Langutelo Ra Bibele
Leswi U Faneleke Ku Swi Endla eSwikhongelweni Swa Wena
EGANGENI ra ntshava leri languteke muti, hosi leyi pfukeriweke ya yimanyana swa xinkarhana leswaku yi anakanyisisa hi xigodlho xa yona xa xiyimo xa le henhla, ntsindza wa yona wa vuandlalo lebyikulu, ni maxangu lama voniwaka hi ndyangu wa yona. Vuthu lerikulu ri hlanganile edzongeni naswona sweswi ri gwirima ri kongome mutini. Vatirhela-mfumo va swikhundla swa le henhla va xandzukile, naswona vunyingi bya vanhu byi hundzukile byi seketela vaxandzuki. Hi mbilu leyi tshovekeke, hosi yi khongela eka Xikwembu. I wanuna wa vukhongeri hakunene, ntshembo wa yena wa engeteleka hi ku tiva leswaku Xikwembu xi ta twa xikombelo xa yena ivi xi sivela makungu ya vakhiri. Kutani, loko a fularhela muti wa yena wo saseka, u ngirimela ntshava ivi a ya emahlweni a kongome en’walungwini hi tlhelo ra le mananga lama nga ehase ka nambu. A nga endla yini swin’wana? Sweswi xiyimo hinkwaxo xi le mandleni ya Xikwembu.
Hi laha ku fanaka, namuntlha vapfumeri lava titsongahataka va khongela Xikwembu hi minkarhi yo tika, hi ndlela leyi chavelelaka va tiyiseka leswaku, Bibele yi ni minkongomiso leyi twalaka ya makhongelelo, naswona yi paluxa leswaku Yehovha Xikwembu hi “L’a yingisaka mikhongelo!” (Pisalema 65:2) Ha tiyiseka leswaku hinkwavo lava timbilu letinene lava lavaka Xikwembu va ta yingisiwa.
Kambe, xana ku laveka ripfumelo ni xikhongelo ntsena? Xana hina hi fanele ku endla yini leswaku swikhongelo swa hina swi humelela?
Xana Hi Nga Hoxa Xandla Njhani?
Hosi leyi boxiweke eku sunguleni a a ri Hosi Davhida wa le Israyele wa khale. Loko a langutane ni vuxengi bya n’wana wakwe Abixalomu la endleke xikhiri ni mutsundzuxi wakwe wa mukanganyisi Ahitofele, u hlawule ku baleka eYerusalema ivi a ya lava vutumbelo emutini wa le mananga wa Mahanayimi lowu nga ni khokholo lowu nge vuxeni bya Nambu wa Yordani. Swi le rivaleni leswaku hikwalaho ko khomiwa hi tingana, gome ni ku karhateka emoyeni, u kombele Yehovha exikhongelweni, a ku: “Yehova, wa nga hunḍuluša makungu ya Akitofel!” (2 Samuwele 15:11-15, 30, 31) Hambi swi ri tano, Davhida a nga lo khongela ntsena. U hoxe xandla hi ndlela leyinene leswaku ku va ni vuyelo lebyinene bya xikhongelo xakwe. Hi ndlela yihi?
Ku hoxa xandla kakwe ku sungule le ndzhaku a nga si hlangavetana ni miringo leyi. Hi malembe yo tala, ni loko a nga si va hosi, Davhida a a ri mugandzeri wa Yehovha la tshembekaka. (1 Samuwele 16:12, 13; Mintirho 13:22) U ve munghana wa Xikwembu. Xisweswo, loko Davhida a ringiwa u ve ni ripfumelo ra leswaku Yehovha u ta twa xikhongelo xakwe naswona a n’wi hlamula hi ndlela leyi faneleke.
Swi tano ni namuntlha. Hakanyingi ndlela leyi tirhaka swinene yo hoxa xandla eka vuyelo bya swikhongelo swa hina i ku landza ndzayo ya Bibele tanihi fambiselo ra nkarhi hinkwawo evuton’wini. Ku namarhela misinya ya milawu ya Xikwembu hi ndlela yoleyo, hi ku tshembeka, swi tswala vuxaka bya le kusuhi na xona. Ku tshinelelana loku ni Xikwembu ni ripfumelo swi fanele swi va kona miringo yi nga si sungula. Swi fanele swi fana ni masungulo lama tiyeke lawa yindlu yi nga ta akiwa eka wona; ya fanele ya va ya ri kona ntiko wa muako wu nga si tlhandlekiwa ehenhla ka wona. Xisweswo—ni sweswi, miringo yi nga si ta—hi nga hoxa xandla leswaku ku va ni vuyelo lebyinene eka swikhongelo swa hina swo tala.
Tirha Swi Vonaka!
Hambi leswi wu nga ntiyiso leswaku vuxaka bya Davhida ni Xikwembu byi tirhile swinene, u tlhele a xiya ni leswaku a a nga ta yima a va muhlaleri ntsena loko xikhongelo xakwe xi hlamuriwa. Ku ri na sweswo, Davhida u tirhe swi vonaka hi laha swi vonakaka ha kona eka goza ra vutlhari leri landzeleke xikhongelo xakwe.
Exikarhi ka vanghana lava tshembekaka va Davhida a ku ri na Muariki la vitaniwaka Huxayi. Huxayi u hlangane ni hosi leyi nga eku balekeni eNtshaveni ya Mitlhwari. Hambi leswi a a lava ku famba swin’we na Davhida laha a a balekela kona, Huxayi u yingise xikombelo xa Davhida xa leswaku a sala emutini. A a fanele hi vukanganyisi a tiendla la tshembekeke eka Abixalomu, leswaku a ringeta ku kavanyeta ndzayo ya mutsundzuxi wa muxengi Ahitofele, naswona a tivisa Davhida hi swiendlakalo. (2 Samuwele 15:32-37) Hi laha a swi languteriwe ha kona, Huxayi u swi kotile ku tshembiwa hi Abixalomu. Kutani sweswi Yehovha a a ta nghenelela.
Ahitofele lowa ntlharhi, kambe a hombolokile u te ni kungu ra vutlharhi swinene. U kombele Abixalomu leswaku a n’wi nyika 12 000 wa vavanuna leswaku va ya hlasela Davhida vusiku byebyo loko a ha baleka, a ha pfilunganyekile naswona a ta hlaseleka hi ku olova—ku dlaya loku a ku wu hetisisa kahle nhlungo-vuhosi! Hambi swi ri tano, lexi hlamariseke vo tala hi leswaku, Abixalomu u lave xitsundzuxo xa Huxayi emhakeni leyi. U tsundzuxe Abixalomu leswaku a heta nkarhinyana a hlengeleta vuthu ra vavanuna va matimba, leri kongomisiwaka hi yena Abixalomu hi yexe. Hi nkongomiso wa Yehovha, ndzayo ya Huxayi yi amukeriwile. Swi le rivaleni, Ahitofele hi ku xiya leswaku ku landza xitsundzuxo xa Huxayi, swi to tisa rifu ntsena, u tlhelele ekaya kakwe ivi a ya tisunga.—2 Samuwele 17:1-14, 23.
Kunene a swi nga kanakanisi leswaku Yehovha a a xi hlamurile xikhongelo xa Davhida—hi laha a khongeleke ha kona. Eka hinkwavo lava lavaka mpfuno wa Xikwembu hi xikhongelo, xikombiso xa Davhida xa ku endla hi ku twanana ni xikhongelo xakwe xi va dyondzisa dyondzo ya nkoka swinene.
Yehovha U Ta Hetisisa Xiphemu Xakwe
I ntiyiso, Yesu u dyondzise valandzeri vakwe leswaku va khongelela vuswa bya siku na siku a tlhela a tshembisa leswaku loko va rhangisa ku rhandza ka Xikwembu, xi ta lulamisa swilaveko swa vona. (Matewu 6:11, 33) Hi xikombiso, loko munhu a nga tirhi, u fanele a endla hi ku twanana ni xikhongelo xakwe xo lava mpfuno hi ku endla matshalatshala hinkwawo yo kuma kumbe ku tisungulela ntirho.
Ku nga khathariseki leswi hi khongelelaka swona, ndlela leyi hi hoxaka xandla ha yona eka vuyelo bya swona ya hambana swinene. Ku ni minkarhi leyi hi nga kotaka ku endla swo tala ni minkarhi leyi loko ku ri ni leswi hi nga swi endlaka, hi endla switsongo swinene. Nchumu wa nkoka a hi leswi hi nga swi kotaka kumbe hi nga kotiki ku swi endla, kambe hi leswaku xana hi endla leswi hi nga swi fikelelaka ke.
Hi nga tiyiseka leswaku Yehovha u tiva swiyimo ni vuswikoti bya hina. Kunene wa swi xiya swinene leswi hina hi nga kotaka ku swi endla, naswona a nge swi languteli leswaku hi endla leswi tlulaka leswi hi nga swi kotaka. Ku nga khathariseki leswaku hi nga endla swo tala, kumbe switsongo swinene, Yehovha u ta pfala lomu hi tsandzekeke kona. U ya teka ya ri ya nkoka matshalatshala yerhu, wa ya seketela naswona u ta tirha hi ku landza wona leswaku a tisa vuyelo lebyinene eka vanhu hinkwavo lava katsekaka.—Pisalema 3:3-7.
Eku nonon’hweriweni, Hosi Davhida u vule hi ntshembo a ku: “Ku hlayiseka ku huma ka Yehova; ku kateka ka wena a ku v̌e henhla ka tiko ra wena.” (Pisalema 3:8) Onge ku tshembela ka hina ematimbeni ya Yehovha xikan’we ni ku hoxa xandla ka hina, hi mpimo lowukulu kumbe lowutsongo, swi nga tisa vuyelo lebyinene eswikhongelweni swa hina.