Kereke Ya Anglican Ya Le Australia Yindlu Leyi Avaneke
Hi muyimeri wa Xalamuka! le Australia
NJHEKANJHEKISANO wa leswaku xana vavasati va nga vekiwa tanihi vaprista va Kereke ya Anglican a hi nchumu wa sweswinyana. Kambe mhaka ya kona sweswinyana yi hundzuke nchumu lowukulu eAustralia.
Hi January 1992 bixopo wa Canberra na Goulburn u tivise hi ta makungu yo hlawula vavasati va nga ri vangani va va vadiyakoni leswaku va va vaprista va Kereke ya Anglican. A nge he yimeli nhlengeletano ya kereke leyi landzelaka. Entiyisweni, nhlengeletano ya kereke ana se yi endle xiboho xo kaneta ku hlawuriwa koloko hi makhamba manharhu.
Kutani leswi eku heteleleni swi humeleleke, khume ra vavasati va hlawuriwe tanihi vaprista va Anglican eku sunguleni ka March le Perth, Australia, ku nga khathariseki nkaneto. Kutani a swi hlamarisi leswi ku yisiweke nyingiso lowukulu eka nhlengeletano ya huvo ya vafundhisi leyi landzelaka. Nongonoko wa July wu endle leswaku ku nga fikeleriwi xiboho, kutani ku lunghiseleriwe “nongonoko lowu nga tolovelekangiki” hi November 21, 1992.
Loko ka ha sele vhiki, Nhlengeletano-nkulu ya Kereke ya Nghilandi yi endle nhlawulo yi pfumela ku hlawuriwa ka vavasati. Vo tala a va langutele leswaku xiboho lexi xi ta va ni mbuyelo lowu khutazaka le Australia. Loko nhlengeletano ya le Australia yi hlangana, phepha-hungu rin’wana ri te: “Eka siku leri njhekanjhekisano ni ku kanetana minkarhi yin’wana a swi chavisa swinene.” Loko muungameri wa nhlengeletano ya huvo ya vafundhisi a nga si boxa vuyelo bya nhlawulo, u kombele leswaku endzhaku ka xitiviso ku nga vi na huwa yo hlula. Loko ku vuriwe leswaku ku hlawuriwa ka vavasati ku pfumeriwile, van’wana eka vayingiseri va tsandzeke ku tikhoma. Loko mahungu ya fike le handle, ku sungule ku hoyozeriwa, ku buluseriwa swibuluki emoyeni.
Ntsako wolowo a wu ngo tiendlekela ntsena. The Sydney Morning Herald yi tshahe mubixopo lonkulu wa Sydney a ri karhi a ku: “A hi nge swi koti ku tshama swin’we hi tsakile . . . Ku ta va ni mintlawa mimbirhi eKerekeni yin’we ya Anglican.” Mufundhisi un’wana u ye emahlweni a vula leswaku ku hlawuriwa ka vavasati va va vaprista swi kombisa leswaku “Kereke ya Anglican le Australia yi sungula ku hambana.”
Bibele yi nyikela swisekelo leswi twalaka mayelana ni timhaka to tano. Yesu Kreste hi yexe u te: “Mfumo wun’wana ni wun’wana lowu hambanaka wu ya eku loveni; naswona ku hava doroba, kumbe muti lowu hambaneke lowu nga tiyaka.”—Matewu 12:25, The New English Bible.
Leswi swi tlakusa xivutiso lexi tikombaka xi kohlekiwile malunghana ni ku holova hinkwako ka kereke, Xana Bibele yi ri yini hi xiphemu xa vavasati evandlheni? Hambi leswi yi kombisaka leswaku Yehovha Xikwembu u languta vavanuna ni vavasati lava tinyiketeleke va ri va nkoka hi ndlela leyi ringanaka, yi nyika vavanuna ni vavasati swiphemu leswi hambaneke evandlheni. (Vagalatiya 3:28) Eka 1 Vakorinto 11:3 swi vekiwa hi ndlela leyi: “Tanihi leswi wanuna un’wana ni un’wana a nga ni Nhloko ku nga Kreste, nhloko ya wansati i wanuna, tanihi leswi Nhloko ya Kreste ku nga Xikwembu.” (NEB) Xisweswo, mayelana ni ku letela ka le rivaleni emahlweni ka vandlha, Pawulo u huhuteriwe ku tsala leswi: “Wansati u fanele a va mudyondzi, a yingisa a miyerile naswona hi ku titsongahata. A ndzi pfumeleli wansati leswaku a va mudyondzisi, hambi leswaku wansati a fuma wanuna.”—1 Timotiya 2:11, 12, NEB.
Hambi swi ri tano, leswi a swi fanelanga swi vilerisa vavasati lava nga Vakreste, hikuva va ntshunxekile leswaku va dyondzisa evutirhelini bya le rivaleni, hi laha vavasati vo kota Luwisa, Yunika, Efodiya na Sintika eminkarhini ya ku sungula ka Vukreste va endleke ha kona.—Vafilipiya 4:2, 3; 2 Timotiya 1:5.