Ndlela Yo Nyikela Xitsundzuxo

1. I mani loyi a faneleke a nyika switsundzuxo? Hlamusela.

XANA wa swi rhandza ku nyika van’wana switsundzuxo? Van’wana va swi rhandza kasi van’wana swa va tikela. Swi nga ri na mhaka leswaku u titwa njhani, mikarhi yin’wana hinkwerhu hi boheka ku nyika van’wana switsundzuxo. Hikwalahokayini? Hikuva Yesu u vule leswaku valandzeri vakwe va ntiyiso a va ta tiviwa hi rirhandzu leri va kombanaka rona. (Yoh. 13:35) Ndlela yin’wana leyi hi kombisaka rirhandzu rero hayona, i ku va hi nyika vamakwerhu ndzayo loko swi laveka. Rito ra Xikwembu ri vula leswaku “vunghana lebyi tsakisaka” byi va kona kumbe bya kula hikwalaho ka “ndzayo leyi humaka embilwini.”—Swiv. 27:9.

2. Vakulu va fanele va kota ku endla yini naswona hikwalahokayini? (Nakambe vona bokisi leri nge, “Ndzayo Leyi Hi Yi Kumaka Eka Tinhlengeletano Ta Le Xikarhi Ka Vhiki.”)

² Hi ku tirhisa Yesu, Yehovha u hlawule vakulu leswaku va risa vandlha hikwalaho i swa nkoka leswaku va va ni vuswikoti byo nyikela ndzayo leyi nga ta pfuna vamakwerhu. (1 Pet. 5:​2, 3) Ndlela yin’wana leyi va risaka vandlha hayona i ku nyikela ndzayo leyi humaka eBibeleni loko va nyikela mimbulavulo evandlheni. Va fanele va tlhela va tshinya nyimpfu ha yin’we ku katsa ni leti hambukeke entlhambini. I yini leswi nga pfunaka vakulu ku katsa na hina hinkwerhu leswaku hi nyikela switsundzuxo leswi pfunaka?

3. (a) I yini leswi nga hi pfunaka leswaku hi va vatsundzuxi lavanene? (Esaya 9:6; nakambe vona bokisi leri nge, “Tekelela Yesu Loko U Tsundzuxa Van’wana.”) (b) Hi ta bula hi yini eka nhlokomhaka leyi?

³ Hi nga dyondza swo tala hi ndlela leyi hi nga vaka vatsundzuxi lavanene loko hi dyondza hi swikombiso swa vanhu va le Bibeleni, ngopfungopfu xa Yesu. Phela Yesu u vuriwa “Mutsundzuxi Lonene.” (Hlaya Esaya 9:6.) Eka nhlokomhaka leyi, hi ta kambisisa leswi hi nga swi endlaka loko munhu a hi kombele leswaku hi n’wi nyika xitsundzuxo ni leswi hi nga swi endlaka loko hi fanele hi tshinya munhu loyi a nga hi kombelangiki. Hi ta tlhela hi kambisisa leswaku hikwalahokayini swi ri swa nkoka ku nyika munhu xitsundzuxo hi nkarhi ni hi ndlela leyinene.

LOKO HI KOMBERIWE KU NYIKELA XITSUNDZUXO

4-5. Hi xihi xivutiso lexi hi faneleke hi tivutisa xona loko un’wana a hi kombela leswaku hi n’wi nyika xitsundzuxo? Nyika xikombiso.

⁴ Hi fanele hi endla yini loko un’wana a hi kombela leswaku hi n’wi nyika xitsundzuxo? Swi nga hi tsakisa leswi a hi kombeleke ivi hi lava ku hatla hi n’wi hlamula. Kambe loko hi nga si n’wi nyika xitsundzuxo, hi fanele hi rhanga hi tivutisa leswi, ‘Xana ndza faneleka ku nyikela xitsundzuxo emhakeni leyi?’ Mikarhi yin’wana, ndlela leyinene yo n’wi pfuna i ku va hi nga n’wi nyiki xitsundzuxo kambe hi n’wi byela leswaku a ya eka vanhu lava fanelekaka ku n’wi pfuna emhakeni yoleyo.

⁵ Ehleketa hi xikombiso lexi. A hi nge munghana wa wena wa vabya swinene ivi a ku byela leswaku u endle ndzavisiso mayelana ni vutshunguri lebyi nga n’wi pfunaka. Kutani u ku kombela leswaku u n’wi pfuna ku hlawula vutshunguri lebyi u vonaka byi antswa. Swi nga endleka u vona ku ri ni vutshunguri byo antswa kambe a wu leteriwanga eka swa vutshunguri. Eka xiyimo xo tano, ndlela leyinene leyi u nga pfunaka munghana wa wena hayona i ku n’wi pfuna a kuma munhu loyi a fanelekaka ku n’wi pfuna.

6. Hikwalahokayini hi fanele hi rhanga hi yimanyana hi nga si nyikela xitsundzuxo?

⁶ Hambiloko hi vona onge ha faneleka ku nyika xitsundzuxo emhakeni yo karhi, hi nga hlawula ku yimanyana hi nga si nyika munhu loyi a hi kombeleke xitsundzuxo. Hikwalahokayini? Swivuriso 15:28 yi vula leswaku ‘lowo lulama wa anakanyisisa a nga si hlamula.’ Hambiloko hi vona onge ha yi tiva nhlamulo, hi nga tinyika nkarhi wo endla ndzavisiso, wo khongela ni wo anakanyisisa. Loko hi endla tano, hi nga tiyiseka leswaku hi nyikela xitsundzuxo lexi Yehovha a lavaka leswaku hi xi nyikela. Xiya leswi endlekeleke muprofeta Nathani.

7. U dyondza yini eka xikombiso xa muprofeta Nathani?

⁷ Hosi Davhida u byele muprofeta Nathani leswaku u lava ku akela Yehovha tempele. Hi ku hatlisa Nathani u n’wi byele leswaku a endla tano. Kambe hikwalahokayini Nathani a a fanele a rhanga a twa vonelo ra Yehovha emhakeni leyi? Hikuva Yehovha a a nga swi lavi leswaku Davhida a aka tempele yoleyo. (1 Tikr. 17:​1-4) Eka mhaka leyi, hi dyondza leswaku loko hi komberiwe ku nyika xitsundzuxo ku ta va ku ri vutlhari ku “hlwela ku vulavula.”—Yak. 1:19.

8. Hi xihi xivangelo xin’wana lexi faneleke xi hi endla hi anakanyisisa hi nga si nyika munhu xitsundzuxo?

⁸ Hi lexi xivangelo xin’wana lexi endlaka hi fanele hi tivonela loko hi nyika munhu xitsundzuxo. Hi nga va na nandzu loko hi nyika munhu xitsundzuxo lexi nga ta endla a teka xiboho lexi nga ta va ni vuyelo byo biha. Swi le rivaleni leswaku i swa nkoka ku ehleketisisa hi nga si nyika munhu xitsundzuxo.

LOKO VAKULU VA TSHINYA MUNHU LOYI A NGA VA KOMBELANGIKI

9. I yini leswi vakulu va faneleke va tiyiseka ha swona va nga si nyikela ndzayo? (Vagalatiya 6:1)

⁹ Nkarhi ni nkarhi, vakulu va fanele va va vo rhanga ku nyika makwerhu loyi a tekeke “goza leri hoxeke” ndzayo. (Hlaya Vagalatiya 6:1.) Swi nga endleka munhu a ri eku endleni ka swiboho leswi nga riki swinene leswi hi ku famba ka nkarhi swi nga ta endla leswaku a endla xidyoho lexikulu. Hikwalaho, xikongomelo xa vakulu i ku n’wi pfuna leswaku a tshama endleleni leyi yisaka evuton’wini lebyi nga heriki. (Yak. 5:​19, 20) Hambiswiritano, leswaku ndzayo ya vona yi kota ku n’wi fikelela mbilu, vakulu va fanele va rhanga va tiyiseka leswaku hakunene munhu yoloye u teke goza leri hoxeke. Phela Yehovha u hi nyike mfanelo yo tiendlela swiboho hi ku ya hi ripfalo ra hina. (Rhom. 14:​1-4) Kambe ku vuriwa yini loko hakunene makwerhu a teke goza leri hoxeke naswona vakulu va teka xiboho xo n’wi nyika ndzayo a nga va kombelanga?

10-12. Vakulu va fanele va endla yini loko va nyikela ndzayo va nga komberiwanga? Kombisa. (Nakambe vona swifaniso.)

¹⁰ Hi wihi ntlhontlho lowu vakulu lava nyikelaka ndzayo va nga komberiwanga va langutanaka na wona? Muapostola Pawulo u vule leswaku munhu a nga teka goza leri hoxeke a nga swi xiyi. Kutani vakulu va fanele va rhanga va endla swo karhi leswaku munhu yoloye a kota ku amukela ndzayo.

¹¹ Ku nyika munhu ndzayo a nga yi kombelanga swi nga ha fana ni ku byala mbewu emisaveni leyi omeke. Loko murimi a nga si byala, u rhanga a rima misava. Sweswo swi endla leswaku mbewu yi kota ku byaleka. Endzhaku wa yi byala ivi a yi cheleta leswaku yi ta kula. Hilaha ku fanaka, nkulu u endla tano a nga si nyika munhu ndzayo. Hi xikombiso, u hlawula nkarhi lowunene wo vulavula na yena ni ku tlhela a n’wi tiyisekisa leswaku wa n’wi rhandza. Loko nkulu yoloye a dume hi ku va ni rirhandzu ni musa, swi ta n’wi olovela makwerhu ku amukela ndzayo yakwe.

¹² Loko va ri karhi va bula, nkulu a nga endla leswaku swi n’wi olovela makwerhu ku amukela ndzayo hi ku n’wi byela leswaku hinkwerhu ha swi endla swihoxo naswona nkarhi na nkarhi ha yi lava ndzayo. (Rhom. 3:23) Hi rito ro rhula, nkulu u ta n’wi komba ku suka eMatsalweni ndlela leyi a tekeke goza leri hoxeke hayona kambe a ri karhi a n’wi xixima. Loko se makwerhu a xi vona xihoxo xakwe, nkulu “u ta byala mbewu” hi ku n’wi byela leswi a faneleke a swi endla leswaku a lulamisa xiyimo xexo. Xo hetelela, nkulu u “cheleta” mbewu hi ku va a n’wi bumabumela ni ku tlhela a khongela na yena.—Yak. 5:15.

13. Vakulu va nga tiyiseka njhani leswaku munhu loyi a nyikiweke ndzayo wa yi twisisa?

¹³ Mikarhi yin’wana, leswi nkulu a swi vulaka swa hambana ni leswi loyi a nyikiwaka ndzayo a swi twaka. Vakulu va nga endla yini leswaku va tiyiseka ku leswi va swi vuleke swi twisisiwe kahle? Hi ndlela leyi xiximekaka va nga vutisa swivutiso hi vutlhari. (Ekl. 12:11) Tinhlamulo leti va nga ta ti kuma hi tona ti nga ta va pfuna va tiyiseka loko a yi twisise kahle ndzayo leyi a nyikiweke yona.

KU NYIKELA NDZAYO HI NKARHI NI HI NDLELA LEYINENE

14. Hikwalahokayini hi nga fanelanga hi tshinya van’wana hi kwatile? Hlamusela.

¹⁴ Leswi hinkwerhu hi endlaka swihoxo, mikarhi yin’wana hi ta endla kumbe ku vula swilo leswi nga khunguvanyisaka van’wana. (Kol. 3:13) Rito ra Xikwembu ri vula leswaku mikarhi yin’wana hi nga endla leswaku van’wana va kariha. (Efe. 4:26) Kambe hikwalahokayini hi fanele hi papalata ku nyikela ndzayo hi kwatile? “Hikuva ku hlundzuka ka munhu a ku n’wi endli a endla swo lulama eka Xikwembu.” (Yak. 1:20) Loko ho tshinya munhu hi kwatile, hi nga nyanyisa xiyimo. Leswi a swi vuli swona leswaku a hi fanelanga hi kwatela lava hi hlundzukiseke. Hambiswiritano, hi ta kota ku vulavula kahle loko se hi nga ha hlundzukanga. Xiya leswi hi nga swi dyondzaka eka Elihu loyi a tshinyeke Yobo hi ndlela leyinene.

15. Hi dyondza yini eka xikombiso xa Elihu? (Nakambe vona xifaniso.)

¹⁵ Elihu u hete masiku yo hlayanyana a ri karhi a twa Yobo a tiyimelela eka swihehlo leswi a a hehliwa hi swona hi vachaveleri vakwe va mavunwa. Hambileswi a a n’wi twela vusiwana Yobo, Elihu u tlhele a n’wi hlundzukela hileswi a hembeleke Yehovha ni leswi a a tivona a lulame ngopfu. Hambiswiritano, Elihu u yimele nkarhi wakwe wo vulavula ni ku tlhela a tshinya Yobo hi ndlela leyinene ni hi ya xichavo. (Yobo 32:2; 33:​1-7) Hi dyondza dyondzo ya nkoka eka Elihu ya leswaku ndzayo leyinene hi leyi nyikeriweke hi nkarhi ni hi ndlela leyinene laha munhu a salaka a titwa a xiximeka ni ku rhandziwa.—Ekl. 3:​1, 7.

YANA EMAHLWENI U NYIKA NI KU AMUKELA NDZAYO

16. U dyondza yini eka Pisalema 32:8?

¹⁶ Tsalwa ra nhlokomhaka leyi ri vula leswaku ‘Yehovha u hi tsundzuxa a hi veke tihlo.’ (Hlaya Pisalema 32:8.) Leswi swi kombisa leswaku a nga tshiki ku hi seketela. U hi nyika switsundzuxo a tlhela a hi pfuna ku swi tirhisa. Hakunene Yehovha u hi vekela xikombiso lexi hi faneleke hi xi tekelela. Loko hi fanele hi nyika van’wana switsundzuxo, a hi va khutazeni ni ku tlhela hi va pfuna leswaku va endla swiboho leswinene.

17. Loko vakulu va nyika ndzayo leyi kongomeke ya le Bibeleni, va kombisa leswaku va fana na yini? Hlamusela. (Esaya 32:​1, 2)

¹⁷ I swa nkoka ngopfu sweswi ku nyika ni ku amukela switsundzuxo leswinene. (2 Tim. 3:1) Vakulu lava nyikaka ndzayo leyi kongomeke ya le Bibeleni va fana ni “swinambyana etikweni leri nga riki na mati.” (Hlaya Esaya 32:​1, 2.) Vanghana lava tivaka leswi hi lavaka ku swi twa kambe va hi byela leswi hi faneleke hi swi twa, va hi nyika nyiko ya risima ku fana ni “maapula ya nsuku lama nga eka swibya swa silivhere.” (Swiv. 25:11) Onge hinkwerhu hi nga ya emahlweni hi tikarhatela ku va ni vutlhari byo kota ku nyika ni ku amukela switsundzuxo leswinene.