Kombela Mpfuno

Ku va ni vanhu lava ku pfunaka a hi swa nkoka loko wa ha nghena xikolo ntsena kambe niloko se u kurile.

I VAMANI lava nga ku pfunaka loko u ri karhi u tikarhatela ku humelela exikolweni?

I ndyangu wa ka n’wina.

Bruna, nhwanyana un’wana loyi a nga ni malembe ya 18 wa le Brazil u ri: “Loko ndzi lava mpfuno hi ntirho-kaya, tatana a a ndzi hlamusela wona ni ku ndzi vutisa swivutiso leswi ndzi pfunaka ku kuma tinhlamulo. Kambe a a ndzi tshika ndzi tikumela tinhlamulo hi ndzexe.”a

Xitsundzuxo: Rhanga hi ku vutisa mutswari wa wena leswaku dyondzo leyi ku tikelaka a a yi twisisa njhani loko a ha nghena xikolo. Loko ku ri leswaku a a yi twisisa kahle, a nga faneleka kahle ku ku pfuna.

Vadyondzisi.

Vadyondzisi vo tala va tsaka ku tiva leswaku swichudeni swa vona swi swi lava hi mbilu hinkwayo ku pasa naswona va nga swi tsakela ku ku pfuna.

Xitsundzuxo: Namba u byela mudyondzisi wa wena u ku, “Dyondzo leyi ya ndzi tikela kambe ndza swi lava ku yi twisisa. Ndzi fanele ndzi endla yini?”

Vatsundzuxi.

Kumbexana munhu loyi a nga munghana wa ndyangu wa ka n’wina a nga ku pfuna. Sweswo swi nga ku vuyerisa hi tindlela timbirhi: Yo sungula, u ta kuma mpfuno lowu u wu lavaka; naswona ya vumbirhi, u ta dyondza leswaku u nga kombela mpfuno eka van’wana loko swi fanerile, ku nga mukhuva lowu nga ta ku vuyerisa loko se u kurile. Ntiyiso wa mhaka hileswaku vanhu va kota ku humelela emintirhweni yo tala hileswi va pfuniwaka hi van’wana, ku nga ri hileswi va tirhaka va ri voxe.—Swivuriso 15:22.

Xitsundzuxo: Vutisa vatswari va wena leswaku i mani loyi a nga vaka mutsundzuxi wa wena.

Makumu ya mhaka: A swi bihanga ku kombela mpfuno!

Ha yini u nga sunguli sweswi? Tsala mavito ya vanhu vambirhi kumbe vanharhu lava nga swikombiso leswinene eka wena. Xana u kona exikarhi ka vona loyi a nga swi kotaka ku ku pfuna hi ntirho wa wena wa xikolo?

a Buti kumbe sesi wa wena a nga ha ku pfuna na yena.

“Mudyondzisi loyi ndzi n’wi rhandzaka”

“Mudyondzisi wa mina loyi ndzi n’wi rhandzaka a a tiyisa voko kambe swichudeni hinkwaswo a swi n’wi xixima. A a hiseka, a tshukatshukisa miri ni ku famba-famba etlilasini loko a ri karhi a dyondzisa. A a endla leswaku swichudeni hinkwaswo swi nyikela mavonelo ya swona loko ku tlhuvutsiwa mhaka yo karhi. Loko u nga yi twisisi yinhla yo karhi, a a ku lehisela mbilu a ku hlamusela yona kukondza u yi twisisa. A a tshamela ku hi byela leswaku u lunghekele ku hlamula xivutiso xin’wana ni xin’wana lexi hi nga na xona. U vule leswaku swivutiso swa hina a swi n’wi pfuni ku xiya swilo leswi hi nga swi twisisiki ntsena, kambe swi tlhela swi n’wi pfuna leswaku a va mudyondzisi loyi a nga ni vutshila. A a khathala swinene hi un’wana ni un’wana wa hina. Endzhaku ko dyondzisiwa hi yena lembe rin’we ntsena, swichudeni swo tala swi hlawule ku endla dyondzo ya swa timali (accounting), ku nga dyondzo leyi a a yi dyondzisa.”—Alana wa le Australia.