The Bible’s Viewpoint

Ti-ufo —Xana I Varhumiwa Lava Humaka Eka Xikwembu?

LOKO lembe-xidzana ra vu-20 ri ri karhi ri hela ni swiyimo emisaveni swi ya swi hohloka, vanhu va ya va pfumela swinene eka Swivumbeko Leswi Nga Tiviwiki Leswi Hahaka (Unidentified Flying Objects [UFO’s]) ni vakhandziyi va swona, swihanyi leswi nga riki swa laha misaveni, swi hambeta swi hangalaka. Xana ti-UFO to va ntsheketo ntsena, vukanganyisi, kumbe vuxisi lebyi taka ni vanhu lava va tsakelaka ku hleka ndlela leyi vanhu va kanganyisekaka hi ku olova ha yona?

Lava va vulaka leswaku va vone ti-UFO kumbe vakhandziyi va tona lava va nga riki va laha misaveni va katsa ni vanhu lava va vonakaka va hanye kahle, lava tshembekaka; kahle-kahle, lava va tshembelaka eka vaendzi lava vo huma etipulanetini tin’wana va katsa tiprofesa ni vativi va sayense lava dyondzekeke. Va tiyiseka leswaku vanhu lava nga riki va laha misaveni va veke vanhu tihlo, naswona minkarhi yin’wana, va vulavula na vona. Ku ni tinhlengeletano leti vuriwaka ta nseketelo wa mayelana ni leswi nga riki swa laha misaveni, to pfuna vanhu lava va vulaka leswaku va vonane ni vaendzi vo huma exibakabakeni.a

Kungu Ro Ponisa Ra Valuveri

Ebukwini leyi nge Aliens Among Us, Ruth Montgomery u vulavurisana ni vanhu lava va yaka va andza lava va tiyisekaka leswaku vona i vaendzi lava nga riki va laha misaveni lava tshamaka emirini ya vanhu. Van’wana va lava va tivulaka swivumbiwa leswi nga riki swa laha misaveni leswi endliweke vanhu va vhumba leswaku hi lembe ra 2000, ku ta va ni “xiendlakalo xa le vuakweni lexi tintsumi ni varhangeri lava nga valawuri ana va nga eku xi lunghiseleleni.” Vanhu van’wana va tshemba leswaku swivumbiwa swin’wana leswi nga riki swa laha misaveni swi tirhisa ti-UFO ku hlengeleta ni ku hlayisa tinxaka ta swimilana ni ta swiharhi, kumbe leswaku ti-UFO ti ta tirhisiwa tanihi swo famba swo ponisa, leswi nga ta tleketla timiliyoni ta vanhu va balekisiwa ndzoviso lowu tshineleke wa misava. Endzhaku ka ndzoviso lowukulu, vanhu va ta vuyisiwa leswaku va ta sungula “Nguva Leyintshwa ni Fambiselo Lerintshwa” ra ku voningeriwa emoyeni. Jaha rin’wana ra le Colorado, U.S.A., xirho xa ntlawa lowu wu tivitanaka “Alien Youth,” ri byele Xalamuka! ri nga kanakani ri ku: “Mina ni vanghana va mina hi yimele vakokwa wa hina va valuveri leswaku va hi wutla hi ya humelela, eka tlhelo lerin’wana.”

Va nga ri vangani va lava va vulaka leswaku vona i swivumbiwa leswi nga riki swa laha misaveni va vula leswaku va kongomisiwa hi Xikwembu, kasi van’wana va vula leswaku va vulavula na xona va tshunxekile va kombela switsundzuxo mayelana ni ku pfuna vanhu. Xana Xikwembu xi tirha hi vaendzi lava humaka etipulanetini tin’wana leswaku xi ponisa vanhu eka ndzoviso wa misava lowu taka?

Ku Vulavurisana Ka Xikwembu Na Vanhu

Le ku sunguleni ka matimu ya munhu, Xikwembu a xi vulavula na vanhu. Rhekhodo ya Bibele yi hlamusela mabulo ya Xikwembu na Adamu na Evha, Nowa, Abrahama, ni van’wana.b (Genesa 3:8-10; 6:13; 15:1) Ku tirhisiwe milorho, marito, ni swivono ku hlamusela ku rhandza ka Xikwembu ni ku tsariwa ka Bibele. Hambiswiritano, endzhaku ka loko Bibele yi hetiwile, xana a xa ha ri kona xivangelo xa leswaku marungula ya le tilweni ya tela vanhu hi ku kongoma? Doo, tanihi leswi Bibele yi vulaka leswaku Matsalwa Layo Kwetsima ma nga endla “mutirheli wa Xikwembu a va la hetisekeke, a tilulamisela ku endla ntirho wun’wana ni wun’wana lowunene.” (2 Timotiya 3:17) Hi ku ya hi Bibele, ndzayo ya minkarhi leyi yo nonon’hwa yi fanele yi kumiwa eRitweni ra Xikwembu leri tsariweke. Kambe, xana xi kona xivangelo hambi xihi xo pfumela leswaku hi ta kuma marungula kumbe switsundzuxo swo hlawuleka leswi humaka eka Xikwembu hi ku kongoma hi ku tirhisa vavulavuleri lava nga riki va laha misaveni? Doo, hikuva muapostola Pawulo u te: “Hambiloko hina kumbe ntsumi yo huma etilweni, hi nga tshuka hi mi dyondzisa Evhangeli yin’wana ehandle ka leyi hi tshamaka hi mi dyondzisa yona, mudyondzisi wo tano a a rhukaniwe!”—Vagalatiya 1:8.

Hambileswi marungula lawa ma vuriwaka hi vanhu lava ku vuriwaka leswaku a hi va laha misaveni ma tikombaka ma pfumelelana ni vuprofeta bya Bibele bya leswaku ku nga ri khale ndzoviso lowukulu wu ta hundzula misava swinene, ma nyikela ndlela yo pona leyi nga ta ta hi swivumbiwa leswi. Bibele a yi khutazi vanhu ku balekela ensirhelelekweni lowu tshembisiwaka wa swibamubamu swa valuveri kumbe ku ya endhawini yin’wana. Ku ri na sweswo, yi hi byela ku tumbela evuxakeni bya ku tinyiketela eka Xikwembu, ku nga ku tinyiketela loku kombisiwaka hi nkhuvulo wa mati. (1 Petro 3:21; ringanisa Pisalema 91:7; Matewu 28:19, 20; Yohane 17:3.) Nakambe Yesu u vule leswaku “loyi a tiyiselaka ku fika makumu, hi yena loyi a nga ta ponisiwa.”—Matewu 24:13.

Xana matsalwa lawa a ma kombisi leswaku vuxaka bya moya ni Xikwembu i bya nkoka leswaku hi kota ku pona, ematshan’weni yo vulavula hi ndhawu yo karhi ya vuchavelo leyi nga ya xiviri? Hikwalaho, ematshan’weni yo pfuna vanhu leswaku va pona, switori leswi swa ‘swihanyi leswi swi nga riki vanhu’ swi hambukisa mianakanyo ya vanhu ekule ni leswi kahle-kahle Xikwembu xi swi lavaka leswaku va kuma vuhlayiseki bya hilaha ku nga heriki.

Xana i mani loyi a nga ringetaka ku hambukisa vanhu ekule ni ndlela ya Xikwembu yo va ponisa, kambe a vula leswaku u seketela Xikwembu? Ed Conroy, ebukwini yakwe leyi nge Report on Communion, u vula leswaku “vativi va ti-UFO lava va tiyimiseleke [lava va dyondzaka ti-UFO] lava dyondzeleke sayense ya mianakanyo ni ya ntshamisano” enkambisisweni wa vona va katsa minkambisiso leyi yelanaka ni ya “‘vaendzi va le makamareni yo etlela ka wona,’ swipuku, swinghunghumana leswi baka pongo, ku vonisiwa, swivono swa timhaka ta vukhongeri, ni leswi swi tekiweke swi ri madimona.” Vativi vo tala va ti-UFO ni lava va tivulaka swivumbiwa leswi nga riki swa laha misaveni leswi nga hi swivumbeko swa vanhu va vula leswaku ku famba hi swibamubamu a swi bohi nikatsongo. Va vula leswaku vanhu lava va nga famba va nga voniwi ivi va ya ku humelelo, endhawini yin’wana emisaveni kambe va nga tanga hi xibamubamu.

Bibele yi tsundzuxa leswaku Sathana ni mademona yakwe va tiyimisele ku kanganyisa vanhu. Leswi vanhu va nga ni gome naswona va heleriweke hi ntshembo va va nyika mintlhantlho leyi vonakaka yi tsakisaka, kambe ya mavunwa. (2 Vakorinto 11:14) Hikwalaho ka sweswo, ku ni xitsundzuxo xa Bibele lexi nge: “Emasikwini lama taka, van’wana va ta hambana ni vupfumeri, hi mhaka ya ku landza mimoya leyi kanganyisaka ni tidyondzo ta mademona.”—1 Timotiya 4:1.

Hi laha ku fanaka namuntlha, ku endzeriwa loku vuriwaka ni switsundzuxo leswi vonakaka swi pfuna, swa vanhu volavo swi fanele swi bakanyeriwa ekule, ku nga khathariseki leswaku swi ta hi xivumbeko xihi. Lava va hlawulaka ku landzela switsundzuxo swa “vanhu lava nga riki va laha misaveni” ku ri na ku landzela Rito ra Xikwembu va ta wela ekhombyeni—ku nga xihoxo lexi nga hlamuselekiki eminkarhini leyi yo nonon’hwa.

[Tinhlamuselo ta le hansi]