Goza Ro Sungula

Lava Switsundzuxo Leswinene

Ha yini goza leri ri ri ra risima? Loko vatswari va ha ku kuma n’wana, va tsaka ngopfu kambe hi nkarhi lowu fanaka va karhateka. Brett, tatana la tshamaka eBritain u ri: “A ndzi tsake ngopfu kambe a a ku ri ni lexi xi ndzi vilerisaka. A ndzi swi vona leswaku ndzi ta va ni vutihlamuleri lebyikulu naswona a a ndzi tivona ndzi nga faneleki ku va tatana.” Monica, manana la tshamaka eArgentina, u ri: “A ndzi karhatekile, ndzi nga tivi loko ndzi ta swi kota ku khathalela xinhwanyetana xa mina. Ndzi ti vutisile ndzi ku, ‘Xana ndzi ta swi kota ku xi kurisa kahle?’”

Xana wa wu twisisa ntsako ni ku karhateka loku twiwaka hi vatswari? Swi lo dla, leswaku ku kurisa n’wana a hi matlangwana kambe swa vuyerisa. Hilaha tatana un’wana a vuleke hakona a ku, “leswi vumba byi tirhiwaka bya ha tsakama ni n’wana u leteriwa a ha ri ntsongo.” Leswi vatswari va nga ni ntirho lowukulu wo endla leswaku vana va vona va va ni rihanyo lerinene ni ku tshama va tsakile, u nga ha titwa u lava xitsundzuxo xo karhi leswaku u va mutswari lonene.

Xiphiqo lexi nga kona: Swi vonaka onge munhu un’wana ni un’wana u ni xitsundzuxo xo karhi malunghana ni ndlela yo kurisa vana. Khale, vatswari lavantshwa a va landzela xikombiso xa vatswari va vona kumbe nkongomiso wa vukhongeri bya vona. Kambe, ematikweni yo tala, mindyangu ya hohloka naswona vanhu a va ha ri na mhaka ni vukhongeri. Hikwalaho ka sweswo, vatswari vo tala va lava switsundzuxo eka vatshila lava nyikelaka switsundzuxo. Switsundzuxo swin’wana swa vatshila lava swi sekeriwe eka milawu leyi twisisekaka. Eswiyin’weni swin’wana, switsundzuxo swa vatshila swa kanetana naswona hi ku famba ka nkarhi swi hundzeriwa hi nkarhi.

Ntlhantlho: Lava xitsundzuxo xa Munhu un’we loyi a nga ni vutivi hi ta ku kurisa vana—ku nga Yehovha Xikwembu Mutumbuluxi wa vanhu. (Mintirho 17:26-28) Rito ra Yena, ku nga Bibele, ri tamele switsundzuxo leswinene ni swikombiso leswi pfunaka leswi nga ku pfunaka ku va mutswari lonene. U tshembisa a ku: “Ndzi ta ku tsundzuxa ndzi veke tihlo ra mina ri ri ehenhla ka wena.”—Pisalema 32:8.

Hi xihi xitsundzuxo lexi Xikwembu xi xi nyikaka vatswari lexi nga va pfunaka ku kurisa vana kahle?

[Nkomiso eka tluka 3]

“Tshemba Yehovha hi mbilu ya wena hinkwayo naswona u nga titshegi hi ku twisisa ka wena n’wini.”—Swivuriso 3:5