‘A Va Lemukanga Nchumu’

KU HONISA switsundzuxo swi nga vanga khombo.

Le dorobeni ra Darwin, le Australia vanhu a va ri karhi va endla malunghiselelo ya minkhuvo ya holideyi hi 1974 loko va twa ku rila tibele leti lemukisaka leswaku ku ni xihuhuri lexi taka. Kambe se a ku hundze malembe ya kwalomu ka 30 doroba ra Darwin ri nga si hlaseriwa hi xihuhuri. Kumbexana xihuhuri lexi a xi nga ta onha nchumu! Vaaki vo tala a va ri tekelanga enhlokweni khombo leri a ri ta va wela kukondza moya wu sungula ku hahlula malwangu ni ku wisa makhumbi ya tindlu leti vanhu a va fumbane eka tona. Hi xa mundzuku xa kona, doroba a ri ri rhumbi.

Hi November 1985, le Colombia ku buluke vholkheno. Gamboko ni ayisi leyi n’okeke swi khuluke ni ndzhope lowu funengeteke vaaki vo tlula 20 000 edorobeni ra Armero. Xana a va nga lemukisiwanga ka ha ri emahlweni? Ku hundze tin’hweti to hlayanyana ntshava yi ri karhi yi tsekatseka. Hambiswiritano, hikwalaho ka leswi vanhu vo tala va le Armero a va tolovele ku tshama ekusuhi ni ntshava leyi nga ni vholkheno, a va swi tekelanga enhlokweni leswaku siku rin’wana yi ta buluka. Vatirhela-mfumo va lemukisiwile leswaku ku ta va ni khombo ku nga ri khale, kambe a va endlanga nchumu leswaku va lemukisa vanhu. Swiya-ni-moya a swi chavelela vaaka-tiko. Swikurisa-marito leswi a swi ri ekerekeni a swi tirhiseriwa ku khutaza vanhu leswaku va rhula mbilu. Siku rin’wana nimadyambu, ntshava yi buluke kambirhi hi ndlela leyi chavisaka. Xana a wu ta va u siye rifuwo ra wena ivi u baleka? Vo tala a va balekanga kukondza khombo ri fika.

Hakanyingi lava nga ni vutivi hi xivumbeko xa misava va pakanisa loko va tivisa laha ku nga ta va ni ku tsekatseka ka misava. Kambe hi xitalo a va ri tivi siku leri yi nga ta tsekatseka ha rona. Hi 1999, ku tsekatseka ka misava emisaveni hinkwayo ku dlaye vanhu va kwalomu ka 20 000. Vo tala lava feke a va anakanya leswaku a va nge pfuki va dlayiwe hi ku tsekatseka ka misava.

Xana U Angula Njhani Eka Switsundzuxo Leswi Humaka Eka Xikwembu Hi Xoxe?

Bibele yi swi hlamusele kahle ka ha ri emahlweni swiendlakalo leswi kombisaka masiku ya makumu. Malunghana ni mhaka leyi, yi hi khutaza ku xiya “masiku ya Nowa.” “Emasikwini wolawo ya le mahlweni ka ndhambi” vanhu a va khomekile hi mintirho leyi tolovelekeke ya vutomi, kambe a swi kanakanisi leswaku a va vilela hi ku andza ka madzolonga lawa a ma ri kona. Kambe xitsundzuxo lexi Xikwembu xi va nyikeke xona hi ku tirhisa nandza wa xona Nowa, “[a va xi lemukanga] . . . ku fikela loko ndhambi yi fika yi va kukula hinkwavo.” (Matewu 24:37-39) Xana a wu ta va u xi yingisile xitsundzuxo xexo? Xana wa xi yingisa sweswi?

A hi nge a wu tshama eSodoma, ekusuhi ni Lwandle leri Feke, emasikwini ya wanuna la vitaniwaka Lota, ntukulu wa Abrahama! Phela tiko ra kona a ri fana ni paradeyisi. Muti wolowo a wu fuwile. Vanhu va kona a va tiendlela ku rhandza ka vona. Emasikwini ya Lota, vanhu “a va dya, a va nwa, a va xava, a va xavisa, a va byala, a va aka.” Vanhu volavo a va hombolokile. Xana wena a wu ta va u xi tekele enhlokweni xitsundzuxo xa Lota loko a sola swiendlo swo biha? Xana a wu ta va u n’wi yingisile loko a ku byela leswaku Xikwembu xi tiyimisele ku lovisa muti wa Sodoma? Kumbe a wu ta va u n’wi teke a ri eku tlangeni, tanihi laha lava a va ta va vakon’wana va Lota va endleke hakona? Kumbexana a wu ta va u sungule ku baleka ivi u languta endzhaku ku fana ni nkata Lota? Hambileswi van’wana a va nga swi tshembi switsundzuxo leswi va byeriweke swona, kambe hi siku leri Lota a humeke ha rona eSodoma, “ku ne ndzilo ni xivavula swi huma etilweni, swi va lovisa hinkwavo.”—Luka 17:28, 29.

Vanhu vo tala esikwini ra hina a va yingisi loko va lemukisiwa. Kambe swikombiso leswi swi tsariwe eRitweni ra Xikwembu leswaku swi va xitsundzuxo eka hina, leswaku swi hi khutaza ku TSHAMA HI RINDZILE!

[Bokisi/Xifaniso lexi nga eka tluka 22]

Xana Hakunene Yi Tshame Yi Va Kona Ndhambi Ya Misava Hinkwayo?

Vaxopaxopi vo tala va ri a yi si tshama yi va kona. Kambe Bibele yi ri yi tshame yi va kona.

Yesu Kreste hi byakwe u vulavule ha yona, naswona a a ri kona loko yi humelela, u yi vone a ri ematilweni.

[Bokisi/Xifaniso lexi nga eka tluka 23]

Xana Hakunene Muti Wa Sodoma Ni Wa Gomora Yi Lovisiwile?

Vuyimburi byi kombisa leswaku xiendlakalo lexi xi endlekile hakunene.

Ku vulavuriwe ha xona ematin’wini.

Yesu Kreste u nyikele vumbhoni bya xiendlakalo xexo, naswona leswi humeleleke swi boxiwe etibukwini ta 14 to hambana-hambana ta Bibele.