Ku Ta Cinca Yini?

“Tiko a ri nge tlakuseli tiko rin’wana banga.”

“Ku hava munhu la tshamaka kona la nga ta ku: ‘Ndza vabya.’”

“Rifu a ri nge he vi kona.”

SWITSHEMBISO leswi nga laha henhla swi nga ha twala swi ri ntsheketo. Kambe hi nga tiyiseka leswaku a hi ntsheketo. Ha yini? Hikuva switshembiso leswi a swi humi eka van’watipolitiki lava nga riki na matimba yo cinca misava. Kambe swi huma eBibeleni.a

Vanhu vo tala va tibyela leswaku Bibele i buku ya khale leyi nga riki ya nkoka eminkarhini ya hina. Xana na wena u titwa hi ndlela yoleyo? Loko swi ri tano, ha yini u nga tinyiki nkarhi wo kambisisa leswi yi swi vulaka? Ntiyiso hileswaku Bibele hi yona ntsena buku yo kwetsima leyi boxaka laha matimu ya vanhu ma sunguleke kona. Yi hlamusela leswi landzelaka:

● Leswi endleke leswaku vanhu va weriwa hi maxangu.—Varhoma 5:12.

● Ndlela leyi Xikwembu xi nga ta va kutsula ha yona vanhu.—Yohane 3:16.

● Xivangelo xo va tihulumendhe ti tsandzeka ku cinca misava.—Yeremiya 10:23.

● Xivangelo xo va hi tshemba xitshembiso xa Xikwembu.—Yoxuwa 23:14.

Xana hakunene Xikwembu xi ta herisa ndlala, tinyimpi, vuvabyi ni rifu? Sweswo swa olova ku swi tshemba, ntsena loko u pfumela leswaku:

1. Hi vumbiwe hi Xikwembu.

2. Xa khathala hi hina.

3. Xi ni matimba yo cinca misava.

4. Xikongomelo xa xona i ku cinca misava.

Xana ku ni swivangelo swo tshemba tinhla leta mune? Timbhoni ta Yehovha leti kandziyiseke magazini lowu, ti lava leswaku u titwela hi ta wena hi ku va ni dyondzo ya Bibele.

Swi nga ha endleka leswaku u na yona Bibele, kambe a wu yi hlayi nkarhi na nkarhi kumbe a wu hlayi. Vanhu vo tala lava va yi hlayaka va vula leswaku swa tika ku yi twisisa. Loko swi ri tano ni le ka wena, hi kombela leswaku u tihlanganisa ni Timbhoni ta Yehovha malunghana ni dyondzo ya mahala ya le kaya ya Bibele. Timiliyoni ta vanhu emisaveni hinkwayo ti karhi ta vuyeriwa hi dyondzo leyi. Yi endlisiwa ku yini?

Vhiki rin’wana ni rin’wana Mbhoni yin’we ya Yehovha kumbe timbirhi ti nga ku endzela ekaya ka wena kumbe kun’wana laha u kumekaka kona leswaku ti ta bula na wena hi Bibele. Dyondzo leyi ya Bibele yi ta ku pfuna ku kuma tinhlamulo ta swivutiso swo tanihi leswi nge, Ha yini hi xaniseka? Ha yini tihulumendhe ta vanhu ti tsandzeka ku cinca misava? I yini Mfumo wa Xikwembu naswona wu ta swi hetisisa njhani leswi tihulumendhe ta vanhu ti tsandzekaka ku swi endla?b

Leswaku u kuma rungula leri engetelekeke malunghana ni ndlela leyi u nga vuyeriwaka ha yona eka dyondzo ya mahala ya le kaya ya Bibele, tihlanganise ni Timbhoni ta Yehovha ta laha u tshamaka kona kumbe u nghena eka Web site ya www.jw.org. U nga ha tlhela u ti tsalela hi ku tirhisa adirese leyi faneleke eka leti longoloxiweke eka tluka 5 ra magazini lowu.

[Tinhlamuselo ta le hansi]