Ntsako—Wu Tiyisekisiwa!
“VA TSAKA lava khathalelaka xilaveko xa vona xa moya,” ku vule Yesu Kreste. (Matewu 5:3, NW) Ku hambana ni vutlharhi bya ntumbuluko, Yesu u yise nyingiso eka ku enerisiwa ka swilaveko swa moya swa munhu, ematshan’wini yo enerisa swilaveko swa leswi vonakaka tanihi nchumu wun’wana lowu nga tisaka ku humelela eku hlongoriseni ka ntsako. Marito wolawo ya Yesu, loko ma landzeleriwa, ma nga tisa ntsako hakunene.
Hambi swi ri tano, ku va munhu a khathalela xilaveko xa yena xa moya, a swi vuli ntsena ku tiva leswaku xona xi kona. Hakanyingi, xilaveko lexi nga fikeleriwiki i xihlovo xa ku vilela ni xikhomela ematshan’wini ya ntsako. Xivuriso xa Bibele xi swi veka hi ndlela leyi: “Ku langutela lo’ku hlwelaka ka v̌av̌isa timbilu.” (Swivuriso 13:12) Xisweswo, ntsako wu kula loko munhu a teka magoza yo xiya ni ku enerisa xilaveko xa yena xa moya. Xana leswi swi nga endlisiwa ku yini?
Laha hi laha Bibele yi nghenaka kona. Ha yini? Hikuva hi yona ntsena yi nga nyikelaka tinhlamulo ta swivutiso leswi u nga ha vaka u anakanye ha swona nkarhi wo leha u nga kumi tinhlamulo leti enerisaka. Hi xikombiso, xana u tshame u tivutisa leswi, ‘Xana xikongomelo xa vutomi i yini? Ha yini munhu a ri emisaveni? Xana vumundzuku byi hi khomele yini?’ Handle ko nyikela tinhlamulo leti enerisaka ta swivutiso leswi ni swin’wana swo tala, Bibele yi tlhela yi nyikela nkongomiso wa mahanyelo lama pfuneke timiliyoni leswaku ti langutana ni swiphiqo leswi rharhanganeke leswi hinkwerhu namuntlha hi langutaneke na swona ni leswi hakanyingi swi kavanyetaka ku lavisisa ka hina ntsako. “Rito ra [Xikwembu] i riv̌oningo e milengeni ya mina, ni ku v̌onakala e ndleleni ya mina,” ku vula mupisalema. (Pisalema 119:105) Ina, Bibele i nkongomiso lowunene lowu nga ku pfunaka ku humelela eku hlongoriseni ka ntsako. Xiya swikombiso leswi swa ntiyiso.
Ku Cukumeta Swikhomela Ku Ya eVukatini Lebyi Tsakisaka
Vukati byi nga va xihlovo xa ntsako kumbe xa maxangu. Khombo ra kona, eka vo tala i xihlovo xa maxangu. Hambi swi ri tano, xitsundzuxo xa Bibele, loko xi tirhisiwa, xi pfune vo tala ku kuma ntsako evukatini lebyi enkarhini wun’wana a byi nga tsakisi.
Yungk’un na Meihsiu va ve ni ntokoto wolowo. “Malembe yo sungula ya nkombo ya vukati bya hina a ma nga tsakisi,” ku vula Yungk’un. “A ndzi heta nkarhi wutsongo ni nsati na vana va mina vambirhi va vanhwanyana. Entiyisweni, ko tala a ndzi etlela entirhweni.” Hambi leswi a va ri na xin’wana ni xin’wana lexi a va xi lava hi tlhelo ra leswi vonakaka, a va nga tsakanga. Nsati wakwe wa engetela: “Hambi leswi nuna wa mina a hi wundla hi leswi vonakaka, a a ndzi siyela vutihlamuleri hinkwabyo bya timhaka ta ndyangu. Hakunene a ndzi nga swi lavi.” Va kale va anakanya ni hi ku hambana.
Yungk’un a a ri na swiphiqo swin’wana swa ndyangu. Hikwalaho ka swiphiqo swa khale swa ndyangu, a a nga si vulavurisana ni sesi wakwe ku ringana nkombo wa malembe. A va endla leswi hambi leswi lomu a va tshama kona a va hambanyisiwa hi timitara leti nga ehansi ka dzana. Hambi swi ri tano, sweswi u tsakela vukati lebyi tsakeke xikan’we ni vuxaka lebyinene ni makwavo. Ha yini a endle ku hundzuka lokukulu swonghasi?
“Mina ni nsati wa mina hi sungule ku dyondza Bibele ni Timbhoni ta Yehovha naswona hi va kona eminhlanganweni ya Bibele ya vhiki na vhiki,” ku hlamusela Yungk’un. Sesi wakwe na yena u endle tano. Va sungule ku tirhisa swilo leswi a va swi dyondza naswona va hlamarisiwe hi vuyelo bya kona. Yungk’un u kume ntirho lowu n’wi pfumeleleke ku khathalela swilaveko swa ndyangu wa yena swa nyama ni swilaveko swa moya ni swa mintlhaveko. Sweswi va tiphina, hi vutomi bya ndyangu lowu tsakeke, lowu nga ni vun’we.
U Kume Xikongomelo eVuton’wini
Lava va dyondzaka ntumbuluko wa munhu va vule leswaku loko hi ta tsaka hi fanele hi va ni xivangelo xo hanya, xikongomelo evuton’wini. Vutomi lebyi lawuriwaka hi swilo leswi vonakaka bya vutianakanyi a byi xi enerisi xilaveko lexi. Lini wa malembe ya 26 u wu vonile ntiyiso lowu.
Wa hlamusela: “A ndzi hamba ndzi tirha 12 wa tiawara hi siku, nkombo wa masiku hi vhiki. Pakani ya mina a ku ri ku pfula bindzu lerikulu ra vumbhuri.” Hambi leswi a a ri kusuhi ni ku fikelela norho wakwe, u kume leswaku a ku ri ni xin’wana lexi kayivelaka evuton’wini bya yena. “A ndzi hamba ndzi tivutisa hi xikongomelo xa vutomi. Xana a ku ri ku tirha ni ku kuma mali?”
Kutani siku rin’wana munhu un’wana a ta exitolo xakwe ivi a n’wi vutisa xona xivutiso lexi a a tivutisa xona. U byeriwe leswaku Bibele yi nga xi hlamula xivutiso xexo. Hambi leswi a a nga si tshama a hlaya Bibele, u pfumerile ku veka awara etlhelo vhiki rin’wana ni rin’wana leswaku a yi kambisisa.
Eka dyondzo yakwe ya vhiki na vhiki, Lini u dyondze leswaku Bibele yi vhumbe swo tala swa swilo leswi a a swi vona masiku hinkwawo. U hlamarisiwe hi ndlela leyi Bibele yi tiyiseke ha yona loko yi ma hlamusele ka ha ri emahlweni mavonelo lawa a a ma n’wi rhendzerile, yi vhumbhe leswaku “vanhu va ta va lava tirhandzaka, va ta va lava rhandzaka mali ngopfu, ni ku tikurisa, ni ku titiva, ni ku rhukana; va ta va lava nga yingisiki vatswari va vona, lava nga riki na ku nkhensa, lava nga khongeriki; va ta va vanhu va tihanyi, lava nga riki na ku tsetselela, valumbeti, lava nga tikotiki, lavo leva, lava vengaka leswo lulama; va ta va timbabva, vanhu va futa, lava nga ni manyunyu, lava rhandzaka ku tiphina ku tlula ku rhandza Xikwembu.” U dyondze vuprofeta byin’wana lebyi kombisaka ku xaniseka loku nga si tshamaka ku va kona loku vangiwaka hi tinyimpi, ndlala, ni timhangu ta ntumbuluko loku voniwaka emisaveni hinkwayo.—2 Timotiya 3:1-5; Matewu 24:7, 12.
Endzhaku Lini u dyondze nchumu wun’wana lowu n’wi tsakiseke swinene—swiyimo swa misava leyi leswi hakanyingi swi tsonaka vanhu ntsako i xikombiso xa leswaku nguva leyintshwa ya matimu ya vanhu yi le kusuhi. (Matewu 24:3-14) Nakambe u tlhele a hlaya eBibeleni leswaku Muvumbi wa vanhu u kunguhate ku simeka misava leyintshwa kona laha misaveni, laha ku nga ta va ni rifuwo ra leswi vonakaka leri vanhu lava nga hetisekangiki va nga si tshamaka va ri vona ri tarise sweswo emisaveni hinkwayo. (Pisalema 72:16; Esaya 65:17, 18, 21, 22) Vanhu lava va nga ta va va fuwile a va nga ha karhatiwi hi makwanga, ku titiva, ni ku rhandza swilo leswi vonakaka, ku katsa ni vuyelo bya swona lebyo biha. (Pisalema 37:9-11, 29; 1 Vakorinto 6:9, 10) A a tsakile swinene loko a hlaya marito lawa eBibeleni: “Hi ku ya hi ku tshembisa ka Hosi, hi langutele matilo lamantshwa ni misava leyintshwa, laha ku nga ta va ni ku lulama.”—2 Petro 3:13.
Ntsako Wu Ku Yimerile
Ematshan’wini yo heta nkarhi wa yena hinkwawo a hlongorisa tipakani ta swilo leswi vonakaka, sweswi Lini u heta nkarhi wakwe a byela van’wana hi swilo leswi a swi dyondzeke. Xana u nga tsakela ku tiva leswi engetelekeke hi switshembiso leswi leswinene? Xana u nga tsakela ku tshubula ndlela leyi Bibele yi nga ku pfunaka ha yona ku kuma ntsako lowu Lini, Yungk’un, Meihsiu, ni van’wana va timiliyoni va wu kumeke? Timbhoni ta Yehovha ti ta swi tsakela ngopfu ku ku pfuna.
[Xifaniso lexi nga eka tluka 8, 9]
Muvumbi wa hina u kunguhata ku simeka misava ya paradeyisi