Leti Humaka Eka Vahlayi

Vantshwa Va Vutisa . . . Xana Ndzi Ni Xiphiqo Hi Ndlela Leyi Ndzi Dyaka Ha Yona? (October 2006) Ndzi titwe ndzi tshikilelekile endzhaku ko hlaya xihloko lexi. I khale ndzi ri karhi ndzi lwisana ni xiphiqo lexi. Xihloko lexi xi ndzi endle ndzi vona onge a ndzi fanele ndzi “lulamise” xiphiqo lexi loko ndza ha ri ntsongo. Hambiswiritano, ku ta fikela sweswi ndza ha lwisana na xona, naswona sweswi ndzi twa onge a ndzi nge he swi koti ku xi hlula. Xihloko lexi xi swi veka onge munhu a nga kota ku hlula xiphiqo lexi hi ku va ni ripfumelo leri tiyeke ntsena.

J. J., United States

“Xalamuka!” ya hlamula: Hambileswi swihloko swo tala swa “Vantshwa Va Vutisa. . . ” hi xitalo swi tsaleriweke vantshwa, misinya ya milawu ya Bibele leyi kumekaka eka swona ya tirha ni le ka vanhu hinkwavo. Ha swi xiya leswaku xiphiqo lexi i xin’wana xa swiphiqo leswi tikaka swinene ku swi hlula. Xihloko a xi vulanga leswaku lava tsandzekaka ku hlula xiphiqo lexi va pfumala ripfumelo. Xi lo ringanyeta ntsena leswaku lava langutaneke ni xiphiqo lexi va nga khongela eka Yehovha va kombela mpfuno. Loko va ri karhi va kombela mpfuno eka Xikwembu, lava nga ni xiphiqo lexi va khutaziwe ni ku lava mpfuno eka “mutswari kumbe munhu un’wana la kuleke.” Tlhandlakambirhi, xihloko lexi xi boxe leswaku “a hi matlangwana ku hlula xiphiqo lexi” nileswaku u nga ha rhetemuka minkarhi yin’wana u tlhelela endzhaku. Leswi u yaka emahlweni u lwisana ni xiphiqo lexi hambileswi se ku hundzeke malembe yo tala swi komba swona leswaku a wu helanga matimba.

Vantshwa Va Vutisa . . . Xana Ndzi Nga Endla Yini Hi Vutomi Bya Mina? (July 2006) Ndzi le kusuhi ni ku heta xikolo, naswona swi lava ndzi hlawula leswaku ndzi ta endla yini hi vutomi bya mina. Xihloko lexi xi ndzi khutaze swinene ku fikelela pakani ya mina ya ku nghenela vutirheli bya nkarhi hinkwawo. A ku na ntirho wun’wana wa nkoka lowu nga ndzi tiselaka ntsako lowukulu.

H. W., Hong Kong

Ndzi nkhensa swinene hikwalaho ka xihloko lexi hikuva xi ndzi pfunile ku vona leswaku eka misava leyi ya vanhu lava hlongorisaka rifuwo, nchumu wa nkoka lowu vantshwa vo fana na mina va nga wu endlaka i ku rhangisa tipakani ta moya evuton’wini bya vona.

A. S., Brazil

Ndzi tshama ndzi khomekile, sweswo swi endla leswaku ndzi tala ku rivala tipakani ta mina. Ku hlaya xihloko lexi swi ndzi pfune leswaku ndzi pfuxeta tipakani ta mina ta ku endla hinkwaswo leswi ndzi nga swi kotaka leswaku ndzi tirhela Yehovha. Ndzi nkhensa swinene hi ndlela leyi mi hi khathalelaka ha yona hina vantshwa.

E. M., Japani

Ndlela Yo Hlakulela Ntsako eVukatini (July 2006) Swihloko leswi i swa risima swinene. Ku tirhisiwa ka ndlela leyi Yesu a tirhisaneke ni vadyondzisiwa vakwe ha yona tanihi xikombiso xa ndlela leyi vatekani va faneleke va khomana ha yona i mhaka ya risima swinene. Khomisani xisweswo. Hi tshama hi ti rindzele hi ntsako timagazini ta hina n’hweti ni n’hweti.

S. C., United States

Ku Suka Eka Gome Ku Ya eNtsakweni (July 2006) Ku fana na Makwerhu González, na mina a ndzi tivona ndzi nga ri nchumu. A ndzi tibyela ndzi ku, ‘Yehovha a nga ndzi rhandzi, ngopfu-ngopfu loko ndzi tsundzuka swidyoho leswi ndzi swi endleke enkarhini lowu hundzeke.’ Swa ndzi khutaza ku tiva leswaku Yehovha u ni tintswalo, wa rivalela naswona wa hi rhandza hakunene! Hikwalaho ka ndzayo, ku seketeriwa hi rirhandzu hi vamakwerhu ni hi ku pfuniwa hi moya lowo kwetsima wa Yehovha, ndzi pfuniwe leswaku ndzi tirhisa ntiyiso wa Bibele evuton’wini bya mina. Xihloko lexi xi fike hi nkarhi, ndzi ba mandla ndzi vuyelela.

T. A., United States