Vuvabyi Byo Oma Swirho!

XIVANGELO-NKULU xa rifu ni vugono lebyi hambetaka ematikweni lama hluvukaka ya le Vupela-dyambu i vuvabyi byo oma swirho. Rito ra Xinghezi leri nge “stroke” (vuvabyi byo oma swirho) ri vula “ku hlaseriwa ka byongo” hi xitshuketa. Minkarhi yin’wana u nga ha titwa kahle, ivi endzhaku ka nkarhinyana, u titwa onge u biwe hi rihati—ku oma swirho lokukulu ku nga hundzula vutomi bya wena hi xitshuketa naswona hi ndlela leyi hlamarisaka. Byi ku endla xilema ni xigono hi ndlela ya tihanyi, byi nga ku endla leswaku u tsandzeka ku vulavula, byi onha mintlhaveko ya wena, byi cinca vumunhu bya wena ni dzanu, ivi byi ku vangela ku lwela ku kuma vutomi bya ntolovelo, lebyi wena ni ndyangu wa wena a a mi ri na byona eku sunguleni.

Anakanya hi Ellen Morgan.a Hi Ravunharhu, Ellen a a ri munhu wa malembe ya 64 hi vukhale la hanyeke kahle. Hi Ravumune, loko a ri evhengeleni ni nuna wakwe, hi xitshuketa Ellen a a nga ha swi koti ku vulavula, naswona xikandza xa yena xi khwanyanile. Miri wakwe wu sungule ku tsana, naswona a a famba tanihi munhu la pyopyiweke. Ellen a a hlaseriwe hi vuvabyi lebyikulu byo oma swirho!

Endzhaku ka ku hlaseriwa hi vuvabyi byo oma swirho, Ellen a a lamarile lerova a tsandzeka ni ku endla swilo leswitsongo, swo tanihi ku hlamba kumbe ku tiambexa. Leswi se a nga ha swi koti ku tsala, ku luka kumbe ku rhunga, u sungule ku tshamela ku rila ni ku twa matshimbi lamakulu. Hambiswiritano, enkarhini lowu hinkwawo, mianakanyo ya Ellen a yi nga lamalanga; minkarhi yin’wana a khomiwa hi tingana loko a vona onge van’wana va n’wi teka a ri dodomedzi. Endzhakunyana, Ellen u hlamuserile: “A hi vangani lava xiyaka ndlela leyi ku cinca loku ka xihatla ku tsemaka nhlana ha yona ni ndlela leyi ku khumbaka ha yona munhu, emintlhavekweni ni le mianakanyweni. A ndzi ehleketa leswaku kumbexana i makumu ya vutomi bya mina.”

Xana vuvabyi byo oma swirho byi vangiwa hi yini? Xana munhu un’wana ni un’wana la nga ni vuvabyi byo oma swirho u khumbeka hi ndlela leyi fanaka? Xana lava poneke va langutane njhani ni vuvabyi lebyi? Xana mindyangu ya vanhu lava poneke vuvabyi byo oma swirho yi hanyisa ku yini? Xana hinkwerhu hi nga endla yini ku va seketela? Xalamuka! yi kambisisa swivutiso swo tano ni ku ku nyika vuxokoxoko malunghana ni vutomi bya vanhu lava poneke eka vuvabyi byo oma swirho swin’we ni mindyangu ya ka vona leyi na yona yi khumbekaka.

[Tinhlamuselo ta le hansi]