Ta Rivala

“Vavasati lava tshamaka ematikweni lama nga evuswetini va le khombyeni lerikulu ra ku fa loko va tikile kumbe loko va veleka, ku tlula lava tshamaka ematikweni lama fuweke.”—BUSINESSWORLD, PHILIPPINES.

Hi ku ya hi nkambisiso lowu endliweke eJarimani, 40 wa tiphesente ta vana lava nga emalembeni ya 11 ku ya eka 15 a va swi tivi leswaku dyambu ri huma evuxeni; kasi lava endlaka 60 wa tiphesente a va swi tivi leswaku n’weti wu heta mavhiki ya mune wu hume wu helerile.—WELT ONLINE, GERMANY.

Vayimburi va tshubule tempele ya le Filista le mutini wa khale wa Gati. Muako wa kona a wu seketeriwe hi tiphuphu timbirhi leti a ti ri exikarhi ka wona naswona wu fanisiwa ni lowu rungula ra Bibele ri vulaka leswaku Samsoni u titshege hi tiphuphu ta wona kutani wu wa.—THE JERUSALEM POST, ISRAEL.

Ku Teka Vavasati Va Le Asia

Xiviko xa mahungu xa le ka Internet xa le Philippine lexi vuriwaka BusinessWorld xi te: “Nhlayo ya vavanuna va le Asia lava humaka ematikweni lama fuweke yo tanihi Japani na South Korea lava tekaka vavasati [ematikweni ya le Asia] lama nga evuswetini, yo tanihi Vietnam na Philippines, yi ya yi andza.” Exikarhi ka 1995 na 2006, nhlayo ya vavanuna va le Japani lava tekaka vavasati va le matikweni mambe yi engeteleke hi tiphesente ta 73. Ha yini? Xiviko lexi xi ye emahlweni xi vula leswaku “vavasati vo tala va le Japani lava nga swigwili va ni manyunyu loko va gangisiwa,” naswona a va tiyimiselanga ku nghenela vukati. Kambe vavasati lava humaka ematikweni lama nga evuswetini va tiyimiserile ku tekiwa, hambiloko vavanuna va kona va huma ematikweni lama fuweke. Leswi swi vangiwa hileswi vavanuna volavo va va tshembisaka ku “hanya emafurheni.”

Ku Nga Tshembeki Ku Endliwa Onge Ka Amukeleka

Website leyi ku gangisaniwaka eka yona eka Internet leyi tirhisiwaka ematikweni ya ntlhanu yi ni marito lama nge: “Vutomi byi komile. Tikumele xigangu.” Musunguri wa yona u vule leswaku website leyi a yi endli leswaku vanhu va nga ha tshembeki eka vanghana va vona va vukati hikuva vanhu lava nghenaka eka yona ana se va “tiyimisele ku rhandzana ni munhu un’wana.” U tlhele a ku: “Swiphiqo swo tala leswi fambisanaka ni ku nga tshembeki swi va kona hikwalaho ka leswi vanhu volavo va kumiwaka. Kambe hina hi va pfuna leswaku sweswo va swi endla hi vutlhari. Xikongomelo xa hina a hi ku endla leswaku vanhu va nga ha tshembeki, kambe i ku va pfuna leswaku va swi endla kahle leswi va swi rhandzaka.” Website leyi sweswi yi tirhisa hi vanhu va kwalomu ka 6,4 wa timiliyoni.

Hi Velekiwe Hi Swi Tiva Ku Cina

Xiviko lexi kandziyisiweke hi vakambisisi va le yunivhesiti ya le York le Nghilandhi na Jyväskylä ya le Finland xi kombisa leswaku “vanhu va ni vuswikoti byo hlawuleka byo tshukatshukisa mimiri ya vona loko va twa vuyimbeleri, sweswo swi vonaka hi ku va va tlangisa mikondzo ya vona loko va twa vuyimbeleri.” Vakambisisi va xiye leswaku hambiloko ricece ri nga si swi kota ku vulavula, loko ri twa vuyimbeleri ri sungula ku tlangisa miri wa rona. Leswi swi endla leswaku ri tshama ri ri eku n’wayiteleni. Leswi swi kombisa leswaku ku va hi kota ku tshukatshukisa miri loko vuyimbeleri byi chaya a ho swi dyondza, kambe hi velekiwa na swona.