Leti Humaka Eka Vahlayi

Vantshwa Va Vutisa . . . Ha Yini Ndzi Fanele Ndzi Hlaya? (May 2006) Ndzi ni malembe ya 15 naswona xihloko lexi xi ndzi pfunile swinene. Ndzi fambe ni magazini lowu exikolweni hiloko thicara wa mina a wu vona. Loko a ri karhi a dyondzisa u bule hi mhaka ya ku hlaya kutani a komba vadyondzi-kulorhi Xalamuka! leyi. U vule leswaku u tiphinile swinene hi ku hlaya xihloko lexi, kutani a vula leswaku na vona va fanele ku xi hlaya.

D.A.C., Brazil

A ndzi tolovele ku hlaya ntsena swihloko leswi ndzi tsakisaka eka timagazini. Kambe sweswi ndzi endla matshalatshala leswaku ndzi hlaya xihloko xin’wana ni xin’wana, hambiloko eku sunguleni, xi vonaka xi nga ndzi tsakisi. Ndzi kume leswaku ndzi hetelela ndzi swi rhandza ngopfu swihloko swo tano. Ndza nkhensa swinene.

E. G., United States

A ndzi tsakile ku tiva leswaku ku ni vantshwa lava rhandzaka ku hlaya ku fana na mina. Ndzi khuvuriwe ndzi ri ni malembe ya 14 naswona sweswi ndzi ni malembe ya 40. Loko ndzi ri kusuhi ni ku khuvuriwa, ndzi swi endle mukhuva ku hlaya matluka yo hlayanyana eka Xihondzo xo Rindza kumbe Xalamuka! siku ni siku. Ndzi anakanya leswaku mukhuva lowu wu ndzi pfunile hikuva sweswi ndzi kota ku hlaya swihloko hinkwaswo naswona swi ndzi pfune ku tshama ndzi tiyile hi tlhelo ra moya.

S. O., Japani

Michael Servetus—Wanuna La Lavisiseke Ntiyiso A Ri Swakwe (May 2006) Ndza mi nkhensa hikwalaho ka xihloko lexi xi tameleke rungula ra ntshima swonghasi. Xi ndzi khutazile ku ya emahlweni ndzi chumayela ni ku lwela vito ra Yehovha.

M. R., Brazil

Vanhu vo tala va n’wi tiva Servetus la dumeke eka swa vutshunguri. Hambiswiritano, xihloko lexi xi paluxe timhaka tin’wana ta nkoka swinene hi wanuna loyi, to fana ni ku tshembeka ka yena ni ku lavisisa ka yena ntiyiso. Ndza mi nkhensa hi ku kandziyisa xihloko lexi.

M. J., Spaniya

Ku Yingisa Swilemukiso Swi Pfunile (June 2006) Swa tsakisa hakunene ku va xirho xa nhlengeletano ya Yehovha leyi nga ni rirhandzu. Ndzi rhandza ku nkhensa vamakwerhu hinkwavo lava pfuneke ku lunghisa yindlu ya mina, leyi a yi onhiwe swinene hi Xidzedze xa Katrina. Sweswi i yindlu leyi kombisaka rirhandzu ra vona.

I. F., United States

Silika—“Nguvu Yo Saseka Ku Tlula Hinkwato” (June 2006) Ku sukela loko ndza ha ri ntsongo, a ndzi lava ku tiva leswaku silika yi endliwa njhani. Ndzi tsake swinene loko ndzi vona xihloko lexi eka Xalamuka! Xi ndzi tsakise ngopfu, naswona xi endle leswaku ndzi wu tlangela ngopfu ntumbuluko wa Yehovha.

A.C.L., Brazil

Swikombiso Leswikulu Swa Swirhumbana Leswi Nga Ni Khensa (June 8, 2005) Hi ku tirhisa swifaniso swa mivala ya mune leswi a swi ri eka xihloko lexi, ndzi kote ku tikambela hiloko ndzi vona xirhumbana xa ntima lexi ndzi nga kuma leswaku a ku ri xirhumbana xa khensa. Lexi tsakisaka, xirhumbana lexi xi susiwile hi ku endla vuhandzuri xi nga si vanga khombo. Ndzi nkhensa Yehovha hi mpfuno lowu ndzi wu kumeke.

K. N., Japani