Tluka Ra Vumbirhi

Ndlela Yo Kurisa Vana Leswaku Va Va Ni Vutihlamuleri

Loko vatswari va languta n’wana wa vona la ha ku velekiwaka, a va swi lavi ku anakanya hi vutihlamuleri lebyi a faneleke a va na byona loko a kula. Kambe ntiyiso wa mhaka hi lowu: Eku heteleleni n’wana yoloye u ta kula naswona u ta boheka ku tiendlela swiboho. Leyi hi yona ndlela leyi swilo swi faneleke swi va ha yona, hikuva Bibele yi vula leswaku “wanuna u ta siya tata wakwe ni mana wakwe.” (Genesa 2:24) Swi tano ni hi wansati.

Siku leri n’wana a humaka muti ha rona, vatswari vo tala va tsaka va tlhela va va ni gome. Va tivutisa, ‘Xana ndzi n’wi kurise hi ndlela leyi faneleke?’ ‘Xana u ta swi kota ku hlayisa ntirho, ndhawu yo tshama ni ku tirhisa mali hi vutlhari?’ Va tlhela va tivutisa xivutiso xin’wana xa nkoka, ‘Xana u ta swi kota ku hanya hi milawu leyi hi n’wi dyondziseke yona?’—Swivuriso 22:6; 2 Timotiya 3:15.

Xalamuka! leyi yo hlawuleka yi ta kombisa ndlela leyi Bibele yi nga va pfunaka ha yona vatswari loko vana va vona va ri karhi va kula.