A Nga Lan’wanga

HI October 5, 1995, Matt Tapio wa malembe ya 14 hi vukhale u endliwe vuhandzuri bya tshumba ebyongweni. Tshumba ra kona a ri tikomba ri ri na khombo. Vuhandzuri bya kona a byi ri byo sungula eka byo tala lebyi a ta endliwa byona eka malembe mambirhi na hafu lawa a ma ta landzela. Ku landzele vutshunguri byo tirhisa tikhemikhali ni nyawuso.

Matt a a tshama eMichigan, U.S.A., laha a nghena kona xikolo a tlhela a hlanganyela eminhlanganweni ya Vukreste. U tirhise lunghelo ro vulavula ni vadyondzisi ni vadyondzi-kulobye hi ripfumelo ra yena a tlhela a hlanganyela eku endzeleni ka van’wana evutirhelini bya le rivaleni. Hi nkarhi lowu a tshamela ku ya exibedlhele—u hete tin’hweti ta 18 eka malembe mambirhi ni hafu yo hetelela ya vutomi byakwe a tshama eswibedlhele—u fambise madzana ya tibuku ta Bibele a fambisela lava a hlangana na vona kwalaho.

Minkarhi yo tala a swi vonaka onge Matt a nge hanyi, kambe nkarhi wun’wana ni wun’wana a hlakarhela hi ku hatlisa. Hi nkarhi wun’wana, loko a ri endleleni yo ya exibedlhele, u ome swirho ivi a nga ha hefemuli. U pfuniwe hi ku huhuteriwa moya ivi a kota ku tlhela a hefemula. Loko a hanyanyile, u sungule ku rila kutani a huwelela a ku: “Ndzi mulwi! Ndzi mulwi! A ndzi toya!” Vanhu va vule leswaku a ku ri ripfumelo ra Matt eka Xikwembu leri n’wi pfuneke ku ya emahlweni a hanya nkarhi wo leha.

Matt u fikelele pakani leyi a yi hisekela swinene hi January 13, 1996, loko a khuvuriwa a kombisa ku tinyiketela ka yena eka Yehovha Xikwembu. U khuvuriwe endhawini yakwe a ri yexe hikwalaho ko chava ku tluleta van’wana mavabyi. Endzhaku ka masiku ma nga ri mangani, u tlhelele exibedlhele leswaku a ya endliwa vuhandzuri byin’wana. Hi August 1997, Matt a a tshamela ku hlanta ku ringana mavhiki yo tala, kambe u tlhelele exiyin’weni lexinene endzhaku ka vuhandzuri byin’wana.

Hambiloko a langutane ni xiyimo lexi, Matt u ye emahlweni a va munhu wa misavu, a hleka ni madokodela ni vaongori. A va nga swi twisisi leswaku ha yini a ri munhu wo rhandza ku hleka ni van’wana hi ndlela leyinene swonghasi. Un’wana wa madokodela u te: “Matt, loko a ndzi ri wena, a ndzi ta pfala khetenisi leri nga etlhelo ka mubedo wa mina, ndzi tipfala nhloko, ivi ndzi byela hinkwavo lava nga kona leswaku va hambana na mina.”

Hi February 1998, Matt u hume exibedlhele a tlhelela ekaya ro hetelela. A tsake ngopfu ku va a ha hanya naswona a ri ekaya lerova loko a fika enyangweni u te: “Ndzi tsake swinene! A hi khongeleni.” Kutani u phofule ntsako wa yena eka Yehovha hi xikhongelo. Endzhaku ka tin’hweti timbirhi, hi April 19, u hetelele a dlayiwe hi khensa.

Emahlweninyana, mbulavurisano wa Matt lowu rhekhodiweke wu tlangiwe hi nkarhi wa minhlangano ya Timbhoni ta Yehovha eHolweni ya Mfumo ya kwalaho. U vutisiwile: “Xana u nga hi byela yini hina hi hanyeke kahle malunghana ni vutirheli bya hina ni minhlangano ya Vukreste?”

Matt u te: “Endlani leswi mi nga swi kotaka sweswi. . . . A mi swi tivi leswi nga ha humelelaka. . . . Kambe ku nga khathariseki leswi nga ha humelelaka, mi nga tshiki ku nyikela vumbhoni hi Yehovha.”