Muvabyi U Ni Mfanelo Yo Hlawula Vutshunguri Lebyi A Byi Lavaka
HI MUTSARI WA XALAMUKA! LE ITALY
◼ Timbhoni ta Yehovha ti ala ku pomperiwa ngati. Ku ala koloko ku sekeriwe eka milawu ya le Bibeleni ya le ku sunguleni leyi nge: “Ntsena nyama leyi nga ni moya-xiviri wa yona—ngati ya yona—mi nga tshuki mi yi dya.” Vakreste va lembe-xidzana ro sungula va byeriwe marito lawa: “Papalata . . . ngati.”—Genesa 9:4; Mintirho 15:29; Levhitika 17:14.
Le Monterenzio, eItaly exikolweni xa sekondari, swichudeni a swi komberiwe ku tsala xitsalwana malunghana ni nkoka wo nyikela hi ngati. Exikarhi ka swichudeni sweswo, a ku ri na Benedetta loyi a nga Mbhoni ya Yehovha, la tsaleke leswi landzelaka:
“Etindhawini to tala Timbhoni ta Yehovha ti tiviwa hi ku ala ku pomperiwa ngati hikwalaho ka leswi ti namarhelaka milawu ya Bibele kambe leswi a swi vuli swona leswaku a ti byi amukeli vutshunguri byin’wana. Entiyisweni, Timbhoni ta Yehovha ta ri rhandza rihanyo lerinene. Ti lwela ku kuma vutshunguri byo antswa tona ni vana va tona. Ta swi tsakela hi mbilu hinkwayo ku tirhisana ni madokodela ntsena loko ma xixima leswi ti swi pfumaleka.”
Benedetta u tlhele a ku: “Muvabyi un’wana ni un’wana u ni lunghelo ro hlawula vutshunguri lebyi a vonaka leswaku byi ta n’wi pfuna, lunghelo ro xiximiwa ni ro tiva makhombo lama nga ha vaka kona swin’we ni ndlela leyi a nga ta vuyeriwa ha yona loko o amukela vutshunguri bya kona.”
Rhavi ra le Monterenzio ra AVIS (Association of Italian Blood Donors [Nhlangano wa le Italy wa Vanhu lava Nyikelaka hi Ngati]) ri nyike swichudeni masagwadi leswi swi yi hlamuseleke kahle ndlela leyi swi titwisaka xiswona malunghana ni mhaka yo nyikela hi ngati. Xiviko xa magazini lowu vuriwaka Monterenzio Vivace xi te: “Benedetta Barbi u bumabumeriwile hikwalaho ka xitsalwana xakwe lexi a xi hambanile ni xa van’wana—mongo wa rungula rakwe a wu hambanile ni lowu hlamuseriweke hi rhavi ra AVIS, kambe u swi kotile ku phofula vonelo rakwe hi ndlela leyi twalaka ni hi xichavo.”
Hambileswi vonelo ra Timbhoni ta Yehovha malunghana ni ngati ri “hambaneke ni ra van’wana,” sweswi madokodela yo tala ma xi vona xivangelo xo va ti ala ku pomperiwa ngati. Langutelo ra Timbhoni ri endle leswaku ku va ni tindlela to hambana-hambana ta matshungulelo leti endlaka leswaku muvabyi a nga lahlekeriwi hi ngati yo tala loko a endliwa vuhandzuri. Leswi swi endle leswaku Timbhoni swin’we ni vavabyi lava nga riki Timbhoni va vuyeriwa. Hambiswiritano, xivangelo lexikulu xa ku va Timbhoni ta Yehovha ti ala ku pomperiwa ngati xi kumeka eBibeleni hilaha swi hlamuseriweke hakona eku sunguleni.
Loko Timbhoni ta Yehovha ti tlhela ti ku endzela, ha yini u nga ti vutisi malunghana ni ndlela leyi Muvumbi a yi tekaka ha yona ngati? Ti ta swi tsakela swinene ku bula na wena, naswona ti ta endla tano hi “xichavo lexi enteke.”—1 Petro 3:15.
[Bokisi/Xifaniso lexi nga eka tluka 30]
RUNGULA LERI ENGETELEKEKE
Hi ku pfuniwa hi madokodela yo tala lama nga ni vutshila lama tivekaka, DVD leyi nge Transfusion Alternatives, yi kota ku hlamusela tindlela ta vutshunguri leti nga le nawini ni milawu yin’wana leyi kongomisaka ya tindlela tin’wana leti fambisanaka ni matshungulelo man’wana lama tirhisiwaka handle ko pompela ngati. Yi endliwe hi Timbhoni ta Yehovha.