February

Yesu a ri ni ntwelavusiwana lowukulu eka vanhu. Vanhu a va swi xiya leswaku wa va rhandza naswona va yingisele rungula ra Mfumo. Loko na hina hi ri ni ntwelavusiwana wo tano, hi ta kota ku pfuna vanhu lava hi va chumayelaka. I yini lexi nga ta hi pfuna hi kombisa ntlhaveko wa xinakulobye eka lava hi va chumayelaka? Hi lava ku tiveka exiyin’weni xa vanhu lava hi hlanganaka na vona ensin’wini kutani hi va khoma hi ndlela leyi a hi ta lava ku khomiwa ha yona loko a hi ri eka xiyimo xa vona. (Mat. 7:12) Ehleketa hi swilaveko swa munhu un’wana ni un’wana. A hi fanelanga hi tirhisa xingheniso xin’we xo sungula mabulo eka munhu un’wana ni un’wana loyi hi hlanganaka na yena ensin’wini. Ematshan’weni ya sweswo, ringeta ku twisisa swiyimo ni mavonelo ya munhu un’wana ni un’wana. Vutisa swivutiso hi vutlhari leswaku u ta tiva swo karhi hi munhu yoloye. (Swiv. 20:5) Loko hi vutisa swivutiso, hi va pfumelela va hi byela leswaku hikwalaho ka yini hi fanele hi va byela mahungu lamanene. Loko se hi swi tivile, hi ta kota ku kombisa ntlhaveko wa xinakulobye ni ku va pfuna hi ku ya hi xilaveko xa vona hilaha Yesu a endleke hakona.—Ringanisa 1 Vakorinto 9:19-23. w19.03 20 ¶2; 22 ¶8-9

Adamu na Evha va kombise leswaku a va nga swi tlangeli swilo hinkwaswo leswinene leswi Yehovha a va endleleke swona. Hinkwerhu hi ni lunghelo ro kombisa leswaku a hi fani na Adamu na Evha, ha swi tlangela swilo hinkwaswo leswi Yehovha a hi endleleke swona. Hi kombisa leswaku hi tshemba Yehovha loko hi khuvuriwa nileswaku u ni mfanelo yo hi vekela milawu ya leswinene ni leswo biha. Hi kombisa leswaku ha n’wi rhandza ni ku n’wi tshemba Tata wa hina. Ntlhontlho lowu hi nga na wona endzhaku ka ku khuvuriwa, i ku hanya hi milawu ya Yehovha siku ni siku, ku nga ri ya hina. Malandza yo tala ya Xikwembu ma endla tano. Na wena u nga fana na vona loko u ya emahlweni u tikarhatela ku twisisa Rito ra Xikwembu, ku nga Bibele, u tihlanganisa ni vamakwerhu nkarhi na nkarhi naswona u hisekela ku byela van’wana leswi u swi dyondzeke hi Tata wa wena wa rirhandzu. (Hev. 10:24, 25) Loko u endla swiboho, landzela nkongomiso lowu Yehovha a ku nyikaka wona hi ku tirhisa Rito rakwe ni nhlengeletano yakwe. (Esa. 30:21) Kutani hinkwaswo leswi u swi endlaka swi ta humelela.—Swiv. 16:20. w19.03 7 ¶17-18

Yehovha u hi nyike swakudya swo tala swa moya. Hi xikombiso, hi kuma swiletelo leswi pfunaka emihlanganweni, eka timagazini ta hina ni le ka ti-website ta hina. Xana u tshama u twa mbulavulo, u hlaya nhlokomhaka eka mikandziyiso kumbe u hlalela vuhaxi bya JW kutani u ku, ‘Leswi hi swona leswi a ndzi swi lava’? Hi nga ku kombisa njhani ku tlangela ka hina eka Yehovha? (Kol. 3:15) Ndlela yin’wana i ku n’wi khensa nkarhi na nkarhi eswikhongelweni swa hina hikwalaho ka tinyiko teto letinene. Hi tlhela hi kombisa leswaku ha n’wi khensa Yehovha loko hi basisa ndhawu ya hina ya vugandzeri. Hi hoxa xandla loko ku basisiwa, ku lunghisiwa Tiholo ta Mfumo, vamakwerhu lava va tirhaka hi swa mpfumawulo na vona va swi khoma kahle switirhisiwa leswi va tirhisaka. Loko hi khathalela Tiholo ta hina ta Mfumo swi ta endla leswaku ti tirhisiwa nkarhi wo leha naswona a ti nge durhi loko ti lunghisiwa. Loko hi endla sweswo, hi ta hlayisa mali yo tala leyi nga ta tirhisiwa ku aka ni ku pfuxeta Tiholo tin’wana ta Mfumo emisaveni hinkwayo. w19.02 18 ¶17-18

Yobo u hete nkarhi a ri karhi a anakanyisisa hi ntumbuluko wa Yehovha lowu hlamarisaka. (Yobo 26:7, 8) U hlamarile loko a ri karhi a ehleketa hi misava, matilo, mapapa ni ku dzindza ka tilo, kambe u swi twisisile leswaku a a nga tivi swo tala hi swilo leswi Yehovha a swi tumbuluxeke. U tlhele a tlangela marito ya Xikwembu. U te: “Ndzi teka marito ya nomu wa xona ma ri ni ntikelo.” (Yobo 23:12) Yobo u hlamarisiwe hi Yehovha naswona a a n’wi xixima swinene. A n’wi rhandza Tata wakwe naswona a lava ku n’wi tsakisa. Sweswo swi endle leswaku Yobo a tiyimisela ku tshama a tshembekile eka Xikwembu. Hi fanele hi endla hilaha Yobo a endleke hakona. Hi tiva swilo swo tala leswi hlamarisaka hi ntumbuluko wa Yehovha ku tlula vanhu va le nkarhini wa Yobo. Hi ni Bibele leyi heleleke leyi hi pfunaka ku tiva Yehovha. Hinkwaswo leswi hi swi dyondzaka swi nga hi khumba mbilu. Sweswo swi hi susumetela ku endla ku rhandza ka Yehovha ni ku n’wi yingisa kutani swi hi pfuna ku tshama hi tshembekile.—Yobo 28:28. w19.02 5 ¶12

Ematin’wini hinkwawo, vafumi va vanhu va xanise vanhu va Yehovha. Va nga hi hehla hi vugevenga byo hambanahambana kambe hi hlawula ku “yingisa Xikwembu tanihi mufumi ku tlula vanhu.” (Mint. 5:29) Hi nga ha hlekuriwa, hi pfaleriwa emakhotsweni kumbe hi bukuteriwa. Hambiswiritano, hi ku pfuniwa hi Yehovha, loko hi weriwa hi miringo a hi nge rihiseli kambe hi ta tshama hi rhurile. A hi kambisiseni xikombiso lexi Vaheveru vanharhu ku nga Hananiya, Mixayele na Azariya va hi vekeleke xona. Hi moya wo rhula, va hlamusele hosi leswaku hikwalaho ka yini va nga gandzeli xifaniso lexi yi xi endleke. A va tiyimisele ku amukela xin’wana ni xin’wana lexi Yehovha a ta xi pfumelela. (Dan. 3:1, 8-28) Loko ku tshembeka ka hina eka Xikwembu ku ringiwa, hi nga va tekelela njhani Vaheveru lavanharhu? Ha titsongahata naswona ha tshemba leswaku Yehovha u ta hi khathalela. (Ps. 118: 7) Hi va hlamula hi moya wo rhula ni hi xichavo lava hi hehlaka hi swilo swo biha. (1 Pet. 3:15) Hi ala ku endla nchumu wihi na wihi lowu nga onhaka vuxaka bya hina na Tata wa hina wa rirhandzu. w19.02 10-11 ¶11-13

Leswaku hi va ni xivindzi hi fanele hi anakanya hi ntshembo lowu gandzelo ra nkutsulo ra Kreste ri endleke leswaku hi va na wona. (Yoh. 3:16; Efe. 1:7) Eka mavhiki ma nga ri mangani emahlweni ka Xitsundzuxo, hi kuma nkarhi wo kombisa ku tlangela ka hina nkutsulo. Hi nkarhi wolowo, hlaya tindzimana ta Bibele ta Xitsundzuxo ni ku anakanyisisa hi swiendlakalo leswi endlekeke loko Yesu a ri eku suhi ni ku dlayiwa. Kutani loko hi hlengeletanile eka Xilalelo xa Hosi, hi ta wu twisisa kahle nkoka wa swifanekiselo swa Xitsundzuxo ni gandzela ro hlawuleka leri swi ri fanekiselaka. Loko hi swi twisisa kahle leswi Yesu na Yehovha va hi endleleke swona ni ndlela leyi hina swin’we ni maxaka ya hina hi vuyeriwaka ha yona, ntshembo wa hina hi vumundzuku wu ta tiya naswona hi ta susumeteleka ku tiyisela ku ya fika emakumu hi xivindzi. (Hev. 12:3) Hakunene ha swi tlangela leswi Yesu a kombisaka timfanelo teto tanihi Muprista wa hina Lonkulu loyi a nga etilweni, loyi a hi kombelelaka! (Hev. 7:24, 25) Leswaku hi kombisa ku tlangela swi suka embilwini, hi fanele hi va kona eka Xitsundzuxo xa rifu ra Yesu, hilaha a hi leriseke hakona.—Luka 22:19, 20. w19.01 22 ¶8; 23-24 ¶10-11

Hinkwerhu Yehovha u hi nyike lunghelo ro va hi n’wi dzunisa. Tinhlamulo ta hina emihlanganweni i “xitlhavelo [xa hina] xa ku dzunisa” naswona ku hava loyi a nga hi endlelaka xona. (Hev. 13:15) Xana Yehovha u langutele leswaku un’wana ni un’wana wa hina a nyikela xitlhavelo lexi fanaka kumbe nhlamulo hi ndlela leyi fanaka? Nikatsongo! Teka mihlangano ya vandlha ku fana ni swakudya swo xawula leswi u swi dyaka ni vanghana. A hi nge vamakwerhu vo karhi va le vandlheni va hlele xinkhubyana kutani va ku kombela leswaku u lunghiselela swakudya swo karhi. Xana a wu ta angula njhani? U nga ha chavanyana, kambe u ta tikarhatela ku endla leswi hinkwavo va nga ta tiphina ha swona. Yehovha, Loyi a hi rhambeke, u lunghiselele swakudya swo nandziha emihlanganweni. (Ps. 23:5; Mat. 24:45) Naswona wa tsaka loko hi ta ni nyiko yitsongo, leyi hi yi lunghiseleleke kahle. Kutani lunghiselela kahle naswona u hlamula hi ku ntshunxeka. Kutani a wu nge dyi swakudya swa Yehovha ntsena kambe na wena u ta tisa nyiko yo karhi evandlheni. w19.01 8 ¶3; 13 ¶20

Emikarhini ya Bibele, hakanyingi vugandzeri bya mavunwa a byi katsa ku tikhoma ko biha hi tlhelo ra masangu. (Hos. 4:13, 14) Entiyisweni, leswi vanhu va nga ni xidyoho vugandzeri byo tano a byi vonaka byi naveleka eka vona. Kambe sweswo a swi nga endli leswaku va tshama va tsakile. Ku hambana ni sweswo, Davhida u te: “Switlhavi swa tala eka lava [va gandzelaka swikwembu swin’wana].” Va tlhele va vangela vana va vona maxangu. (Esa. 57:5) Hakunene tihanyi to tano a ti n’wi nyenyetsa Yehovha! (Yer. 7:31) Ninamuntlha, vugandzeri bya mavunwa byi pfumelela ku tikhoma loko biha hi timhaka ta masangu ni ku va vanhu va rimbewu leri fanaka va endla timhaka ta masangu. Vuyelo lebyi kumiwaka hi vanhu lava tiphinaka hi ntshunxeko wa mahanyelo wolawo yo biha bya ha fana ni bya le nkarhini wa Bibele. (1 Kor. 6:18, 19) Vanhu va ‘tivangela switlhavi swo tala,’ hilaha u nga vaka u swi vone hakona. Hikwalaho, n’wina vantshwa yingisani Tata wa n’wina wa le tilweni. Tiyisekani leswaku mi ta vuyeriwa loko mi n’wi yingisa. Tsundzukani leswaku loko mi endla xidyoho hi ku lava ku titsakisa swa xinkarhana mi ta kuma vuyelo byo vava swinene.—Gal. 6:8. w18.12 27-28 ¶16-18

Loko nuna kumbe nsati wa Mukreste a endle vuoswi, Mukreste loyi a nga riki na nandzu u ta boheka ku endla xiboho. Yesu u vule leswaku nuna kumbe nsati loyi a nga riki na nandzu u na xona xivangelo xo dlaya vukati a tlhela nghenela byin’wana. (Mat. 19:9) Hi hala tlhelo, loyi a nga riki na nandzu a nga ha hlawula ku rivalela munghana wakwe wa vukati. Sweswo swi ta va swi nga hoxanga nikatsongo. Hosiya u tlhele a teka Gomere a va nsati wakwe. Loko Gomere a tlhelele eka Hosiya, Gomere a a nga ha fanelanga a endla timhaka ta masangu ni wanuna un’wana. Hosiya a ‘nga vanga ni vuxaka bya rimbewu’ na Gomere ku ringana nkarhi wo karhi. (Hos. 3:1-3) Hi ku famba ka nkarhi, Hosiya u fanele a tlhele a endla timhaka ta masangu na yena, leswi kombisaka ku tiyimisela ka Xikwembu ku tlhela xi amukela vanhu va xona kutani xi ya emahlweni xi tirhisana na vona. (Hos. 1:11; 3:4, 5) Xana leswi swi byi khumba njhani vukati namuntlha? Loko munghana wa vukati loyi a nga riki na nandzu a endla xiboho xo ka a nga byi dlayi vukati, a tlhela a endla timhaka ta masangu ni munghana wakwe wa vukati u va a kombisa leswaku u n’wi rivalerile. (1 Kor. 7:3, 5) Hikwalaho a nga ha ri na xona xivangelo xo dlaya vukati. Endzhaku ka sweswo tanihi nuna ni nsati, va fanele va tikarhatela ku kombisa langutelo ra Xikwembu hi vukati. w18.12 13 ¶13

Loko hi ri karhi hi dyondza, hi fanele hi tlhela hi kambisisa leswaku leswi hi swi dyondzaka swi ta swi khumba njhani swiboho leswi hi nga ha swi endlaka enkarhini lowu taka. Loko hi endla tano hi ta kota ku endla swiboho swa vutlhari loko hi ri eka swiyimo leswi lavaka leswaku hi endla swiboho hi xihatla. Leswi Yosefa a hatleke a bakanya rhengu ra nsati wa Potifaro ro lava ku etlela na yena, swi kombisa leswaku a a ri tiva langutelo ra Yehovha hi ku tshembeka evukatini. (Gen. 39:8, 9) Ku engetela kwalaho, nhlamulo yakwe eka nsati wa Potifaro leyi nge: “Ndzi nga byi endlisa ku yini vubihi lebyi lebyikulu ndzi dyohela Xikwembu hakunene?” yi kombisa leswaku a ri ni langutelo ra Yehovha. Xana ku vuriwa yini hi hina? Xana u ta endla yini loko mutirhikulorhi a sungula ku ku gangisa? Xana u ta endla yini loko u rhumeriwe marungula kumbe swifaniso leswi navetisaka timhaka ta masangu efonini ya wena? Swi ta hi olovela ku tiva leswi hi nga swi endlaka, loko se hi ri ni miehleketo ya Yehovha etimhakeni to tano naswona hi kunguhate ka ha ri emahlweni leswi hi nga ta swi endla. w18.11 25 ¶13-14

Swidyondzeki swin’wana swi ehleketa leswaku ndzimana leyi yi vula leswaku “Ndzi ta tlulatlula hi ntsako eka Hosi, ndzi tlhela ndzi rhendzeleka ndzi tsakile eka Xikwembu.” Hakunene yoleyo i dyondzo ya nkoka eka hinkwerhu! Yehovha u hi nyike switshembiso swo tano leswi hlamarisaka a tlhela a hi tiyisekisa leswaku xikongomelo xakwe xi ta hetiseka. Swi le rivaleni leswaku rungula ra nkoka ra buku ya Habakuku i ku tshemba Yehovha. (Hab. 2:4) Hi nga swi kota ku tshemba Yehovha loko hi tiyisa vuxaka bya hina na yena (1) hi ku phikelela exikhongelweni, hi byela Yehovha hinkwaswo leswi hi vilerisaka; (2) hi ku yingisa nkongomiso lowu humaka eRitweni ra Yehovha ni le ka nhlengeletano yakwe ni (3) hi ku rindzela Yehovha hi ku tshembeka. Habakuku u endle tano. Hambileswi a sunguleke buku yakwe a ri ni gome kambe u yi gimete hi marito ya ntsako. Onge hi nga tekelela xikombiso xakwe lexinene leswaku na hina hi ta titwa hi rhandziwa hi Yehovha tanihi tatana! A wu kona nchavelelo lowu tlulaka lowu emisaveni leyi yo homboloka. w18.11 17 ¶18-19

Xivangelo xin’wana lexi endlaka Vakreste va ntiyiso va rhandza Xikwembu hi leswaku: “Xi rhandze misava swinene xi kala xi nyikela hi N’wana wa xona la tswariweke a ri swakwe, leswaku un’wana ni un’wana loyi a kombisaka ripfumelo eka yena a nga lovisiwi kambe a va ni vutomi lebyi nga heriki.” (Yoh. 3:16) Vona ndlela leyi Yesu a hi rhandzeke ha yona hi ku nyikela vutomi byakwe hikwalaho ka hina! Naswona rirhandzu rero ra hi tiyisa. Rito ra Xikwembu ri tshembisa leswaku hambi ku ri “nhlomulo kumbe maxangu” a swi nge hi ‘hambanisi ni rirhandzu leri nga eka Kreste.’ (Rhom. 8:35, 38, 39) Loko hi langutane ni miringo leyi hi hetaka matimba, rirhandzu ra Kreste ri nga hi nyika matimba leswaku hi kota ku tiyisela. (2 Kor. 5:14) Rirhandzu ra Yesu ri hi pfuna leswaku hi nga lahli thawula hambiloko hi langutane ni miringo yo tanihi hi timhangu, ku xanisiwa, swiyimo leswi hetaka matimba kumbe maxangu. w18.09 14 ¶8-9

Leswaku hi famba entiyisweni, hi fanele hi amukela hi tlhela hi yingisa hinkwaswo leswi Yehovha a swi vulaka. Hi fanele hi rhangisa ntiyiso evuton’wini bya hina hi tlhela hi hanya hi misinya ya milawu ya le Bibeleni. Ku fana na Davhida na hina hi fanele hi tiyimisela hi mbilu hinkwayo ku tshama hi ri karhi hi famba entiyisweni wa Xikwembu. Loko hi nga endli tano, hi nga ha sungula ku anakanya hi swilo leswi hi swi tshikeke leswaku hi kuma ntiyiso naswona hi nga ha sungula ku lava swin’wana swa swona. Ku ri na sweswo, hi khomelela swi tiya entiyisweni. Ha swi xiya leswaku a hi nge hlawuli leswaku hi ta amukela ntiyiso wo karhi hi tshika wo karhi. Phela, hi fanele hi famba “entiyisweni hinkwawo.” (Yoh. 16:13) Leswaku hi papalata ku khukhuleka entiyisweni, hi fanele hi wu tirhisa hi vutlhari nkarhi wa hina. Loko hi nga tivoneli, hi nga ha sungula ku heta nkarhi wo tala hi ri karhi hi tihungasa, hi endla swilo leswi hi swi rhandzaka, hi nghena eka Inthanete kumbe hi hlalela thelevhixini. Hambiloko swilo leswi swi nga hoxanga, nkarhi lowu hi wu hetaka hi swi endla wu nga ha sungula ku siva nkarhi lowu a hi wu tirhisela ku endla dyondzo ya munhu hi yexe ni swilo swin’wana leswi katsaka ku tirhela Yehovha. w18.11 10 ¶7-8

Loko ku cinca ko karhi ku hi khumba hi ku kongoma, hi nga ha titwa hi pfilunganyekile. (Swiv. 12:25) Swi nga ha hi tikela ku amukela ku cinca ko tano. Eka swiyimo swo tano hi nga ‘khongotela ni ku miyeta’ moya-xiviri wa hina hi ndlela yihi? (Ps. 131:1-3) Ku nga khathariseki swiyimo swo tika leswi hi langutanaka na swona, na hina hi nga ha vona vuyelo bya “ku rhula ka Xikwembu” loku rindzaka matimba ya hina ya miehleketo. (Filp. 4:6, 7) Hikwalaho, loko hi lahlela ku vilela ka hina eka Yehovha, ku rhula ka Xikwembu ku nga hi pfuna leswaku hi fikelela tipakani ta hina ni ku tlhela ku hi pfuna leswaku hi nga karhali. Moya wa Xikwembu a wu hi pfuni leswaku hi va ni ku rhula ntsena, kambe wu tlhela wu hi kongomisa eka Matsalwa lama nga ta hi pfuna leswaku hi tiva swilo swa nkoka.—Yoh. 14:26, 27. w18.10 27 ¶2; 28 ¶5, 8

Hi wihi nchumu lowu nga ni khombo ku tlula swilo hinkwaswo eka vanhu? I mavunwa! Ku nga, ku vulavula swilo leswi u swi tivaka leswaku a hi ntiyiso leswaku u kanganyisa van’wana. I mani munhu wo sungula ku hemba? Yesu Kreste u vule leswaku “Diyavulosi” i “tata wa mavunwa.” (Yoh. 8:44) U sungule rini ku hemba? U sungule entangeni wa Edeni eka magidi ya malembe lama hundzeke. Vatekani vo sungula, Adamu na Evha, a va tiphina hi vutomi eParadeyisini leyi Muvumbi wa vona a a va veke eka yona. Hi loko ku fika Diyavulosi. A swi tiva leswaku Xikwembu xi lerise vatekani volavo leswaku va nga dyi eka “murhi wa ku tiva leswinene ni leswo biha,” ni leswaku va ta fa loko va nga xi yingisi. Nilokoswiritano, hi ku tirhisa nyoka Sathana u byele Evha a ku: “Entiyisweni mi nga ka mi nga fi [lawa i mavunwa yo sungula]. Hikuva Xikwembu xi tiva leswaku siku mi nga ta dya eka wona, mahlo ya n’wina ma ta pfuleka kutani mi ta fana ni Xikwembu, mi ta tiva leswinene ni leswo biha.”—Gen. 2:15-17; 3:1-5. w18.10 6 ¶1-2

Leswaku hi va ni mbilu leyi baseke hi fanele hi va ni mianakanyo ni ku navela loku baseke kumbe loku tengeke. Loko hi hlayisa mianakanyo ya hina yi ri leyi baseke, vugandzeri bya hina eka Yehovha byi ta va lebyi amukelekaka. (2 Kor. 4:2; 1 Tim. 1:5) Lava tengeke etimbilwini va swi kotisa ku yini ku “vona Xikwembu” loko ku ri hi leswaku, “a ku na munhu la nga vonaka [Xikwembu] ivi a hanya”? (Eks. 33:20) Rito ra Xigriki leri hundzuluxeriweke ri va “vona,” ri nga ha vula “ku vona hi mahlo ya mianakanyo, ku twisisa kumbe ku tiva.” Lava vonaka Xikwembu hi ‘mahlo ya mianakanyo’ hi lava se va xi tivaka kahle ni ku tlangela timfanelo ta xona. (Efe. 1:18) Ndlela yin’wana leyi vagandzeri va ntiyiso va nga tivaka timfanelo ta Xikwembu ha yona ni ku “vona Xikwembu,” i ku xiya ndlela leyi xi va khathalelaka ha yona. (Yobo 42:5) Hi fanele hi yi vona hi mahlo ya mianakanyo mikateko leyi Xikwembu xi yi tshembisaka lava nga ni timbilu leti tengeke ni lava xi tirhelaka hi ku tshembeka. w18.09 20 ¶13, 15-16

Loko hi endla leswinene hi ta kuma mikateko yo tala. Hambileswi vutlhari byi titshegeke hi vutivi kambe byi fambisana ni vuswikoti bya hina byo endla swiboho ku nga ri ku twisisa mhaka ntsena. Hambi ku ri vusokoti byi tlharihile. Byi kombisa vutlhari hi ku lunghiselela swakudya swa byona hi ximumu. (Swiv. 30:24, 25) Kreste “vutlhari bya Xikwembu” mikarhi hinkwayo a endla swilo leswi tsakisaka Tata wakwe. (1 Kor. 1:24; Yoh. 8:29) Xikwembu xi tiva ku hambana exikarhi ka ku endla xiboho lexinene ni ku xi hetisisa. Naswona xi hakela lava tiyiselaka hi ku titsongahata ni ku hanya hi ku pfumelelana ni leswi va swi dyondzeke. (Mat. 7:21-23) Tikarhatele ku endla leswaku vandlha ri va ndhawu leyi vanhu hinkwavo va tirhelaka Yehovha hi ku rhula. Ku tirhisa leswi hi swi dyondzaka swi teka nkarhi naswona swi lava hi lehisa mbilu kambe swi kombisa ku titsongahata loku nga hi tiselaka ntsako sweswi ni hilaha ku nga heriki. w18.09 7 ¶18

Muvumbi a a swi vurile leswaku vanhu lava hetisekeke a va ta tirhisana na yena leswaku va hetisisa xikongomelo xa yena. Hambileswi sweswi vanhu va nga hetisekangiki, vanhu vo tshembeka va nga swi kota ku tirha ni Xikwembu siku ni siku. Hi xikombiso, “hi vatirhi-kulobye ni Xikwembu” loko hi chumayela mahungu lamanene ya Mfumo wa xona ni ku endla vadyondzisiwa. (1 Kor. 3:5-9) Hakunene i lunghelo ku tekiwa hi ri lava fanelekaka ku tirha swin’we ni Muvumbi wa vuako hinkwabyo eka ntirho lowu a wu tekaka wu ri wa nkoka! Hambiswiritano, ku chumayela ni ku endla vadyondzisiwa a hi tona ntsena tindlela leti hi tirhaka swin’we na Yehovha ha tona. Tindlela tin’wana to endla tano, i ku pfuna mindyangu ya hina ni vamakwerhu, ku va ni malwandla, ku tinyiketela hi ku tirhandzela eka mintirho leyi hleriweke hi nhlengeletano ni ku engetela vutirheli bya hina. (Kol. 3:23) U nga pimanisi ntirho lowu u wu endlelaka Yehovha ni wa van’wana. Tsundzuka leswaku vanhu va hambana hi malembe, rihanyo, swiyimo ni hi vuswikoti. w18.08 23 ¶1-2

Yehovha u tiyisekise Habakuku leswaku u ta kuma tinhlamulo ta swivutiso swakwe. Swi nga si ya kwihi, swiphiqo swakwe hinkwaswo a swi ta kuma ndzhuti swi yima. Hi marito man’wana, Xikwembu xi byele muprofeta loyi xi ku: “Lehisa mbilu, u ndzi tshemba. Leswi ndzi swi vuleke swi ta humelela hambiloko swi vonaka swi hlwela!” Yehovha u n’wi tsundzuxe leswaku U veke nkarhi lowu faneleke leswaku A hetisisa switshembiso Swakwe. U khutaze Habakuku leswaku a rindzela ku hetiseka ka xikongomelo Xakwe. Eku heteleleni ku rindza kakwe a ku nga ta va ka hava. Loko hi lehisa mbilu hi rindzela Yehovha ni ku yingisa leswi a hi byelaka swona swi ta hi pfuna leswaku hi va lava rhuleke embilwini ku nga khathariseki maxangu lawa hi nga na wona. Yesu u hi tiyisekise leswaku hi nga tshemba Yehovha tanihi Muhlayisi Lonkulu wa nkarhi ku nga ri ku dzikisa mianakanyo ya hina eka “minkarhi kumbe tinguva” leti Xikwembu xi nga si hi paluxelaka tona. (Mint. 1:7) Hikwalaho a hi fanelanga hi hela matimba kambe hi fanele hi rindza hi ku titsongahata, hi ripfumelo, hi ku lehisa mbilu ni ku wu tirhisa kahle nkarhi lowu hi nga na wona leswaku hi tirhela Yehovha hilaha hi nga kotaka hakona.—Mar. 13:35-37; Gal. 6:9. w18.11 16 ¶13-14

Ku fana ni Vayuda van’wana va le nkarhini wakwe, Petro u kule a ri karhi a tshemba leswaku vanhu Vamatiko a va basangi. Hambiswiritano, Petro u vone swiendlakalo leswi endleke leswaku a tikambisisa. Hi xikombiso, Petro a ha ku vona xivono hi singita. (Mint. 10:9-16) Ku fana na Petro, hi fanele hi tikambisisa hi vukheta naswona hi tiyimisela ku amukela mpfuno leswaku hi ta susa xihlawuhlawu xihi na xihi lexi nga etimbilwini ta hina. I yini swin’wana leswi hi nga swi endlaka? Loko hi rhandza van’wana, hi ta pfumelela rirhandzu ri siva xihlawuhlawu. (2 Kor. 6:11-13) Xana u tolovelane na vanhu va rixaka ra wena ntsena, ndhavuko, tiko kumbe lava vulavulaka ririmi ra wena? Loko swi ri tano, ringeta ku tolovelana ni van’wana lava nga riki va rixaka ra wena. Swi nga va njhani loko wo rhamba vamakwerhu va tinxaka tin’wana leswaku va ta tirha na wena ensin’wini kumbe u va rhamba ekaya ra wena leswaku mi ta tsakela swakudya? (Mint. 16:14, 15) Loko u endla tano, u ta va rhandza kutani a wu nge vi na xona xihlawuhlawu. w18.08 9 ¶3, 6; 10 ¶7

Timbhoni tin’wana a ti yi tshikanga mikhuva ya misava. Matikhomelo ya tona swin’we ni ndlela leyi ti cinaka ha yona eswinkhubyanini a yi amukeleki eka Vakreste. Van’wana eka social media va veka swifaniso ni ku tsala marungula lama kombisaka langutelo ra misava. Swi nga endleka va nga si tshama va tshinyiwa evandlheni hikwalaho ko endla xidyoho lexikulu kambe va nga va ni nkucetelo wo biha eka tintangha ta vona leti tikarhatelaka ku tikhoma kahle exikarhi ka vanhu va Yehovha. (1 Pet. 2:11, 12) Misava yi hlohlotela vanhu ku rhangisa “ku navela ka nyama ni ku navela ka mahlo ni ku bombisa rifuwo ra munhu ra vutomi.” (1 Yoh. 2:16) Kambe, leswi hi nga va gandzeri va Yehovha, hi lemukisiwa leswaku hi “hambana ni ku nga xiximi Xikwembu ni ku navela ka misava, ni ku hanya hi mianakanyo yo hluteka ni ku lulama ni ku tinyiketela loku nga ni vukwembu exikarhi ka mafambiselo lawa ya swilo ya sweswi.” (Tito 2:12) Swilo hinkwaswo leswi hi swi endlaka, ndlela leyi hi vulavulaka ha yona, hi dyaka ha yona, hi nwaka ha yona ni ku ambala ha yona swi fanele swi swi veka erivaleni eka vanhu van’wana leswaku hi gandzela Yehovha. w18.07 25 ¶13-14

Loko hi hlayisa mahlo ya hina yo fanekisela ma langute eka Yehovha, a hi nge pfumeleli swiendlo swa van’wana swi hi hlundzukisa kumbe swi onha vuxaka bya hina na yena. Leswi i swa nkoka ngopfu eka lava ku fana na Muxe, va nga ni vutihlamuleri enhlengeletanweni ya Xikwembu. Entiyisweni un’wana ni un’wana wa hina u fanele a ‘hambeta a tirhela ku ponisiwa ka yena hi ku chava ni ku rhurhumela,’ hi fanele hi tsundzuka leswaku Yehovha a nga tirhisi nawu un’we lowu nga hundzukiki loko a hi avanyisa. (Filp. 2:12) Hikwalaho, loko hi ri na vutihlamuleri byo tala, Yehovha u langutele swo tala eka hina. (Luka 12:48) Kambe, loko hakunene hi rhandza Yehovha, a xi kona lexi nga hi hambanisaka ni rirhandzu rakwe. (Ps. 119:165; Rhom. 8:37-39) Eminkarhini leyi yo tika, onge mahlo ya hina ma nga tshama ma langute eka Loyi a “tshamaka ematilweni,” leswaku hi ta tiva ku rhandza kakwe. (Ps. 123:1) Onge hi nga tiyimisela ku nga pfumeleli swiendlo swa van’wana swi onha vuxaka bya hina na Yehovha. w18.07 16 ¶19-20

Vona ndlela leyi swi tsakisa ha yona, ku vona ku andza loku nga kona exikarhi ka vanhu va Yehovha! Hi 2017, hi fambise tidyondzo ta Bibele leti tlulaka 10 000 000. Leswi swi kombisa leswaku malandza ya Xikwembu ma pfumelela ku voninga ka wona ku vonakala. Nakambe anakanya hi timiliyoni ta vanhu lava tsakelaka lava veke kona eXitsundzuxweni. Va dyondze hi rirhandzu leri Xikwembu xi hi kombiseke rona hi ku hi nyika nkutsulo. (1 Yoh. 4:9) Emisaveni hinkwayo, vanhu va Yehovha va vulavula tindzimi to hambanahambana. Hambiswiritano, leswi a swi hi siveli leswaku hi dzunisa Tata wa hina Yehovha hi vun’we. (Nhlav. 7:9) Ku nga khathariseki ririmi leri hi ri vulavulaka kumbe laha hi tshamaka kona, hi nga voninga “kukota mavoningo emisaveni.” (Filp. 2:15) Ku andza loku hi ku vonaka ni vun’we lebyi hi tiphinaka ha byona ku katsa ni langutelo ro rindza leri hi tikarhatelaka ku ri hlayisa, swi yisa ku dzuneka eka Yehovha. w18.06 21 ¶1-3

Kambe ndlela leyi a va hlamuleke ha yona yi swi veke erivaleni leswaku a khomeke hi ntirho wo chumayela lerova swakudya a swi nga ri swa nkoka hi nkarhi wolowo. Ku chumayela, hambi ku ri ku chumayela wansati wa Musamariya a ku ri ku rhandza ka Tata wakwe naswona a swi fana ni swakudya eka yena. (Yoh. 4:31-34) Kambe Yakobo na Yohane a va swi twisisanga sweswo. Loko va ri na Yesu eSamariya, vadyondzisiwa a va lava byetlelo emutini wa Samariya. Vasamariya va ale ku va nyika ndhawu yo etlela kutani Yakobo na Yohane lava a va hlundzukile, va kombele Yesu leswaku va vitana ndzilo wu xika hi le tilweni leswaku wu lovisa muti wolowo. Kambe Yesu u va tshinyile hikwalaho ka sweswo. (Luka 9:51-56) Kumbexana Yakobo na Yohane a va ta va va nga hlundzukanga hi ndlela yoleyo, loko muti lowu wu aleke ku va amukela a wu ri endhawini ya ka vona eGaleliya. Swi tikomba onge xihlawuhlawu hi xona lexi endleke leswaku va venga Vasamariya. Swi vonaka onge muapostola Yohane u khomiwe hi tingana loko a vona ndlela leyinene leyi Vasamariya va anguleke ha yona loko a va chumayela endzhaku ka nkarhi.—Mint. 8:14, 25. w18.06 10-11 ¶12-13

Loko ntiyiso wa Bibele wu tsimbiwe eka hina hi ndlela yo fanekisela hi ta susumeteleka ku hanya hi ku pfumelelana na wona ni ku vulavula ntiyiso mikarhi hinkwayo. Hikwalaho ka yini hi papalata ku vulavula mavunwa? Hikuva mavunwa i tlhari leri nga ni matimba leri Sathana a ri tirhisaka. Mavunwa ma vavisa lava va ma vulaka ni lava va ma tshembaka. (Yoh. 8:44) Hikwalaho, hi fanele hi tikarhatela ku papalata ku vulavula mavunwa. (Efe. 4:25) Kambe swi nga ha tika ku endla tano. Abigail, loyi a nga ni malembe ya 18 u ri: “Ku vulavula ntiyiso mikarhi yin’wana swi nga ha vonaka swi nga pfuni nchumu, ngopfungopfu loko ku vulavula mavunwa swi ta ku phula ekhombyeni.” Hikwalaho ka yini hi fanele hi vulavula ntiyiso? Victoria, loyi a nga ni malembe ya 23 u ri: “Loko u vulavula ntiyiso ni ku namarhela leswi u pfumelaka eka swona u nga ha xanisiwa. Kambe mikarhi hinkwayo u kuma vuyelo lebyi tsakisaka: U ta titshemba, u titwa u ri ni vuxaka bya le kusuhi na Yehovha naswona lava ku rhandzaka va ta ku xixima.” Hakunene swa vuyerisa ku tshama u “tikhame masenge hi ntiyiso” mikarhi hinkwayo. w18.05 28 ¶3, 5

Leswi mikarhi leyi yo tika yi yaka yi nyanya ku biha, i swa nkoka leswaku hinkwerhu hi tshama hi rindzile. Loko Yehovha a teka goza, ku ta va ku ri nkarhi lowu faneleke. A hi kanakani hi sweswo. (Mat. 24:42-44) Kambe sweswi, hi fanele hi lehisa mbilu hi ku tshama hi rindzile. Hlaya Rito ra Xikwembu siku ni siku naswona u xalamuka eswikhongelweni. (1 Pet. 4:7) Tekelela swikombiso swa vamakwerhu lava kombisaka leswaku va tsakela ku tshama va rindzile ni leswaku va pfumelela ku voninga ka vona ku vonakala. Tshama u khomekile hi mitirho leyinene naswona u tikarhatela ku va ni vanghana lavanene. Sweswo swi ta endla leswaku u va ni ntsako naswona u ta vona nkarhi wu famba hi ku hatlisa. (Efe. 5:16) Swi tiyisa ripfumelo ku tiva leswaku ku nga hetiseki ka hina a ku hi siveli ku tirhela Yehovha. Hikwalaho, hi fanele hi kombisa ku tlangela lunghiselelo ra Yehovha ra “tinyiko leti nga vanhu,” ku nga vakulu va vandlha. (Efe. 4:8, 11, 12) Loko nkulu a ku endzela, tirhisa nkarhi wolowo leswaku u vuyeriwa eka vutlhari ni switsundzuxo swakwe. w18.06 24-25 ¶15-18

Yesu u byele valandzeri vakwe leswaku va ‘tshama erirhandzwini rakwe.’ Hikwalaho ka yini? Hikuva ku tshama u ri mudyondzisiwa wa ntiyiso wa Kreste, swi lava ku tiyisela. Yesu u kandziyise xilaveko xo tiyisela hi ku tirhisa xiga lexi nge, “tshamani” hi ku phindhaphindha eka Yohane 15:4-10. Hi nga swi kombisa njhani leswaku hi lava ku tshama erirhandzwini ra Kreste ni ku amukeriwa hi yena? Hi ku hlayisa swileriso swakwe. Hi ku komisa, Yesu u hi byela a ku, ‘Ndzi yingiseni.’ Hambiswiritano, Yesu u lava leswaku hi endla leswi na yena a swi endleke hikuva u engete a ku: “Tanihi leswi ndzi hlayiseke swileriso swa Tatana ivi ndzi tshama erirhandzwini rakwe.” Yesu u hi vekele xikombiso. (Yoh. 13:15) Loko hi yingisa xileriso xa Yesu xo chumayela, hi va hi kombisa leswaku hi rhandza Xikwembu hikuva swileriso swa Yesu swi huma eka Tata wakwe. (Mat. 17:5; Yoh. 8:28) Loko hi endla tano, Yehovha na Yesu va ta hi hlayisa erirhandzwini ra vona. w18.05 18 ¶5-7

Vantshwa va fanele va endla swiboho mayelana ni dyondzo, ntirho ni swin’wana. Loko u ku tiva kahle laha u yaka kona, ku hlawula ndlela a swi tiki. Loko u tivekela tipakani wa ha ri ntsongo, swilo swi ta ku fambela kahle. Vantshwa va magidi emavandlheni emisaveni hinkwayo va fanele va bumabumeriwa. Va tinyiketele eka Yehovha naswona va rhangisa tipakani to tirhela Yehovha evuton’wini bya vona. Vantshwa volavo va tiphina hi vutomi hilaha ku heleleke loko va ri karhi va dyondza ku landzela nkongomiso wa Yehovha eka swilo hinkwaswo, leswi katsaka ni vutomi bya ndyangu. Solomoni u tsale a ku: “Tshemba Yehovha hi mbilu ya wena hinkwayo. N’wi tivise tindlela ta wena hinkwato, kutani yena u ta lulamisa tindlela ta wena.” (Swiv. 3:5, 6) Vantshwa evandlheni ra Vukreste i va risima eka Yehovha loyi a va rhandzaka swinene, a va sirhelelaka, a va kongomisaka ni ku va katekisa. w18.04 26 ¶7; 27 ¶9

Muapostola Yohane a ri phuphu evandlheni ro sungula ra Vukreste. Rungula rakwe leri tsakisaka ra Evhangeli ya vutirheli bya Yesu, ri khutaze Vakreste eka madzana ya malembe lama hundzeke naswona ra ha ri tano ninamuntlha. Evhangeli yakwe hi yona ntsena leyi hlayiseke marito ya Yesu ya leswaku rirhandzu i mfungho wa vadyondzisiwa va ntiyiso va Yesu. (Yoh. 13:35) Mapapila manharhu ya Yohane ma tamele tidyondzo tin’wana ta ntiyiso. Loko hi titwa hi hele matimba hikwalaho ka xidyoho, xana a hi khutazeki loko hi hlaya leswaku “ngati ya Yesu . . . ya hi basisa eswidyohweni hinkwaswo”? (1 Yoh. 1:7) Loko timbilu ta hina ti ya emahlweni ti hi sola, xana a hi tsaki ni ku tala ku khensa loko hi hlaya leswaku “Xikwembu i xikulu eka timbilu ta hina”? (1 Yoh. 3:20) I Yohane ntsena la tsaleke leswaku “Xikwembu i rirhandzu.” (1 Yoh. 4:8, 16) Eka papila rakwe ra vumbirhi ni ra vunharhu, u bumabumela Vakreste lava yaka emahlweni va “famba entiyisweni.”—2 Yoh. 4; 3 Yoh. 3, 4. w18.04 18 ¶14-15