Leti Humaka Eka Vahlayi

Ndlela Leyintshwa Leyi Xalamuka! Yi Langutekaka Ha Yona Tolo nivusiku ndzi hete ku hlaya nkandziyiso wa Xalamuka! ya January 2006. Ndza yi rhandza swinene ndlela leyi yi langutekaka ha yona sweswi. Sweswi Xalamuka! i magazini lowu lavaka ku hlayiwa hi vukheta, yi tsariwe hi ndlela leyi endlaka leswaku muhlayi a anakanyisisa. Ku sukela eka tluka ro sungula ku ya eka ro hetelela, ndza swi vona leswaku Yehovha u kongomisa swilo leswaku hi kula hi tlhelo ra moya.

B. N., Canada

Ndzi ni malembe ya 16. Ndlela leyintshwa leyi Xalamuka! yi hleriweke ha yona yi ta hi pfuna swinene leswaku hi dyondza Bibele. Swihloko swin’wana swi ni swivutiso swo hlayanyana leswi pfunaka muhlayi leswaku a anakanyisisa hi leswi a swi hlayeke. Ndza swi tsakela ku tirhisa Xalamuka! entirhweni wa mina wa xikolo. Ndza tshemba leswaku mi ta ya emahlweni mi hi nyika rungula lerinene ni leri pfunaka swonghasi.

S. N., Namibia

Ripfumelo Ra Mina Ri Ndzi Pfunile—Ku Hanya Ni Vuvabyi Bya ALS (January 2006) Endzhaku ko hlaya ntokoto wa Jason Stuart, swiphiqo swa mina hinkwaswo swi vonake swi nga ri nchumu. Ndzi swi vonile leswaku Yehovha u teka vutirheli lebyi hi n’wi endlelaka byona byi ri bya nkoka swinene hi ku ya hi swiyimo swa hina. Ndza n’wi xixima nsati wa Jason hikwalaho ka ku tikarhata kakwe ni ku tshembela kakwe eka Yehovha. Ntokoto lowu a ndzi nge wu rivali, naswona wu ta ndzi pfuna ku langutana ni swiphiqo leswi nga ha vaka kona enkarhini lowu taka.

C.R.S., Peru

Ndzi ririle endzhaku ko hlaya ntokoto wa Jason, ku nga ri ntsena hileswi ndzi tweke ku vava loko ndzi hlaya hi swiyimo swo nonon’hwa leswi a langutaneke na swona, kambe ni hikwalaho ka leswi ndzi nga Mbhoni ya Yehovha, ndzi tinyungubyisaka swinene hi ku va ni makwerhu wo tano wa moya. Eka xihloko xexo, ndzi swi vonile leswaku i swa nkoka ku tilunghiselela miringo, tanihi leswi “nkarhi ni xiendlakalo lexi nga languteriwangiki” swi nga ha fikelaka un’wana ni un’wana wa hina.—Eklesiasta 9:11.

T. A., Hungary

Mana wa mina u dlayiwe hi ALS. Hikwalaho ntokoto wa Jason wu khumbe mbilu ya mina. Xikombiso xakwe xi ndzi khutazile leswaku ndzi ya emahlweni ndzi hiteka swinene evutirhelini. Ndzi khongela leswaku Yehovha a ya mahlweni a tiyisa makwerhu loyi ni nsati wakwe.

L.Z.G., Paraguay

Mhaka ya leswaku Jason u tirhise nkarhi wakwe a dyondza loko a ha hanye kahle, kutani a tirhisa dulu rakwe ra moya loko se a pfumala, swi ndzi endle leswaku ndzi dya marhambu ya nhloko. Swi endle leswaku ndzi tiyimisela ku hisekela dyondzo ya mina ya Bibele.

Y. M., Japani

Vantshwa Va Vutisa—Ha Yini Ndzi Tivavisa? (January 2006) Loko ndza ha ri muntshwa, a ndzi lwisana ni swidzidzirisi ni byala, kambe xiphiqo xo tika swinene lexi ndzi langutaneke na xona i ku tivavisa. Nyimpi leyi a yi heli, kambe swihloko swo fana ni lexi swi ndzi nyike matimba ya ku tiyisela. Ndzi hava marito yo kombisa ndlela leyi ndzi tlangelaka ha yona.

E. C., United States

Ndzi sungule ku tivavisa ndza ha ri emalembeni ya kondlo-a-ndzi-dyi. Sweswi ndzi ni malembe ya 56. Ndzi tshike mukhuva lowu wa ku tivavisa emalembeni ya mune lama hundzeke, kambe minkarhi yin’wana ndzi va ni swiphiqo leswikulu ngopfu lerova ndzi navela ku tivavisa nakambe. Xihloko lexi xi ndzi fikelele embilwini. Xi ta pfuna vanhu vo fana na mina ku tlhela va langutana ni swiphiqo swa vutomi.

Vito ri susiwile, Netherlands

Ndzi ni malembe ya 17 naswona ndzi rhandza ku mi nkhensa hi xihloko lexi. Ndzi ni xiphiqo xa ku tivavisa. Sweswinyana, ndza ha ku titsema nakambe. Endzhaku ka sweswo ndzi ye eka manana ndzi ya kombela leswaku a khongela na mina. Hambileswi ndzi nga ni xiphiqo lexi, ndzi kume leswaku Yehovha wa ndzi rhandza. Xihloko xa n’wina xi ndzi pfune ngopfu, naswona ndzi nkhensa Xikwembu hi xihloko lexi!

N. M., Czech Republic

“Swa hlamarisa!” Leyi i ndlela leyi ndzi titweke ha yona loko ndzi vona xihloko lexi. Ndzi ni malembe ya 18. Ndzi tshamela ku tivavisa. Ku vava ku endla leswaku ndzi tumbeta ndlela leyi ndzi titwaka ha yona. Hakanyingi ndzi navela ku tivavisa, kambe a ndzi swi tivi leswaku ndzi nga lwisana njhani ni ku navela koloko. Swi ndzi hlamarise ngopfu ku vona xihloko lexi. Ndzi xiririke mihloti, kutani ndzi khongela eka Yehovha ku n’wi nkhensa. Munhu a nga kuma nchavelelo wo tano enhlengeletanweni ya Yehovha ntsena!

A. P., Rhaxiya

Loko ndzi ri ni malembe ya 14, ndzi sungule ku huhata ku vava loku a ndzi ku twa embilwini hi ku sungula ku tivavisa. Ndzi tshame ndzi ya ni le xibedlhele hikwalaho ka ku tivavisa. Ku tsala ehansi nkarhi ni nkarhi loko ndzi tivavisa swi ndzi pfunile leswaku ndzi tshama ndzi ri karhi ndzi lawula ndlela leyi ndzi titwaka ha yona. Nakambe, loko ndzi navela ku tivavisa, ndzi fonela munghana wa mina la twisisaka. Xikhongelo xi pfunile swinene. Naswona loko ndzi titwa ndzi nga faneleki ku khongela, vanghana ni vakulu lava nga Vakreste va ndzi khongelerile. Nyimpi leyi ya tika, kambe ndzi dyondze ku langutana na yona ni ku amukela mpfuno hinkwawo lowu kumekaka leswaku ndzi nga tivavisi.

N. W., Jarimani

Xifaniso lexi a xi ri eka tluka ro sungula ra xihloko lexi xi kombisa nhwanyana a ri karhi a titsuvula misisi, kutani xihloko lexi xi boxe “Sara,” loyi a tsuvuleke misisi yakwe ku ri ndlela ya ku tixupula. N’wana wa mina wa nhwanyana u ni xifo lexi vuriwaka trichotillomania, ku nga vuvabyi lebyi endlaka leswaku munhu a titsuvula misisi. Munhu a nga tiendli loko a ri ni xifo lexi. Ku ni nchumu wo karhi lowu n’wi susumetelaka ku endla sweswo, u va a nga naveli ku tivavisa. A swi vuli leswaku loko munhu a titsuvula misisi u ta hetelela hi ku titsema-tsema.

M. H., United States

“Xalamuka!” ya hlamula: Rito leri nge “trichotillomania,” ri vumbiwe eku heleni ka lembe-xidzana ra vu-19, ri kombetela eka xiphiqo xa mahanyelo lexi vonakaka loko munhu a titsuvula misisi. Hilaha xifaniso xa hina a xi lava ku swi kombisa kahle hakona, van’wana va tivavise hi ku titsuvula misisi. Kambe, leswi a swi vuli leswaku un’wana ni un’wana la titsuvulaka misisi u ni xiphiqo xa ku tivavisa lexi tlhuvutsiweke exihlokweni xa hina. Hilaha muhlayi la tshahiweke la henhla a kombisaka hakona, van’wana a va tiendli.

Hambiswiritano, vativi van’wana va vula leswaku xivangelo xa “trichotillomania” xi fanele xi tekeriwa enhlokweni leswaku ku ta kumeka vutshunguri lebyi fambisanaka ni muvabyi yoloye. Hikwalaho, ku nga va vutlhari leswaku lava nga ni xiphiqo lexi va vonana na dokodela kutani a vona kahle leswaku va khomiwe hi yini ni ku kunguhata ndlela yo va tshungula.

U Nga Hlamula Njhani? (January 2006) Xiyenge lexi lexintshwa xi ndzi tsakisa ngopfu. Hi dyondzisa vatukulu va hina, kutani leswi swi ta fambisana kahle ni ku hlaya ka vona ka Bibele ni swihloko swa Xalamuka! leswi va swi hlayeke tanihi xiphemu xa ntirho wa vona wa le xikolweni. Ha mi nkhensa swinene hi ku khathala swonghasi hi lavatsongo.

B. E., United States

Xiyenge lexi a xi olovi, kambe loko ndzi kuma nhlamulo, ndza tsaka hakunene! Tolo nimadyambu ndzi xuxe hi ku hlaya tluka leri hinkwaro; ri ndzi tsakise ngopfu! Loko ndzi kula, ndzi lava ku pfuna eku endleni ka magazini lowu leswaku van’wana va ta dyondza hi Yehovha!

D. H., United States

Ndzi ni malembe ya nhungu. Ndyangu wa ka hina wu tirhisa tluka leri eka dyondzo ya hina ya ndyangu. Ha byi tsakela vulavisisi lebyi hi faneleke hi byi endla. Xiphemu lexi nge “Hi Mina Mani?” xa tika, kambe ha wu rhandza ntlhontlho lowu xi hi vekelaka wona. Mi xumile.

C. W., United States