Dyondzo Ya Xikwembu Ya Vuyerisa Swinene

Vatswari lava dyondzisaka vana va vona va ha ri vatsongo va tala ku tsaka hi vuyelo bya matshalatshala ya vona. Dorian muntshwa la tshamaka le Peru eAmerika Dzonga, u nyikele nkulumo yakwe yo sungula eka Xikolo xa Vutirheli bya le Tilweni eHolweni ya Mfumo ya Timbhoni ta Yehovha, loko a ri ni malembe ya mune ntsena. Loko a sungula ku ya exikolweni, u kote ku hlamusela xivangelo xa yena xa ku va a nga yi tlangeli Khisimusi eka mudyondzisi wa yena ni vadyondzi-kulobye hi ku tirhisa Bibele.

Sweswinyana, leswi se a nga ni malembe ya ntlhanu, Dorian u komberiwe leswaku a vulavula ni xikolo hinkwaxo—lexi nga ni swichudeni swa kwalomu ka 500—mayelana ni leswaku u titwa njhani hi ku tlangela Siku ra Vatatana. U lunghiselele nkulumo ya timinete ta khume leyi nga ni xihloko lexi nge, “Vutihlamuleri Bya Tatana,” leyi sekeriweke eka tsalwa ra le Bibeleni ra Vaefesa 6:4. Loko a gimeta nkulumo yakwe u te: “Ematshan’weni yo tlangela Siku ra Vatatana kan’we hi lembe, vana va fanele va xixima ni ku yingisa vatswari va vona siku ni siku.”

Hi 1943, Xikolo xa Vutirheli bya le Tilweni lexi hleriweke ku pfuna vanhu lavakulu ni lavatsongo hi ndlela yo vulavurisana ni vanhu, xi ve xiyenge xa vhiki ni vhiki xa minhlangano ya Timbhoni ta Yehovha. Ku sukela hi nkarhi wolowo xi nyikele nkongomiso lowu humaka eBibeleni lowu seketelaka dyondzo leyi vatswari va khutaziwaka ku yi dyondzisa vana va vona.—Swivuriso 22:6.

Hi November 2005, Simon muntshwa wa le Switzerland la nga ni malembe ya tsevu, u veke nkulumo ya yena yo sungula yo hlaya Bibele eka Xikolo xa Vutirheli bya le Tilweni. Endzhaku ka lembe, ku buriwe na yena eka nongonoko wa nhlengeletano ya Timbhoni ta Yehovha. Xana a a ri ni langutelo rihi mayelana ni swilo swa moya?

Simon a nga xwi eminhlanganweni ya Vukreste, hambiloko a karhele. Ku tlula kwalaho u famba ni ndyangu wa ka vona loko wu ya eku chumayeleni. N’hweti yin’wana ni yin’wana u fambisela vanhu vo hambana-hambana tikopi ta Xihondzo xo Rindza ni Xalamuka! ta 30 ku ya eka 50. Tlhandlakambirhi, minkarhi yin’wana u bula ni tata wakwe hi Bibele kutani a n’wi rhamba leswaku a famba na vona loko va ya eminhlanganweni.

Handle ko tipfinyinga, vatswari lava kurisaka vana va vona “hi ku tshinya ni nkongomiso wa mianakanyo wa Yehovha” va kuma ntsako loko vana va vona va amukela dyondzo kutani va endla leswi nga swinene.—Vaefesa 6:4; Yakobo 3:17, 18.

[Xifaniso lexi nga eka tluka 28]

Dorian a ri exikolweni

[Xifaniso eka tluka 28]

Simon a ri eHolweni ya Mfumo