Langutelo Ra Bibele

Xana Mintwanano Leyi Sayiniwaka Hi Matiko Yi Ta Ku Tisa Ku Rhula eMisaveni?

XANA u rhandza ku vona tinyimpi hinkwato ti herile? Kunene ku fanele ku va ni mintwanano leyi sayiniwaka hi tiko ni hi matiko leswaku ku herisiwa hasahasa emisaveni hinkwayo. Vo tala va vona onge loko varhangeri vo tirhisana, tinyimpi ti nga hela. Hambiswiritano, swi nga ha endleka leswaku u hetiwe matimba hi vuyelo bya mintwanano ya matiko. Malembe-xidzana yo tala ku cinciwe mintwanano leyi a yi sayiniwile, ku endliwe mindzulamiso eka swiboho leswi a swi endliwile, ni ku khoma minhlangano leyikulu, kambe a swi nyawuli swiphiqo leswi tlhantlhiweke.

Bibele yi na swo tala swo swi vula malunghana ni ku hlayisa vuxaka exikarhi ka matiko ni ku rhula. Yi hlamula swivutiso leswi landzelaka: I yini leswi sivelaka leswaku ku kondleteriwa ka vuxaka exikarhi ka matiko swi nga tisi ku rhula? Xana Vakreste va fanele va va ni xiphemu eka mintwanano leyi sayiniwaka hi matiko? Xana ku rhula ka ntiyiso ku ta kala ku kumeka?

Xana I Yini Leswi Endlaka Leswaku Ku Nga Vi Ni Ku Rhula?

Swiendlakalo swo tala eBibeleni swi kombisa ndlela leyi ku vulavurisana exikarhi ka vanhu swi nga tisaka ku rhula ha yona. Hi xikombiso, Abigail hi vutlhari u khorwise Davhida ni vuthu rakwe leswaku va nga rihiseli eka muti wa yena. (1 Samuwele 25:18-35) Yesu u nyikele xifaniso xa hosi leyi a ku ri hava lexi a yi nga xi endla handle ko rhuma vayimeri ku ya kombela ku rhula. (Luka 14:31, 32) Ina, Bibele ya pfumela leswaku mintwanano yo karhi leyi endliwaka yi nga ha tisa ku rhula. Kutani ha yini minhlangano yo kondletela ku rhula yi nga vi ni vuyelo lebyinene?

Bibele yi profete hi ku kongoma leswaku minkarhi ya hina a yi ta va ni swiphiqo leswikulu. Hikwalaho ka nkucetelo wo biha wa Sathana Diyavulosi, vanhu a va ta va “lava nga laviki ntwanano hambi wu ri wihi,” . . . kambe va ta va “lava nga ni tihanyi, lava nga rhandziki vunene, vaxengi, lava omeke tinhloko, lava tikukumuxaka hi ku tinyungubyisa.” (2 Timotiya 3:3, 4; Nhlavutelo 12:12) Ku engetela kwalaho, Yesu u profetile leswaku makumu ya mafambiselo lawa ya swilo ma ta vonakala hi “tinyimpi ni swiviko swa tinyimpi.” (Marka 13:7, 8) Xana u kona loyi a nga kanetaka leswaku swiendlakalo swo tano swi tele? Hikwalaho a swi hlamarisi leswi matshalatshala ya ku kondletela ku rhula exikarhi ka matiko ma talaka ku hundzuka nyuku wa mbyana!

Nakambe, xiya ntiyiso lowu: Hambiloko vayimeri va matiko va nga ringeta hi matimba ku papalata tinyimpi, xikongomelo xa muyimeri ha un’we lexikulu i ku lulamisa swa tiko ra ka vona. Xexo hi xona xikongomelo nkulu xa vayimeri va matiko. Xana Vakreste va fanele va va ni xiphemu etimhakeni to tano?

Vakreste Ni Ntirho Wo Kondletela Ntwanano

Bibele ya tsundzuxa: “Mi nga tshembi vanhu va xiyimo xa le henhla, hambi ku ri n’wana wa munhu wa nyama, loyi a tsandzekaka ku ponisa.” (Pisalema 146:3) Leswi swi vula leswaku ku nga khathariseki xikongomelo xa vona vayimeri va matiko va misava hinkwayo a va na vuswikoti hambi ku ri matimba yo tisa ntlhantlho lowu nga ta tshama hi masiku.

Loko Yesu a ri karhi a tengisiwa emahlweni ka Pontiyo Pilato, u te: “Mfumo wa mina a hi xiphemu xa misava leyi. Loko mfumo wa mina a wu ri xiphemu xa misava leyi, valanguteri va mina a va ta va va lwile leswaku ndzi nga nyiketiwi eka Vayuda. Kambe, hilaha swi nga hakona, mfumo wa mina a wu humi exihlobyeni lexi.” (Yohane 18:36) Ku kondleteriwa ka ku rhula hakanyingi ku pfangana ni vutiko ni vutianakanyi bya swa politiki. Hambiswiritano, Vakreste va ntiyiso va papalata ku tikatsa eka hasahasa ya misava ni le ka matshalatshala ya vona yo kondletela ntwanano.

Xana sweswo swi vula leswaku Vakreste a va na mhaka ni timhaka ta misava? Xana a va karhateki hi ku xaniseka ka vanhu? Doo! Ku hambana ni sweswo Bibele yi hlamusela vagandzeri va Xikwembu tanihi vanhu lava nga ni “nhlomulo, lava va konyaka” hikwalaho ka swilo leswi humelelaka. (Ezekiyele 9:4) Vakreste va titshege hi Xikwembu leswaku xi tisa ku rhula hilaha xi tshembiseke hakona. Xana ku herisiwa ka nyimpi swi vula ku rhula eka wena? Mfumo wa Xikwembu wu ta swi endla sweswo hakunene. (Pisalema 46:8, 9) Kambe ku engetela kwalaho, wu ta tiyiseka leswaku swivumbiwa hinkwaswo swa misava swi hlayisekile. (Mika 4:3, 4; Nhlavutelo 21:3, 4) Ku rhula ka xiyimo xa le henhla hi ndlela leyi a ku nge kumiwi hi ku kondletela ku rhula exikarhi ka matiko kumbe hi matshalatshala ya vanhu ya minhlangano ya “ku hlayisa ku rhula.”

Vuprofeta bya Bibele ni matimu swi kombisa kahle leswaku ku veka ntshembo eku kondleteleni ka vanhu ku vulavurisana ka matiko leswaku ku tisiwa ku rhula swi nga ku khomisa tingana. Lava vekeke ntshembo wa vona wa ku rhula eka Yesu Kreste ni ku seketela Mfumo wa Xikwembu va ta vona ku navela ka vona ko kuma ku rhula ka ntiyiso ku hetiseka. Lexi tsakisaka hi leswaku va ta ku tsakela hi masiku!—Pisalema 37:11, 29.

[Marito lama tshahiweke exihlokweni lama nga eka tluka 15]

Ku nga khathariseki swikongomelo swa vona, vakondleteri va ku vulavurisana ka matiko a va na vuswikoti kumbe matimba yo endla leswaku ku va ni ntlhantlho wa xiviri

[Laha Xifaniso Xi Humaka Kona eka tluka 14]

Bottom: Photo by Stephen Chernin/Getty Images