“Minkarhi Ya Swakudya Ya Hi Hlanganisa”

XANA ndyangu wa wena wa hlangana kan’we hi siku wu dya swakudya swin’we? Lexi twisaka ku vava, emisaveni ya namuntlha laha n’wana a an’waka hi rheve, vanhu va dya va ri karhi va tsutsuma, emindyangwini yo tala un’wana ni un’wana u tidyela hi nkarhi wakwe, a dya leswi a swi lavaka. Kambe, munhu a ngo dyela ku xurha ntsena, ku dya mi ri ndyangu swi nga enerisa xilaveko xin’wana xa nkoka swinene—ku bula swin’we ni ku aka vuxaka lebyikulu tanihi ndyangu.

Algirdas, u tshama ni nkatakwe Rima ni vana va vona vanharhu va vanhwanyana etikweni ra Lithuania leri nga le n’walungwini wa Yuropa. Algirdas u ri: “Hambileswi ndzi tirhaka naswona vana va mina va nghenaka xikolo, hi hlela xiyimiso xa hina leswaku hi kota ku lalela swin’we. Hi nkarhi wa swakudya, hinkwerhu ka hina hi titwa hi ntshunxekile ku vulavula hi swiphiqo swa hina, leswi hi swi ehleketaka, makungu ya hina, leswi hi swi rhandzaka ni leswi hi nga swi rhandziki. Hi tlhela hi tirhisa nkarhi lowu ku bula hi swilo swa moya. Handle ko kanakana, minkarhi ya swakudya ya hi hlanganisa.”

Rima wa engetela: “Ku sweka swakudya ni vana va hina swi endla leswaku hi kota ku bula hi ndlela ya xinghana, hi ntshunxekile. Vana va hina va vanhwanyana va tsakela ku tirha swin’we ekhixini, hi nkarhi lowu fanaka, va dyondza mintirho ya nkoka. Hikwalaho, hi kota ku tlanga hi ri karhi hi tirha hi ntsako.”

Algirdas, Rima ni vana va vona va kuma vuyelo byo tala lebyinene hikuva va tinyika nkarhi wa ku dya swakudya swin’we. Loko mi nga si sungula ku endla tano, hi mi khutaza leswaku mi hlela ku dya swakudya swin’we kan’we mi ri ndyangu siku ni siku, hambiloko u ri mutswari la nga swakwe. Vuyelo bya kona byi ta swi tlula ekule leswi u titsonaka swona leswaku u va ni ndyangu wa wena.