Vahlaleri Lava Hlaselekaka Hi Ku Olova

HI MUTSARI WA XALAMUKA! EFINLAND

VANA vo tala va tshamela ku vona tifilimi, tivhidiyo, ti-DVD, mintlango ya elektroniki ni Internet. Xiviko xa sweswinyana lexi kandziyisiweke hi Ndzawulo yo Hlela Tifilimi ya le Finland xi vula leswaku “hi ku ya hi swiringanyeto swin’wana, nkarhi lowu vana ni vantshwa va wu hetaka va tirhisa swilo leswi kumbe ku hlalela swihaxa-mahungu wu endla kwalomu ka 20 na 30 ku tlula lowu va wu hetaka va ri ni mindyangu ya ka vona.”a Khombo ra kona, sweswo swi endla leswaku vana va kota ku hlangana ni swilo leswi nga ni khombo.

Ematikweni man’wana, valawuri va ringeta ku sirhelela vana hi ku simeka swipimelo swa malembe hi ku ya hi leswi kumekaka eka ntlango wa kona. Hambiswiritano, hi ku ya hi xiviko lexi, vana ni vatswari va vona hakanyingi a va pfumelelani ni swipimelo leswi, kumbe a va swi tekeli enhlokweni. Ku engetela kwalaho, tindlu ta mintlango ya tifilimi to tala ni tindhawu leti ku lombisiwaka tivhidiyo eka tona ti tiveka hi ku honisa swipimelo swa malembe. Tlhandlakambirhi, minongonoko ni tifilimi tin’wana a ti vekeriwi swipimelo.

Mudyondzisi un’wana la vutisiweke u te: “Swi vonaka onge a hi minkarhi hinkwayo laha swichudeni swi tekaka tifilimi leti ku nga halatiwiki ngati eka tona ti ri ni madzolonga.” Tivhidiyo ni mintlango yo tala ya tikhompyuta—hambi ku ri tiphophayi leti endleriweke vana—ti ni madzolonga.

Xiviko lexi xi vula leswaku ndyangu wun’wana ni wun’wana wu ni “vutihlamuleri lebyikulu eka tifilimi ni minongonoko ya thelevhixini leyi vana va yi hlalelaka.” Xiviko lexi xi gimete hi xivutiso lexi tlhontlhaka mianakanyo lexi nge: “Xana hina vatswari, ha swi navela, kumbe hi ni matimba ni vuswikoti byo sirhelela vana eka swilo leswi nga ni khombo leswi kombisiwaka eka swihaxa-mahungu?”

[Nhlamuselo ya le hansi]