Xana Ku Tixixima Swi Helele Kwihi?

HIKWALAHOKAYINI SWI RI SWA NKOKA KU TIXIXIMA

Vanhu lava va tixiximaka va nga langutana ni swiphiqo hi ndlela leyinene. A va heli matimba hi ku olova.

Ndzavisiso wu kombisa leswaku vanhu lava nga tixiximiki mikarhi yo tala va vilela, va va ni ntshikilelo wa mianakanyo ni ku nga dyi kahle. Naswona va tala ku nwa ngopfu ni ku tirhisa tidrugs.
Vanhu lava tixiximaka va papalata ku tiringanisa ni vanhu van’wana, sweswo swi endla swi va olovela ku hanyisana ni vanhu ni ku aka xinghana lexi tiyeke. Loko hi hala tlhelo, vanhu lava nga tixiximiki va rhandza ku xopaxopa leswi endlaka leswaku va nga vi ni vuxaka lebyinene ni vanhu van’wana.
Hambi vo langutana ni mitlhontlho, vanhu lava tixiximaka va tiyisela; a va pfumeli leswi humeleleke enkarhini lowu nga hundza swi va sivela ku fikelela leswi va swi navelaka. Loko hi hala tlhelo, vanhu lava nga tixiximiki va teka swiphiqo switsongo ku ri nchumu lowukulu hambiloko swi nga nyawuli. Sweswo swi nga va heta matimba hi ku hatlisa.

LESWI U NGA SWI ENDLAKA

Hlawula vanghana lava nga ta ku aka. Hlawula vanghana lava ku xiximaka, lava khathalaka hi rihanyo ra wena ni lava nga ta ku aka.

“Munghana wa ntiyiso u kombisa rirhandzu mikarhi hinkwayo, i makwenu wa ntiyiso loko u ri emaxangwini.”—Swivuriso 17:17.

Pfuna van’wana. Loko u khathala hi van’wana u tlhela u va endlela leswinene, ku katsa ni lava nga swi kotiki ku endla leswi fanaka eka wena, u ta kuma ntsako wa xiviri lowu tisiwaka hi ku nyika. Swi ta va tano hambiloko swi tikomba onge van’wana a va yi voni mitirho leyinene leyi u yi endlaka.

“Ku nyika swi tisa ntsako lowukulu ku tlula ku amukela.”—Mitirho 20:35.

Pfuna vana va wena va tikarhatela ku tixixima. Ndlela yo endla sweswo i ku va pfumelela va ti tlhantlhela swiphiqo swa vona hi ndlela leyi va yi fikelelaka. Sweswo swi dyondzisa vana ku langutana ni mitlhontlho ni ku yi hlula. Swi ta endla va tixixima naswona swi ta va pfuna ni loko se va kurile.

“Letela mufana endleleni leyi a faneleke a famba ha yona; hambiloko a kurile a nge yi tshiki.”—Swivuriso 22:6, nhlamuselo ya le hansi.

Un’wana wa Timbhoni Ta Yehovha a ri karhi a dyondza Bibele ni wansati un’wana exitolo xa kofi.

LESWI TIMBHONI TA YEHOVHA TI SWI ENDLAKA

Tinhlengeletano ni ku dyondza Bibele ni Timbhoni Ta Yehovha swi pfuna vanhu ku antswisa vutomi bya vona ni ku tixixima.

TINHLENGELETANO TA HINA TA VHIKI NI VHIKI

Eka tinhlengeletano ta hina ta vhiki ni vhiki, hi tiphina hi ku yingisela mimbulavulo leyi humaka eBibeleni leyi mikarhi yo tala yi dyondzisaka ku tixixima. Etinhlengeletanwini ta hina hi amukela un’wana ni un’wana naswona ku ngheniwa mahala. Hi xikombiso, etinhlengeletanwini ta hina u ta dyondza . . .

leswaku hikwalahokayini u ri wa nkoka eka Xikwembu
ndlela yo kuma xikongomelo xa vutomi
ndlela yo aka vuxaka lebyi tiyeke ni van’wana

U ta tlhela u kuma vanghana va ntiyiso lava ‘hlayisanaka.’—1 Vakorinto 12:25, 26

Leswaku u dyondza leswi engetelekeke hi tinhlengeletano ta hina, secha vhidiyo yo koma eka jw.org, leyi nga ni nhlokomhaka leyi nge Ku Endliwa Yini Eholweni Ya Mfumo?

DYONDZO YA HINA YA BIBELE

Hi dyondza na vanhu Bibele mahala hi ku tirhisa buku leyi nge Tiphine Hi Vutomi Hilaha Ku Nga Heriki! Buku leyi yi ni matsalwa, tinhlamuselo leti twisisekaka, swivutiso, tivhidiyo leti khutazaka ni swifaniso swo xonga. Dyondzo ya hina ya Bibele yi pfuna vanhu leswaku va tixixima ni ku antswisa vutomi bya vona.

Leswaku u vona ndlela leyi ku dyondza Bibele swi nga ku vuyerisaka hayona secha vhidiyo yo koma eka jw.org, leyi nge Ha yini U Fanele U Dyondza Bibele?