Leti Humaka Eka Vahlayi

Ngalava Ya Nowa Ni Vutshila Bya Ku Aka Swikepe (January 2007) A a ndzi swi tiva leswaku ngalava a yi akiwe hi ndlela yo hlamarisa, kambe a ndzi nga yi twisisi kahle ndlela leyi a yi akiwe ha yona. Xihloko lexi xi yi hlamusele kahle ndlela a yi lehe ha yona, ku anama ni ku tlakuka ka yona leswi nga yi endla leswaku yi kota ku papamala ematini. Mina ni vantshwa va le vandlheni hi endle xingalavana, hi tirhisa xifaniso lexi kombisiweke. Kutani hi endla swiharhi hi maphepha ivi hi swi hoxa endzeni ka ngalava hi tlhela hi dirowa swifaniso swa Nowa ni ndyangu wa yena. Ku aka ka hina xingalavana xexo swi hi endle leswaku hi xi twisisa ku antswa xiendlakalo lexi xa le Bibeleni. Ha nkhensa swinene.

T. A., Japani

Xifanyetana xa mina xi rhandza ku aka-aka swilo. Mina na xona hi tsake ngopfu loko hi kume swiletelo eka Xalamuka! swa ndlela leyi hi nga akaka ngalava ya Nowa ha yona. Kunene hi tiphine ngopfu nhlikanhi wa kona, ha mi nkhensa swinene hikwalaho ka xihloko lexi! Leswi hi hanyaka emisaveni leyi nga ni mphesamphesa ni mintshikilelo leyi vana va hina va langutanaka na yona siku ni siku exikolweni, hakunene i nkateko eka vatswari ku va ni magazini wa Xalamuka! lowu va pfunaka leswaku va kurisa vana va vona hi tindlela ta Yehovha.

M. F., United States

Vantshwa Va Vutisa . . . Ndzi Nga Wu Hlurisa Ku Yini Mukhuva Lowu? (November 2006) Loko ndzi hlaya xihloko lexi ndzi xiye ndlela leyi Yehovha a hi khathalelaka ha yona ni ku hi pfuna leswaku hi tlhantlha swiphiqo swa hina naswona sweswo swi ndzi khumbe mbilu. Hambiloko hi dyoha Yehovha u “lunghekele ku rivalela.” (Pisalema 86:5) Ku tiva mhaka leyi swa hi pfuna hina vantshwa leswaku hi “balekela ku navela loku fambisanaka ni vuntshwa.”—2 Timotiya 2:22.

V.F.F., Brazil

Vantshwa Va Vutisa . . . Ha Yini Ndzi Vekeriwe Milawu Yo Tala Swonghasi?(December 2006) Se ndzi ni malembe ya tsevu ndzi ri karhi ndzi dyondzeriwa Bibele. Hambileswi vatswari va mina va tiyisaka voko eka hina vana va vona, ndza swi tiva leswaku va khathala hi mina. Loko ndzi hlaya xihloko lexi, xi ndzi pfunile leswaku ndzi twisisa xivangelo xa ku va vatswari va mina va karhateka naswona xi ndzi pfune leswaku ndzi tlangela ndlela leyi Yehovha a ndzi khathalelaka ha yona mina hi ndzexe.

K. T., Thailand

A Ndzi Ri N’wana Wa Vusopfa (December 2006) Ndzi tive ntiyiso wa Bibele ku sukela hi 1992. Kambe ku fike nkarhi lowu ndzi nga lava ku tihanyela hi ndlela leyi ndzi yi rhandzaka. Ku fana na Meros Sunday, ku ve ni nkarhi lowu ndzi tiphineke hi vutomi ni lowu ndzi hlangavetaneke ni miringo, naswona endzhaku ka malembe manharhu ndzi fularhele Yehovha, ndzi n’wi kombele leswaku a ndzi pfuna. Sweswi ndzi tlhelele eka Yehovha! Ndzi nkhensa xihloko lexi.

D. K., Ukraine

Vantshwa Va Vutisa . . . Xana Ndzi Nga Sungula Rini Ku Gangisana Ni Munhu Un’wana? (January 2007) Ndzi ni malembe ya 15 hi vukhale. Loko ndzi endzele hahani, ndzi hlangane ni mufana wa malembe ya 17 hi vukhale la nga Mbhoni. Hi sungule ku vulavurisana hi Internet, kambe eku sunguleni a hi nga vulavurisani siku ni siku. Kambe hi ku famba ka nkarhi se a hi vulavula masiku hinkwawo, hiloko se hi sungula ku rhandzana. Hiloko ndzi hlaya xihloko lexi kutani ndzi swi vona leswaku phela leswi hi swi endlaka swi endliwa hi vanhu lava lavaka ku tekana. Xihloko lexi xa Xalamuka! swin’we ni vatswari va mina va ndzi pfune leswaku ndzi endla xiboho xa kahle ngopfu—xo tshika ku vulavurisana ni mufana loyi. Hi hambete hi ri vanghana, kambe munghana wa mina lonkulu i Yehovha. Ndzi nkhensa ndzi vuyelela leswi xihloko lexi xi ndzi xalamukiseke.

D. D., Canada