nyikela eka Yehovha mapa ya swin’wana swa leswi tshoveriweke ku sungula hilaha ku nga heriki.
22 “‘Loko mo tshuka mi endla xihoxo, mi tsandzeka ku endla swileriso leswi hinkwaswo, leswi Yehovha a swi byeleke Muxe, 23 hinkwaswo leswi Yehovha a mi leriseke swona hi ku tirhisa Muxe ku sukela siku leri Yehovha a mi leriseke swona ku ya fikela ni le ka vatukulu va n’wina, 24 loko swi endleke hi xihoxo vanhu va nga swi tivi, vanhu hinkwavo va fanele va nyikela xinkuzana xin’we xi va gandzelo ro hisiwa, leswaku xi ta va nun’hwelo lowu tsakisaka Yehovha ni gandzelo ra xona ra mavele ni gandzelo ra xona ra swakunwa, hi ku ya hi endlelo ra kona+ ni ximbutana xin’we xi va gandzelo ra xidyoho.+ 25 Muprista u ta kombela leswaku Vaisrayele hinkwavo va rivaleriwa, kutani va ta rivaleriwa,+ hikuva a ku ri xihoxo naswona va endlele Yehovha gandzelo hi ndzilo ni gandzelo ra xidyoho emahlweni ka Yehovha hikwalaho ka xihoxo xa vona. 26 Vaisrayele hinkwavo ni valuveri lava tshamaka na vona va ta rivaleriwa hikuva a ku ri xihoxo xa vanhu hinkwavo.
27 “‘Loko munhu o tshuka a dyoha hi xihoxo, u fanele a nyikela mbuti ya ntswele leyi nga ni lembe yi va gandzelo ra xidyoho.+ 28 Muprista u ta kombelela munhu loyi a nga dyohangiki hi vomu ku rivaleriwa eka Yehovha, kutani u ta rivaleriwa.+ 29 Ku fanele ku tirha nawu wun’we eka Vaisrayele ni le ka valuveri lava tshamaka na n’wina, loko munhu a nga dyohanga hi vomu.+
30 “‘Kambe munhu loyi a dyohaka hi vomu,+ hambi i Muisrayele kumbe i muluveri, u rhukana Yehovha naswona u fanele a dlayiwa. 31 U fanele a dlayiwa hikwalaho ka leswi a deleleke Yehovha a tlhela a tlula xileriso xakwe.+ U ta fela xidyoho xakwe.’”+
32 Loko Vaisrayele va ha ri emananga, va tshame va kuma munhu a ri karhi a rhotela tihunyi hi siku ra Savata.+ 33 Lava n’wi kumeke a ri karhi a rhotela tihunyi va n’wi yise eka Muxe na Aroni ni vanhu hinkwavo. 34 Hiloko va n’wi pfalela+ hikuva a swi nga tiviwi leswaku ku fanele ku endliwa yini hi yena.
35 Kutani Yehovha a byela Muxe a ku: “Munhu yoloye u fanele a dlayiwa,+ vanhu hinkwavo va fanele va n’wi khandla hi maribye ehandle ka nxaxa.”+ 36 Hiloko vanhu hinkwavo va n’wi humesela ehandle ka nxaxa, va n’wi khandla hi maribye kukondza a fa, hilaha Yehovha a leriseke Muxe hakona.
37 Yehovha a ya emahlweni a byela Muxe a ku: 38 “Byela Vaisrayele ni vatukulu va vona leswaku va fanele va tiendlela makhaxa* emakumu ka swiambalo swa vona naswona va fanele va rhungelela ntambhu ya wasi ehenhlanyana ka makhaxa.+ 39 ‘Mi fanele mi endla makhaxa emakumu ka swiambalo swa n’wina leswaku loko mi ma vona mi ta tsundzuka milawu hinkwayo ya Yehovha kutani mi yingisa.+ A mi fanelanga mi landzela timbilu ta n’wina ni mahlo ya n’wina, hikuva sweswo swi ta endla leswaku mi gandzela swikwembu swin’wana.*+ 40 Leswi swi ta mi pfuna leswaku mi tsundzuka ni ku yingisa milawu ya mina hinkwayo naswona mi ta va mi kwetsima emahlweni ka Xikwembu xa n’wina.+ 41 Hi mina Yehovha Xikwembu xa n’wina loyi a mi humeseke etikweni ra Egipta leswaku mi ta swi tiva leswaku ndzi Xikwembu xa n’wina.+ Hi mina Yehovha Xikwembu xa n’wina.’”+
16 Kutani Kora+ n’wana wa Izihara,+ n’wana wa Kohata,+ n’wana wa Levhi+ a boha xikungu ni vana va Eliyabu+ ku nga Dathani na Abirama na Oni n’wana wa Pelethi wa vana va Rhuveni.+ 2 Hiloko vona ku katsa ni vavanuna van’wana va 250 va Vaisrayele, lava nga tindhuna leti hlawuriweke, vavanuna va ndhuma, va pfukela Muxe. 3 Kutani va hlengeletana va pfukela+ Muxe na Aroni, va ku: “Hi karhele hi n’wina! Nhlengeletano hinkwayo yi hlawulekile+ naswona Yehovha u le xikarhi ka yona.+ Hikwalaho ka yini n’wina mi titlakusa ehenhla ka vanhu va Yehovha?”
4 Loko Muxe a twa sweswo, a khinsama xikandza xakwe xi languta ehansi. 5 Hiloko Muxe a byela Kora ni vaseketeri vakwe hinkwavo a ku: “Nimixo Yehovha u ta hi byela loyi a nga wa yena,+ loyi a hlawulekeke ni loyi a faneleke ku tshinela eka yena,+ loyi a nga ta n’wi hlawula+ u ta tshinela eka yena. 6 Endlani leswi: Wena Kora ni vaseketeri va wena+ tekani swo khoma ndzilo,+ 7 mi chela ndzilo ni murhi wo nun’hwela eka swona, mi ya yima emahlweni ka Yehovha mundzuku, loyi Yehovha a nga ta n’wi hlawula,+ hi yena loyi a hlawulekeke. Se mi tlule mpimo n’wina vana va Levhi!”+
8 Kutani Muxe a byela Kora a ku: “Ndzi kombela mi ndzi yingisa n’wina vana va Levhi. 9 Xana a mi eneriseki hi leswi Xikwembu xa Israyele xi mi hlawuleke eka Vaisrayele,+ xi mi pfumelela ku xi tirhela etabernakeleni ya Yehovha ni ku yima emahlweni ka vanhu mi va tirhela,+ 10 nileswi xi endleke leswaku mi va ekusuhi na xona swin’we ni vamakwenu hinkwavo, vana va Levhi? Xana mi lava ku teka ni vuprista?+ 11 Hikwalaho ka sweswo, wena ni vaseketeri va wena hinkwavo mi lwa na Yehovha. Loko ku ri Aroni, wo va yini lerova mi n’wi gungulela?”+
12 Endzhaku ka sweswo Muxe a rhumela rito leswaku ku ya vitaniwa Dathani na Abirama+ vana va Eliyabu, kambe va ku: “A hi nge ti! 13 Xana a wu eneriseki hi leswi u hi humeseke etikweni leri khulukaka ntswamba ni vulombe u ta hi dlaya laha mananga?+ Xana sweswi u lava ku tiendla hosi ya hina? 14 A wu si hi fikisa etikweni leri khulukaka ntswamba ni vulombe+ kumbe u hi nyika ndzhaka ya tiko ni nsimu ya madiriva. Xana u ehleketa leswaku u nga va pfala* matihlo vanhu volavo? A hi nge ti!”
15 Hiloko Muxe a hlundzuka swinene kutani a byela Yehovha a ku: “U nga ri languti gandzelo ra vona ra mavele. A ndzi si tshama ndzi va tekela hambi ku ri mbhongolo yinene, kumbe ku vavisa un’wana wa vona.”+
16 Kutani Muxe a byela Kora a ku: “Tanani emahlweni ka Yehovha mundzuku, wena ni vaseketeri va wena na Aroni. 17 Ha un’we wa n’wina a a teke xo khoma ndzilo mi chela murhi wo nun’hwela eka swona, mi yima emahlweni ka Yehovha, vaseketeri va wena va ta khoma swo khoma ndzilo swa vona swa 250, ku katsa na wena na Aroni.” 18 Hiloko hinkwavo va teka swo khoma ndzilo, va swi chela ndzilo ni murhi wo nun’hwela, va ya yima enyangweni ya tende ra nhlengeletano va ri na Muxe na Aroni. 19 Loko Kora a hlengelete vaseketeri vakwe+ lava pfukelaka enyangweni ya tende ra nhlengeletano, ku vangama ka Yehovha ku humelela eka vanhu hinkwavo.+
20 Kutani Yehovha a byela Muxe na Aroni a ku: 21 “Sukani exikarhi ka vanhu lava, leswaku ndzi ta hatla ndzi va herisa.”+ 22 Hiloko va wa swikandza swa vona swi languta ehansi, kutani va ku: “Xikwembu xa hina, Xikwembu lexi tumbuluxeke vanhu hinkwavo,+ xana xidyoho xa munhu un’we xi nga endla leswaku u hlundzukela vanhu hinkwawo?”+
23 Yehovha a byela Muxe a ku: 24 “Byela vanhu u ku, ‘Sukani ekusuhi ni matende ya Kora na Dathani na Abirama!’”+
25 Kutani Muxe a ya eka Dathani na Abirama a ri ni vakulukumba+ va Israyele. 26 A byela vanhu a ku: “Ndzi kombela mi yimela ekule ni matende ya vavanuna lava vo homboloka, mi nga khumbi nchumu swa vona, leswaku mi nga dlawi hikwalaho ka xidyoho xa vona.” 27 Hiloko va hatla va tlhentlhela ekule ni matende ya Kora, Dathani na Abirama, matlhelo hinkwawo, kutani Dathani na Abirama va huma va yima enyangweni ya matende ya vona va ri ni vasati va vona ni vana va vona ku katsa ni vana va vona lavatsongo.
28 Kutani Muxe a ku: “Leswi mi nga ta swi vona namuntlha swi ta mi komba leswaku ndzi rhumiwe hi Yehovha, a ndzi lo tisungulela: 29 Loko vanhu lava vo tifela ku fana ni vanhu hinkwavo, niloko vo xupuriwa ku fana ni vanhu hinkwavo, sweswo swi ta vula leswaku a ndzi rhumiwanga hi Yehovha.+ 30 Kambe loko Yehovha o endla nchumu lowu nga tolovelekangiki eka vona, misava yi pfuleka ivi yi va mita ni hinkwaswo leswi va nga na swona, va nghena eSirheni* va ri karhi va hanya, mi ta swi tiva leswaku vanhu lava va delele Yehovha.”
31 Kuteloko a heta ku vulavula, hiloko misava yi pandzeka.+ 32 Kutani misava yi pfuleka yi va mita ni mindyangu ya vona, ku katsa ni ndyangu wa Kora+ ni hinkwaswo leswi va nga na swona. 33 Xisweswo vona ni mindyangu ya vona va mitiwa hi misava, va nghena eSirheni* va ri karhi va hanya, misava yi tlhela yi va funengeta, va lovisa sweswo.+ 34 Kutani Vaisrayele lava a va ri ekusuhi na vona va baleka loko va twa ku kalakala ka vona, va ku: “Hi chava leswaku misava yi nga hi mita na hina!” 35 Hiloko ku ta ndzilo wu huma eka Yehovha+ wu fika wu herisa vavanuna va 250 lava a va nyikela mirhi yo nun’hwela.+
36 Kutani Yehovha a byela Muxe a ku: 37 “Byela Eliyazara n’wana wa muprista Aroni leswaku a susa swo khoma ndzilo+ endzilweni, hikuva swa kwetsima. Tlhela u n’wi byela leswaku a ya ma hangalasela ekule makala ya kona. 38 Leswo khoma ndzilo swa vavanuna lava feleke swidyoho swa vona, swi fanele swi endliwa swiphepherhele ivi swi namekiwa ealtarini,+ hikuva va swi nyikele Yehovha kutani swi va swo kwetsima. Swi ta va xikombiso eka Vaisrayele.”+ 39 Hiloko muprista Eliyazara a teka swo khoma ndzilo swa koporo leswi nyikeriweke hi lava dlayiweke hi ndzilo, kutani va swi fula va swi nameka ealtarini 40 hilaha Yehovha a n’wi byeleke hakona hi ku tirhisa Muxe. Ku ve xitsundzuxo eka Vaisrayele leswaku a ku na munhu loyi a nga riki muprista* loyi a pfumeleriweke ku hisela Yehovha mirhi yo nun’hwela handle ka vana va Aroni,+ ni leswaku a nga kona loyi a faneleke a tekelela Kora ni vaseketeri vakwe.+
41 Hi siku leri landzelaka, Vaisrayele va sungula ku gungulela Muxe na Aroni+ va ku: “N’wina vambirhi mi dlaye vanhu va Yehovha.” 42 Loko vanhu va ha hlengeletanile va ri karhi va gungulela Muxe na Aroni, va te loko va languta tende ra nhlengeletano, va vona papa ri ri funengetile kutani ku humelela ku vangama ka Yehovha.+
43 Hiloko Muxe na Aroni va ya etendeni ra nhlengeletano,+ 44 Yehovha a byela Muxe a ku: 45 “Sukani exikarhi ka vanhu lava, leswaku ndzi ta va lovisa.”+ Loko va twa sweswo, va wa swikandza swa vona swi languta ehansi.+ 46 Hiloko Muxe a byela Aroni a ku: “Teka xo khoma ndzilo u ya oka ndzilo ealtarini,+ u chela ni murhi wo nun’hwela u hatla u ya laha vanhu va nga kona u ya va kombelela ndzivalelo,+ hikuva Yehovha u va hlundzukerile. Ntungu wu sungurile!” 47 Kutani Aroni a hatla a xi teka, hilaha Muxe a vuleke hakona, a tsutsumela exikarhi ka vanhu, loko a fika u kume leswaku ntungu ana se a wu sungurile. Hiloko a chela murhi wo nun’hwela eka xo khoma ndzilo kutani a sungula ku kombelela vanhu ku rivaleriwa. 48 Hiloko a yima a nga suki exikarhi ka lava feke ni lava hanyaka, kukondza ntungu wu hela. 49 Lava dlayiweke hi ntungu a va ri 14 700, ku nga hlayiwi lava feke hikwalaho ka Kora. 50 Ntungu a wu herile loko Aroni a tlhelela eka Muxe enyangweni ya tende ra nhlengeletano.
17 Kutani Yehovha a byela Muxe a ku: 2 “Byela Vaisrayele va ku tisela nhonga yin’we leyi humaka eka nyimba ha yin’we, eka ndhuna ya nyimba ha yin’we,+ ku ta va tinhonga ta 12. U ta tsala vito ra ndhuna ya nyimba ha yin’we enhongeni ya yona. 3 U ta tsala vito ra Aroni eka nhonga ya Levhi, hikuva ndhuna ya nyimba ha yin’we yi ni nhonga ya yona. 4 Veka tinhonga etendeni ra nhlengeletano emahlweni ka areka ya Vumbhoni,+ laha ndzi humelelaka kona eka wena nkarhi na nkarhi.+ 5 Nhonga ya munhu loyi ndzi nga ta n’wi hlawula+ yi ta hluka, xisweswo Vaisrayele va ta tshika ku ndzi gungulela,+ hilaha va ku gungulelaka hakona na wena.”+
6 Hiloko Muxe a byela Vaisrayele ni tindhuna ta vona hinkwato leswaku ti n’wi nyika tinhonga—nhonga ya ndhuna ya nyimba ha yin’we, tinhonga ta 12—nhonga ya Aroni a yi ri exikarhi ka tinhonga teto. 7 Kutani Muxe a veka tinhonga emahlweni ka Yehovha etendeni ra Vumbhoni.
8 Hi siku leri landzelaka, loko Muxe a nghena etendeni ra Vumbhoni, nhonga ya Aroni loyi a a ri wa nyimba ya Levhi a yi hlukile, yi ri ni swiluva ni timongo ta almondi leti wupfeke. 9 Kutani Muxe a humesa tinhonga hinkwato emahlweni ka Yehovha a ti yisa eka Vaisrayele. Hiloko va ti languta ivi ndhuna ha yin’we yi teka nhonga ya yona.
10 Hiloko Yehovha a byela Muxe a ku: “Tlherisela nhonga ya Aroni+ emahlweni ka areka ya Vumbhoni leswaku yi ta va xitsundzuxo+ eka lava xandzukaka,+ va ta tshika ku ndzi gungulela leswaku va nga fi.” 11 Kutani Muxe a hatla a endla hilaha Yehovha a n’wi leriseke hakona. U endle tano.
12 Hiloko Vaisrayele va byela Muxe va ku: “Sweswi hi ta fa, hi ta lova, hi ta lova hinkwerhu! 13 Un’wana ni un’wana loyi a tshinelaka ekusuhi ni tabernakela ya Yehovha u ta fa!+ Xana hi fanele hi fa hi ndlela leyi hinkwerhu?”+
18 Yehovha a ya emahlweni a byela Aroni a ku: “Wena ni vana va wena ni vandyangu wa wena mi ta hlamula hikwalaho ka xihoxo lexi nga ta endleka endhawini yo kwetsima+ naswona wena ni vana va wena mi ta hlamula hikwalaho ka xihoxo lexi nga ta endleka eka ntirho wa n’wina wa vuprista.+ 2 Teka ni vamakwenu va nyimba ya Levhi, nyimba ya vakokwa wa wena, leswaku va ta ku pfuna, wena+ ni vana va wena emahlweni ka tende ra Vumbhoni.+ 3 Va ta endla ntirho lowu u nga ta va nyika wona ni ntirho hinkwawo lowu va faneleke va wu endla etendeni.+ Hambiswiritano a va fanelanga va tshinela ekusuhi ni swibya swa ndhawu yo kwetsima ni le altarini leswaku wena na vona mi nga fi.+ 4 Va ta tirha na wena va endla mitirho hinkwayo leyi lavekaka etendeni ra nhlengeletano naswona munhu un’wana ni un’wana la nga riki muprista* a nga fanelanga a tshinela ekusuhi na wena.+ 5 Mi fanele mi endla mitirho ya n’wina endhawini yo kwetsima+ ni le altarini,+ leswaku ndzi nga ha va hlundzukeli+ Vaisrayele. 6 Loko ku ri mina ndzi teke vamakwenu, ku nga Valevhi exikarhi ka Vaisrayele ndzi mi nyika vona.+ Va nyikiwe Yehovha leswaku va endla mitirho leyi nga kona etendeni ra nhlengeletano.+ 7 Wena ni vana va wena mi ta endla mitirho leyi fambisanaka ni vuprista eka timhaka leti khumbaka altari ni leswi nga endzhaku ka khetheni,+ mi fanele mi endla ntirho lowu.+ Ndzi mi nyike ntirho wa vuprista leswaku wu va nyiko naswona un’wana ni un’wana la nga riki muprista* loyi a nga ta tshinela, u fanele a dlayiwa.”+
8 Yehovha a ya emahlweni a byela Aroni a ku: “Loko ku ri mina ndzi ku veka leswaku u langutela minyikelo leyi nyikeriwaka eka mina.+ Wena ni vana va wena ndzi ta mi nyika swo karhi eka swilo hinkwaswo swo kwetsima leswi nyikeriwaka hi Vaisrayele hilaha ku nga heriki.+ 9 Swilo swo kwetsima ngopfu leswi nyikeriwaka leswi faneleke ku va swa wena eka magandzelo lama endliweke hi ndzilo hi leswi: gandzelo rin’wana ni rin’wana leri va ri endlaka ku katsa ni magandzelo ya vona ya mavele,+ magandzelo ya vona ya xidyoho,+ magandzelo ya vona ya nandzu+ lawa va ndzi endlelaka wona. Hinkwawo ma kwetsima swinene eka wena ni vana va wena. 10 U fanele u swi dyela endhawini yo kwetsima ngopfu.+ Vaxinuna hinkwavo va nga swi dya. Swi ta va swo kwetsima eka wena.+ 11 Swin’wana leswi nga ta va swa wena hi leswi: tinyiko hinkwato leti Vaisrayele va tinyikelaka+ ku katsa ni magandzelo hinkwawo yo ndziwitiwa.+ Ndzi swi nyika wena ni vana va wena, hilaha ku nga heriki.+ Un’wana ni un’wana la nga nyamangiki endyangwini wa wena a nga swi dya.+
12 “Mafurha hinkwawo lamanene ni vhinyo hinkwayo leyintshwa leyinene ni mavele, leswi va swi tshovelaka ku sungula+ leswi va swi nyikaka Yehovha, ndzi ku nyika swona.+ 13 Mihandzu hinkwayo leyi wupfaka ku sungula etikweni ra vona, leyi va nga ta yi tisa eka Yehovha, yi ta va ya wena.+ Un’wana ni un’wana la nga nyamangiki endyangwini wa wena a a nga swi dya.
14 “Xilo xin’wana ni xin’wana lexi nyikeriweke eka Xikwembu eIsrayele xi ta va xa wena.+
15 “Mativula ya swilo hinkwaswo leswi hanyaka,+ leswi va nga ta swi nyikela eka Yehovha, ku nga ha va munhu kumbe xiharhi, swi fanele swi va swa wena. Kambe u fanele u kutsula mativula ya vanhu+ ni mativula ya swifuwo leswi nga basangiki.+ 16 U fanele u xi kutsula hi mali ya nkutsulo wa xona ku sukela loko xi ri ni n’hweti ku ya ehenhla, hi ku ya hi nxavo lowu pimanyetiweke wa swiphemu* swa silivhere swa ntlhanu+ hi ku ya hi mpimo wa ndhawu yo kwetsima.* I tigera* ta 20. 17 I nkuzi ya mativula kumbe xinyimpfana xa xinuna lexi nga mativula, kumbe mbuti ya mativula ntsena leswi u nga fanelangiki u swi kutsula.+ Swa kwetsima. U fanele u n’wan’wasela ngati ya swona ealtarini,+ u hisa mafurha ya swona ma va gandzelo leri endliwaka hi ndzilo ri va nun’hwelo lowu tsakisaka eka Yehovha.+ 18 Nyama ya swona yi ta va ya wena. Ku fana ni xifuva xa gandzelo leri ndziwitiwaka ni nenge wa xinene, swi fanele swi va swa wena.+ 19 Minyikelo hinkwayo yo kwetsima leyi Vaisrayele va nga ta yi nyikela eka Yehovha,+ ndzi yi nyike wena ni vana va wena va majaha ni va vanhwanyana hilaha ku nga heriki.+ I ntwanano lowu nga heriki wa munyu exikarhi ka Yehovha na wena ku katsa ni vana va wena.”
20 Yehovha a ya emahlweni a byela Aroni a ku: “A wu nge vi na ndzhaka etikweni ra vona naswona a wu nge nyikiwi hambi xiphemunyana xa tiko exikarhi ka vona.+ Mina ndzi xiavelo xa wena ni ndzhaka ya wena exikarhi ka Vaisrayele.+
21 “Loko va ri vana va Levhi, ndzi va nyike vukhume+ eIsrayele byi ta va ndzhaka ya vona hikwalaho ka ntirho lowu va wu endlaka etendeni ra nhlengeletano. 22 Vaisrayele va nga ha tshineli etendeni ra nhlengeletano, hikuva va ta tivangela xidyoho kutani va fa. 23 I Valevhi ntsena lava nga ta tirha etendeni ra nhlengeletano naswona hi vona va nga ta tihlamulela eka xihoxo xa vona.+ I nawu lowu nga ta tshama hilaha ku nga heriki eka vatukulu va n’wina hinkwavo leswaku a va fanelanga va va ni ndzhaka exikarhi ka Vaisrayele.+ 24 Hikuva Valevhi ndzi va nyike vukhume bya leswi nyikeriwaka eka Yehovha hi Vaisrayele leswaku byi va ndzhaka ya vona. Hi yona mhaka leyi ndzi va byeleke ndzi ku, ‘A va fanelanga va va ni ndzhaka exikarhi ka Vaisrayele.’”+
25 Kutani Yehovha a byela Muxe a ku: 26 “U fanele u byela Valevhi u ku, ‘Mi ta amukela vukhume lebyi ndzi mi nyikeke byona byi huma eka Vaisrayele, byi ta va ndzhaka ya n’wina,+ kutani na n’wina mi fanele mi humesa vukhume eka vukhume lebyi mi byi kumeke byi va munyikelo eka Yehovha.+ 27 Byi ta tekiwa ku ri munyikelo wa n’wina, onge hiloko ku ri mavele ya le xivuyeni,+ kumbe vhinyo yo tala kumbe mafurha ya n’wina. 28 Hi ndlela yoleyo na n’wina mi ta nyikela eka Yehovha, mi pambula eka vukhume bya swilo hinkwaswo leswi humaka eka Vaisrayele kutani eka swona mi ta nyikela eka Yehovha hi ku swi nyika muprista Aroni. 29 Mi ta nyikela swilo swo hambanahambana eka Yehovha mi pambula eka leswinene ngopfu swa tinyiko hinkwato leti mi nyikiweke+ tona ti ri swilo swo kwetsima.’
30 “U fanele u va byela u ku: ‘Loko mi nyikela leswinene ngopfu, swi ta tekiwa swi ri ntshovelo wa le xivuyeni naswona swi ri vhinyo kumbe mafurha ya Valevhi. 31 N’wina ni mindyangu ya n’wina mi nga swi dyela endhawini yin’wana ni yin’wana, hikuva i hakelo ya n’wina hikwalaho ka leswi mi tirhaka etendeni ra nhlengeletano.+ 32 A mi nge tivangeli xidyoho emhakeni leyi, ntsena loko mi nyikela leswinene eka swona naswona a mi fanelanga mi thyakisa swilo swo kwetsima swa Vaisrayele hikuva mi ta fa.’”+
19 Yehovha a tlhela a vulavula na Muxe na Aroni a ku: 2 “Lowu i nawu lowu Yehovha a wu leriseke a ku, ‘Byela Vaisrayele leswaku va ku tisela thokazi ro tshwuka leri hanyeke kahle, leri nga riki na xivati+ naswona ri nga si tshamaka ri rhwexiwa joko. 3 Mi ta ri nyika muprista Eliyazara, yena u ta ri humesela ehandle ka nxaxa kutani ri ta tlhaviwa a ri karhi a ri vona. 4 Muprista Eliyazara u ta peta rintiho rakwe eka ngati yin’wana ya rona, a n’wan’wasela ka nkombo emahlweni ka tende ra nhlengeletano.+ 5 Thokazi ri ta hisiwa a ri langutile. Dzovo ra rona ni nyama ya rona ni ngati ya rona ni vulongo bya rona swi ta hisiwa.+ 6 Kutani muprista u ta teka mukedari, hisopa+ ni lapi ro tshwuka a swi hoxa endzilweni lowu hisaka thokazi. 7 Muprista u ta hlantswa swiambalo swakwe a tlhela a hlamba hi mati, endzhaku ka sweswo a nga nghena enxaxeni; kambe muprista u ta va a nyamile ku fikela nimadyambu.
8 “‘Loyi a hiseke thokazi u ta hlantswa swiambalo swakwe hi mati a tlhela a hlamba hi mati, u ta va a nyamile ku fikela nimadyambu.
9 “‘Munhu la nga nyamangiki u ta hlengeleta nkuma wa thokazi+ a wu veka endhawini leyi baseke ehandle ka nxaxa, wu fanele wu hlayisiwa leswaku Vaisrayele va ta wu tirhisa eka mati yo basisa leswi nyameke.+ I gandzelo ra xidyoho. 10 Loyi a hlengeletaka nkuma wa thokazi u ta hlantswa swiambalo swakwe naswona a va la nyameke ku fikela nimadyambu.
“‘Lowu wu ta va nawu wa hilaha ku nga heriki eka Vaisrayele ni le ka valuveri lava tshamaka exikarhi ka vona.+ 11 Un’wana ni un’wana la nga ta khumba ntsumbu, u ta va a nyamile masiku ya nkombo.+ 12 Munhu yoloye u fanele a tibasisa hi mati hi siku ra vunharhu kutani hi siku ra vunkombo u ta va a basile. Kambe loko a nga tibasisi hi siku ra vunharhu, u ta va a ha nyamile hi siku ra vunkombo. 13 Un’wana ni un’wana loyi a khumbaka ntsumbu kutani a nga tibasisi u nyamise tabernakela ya Yehovha,+ munhu yoloye u fanele a dlayiwa eIsrayele.+ U ta tshama a nyamile hikwalaho ka leswi a nga n’wan’waseriwangiki hi mati yo n’wi basisa.+ Ku nyama kakwe ka ha ri ehenhla ka yena.
14 “‘Loko ko tshuka ku fa munhu etendeni, nawu wa kona hi lowu: Loyi a nga ta nghena etendeni ni loyi ana se a a ri kwalaho, u ta nyama ku ringana masiku ya nkombo. 15 Swibya leswi pfulekeke leswi nga riki na swipfalo na swona swi ta nyama.+ 16 Loyi a nga ta khumba munhu enhoveni la dlayiweke hi banga kumbe ntsumbu kumbe rhambu ra munhu kumbe sirha, u ta nyama ku ringana masiku ya nkombo.+ 17 Va fanele va nusa nkuma wa gandzelo ra xidyoho leri nga hisiwa va wu pfanganisa ni mati lama baseke endzeni ka xibya, leswaku va ta basisa loyi a nyameke. 18 Kutani munhu loyi a baseke+ u ta teka hisopa+ a yi peta ematini, a xuva tende ni swibya hinkwaswo ni vanhu lava a va ri kwalaho ni munhu loyi a khumbeke rhambu kumbe loyi a dlayiweke kumbe ntsumbu kumbe sirha. 19 Munhu loyi a baseke u ta xuva loyi a nyameke hi siku ra vunharhu ni hi siku ra vunkombo, u ta n’wi basisa eka xidyoho xakwe hi siku ra vunkombo;+ endzhaku ka sweswo u fanele a hlantswa swiambalo swakwe a tlhela a hlamba hi mati kutani u ta va loyi a baseke nimadyambu.
20 “‘Kambe munhu loyi a nyameke a tlhela a nga tibasisi, u fanele a dlayiwa,+ hikuva u nyamise ndhawu ya Yehovha yo kwetsima. U ta nyama hikwalaho ka leswi a nga xuviwangiki hi mati yo n’wi basisa.
21 “‘Lowu wu ta va nawu wa hilaha ku nga heriki eka vona: Loyi a xuvaka hi mati yo basisa+ u fanele a hlantswa swiambalo swakwe ni loyi a khumbaka mati yo basisa u ta nyama ku fikela nimadyambu. 22 Hinkwaswo leswi munhu loyi a nyameke a nga ta swi khumba, swi ta va swi nga tenganga, loyi a nga ta swi khumba u ta nyama ku fikela nimadyambu.’”+
20 Hi n’hweti yo sungula, Vaisrayele va fike emananga ya Zini, va fika va tshama eKadexi.+ Meriyamu+ u fele kwalaho kutani a lahliwa.
2 Vanhu a va nga ri na mati+ kutani va sungula ku pfukela Muxe na Aroni. 3 Va holovisa Muxe+ va ku: “Loko a hi lo fa swin’we ni vamakwerhu loko va fa emahlweni ka Yehovha! 4 Hikwalaho ka yini mi tise nhlengeletano ya Yehovha emananga lawa leswaku hina ni swifuwo swa hina hi ta fela kona?+ 5 Naswona hikwalaho ka yini mi hi humese eEgipta mi hi tisa endhawini leyi yo biha?+ A hi ndhawu yo byala mbewu ni makuwa ni mirhi ya madiriva ni magrenada naswona a ku na mati yo nwa.”+ 6 Hiloko Muxe na Aroni va suka emahlweni ka vanhu va ya enyangweni ya tende ra nhlengeletano, va fika va khinsama swikandza swa vona swi languta ehansi, kutani ku vangama ka Yehovha ku sungula ku humelela eka vona.+
7 Hiloko Yehovha a byela Muxe a ku: 8 “Teka nhonga u vitana vanhu, wena na Aroni makwenu, kutani mi vulavula ni ribye va mi langutile leswaku ri humesa mati, mi ta va humesela mati eribyeni mi va nyika va nwa vona ni swifuwo swa vona.”+
9 Kutani Muxe a teka nhonga emahlweni ka Yehovha+ hilaha A n’wi leriseke hakona. 10 Endzhaku ka sweswo Muxe na Aroni va vitana vanhu va fika va yima emahlweni ka ribye, kutani Muxe a ku eka vona: “Yingisani, n’wina vaxandzuki! Hi mi humesela mati eribyeni leri ke?”+ 11 Hiloko Muxe a tlakusa voko a ba ribye kambirhi hi nhonga yakwe, kutani ku huma mati yo tala, vanhu ni swifuwo swa vona va sungula ku nwa.+
12 Endzhaku ka sweswo Yehovha a byela Muxe na Aroni a ku: “A mi nge va nghenisi vanhu lava etikweni leri ndzi nga ta va nyika rona, hikuva a mi vanga ni ripfumelo eka mina naswona a mi ndzi kwetsimisanga emahlweni ka Vaisrayele.”+ 13 Lawa i mati ya Meriba,*+ laha Vaisrayele va holoveke na Yehovha, lerova a kala a va komba leswaku wa kwetsima.
14 Endzhaku ka sweswo Muxe a rhumela vanhu va suka eKadexi va ya eka hosi ya le Edomu,+ va ku: “Makwenu Israyele+ u ri, ‘U ma tiva kahle maxangu ya hina hinkwawo. 15 Vatata wa hina va ye eEgipta,+ kutani hi tshame eEgipta malembe*+ yo tala, Vaegipta va hi xanisile, hina ni vatata wa hina.+ 16 Hi hetelele hi rilele Yehovha,+ u hi twile ivi a rhumela ntsumi+ yi hi humesa eEgipta, sweswi hi le Kadexi, muti lowu nga endzilakaneni wa tiko ra wena. 17 Hi kombela u hi pfumelela hi hundza etikweni ra wena. A hi nge kandziyeli masimu kumbe mirhi ya madiriva naswona a hi nge nwi mati eswihlobyeni swa wena. Hi ta famba eGondzweni ra Hosi, a hi nge hambukeli exineneni kumbe eximatsini, kukondza hi hundza etikweni ra wena.’”+
18 Kambe Edomu a ku eka yena: “Mi nga tsemakanyi etikweni ra mina. Loko mo ta, ndzi ta mi hlanganisa hi banga.” 19 Vaisrayele va n’wi hlamula va ku: “Hi ta tifambela hi gondzo, loko hina ni swifuwo swa hina ho nwa mati ya wena, hi ta ku hakela.+ Ho lava ntsena ku tsemakanya etikweni ra wena.”+ 20 Hambiswiritano, Edomu a ku: “U nga tsemakanyi.”+ Hiloko Edomu a huma ku ta hlangana na yena a ri ni vanhu vo tala ni vuthu ra matimba. 21 Hiloko Edomu a arisa xisweswo ku pfumelela Vaisrayele ku tsemakanya etikweni rakwe; kutani Vaisrayele va famba hi ndlela yin’wana.+
22 Vaisrayele, va suka eKadexi va ya fika eNtshaveni ya Hore.+ 23 Kutani Yehovha a byela Muxe na Aroni eNtshaveni ya Hore endzilakaneni wa tiko ra Edomu a ku: 24 “Aroni u ta fa a lahliwa eka varikwavo.+ A nge ngheni etikweni leri ndzi nga ta ri nyika Vaisrayele, hikuva wena na yena a mi ndzi xiximanga ematini ya Meriba.+ 25 Teka Aroni na Eliyazara n’wana wakwe mi ya khandziya Ntshava ya Hore. 26 U fika u hluvula Aroni swiambalo,+ u swi ambexa Eliyazara+ n’wana wakwe, kutani Aroni u ta fela kwalaho.”
27 Hiloko Muxe a endla hilaha Yehovha a leriseke hakona, kutani va khandziya Ntshava ya Hore vanhu hinkwavo va va langutile. 28 Kutani Muxe a hluvula Aroni swiambalo, a ambexa Eliyazara n’wana wakwe, endzhaku ka sweswo Aroni a fela kwalaho ehenhla ka ntshava.+ Hiloko Muxe na Eliyazara va rhelela entshaveni. 29 Loko vanhu hinkwavo va swi vona leswaku Aroni u file, yindlu hinkwayo ya Israyele yi n’wi rila masiku ya 30.+
21 Loko hosi ya Mukanana ya le eAradi+ leyi a yi tshama eNegebu yi twa leswaku Vaisrayele va ta hi ndlela ya le Atarimi, yi va hlasela naswona yi khoma van’wana va vona yi va endla mahlonga. 2 Hiloko Vaisrayele va hlambanya eka Yehovha va ku: “Loko wo hi pfuna leswaku hi hlula vanhu lava, hi ta tlhela hi lovisa ni miti ya vona.” 3 Yehovha a yingisa Vaisrayele, a va pfuna ku hlula Vakanana kutani va lovisa ni miti ya vona. Hikwalaho, va thya ndhawu yoleyo vito ra Horma.*+
4 Loko va ri karhi va ya emahlweni ni riendzo ra vona ku suka eNtshaveni ya Hore+ hi ndlela leyi yaka eLwandle ro Tshwuka leswaku va nga hundzi hi le tikweni ra Edomu,+ vanhu va sungula ku karhala. 5 Hiloko vanhu va tshamela ku gungulela Xikwembu na Muxe,+ va ku: “Hikwalaho ka yini mi hi humese eEgipta leswaku hi ta fela emananga? A ku na swakudya ni mati+ naswona se hi karhele hi xinkwa lexi xo nyenyetsa.”+ 6 Kutani Yehovha a rhumela tinyoka leti nga ni vuxungu exikarhi ka vanhu, hiloko ti lumetela vanhu lerova ku fa Vaisrayele vo tala.+
7 Hiloko vanhu va ya eka Muxe va ku: “Hi dyohile, hi ku gungulela Yehovha na wena.+ Hi kombelele eka Yehovha leswaku a hi susela tinyoka leti.” Kutani Muxe a kombelela vanhu.+ 8 Kutani Yehovha a byela Muxe a ku: “Endla xifaniso xa nyoka leyi nga ni vuxungu u xi hayeka emhandzini. Loko munhu a lumiwa, u ta xi languta leswaku a nga fi.” 9 Xikan’wekan’we Muxe a endla nyoka hi koporo,+ a yi hayeka emhandzini,+ loko munhu a lumiwa hi nyoka a a languta nyoka ya koporo a hola.+
10 Endzhaku ka sweswo, Vaisrayele va suka va ya dzima mixaxa eOboti.+ 11 Kutani va suka eOboti va ya dzima mixaxa eIye-abarima,+ ku nga mananga lama nga ekusuhi na Mowabu, hi le vuxeni. 12 Ku suka kwalaho va ye va ya dzima mixaxa eNkoveni wa Serede.+ 13 Loko va suka kwalaho, va ye va ya dzima mixaxa exifundzheni xa Arinoni,+ lexi nga emananga lama sukelaka endzilakaneni wa Vaamori, hikuva Arinoni i ndzilakana lowu a wu hambanisa Vamowabu ni Vaamori. 14 Hi yona mhaka leyi buku ya Tinyimpi ta Yehovha yi vulavulaka hi muti wa “Vhahebe lowu nga eSufa ni mikova ya Arinoni, 15 ni swintshabyana leswi rhelelaka ku ya fika eswimitanini swa Ara, ivi swi hlangana ni ndzilakana wa Mowabu.”
16 Ku suka kwalaho, va ye eBeyera. Lexi i xihlovo lexi Yehovha a nga byela Muxe eka xona a ku: “Hlengeleta vanhu leswaku ndzi ta va nyika mati.”
17 Hi nkarhi wolowo, Vaisrayele va yimbelele risimu leri:
“Hi humesele mati, wena xihlovo! Yimbelelani!
18 Xihlovo lexi ceriweke hi tihosana, lexi handziweke hi vachaviseki,
Va xi cele hi nhonga ya ndhuna ni hi tinhonga ta vona.”
Hiloko va suka emananga va ya eMatana, 19 va suka eMatana va ya eNahaliyele, ku suka eNahaliyele va ye eBamoti.+ 20 Va suka eBamoti va ya enkoveni lowu nga etikweni ra Mowabu,+ ehenhla ka Pisiga,+ leyi nga ekusuhi na Yeximoni.*+
21 Hiloko Vaisrayele va rhuma vanhu eka Sihoni hosi ya Vaamori va ku:+ 22 “Hi pfumelele hi tsemakanya hi le tikweni ra wena. A hi nge ngheni emasin’wini kumbe entangeni wa wena wa madiriva. A hi nge nwi mati eswihlobyeni swa wena. Hi ta famba hi le Gondzweni ra Hosi kukondza hi tsemakanya tiko ra wena.”+ 23 Kambe Sihoni a nga pfumelanga leswaku Vaisrayele va tsemakanya etikweni rakwe. Ematshan’weni ya sweswo, Sihoni u hlengelete vanhu vakwe hinkwavo leswaku va ya hlasela Vaisrayele emananga kutani a fika eYahasa a sungula ku lwa ni Vaisrayele.+ 24 Kambe Vaisrayele va n’wi hlula hi banga+ kutani va teka tiko rakwe,+ ku sukela eArinoni+ ku ya fika eYaboko,+ ekusuhi ni Vaamoni hikuva muti wa Yazere+ wu le kusuhi ni tiko ra Vaamoni.+
25 Kutani Vaisrayele va teka miti leyi hinkwayo, va sungula ku tshama emitini hinkwayo ya Vaamori,+ eHexiboni ni le swimitanini hinkwaswo leswi nga ekusuhi. 26 Hikuva Hexiboni a wu ri muti wa Sihoni, hosi ya Vaamori loyi a lweke ni hosi ya Mowabu ivi a teka tiko rakwe hinkwaro ku ya fika eArinoni. 27 Hi yona mhaka leyi ku nga ni xivuriso lexi xo vungunya:
“Tanani eHexiboni.
Muti wa Sihoni a wu akiwe wu tiya.
28 Hikuva ndzilo wu hume eHexiboni, langavi ri hume emutini wa Sihoni.
Wu herise muti wa Ara lowu nga eMowabu, vini va tindhawu leti tlakukeke ta Arinoni.
29 Khombo eka wena Mowabu! Mi ta lovisiwa n’wina vanhu va le Kemoxi!+
U tshike vana va wena va majaha va baleka, vana va wena va vanhwanyana u va tshike va va mahlonga ya Sihoni hosi ya Vaamori.
30 A hi va copeni;
Hexiboni wu ta lovisiwa ku ya fika eDiboni;+
A hi wu endleni rhumbi ku ya fika eNofa;
Ndzilo wu ta hangalaka wu ya fika eMedeba.”+
31 Xisweswo Vaisrayele va sungula ku tshama etikweni ra Vaamori. 32 Kutani Muxe a rhuma vavanuna ku ya kambela muti wa Yazere.+ Va fike va teka swimitana leswi nga ekusuhi na wona, va hlongola Vaamori lava a va tshama kwalaho. 33 Endzhaku ka sweswo, va famba hi Ndlela ya Baxani. Hiloko Ogo+ hosi ya le Baxani a ta ni vanhu vakwe hinkwavo leswaku a ta lwa na vona eEdireyi.+ 34 Yehovha a byela Muxe a ku: “U nga n’wi chavi,+ ndzi ta ku pfuna leswaku u n’wi hlula, yena ni vanhu vakwe hinkwavo ni tiko rakwe,+ u ta n’wi endla leswi u swi endleke Sihoni hosi ya Vaamori, loyi a a tshama eHexiboni.”+ 35 Hiloko va n’wi dlaya, yena ni vana vakwe ni vanhu vakwe hinkwavo, a ku ponanga munhu,+ kutani va teka tiko rakwe.+
22 Kutani Vaisrayele va suka va ya dzima mixaxa emananga ya Mowabu entsungeni wa Yordani ku suka eYeriko.+ 2 Balaka+ n’wana wa Sipora a vona hinkwaswo leswi Vaisrayele va swi endleke eka Vaamori, 3 hiloko Vamowabu va sungula ku chava Vaisrayele swinene hikuva a va tele; Vamowabu a vo rhurhumela kunene loko va ehleketa hi Vaisrayele.+ 4 Kutani Vamowabu va byela vakulukumba va le Midiyani+ va ku: “Vanhu lava va ta hi heta hinkwerhu, ku fana ni nkuzi leyi dyaka byanyi enhoveni yi byi heta.”
Balaka n’wana wa Sipora a a ri hosi ya Vamowabu hi nkarhi wolowo. 5 Hiloko a rhumela vanhu eka Balama n’wana wa Beyori loyi a tshama ni maxaka yakwe emutini wa Petoro,+ lowu nga etlhelo ka Nambu.* A n’wi kombela a ku: “Yingisa! Ku ni vanhu lava humaka eEgipta. Va tele swinene+ naswona va tshama ekusuhi ni tiko ra mina. 6 Ndzi kombela u ta ndzi pfuna hi ku ndzi rhukanela vanhu lava,+ hikuva va ni matimba ku ndzi tlula. Kumbexana ndzi nga kota ku va hlula ndzi va hlongola etikweni, hikuva ndzi swi tiva kahle leswaku loyi u n’wi katekisaka wa kateka naswona loyi u n’wi rhukanaka wa rhukaniwa.”
7 Kutani vakulukumba va Mowabu ni va Midiyani va famba swin’we, va khome mali yo hlahluva, va ya eka Balama+ ku ya n’wi byela leswi Balaka a va rhumeke swona. 8 A va hlamula a ku: “Etlelani laha namuntlha, ndzi ta mi byela leswi Yehovha a nga ta ndzi byela swona.” Hiloko tihosana ta Vamowabu ti tshama na Balama.
9 Kutani Xikwembu xi humelela eka Balama xi ku:+ “I vamani vavanuna lava u nga na vona?” 10 Hiloko Balama a byela Xikwembu xa ntiyiso a ku: “Balaka n’wana wa Sipora, hosi ya Vamowabu u rhumele rito eka mina a ku, 11 ‘Yingisa! Ku ni vanhu vo tala swinene lava humaka eEgipta. Tana u ta ndzi rhukanela vona.+ Kumbexana ndzi nga kota ku lwa na vona ndzi va hlongola.’” 12 Kambe Xikwembu xi byela Balama xi ku: “U nga fambi na vona. U nga tshuki u rhukana vanhu volavo, hikuva va katekisiwile.”+
13 Balama a pfuka nimixo a byela tihosana ta Balaka a ku: “Mukani hikuva Yehovha u arile leswaku ndzi famba na n’wina.” 14 Hiloko tihosana ta Vamowabu ti suka, kutani ti fika eka Balaka, ti ku: “Balama u arile ku ta na hina.”
15 Hambiswiritano, Balaka a rhumela tihosana tin’wana to tala, leti xiximekaka ku tlula to sungula. 16 Ti fika eka Balama ti ku: “Balaka n’wana wa Sipora u ri, ‘Ndzi kombela u ta, u nga tsandzeki, 17 ndzi ta ku fundza swinene naswona ndzi ta endla xin’wana ni xin’wana lexi u nga ta ndzi byela xona. Ndzi kombela u ta, u ta ndzi rhukanela vanhu lava.’” 18 Kambe Balama a hlamula malandza ya Balaka a ku: “Hambiloko Balaka o ndzi nyika yindlu yakwe yi tele hi silivhere ni nsuku, a ndzi nge swi koti ku tlula xileriso xa Yehovha Xikwembu xa mina, ku nga khathariseki leswaku i xikulu kumbe i xitsongo.+ 19 Kambe ndzi kombela leswaku na n’wina mi etlela kwala namuntlha, ndzi ta twa leswaku Yehovha u ri yini hi mhaka leyi.”+
20 Kutani Xikwembu xi humelela eka Balama nivusiku xi ku: “Loko vavanuna lava va tele ku ta ku vitana, famba na vona. Kambe u ta vulavula ntsena leswi ndzi ku byelaka swona.”+ 21 Hiloko Balama a pfuka nimixo a gada mbhongolo* yakwe, a famba ni tihosana ta Mowabu.+
22 Kutani Xikwembu xi hlundzuka swinene hi leswi Balama a ri eku fambeni, hiloko ntsumi ya Yehovha yi yima endleleni yi n’wi sivela. Balama a a gade mbhongolo yakwe, a ri ni malandza yakwe mambirhi. 23 Loko mbhongolo yi vona ntsumi ya Yehovha yi yime endleleni yi khome banga, yi ringeta ku hambuka yi ya enhoveni. Kambe Balama a sungula ku yi ba leswaku yi tlhelela endleleni. 24 Kutani ntsumi ya Yehovha yi yima exindledyanini lexi nga exikarhi ka masimu ya madiriva, lama nga ni makhumbi lama akiweke hi maribye hala ni hala. 25 Loko mbhongolo yi vona ntsumi ya Yehovha, yi sungula ku manyukuta hi le khumbini, yi manya nenge wa Balama ni khumbi, hiloko Balama a tlhela a sungula ku yi ba.
26 Kutani ntsumi ya Yehovha yi tlhela yi hundza yi ya yima endhawini yo lala laha a swi nga koteki ku hambukela exineneni kumbe eximatsini. 27 Loko mbhongolo yi vona ntsumi ya Yehovha, yi tshama ehansi Balama a ha ri ehenhla ka yona, hiloko Balama a hlundzuka swinene a tlhela a himetela mbhongolo hi nhonga yakwe. 28 Eku heteleleni Yehovha a pfula nomu wa mbhongolo+ kutani yi vutisa Balama yi ku: “Ndzi ku dyohele yini leswi u ndzi baka ra vunharhu?”+ 29 Balama a hlamula mbhongolo a ku: “Hikwalaho ka leswi u ndzi endlaka xiphukuphuku. Loko a ndzi khome banga, a ndzi ta ku dlaya!” 30 Kutani mbhongolo yi ku eka Balama: “Xana a ndzi mbhongolo ya wena leyi u yi gadeke vutomi bya wena hinkwabyo ku ta fikela namuntlha? Xana ndzi tshama ndzi ku endlela swo fana ni leswi?” Balama a ku: “E-e!” 31 Yehovha a pfula mahlo ya Balama,+ hiloko a vona ntsumi ya Yehovha yi yime endleleni yi khome banga. Xikan’wekan’we Balama a hatla a khinsama, xikandza xakwe xi languta ehansi.
32 Kutani ntsumi ya Yehovha yi ku eka yena: “Hikwalaho ka yini u be mbhongolo ya wena kanharhu? Yingisa! Mina ndzi tele ku ta ku sivela, hikuva leswi u swi endlaka a swi fambisani ni ku rhandza ka mina.+ 33 Mbhongolo yi ndzi vonile kutani yi ringeta ku hambuka kanharhu.+ Loko a yi nga hambukanga emahlweni ka mina! Sweswi a ndzi ta va ndzi ku dlele, ku sala yona.” 34 Balama a byela ntsumi ya Yehovha a ku: “Ndzi dyohile hikuva a ndzi nga swi tivi leswaku a wu yime endleleni ku ta hlangana na mina. Sweswi loko swi bihile ematihlweni ya wena, ndzi ta tlhela.” 35 Kambe ntsumi ya Yehovha yi byela Balama yi ku: “Famba ni vavanuna lava, kambe u ta vulavula ntsena leswi ndzi nga ta ku byela swona.” Kutani Balama a famba ni tihosana ta Balaka.
36 Loko Balaka a twa leswaku Balama u fikile, a hatla a huma ku ya hlangana na yena emutini wa Mowabu lowu nga ekusuhi na Arinoni, endzilakaneni wa tiko. 37 Balaka a ku eka Balama: “Xana a ndzi ku vitananga? Hikwalaho ka yini u nga tanga? Xana a wu ehleketa leswaku ndzi nga tsandzeka ku ku fundzha swinene?”+ 38 Balama a hlamula Balaka a ku: “Se ndzi fikile. Kambe xana ndzi nga pfumeleriwa ku vula swo karhi? Ndzi ta vulavula ntsena leswi Xikwembu xi nga ta ndzi byela swona.”+
39 Balama na Balaka va famba swin’we va ya fika eKiriyati-hazoti. 40 Hiloko Balaka a endla magandzelo hi tihomu ni tinyimpfu a rhumela tin’wana eka Balama ni le ka tihosana leti a ti ri na yena. 41 Nimixo Balaka a teka Balama a n’wi yisa eBamoti-bali laha a a kota ku vona Vaisrayele hinkwavo.+
23 Hiloko Balama a byela Balaka a ku: “Ndzi akele tialtari ta nkombo,+ u tlhela u ndzi lulamisela tinkuzi ta nkombo ni makhuna ya nkombo endhawini leyi.” 2 Balaka a hatla a endla hilaha Balama a vuleke hakona. Hiloko Balaka na Balama va nyikela nkuzi ni khuna ealtarini ha yin’we.+ 3 Balama a byela Balaka a ku: “Yima laha ekusuhi ni gandzelo ra wena ro hisiwa, u ndzi tshika ndzi famba. Kumbexana Yehovha u ta vulavula na mina. Ndzi ta ku byela hinkwaswo leswi a nga ta ndzi byela swona.” Kutani a ya ehenhla ka xintshabyana.
4 Hiloko Xikwembu xi vulavula na Balama,+ kutani a ku eka xona: “Ndzi forise tialtari ta nkombo naswona ndzi nyikele hi nkuzi ni khuna ealtarini ha yin’we.” 5 Yehovha a byela Balama+ leswi a faneleke a swi vula, a ku: “Tlhelela eka Balaka u ya n’wi byela leswi.” 6 Hiloko a tlhela, kutani a vona Balaka ni tihosana hinkwato ta le Mowabu ti yime ekusuhi ni laha a endleke kona gandzelo ro hisiwa. 7 Hiloko a sungula ku tlhokovetsela a ku:+
“Balaka hosi ya Mowabu u ndzi suse eAramu,+
Etintshaveni ta le vuxeni a ku:
‘Tana u ta ndzi rhukanela Yakobo.
Tana u ta sandza Israyele.’+
8 Ndzi nga va rhukana njhani vanhu lava Xikwembu xi nga va rhukanangiki?
Ndzi nga va sandzisa ku yini vanhu lava Yehovha a nga va sandzangiki?+
9 Ndzi va vona ndzi ri ehenhla ka maribye,
Naswona ndza va vona ndzi ri ehenhla ka swintshabyana.
10 I mani la nga hlayelaka vana va Yakobo+ lava teleke ku fana ni ntshuri,
Kumbe ku hlayela hambi kotara ya Israyele?
Swa antswa ndzi fa ku fana ni vanhu vo lulama,
Swa antswa ndzi fa ku fana na vona.”
11 Hiloko Balaka a byela Balama a ku: “Hikwalaho ka yini u ndzi endle leswi? Ndzi ku vitane leswaku u ta ndzi rhukanela valala va mina kambe wena a wu va rhukananga, u va katekisile.”+ 12 A hlamula a ku: “Xana a ndzi fanelanga ndzi vula hinkwaswo leswi Yehovha a ndzi byeleke swona?”+
13 Balaka a ku eka yena: “Ndzi kombela hi famba swin’we hi ya endhawini leyi u nga ta kota ku va vona. U ta vona van’wana va vona; a wu nge va voni hinkwavo. Kutani u ndzi rhukanela vona u ri kwalaho.”+ 14 Hiloko a n’wi yisa ensin’wini ya Sofimi, ehenhla ka Pisiga,+ kutani a aka tialtari ta nkombo a nyikela nkuzi ni khuna ealtarini ha yin’we.+ 15 Kutani Balama a byela Balaka a ku: “Yima laha ekusuhi ni gandzelo ra wena ro hisiwa, mina ndzi ta ya vulavula na Yena lahaya.” 16 Hiloko Yehovha a vulavula na Balama a ku:+ “Tlhelela eka Balaka u ya n’wi byela leswi.” 17 Hiloko a tlhelela, a n’wi kuma a yime ekusuhi ni gandzelo rakwe ro hisiwa naswona a ri ni tihosana ta le Mowabu. Balaka a n’wi vutisa a ku: “Xana Yehovha u te yini?” 18 Hiloko a sungula ku tlhokovetsela a ku:+
“Suka u yima, wena Balaka u yingisela.
Ndzi yingise, wena n’wana wa Sipora.
Loko xi vula swo karhi, xana a xi nge swi endli?
Loko xi vula swo karhi, xana a xi nge swi hetisisi?+
21 A xi swi pfumeleli leswaku Yakobo a tirhiseriwa masalamusi,
Naswona a xi pfumeli leswaku Israyele a karhatiwa.
Yehovha Xikwembu xa yena u na vona,+
Naswona u dzunisiwa tanihi hosi exikarhi ka vona.
22 Xikwembu xi va humesa eEgipta.+
Eka vona xi fana ni timhondzo ta nkuzi ya nhova.+
Enkarhini lowu vanhu va ta vula leswi hi Yakobo na Israyele:
‘Vona leswi Xikwembu xi swi endleke!’
A va nge etleli kukondza va dya leswi va swi hloteke,
Ni ku nwa ngati ya swiharhi.”
25 Hiloko Balaka a byela Balama a ku: “Loko u nga swi koti ku n’wi rhukana, u nga n’wi katekisi.” 26 Balama a hlamula Balaka a ku: “Xana a ndzi ku byelanga ndzi ku, ‘Ndzi ta endla hinkwaswo leswi Yehovha a nga ta swi vula’?”+
27 Balaka a byela Balama a ku: “Ndzi kombela hi famba swin’we hi ya endhawini yin’wana. Kumbexana swi ta va swi lulamile emahlweni ka Xikwembu xa ntiyiso ku ndzi rhukanela vona kwalaho.”+ 28 Kutani Balaka a teka Balama a n’wi yisa ehenhla ka ntshava ya Peyori, leyi langutaneke na Yeximoni.*+ 29 Hiloko Balama a byela Balaka a ku: “Ndzi akele tialtari ta nkombo endhawini leyi, u tlhela u ndzi lulamisela tinkuzi ta nkombo ni makhuna ya nkombo.”+ 30 Kutani Balaka a endla hilaha Balama a n’wi byeleke hakona, hiloko a nyikela nkuzi ni khuna ealtarini ha yin’we.
24 Loko Balama a vona leswaku Yehovha a a katekisa Vaisrayele, a nga ha ringetanga ku lava ndlela yo va rhukana,+ kambe u langute emananga. 2 Loko Balama a vona Vaisrayele va tshame hi ku ya hi tinyimba ta vona,+ moya wa Xikwembu wu va ehenhla ka yena.+ 3 A sungula ku tlhokovetsela a ku:+
“Marito ya Balama n’wana wa Beyori,
Marito ya munhu loyi a pfuriweke matihlo,
4 Marito ya loyi a tweke rito ra Xikwembu,
Loyi a voneke xivono xa Lowa Matimba Hinkwawo
Loyi a khinsameke a pfule matihlo:+
6 Ma aname mpfhuka wo leha ku fana ni mikova,+
Ku fana ni mitanga leyi nga etlhelo ka nambu,
Ku fana ni timhangani leti byariweke hi Yehovha,
Ku fana ni mikedari leyi nga etlhelo ka mati.
7 Mati ma tshamela ku thona ma huma emaguleni yakwe mambirhi ya dzovo,
8 Xikwembu xi n’wi humesa eEgipta;
Xi fana ni timhondzo ta nkuzi ya nhova eka vona.
Xi ta herisa matiko lawa ma n’wi tshikilelaka,+
Xi ta phorha marhambu ya wona, xi ta ma heta hi miseve ya xona.
9 U bvutamile, u etlele ku fana ni nghala,
I mani loyi a nga kanyaka mbilu a n’wi pfuxa?
Lava va ku katekisaka va kateka,
Kasi lava ku rhukanaka va rhukaniwa.”+
10 Hiloko Balaka a hlundzukela Balama swinene. A n’wi holovela a ri karhi a ba mavoko hi ndlela yo vungunya, a ku: “Ndzi ku vitanele ku ta rhukana valala va mina,+ kambe wena se u va katekise kanharhu. 11 Namba u muka. A ndzi tiyimisele ku ku endla munhu,+ kambe Yehovha u ku tsonise mikateko.”
12 Balama a hlamula Balaka a ku: “Xana a ndzi va byelanga lava a wu va rhumile ndzi ku, 13 ‘Hambiloko Balaka o ndzi nyika yindlu yakwe yi tele hi silivhere ni nsuku, a ndzi nge endli ku rhandza ka mina, ndzi tlula xileriso xa Yehovha, hambiloko mhaka ya kona yi ri yinene kumbe yi nga ri yinene. Ndzi ta vula ntsena leswi Yehovha a nga ta ndzi byela swona’?+ 14 Sweswi ndzi ya eka rikwerhu. Tana ndzi ta ku byela leswi vanhu lava va nga ta swi endla eka vanhu va wena enkarhini lowu taka.”* 15 Hiloko a sungula ku tlhokovetsela a ku:+
“Marito ya Balama n’wana wa Beyori,
Ni marito ya munhu loyi a pfuriweke matihlo,+
16 Marito ya loyi a twaka rito ra Xikwembu,
Ni loyi a nga ni vutivi bya La Nge Henhlahenhla,
U vone xivono xa Lowa Matimba Hinkwawo
Loko a khinsamile a pfule matihlo:
17 Ndzi ta n’wi vona kambe ku nga ri sweswi;
Ndzi ta n’wi languta kambe ku nga ri hi ku hatlisa.
Kunene u ta faya mombo wa Vamowabu+
Ni tinhloko ta hinkwavo lava rhandzaka nyimpi.
18 Edomu wu ta va ndzhaka yakwe,+
Seyiri+ wu ta va ndzhaka ya valala vakwe,+
Loko Israyele a kombisa vurhena byakwe.
20 Loko a vona Amaleke, a ya emahlweni a tlhokovetsela a ku:
21 Loko a vona Vakena,+ a ya emahlweni a tlhokovetsela a ku:
“Ndhawu ya wena yi sirhelelekile, yi le henhla ka ribye.
22 Kambe ku ni loyi a nga ta hisa Kayina.
Xana ku sele nkarhi wo tanihi kwihi leswaku Asiriya a ku endla hlonga?”
23 A ya emahlweni ni ku tlhokovetsela a ku:
“Khombo! I mani loyi a nga ta pona loko Xikwembu xi endla leswi?
Kambe na yena u ta hetelela a lova.”
25 Hiloko Balama+ a muka. Balaka na yena a tifambela.
25 Loko Vaisrayele va ri eXitimi,+ vavanuna va sungula ku tikhoma ku biha hi swa masangu ni vanhwanyana va le Mowabu.+ 2 Vavasati a va rhamba vavanuna lava leswaku va ta endlela swikwembu swa vona+ magandzelo, hiloko vavanuna lava va sungula ku dya ni ku khinsamela swikwembu swa vona.+ 3 Xisweswo Vaisrayele va sungula ku gandzela Bali wa Peyori+ kutani Yehovha a va hlundzukela swinene. 4 Yehovha a byela Muxe a ku: “Teka tindhuna hinkwato ta vanhu lava u ti hayeka edyambyini emahlweni ka Yehovha leswaku Yehovha a ta tshika ku hlundzukela Vaisrayele.” 5 Hiloko Muxe a byela vaavanyisi va Vaisrayele a ku:+ “Un’wana ni un’wana wa n’wina u fanele a dlaya vavanuna vakwe lava gandzeleke Bali wa Peyori.”+
6 Hi nkarhi wolowo, wanuna un’wana wa Muisrayele a ta ni wansati wa le Midiyani,+ a ri karhi a voniwa hi Muxe ni Vaisrayele hinkwavo, hi nkarhi lowu a va ri eku rileni enyangweni ya tende ra nhlengeletano. 7 Loko Finiyasi+ n’wana wa Eliyazara, ntukulu wa muprista Aroni a swi vona, xikan’wekan’we a suka a yima exikarhi ka vanhu a teka tlhari rakwe. 8 Hiloko a landza Muisrayele yoloye etendeni a fika a va tlhava havambirhi ka vona, a tlhava wansati exirhweni xa rimbewu. Kutani ntungu wu yimisiwa eka Vaisrayele.+ 9 Lava dlayiweke hi ntungu a va ri 24 000.+
10 Hiloko Yehovha a byela Muxe a ku: 11 “Finiyasi+ n’wana wa Eliyazara, ntukulu wa muprista Aroni u vohlise vukarhi bya mina eka Vaisrayele hikuva u lwisane ni lava a va nga tshembeki eka mina.+ Kutani a ndza ha va lovisanga Vaisrayele evukarhini bya mina hikwalaho ka leswi ndzi nga laviki ku gandzeriwa ni swikwembu swin’wana.+ 12 Hikwalaho, n’wi byele u ku, ‘Ndzi n’wi nyika ntwanano wa mina wa ku rhula. 13 Naswona wu ta endla leswaku vuprista bya yena ni vana va yena byi tshama hilaha ku nga heriki,+ hikuva u lwele Xikwembu xakwe+ naswona u kombelele Vaisrayele ku rivaleriwa.’”
14 Vito ra wanuna wa Muisrayele loyi a dlayiweke ni wansati wa le Midiyani a ku ri Zimri n’wana wa Salu, ndhuna ya rixaka ra Simiyoni. 15 Vito ra wansati wa le Midiyani loyi a dlayiweke a ku ri Kozibi n’wana wa Suru;+ loyi a a ri ndhuna ya rixaka ra le Midiyani.+
16 Endzhaku ka sweswo Yehovha a byela Muxe a ku: 17 “Hlaselani Vamidiyani, mi va dlaya,+ 18 hikuva a va mi xanisa hi vukanganyisi bya vona leswaku mi dyoha mi gandzela Peyori+ ni hi ku tirhisa Kozibi n’wana wa ndhuna ya le Midiyani, makwavo wa vona wa xisati loyi a dlayiweke+ hi siku ra ntungu.”+
26 Loko ntungu wu herile,+ Yehovha a byela Muxe na Eliyazara n’wana wa muprista Aroni a ku: 2 “Hlayani Vaisrayele hinkwavo lava nga ni malembe ya 20 ku ya ehenhla, hi ku ya hi mindyangu ya vona, mi hlaya hinkwavo lava nga vaka masocha eIsrayele.”+ 3 Hiloko Muxe na muprista Eliyazara+ va vulavula na vona emananga ya Mowabu+ eYeriko+ ekusuhi ni le Yordani, va ku: 4 “Hlayani lava nga ni malembe ya 20 ku ya ehenhla, hilaha Yehovha a leriseke Muxe hakona.”+
Vaisrayele lava humeke etikweni ra Egipta a ku ri: 5 Rhuveni+ mativula ya Israyele; vana va Rhuveni+ a ku ri: eka Hanoko, ndyangu wa va ka Hanoko; eka Palu, ndyangu wa va ka Palu; 6 eka Hezroni, ndyangu wa va ka Hezroni; eka Karimi, ndyangu wa va ka Karimi. 7 Leyi a ku ri mindyangu ya va ka Rhuveni, lava tsarisiweke a va ri 43 730.+
8 N’wana wa Palu a ku ri Eliyabu. 9 Vana va Eliyabu a ku ri Nemuwele, Dathani na Abirama. Dathani na Abirama a va ri vayimeri lava hlawuriweke, lava lwisaneke na Muxe+ na Aroni va ri na vaseketeri va Kora,+ hi nkarhi lowu va lweke na Yehovha.+
10 Hiloko misava yi pfuleka, yi va mita. Loko ku ri Kora u fe ni vaseketeri vakwe loko ndzilo wu hisa vanhu va 250.+ Leswi va humeleleke swi ve xilemukiso.+ 11 Hambiswiritano, vana va Kora a va fanga.+
12 Vana va Simiyoni+ hi ku ya hi mindyangu ya vona a ku ri: eka Nemuwele, ndyangu wa va ka Nemuwele; eka Yamini, ndyangu wa va ka Yamini; eka Yakini, ndyangu wa va ka Yakini; 13 eka Zara, ndyangu wa va ka Zara; eka Xawulo, ndyangu wa va ka Xawulo. 14 Leyi a ku ri mindyangu ya va ka Simiyoni: 22 200.+
15 Vana va Gadi+ hi ku ya hi mindyangu ya vona a ku ri: eka Zefoni, ndyangu wa va ka Zefoni; eka Hagi, ndyangu wa va ka Hagi; eka Xuni, ndyangu wa va ka Xuni; 16 eka Ozni, ndyangu wa va ka Ozni; eka Eri, ndyangu wa va ka Eri; 17 eka Arodi, ndyangu wa va ka Arodi; eka Areli, ndyangu wa va ka Areli. 18 Leyi a ku ri mindyangu ya vana va Gadi, lava tsarisiweke a va ri 40 500.+
19 Vana va Yuda+ a ku ri Ere na Onani.+ Kambe Ere na Onani va fele etikweni ra Kanana.+ 20 Vana va Yuda hi ku ya hi mindyangu ya vona a ku ri: eka Xela,+ ndyangu wa va ka Xela; eka Faresi,+ ndyangu wa va ka Faresi; eka Zara,+ ndyangu wa va ka Zara. 21 Vana va Faresi a ku ri: eka Hezroni,+ ndyangu wa va ka Hezroni; eka Hamula,+ ndyangu wa va ka Hamula. 22 Leyi a ku ri mindyangu ya va ka Yuda, lava tsarisiweke a va ri 76 500.+
23 Vana va Isakara+ hi ku ya hi mindyangu ya vona a ku ri: eka Tola,+ ndyangu wa va ka Tola; eka Puvha, ndyangu wa va ka Puvha; 24 eka Yaxubu, ndyangu wa va ka Yaxubu; eka Ximroni, ndyangu wa va ka Ximroni. 25 Leyi a ku ri mindyangu ya va ka Isakara, lava tsarisiweke a va ri 64 300.+
26 Vana va Zebuloni+ hi ku ya hi mindyangu ya vona a ku ri: eka Seredi, ndyangu wa va ka Seredi; eka Elone, ndyangu wa va ka Elone; eka Yahaliyele, ndyangu wa va ka Yahaliyele. 27 Leyi a ku ri mindyangu ya va ka Zebuloni, lava tsarisiweke a va ri 60 500.+
28 Vana va Yosefa+ hi ku ya hi mindyangu ya vona a ku ri: Manase na Efrayimi.+ 29 Vana va Manase+ a ku ri: eka Makiri,+ ndyangu wa va ka Makiri; Makiri a a ri tata wa Giliyadi;+ eka Giliyadi, ndyangu wa va ka Giliyadi. 30 Vana va Giliyadi a ku ri: eka Iyezere, ndyangu wa va ka Iyezere; eka Heleke, ndyangu wa va ka Heleke; 31 eka Asiriyele, ndyangu wa va ka Asiriyele; eka Xikeme, ndyangu wa va ka Xikeme; 32 eka Xemida, ndyangu wa va ka Xemida; eka Hefere, ndyangu wa va ka Hefere. 33 Selofehada n’wana wa Hefere a nga vanga na vana va majaha, a ri ni vana va vanhwanyana ntsena,+ mavito ya vana va vanhwanyana va Selofehada+ a ku ri Mahela, Nowa, Hogila, Milka na Tirisa. 34 Leyi a ku ri mindyangu ya va ka Manase, lava tsarisiweke a va ri 52 700.+
35 Lava a ku ri vana va Efrayimi+ hi ku ya hi mindyangu ya vona: eka Xutela,+ ndyangu wa va ka Xutela; eka Bekere, ndyangu wa va ka Bekere; eka Tahani, ndyangu wa va ka Tahani. 36 Lava a ku ri vana va Xutela: eka Erani, ndyangu wa va ka Erani. 37 Leyi a ku ri mindyangu ya vana va Efrayimi, lava tsarisiweke a va ri 32 500.+ Lava a ku ri vana va Yosefa hi ku ya hi mindyangu ya vona.
38 Vana va Benjamini+ hi ku ya hi mindyangu ya vona a ku ri: eka Bela,+ ndyangu wa va ka Bela; eka Axabela, ndyangu wa va ka Axabela; eka Ahiramu, ndyangu wa va ka Ahiramu; 39 eka Xefufami, ndyangu wa va ka Xupimi; eka Hufamu, ndyangu wa va ka Hufamu. 40 Vana va Bela a ku ri Aridi na Namani:+ eka Aridi, ndyangu wa va ka Aridi; eka Namani, ndyangu wa va ka Namani. 41 Lava a ku ri vana va Benjamini hi ku ya hi mindyangu ya vona, lava tsarisiweke a va ri 45 600.+
42 Lava a ku ri vana va Dani+ hi ku ya mindyangu ya vona: eka Xuhamu, ndyangu wa va ka Xuhamu. Leyi a ku ri mindyangu ya Dani hi ku ya hi mindyangu ya yona. 43 Hinkwavo lava tsarisiweke eka mindyangu ya va ka Xuhamu, a va ri 64 400.+
44 Vana va Axere+ hi ku ya hi mindyangu ya vona a ku ri: eka Imina, ndyangu wa va ka Imina; eka Ixivhi, ndyangu wa va ka Ixivhi; eka Beriya, ndyangu wa va ka Beriya; 45 eka vana va Beriya: eka Hevere, ndyangu wa va ka Hevere; eka Malikiyele, ndyangu wa va ka Malikiyele. 46 N’wana wa nhwanyana wa Axere a ku ri Sera. 47 Leyi a ku ri mindyangu ya vana va Axere, lava tsarisiweke a va ri 53 400.+
48 Vana va Neftali+ hi ku ya hi mindyangu ya vona a ku ri: eka Yahazili, ndyangu wa va ka Yahazili; eka Guni, ndyangu wa va ka Guni; 49 eka Yezere, ndyangu wa va ka Yezere; eka Xalemi, ndyangu wa va ka Xalemi. 50 Leyi a ku ri mindyangu ya Neftali hi ku ya hi mindyangu ya yona, lava tsarisiweke a va ri 45 400.+
51 Leyi a ku ri nhlayo ya Vaisrayele hinkwavo lava tsariweke: 601 730.+
52 Endzhaku ka sweswo Yehovha a byela Muxe a ku: 53 “Lava hi vona lava faneleke va averiwa tiko, ri va ndzhaka ya vona hi ku ya hi nxaxamelo wa mavito.+ 54 Lava taleke va nyike ndzhaka yo tala, lava nga talangiki va nyike ndzhaka yitsongo.+ Ndzhaka yi fanele yi aviwa hi ku ya hi nhlayo ya lava tsarisiweke. 55 Hambiswiritano, tiko ri fanele ri aviwa hi ku tirhisa vuhlolotwana.*+ Va fanele va averiwa ndzhaka hi ku ya hi mavito ya tinyimba ta vatata wa vona. 56 Ndzhaka ya nyimba ha yin’we yi ta aviwa hi ku tirhisa vuhlolotwana,* yi averiwa tinyimba letikulu ni letitsongo.”
57 Lava tsarisiweke eka nyimba ya Valevhi+ hi ku ya hi mindyangu ya vona hi lava: eka Gerixoni, ndyangu wa va ka Gerixoni; eka Kohata,+ ndyangu wa va ka Kohata; eka Merari, ndyangu wa va ka Merari. 58 Leyi a ku ri mindyangu ya Valevhi: ndyangu wa va ka Libni,+ ndyangu wa va ka Hebroni,+ ndyangu wa va ka Maheli,+ ndyangu wa va ka Muxi+ ni ndyangu wa va ka Kora.+
Kohata a va tata wa Amirama.+ 59 Vito ra nsati wa Amirama a ku ri Yokebedi,+ n’wana wa Levhi loyi nsati wakwe a nga n’wi tswalela Levhi eEgipta. Yokebedi u tswalele Amirama, Aroni na Muxe na Meriyamu+ makwavo wa vona wa xisati. 60 Vana va Aroni a ku ri Nadabu, Abihu, Eliyazara na Ithamara.+ 61 Kambe Nadabu na Abihu va fe emahlweni ka Yehovha hikwalaho ko endla gandzelo* leri nga amukelekiki.+
62 Nhlayo ya lava tsarisiweke a ku ri 23 000, vaxinuna hinkwavo lava nga ni n’hweti yin’we ku ya ehenhla.+ A va nga tsarisiwanga exikarhi ka Vaisrayele+ hikuva a va nga ta nyikiwa ndzhaka ni Vaisrayele.+
63 Lava hi lava tsarisiweke hi Muxe na muprista Eliyazara loko va tsarisa Vaisrayele emananga ya Mowabu eYeriko ekusuhi na Yordani. 64 Kambe exikarhi ka vona a ku nga ri na loyi a tsarisiweke hi Muxe na muprista Aroni loko va hlaya Vaisrayele emananga ya Sinayi.+ 65 Hikuva Yehovha a a vule leswi mayelana na vona: “Kunene va ta fela emananga.”+ Hikwalaho a ku nga ri na wanuna la saleke eka vona handle ka Kalebe n’wana wa Yefune na Yoxuwa n’wana wa Nuni.+
27 Kutani vana va vanhwanyana va Selofehada,+ n’wana wa Hefere, n’wana wa Giliyadi, n’wana wa Makiri, n’wana wa Manase, va mindyangu ya Manase n’wana wa Yosefa va ta. Mavito ya vana va yena va vanhwanyana a ku ri Mahela, Nowa, Hogila, Milka na Tirisa. 2 Va fika va yima emahlweni ka Muxe, muprista Eliyazara, tindhuna+ ni vanhu hinkwavo enyangweni ya tende ra nhlengeletano, va ku: 3 “Tatana u fele emananga, kambe a a nga ri un’wana wa vaseketeri va Kora+ lava lweke na Yehovha, yena u fele xidyoho xakwe naswona u fe a nga ri na vana va majaha. 4 Hikwalaho ka yini xivongo xa tatana xi fanele xi fa hileswi a nga ri na n’wana wa jaha? Hi nyikeni ndzhaka exikarhi ka vamakwavo va tatana.” 5 Hiloko Muxe a vika mhaka ya vona eka Yehovha.+
6 Kutani Yehovha a byela Muxe a ku: 7 “Vana va Selofehada va tiyisile. U fanele u va nyika ndzhaka exikarhi ka vamakwavo va tata wa vona, u hundzisela ndzhaka ya tata wa vona eka vona.+ 8 Byela Vaisrayele u ku, ‘Loko wanuna o fa a nga ri na n’wana wa jaha, ndzhaka yakwe yi ta nyikiwa vana vakwe va vanhwanyana. 9 Loko a nga ri na n’wana wa nhwanyana, ndzhaka yakwe yi ta nyikiwa vamakwavo wakwe va xinuna. 10 Loko a nga ri na vamakwavo va xinuna, yi ta nyikiwa vamakwavo va tata wakwe. 11 Loko tata wakwe a nga ri na vamakwavo, mi ta yi nyika xaka rakwe ra ngati kutani ri ta yi teka yi va ya rona. Xiboho lexi xi ta va nawu eka Vaisrayele, hilaha Yehovha a leriseke Muxe hakona.’”
12 Endzhaku ka sweswo Yehovha a byela Muxe a ku: “Tlhandlukela entshaveni leyi ya Abarima+ u languta tiko leri ndzi nga ta ri nyika Vaisrayele.+ 13 Loko u ri vonile, u ta fa,+ ku fana ni makwenu Aroni,+ 14 hikuva loko vanhu va ndzi gungulela emananga ya Zini, a mi xi yingisanga xileriso xa mina xa leswaku ndzi fanele ndzi vangamisiwa emahlweni ka vona hi ku va nyika mati.+ Lawa i mati ya le Meriba+ eKadexi+ emananga ya Zini.”+
15 Kutani Muxe a byela Yehovha a ku: 16 “Yehovha Xikwembu lexi vumbeke vanhu hinkwavo a a hlawule wanuna exikarhi ka vanhu 17 loyi a nga ta va rhangela eka swilo hinkwaswo ni loyi va nga ta n’wi yingisa eka swilo hinkwaswo, leswaku vanhu va Yehovha va nga fani ni tinyimpfu leti nga riki na murisi.” 18 Kutani Yehovha a byela Muxe a ku: “Teka Yoxuwa n’wana wa Nuni, wanuna loyi a nga ni moya, u n’wi tlhandleka mavoko.+ 19 U n’wi yimisa emahlweni ka muprista Eliyazara ni le mahlweni ka vanhu hinkwavo, naswona u fanele u n’wi veka ku va murhangeri emahlweni ka vona.+ 20 N’wi nyike byin’wana bya vulawuri bya wena+ leswaku Vaisrayele hinkwavo va ta n’wi yingisa.+ 21 U ta yima emahlweni ka muprista Eliyazara, loyi a nga ta n’wi vutisela eka Yehovha hi ku tirhisa Urimi+ leswaku a n’wi kongomisa. Loko va kuma xileriso xa leswaku va huma va ta huma, loko va kuma xileriso xa leswaku va vuya va ta vuya, yena ni Vaisrayele hinkwavo lava nga na yena ni vanhu hinkwavo.”
22 Hiloko Muxe a endla hilaha Yehovha a n’wi leriseke hakona. A teka Yoxuwa a n’wi yimisa emahlweni ka muprista Eliyazara ni le mahlweni ka vanhu hinkwavo, 23 a n’wi tlhandleka mavoko, a n’wi hlawula ku va murhangeri,+ hilaha Yehovha a byeleke Muxe hakona.+
28 Yehovha a tlhela a byela Muxe a ku: 2 “Lerisa Vaisrayele u ku, ‘Mi fanele mi tiyiseka leswaku mi nyikela gandzelo ra mina ku nga xinkwa xa mina. Magandzelo ya mina lama hisiwaka kunene ma va nun’hwelo lowu tsakisaka eka mina, ma fanele ma endliwa hi mikarhi ya wona leyi vekiweke.’+
3 “Va byele u ku, ‘Leri i gandzelo leri ngo hisiwa kunene leri mi nga ta ri nyikela eka Yehovha: swinyimpfana swimbirhi swa xinuna leswi hanyeke kahle leswi nga ni lembe hi siku swi va gandzelo ro hisiwa ra nkarhi na nkarhi.+ 4 Xinyimpfana xin’we xa xinuna u ta xi nyikela nimixo kasi lexin’wana u ta xi nyikela nimadyambu,+ 5 u ta swi nyikela ni omere* yin’we ya mapa lama silekeke kahle lama pfanganisiweke ni kotara ya hini* ya mafurha lamanene, swi va gandzelo ra mavele.+ 6 I gandzelo ro hisiwa ra siku ni siku+ leri sunguleke ku nyikeriwa eNtshaveni ya Sinayi ri va nun’hwelo lowu tsakisaka, gandzelo ro hisiwa leri a ri endleriwa Yehovha, 7 ni gandzelo ra rona ra swakunwa ku nga kotara ya hini eka xinyimpfana xa xinuna ha xin’we.+ Chululela Yehovha byala endhawini yo kwetsima, byi va gandzelo ra swakunwa. 8 U ta nyikela xinyimpfana lexin’wana xa xinuna nimadyambu. U ta xi nyikela ni gandzelo ra mavele ni ra swakunwa leswi fanaka ni leswi endliweke nimixo, swi ta va gandzelo ro hisiwa leri nga ta va nun’hwelo wo tsakisa eka Yehovha.+
9 “‘Hambiswiritano, hi siku ra Savata+ gandzelo ra kona ku ta va swinyimpfana swimbirhi swa xinuna leswi hanyeke kahle leswi nga ni lembe rin’we ni tiomere* timbirhi ta mapa lama silekeke kahle, lama pfanganisiweke ni mafurha lamanene ri va gandzelo ra mavele ku katsa ni gandzelo ra swona ra swakunwa. 10 Leri i gandzelo ro hisiwa ra Savata ni gandzelo ro hisiwa ra siku ni siku ni gandzelo ra swona ra swakunwa.+
11 “‘Eku sunguleni ka n’hweti yin’wana ni yin’wana, mi ta nyikela swinkuzana swimbirhi, khuna rin’we ni swinyimpfana swa nkombo swa xinuna leswi hanyeke kahle leswi nga ni lembe rin’we, swi va gandzelo ro hisiwa eka Yehovha,+ 12 ni tiomere* tinharhu ta mapa lama silekeke kahle, lama pfanganisiweke ni mafurha swi va gandzelo ra mavele+ eka nkuzi ha yin’we, ni tiomere timbirhi ta mapa lama silekeke kahle, lama pfanganisiweke ni mafurha swi va gandzelo ra mavele eka khuna ha rin’we,+ 13 ni omere yin’we ya mapa lama silekeke kahle lama pfanganisiweke ni mafurha swi va gandzelo ra mavele eka xinyimpfana ha xin’we xa xinuna, swi hisiwa swi va nun’hwelo lowu tsakisaka eka Yehovha.+ 14 Magandzelo ya vona ya swakunwa ma ta va vhinyo leyi ringanaka ni hafu ya hini eka nkuzi yin’we+ ni vhinyo leyi nga le henhlanyana ka litara eka khuna rin’we+ ni kotara ya hini ya vhinyo eka xinyimpfana xin’we xa xinuna.+ Leri i gandzelo ro hisiwa ra n’hweti na n’hweti lembe hinkwaro. 15 Nakambe ku fanele ku nyikeriwa ximbutana xin’we xi va gandzelo ra xidyoho eka Yehovha ku engetela eka gandzelo ro hisiwa ra siku ni siku ni gandzelo ra rona ra swakunwa.
16 “‘Hi siku ra vu-14 ra n’hweti yo sungula, ku ta va Paseka+ ya Yehovha. 17 Hi siku ra vu-15 ra n’hweti leyi, ku ta va ni nkhuvo. Ku ta dyiwa swinkwa leswi nga riki na comela masiku ya nkombo.+ 18 Hi siku ro sungula ku ta va ni nhlengeletano yo kwetsima. Mi nga endli mitirho yo tika. 19 Mi ta nyikela gandzelo ro hisiwa eka Yehovha hi swinkuzana swimbirhi, khuna rin’we ni swinyimpfana swa nkombo swa xinuna, leswi nga ni lembe rin’we. Mi fanele mi nyikela hi swifuwo leswi hanyeke kahle.+ 20 Mi fanele mi swi nyikela ni magandzelo ya swona ya mavele ya mapa lama silekeke kahle lama pfanganisiweke ni mafurha,+ tiomere tinharhu eka nkuzi ni tiomere timbirhi eka khuna. 21 Mi ta nyikela omere yin’we eka xinyimpfana ha xin’we xa xinuna eka leswa nkombo, 22 ni mbuti yin’we ya gandzelo ra xidyoho leswaku mi ta kombeleriwa ku rivaleriwa. 23 Leswi swi ta nyikeriwa ku engetela eka gandzelo ro hisiwa ra nimixo, leri endliwaka siku ni siku. 24 Mi ta swi nyikela hi ndlela leyi fanaka siku ni siku ku ringana masiku ya nkombo swi va gandzelo ra swakudya,* swi ta hisiwa swi va nun’hwelo lowu tsakisaka eka Yehovha. Swi fanele swi nyikeriwa ni gandzelo ro hisiwa ra siku ni siku leri fambisanaka ni gandzelo ra rona ra swakunwa. 25 Hi siku ra vunkombo mi fanele mi va ni nhlengeletano yo kwetsima.+ A mi fanelanga mi endla mitirho yo tika.+
26 “‘Hi siku ra mihandzu leyi wupfeke ku sungula,+ loko mi nyikela gandzelo ra mavele lamantshwa eka Yehovha+ mi fanele mi khoma nhlengeletano yo kwetsima hi nkarhi wa nkhuvo wa ntshovelo.+ A mi fanelanga mi endla mitirho yo tika.+ 27 Mi ta nyikela gandzelo ro hisiwa leri tsakisaka eka Yehovha hi swinkuzana swimbirhi, khuna rin’we ni swinyimpfana swa nkombo swa xinuna leswi nga ni lembe rin’we,+ 28 ni gandzelo ra swona ra mavele ra mapa lama silekeke kahle lama pfanganisiweke ni mafurha, tiomere tinharhu eka nkuzi ha yin’we, tiomere timbirhi eka khuna ha rin’we, 29 mi ta nyikela hi omere yin’we eka xinyimpfana ha xin’we xa xinuna eka leswa nkombo, 30 ni ximbutana xin’we leswaku mi kombela ku rivaleriwa.+ 31 Mi ta swi nyikela ku engetela eka gandzelo ro hisiwa ni gandzelo ra rona ra mavele ra siku ni siku. Ku fanele ku va swifuwo leswi hanyeke kahle+ swin’we ni magandzelo ya swona ya swakunwa.
29 “‘Kutani hi siku ro sungula ra n’hweti ya vunkombo, mi fanele mi va ni nhlengeletano yo kwetsima. A mi fanelanga mi endla mitirho yo tika.+ I siku leri mi faneleke mi chaya timhalamhala.+ 2 Mi ta nyikela xinkuzana xin’we, khuna rin’we, swinyimpfana swa nkombo swa xinuna ha xin’we xi ri ni lembe rin’we, swi va gandzelo ro hisiwa ra nun’hwelo lowu tsakisaka eka Yehovha, hinkwaswo swi va leswi hanyeke kahle 3 ni gandzelo ra swona ra mavele ra mapa lama silekeke kahle lama pfanganisiweke ni mafurha, tiomere* tinharhu eka nkuzi, tiomere* timbirhi eka khuna, 4 ni omere* yin’we eka xinyimpfana ha xin’we xa xinuna eka leswa nkombo 5 ni xiphongo lexitsongo xi va gandzelo ra xidyoho leswaku mi kombeleriwa ku rivaleriwa. 6 Leswi mi ta swi nyikela ku engetela eka gandzelo ro hisiwa ra n’hweti ni n’hweti ni gandzelo ra rona ra mavele+ ni gandzelo ra rona ro hisiwa ra siku ni siku ni gandzelo ra rona ra mavele,+ swin’we ni magandzelo ya swona ya swakunwa,+ hi ku ya hi leswi a swi endlisiwa xiswona siku ni siku, swi va nun’hwelo lowu tsakisaka, gandzelo leri hiseriwaka Yehovha.
7 “‘Hi siku ra vukhume ra n’hweti leyi ya vunkombo, mi fanele mi va ni nhlengeletano yo kwetsima,+ mi fanele mi tisola* hikwalaho ka swidyoho swa n’wina. A mi fanelanga mi endla mitirho yo tika.+ 8 Mi ta nyikela xinkuzana xin’we, khuna rin’we, swinyimpfana swa nkombo swa xinuna ha xin’we xi ri ni lembe rin’we, swi va gandzelo ro hisiwa ra nun’hwelo lowu tsakisaka eka Yehovha, hinkwaswo swi fanele swi va leswi hanyeke kahle.+ 9 Naswona eka gandzelo ra swona ra mavele ra mapa lama silekeke kahle lama pfanganisiweke ni mafurha, tiomere tinharhu eka nkuzi, tiomere timbirhi eka khuna ha rin’we, 10 omere yin’we eka xinyimpfana ha xin’we xa xinuna eka leswa nkombo 11 ku katsa ni ximbutana xin’we xa gandzelo ra xidyoho, ku nga hlayiwi gandzelo ra xidyoho ra ku kombela ku rivaleriwa+ ni gandzelo ro hisiwa ra siku ni siku ni gandzelo ra rona ra mavele swin’we ni magandzelo ya swona ya swakunwa.
12 “‘Hi siku ra vu-15 ra n’hweti ya vunkombo, mi fanele mi va ni nhlengeletano yo kwetsima. A mi fanelanga mi endla mitirho yo tika naswona mi fanele mi endlela Yehovha nkhuvo ku ringana masiku ya nkombo.+ 13 Mi ta nyikela swinkuzana swa 13, makhuna mambirhi, swinyimpfana swa 14 swa xinuna, ha xin’we xi ri ni lembe rin’we, swi va gandzelo ro hisiwa,+ gandzelo leri endliweke hi ndzilo ri va nun’hwelo lowu tsakisaka eka Yehovha, hinkwaswo swi fanele swi va leswi hanyeke kahle.+ 14 Naswona eka gandzelo ra swona ra mavele ra mapa lama silekeke kahle lama pfanganisiweke ni mafurha, tiomere tinharhu eka nkuzi ha yin’we eka leta 13, tiomere timbirhi eka khuna ha rin’we eka makhuna mambirhi 15 ni omere yin’we eka xinyimpfana ha xin’we xa xinuna eka leswa 14, 16 ku katsa ni ximbutana xin’we xi va gandzelo ra xidyoho, ku nga hlayiwi gandzelo ro hisiwa ra siku ni siku, gandzelo ra xona ra mavele ni gandzelo ra xona ra swakunwa.+
17 “‘Hi siku ra vumbirhi, mi ta nyikela swinkuzana swa 12, makhuna mambirhi, swinyimpfana swa 14 swa xinuna ha xin’we xi ri ni lembe rin’we, hinkwaswo swi va leswi hanyeke kahle+ 18 ni gandzelo ra swona ra mavele ni magandzelo ya swona ya swakunwa eka tinkuzi, makhuna ni swinyimpfana swa xinuna hi ku ya hi nhlayo ya swona, hi ku ya hi leswi a swi endlisiwa xiswona siku ni siku 19 ku katsa ni ximbutana xin’we xi va gandzelo ra xidyoho, ku nga hlayiwi gandzelo ro hisiwa ra siku ni siku, gandzelo ra xona ra mavele ni magandzelo ya swona ya swakunwa.+
20 “‘Hi siku ra vunharhu mi ta nyikela tinkuzi ta 11, makhuna mambirhi, swinyimpfana swa 14 swa xinuna ha xin’we xi ri ni lembe rin’we, hinkwaswo swi va leswi hanyeke kahle+ 21 ni gandzelo ra swona ra mavele ni magandzelo ya swona ya swakunwa eka tinkuzi, makhuna ni swinyimpfana swa xinuna hi ku ya hi nhlayo ya swona, hi ku ya hi leswi a swi endlisiwa xiswona siku ni siku 22 ku katsa ni mbuti yin’we yi va gandzelo ra xidyoho, ku nga hlayiwi gandzelo ro hisiwa ra siku ni siku, gandzelo ra yona ra mavele ni gandzelo ra yona ra swakunwa.+
23 “‘Hi siku ra vumune, mi ta nyikela tinkuzi ta khume, makhuna mambirhi, swinyimpfana swa 14 swa xinuna ha xin’we xi ri ni lembe rin’we, hinkwaswo swi va leswi hanyeke kahle,+ 24 gandzelo ra swona ra mavele ni magandzelo ya swona ya swakunwa eka tinkuzi, makhuna ni swinyimpfana swa xinuna hi ku ya hi nhlayo ya swona, hi ku ya hi leswi a swi endlisiwa xiswona siku ni siku 25 ku katsa ni ximbutana xin’we xi va gandzelo ra xidyoho, ku nga hlayiwi gandzelo ro hisiwa ra siku ni siku, gandzelo ra xona ra mavele ni gandzelo ra xona ra swakunwa.+
26 “‘Hi siku ra vuntlhanu, mi ta nyikela tinkuzi ta kaye, makhuna mambirhi, swinyimpfana swa 14 swa xinuna ha xin’we xi ri ni lembe rin’we, hinkwaswo swi va leswi hanyeke kahle+ 27 ni gandzelo ra swona ra mavele ni magandzelo ya swona ya swakunwa eka tinkuzi, makhuna ni swinyimpfana swa xinuna hi ku ya hi nhlayo ya swona, hi ku ya hi leswi swi endlisiwaka xiswona nkarhi hinkwawo 28 ku katsa ni mbuti yin’we yi va gandzelo ra xidyoho, ku nga hlayiwi gandzelo ro hisiwa ra siku ni siku ni gandzelo ra yona ra mavele ni gandzelo ra yona ra swakunwa.+
29 “‘Hi siku ra vutsevu, mi ta nyikela tinkuzi ta nhungu, makhuna mambirhi, swinyimpfana swa 14 swa xinuna, ha xin’we xi ri ni lembe rin’we, hinkwaswo swi va leswi hanyeke kahle+ 30 ni gandzelo ra swona ra mavele ni magandzelo ya swona ya swakunwa ya tinkuzi, makhuna ni swinyimpfana swa xinuna hi ku ya hi nhlayo ya swona, hi ku ya hi leswi a swi endlisiwa xiswona siku ni siku 31 ku katsa ni mbuti yin’we yi va gandzelo ra xidyoho, ku nga hlayiwi gandzelo ro hisiwa ra siku ni siku, gandzelo ra yona ra mavele ni gandzelo ra yona ra swakunwa.+
32 “‘Hi siku ra vunkombo, mi ta nyikela tinkuzi ta nkombo, makhuna mambirhi, swinyimpfana swa 14 swa xinuna, ha xin’we xi ri ni lembe rin’we, hinkwaswo swi va leswi hanyeke kahle+ 33 ni gandzelo ra swona ra mavele, magandzelo ya swona ya swakunwa ya tinkuzi, makhuna ni swinyimpfana swa xinuna hi ku ya hi nhlayo ya swona, hi ku ya hi leswi a swi endlisiwa xiswona siku ni siku, 34 ku katsa ni mbuti yin’we yi va gandzelo ra xidyoho, ku nga hlayiwi gandzelo ro hisiwa ra siku ni siku, gandzelo ra yona ra mavele ni gandzelo ra yona ra swakunwa.+
35 “‘Hi siku ra vunhungu, mi fanele mi khoma nhlengeletano yo xiximeka. A mi fanelanga mi endla mitirho yo tika.+ 36 Mi ta nyikela nkuzi yin’we, khuna rin’we ni swinyimpfana swa nkombo swa xinuna, ha xin’we xi ri ni lembe rin’we, swi va gandzelo ro hisiwa, ri va nun’hwelo lowu tsakisaka eka Yehovha, hinkwaswo swi va leswi hanyeke kahle,+ 37 ni gandzelo ra swona ra mavele ni magandzelo ya swona ya swakunwa ya nkuzi, khuna ni swinyimpfana swa xinuna hi ku ya hi nhlayo ya swona, hi ku ya hi leswi a swi endlisiwa xiswona siku ni siku, 38 ku katsa ni mbuti yin’we yi va gandzelo ra xidyoho, ku nga hlayiwi gandzelo ro hisiwa ra siku ni siku ni gandzelo ra yona ra mavele ni gandzelo ra yona ra swakunwa.+
39 “‘Leswi mi ta swi nyikela eka Yehovha eminkhubyeni ya n’wina ya nkarhi ni nkarhi,+ ku engetela eka magandzelo lawa mi tshembiseke+ ku ma endla ni magandzelo ya n’wina ya ku tirhandzela+ ku fana ni magandzelo ya n’wina yo hisiwa+ ni magandzelo ya n’wina ya mavele+ ni magandzelo ya n’wina ya swakunwa+ ni magandzelo ya n’wina yo kombela ku rhula.’”+ 40 Muxe a byela Vaisrayele hinkwaswo leswi Yehovha a n’wi leriseke swona.
30 Hiloko Muxe a byela tindhuna+ ta tinyimba ta Israyele a ku: “Yehovha u lerise a ku: 2 Loko wanuna o endla xitshembiso+ eka Yehovha kumbe a hlambanya+ ku titsona swo karhi, u fanele a endla leswi a swi vuleke.+ U fanele a endla hinkwaswo leswi a tshembiseke ku swi endla.+
3 “Loko wansati o endla xitshembiso eka Yehovha kumbe a hlambanya leswaku u ta titsona swo karhi loko a ha ri ntsongo naswona a ha tshama ekaya ka tata wakwe, 4 kutani tata wakwe a twa xitshembiso xolexo kumbe xihlambanyo xa yena xa ku titsona swo karhi naswona tata wakwe a nga n’wi aleli, switshembiso swakwe hinkwaswo leswi a swi tshembiseke u fanele a swi endla ni xihlambanyo xakwe xa ku titsona, u fanele a xi namarhela. 5 Kambe loko tata wakwe o n’wi alela loko a twa leswaku u endle switshembiso kumbe u hlambanye ku titsona swo karhi, a nge boheki ku swi endla. Yehovha u ta n’wi rivalela hikuva tata wakwe u n’wi alerile.+
6 “Hambiswiritano, loko o tekiwa a ha endle xitshembiso kumbe xihlambanyo lexi a xi endleke hi magugu 7 kambe nuna wakwe a nga n’wi aleli hi siku leri a swi twaka ha rona, switshembiso swakwe kumbe swihlambanyo swakwe swo titsona swo karhi leswi a swi endleke u fanele a swi namarhela. 8 Kambe loko nuna wakwe o n’wi alela hi siku leri a swi twaka ha rona, a nga xi herisa xitshembiso xexo kumbe xihlambanyo lexi a xi endleke hi magugu,+ naswona Yehovha u ta n’wi rivalela.
9 “Kambe loko noni kumbe wansati loyi vukati bya yena byi feke o endla xitshembiso xo karhi, u ta boheka ku endla hinkwaswo leswi a swi tshembiseke.
10 “Kambe loko wansati o endla xitshembiso kumbe xihlambanyo xo titsona swo karhi a ha ri endlwini ya nuna wakwe 11 kutani nuna wakwe a swi twa naswona a nga n’wi aleli, switshembiso swakwe hinkwaswo kumbe xihlambanyo xihi ni xihi xa ku titsona swo karhi leswi a tiboheke ha swona u fanele a swi endla. 12 Kambe loko hi siku leri a swi tweke ha rona, nuna wakwe o swi herisela makumu switshembiso swihi ni swihi kumbe xihlambanyo xa ku titsona swo karhi lexi a xi endleke, a swi nge bohi leswaku a swi endla.+ Nuna wakwe u swi herisile naswona Yehovha u ta n’wi rivalela wansati yoloye. 13 Wanuna u ni mfanelo yo herisa kumbe ku pfumelela xitshembiso xihi ni xihi kumbe xihlambanyo xihi ni xihi xo titsona swo karhi lexi endliweke hi nsati wakwe. 14 Kambe loko ko hundza masiku nuna wakwe a nga vuli nchumu, leswi swi ta vula leswaku u pfumelelana ni switshembiso swakwe hinkwaswo kumbe swihlambanyo swakwe swo titsona swo karhi leswi a swi endleke. U swi tiyisile hikuva a nga alanga hi siku leri a n’wi tweke a swi endla. 15 Kambe loko o swi herisa se ku hundze masiku a swi twile, u ta rhwala nandzu wa nsati wakwe.+
16 “Leyi i milawu leyi Yehovha a yi leriseke Muxe etimhakeni ta wanuna ni nsati wakwe ni ta tatana ni n’wana wakwe wa nhwanyana lontsongo loyi a ha tshamaka na yena ekaya.”
31 Hiloko Yehovha a byela Muxe a ku: 2 “Rihiselela+ Vaisrayele eka Vamidiyani.+ Endzhaku ka sweswo u ta fa.”+
3 Kutani Muxe a byela vanhu a ku: “Hlomisani vavanuna exikarhi ka n’wina leswaku va ta lwa ni Vamidiyani va rihiselela Yehovha eka Vamidiyani. 4 U fanele u rhumela vanhu va 1 000 eka nyimba yin’wana ni yin’wana ya tinyimba hinkwato ta Israyele enyimpini.” 5 Hikwalaho eka magidi ya Vaisrayele,+ ku hlawuriwe vanhu va 1 000 eka nyimba ha yin’we, vanhu va 12 000 lava hlomeleke nyimpi.
6 Kutani Muxe a rhuma vanhu va 1 000 lava humaka eka nyimba ha yin’we va ya enyimpini, swin’we na Finiyasi+ n’wana wa muprista Eliyazara loyi a a rhwale swibya swo kwetsima, a khome ni timhalamhala leti nga ta biwa enyimpini.+ 7 Hiloko va lwa ni Vamidiyani hilaha Yehovha a leriseke Muxe, va dlaya vavanuna hinkwavo. 8 Eka lava dlayiweke, ku katseka ni tihosi ta Vamidiyani, ku nga Evhi, Rekemu, Suru, Huru na Reba ku nga tihosi ta ntlhanu ta Vamidiyani. Va tlhela va dlaya na Balama+ n’wana wa Beyori hi banga. 9 Vaisrayele va teka vavasati ni vana va Vamidiyani va va endla mahlonga. Va tlhela va teketela ni tihomu ta vona hinkwato, tinyimpfu ta vona hinkwato ni nhundzu ya vona hinkwayo. 10 Miti ya vona hinkwayo leyi a va tshama eka yona ni mixaxa ya vona hinkwayo leyi biyeriweke va swi hise hi ndzilo. 11 Va teka leswi phangiweke hinkwaswo ni rifuwo hinkwaro, vanhu ni swifuwo. 12 Va tisa mahlonga, rifuwo ni leswi phangiweke eka Muxe na muprista Eliyazara ni le ka Vaisrayele, enxaxeni erivaleni emananga ya Mowabu+ ekusuhi na Yordani, eYeriko.
13 Hiloko Muxe na muprista Eliyazara ni tindhuna hinkwato va huma va ya hlangana na vona ehandle ka nxaxa. 14 Kambe Muxe a hlundzukela varhangeri va masocha ya nyimpi, tindhuna ta masocha ya magidi ni tindhuna ta masocha ya madzana leti a ti vuya hi le nyimpini. 15 Muxe a ku eka vona: “Xana mi tshike vavasati hinkwavo va hanya? 16 Phela hi vona lava byeriweke hi Balama ku kucetela Vaisrayele leswaku va nga tshembeki+ eka Yehovha hi ku gandzela Peyori,+ lerova vanhu va Yehovha va weriwa hi ntungu.+ 17 Sweswi mi fanele mi dlaya vana hinkwavo vaxinuna mi tlhela mi dlaya ni vavasati hinkwavo lava nga tshama va etlela ni wanuna. 18 Kambe swinhwanyetana leswi nga si tshamaka swi etlela ni wanuna mi swi tshika, mi nga swi dlayi.+ 19 Kutani mi fanele mi ya tshama ehandle ka nxaxa ku ringana masiku ya nkombo. Un’wana ni un’wana wa n’wina loyi a dlayeke munhu ni un’wana ni un’wana loyi a khumbeke ntsumbu+ u fanele a tibasisa+ hi siku ra vunharhu ni hi siku ra vunkombo, n’wina ni mahlonga ya n’wina. 20 Mi fanele mi basisa swiambalo, xilo xin’wana ni xin’wana lexi endliweke hi dzovo, xin’wana ni xin’wana lexi endliweke hi voya bya mbuti ni xilo xin’wana ni xin’wana lexi vatliweke hi timhandzi.”
21 Kutani muprista Eliyazara a byela masocha lawa a ma ye enyimpini a ku: “Lowu i nawu lowu Yehovha a wu leriseke Muxe a ku, 22 ‘Nsuku, silivhere, koporo, nsimbhi, thini ni ntsompfu,* 23 hinkwaswo leswi nga chaviki ndzilo loko swi hisiwa, mi fanele mi swi basisa hi ndzilo, kutani swi ta va leswi baseke. Kambe swi fanele swi tlhela swi basisiwa hi mati yo basisa.+ Hinkwaswo leswi chavaka ndzilo loko swi hisiwa swi fanele swi basisiwa hi mati. 24 Mi fanele mi hlantswa swiambalo swa n’wina hi siku ra vunkombo, mi va lava baseke, endzhaku ka sweswo mi nga nghena enxaxeni.’”+
25 Hiloko Yehovha a byela Muxe a ku: 26 “Hlaya leswi phangiweke, u hlaya mahlonga ya vanhu ni ya swifuwo; u swi hlaya u ri na muprista Eliyazara ni tindhuna ta mindyangu ya vanhu. 27 Avanyisa leswi phangiweke hi le xikarhi, swi ta nyikiwa masocha lama yeke enyimpini ni vanhu hinkwavo.+ 28 Eka masocha lama yeke enyimpini u fanele u teka xivumbiwa xin’we eka swa 500, eka vanhu, tihomu, timbhongolo, tinyimpfu ni timbuti, swi va xibalo eka Yehovha. 29 U fanele u swi teka eka hafu leyi va averiweke yona, u swi nyika muprista Eliyazara swi va munyikelo wa Yehovha.+ 30 Eka hafu leyi nyikiweke Vaisrayele, u fanele u teka xin’we eka swa 50, eka vanhu, tihomu, timbhongolo, tinyimpfu ni timbuti u swi nyika Valevhi,+ lava tirhaka etabernakeleni ya Yehovha.”+
31 Muxe na muprista Eliyazara va endla hilaha Yehovha a leriseke Muxe hakona. 32 Rifuwo, leswin’wana hinkwaswo leswi masocha ma swi phangeke a ku ri tinyimpfu ni timbuti ta 675 000, 33 tihomu ta 72 000 34 ni timbhongolo ta 61 000. 35 Vavasati lava nga si tshamaka va etlela ni vavanuna+ a va ri 32 000. 36 Hafu leyi averiweke lava yeke enyimpini a ku ri tinyimpfu ni timbuti ta 337 500. 37 Xibalo xa Yehovha lexi humaka eka tinyimpfu ni timbuti teto a swi ri 675. 38 A ku ri na tihomu ta 36 000 naswona xibalo xa Yehovha eka tona a ku ri tihomu ta 72. 39 A ku ri na timbhongolo ta 30 500 naswona xibalo xa Yehovha eka tona a ku ri timbhongolo ta 61. 40 A ku ri ni vanhu va 16 000 naswona xibalo xa Yehovha eka vona a ku ri vanhu va 32. 41 Hiloko Muxe a nyika muprista Eliyazara xibalo xi va munyikelo wa Yehovha,+ hilaha Yehovha a leriseke Muxe hakona.
42 Eka hafu leyi averiweke Vaisrayele, leyi Muxe a yi aveke eka leswi nyikiweke masocha, 43 hafu yoleyo ya tinyimpfu ni timbuti a ti ri 337 500, 44 tihomu a ti ri 36 000, 45 timbhongolo a ti ri 30 500 46 ni vanhu a va ri 16 000. 47 Kutani eka hafu leyi averiweke Vaisrayele, Muxe a teka xin’we eka swa 50, eka vanhu ni le ka swifuwo a swi nyika Valevhi,+ lava a va tirha etabernakeleni ya Yehovha,+ hilaha Yehovha a leriseke Muxe hakona.
48 Kutani varhangeri va masocha ya nyimpi va vanhu va magidi,+ tindhuna ta magidi ni tindhuna ta madzana va ya eka Muxe, 49 va fika va ku: “Malandza ya wena ma hlayele masocha lama nga hansi ka hina naswona ma helerile.+ 50 Hikwalaho pfumelela un’wana ni un’wana wa hina a nyikela leswi a swi kumeke swi va gandzelo ra Yehovha, swilo swa nsuku, masindza, vusenga, swingwavila swo fungha ha swona, swingwavila swa tindleve ni swin’wetsin’wetsi swin’wana leswaku hi ta kombela ku rivaleriwa eka Yehovha.”
51 Hiloko Muxe na muprista Eliyazara va amukela nsuku lowu humaka eka vona ni swin’wetsin’wetsi hinkwaswo. 52 Nsuku hinkwawo lowu va wu nyikeleke eka Yehovha, lowu a wu huma eka tindhuna ta magidi ni tindhuna ta madzana a wu endla 190 950 wa tikhilogiramu.* 53 Socha ha rin’we a ri titekele swo karhi. 54 Hiloko Muxe na muprista Eliyazara va amukela nsuku lowu humaka eka tindhuna ta magidi ni tindhuna ta madzana, va wu tisa etendeni ra nhlengeletano wu va xitsundzuxo eka Vaisrayele emahlweni ka Yehovha.
32 Vana va Rhuveni+ ni vana va Gadi+ a va ri ni swifuwo swo tala, hiloko va vona leswaku tiko ra Yazere+ ni ra Giliyadi a ma ri ndhawu leyinene ya swifuwo. 2 Kutani vana va Gadi ni vana va Rhuveni va ya eka Muxe na muprista Eliyazara ni tindhuna, va fika va ku: 3 “Miti ya Ataroti, Diboni, Yazere, Nimura, Hexiboni,+ Eliyale, Sebama, Nebo+ na Beyoni,+ 4 ndhawu leyi Yehovha a yi hluleleke Vaisrayele+ i ndhawu leyinene ya swifuwo naswona hina malandza ya wena hi ni swifuwo swo tala.”+ 5 Va ya emahlweni va ku: “Loko u hi tsakela, ndhawu leyi a yi nyikiwe malandza ya wena yi va ndzhaka ya wona. U nga hi perisi nambu wa Yordani.”
6 Hiloko Muxe a vutisa vana va Gadi ni vana va Rhuveni a ku: “Xana vamakwenu va ta ya enyimpini n’wina mi lo tshama laha? 7 Hikwalaho ka yini mi lava ku heta Vaisrayele matimba leswaku va nga peleli etikweni leri Yehovha a nga ta va nyika rona hakunene? 8 Vatata wa n’wina va endle tano loko ndzi va rhuma va suka eKadexi-baniya leswaku va ya kambela tiko.+ 9 Loko va fika eNkoveni wa Exikoli+ va vona tiko, va hete Vaisrayele matimba leswaku va nga yi etikweni leri Yehovha a a ta va nyika rona.+ 10 Yehovha a a hlundzuke ngopfu siku rero lerova a hlambanya a ku:+ 11 ‘Vavanuna lava humeke eEgipta lava nga ni malembe ya 20 ku ya ehenhla a va nge ri voni tiko+ leri ndzi ri hlambanyeleke Abrahama, Isaka na Yakobo,+ hikuva a va ndzi landzelanga hi mbilu ya vona hinkwayo— 12 handle ka Kalebe+ n’wana wa Yefune wa Mukenizi na Yoxuwa+ n’wana wa Nuni, hikuva va landzele Yehovha hi timbilu ta vona hinkwato.’+ 13 Yehovha a hlundzukela Vaisrayele kutani a va tsendzelekisa emananga ku ringana malembe ya 40,+ kukondza vanhu hinkwavo lava a va endla swo biha eka Yehovha va hela.+ 14 Na n’wina mi tekelele vatata wa n’wina, mi vadyohi lava endlaka leswaku Yehovha a hlundzukela Vaisrayele swinene. 15 Loko mi nga n’wi landzeli, u ta tlhela a va tshika emananga, mi ta endla leswaku vanhu lava hinkwavo va weriwa hi khombo.”
16 Endzhakunyana, va tlhelela eka yena va fika va ku: “Hi pfumelele hi aka matshanga ya swifuwo swa hina hi maribye, hi akela ni vana va hina miti. 17 Kambe hi ta tshama hi hlomile+ naswona hi ta famba ni Vaisrayele kukondza hi va fikisa laha va yaka kona, kasi vana va hina va ta sala emitini leyi biyeriweke, va sirhelelekile eka vanhu lava tshamaka etikweni leri. 18 A hi nge tlheleli emakaya kukondza Muisrayele un’wana ni un’wana a kuma ndhawu leyi nga ndzhaka yakwe.+ 19 Hikuva a hi nge kumi ndzhaka na vona etlhelweni lerin’wana ra nambu wa Yordani ni le ntsungeni, hileswi hi kumeke ndzhaka ya hina etlhelweni ra le vuxeni bya Yordani.”+
20 Muxe a va hlamula a ku: “Loko mo endla leswi: Hlomani mi ya lwa hilaha Yehovha a leriseke hakona;+ 21 naswona loko hinkwenu mo hloma, mi pela nambu wa Yordani Yehovha a ri karhi a swi vona, a ri karhi a hlongola valala vakwe lava nga emahlweni ka yena+ 22 kukondza tiko ri hluriwa emahlweni ka Yehovha,+ endzhaku ka sweswo mi ta vuya+ naswona mi ta va mi nga ha ri na nandzu emahlweni ka Yehovha ni Vaisrayele. Kutani tiko leri ri ta va ndzhaka ya n’wina emahlweni ka Yehovha.+ 23 Kambe loko mo ka mi nga endli hi ndlela leyi, mi ta va mi dyohele Yehovha. Hikwalaho mi ta xupuriwa hikwalaho ka xidyoho xa n’wina. 24 Kutani mi nga va akela vana va n’wina miti, mi akela ni mitlhambi ya n’wina matshanga,+ kambe mi fanele mi endla leswi mi swi tshembiseke.”
25 Vana va Gadi ni vana va Rhuveni va byela Muxe va ku: “Malandza ya wena ma ta endla hilaha hosi ya mina yi lerisaka hakona. 26 Vana va hina, vasati va hina, mitlhambi ya hina ni swifuwo swa hina hinkwaswo swi ta tshama emitini ya Giliyadi,+ 27 kambe malandza ya wena ma ta pela nambu, wanuna un’wana ni un’wana a hlomile ku ya lwela Yehovha,+ hilaha hosi ya mina yi vulaka hakona.”
28 Hiloko Muxe a lerisa muprista Eliyazara, Yoxuwa n’wana wa Nuni ni tindhuna ta vatata wa tinyimba ta Israyele. 29 Muxe a ku eka vona: “Loko vana va Gadi ni vana va Rhuveni vo pela nambu wa Yordani na n’wina, wanuna un’wana ni un’wana la hlomeleke nyimpi emahlweni ka Yehovha, kutani tiko ri hluriwa emahlweni ka n’wina, mi ta va nyika tiko ra Giliyadi ri va ndzhaka ya vona.+ 30 Kambe loko vo ka va nga hlomi va pela nambu na n’wina, va ta tshama na n’wina etikweni ra Kanana.”
31 Hiloko vana va Gadi ni vana va Rhuveni va hlamula va ku: “Leswi Yehovha a swi byeleke malandza ya wena hi ta swi endla. 32 Hi ta hloma hi pela nambu hi ya lwela Yehovha etikweni ra Kanana,+ kambe ndzhaka ya hina yi le tlhelweni leri ra Yordani.” 33 Hiloko Muxe a nyika vana va Gadi, vana va Rhuveni+ ni hafu ya nyimba ya Manase+ n’wana wa Yosefa mfumo wa Sihoni+ hosi ya Vaamori ni mfumo wa Ogo+ hosi ya Baxani, ku nga tiko leri nga ni miti leyi nga emigangeni yoleyo ni miti leyi akiweke ekusuhi na wona.
34 Vana va Gadi va aka* muti wa Diboni,+ Ataroti,+ Arowere,+ 35 Atiroto-xofani, Yazere,+ Yogibeha,+ 36 Beta-nimura+ na Beta-harama,+ ku nga miti leyi biyeriweke, va tlhela va aka ni matshanga ya maribye ya swifuwo swa vona. 37 Vana va Rhuveni va aka muti wa Hexiboni,+ Eliyale,+ Kiriyatayimi,+ 38 Nebo+ na Bali-meyoni+ mavito ya yona ma cinciwile va aka na Sibma; kutani va sungula ku cinca mavito ya miti leyi va yi pfuxeke.
39 Vana va Makiri+ n’wana wa Manase va hlasela muti wa Giliyadi va wu teka kutani va hlongola Vaamori lava a va tshama kwalaho. 40 Hiloko Muxe a nyika Makiri n’wana wa Manase muti wa Giliyadi, a sungula ku tshama eka wona.+ 41 Yayiri n’wana wa Manase a hlasela swimitana swa vona swa matende, a swi teka a swi thya Havhoti-yayiri.*+ 42 Noba a hlasela muti wa Kenati ni swimitana leswi nga ekusuhi na wona kutani a swi thya vito rakwe ra Noba.
33 Leyi i ndlela leyi Vaisrayele va fambeke ha yona, loko va huma etikweni ra Egipta+ hi ku ya hi mavuthu ya vona,+ va rhangeriwe hi Muxe na Aroni.+ 2 Muxe a a tsala tindhawu leti a va hundza eka tona loko va ri karhi va famba hilaha Yehovha a a n’wi lerisa hakona, va fambe hi ndlela leyi:+ 3 Va suke eRamsese+ hi siku ra vu-15 ra n’hweti yo sungula.+ Hi siku leri tlhandlamaka ra Paseka,+ Vaisrayele va hume eEgipta va nga chavi nchumu va ri karhi va voniwa hi Vaegipta hinkwavo. 4 Hi nkarhi wolowo Vaegipta a va ri eku lahleni ka mativula hinkwawo lawa Yehovha a ma dlayeke,+ hikuva Yehovha u avanyise swikwembu swa vona.+
5 Vaisrayele va suka eRamsese va ya dzima mixaxa eSukoti.+ 6 Va suka eSukoti va ya dzima mixaxa eEthamu+ etlhelo ka mananga. 7 Va suka eEthamu va tlhelela ePihahiroto lowu langutaneke na Bali-sefoni,+ va fika va dzima mixaxa emahlweni ka Migidoli.+ 8 Endzhaku ka sweswo va suka ePihahiroto va hundza exikarhi ka lwandle+ va ya emananga,+ va fambe masiku manharhu emananga ya Ethamu,+ va ya fika va dzima mixaxa eMara.+
9 Hiloko va suka eMara va ya eElimi. Le Elimi a ku ri ni swihlovo swa mati swa 12 ni mirhi ya micindzu ya 70, va fika va dzima mixaxa kwalaho.+ 10 Va suka eElimi va ya dzima mixaxa ekusuhi ni Lwandle ro Tshwuka. 11 Endzhaku ka sweswo va suka eLwandle ro Tshwuka va ya dzima mixaxa emananga ya Sini.+ 12 Va suka emananga ya Sini va ya dzima mixaxa eDofika. 13 Endzhaku ka sweswo va suka eDofika va ya dzima mixaxa eAluxi. 14 Va suka eAluxi va ya dzima mixaxa eRefidimi,+ laha a ku nga ri na mati yo nwa. 15 Endzhaku ka sweswo va suka eRefidimi va ya dzima mixaxa emananga ya Sinayi.+
16 Va suka emananga ya Sinayi va ya dzima mixaxa eKibiroti-hatavha.+ 17 Kutani va suka eKibiroti-hatavha va ya dzima mixaxa eHaseroti.+ 18 Endzhaku ka sweswo va suka eHaseroti va ya dzima mixaxa eRitima. 19 Endzhaku va suka eRitima va ya dzima mixaxa eRimono-perezi. 20 Hiloko va suka eRimono-perezi va ya dzima mixaxa eLibna. 21 Va suka eLibna va ya dzima mixaxa eRisa. 22 Endzhaku ka sweswo va suka eRisa va ya dzima mixaxa eKehelata. 23 Kutani va suka eKehelata va ya dzima mixaxa eNtshaveni ya Xefere.
24 Endzhaku ka sweswo va suka eNtshaveni ya Xefere va ya dzima mixaxa eHarada. 25 Kutani va suka eHarada va ya dzima mixaxa eMakeloti. 26 Va suka+ eMakeloti va ya dzima mixaxa eTahata. 27 Endzhaku ka sweswo va suka eTahata va ya dzima mixaxa eTera. 28 Va suka eTera va ya dzima mixaxa eMitika. 29 Endzhaku ka sweswo va suka eMitika va ya dzima mixaxa eHaximona. 30 Va suka eHaximona va ya dzima mixaxa eMosera. 31 Kutani va suka eMosera va ya dzima mixaxa eBene-yakani.+ 32 Endzhaku ka sweswo va suka eBene-yakani va ya dzima mixaxa eHori-hagidigada. 33 Endzhaku va suka eHori-hagidigada va ya dzima mixaxa eYotibata.+ 34 Endzhaku ka sweswo va suka eYotibata va ya dzima mixaxa eAbirona. 35 Kutani va suka eAbirona va ya dzima mixaxa eEsiyoni-gebere.+ 36 Endzhaku ka sweswo va suka eEsiyoni-gebere va ya dzima mixaxa emananga ya Zini,+ ku nga Kadexi.
37 Endzhaku va suka eKadexi va ya dzima mixaxa eNtshaveni ya Hore,+ laha tiko ra Edomu ri sukelaka kona. 38 Kutani muprista Aroni a khandziya Ntshava ya Hore hilaha Yehovha a n’wi leriseke hakona ivi a ya fela kona, hi lembe ra vu-40 ra ku huma ka Vaisrayele etikweni ra Egipta, hi siku ro sungula ra n’hweti ya vuntlhanu.+ 39 Aroni a a ri ni malembe ya 123 loko a fa eNtshaveni ya Hore.
40 Hosi ya le Aradi+ leyi a yi ri Mukanana naswona a yi tshama eNegebu etikweni ra Kanana, yi twa leswaku Vaisrayele va le ku teni.
41 Hi ku famba ka nkarhi va suka eNtshaveni ya Hore+ va ya dzima matende eZalamona. 42 Endzhaku ka sweswo, va suka eZalamona va ya dzima mixaxa ePunoni. 43 Kutani va suka ePunoni va ya dzima mixaxa eOboti.+ 44 Va suka eOboti va ya dzima mixaxa le Iye-abarima, endzilakaneni wa Mowabu.+ 45 Endzhaku va suka eIyima va ya dzima mixaxa eDiboni-gadi.+ 46 Endzhaku va suka eDiboni-gadi va ya dzima mixaxa eAlimoni-diblatayimi. 47 Kutani va suka eAlimoni-diblatayimi va ya dzima mixaxa etintshaveni ta Abarima,+ emahlweni ka Nebo.+ 48 Eku heteleleni va suka etintshaveni ta Abarima va ya dzima mixaxa emananga ya le Mowabu, ekusuhi na Yordani eYeriko.+ 49 Va tshame ekusuhi ni nambu wa Yordani swa nkarhinyana ku sukela eBeta-yeximoto ku ya eAvele-xitimi+ emananga ya Mowabu.
50 Yehovha a vulavula na Muxe emananga ya le Mowabu eYordani le Yeriko a ku: 51 “Byela Vaisrayele u ku, ‘Mi ta pela nambu wa Yordani mi ya etikweni ra Kanana.+ 52 Mi fanele mi hlongola vanhu hinkwavo lava tshamaka etikweni leri, mi fayetela swikwembu swa vona hinkwaswo swa maribye+ ni leswi endliweke hi nsimbhi,+ mi fanele mi hirimuxa ni tindhawu ta vona hinkwato leti va phahlaka eka tona.+ 53 Tiko rona mi ta ri teka ivi mi tshama eka rona, hikuva kunene ndzi ta mi nyika rona ri va ndzhaka ya n’wina.+ 54 Mi fanele mi ava tiko hi ku tirhisa vuhlolotwana*+ ri va ndzhaka ya mindyangu ya n’wina. Lava nga tala mi va avela ndhawu leyikulu, kasi lava nga vatsongo mi va avela ndhawu leyitsongo.+ Un’wana ni un’wana u ta nyikiwa ndhawu leyi vuhlolotwana byi nga ta n’wi komba yona. Mi ta nyikiwa tiko ri va ndzhaka ya n’wina hi ku ya hi tinyimba ta vatata wa n’wina.+
55 “‘Kambe, loko mi nga va hlongoli hinkwavo vanhu lava tshamaka etikweni leri,+ lava mi nga ta va tshika va sala, va ta fana ni nchumu lowu mi hlohlonyaka matihlo ni mitwa ematsheveni ya n’wina. Va ta mi karhata swinene etikweni leri mi nga ta va mi tshama eka rona.+ 56 Kutani leswi a ndzi ta swi endla eka vona, ndzi ta swi endla eka n’wina.’”+
34 Yehovha a ya emahlweni a byela Muxe a ku: 2 “Lerisa Vaisrayele u ku: ‘Loko mi nghena etikweni ra Kanana,+ matiko lama landzelaka ma ta va ndzhaka ya n’wina, tiko ra Kanana hi ku ya hi mindzilakano ya rona.+
3 “‘Ndzilakana wa n’wina hi tlhelo ra le dzongeni wu ta sukela emananga ya Zini lama nga ekusuhi na Edomu, kasi hi le tlhelo ra le evuxeni ndzilakana wu ta sukela eLwandle ra Munyu.*+ 4 Ndzilakana wa n’wina wu ta jika wu ya hundza hi le dzongeni wa Akrabimi+ wu ya eZini, wu ya helela edzongeni wa Kadexi-baniya.+ Kutani wu ta tlhela wu ya eHasara-adara+ ku ya fika eAzimoni. 5 Ndzilakana wu ta jika wu ya eAzimoni wu kongoma eNkoveni wa Egipta, wu ya helela eLwandle.*+
6 “‘Ndzilakana wa n’wina wa le vupeladyambu wu ta va Lwandle Lerikulu* ni ndhawu leyi nga ekusuhi ni lwandle. Wolowo wu ta va ndzilakana wa n’wina wa le vupeladyambu.+
7 “‘Lowu wu ta va ndzilakana wa n’wina wa le n’walungwini: Mi ta wu fungha ku sukela eLwandle Lerikulu ku ya eNtshaveni ya Hore. 8 Mi ta fungha ndzilakana ku sukela eNtshaveni ya Hore ku ya eLe′bo-hamati*+ wu ya helela eSedada.+ 9 Ndzilakana wu ta ya eZifironi naswona wu ta helela eHasara-enana.+ Lowu wu ta va ndzilakana wa n’wina wa le n’walungwini.
10 “‘Mi fanele mi fungha ndzilakana wa n’wina wa le vuxeni ku sukela eHasara-enana ku ya eXefamu. 11 Ndzilakana wu ta suka eXefamu wu ya eRibla evuxeni bya Ayini, wu rhelela wu ya hundza hi le tlhelo ka xintshabyana xa le vuxeni xa Lwandle ra Kinereti.*+ 12 Wu ta kongoma eYordani wu ya helela eLwandle ra Munyu.+ Leri ri ta va tiko ra n’wina+ ni mindzilakana ya rona.’”
13 Hiloko Muxe a byela Vaisrayele a ku: “Leri i tiko leri mi nga ta avelana rona hi vuhlolotwana,*+ hilaha Yehovha a vuleke hakona leswaku u ta ri nyika tinyimba ta kaye ni hafu ya nyimba. 14 Hikuva nyimba ya vana va Rhuveni hi ku ya hi mindyangu ya yona, nyimba ya vana va Gadi hi ku ya hi mindyangu ya vona ni hafu ya nyimba ya Manase ana se va yi kumile ndzhaka ya vona.+ 15 Tinyimba letimbirhi ni hafu ana se ti hlawule ndzhaka ya tona evuxeni bya Yordani ekusuhi na Yeriko hi le vuxeni.”+
16 Yehovha a tlhela a byela Muxe a ku: 17 “Lawa i mavito ya vavanuna lava nga ta mi avela tiko: muprista Eliyazara+ na Yoxuwa+ n’wana wa Nuni. 18 Mi ta teka ndhuna yin’we eka nyimba ha yin’we leswaku yi mi avela tiko.+ 19 Mavito ya tindhuna ta kona hi lawa: eka nyimba ya Yuda+ ku ta va Kalebe+ n’wana wa Yefune; 20 eka nyimba ya vana va Simiyoni,+ ku ta va Xemuwele n’wana wa Amihudi; 21 eka nyimba ya Benjamini,+ ku ta va Elidada n’wana wa Kisiloni; 22 eka nyimba ya vana va Dani,+ ku ta va ndhuna Buki, n’wana wa Yogili; 23 eka vana va Yosefa,+ eka nyimba ya vana va Manase+ ku ta va ndhuna Haniyele, n’wana wa Efodi; 24 eka nyimba ya vana va Efrayimi,+ ku ta va ndhuna Kemuwele, n’wana wa Xifitani; 25 eka nyimba ya vana va Zebuloni,+ ku ta va ndhuna Elizafani, n’wana wa Parinaka; 26 eka nyimba ya vana va Isakara,+ ku ta va ndhuna Palatiyele, n’wana wa Azani; 27 eka nyimba ya vana va Axere,+ ku ta va ndhuna Ahihudi, n’wana wa Xelomi; 28 eka nyimba ya vana va Neftali,+ ku ta va ndhuna Padahele, n’wana wa Amihudi.” 29 Lava hi vona lava Yehovha a vuleke leswaku va avela Vaisrayele tiko ra Kanana.+
35 Yehovha a ya emahlweni a vulavula na Muxe emananga ya le Mowabu eYordani+ le Yeriko a ku: 2 “Lerisa Vaisrayele leswaku va nyika Valevhi miti yo tshama eka yona eka ndzhaka leyi va nga ta yi kuma,+ va fanele va va nyika ni madyelo lama nga ekusuhi ni miti yoleyo.+ 3 Va ta tshama emitini yoleyo, kasi madyelo ma ta va ya swifuwo swa vona, nhundzu ya vona ni swifuwo leswin’wana swa vona hinkwaswo. 4 Madyelo ya miti leyi mi nga ta yi nyika Valevhi ma ta sukela ekhumbini ra muti, ma ta anama timitara ta 445* matlhelo hinkwawo. 5 Mi fanele mi pima ehandle ka muti, timitara ta 890* ku ya evuxeni, timitara ta 890 ku ya edzongeni, timitara ta 890 ku ya evupeladyambu ni timitara ta 890 ku ya en’walungwini, muti wu va exikarhi. Lawa ku ta va madyelo ya miti ya vona.
6 “Mi ta nyika Valevhi miti ya tsevu yo tumbela eka yona,+ leyi munhu loyi a nga dlayangiki hi vomu a nga ta balekela eka yona,+ ku katsa ni miti yin’wana ya 42. 7 Mi ta nyika Valevhi miti ya 48 ni madyelo ya yona.+ 8 Miti leyi mi nga ta va nyika yona yi ta huma eka ndzhaka ya Vaisrayele.+ Eka lava nga tala u ta teka yo tala, eka lava nga vatsongo u ta teka yitsongo.+ Ntlawa ha wun’we wu ta nyika Valevhi yin’wana ya miti ya wona, hi ku ya hi mpimo wa ndzhaka leyi va nga ta yi kuma.”
9 Yehovha a ya emahlweni a byela Muxe a ku: 10 “Byela Vaisrayele u ku, ‘Leswi mi pelaka nambu wa Yordani mi ya etikweni ra Kanana,+ 11 mi fanele mi hlawula miti leyi mi nga ta kota ku fika eka yona leyi nga ta va miti yo tumbela eka yona, leswaku loyi a nga ta tshuka a dlaya munhu ku nga ri hi vomu a ta balekela kona.+ 12 Miti leyi yi ta va vutumbelo bya n’wina loko mi balekela murihiseri wa ngati+ leswaku mudlayi a nga dlayiwi kukondza a yima emahlweni ka ntshungu ku tengiwa nandzu wakwe.+ 13 Miti ya vutumbelo ya tsevu leyi mi nga ta yi hlawula yi ta tirhiseriwa sweswo. 14 Mi ta hlawula miti yinharhu etlhelweni leri ra Yordani+ ni miti yinharhu leyi nga etikweni ra Kanana,+ yi ta va miti ya vutumbelo. 15 Miti leyi ya tsevu yi ta va vutumbelo eka Vaisrayele, muluveri+ ni munhu loyi a tshamaka na vona, leswaku loyi a nga ta tshuka a dlaya munhu ku nga ri hi vomu a ta balekela kona.+
16 “‘Kambe loko o n’wi ba hi nsimbhi kutani a fa, i mudlayi. Mudlayi u fanele a dlayiwa.+ 17 Loko o n’wi ba hi ribye leri nga dlayaka munhu kutani a fa, i mudlayi. Mudlayi u fanele a dlayiwa. 18 Loko o n’wi ba hi mhandzi leyi nga dlayaka munhu kutani a fa, i mudlayi. Mudlayi u fanele a dlayiwa.
19 “‘Murihiseri wa ngati hi yena loyi a nga ta dlaya mudlayi yoloye. Loko o hlangana na yena, u ta n’wi dlaya. 20 Loko o fa hikwalaho ka leswi a nga n’wi susumeta hi ku va a n’wi venga kumbe a n’wi faya hi nchumu wo karhi, hi xikongomelo xo n’wi vavisa,+ 21 kumbe a n’wi hima a fa hikwalaho ka leswi a n’wi vengaka, loyi a n’wi himeke u fanele a dlayiwa. I mudlayi. Loko murihiseri o hlangana na yena u ta n’wi dlaya.
22 “‘Kambe loko o n’wi susumeta ku nga ri hi vomu kambe a nga n’wi vengi kumbe a n’wi hoxa hi nchumu wo karhi, ku nga ri hi xikongomelo xo n’wi vavisa,+ 23 kumbe a wisa ribye a nga n’wi voni kutani ri n’wi wela naswona a a nga ri nala wakwe kumbe a a nga tiyimiselanga ku n’wi vavisa kutani a fa, 24 vaavanyisi va fanele va avanyisa exikarhi ka loyi a n’wi beke ni murihiseri wa ngati, hi ku landza swileriso leswi.+ 25 Kutani vaavanyisi va fanele va ponisa mudlayi eka murihiseri wa ngati, va n’wi tlherisela emutini wa vutumbelo lowu a a balekele eka wona, u fanele a tshama eka wona kukondza muprista lonkulu loyi a hlawuriweke hi ku cheriwa mafurha yo kwetsima a fa.+
26 “‘Kambe loko mudlayi o huma emutini wa vutumbelo lowu a balekeleke eka wona, 27 kutani murihiseri wa ngati a n’wi kuma ehandle ka muti wa vutumbelo, ivi a n’wi dlaya, a nge vi ni nandzu. 28 Hikuva mudlayi u fanele a tshama emutini wa vutumbelo kukondza ku fa muprista lonkulu. Kambe a nga tlhelela etikweni ra rikwavo endzhaku ka loko muprista lonkulu a file.+ 29 Leyi i milawu leyi mi nga ta yi landzela loko mi avanyisa vanhu ni vatukulu lava nga ta landzela, hinkwako laha mi tshamaka kona.
30 “‘Un’wana ni un’wana loyi a dlayaka munhu, u fanele a dlayiwa+ loko ku ri ni vumbhoni bya timbhoni;+ kambe a ku na munhu loyi a nga ta dlayiwa hikwalaho ka vumbhoni bya mbhoni yin’we ntsena. 31 Mi nga tshuki mi amukela mali yo ponisa mudlayi loyi a faneriwaka hi ku fa, hikuva u fanele a dlayiwa.+ 32 Mi nga tshuki mi amukela mali yo tshunxa loyi a balekeleke emutini wakwe wa vutumbelo, leswaku a tlhelela etikweni ra rikwavo muprista lonkulu a nga si fa.
33 “‘Mi nga tshuki mi thyakisa tiko leri mi tshamaka eka rona, hikuva ngati yi thyakisa tiko,+ naswona a ku na ndzivalelo wa ngati leyi halatiweke etikweni handle ka ku halata ngati ya loyi a yi halateke.+ 34 Mi nga tshuki mi thyakisa tiko leri mi tshamaka eka rona, leri na mina ndzi tshamaka eka rona; hikuva mina Yehovha, ndzi tshama exikarhi ka Vaisrayele.’”+
36 Varhangeri va rixaka ra Giliyadi n’wana wa Makiri,+ n’wana wa Manase va mindyangu ya vana va Yosefa, va ya eka Muxe ni le ka tindhuna ta tiko, ku nga varhangeri va mindyangu ya Vaisrayele. 2 Va fika va ku: “Yehovha u lerise hosi ya mina leswaku yi avela Vaisrayele tiko hi vuhlolotwana;*+ naswona Yehovha u lerise hosi ya mina ku nyika vana va vanhwanyana va Selofehada makwerhu ndzhaka yakwe.+ 3 Loko vo tekiwa hi vavanuna va nyimba yin’wana ya Israyele, ndzhaka ya vavasati lava yi ta tekiwa eka ndzhaka ya vatata wa hina, yi hlanganisiwa ni ndzhaka ya nyimba leyi va tekiwaka eka yona, leswi swi ta vula leswaku yi ta susiwa eka ndzhaka ya hina leyi hi averiweke yona hi vuhlolotwana.* 4 Kutani loko ku fika Lembe Ra Ntshunxeko*+ ra Vaisrayele, ndzhaka ya vavasati lava yi ta hlanganisiwa ni ndzhaka ya nyimba leyi va tekiweke eka yona, lerova ndzhaka ya vona yi ta susiwa eka ndzhaka ya nyimba ya vatata wa hina.”
5 Kutani Muxe a lerisa Vaisrayele leswi Yehovha a n’wi byeleke swona a ku: “Leswi nyimba ya vana va Yosefa yi swi vulaka i ntiyiso. 6 Leswi hi leswi Yehovha a swi leriseke mayelana ni vana va vanhwanyana va Selofehada: ‘Va nga tekiwa hi loyi va n’wi rhandzaka. Kambe va fanele va tekiwa hi wanuna loyi a humaka enyimbeni ya tata wa vona. 7 Ndzhaka ya Vaisrayele a yi fanelanga yi suka eka nyimba yin’wana yi ya eka nyimba yin’wana, yi fanele yi tshama eka nyimba ya vakokwa wa vona. 8 Nhwana un’wana ni un’wana loyi a nga ni ndzhaka exikarhi ka tinyimba ta Israyele, u fanele a tekiwa hi wanuna loyi a humaka eka nyimba ya tata wa yena,+ leswaku Vaisrayele va ta tshama ni ndzhaka ya vakokwa wa vona. 9 Ndzhaka ya nyimba yo karhi a yi fanelanga yi tekiwa hi nyimba yin’wana, hikuva tinyimba ta Israyele ti fanele ti tshama ni ndzhaka ya tona.’”
10 Vana va vanhwanyana va Selofehada va endla hilaha Yehovha a leriseke Muxe hakona.+ 11 Hikwalaho Mahela, Tirisa, Hogila, Milka na Nowa, ku nga vana va vanhwanyana va Selofehada+ va tekiwe hi vana va vamakwavo va tata wa vona. 12 Va tekiwe hi vavanuna lava humaka emindyangwini ya Manase n’wana wa Yosefa, leswaku ndzhaka ya vona yi ta tshama enyimbeni ya ndyangu wa tata wa vona.
13 Leswi i swileriso ni swiboho leswi Yehovha a swi nyikeke Vaisrayele hi ku tirhisa Muxe loko va ri emananga ya le Mowabu eYordani le Yeriko.+
Hi Xiheveru, “a ri mufambi,” ku nga munhu loyi a nga riki Mulevhi.
Kumbe “mujeko.”
Hi Xiheveru, “ndzilo.”
Hi Xiheveru, “a ri mufambi,” ku nga munhu loyi a nga riki ntukulu wa Aroni.
Vona Tinhlamuselo.
Hi Xiheveru, “a ri mufambi,” ku nga munhu loyi a nga riki ntukulu wa Aroni.
Hi Xiheveru, “tixikele ta ntlhanu.” Xikele a yi tika 11,4 wa tigiramu. Vona Xiengetelo B14.
Kumbe “hi xikele yo kwetsima.”
Gera a yi tika 0,57 wa tigiramu. Vona Xiengetelo B14.
Hi Xiheveru, “xikele.” Xikele a yi tika 11,4 wa tigiramu. Vona Xiengetelo B14.
Ku nga xiharhi lexi tshamaka ematini.
Ku nga xiharhi lexi tshamaka ematini.
Ku nga xiharhi lexi tshamaka ematini.
Ku nga xiharhi lexi tshamaka ematini.
Ku nga xiharhi lexi tshamaka ematini.
Kumbe “nkuma wa mafurha,” ku nga nkuma lowu nga ni mafurha ya magandzelo.
Kumbe “xivunguvungu.”
Ku nga, xiharhi lexi tshamaka ematini.
Hi Xiheveru, “ndzhwalo.”
Vona nhlamuselo ya le hansi ya Eks 29:7.
Vona Tinhlamuselo.
Hi Xiheveru, “Va.”
Hi Xiheveru, “va.”
Hi Xiheveru, “va.”
Hi Xiheveru, “1/10 ya efa.” Vona Xiengetelo B14.
Kumbe “A swi ve tano! A swi ve tano!”
Hi Xiheveru, na·zir′, leswi vulaka “Loyi A Hlawuriweke; Loyi A Tinyiketeleke; Loyi A Hambanisiweke.”
Ku nga muxaka wun’wana wa matuva lamatsongo.
Hi Xiheveru, “tigolonyi leti funengetiweke.”
Kumbe “pfuriwa.”
Kumbe “pfuriwa.”
Hi Xiheveru, “130 wa tixikele.” Xikele a yi tika 11,4 wa tigiramu. Vona Xiengetelo B14.
Hi Xiheveru, “70 wa tixikele.” Xikele a yi tika 11,4 wa tigiramu. Vona Xiengetelo B14.
Kumbe “xikele yo kwetsima.”
Hi Xiheveru, “khume ra tixikele.” Xikele a yi tika 11,4 wa tigiramu. Vona Xiengetelo B14.
Kumbe “pfuriwa.”
Hi Xiheveru, “2 400 wa tixikele.” Xikele a yi tika 11,4 wa tigiramu. Vona Xiengetelo B14.
Hi Xiheveru, “120 wa tixikele.” Xikele a yi tika 11,4 wa tigiramu. Vona Xiengetelo B14.
Kumbe “pfuriwa.”
Hi Xiheveru, “mati yo susa xidyoho.”
Kumbe “xisingwana.”
Ku nga Yetro.
Leswi vulaka “Ku Tshwa.”
Swi tikomba ku ri vanhu lava nga riki Vaisrayele.
Kumbe “muongori wa xinuna.”
Hi Xiheveru, “Tibasiseni.”
Kumbe “switsatsatsa.”
Hi Xiheveru, “swisungunu swimbirhi.” Xisungunu a xi ringana na 44,5 wa tisentimitara. Vona Xiengetelo B14.
Homere a yi ringana na 220 wa tilitara. Vona Xiengetelo B14.
Leswi vulaka “Masirha Ya Vanhu Va Makwanga.”
Kumbe “a a titsongahate swinene ku tlula vanhu hinkwavo.”
Hi Xiheveru, “yindlu.”
Kumbe “ntshayito.”
Kumbe “Yehoxuwa,” leswi vulaka leswaku “Yehovha i Muponisi.”
Kumbe “enyangweni ya Hamati.”
Leswi vulaka “Xichocho Xa Madiriva.”
Hi Xiheveru, “hikuva i xinkwa xa hina.”
Hi Xiheveru, “endleke vunghwavava.”
Kumbe “endla nala wa n’wina.”
Hi Xiheveru, “1/10 ya efa.” Vona Xiengetelo B14.
Hini a yi ringana na 3,67 wa tilitara. Vona Xiengetelo B14.
Omere a yi ringana na 2,2 wa tilitara. Vona Xiengetelo B14.
Kumbe “xinkwa.”
Kumbe “madziva, swincikinciki.”
Hi Xiheveru, “endla vunghwavava.”
Hi Xiheveru, “xokola”
Kumbe “eSheol.” Vona Tinhlamuselo.
Kumbe “eSheol.” Vona Tinhlamuselo.
Hi Xiheveru, “loyi a nga mufambi.”
Ku nga munhu loyi a nga riki Mulevhi.
Ku nga munhu loyi a nga riki Mulevhi.
Hi Xiheveru, “tixikele.” Xikele a yi tika 11,4 wa tigiramu. Vona Xiengetelo B14.
Hi Xiheveru, “xikele yo kwetsima.”
Gera a yi tika 0,57 wa tigiramu. Vona Xiengetelo B14.
Leswi vulaka “Ku Holova.”
Hi Xiheveru, “masiku.”
Leswi vulaka “Ku Lovisiwa.”
Kumbexana “mananga.”
Swi tikomba ku vulavuriwa hi Yufrata.
Hi Xiheveru, “mbhongolo ya ntswele.”
Kumbe “cincaka miehleketo.”
Kumbexana “mananga.”
Kumbe “vana.”
Kumbe “enkarhini wa makumu.”
Vona Tinhlamuselo.
Vona Tinhlamuselo.
Hi Xiheveru, “ndzilo.”
Hi Xiheveru, “1/10 ya efa.” Vona Xiengetelo B14.
Hini a yi ringana na 3,67 wa tilitara. Vona Xiengetelo B14.
Hi Xiheveru, “2/10 ya efa.” Vona Xiengetelo B14.
Hi Xiheveru, “3/10 ya efa.” Vona Xiengetelo B14.
Hi Xiheveru, “xinkwa.”
Hi Xiheveru, “3/10 ya efa.” Vona Xiengetelo B14.
Hi Xiheveru, “2/10 ya efa.” Vona Xiengetelo B14.
Hi Xiheveru, “1/10 ya efa.” Vona Xiengetelo B14.
Hi ntolovelo ku “tisola” swi vula swilo swo hambanahambana, ku katsa ni ku titsona swakudya.
Kumbe “mthofi; mthovhu.”
Hi Xiheveru, “16 750 wa tixikele.” Xikele a yi tika 11,4 wa tigiramu. Vona Xiengetelo B14.
Kumbe “pfuxeta.”
Leswi vulaka “Swimitana Swa Matende Swa Yayiri.”
Vona Tinhlamuselo.
Ku nga Lwandle leri Feke.
Ku nga Lwandle Lerikuku ra Mediteraniya.
Ku nga Mediteraniya.
Kumbe “enyangweni ya Hamati.”
Ku nga tiva ra Genesareta, kumbe Lwandle ra Galeliya.
Vona Tinhlamuselo.
Hi Xiheveru, “1 000 wa swisungunu.” Xisungunu a xi ringana na 44,5 wa tisentimitara. Vona Xiengetelo B14.
Hi Xiheveru, “2 000 wa swisungunu.” Xisungunu a xi ringana na 44,5 wa tisentimitara. Vona Xiengetelo B14.
Vona Tinhlamuselo.
Vona Tinhlamuselo.
Hi Xiheveru, “Yubili.”