I Yini Gwagwavukani?

Hi mutsari wa Xalamuka! eAfrika Dzonga

◼ Minkarhi yin’wana Sibongile u vulavula hi ndlela ya misavu loko a vulavula hi nhlonge yakwe. U vulavula a ri karhi a n’wayitela a ku, “Ndzi velekiwe ndzi ri muntima, kutani ndzi hundzuka ndzi va mulungu, sweswi a ndza ha titivi leswaku ndzi mu yini.” U na gwagwavukani.

Gwagwavukani, u vangiwa hi ku hela ka tisele leti akaka muvala enhlongeni. Leswi swi endla leswaku munhu a va ni mivala yo basa ni swivati enhlongeni. Van’wana vona ho kuma va ri ni xivati xin’we ntsena. Kasi van’wanyana, ku nga ri kungani ho kuma se va ri ni swivati miri hinkwawo. Kasi van’wana swivati leswi swi ta hakatsongo-tsongo, ku hela malembe yo tala swi ri karhi swi engetelaka emirini wa vona. Gwagwavukani a nga vavi naswona a nga tluleli munhu.

A hi hinkwavo vanhu lava nga na gwagwavukani lava nga ta fana na Sibongile hikuva u vonaka ngopfu eka vanhu va nhlonge ya ntima. Kambe vo tala va gwavukela hi mpimo lowu nga ringaniki. Vulavisisi byi kombisa leswaku vanhu lava endlaka phesente yin’we kumbe timbirhi va gwavukela va va ni mavalavala. Gwagwavukani a nga na mhaka nileswaku u mulungu kumbe u muntima, u wansati kumbe u wanuna. A swi si tiveka leswaku u vangiwa hi yini.

Hambileswi wu nga riki kona murhi wo tshungula gwagwavukani, kambe ti tele tindlela to lwa na yena. Hi xikombiso, eka lava nhlonge ya ntlhohe, swi vonaka ngopfu loko swiyenge leswi nga kwamukelangiki swi hisiwa hi dyambu. Hikwalaho, ku balekela dyambu swi nga endla leswaku swi nga vonaki ngopfu leswaku va gwavukela enhlongeni. Eka lava nhlonge ya ntima, munhu a nga tumbeta mavalavala hi switolwa swo hlawuleka. Van’wana lava nga na wona va pfunekile loko ku tirhisiwa matshungulelo yo tlherisela muvala wa nhlonge. Matshungulelo lawa ma teka tin’hweti to tala naswona ku tirhisiwa ni switirhisiwa swo hlawuleka swa ultraviolet. Eswiyin’weni swo tala, matshungulelo lawa ma endle leswaku nhlonge ya munhu yi tlhelela eka muvala wakwe wa ntumbuluko. Van’wana va hlawule ku cinca muvala wa vona wa ntumbuluko. Xikongomelo xa matshungulelo lawa i ku herisa muvala wa ntumbuluko hi ku dlaya tisele leti endlaka muvala hi ku tirhisa mirhi yo karhi.

Gwagwavukani a nga ha khomisa munhu gome, ngopfu-ngopfu loko a gwagwavukela xikandza xakwe hinkwaxo. Sibongile wa hlamusela: “Tolweni wa masiku, vana va ndzi langutile kutani va suka va baleka, va ri karhi va rila. Van’wana a va swi lavi kahle ku bula na mina, va ehleketa leswaku ndzi ni vuvabyi lebyi tlulelaka kumbe va ehleketa leswaku ndzi rhukaniwile. Loko a yi ri kona ndlela yo va hlamusela kahle, a va nga ta va chava vanhu vo fana na mina. A va nge gwagwavukeli nhlonge hi ku ndzi khumba kumbe va swi kuma kun’wana emoyeni.”

Sibongile a nga xi pfumeleli xiyimo xakwe leswaku xi n’wi sivela ku endla ntirho wo dyondzisa Bibele lowu a wu rhandzaka swinene tanihi leswi a nga Mbhoni ya Yehovha. Ntirho lowu wu lava leswaku a endzela vanhu emakaya ya vona ni ku vulavula na vona va langutane ematihlweni. U ri: “A ndza ha ri na xiphiqo ni ndlela leyi ndzi langutekaka ha yona. Ndzi titwa ndzi enerisekile hileswi ndzi nga xiswona, naswona ndzi langutele emahlweni enkarhini lowu ndzi nga ta tlhela ndzi kuma muvala wa mina wa ntumbuluko hi ku helela emisaveni ya Paradeyisi leyi tshembisiweke hi Yehovha Xikwembu.”—Nhlavutelo 21:3-5.

[Xifaniso lexi nga eka tluka 28]

Hi 1967, ndza ha ri kahle