Ku Humesa Tibuku Ta Bibele To Dzunisa Xikwembu

Timbhoni ta Yehova ti tiveka swinene hikwalaho ka ku chumayela ka tona ka Mfumo wa Xikwembu hi ku tirhisa tibuku. Ku sukela hi 1920 Sosayiti ya Watch Tower yi tirhisile vatirhi vo tirhandzela lava humaka exikarhi ka Timbhoni ku humesa timagazini na tibuku leswaku ti hangalasiwa. Loku ku vile ku tiyisa ku humesiwa ka tibuku loku tshembekaka hi nxavo wa le hansi.

Hi malembe lama nga vaka 60, Sosayiti yi vumbeterile ni ku andzisa ku humesa ka yona ka tibuku ta Bibele, ku sungula eBrooklyn ivi ku landza matiko man’wana. Ntirho hinkwawo wu endliwile hi vatirhi vo tirhandzela lava engetelekaka.

Eku heleni ka va-1970 mukhuva wa rixaka wo lunghiselela ni ku gandlisa matsalwa a wu ri karhi wu tshuriwa hi ku tirhisa maendlelo ya tikhomphyutara, ku hisa swifaniso ni ku tsala hi offset. Xiphiqo laha a ku ri leswaku switirho leswi hluvukeke leswi a swi ri kona a swi kota ku tirha nhlayo leyi hikiweke ntsena ya tindzimi. Kambe, Sosayiti ana se a yi ri karhi yi humesa tibuku hi tindzimi leti nga vaka 160, naswona a ku ri na xilaveko xa tin’wana to tala.

Kutani vatirhi vo tirhandzela va vitaniwile ku ta tshula endlelo ra tielektroni ro thayipa tindzimi to tala. Vuyelo byi vile lebyi tsakisaka. Ku ringeta loku a ku laveka ku katekile, naswona endlelo ro nghenisa marungula, swifaniso ni ku thayipa, loku vitaniwaka MEPS, ri tshuriwile. Rona ri nga humesa tindzimi leti nga vaka 200. Ku nga ha engeteriwa tin’wana to tala.

Namuntlha ti-MEPS ni mabokisi ya kona, leswi endliweke hi Timbhoni ta Yehova, swi karhi swa tirhisiwa ematikweni ya 25, naswona swo tala swa karhi swa kunguhatiwa. Vatirhi vo tirhandzela vo huma ematikweni lawa va dyondzisiwe ku tirhisa ni ku hlayisa switirho leswi. Sosayiti sweswi yi humesa timagazini hi tindzimi leti tlulaka 100 ematikweni ya 36, naswona eka 5 wa matiko lawa ku tlhela ku humesiwa ni tibuku ni Tibibele.

Ku endla ntirho lowu swi lava vanhu—vatsari, vahundzuluxeri, vakambisisi, vagandlisi, vabohi va tibuku ni vatirhi lava rhumelaka swilo. Van’wana va fanele ku tamela mintirho ya mabandlha. Van’wana va lunghiselela swakudya, va basisa, va hlantswa ni swin’wana. Hinkwaswo leswi swi endliwa hi vatirhi vo tirhandzela lava tinyiketelaka va huma ematikweni lama hambaneke. Emisaveni hinkwayo hi 1985, a ku ri ni vatirhi vo tirhandzela va 8 438 lava tirhaka etihofisini, tifektri, emakaya ni le mapurasini lama hambaneke.

I vamani vanhu lava xana? I vavanuna ni vavasati, lava nga siki nghenaka evukatini ni lava ngheneleke vukati, lavantshwa ni lavakulu, hinkwavo va nga Timbhoni ta Yehova leti tinyiketeke. Van’wana va vile entirhweni lowu hi malembe ya 40, 50 hambi ku ri 60. Va heta nhlayo xikarhi ya maawara lama nga vaka 44 hi vhiki eswiavelweni swa vona, ni wun’wana nkarhi wo tlhandlekela loko swi laveka. Minkarhi ya madyambu ni mahelo-vhiki swi tirhiseriwa ku chumayela mahungu lamanene hi yindlu na yindlu, ni le mintirhweni yin’wana ya bandlha.

Emisaveni hinkwayo vatirhi lava va nyikiwa tiyindlu letinene ni swakudya eka yin’wana ya miako ya Sosayiti, leyi vitaniwaka Mindyangu ya Bethele. Tlhandla-kambirhi va kuma mali leyintsongo ya xipfuno yo hakelela swo famba evutirhelini bya vona ni ntsengo wuntsongo wa swilaveko swa munhu hi xiyexe.

Ku sukela hi 1920, vatirhi lava vo tirhandzela va humesile ku tlula tibiliyoni ta kaye ta Tibibele, tibuku, timagazini na swiphephana hi tindzimi leti nga vaka 200 leswaku swi hangalasiwa emisaveni hinkwayo. Va endla xiphemu xa vona leswaku mahungu lamanene lama nga riki na ku hela ma swi kota ku vuriwa tanihi “Evangeli” eka matiko ni tinxaka ni tindzimi ni vanhu vahi ni vahi.—Nhlavutelo 14:6, 7.

• I mintirho yihi yo gandlisa leyi Sosayiti ya Watch Tower yi nga na yona, naswona ha yini?

• I vamani lava endlaka ntirho lowu hinkwawo, naswona va hanyisa ku yini?

[Swifaniso leswi nga eka tluka 24]

Vatirhi va endla mintirho leyi fambelanaka ni ku humesiwa ka tibuku ta Bibele efektrini, ekaya, ehofisini na le purasini, eBrooklyn na le Wallkill, New York, U.S.A.

[Swifaniso leswi nga eka tluka 25]

Vatirhi va tirha mintirho leyi hambaneke leyi hi ku kongoma kumbe handle ko kongoma yi katsaka ku humesiwa ka Tibibele na tibuku ta Bibele

Spain

Jarimani

Finland

Canada

Denmark

Sweden

Afrika Dzonga

Brazil

Netherlands

Australia