Xiviko Xa Vahuweleri Va Mfumo

Ntiyiso Wa Bibele Wu Hlula Mukhuva

MUKHUVA wa vukhongeri wu nga va wu simekiwe hi vuenti. Timiliyoni ti ehleketa leswaku swi hoxile ku cinca vukhongeri bya wena. Sawulo, loyi a veke muapostola Pawulo, entiyisweni u titwe hi ndlela leyi fanaka, tanihi leswi a nga te: “[A] ndzi hisekela ngopfu mikhuva ya vatata wa hina [ku tlula vo tala va tintangha ta mina].” Kambe loko a kombisiwe ntiyiso, u cince ku suka eka Vuyuda kutani a va Mukriste. (Vagalatiya 1:13-16) Vo tala namuntlha va xiye leswaku ntiyiso wa Bibele wu huma exihlobyeni lexi tlulaka mukhuva. Xiya ndlela leyi ntiyiso wa Bibele wu hluleke ha yona eItaly.

Wansati un’wana wa hlamusela: “Mina ni makwerhu wa xisati hi kulele endyangwini lowukulu lowu nga ni mikhuva ya Khatoliki ya nkarhi wo leha, naswona a hi ri Makhatoliki lama tinyiketeleke swinene. Hi ku famba ka nkarhi, ndzi tekiwile. Endzhaku ndzi lahlekeriwe hi nuna wa mina kutani ndzi hanya tanihi noni hi malembe yo tala ndzi ri ndzexe ni vana va mina. Ntukulu wa mina a a dyondzisa ku chumayela hi ku anakanyisisa naswona u ye emahlweni a vutisa muprista swivutiso swa Bibele, kambe a nga kumanga tinhlamulo leti anerisaka.

“Loko ndzi endzela doroba ra le kaya, ndzi hlangane ro sungula ni Timbhoni ta Yehova naswona ndzi amukele dyondzo ya Bibele. Khale ka vanghana va mina hinkwavo va Makhotoliki va ndzi hlekurile hikwalaho ka ku dyondza Bibele. Hambi swi ri tano, a ndzi helanga matimba. A ku ri ro sungula, ndzi va ni Bibele, naswona a ku nga ri na munhu loyi a a ta ndzi tekela yona. Makwerhu wa mina wa xisati na yena u teke xiyimo xa yena eka Yehova, kutani ku nga si hela malembe mambirhi, havambirhi ka hina hi khuvuriwile.

“Ndzi ririle loko ro sungula ndzi tihambanise ni kereke hikuva a ndzi chava ku tshika mikhuva leyi mileke eka mina hi malembe ya 76. Kambe sweswi ndzi tsakela ku famba etindleleni ta Yehova ni ku endla hi laha ndzi nga kotaka ha kona ku pfuna van’wana ku huma emunyameni wa moya!”—Ringanisa 1 Petro 2:9.

Mubyevuri A Ololoxa Ku Anakanya Loku Hoxeke

Mubyevuri eJapani a a tsakela ku vulavula hi mademona ni ti-UFO loko a tsema misisi ya tikhasitama. Hambi swi ri tano, endzhaku ka loko a sungule ku dyondza Bibele, u xiye ndlela leyi mukhuva lowu a wu ri ni khombo ha yona. Kutani ematshan’wini ya sweswo u rhambe tikhasitama ta yena ku n’wi joyina edyondzweni ya yena ya Bibele. U veke vumbhoni eka tikhasitama letintsongo ehenhleni ka ntumbuluko. Vhiki rin’wana ni rin’wana u ode Tibibele ni tikopi ta buku leyi nge U Nga Hanya Hi Masiku aParadeyisini eMisaveni eka Mbhoni leyi a yi dyondza na yena leswaku a ta kota ku ti fambisa eka tikhasitama ta yena.

Hambi leswi a a nga si va Mbhoni, u fambise ku tlula 30 wa tisete ta Tibibele ni tibuku leti nge Hanya Hi Masiku hi lembe ra yena ro sungula ku dyondza. Vanhu vo tlula 25 va sungule ku dyondza Bibele hikwalaho ka ku veka ka yena vumbhoni bya xitshuketa. Nkarhi wun’wana vanhu va khume a va hlanganyela entlaweni wa yena wa dyondzo ya Bibele. Sweswi nkombo wa lava a vekeke vumbhoni eka vona loko a lunghisa misisi ya vona va lulamisiwe ku anakanya ka vona loku hoxeke naswona i Timbhoni ta Yehova leti khuvuriweke!