Ndlela Leyi Tinomboro Ti Ku Khumbaka Ha Yona

XANA tinomboro ti ni nhlamuselo yo karhi leyi tumbeleke? Van’wana va vula leswaku “ti na yona” naswona va kombetela eka xiendlakalo lexi hlamarisaka xa ku hlasela ka matherorisi hi September 11, 2001.

Mungoma un’wana wa tinomboro u ri: “Loko ndzi twa mahungu wolawo, ndzi lemuke siku ra kona: 9-11-2001. Hi ntolovelo vangoma va tinomboro va teka nomboro ya vu-11 yi ri “nomboro ya nkoka swinene.” Kutani lava hisekelaka vungoma bya tinomboro va tsale nxaxamelo wa swilo swo hambana-hambana leswi fambisanaka ni nhlaselo wa matherorisi, leswi kombetelaka eka “nomboro ya nkoka swinene” ya vu-11. Hi leswi swin’wana swa leswi va swi kumeke:

■ Mhangu leyi yi endleke hi siku ra 9/11. . . . 9 + 1 + 1 = 11.

■ September 11 a ku ri siku ra vu-254 ra lembe. . . . 2 + 5 + 4 = 11.

■ Xihaha-mpfhuka lexi himeke xihondzo xa le n’walungwini a xi vitaniwa Flight 11.

■ Xihaha-mpfhuka lexi a xi khandziyise vanhu va 92. . . . 9 + 2 = 11.

■ Xihaha-mpfhuka lexi himeke xihondzo xa le dzongeni a xi khandziyise vanhu va 65. . . . 6 + 5 = 11.

■ Swihondzo leswi Swimbirhi a swi yime ku fana ni nomboro ya vu-11.

■ Marito lama nge “Doroba ra New York [New York City]” ma ni maletere ya 11 hi Xinghezi.

Vungoma bya tinomboro byi tirhisiwa ngopfu eAfrika, eAsiya ni le Matikweni ya Amerika—ku vuriwa leswaku tinomboro tin’wana loko ti hlanganisiwa niloko ku tekiwa ntsengo wa tona ti fambisana ni swiendlakalo swo hlawuleka. Ha yini vanhu va rhandza vungoma bya tinomboro? Hi ku ya hi Web-site yin’wana, u nga ha tirhisa maletere lama vumbaka vito ra munhu leswaku u “tiva vumunhu byakwe, langutelo rakwe, timfanelo takwe ni swihoxo swakwe.” Hi ku ya hi xihlovo lexi, ku kambisisa “masiku lawa hi tswariweke ha wona swi hi voningela ndlela leyi vutomi bya hina byi nga ta va ha yona, swi hi komba ntsako ni miringo leyi hi nga ta langutana na yona.”

Xana sweswo i ntiyiso? Kumbe, xana ku ni makhombo lama tumbeleke lama nga vangiwaka hi vungoma bya tinomboro?