Langutelo Ra Bibele
Xana Xikwembu Xa Khathala Hakunene Hi Vana?
VANA vo tala swinene va xanisiwa, va cinisiwa rhuvurhuvu ni ku biwa hi ndlela ya nsele lembe ni lembe. Vo tala va tirha tanihi mahlonga eswiyin’weni leswi nga ni khombo. Van’wana va tlhakisiwa kutani va sindzisiwa leswaku va va masocha kumbe tinghwavava. Vana vo tala a va ha tshembi munhu hikwalaho ka leswi va pfinyiwaka hi maxaka ni ku xanisiwa hi tindlela tin’wana ta tihanyi.
Ha swi twisisa leswaku ha yini vanhu lavanene, lava khathalaka, va karhateka swinene hi swiyimo swo biha leswi vana va langutanaka na swona. Hambileswi van’wana va pfumelaka leswaku makwanga ni vuhomboloki bya vanhu hi swona swi vangaka ku xanisiwa ko tano, kambe va nga ha kuma swi tika ku pfumela leswaku Xikwembu lexi nga ni rirhandzu xi nga pfumelela vubihi byo tano. Va nga ha ehleketa leswaku Xikwembu xi va fularherile vana lava naswona a xi khathali ngopfu ha vona. Xana swi tano hakunene? Xana mhaka leyi vavisaka ya ku xanisiwa ka vana nkarhi ni nkarhi yi kombisa leswaku Xikwembu a xi khathali ha vona? Xana Bibele yi ri yini?
Xikwembu Xi Sola Vanhu Lava Xanisaka Van’wana
A ku nga ri xikongomelo xa Yehovha Xikwembu leswaku vana va xanisiwa hi vanhu lavakulu lava nga ni tihanyi. Ku xanisiwa ka vana hi byin’wana bya vuyelo byo biha swinene bya ku xandzuka ka vanhu entangeni wa Edeni. Ku ariwa ka vuhosi bya Xikwembu hi swona swi endleke leswaku vanhu va xanisa van’wana hi ndlela ya tihanyi.—Genesa 3:11-13, 16; Eklesiasta 8:9.
Xikwembu xi venga lava xanisaka vanhu lava nga riki ni matimba ni ndlela yo tisirhelela. Matiko yo tala ya khale lama a ma nga n’wi tirheli Yehovha a ma endla switlhavelo hi vana, kambe Yehovha u vule leswaku leswi a ku ri ‘nchumu lowu a nga wu lerisangiki naswona a wu vanga kona embilwini ya yena.’ (Yeremiya 7:31) Xikwembu xi lemukise vanhu va xona va le nkarhini wa khale: “Loko mo tshuka mi n’wi xanisile [n’wana la nga riki na tatana], kutani a huwelela eka mina, hakunene ndzi ta twa xirilo xa yena; kunene ku hlundzuka ka mina ku ta va kukulu.”—Eksoda 22:22-24.
Yehovha U Rhandza Vana
Leswaku Xikwembu xa khathala hi vana hi swi vona eka swiletelo swa vutlhari leswi xi swi nyikaka vatswari. Vana lava kurisiweke endyangwini lowunene, hi xitalo va kula va va vanhu lava wupfeke ni lava xiximekaka. Hikwalaho Muvumbi wa hina u sungule lunghiselelo ra vukati, lunghiselelo ra vutomi hinkwabyo leswaku “wanuna [a] ta siya tata wakwe ni mana wakwe naswona u fanele ku namarhela nsati wakwe, kutani va fanele va va nyama yin’we.” (Genesa 2:24) EBibeleni, vuxaka bya rimbewu byi pfumeleriwa ntsena eka vanhu lava tekaneke leswaku vana lava va nga ta va kuma va kota ku khathaleriwa endhawini leyi hlayisekeke.—Vaheveru 13:4.
Matsalwa ma tlhela ma kandziyisa leswaku i swa nkoka leswaku vatswari va letela vana va vona. Bibele yi ri: “Vana i ndzhaka leyi humaka eka Yehovha; mbhandzu wa khwiri i hakelo. Ku fana ni miseve evokweni ra wanuna wa matimba, va tano vana va vuntshwa.” (Pisalema 127:3, 4) Vana i nyiko ya risima leyi humaka eka Xikwembu, naswona xi lava leswaku va tsaka. Xikwembu xi khutaza vatswari ku nyika vana va vona nkongomiso lowunene evuton’wini, ku fana ni mucopi loyi a kongomisaka nseve wakwe a nga si copa. Rito ra Xikwembu ri nyikela ndzayo leyi: “Vatatana, mi nga karhati vana va n’wina, kambe hambetani mi va kurisa hi ku tshinya ni nkongomiso wa mianakanyo wa Yehovha.”—Vaefesa 6:4.
Ndlela yin’wana leyi Yehovha a kombiseke leswaku u rhandza vana ha yona i ku dyondzisa vatswari ku sirhelela vana va vona eka vanhu lava nga ni tihanyi. EIsrayele wa khale, hambi ku ri “vana” a va lerisiwa ku yingisa Nawu, lowu a wu hlamusela ku tikhoma lokunene ni loko biha hi tlhelo ra rimbewu. (Deteronoma 31:12; Levhitika 18:6-24) Xikwembu xi lava leswaku vatswari va endla leswi nga ematimbeni ya vona leswaku va sirhelela vana va vona eka mani na mani loyi a nga ha va xanisaka.
Ntshembo Lowu Vana Va Nga Na Wona
Rirhandzu leri Yehovha a nga na rona eka vana ri kombisiwe hi ndlela yo hlamarisa hi Yesu Kreste, loyi a kombiseke vumunhu bya Tata wakwe hi ndlela leyi hetisekeke. (Yohane 5:19) Loko vaapostola vakwe, va ringete ku pfuna Yesu hi ndlela leyi hoxeke, hi ku alela vatswari leswaku va tisa vana va vona eka yena, Yesu u va tshinye hi ku hlundzuka. U te: “Tshikani vana lavatsongo va ta eka mina.” Kutani a “angarha vana, a va katekisa.” (Marka 10:13-16) Vana i va nkoka eka Yehovha Xikwembu hambi ku ri eka N’wana wakwe.
Entiyisweni, ku nga ri khale Xikwembu xi ta ntshunxa vana lava xanisiwaka hi ku tirhisa Hosi ya xona leyi xi yi vekeke, ku nga Yesu Kreste. Vaxanisi lava nga ni tihanyi lava nga kona emisaveni leyi va ta heriseriwa makumu. (Pisalema 37:10, 11) Eka lavo rhula lava lavaka Yehovha, Bibele yi ri: “Xi ta sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona. Swilo swo sungula swi hundzile.”—Nhlavutelo 21:3, 4.
Swa sweswi, Xikwembu xi kombisa rirhandzu ra xona hi ku pfuna lava khomiweke hi ndlela yo biha ni lava xanisiwaka. Xa tshembisa: “Leyi lahlekeke ndzi ta yi lavisisa, leyi hambukeke ndzi ta yi vuyisa, leyi tshovekeke ndzi ta yi bohelela, leyi vabyaka ndzi ta yi tiyisa.” (Ezekiyele 34:16) Yehovha u chavelela vana lava tshikileriweke ni lava nga evuswetini hi ku tirhisa Rito ra yena, moya wakwe lowo kwetsima ni vandlha ra Vukreste. Hakunene swa tsakisa ku tiva leswaku sweswi tanihi leswi a nga ta swi endla enkarhini lowu taka, “Tatana la nga ni tintswalo letikulu tlhelo Xikwembu xa nchavelelo hinkwawo, . . . [xa hi chavelela] enhlomulweni wa hina hinkwawo.”—2 Vakorinto 1:3, 4.
[Laha Xifaniso Xi Humaka Kona eka tluka 16]
© Mikkel Ostergaard /Panos Pictures