Xana I Vamani?
I ku navela ka Timbhoni ta Yehova leswaku u tolovelana ku antswa na tona. U nga ha va u hlangane na tona tanihi vaakelani, vatirhi-kuloni kumbe etimhakeni tihi na tihi ta siku na siku ta vutomi. U nga ha va u va vone exitarateni va nyikela timagazini ta vona eka vahundzi va ndlela. Kumbe, u nga ha va u vulavulenyana na vona ekaya ka wena.
Entiyisweni, Timbhoni ta Yehova ta ku tsakela wena ni vuhlayiseki bya wena. Va lava ku va vanghana va wena ni ku ku byela swo tala ehenhleni ka vona, leswi va swi pfumelaka, nhlengeletano ya vona ni leswi va titwisaka swona hi vanhu ni misava leyi hinkwerhu hi hanyaka eka yona. Leswaku va hetisisa xikongomelo lexi va ku lunghiselele broxara leyi.
Hi tindlela to tala Timbhoni ta Yehova ti fana na mani na mani. Va na swiphiqo swa vona—swa ikhonomi, swa miri, ni swa mintlhaveko. Va swi endla swihoxo minkarhi yo tala, hikuva a va hetisekanga, kumbe ku huhuteriwa, kumbe ku pfumala xihoxo. Kambe va ringeta ku dyondzisiwa hi mintokoto ya vona ivi hi tinghitsi va dyondza Bibele leswaku va endla mindzulamiso leyi lavekaka. Va tinyiketele eka Xikwembu ku endla ku rhandza ka xona, naswona va tikarhata leswaku va hetisisa ku tinyiketela loku. Eka mintirho ya vona hinkwayo va lava vukongomisi lebyi humaka eRitweni ra Xikwembu ni moya wa xona lowo kwetsima.
I swa nkoka lowukulu eka vona leswaku leswi va swi pfumelaka swi va leswi seketeriwaka hi Bibele hayi hi mianakanyo ya vanhu kumbe milawu ya vukhongeri ntsena. Va titwa hi laha muapostola Pawulo a titweke ha kona loko a humese marito yakwe ehansi ka ku huhuteriwa a ku: “Xikwembu xi fanele ku tiviwa xi ri xa ntiyiso, ni loko munhu un’wana ni un’wana a ri muhembi.” (Varhoma 3:4a) Loko swi ta eka tidyondzo leti nyikeriwaka tanihi ntiyiso wa Bibele, va namarhela swinene ndlela leyi landzeriweke hi va le Beriya loko va twe muapostola Pawulo a chumayela a ku: “Va amukela Rito hi ku nkhensa lokukulu, va kambisisa Matsalwa masiku hinkwawo, va lava ku tiva leswaku xana timhaka ti tano xana.” (Mintirho 17:11) Timbhoni ta Yehova ti pfumela leswaku tidyondzo hinkwato ta vukhongeri ti fanele ku vekiwa eku ringetiweni loku ko pfumelelana ni Matsalwa, hambi loko dyondzo yi nyikeriwa hi vona kumbe hi van’wana. Va ku rhamba—va ku khutaza— ku endla leswi eku kanerisaneni ka wena na vona.
Eka leswi swa vonaka leswaku Timbhoni ta Yehova ta tshemba leswaku Bibele i Rito ra Xikwembu. Va teka tibuku ta yona ta 66 ti ri leti huhuteriweke ni ku va leti baka nhloko ya mhaka ehenhleni ka matimu. Leswi hi ntolovelo swi vitaniwaka Testamente Leyintshwa va swi vula Matsalwa ya Xigriki ya Vukriste, naswona Testamente Ya Khale va yi vitana Matsalwa ya Xiheveru. Va tiseketela hi Matsalwa ya Xigriki kun’we ni ya Xiheveru, ni ku ma teka ya ri ya xiviri handle ka loko marito kumbe leswi andlariweke swi kombisa erivaleni leswaku i swigege kumbe i swo fanekisela. Va twisisa leswaku vunyingi bya vuprofeta bya Bibele byi hetisekile, byin’wana bya karhi ku hetiseka, kasi byin’wana bya ha yimele ku hetiseka.
VITO RA VONA
I Timbhoni ta Yehova xana? Ina, yoleyo i ndlela leyi va tivitanaka ha yona. I vito ro hlamusela, leri kombaka leswaku va veka vumbhoni mayelana na Yehova, Vukwembu byakwe ni swikongomelo swa yena. “Xikwembu,” “Hosi,” “Muvumbi”—tanihi ku “Muungameri,” “Mufumi,” “Ndhuna”—i swibumabumelo naswona swi nga ha tirhiseriwa vanhu vo tala lava hambaneke. Kambe ku “Yehova” i vito ra xiviri naswona ri vula Xikwembu xa Matimba Hinkwawo ni Muvumbi wa vuako. Leswi swi kombisiwe eka Psalma 83:18, hi ku ya hi Bibele ya King James Version: “Leswaku vanhu va ta swi tiva leswaku wena, loyi vito ra yena ntsena a nga YEHOVA, u tlakukile ehenhla ka misava hinkwayo.”
Vito ra Yehova (kumbe “Yahweh,” hi laha Jerusalem Bible ya Rhoma khatoliki ni vadyondzi van’wana va manguva lawa va tsakelaka ha kona) ri humelela minkarhi ya 7 000 eka Matsalwa yo sungula ya Xiheveru. Tibibele to tala a ti ri kombisi ri ri tano, kambe ti ri siva hi ku “Xikwembu” kumbe “Hosi.” Kambe, hambi ku ri eka Tibibele leti, munhu wa swi kota ku komba lomu Matsalwa yo sungula ya Xiheveru a ma tirhisa Yehova, hikuva eswivandleni sweswo marito lama nghenisiweke ma tsariwe hi tinhlanga tikulukumba leti kurisiweke no tsongahatiwa, xisweswo ku va: XIKWEMBU, HOSI. Ku hundzuluxela ko tala ka manguva lawa ku tirhisa vito ra Yehova kumbe Yahweh. Kutani ke, Bibele ya Xitsonga eka Esaya 42:8 yi ri: “Hi mina Yehova, hi rona vito ra mina.”
Mhaka ya Matsalwa leyi Timbhoni ta Yehova ti tekaka vito ra tona eka yona yi le ka ndzima ya vu-43 ya Esaya. Kwalaho xivono xa misava xi voniwa tanihi xiendlakalo xa le hubyeni: Swikwembu swa matiko swi byeriwa ku humesa timbhoni ta swona ku tiyisa timhaka ta swona ta ku rhula leti mangariweke, kumbe ku twa timbhoni ta tlhelo ra Yehova kutani swi amukela ntiyiso. Kwalaho Yehova u byela vanhu vakwe a ku: “Mi timbhoni ta mina, ku vula Yehova, n’wina ni nandza wa mina loyi ndzi n’wi hlawuleke, hi leswaku mi ta swi tiva, mi ndzi pfumela, mi va mi swi twa leswaku hi mina: Emahlweni ka mina a ku nga si va na Xikwembu lexi endliweke, endzhaku ka mina ku nga ka ku nga vi na xin’wana. Hi mina, mina Yehova, ehandle ka mina a ku na muponisi!”—Esaya 43:10, 11.
Yehova Xikwembu u vile na timbhoni emisaveni hi magidi ya malembe emahlweni ka Kriste. Endzhaku ko xaxameta van’wana va vavanuna volavo va ripfumelo eka Vaheveru ndzima 11, Vaheveru 12:1 yi ri: “Hikokwalaho, leswi hi rhendzeriweke hi vunyingi lebyikulu lebyi bya timbhoni, na hina a hi tshikeni hinkwaswo leswi swi hi sivelaka ku ya emahlweni, ni vudyoho lebyi hatlaka ku hi namarhela, hi tsutsuma hi ri ni ku tiyisela eku tsutsumeni ka mpfhuka lowu hi vekeriweke wona.” Emahlweni ka Pontiyo Pilato Yesu u te: “Leswi ndzi velekeriweke swona ni leswi ndzi nga tela swona laha misaveni, i ku ta ndzi ta veka vumbhoni ehenhla ka ntiyiso.” U vitaniwa “mbhoni leyi tshembekeke, ya ntiyiso.” (Yohane 18:37; Nhlavutelo 3:14) Yesu u byele vadyondzisiwa vakwe: “Kambe mi ta nyikiwa matimba, siku Moya lowo Kwetsima wu taka ehenhla ka n’wina; kutani mi ta va timbhoni ta mina kwala Yerusalema, ne tikweni hinkwaro ra Yudiya, ni ra Samariya, ni ku ya fika emakun’wini ya misava.”—Mintirho 1:8.
Hi yona mhaka leyi ha yona, vanhu lava tlulaka 3 750 000 namuntlha lava vulaka mahungu lamanene ya Mfumo wa Yehova ha Kriste Yesu eka matiko lama tlulaka 200 va vonaka va tivitana kahle tanihi Timbhoni ta Yehova.
[Nhlamuselo ya le hansi]
a Handle ka mfungho, Matsalwa ya Xiheveru lama tshahiweke eka broxara leyi ma huma eka Bibele ya Xitsonga kasi ya Xigriki ya huma eka Testamente ya Mahungu Lamanene. Laha ku humelelaka NW endzhaku ka ku tshaha, swi komba leswaku ku hundzuluxela ka kona i ka Bibele ya Xinghezi ya New World Translation of the Holy Scriptures, Nkandziyiso Lowuntshwa wa 1984.
[Marito lama tshahiweke exihlokweni lama nga eka tluka 3]
Va ku tsakela
[Marito lama tshahiweke exihlokweni lama nga eka tluka 3]
Va tinyiketele ku endla ku rhandza ka Xikwembu
[Marito lama tshahiweke exihlokweni lama nga eka tluka 4]
Va pfumela leswaku Bibele i Rito ra Xikwembu
[Marito lama tshahiweke exihlokweni lama nga eka tluka 4]
Vito ra Xikwembu ra xiviri hi Xiheveru xa khale
[Marito lama tshahiweke exihlokweni lama nga eka tluka 5]
Vito hi laha ri yelanaka ha kona ni xiendlakalo xa le hubyeni
[Marito lama tshahiweke exihlokweni lama nga eka tluka 5]
Timbhoni leti tlulaka 3 750 000 eka matiko lama tlulaka 200