Leti Humaka Eka Vahlayi

Matsalwa Ya Khale—Xana Wu Kumiwa Njhani Nkarhi Wa Ku Tsariwa Ka Wona? (February 2008) Xihloko lexi xa ndzi hlundzukisa. Mina ndzi tiva leswaku C.E. yi yimela “Nguva leyi Tolovelekeke” naswona B.C.E. yi yimela “Emahlweni ka Nguva leyi Tolovelekeke.” Eka malembe hinkwawo lama ndzi ma hanyeke ya 70, a ndzi tolovele ku vona marito lama nge B.C. na A.D. ma kombetela eka nkarhi wa le mahlweni ka ku tswariwa ka Yesu ni le ndzhaku ka ku tswariwa ka yena. Mina ndzi vona onge ku tirhisa B.C.E. kumbe C.E. swi kanetana ni mhaka ya ku tswariwa ka Yesu.

R. W., United States

“Xalamuka!” ya hlamula: Hambileswi rito leri nge A.D. (Anno Domini, leri vulaka “elembeni ra Hosi ya hina”) ni leri nge B.C. (emahlweni ka Kreste) ma tirhisiwaka ematikweni lawa vanhu vo tala va tivulaka Vakreste, hi hlawule ku tirhisa rito leri nge C.E. (Nguva leyi Tolovelekeke) ni leri nge B.C.E. (Emahlweni ka Nguva leyi Tolovelekeke). Ha yini? Xo sungula, ku ni vumbhoni byo tala lebyi kombaka leswaku Yesu u tswariwe hi lembe ra 2 B.C.E. Xa vumbirhi, tibuku leti kandziyisiwaka hi Timbhoni ta Yehovha ti kumeka hi tindzimi leti hlayiwaka hi vanhu vo tala lava nga riki Vakreste. Xa vunharhu, vito leri nge “Kreste” ri vula “Mutotiwa.” Yesu u ve Mesiya kumbe Kreste loko a totiwa hi moya wa Xikwembu hi nkarhi lowu a khuvuriweke ha wona hi 29 C.E. (Matewu 3:13-17) Hikwalaho, Yesu a nga tswariwanga a ri Kreste; u ve Kreste hi lembe leri a khuvuriweke ha rona. Lexi xiyekaka hileswaku tinhlamuselo ta C.E. na B.C.E. ti ya ti tirhisiwa hi xitalo, naswona ti humelela eka swihlamusela-marito swo tala swa manguva lawa ni le ka tibuku to tala. Hi kombela u tiyiseka leswaku Timbhoni ta Yehovha ti teka Yesu a ri wa nkoka ni xitlhavelo xakwe eka ku hetiseka ka switshembiso swa Xikwembu ni ku ponisiwa ka hina.

Vantshwa Va Vutisa . . . Xana Ndzi Nga Hanya Njhani Ni Mutwa eNyameni? (February 2008) A ndzi tsake ngopfu loko ndzi kuma xihloko lexi hi nkarhi lowu faneleke! Ndzi sungule ku vabya kutani ndzi tshama exibedlhele ku ringana mavhiki manharhu. Loko ndzi kuma magazini lowu a ndza ha ku huma exibedlhele. Na mina a ndzi titwa ku fana ni vantshwa lava ku vulavuriweke ha vona eka xihloko lexi. Ndza swi nkhensa swikombiso swin’we ni ndzayo leyi nyikeriweke.

K. P., Canada

Mbilu ya mina yi khumbekile hikwalaho ka leswi Yehovha Xikwembu a chavelelaka, hambi ku ri lava lamaleke ku fana na mina. Loko ndza ha ri ntsongo swinene, ndzi khomiwe hi vuvabyi bya ku nga tirhi kahle ka byongo. Hambileswi ndzi nga swi kotiki ku famba, ndzi phayona ra nkarhinyana. Ndzi wu langutele hi mahlo-ngati nkarhi lowu hinkwavo lava lamaleke va nga “ta tlula kukota mhunti” emisaveni leyi nga Paradeyisi leyi nga kwala nyongeni.—Esaya 35:5, 6.

J. J., Riphabliki ra Korea

Ndzi xi hlaye ko tala xihloko lexi. Mihloti a yo xiririka kunene loko ndzi vona ndlela leyi Yehovha a hi rhandzaka ha yona. A swi fana ni loko a hi funengete hi nkumba wo kufumela leswaku hi nga vaviseki. Ndza nkhensa swinene.

M. T., Japani

Rifu—Xana I Makumu Ya Vutomi? (December 2007) Mana wa mina a ha ku fa eka tin’hweti ti nga ri tingani ndzi nga si kuma magazini lowu, naswona nhlamuselo leyi nga le ka swihloko leswi leswi tlhandlamanaka, ngopfu-ngopfu switshembiso swa malunghana ni ku pfuxiwa ka lava feke yi ndzi khumbe swinene. Ndza nkhensa swinene. Swi ndzi chavelerile swinene swi tlhela swi ndzi khutaza.

M. R., Madagascar