Ndzima 8

Ku Hlanganyela Eku “Tsakeni” Ka “Hosana Ya Ku Rhula”

1. (a) Munhu un’wana u teke riendzo ro ya ekule hikwalaho ka xivangelo xihi? (b) I yini lexi vuriwaka eka xifaniso xa Yesu, hambi loko xi nga vuriwangi hi ku kongoma?

EXIFANISWENI xa Yesu xa titalenta, wanuna loyi a a ri na titalenta ta nhungu ta silver a nga tekanga riendzo ro ya ekule ntsena ku titsakisa tanihi loko ri ri riendzo ro vona tindzhawu. A a ri na xivangelo lexikulu xo teka riendzo ro ya ekule; a a navela ku kuma nchumu wa risima. U yile ekule, hi laha xifaniso xi kombisaka ha kona, ku kuma “ntsako” wun’wana, kun’we ni “swilo swo tala.” (Matewu 25:21) Xisweswo a a fanele ku teka riendzo ro leha, leri lavaka nkarhi wo leha, leswaku a ya kombela eka loyi a a ta n’wi nyika ntsako wolowo.

2. (a) Emhakeni ya Yesu, xana riendzo ro ya ekule ra wanuna wa mufuwi ri fanekisela yini, naswona a a ya eka mani? (b) Xana N’wini u vuye na yini?

² Tanihi leswi wanuna wa mufuwi exifanisweni a faniselaka Yesu Kriste, ku famba ka wanuna loyi a ya ekule swi fanisela ku famba ka Yesu a ya eka Xihlovo xin’we xa ntsako lowu hlawulekeke lowu a a ri na wona emiehleketweni. Kutani ke, u ye eka mani xana? Vaheveru 12:2 ya hi byela: “A hi languteni eka Yesu, musunguri ni muhetisisi wa ku pfumela ka hina, loyi a nga chavangiki ku byarha xihambano, a nga vuli nchumu hi tingana ta kona, hikwalaho ka ku tsaka loku vekiweke emahlweni ka yena; kutani sweswi ú tshamile evokweni ra xinene exiluvelweni xa Xikwembu.” Ina, hakunene, Yehova Xikwembu i Xihlovo xa ntsako wolowo. A ku ri eka yena laha Yesu a yeke kona, a siya vadyondzisiwa vakwe lava tshembekaka la misaveni a va nyikile “titalenta” ta yena. N’wini wa malandza u vuye na “swilo swo tala” leswi a a nga ri na swona loko a nyika malandza yakwe titalenta ta nhungu ta silver. Xifaniso xo sungula lexi nyikiweke hi Yesu, xifaniso xa “tipondho ta khume,” xi boxa leswaku leswi a vuyeke na swona a ku ri ‘matimba ya vuhosi.’—Luka 19:12-15.

3. A ku ri nkarhi wa muxaka muni loko Zakaria 9:9 yi sungula ku hetiseka hi lembe xidzana ro sungula C.E.?

³ Hi ku va ya ha ku vekiwa, hosi a yi fanela ku tsaka, na vona vafumiwa va yona lava tshembekaka. Hi tsundzuka loko N’wana wa Xikwembu a nghena eYerusalema a khandziyile mbhongolo ku hetisisa vuprofeta bya Zakaria 9:9. Malunghana ni ku hetiseka ka vuprofeta byebyo, ku tsariwile: “Kutani vanhu lavo tala va andlala tinguvu ta vona endleleni, van’wana va tshova switluka swa mirhi, va andlala endleleni. Mintshungu leyi n’wi rhangeleke emahlweni, ni leyi n’wi landzeke hi le ndzhaku, yi huwelela yi ku: ‘Hozana eka N’wana Davhida! A ku dzunisiwe la taka hi vito ra Hosi [Yehova]! Hozana ematilweni ya le henhla-henhla!’ Kute loko Yesu a nghenile Yerusalema, muti hinkwawo wu yima-yimeka, vanhu va ku: ‘Munhu loyi, i mani xana?’”—Matewu 21:4-10; nakambe vona Luka 19:36-38, Bibele ya Xitsonga.

4. Endzhaku ka ku vekiwa Hosi, hikwalaho ka yini Yesu Kriste a a ri na xisekelo lexi hlawulekeke xo rhambela “malandza” yakwe lama tshembekaka eku tsakeni?

⁴ Loko manuku, a ku ri xiendlakalo xa ntsako loko a titisile ntsena eka vaaki va Yerusalema tanihi loyi a totiweke hi moya wa Yehova leswaku a kuma vuhosi, a swi ta va njhani loko hakunene a vekiwe exiluvelweni tanihi Hosi eku heleni ka Minkarhi ya Vamatiko hi 1914? A ku ri xiendlakalo xa ntsako lowukulu eka yena. Kutani ke, hakunene, u nghenile entsakweni lowu a a nga si tshama a va na vona. Eku lunghiseni ka timhaka, kwalaho a a ta ku eka vadyondzisiwa lava a va avanyiseke va ri ‘lavanene ni vo tshembeka’: “U tshembekile eswilweni swi nga ri swingani, ndzi ta ku veka ku va mulanguteri wa leswo tala; nghena eku tsakeni ka n’wini wa wena.” (Matewu 25:21) Sweswi a ku ri na ntsako lowuntshwa lowu “malandza” yakwe lama nkhensiweke a ya ta hlanganyela eka wona. Mawaku hakelo leyonghasi!

5. (a) Muapostola Pawulo a a ri ‘muyimeri’ wa Kriste eka xiyimo xihi xa timhaka? (b) Kambe namuntlha masalela lama totiweke i “vayimeri” va Kriste endzhaku ka xiendlakalo xihi?

⁵ Hi 1919 vadyondzisiwa lava totiweke va Hosi leyi fumaka, Yesu Kriste, va nghene exiyin’weni lexi amukelekaka, kutani laha va nghenile va ri ni ntsako lowukulu ngopfu. Malembe xidzana ya khume-kaye emahlweninyana muapostola Pawulo u tsalele vapfumeri-kulobye a va byela hi xiyimo xa vona lexi tlakusiweke a ku: “Hikokwalaho, hi vayimeri va Kriste.” (2 Vakorinto 5:20) Sweswo swi tsariwile loko Yesu a ri mudyandzhaka loyi a nga ni ku langutela ko kuma “Mfumo wa matilo.” (Matewu 25:1) Kutani ke, a a fanele ku tshama evokweni ra xinene ra Xikwembu kwalaho a rindzela siku ro khangula. Kambe sweswi, ku sukela hi 1919, masalela lama amukeriweke ya vile “vayimeri” lava rhumiweke hi Loyi hakunene a fumaka tanihi Hosi. (Vaheveru 10:12, 13) Mhaka leyi kahle-kahle yi tisiwile emiehleketweni ya Swichudeni swa Bibele swa Matiko Hinkwawo entsombanweni wa Cedar Point, Ohio, hi 1922.

6. Matshalatshala ya le ndzhaku ka nyimpi ya lava va kumeke “titalenta” ku sungula a ya kongomisiwe eka ntirho wa muxaka muni?

⁶ Hi 1919 a va se va nyikiwile “titalenta” ta Hosi leyi fumaka, Yesu Kriste. Leswi swi kurise vutihlamuleri bya vona eka Hosi ya vona leyi fumaka. Ku sukela emasungulweni, matshalatshala ya vona ya le ndzhaku ka nyimpi a ya kongomisiwa eka ntirho wa ku “tshovela,” ku hlengeletiwa ka leswi a ku ri ntlawa wa “mavele.” (Matewu 13:24-30) Leswi, hi ku vula ka Yesu, ku tshovela ku nga “makumu ya mafambiselo ya swilo,” lembe leri landzeleke ku hela ka nyimpi ra 1919 a ku ri nkarhi lowu faneleke wa leswaku ku tshovela loku ka “vana va Mfumo” lava fanaka ni mavele, masalela lama totiweke lama tshembekaka, ku sungula.—Matewu 13:37-39.

7. (a) Hi le ka nkarhi wa muxaka muni laha vatshoveri va nghenaka ni N’wini wa vona? (b) Hi le ka xiyimo xihi laha Yehova a tiseke vatshoveri, naswona i mhaka yihi ya vuprofeta va yi hetisisaka?

⁷ Nkarhi wa ku tshovela i nkarhi wa ntsako eka vatshoveri, tanihi loko N’wini wa ku tshovela a tsakela nkarhi wolowo na vona. (Psalma 126:6) Nkarhi lowu wa ku tshovela wu fuwisiwile swinene hi vumbhoni lebyi tlhandlekelanaka bya leswaku Mfumo wa Xikwembu hi Yesu Kriste wu tlhomiwile ematilweni hi 1914 ni leswaku Yehova u pfuxetile xiyimo lexi lulameke eka vanhu vakwe lava tinyiketeke emisaveni. Tanihi ntlawa, va teka marito ya Esaya 61:10: “Ndzi ta titsakela eka Yehova, moya wa nga wu ta titsakela eka Xikwembu xa mina; hikuva xi ndzi ambexile tinguvu ta ku hlayiseka, xi ndzi funengetile hi nkumba wa ku lulama.”

Ku Hlengeleta “Ntshungu Lowukulu” Wa Lava Hlanganyelaka Eku “Tsakeni”

8. I ntsako muni lowu masalela lama totiweke a ma nga wu rindzelanga lowu a wu ta va wa vona eku heleni ka ku hlengeletiwa ka vadyandzhaka va Mfumo?

⁸ Nikantsongo masalela lama totiweke lama ngheneke eku “tsakeni” ka N’wini wa wona a ma swi xiyanga leswaku eku heleni ka ku hlengeletiwa ka swirho swo hetelela swa vadyandzhaka va Mfumo wa le matilweni a ku ta va ni ntsako wun’wana, nchumu lowu a wu nga ha rindzeriwanga. Loku a ku ta va ku hlengeletiwa ka ntlawa wa le misaveni lowu a wu ta hanya aParadeyisini emisaveni ehansi ka Mfumo wa Gidi ra Malembe wa Yesu Kriste. I vamani loko va nga ri vanhu lava humaka eka ntlawa lowu wa le misaveni lava a va ta va lava fanelekaka ku rhamberiwa eka leswi a swi ta va ku paluxiwa ko sungula ka vuxokoxoko lebyi yelanaka na wona?

9. I vamani lava a va rhambiwe hi ndlela yo hlawuleka leswaku va va kona eka ntsombano wa le Washington, D.C., hi 1935, naswona i vuxokoxoko byihi lebyi faneleke lebyi va pfuleriweke byona?

⁹ Kutani swi ve tano, hi ku amukela xirhambo lexi humesiweke eka Xihondzo xo Rindza,a magidi lama a ma lava vuxaka na Yehova, xikan’we ni vanhu va vito ra yena, va hlanganyele ntsombano-nkulu wa Timbhoni ta Yehova eWashington, D.C., hi May 30 ku ya eka June 2, 1935. Entsombanweni wolowo va tsakile swinene ku twa leswaku “ntshungu lowukulu” lowu vhumbiweke eka Nhlavutelo 7:9-17 a wu ta va ntlawa wa laha misaveni.

10, 11. Hi le ka vamani etilweni laha leswi a swi fanele swi tikombe wu ri nkarhi wa ntsako wo hlawuleka?

¹⁰ Mawaku ntsako lowukulu swonghasi lowu ku khomiwa ka ntsombano wolowo eWashington, D.C., ku faneleke ku vile na wona eka Xikwembu Lexi Tlakukeke, Yehova! I ntsako muni wonghasi nakambe lowu veke kona eka N’wana wa yena tanihi Murisi Lonene loyi sweswi a a ta sungula ku hlengeleta ‘tinyimpfu leti tin’wana’ eka “ntlhambi wun’we”!—Yohane 10:16.

¹¹ Loko swi ri karhi swi byisiwa swin’we ni ku yisiwa emadyelweni, hi ku fanekisela, swirho swa masalela ni “ntshungu” lowu kulaka wa “tinyimpfu tin’wana” swi hlangana kun’we hi ku rhula na hi rirhandzu. Mbilu ya “murisi un’we” wa swona yi fanele sweswi yi tala hi ntsako hi ku va ni “ntlhambi” wo kurisa sweswo ekusuhi ni ‘ku hela loku ka mafambiselo ya swilo.’

Varhumiwa Va “Hosana Ya Ku Rhula”

12, 13. (a) I vamani lava rhamberiweke ku hlanganyela ni masalela lama totiweke eka ntsako wa N’wini la vuyeke, naswona xivangelo xa leswi i yini? (b) “Ntshungu lowukulu” wa “tinyimpfu tin’wana” wu hetisisa ku rhandza ka “Hosana ya ku Rhula” eka swivandla swihi?

¹² Lava va fanaka ni tinyimpfu lava endlaka “ntshungu lowukulu” sweswi va hlanganyela swinene eka ntsako wa N’wini, Yesu Kriste. Leswi swi vangiwa ngopfu hi leswi va nga na xiphemu lexikulu eku tiseni ka lava lavekaka ku tatisa “ntshungu lowukulu,” lowu nhlayo ya wona yi nga nyikiwangiki eka Nhlavutelo 7:9.

¹³ Ntirho wo hlengeleta lowu “tinyimpfu tin’wana” ti hlanganyelaka eka wona wu andze ku fika eka mimpimo ya misava hinkwayo, ku tlula vuswikoti bya nhlayo leyi hungutekaka ya masalela lama totiweke ku wu endla. Kahle-kahle, swi ve leswi lavekaka swinene eka nhlayo leyi kulaka ya “tinyimpfu tin’wana” ku hlanganyela swinene eku tiseni ka “tinyimpfu tin’wana” leti engetelekeke leti nga ni ntshembo wa la misaveni. Xisweswo “tinyimpfu tin’wana” ti tirha tanihi varhumiwa lava tshembekaka va “Hosana ya ku Rhula.” Swivuriso 25:13 swa engetela: “Entsumi leyi tshembekeke ka lava yi rhumeke yi kotisa gamboko lero titimela enkarhini wa ku tshovela. Ri titimeta mbilu ya hosi yakwe.”

14. (a) Xana tinyimpfu to fanekisela ta xifaniso xa Yesu eka Matewu 25:31-46 ti amukela yini? (b) Xana Mfumo wu lunghiseleriwe vona “hi mpfhuka misava yi tumbuluka” hi ndlela yihi?

¹⁴ Eka xifaniso xa tinyimpfu ni timbuti, tinyimpfu to fanekisela hi lava Hosi Yesu Kriste a va byelaka a ku: “Tanani n’wina lava katekisiweke hi Tata wa mina, amukelani Mfumo lowu nga lunghiseleriwa n’wina hi mpfhuka misava yi tumbuluka.” (Matewu 25:31-46) Va va vadyandzhaka va xivandla xa le misaveni lexi Mfumo wa matilo wu nga ta xi fuma enkarhini wa ku fuma ka Kriste ka Gidi ra Malembe. Ku sukela enkarhini wa Avele la tshembekaka, Yehova a a ri karhi a lunghiselela xivandla lexi xa misava ya vanhu lava kutsulekaka.—Luka 11:50, 51.

15, 16. (a) I ku “twala” kwihi ka Hosi, tanihi loko ku hlamuseriwe hi Solomoni, loku N’wini a nga na kona namuntlha hikwalaho ka ku fuma ka yena exikarhi ka valala vakwe? (b) Hi le ka xivumbeko xihi laha Hosi leyi yi fumaka yi nga na ku “twala” loku namuntlha? (c) Xana lava va endlaka ku “twala” va endle yini?

¹⁵ Solomoni, Hosi leyi tlhariheke ya Israyele wa khale yi tsarile: “Ku twala ka hosi i ku tala ka vanhu.” (Swivuriso 14:28) N’wini la nga ni vuhosi wa namuntlha, Kriste Yesu, loyi a nga mulawuri la tlakukeke ku tlula Hosi Solomoni wa la misaveni, u na ku “twala” ko tano mayelana ni ku “tala ka vanhu.” Leswi i ntiyiso hambi ku ri sweswi a nga siki sungulaka vuhosi byakwe bya Gidi ra Malembe, ina, loko a fuma exikarhi ka valala vakwe va le misaveni, lava Sathana Diyavulosi a nga hosi ya vona leyi tlulaka vanhu leyi nga vonakiki.—Matewu 4:8, 9; Luka 4:5, 6.

¹⁶ Ku “twala” ka namuntlha loku fanelaka mulawuri la tlakukeke la nga hosi sweswi ku kumeka eka nhlayo leyi kulaka ya “tinyimpfu tin’wana” takwe leti endlaka “ntshungu lowukulu.” Hi ntsako va huwelela hi vun’we va ku: “Ku ponisiwa ku huma eka Xikwembu xa hina lexi tshameke exiluvelweni, ni le ka Xinyimpfana.” (Nhlavutelo 7:9, 10) Va se va kuma ku ponisiwa eka mafambiselo lama avanyisiweke ya swilo, lama Sathana Diyavulosi a nga “xikwembu” xa wona. (2 Vakorinto 4:4) Ana se, hi ku fanekisela, “va hlantswile tinguvu ta vona . . . hi ngati ya Xinyimpfana” kutani va tibasisile leswaku va vonaka va nga ri na xivati emahlweni ka Yehova Xikwembu, Muavanyisi.—Nhlavutelo 7:14.

17. (a) I ku ponisiwa kwihi loku “ntshungu lowukulu” wu ku languteleke? (b) I lunghelo rihi leri va nga ta ri tsakela hi nkarhi wa ku fuma ka Gidi ra Malembe ka “Hosana ya ku Rhula”?

¹⁷ Kambe va langute emahlweni eka ku ponisiwa loku lunghiseleriweke hi Xikwembu loku va nga ta va na kona eku hluleni lokukulu ka Yehova ‘eku lweni ka Xikwembu xa Matimba Hinkwawo hi siku lerikulu ra kona’ eArmagedoni. Ku hlula ka yena lokukulu kwalaho ku ta hetelela hi ku lweriwa ka Mfumo wa yena wa misava hinkwayo, naswona va ta va timbhoni ta la misaveni hikwalaho ka ku va va hlayisiwe va hanya eku heleni loku chavisaka ka misava leyo biha. (Nhlavutelo 16:14; 2 Petro 3:12) Mawaku lunghelo lero hlawuleka swonghasi! Mayana ntsako lowukulu swonghasi lowu manuku “Hosana ya ku Rhula” yi nga ta wu hlanganyela ni “ntshungu lowukulu” lowu ponaka wa “tinyimpfu tin’wana” ta yona leti tshembekaka!

[Nhlamuselo ya le hansi]

[Xifaniso lexi nga eka tluka 71]

Mbilu ya Murisi Lonene sweswi yi fanele yi tatiwe hi ntsako hi ku va ni “tinyimpfu tin’wana” to tala