Ku Kokiwa Rinoko Hi Tinomboro

EHLEKETA ku nga ri na tinomboro. Mali a yi nga ta va kona. Bindzu a ri ta hetela hi ku cincisana swilo ntsena. Naswona ku vuriwa yini hi mintlango? Loko a ku nga ri na tinomboro, a hi ta tsandzeka ku hlayela minkutlunya naswona a hi nga ta swi tiva leswaku xipano ha xin’we xi fanele xi va ni vatlangi vangani!

Hambileswi tinomboro ti pfunaka, ti tamele rungula leri tumbeleke. Rungula ra kona ri lava vutlhari byo karhi leswaku munhu a ri twisisa. Nomboro yo va nchumu lowu nga emianakanyweni. Hi xikombiso: Apula ri ni muvala wa rona, xivumbeko xa rona, mpimo wa rona, nun’hwelo wa rona swin’we ni nandzo wa rona. Swilo leswi swi nga ku pfuna ku vona loko xilo xo karhi xi ri apula, lamula, bolo kumbe xi ri nchumu wun’wana. Kambe a swi tano hi nomboro. Loko u hlengelete swilo swo karhi swa nkombo, a swi nge fani ni swin’wana swa nkombo ntsena hileswi swi ringanaka hi nhlayo. Hikwalaho, ku twisisa leswi tinomboro ti vulaka swona—hi xikombiso ku twisisa ku hambana exikarhi ka tsevu na nkombo—a swi olovi nikatsongo. Hi yona mhaka leyi ku nga ni vangoma va tinomboro.

Ku Suka Eka Dyondzo Ya Pythagoras Ku Ya Eka Leswi Vuriwaka Sayense

A swi tolovelekile eka vanhu va khale leswaku tinomboro ti vula swo karhi eka vona. Pythagoras, mutivi wa filosofi ni tinhlayo wa Mugriki, la hanyeke eka lembe-xidzana ra vutsevu B.C.E.,u dyondzise leswaku swilo hinkwaswo swi nga hlamuseriwa hi tinomboro. Yena ni valandzeri vakwe a va vula leswaku vuako hinkwabyo byi hlelekile naswona swilo leswi nga eka byona swa yelana. Kutani, xana leswi swi vula leswaku tinomboro ta nghenelela eka swilo hinkwaswo?

Ku sukela esikwini ra Pythagoras, tinomboro a ti tirhisiwa ku bvumba ni ku hlamusela milorho, naswona a ti tirhisiwa ni ku tsundzuka swilo. A ti tirhisiwa hi Magriki, Mamoslem ni swirho swa Vujagana. Loko Vativi va Vungoma bya Xiyuda va tirhisa endlelo ra ku hlamusela matsalwa leri vuriwaka gematria, a va vekela nomboro eka letere rin’wana ni rin’wana eka maletere laya 22 ya Xiheveru, hi ndlela yoleyo va vula leswaku va kume nhlamuselo leyi tumbeleke ya Matsalwa ya Xiheveru.

Vungoma bya manguva lawa bya tinomboro, na byona byi tano. Hakanyingi, ku sunguriwa hi vito ra wena ni siku leri u velekiweke ha rona leswaku ku paluxiwa swihundla swa wena. Letere ha rin’we ra vito ra wena ri veheriwa nomboro. Hi ku hlanganisa tinomboro leti swin’we ni tinomboro ta n’hweti ni siku leri u velekiweke ha rona—mungoma wa tinomboro u kota ku kuma tinomboro ta wena. Kutani u nyikela nhlamuselo yo hlawuleka ya tinomboro teto, leti a vonaka onge ti ku hlamusela hi ku helela—ku katsa vumunhu bya wena ni swilo leswi u nga swi rhandziki kambe u nga swi lemuki ni vumundzuku bya wena.

Kumbexana lexi endlaka leswaku vungoma bya tinomboro byi rhandziwa hileswi tinhlamuselo ta kona ti vonakaka ti pakanisile. Edward Albertson, ebukwini yakwe leyi nge Prophecy for the Millions u ri: “Vanhu vo tala va kholwa vungoma bya tinomboro hileswi va kumaka leswaku tinhlamuselo ta byona ti fambisana swinene ni swiyimo leswi va swi hlamuselaka.” Kambe, vungoma bya tinomboro na byona byi tekiwa byi ri sayense. Ha yini? Xana u ni swivangelo swo kanakana leswi byi swi vulaka?

[Bokisi/Swifaniso leswi nga eka tluka 21]

XANA BIBELE YI NI MARUNGULA LAMA TUMBELEKE?

Ebukwini yakwe leyi nge The Bible Code, mutsari wa maphepha-hungu Michael Drosnin u vula leswaku hi ku tirhisa vulavisisi bya khompyuta u kume marungula lama tumbeleke eMatsalweni ya Xiheveru. Hi ku ya hi Drosnin, “nomboro” yin’wana yi humese marito lama nge “mudlayi la nga ta dlayiwa” swin’we ni vito ra Yitzhak Rabin—naswona leswi swi kumiwe elembeni leri tlhandlamaka ra ku dlayiwa ka Holobye-nkulu wa le Israeli Rabin.

Hilaha a swi languteriwe hakona, The Bible Code yoleyo yi pfuxe njhekanjhekisano. Dave Thomas, mutivi wa tinhlayo tlhelo mutshila wa sayense, u kombise leswaku loko u endla vulavisisi hi khompyuta, yi ta humesa swin’wana leswi vonakaka onge i marungula ya xihundla. Loko Thomas a xopa-xopa rungula ra Drosnin, u kume marito lama nge “nomboro,” “vuphukuphuku” ni leri nge “vuxisi.” Thomas u ri: “Marungula lama tumbeleke ma nga kumiwa kun’wana ni kun’wana, ntsena loko u ri ni nkarhi naswona u tiyimisele ku endla matshalatshala yo lavisisa timhaka leti ngo kumbeteriwa kunene.”

Leswi khompyuta yi nga swi kotaka ku hlanganisa swilo swa ntsandza-vahlayi, yi nga ha hlanganisa ni maletere lama vonakaka ma bvumba swo karhi. Kambe leswi swi ta va swi ri xiwelo ntsena, a swi kombisi leswaku Bibele yi ni marungula lama tumbeleke.a

[Nhlamuselo ya le hansi]

[Xifaniso lexi nga eka tluka 20]

Pythagoras u dyondzise leswaku swilo hinkwaswo swi nga hlamuseriwa hi tinomboro

[Xihlovo Xa Kona]

Courtesy National Library of Medicine