Ta Rivala

◼ “Makaya ya le United States ma ni ti-TV to tala ku tlula vanhu”—vanhu va 2,55 va ni ti-TV ta 2,73. “Hafu ya miti ya le Amerika yi ni ti-TV tinharhu kumbe ku tlula.”—ASSOCIATED PRESS, U.S.A.

◼ Siku ni siku laha Afrika Dzonga, vana va 82 va hehliwa etihubyeni hi ku “pfinya kumbe ku khoma vana van’wana hi tihanyi.” Vo tala va vula leswaku, leswi va swi endlaka “swi hlohloteriwa hi leswi va swi vonaka eka thelevhixini.”—THE STAR, AFRIKA DZONGA.

Ku Nga Etleli Hi Mfanelo Swi Endla Leswaku Munhu A Nga Tirhi Kahle

Ndlela leyi vanhu va le Spaniya va etlelaka ha yona yi endla leswaku va nga tirhi kahle. Dok. Eduard Estivill loyi a nga ni tliliniki yo kambisisa timhaka ta vurhongo le Barcelona, u xiye leswaku vanhu va le Spaniya loko va fanisiwa ni vanhu va le Yuropa va tirha ku sukela hi mahlamba-ndlopfu kukondza ri pela, va lalela ni vusiku naswona va hatla va pfuka. Ku nga etleli hi mfanelo swi endla leswaku munhu a va ni ximbilwa-mbilwana, ku rivala swilo, ku karhateka ni ku tshikileleka. Xisweswo Dok. Estivill wa tsundzuxa, “munhu un’wana ni un’wana loyi a tirhaka ntirho lowu lavaka vutlhari kumbe lowu lavaka ku tinyiketela, u fanele a etlela tiawara ta kwalomu ka nkombo ku ya eka nhungu hi siku.”

Xana Swi Fanerile Ku Tshivela Koroni?

Xana swi fanerile ku tshivela koroni leswaku u ta orha? Phepha-hungu ra le Jarimani ra Frankfurter Allgemeine Sonntagszeitung ri vula leswaku, leswi nxavo wa koroni wu yaka ehansi kambe wa pharafini wu tlakukaka, swa antswa swinene leswaku murimi a tshivela koroni ya yena ku ri ni ku yi xavisa leswaku a ta xava pharafini. Tikhilogiramu ta 2,5 ta koroni ti n’wi koxa R1,40 ku byala ni ku yi cheleta, kambe loko o yi tshivela yi nga n’wi endlela ndzilo lowu ringanaka ni lowu endliwaka hi litara ya pharafini leyi nga R4,20. Leswi swi hi tisa eka xiphiqo lexi vuriweke hi phepha-hungu leri ku nga lexi: Xana “swi fanerile ku tshivela koroni loko vanhu van’wana va ri karhi va sika”?

Riendzo Ra Mupapa Ra Bindzurisa

Loko mupapa a endzele le Jarimani hi 2006, vaendli va swilo swo xavisa, van’wamabindzu ni lava rhurhelaka vaendzi etikweni a va tiyimiserile ku hakuta mali hi masaka hikwalaho ka riendzo leri. Kereke na yona yi hlawule bindzu ro karhi leri a yi ta tirhisana na rona eku xaviseni ka swingolongondzwana leswi fambisanaka ni kereke. Swilo leswi a swi xavisiwa a swi katsa vuhlalu, makhandlhela, mabodlhela lama nga ni mati yo kwetsima, tikomichi ta kofi, tikepisi, swikipa, swilo swo khoma swilotlelo ni mijeko ya le Vatican. Phepha-hungu ra Der Spiegel ri te: “Kereke ya Khatoliki yi ni ndlela ya yona yo endla mali, ya rivala leswaku Yesu Kreste . . . u tshama a hlongola vaxavisi etempeleni.”

Mintlangu Ya Tivhidiyo Yi Endla Leswaku Vanhu Va Nga Chavi Madzolonga

Mutivi wa mianakanyo loyi a endleke ndzavisiso le Yunivhesiti ya Mfumo ya le Iowa, eU.S.A. u vula leswaku, “mintlangu ya tivhidiyo leyi nga ni madzolonga yi endla leswaku vatlangi va yona va fa ripfalo loko ku humelela madzolonga ya xiviri.” Minkambisiso leyi endliweke eku sunguleni yi komba leswaku loko munhu a tlanga mintlango leyi “swi endla leswaku a leva, a tshama a hlundzukile naswona mbilu ya yena yi bela ehenhla.” Nkambisiso lowu wu kambele mabele ya mbilu ya vanhu lava a a va ha ku languta filimi leyi nga ni madzolonga endzhaku ka ku tlanga ntlangu wa vhidiyo lowu nga ni madzolonga kumbe lowu nga riki na wona. Vuyelo bya kona byi kombe leswaku “lava a va tlanga ntlangu wa vhidiyo lowu nga ni madzolonga va ma tolovela kutani a va ha chavi loko va vona madzolonga ya xiviri.”