June

Hana, mana wa muprofeta Samuwele, a a langutane ni swiphiqo swo tika swinene. U hete malembe yo tala a nga kumi n’wana. (1 Sam. 1:2) Hi ku ya hi ndhavuko wa Vaisrayele, loko wansati a ri mhika a ku vuriwa leswaku u rhukaniwile. Leswi a swi endla a titwa a ri xikangalafula. (Gen. 30:1, 2) Lexi a xi endla leswaku xiyimo xa Hana xi tika ngopfu, hileswi nuna wakwe a a ri ni nsati un’wana, ku nga Penina loyi a a n’wi velekela vana naswona Penina a a dyisa Hana mbitsi hileswi a a nga veleki. Hana a swi n’wi tikela ku langutana ni xiphiqo xexo. A a twa ku vava lerova “a rila a tlhela a ala ni ku dya.” Mbilu yakwe a yi “vava ngopfu.” (1 Sam. 1:7, 10) Xana Hana u wu kume kwihi nchavelelo? Hana u phofulele Yehovha hi xikhongelo ndlela leyi a a titwa hayona. Endzhaku ka loko a khongerile, u hlamusele Muprista Lonkulu Eli xiyimo xakwe. Eli u n’wi byele leswi: “Famba hi ku rhula, onge Xikwembu xa Israyele xi nga ku nyika leswi u swi kombeleke.” Xana vuyelo byi ve byihi? Hana u “[fambile] a ya dya naswona a a nga ha ri na gome.” (1 Sam. 1:17, 18) Xikhongelo xi pfune Hana leswaku a nga ha vileli. w20.02 21 ¶4-5

Ku nga ri khale, Yehovha u ta herisa misava leyi. Ku ta pona “lava [kombisaka] leswaku va lava ku kuma vutomi lebyi nga heriki.” (Mit. 13:48) Swa twala ku va hi navela leswaku maxaka ya hina ma tirhela Yehovha swin’we na hina. Yehovha Tata wa hina “a nga naveli leswaku ku lova ni un’we, u lava leswaku vanhu hinkwavo va hundzuka.” (2 Pet. 3:9) Hi fanele hi tsundzuka leswaku ku ni ndlela leyinene ni leyi nga riki yinene, yo byela van’wana hi rungula ra ku ponisiwa. Hi xikombiso, hi nga vulavula hi musa loko hi chumayela vanhu lava hi nga va tiviki, kambe loko hi chumayela maxaka ya hina hi va byeletela kunene! Vo tala va hina loko hi tsundzuka ndlela leyi hi chumayeleke maxaka ya hina hayona, ha tisola naswona hi vona onge a swi ta antswa loko a hi va chumayele hi ndlela yin’wana. I swa nkoka ku tsundzuka ndzayo ya muapostola Pawulo leyi boxiweke eka ndzimana ya siku ra namuntlha loko hi chumayela maxaka ya hina. Hikuva swi nga ha endleka hi va hlundzukisa ematshan’weni yo va pfuna. w19.08 14-15 ¶3-5

U titwe njhani endzhaku ko dyondza hi ntiyiso lowu landzelaka mayelana ni N’wana? Yesu i xivumbiwa xa vumbirhi hi ku tlakuka evuakweni hinkwayo. I Mukutsuri wa hina. U nyikele hi vutomi byakwe hikwalaho ka hina. Loko hi kombisa leswaku hi ni ripfumelo eka nkutsulo, hi ta rivaleriwa swidyoho swa hina, hi va ni vuxaka ni Xikwembu naswona hi ta kuma vutomi lebyi nga heriki. (Yoh. 3:16) Yesu i Muprista wa hina Lonkulu. U lava hi vuyeriwa eka nkutsulo nileswaku hi va ni vuxaka lebyinene ni Xikwembu. (Hev. 4:15; 7:24, 25) Leswi a nga Hosi ya Mfumo wa Xikwembu, Yehovha u ta tirhisa yena leswaku a kwetsimisa vito Rakwe, a herisa vuhomboloki ni ku tisela vanhu mikateko ya hilaha ku nga heriki eParadeyisini. (Mat. 6:9, 10; Nhlav. 11:15) Yesu u hi vekele xikombiso. U hi vekele xikombiso lexinene hi ku rhangisa ntirho wa Xikwembu evuton’wini byakwe. (Yoh. 4:34) Loko u amukela leswi Bibele yi swi dyondzisaka hi Yesu, u ta n’wi rhandza N’wana loyi Xikwembu xi n’wi rhandzaka. Rirhandzu rero, ri ta ku susumetela ku endla ku rhandza ka Xikwembu hilaha Yesu a endleke hakona. w20.03 10 ¶12-13

Yesu u khongele ko tala hi siku rakwe ro hetelela a nga si fa. Loko a simeka xitsundzuxo xa rifu rakwe, u khongelele xinkwa ni vhinyo. (1 Kor. 11:23-25) Loko va nga si suka laha a va endle Paseka kona, u khongele swin’we ni vadyondzisiwa vakwe. (Yoh. 17:1-26) Loko yena ni vadyondzisiwa vakwe va fika eNtshaveni ya Mitlhwari, u khongele hi ku phindhaphindha. (Mat. 26:36-39, 42, 44) Marito yo hetelela lama Yesu a ma vuleke loko a nga si fa u ma vule exikhongelweni xakwe. (Luka 23:46) Yesu u khongele eka Yehovha malunghana ni xin’wana ni xin’wana lexi endlekeke hi siku ro hetelela ra vutomi byakwe. Xivangelo xin’wana lexi endleke Yesu a kota ku tiyisela ndzingo hileswi a a khongela nkarhi na nkarhi a kombela Tata wakwe leswaku a n’wi pfuna. Hi hala tlhelo, vaapostola va tsandzekile ku phikelela exikhongelweni hi vusiku byebyo. Hikwalaho ka sweswo, va tsandzeke ku va ni xivindzi loko va langutana ni ndzingo. (Mat. 26:40, 41, 43, 45, 56) Loko hi weriwa hi miringo, hi ta tshama hi tshembekile ntsena loko hi landzela xikombiso xa Yesu kutani hi “ya emahlweni [hi] khongela.” w19.04 9 ¶4-5

Yehovha u venga vungoma! U byele Vaisrayele a ku: “Ku nga tshuki ku kumiwa eka wena munhu un’wana ni un’wana loyi a hisaka n’wana wakwe wa jaha kumbe wa nhwanyana hi ndzilo a endla magandzelo hi yena, loyi a hlahluvaka, loyi a endlaka masalamusi, loyi a endlaka mihlolo, noyi, loyi a loyaka van’wana, loyi a vutisaka mungoma kumbe muvhumbhi kumbe loyi a vutisaka lava feke. Hikuva un’wana ni un’wana loyi a endlaka swilo leswi wa nyenyetsa eka Yehovha.” (Det. 18:10-12) Vakreste a va le hansi ka Nawu lowu Yehovha a a wu nyike Vaisrayele. Hambiswiritano, ha swi tiva leswaku ndlela leyi a titwaka hayona hi vungoma a yi si cinca. Yehovha u hi lemukisa hi vungoma hikuva wa swi tiva leswaku Sathana u tirhisa byona ku xanisa vanhu. Sathana u tirhisa vungoma leswaku a hangalasa mavunwa ku katsa ni mavunwa ya leswaku vanhu lava feke va ya emahlweni va hanya endhawini yin’wana. (Ekl. 9:5) Sathana u tirhisa vungoma leswaku a chavisa vanhu ni ku endla leswaku va nga gandzeli Yehovha. Xikongomelo xakwe, hileswaku vanhu lava tirhisaka vungoma va ta tshemba mimoya yo biha, ku ri ni ku tshemba Yehovha. w19.04 21 ¶5-6

Ku xanisa vana i xidyoho lexikulu. Muxanisi wa vana u vavisa n’wana hi ndlela leyi hlomulaka mbilu. Muxanisi u endla n’wana a nga ha tshembi munhu ni ku tshama a chuhile. Hi fanele hi sirhelela vana leswaku va nga xanisiwi hi ndlela yoleyo yo homboloka leyi hlomulaka mbilu, naswona hi fanele hi khongotela lava xanisiweke hi tlhela hi va pfuna. (1 Tes. 5:14) Loko xirho xa vandlha xi va ni nandzu wo xanisa n’wana hi swa masangu xi tisa xisandzu evandlheni. (Mat. 5:16; 1 Pet. 2:12) Vandlha a ri va pfumeleli vadyohi lava nga hundzukiki leswaku va ya emahlweni va tivula swirho swa vandlha kasi va tisa xisandzu evandlheni. Loko unʼwana evandlheni a tlula nawu wa tiko hi ku xanisa n’wana hi swa masangu u dyohele ni mfumo. (Ringanisa Mitirho 25:8.) Hambileswi vakulu va nga riki na matimba yo xupula munhu wihi ni wihi la tlulaka nawu wa tiko, kambe a va n’wi sirheleli eka vuyelo bya xidyoho xakwe. w19.05 9 ¶4-7

Hi kota ku lwisana ni swiphiqo swihi ni swihi hikuva Yehovha i Muleteri wa hina Lonkulu. (Esa. 30:20, 21) Rito rakwe ri hi dyondzisa hinkwaswo leswi hi swi lavaka leswaku hi “va ni vuswikoti” ni ku “lunghekela ntirho wun’wana ni wun’wana lowunene.” (2 Tim. 3:17) Loko hi tirhisa leswi Bibele yi swi vulaka hi ta va ni vutlhari lebyi tlulaka bya vanhu lava nga ni “vutlhari bya misava leyi.” (Ps. 119:97-100) Khombo ra kona, vutlhari bya misava byi hlohlotela ku navela ka vutianakanyi. Kutani swi nga ha hi tikela ku papalata ku ehleketa ni ku hanya ku fana ni vanhu lava nga lawuriki hi Bibele. Hikwalaho, Bibele yi ri: “Tivoneleni leswaku ku nga vi ni loyi a mi phasaka hi vutlhari bya misava leyi ni vuxisi leswi humaka eka ndhavuko wa vanhu.” (Kol. 2:8) Hilaha Bibele yi profeteke ha kona hi ta masiku ya makumu, vanhu va sungule ku “[rhandza] ku tiphina.” (2 Tim. 3:4) Ku andza ka mavabyi lama tlulelaka hi swa masangu yo tanihi AIDS, swi kombisa leswaku vutlhari bya misava i vuphukuphuku.—2 Pet. 2:19. w19.05 21 ¶1-2; 22 ¶4-5

Sathana u kanganyise Vaisrayele ku pfumela leswaku va boheka ku landzela mihivahivana ya vaakelani va vona va vahedeni. Vahedeni volavo a va pfumela leswaku swikwembu swa vona swi ta va nisela mpfula loko va endla mihivahivani yo karhi ya vugandzeri. Lava a va nga ri na ripfumelo eka Yehovha a va pfumela leswaku yoleyo hi yona ntsena ndlela yo papalata dyandza. Hikwalaho, a va endla mihivahivani yo gandzela Bali xikwembu xa mavunwa. Sathana u tlhele a va kucetela leswaku va tikhoma ku biha hi swa masangu. Vanhu va matiko ya vahedeni a va gandzela swikwembu swa vona hi ku endla swilo leswi nyenyetsaka swa masangu. Vugandzeri byo tano lebyi nyenyetsaka a byi katsa nghwavava ya xinuna ni ya xisati ya le tempeleni. Ku va vanhu va rimbewu leri fanaka va endla swa masangu ni mixaka yin’wana ya ku tikhoma ko biha hi swa masangu a yi tolovelekile! (Det. 23:17, 18; 1 Tih. 14:24) Vahedeni a va pfumela leswaku loko va endla mihivahivana yoleyo a va khutaza swikwembu leswaku swi nonisa misava. Vaisrayele a va wongiwa hi ku tikhoma ko biha hi swa masangu loku a ku endliwa evugandzerini bya vahedeni, kutani va pfumela ku gandzela swikwembu swa mavunwa. w19.06 2 ¶3; 4 ¶7-8

Vamakwerhu vo tala lava a va tirha eBethele ni van’wana lava a va ri eka ntirho wa nkarhi hinkwawo wo hlawuleka va kume swiavelo leswintshwa.  Vamakwerhu volavo swi nga ha va tikela ku sukela swiavelo swa vona leswi va swi rhandzaka hi mbilu hinkwayo. Loko u ri un’wana wa vona, i yini leswi nga ku pfunaka leswaku u langutana ni ku cinca koloko? Tshama u ri ekusuhi na Yehovha hi ku hlaya Matsalwa siku ni siku u tlhela u anakanyisisa ha wona. Nakambe yana emahlweni u endla leswi u nga swi kotaka leswaku u chumayela mahungu lamanene loko u ri evandlheni lerintshwa. Yehovha a nga va rivali lava yaka emahlweni va n’wi tirhela hi ku tshembeka hambiloko va nga ha swi koti ku endla leswi a va swi endla khale. U nga ti tikiseli vutomi. U nga pfumeleli mivilelo ya misava ya Sathana yi ku ‘kavanyeta’ u nga ha swi koti ku tirhela Yehovha. (Mat. 13:22) U nga va yingiseli vanhu lava nga tirheliki Yehovha, vanghana kumbe maxaka lava ringetaka ku ku pfuna, hi ku ku byela leswaku u fanele u kuma ntirho lowu holelaka leswaku u ta tiphina hi vutomi. (1 Yoh. 2:15-17) Tshemba Yehovha loyi a hi tshembisaka ku hi tiyisa eripfumelweni, a hi nyika ku rhula ni leswi hi swi pfumalaka “enkarhini wa kona.”—Hev. 4:16; 13:5, 6. w19.08 20 ¶4; 21-22 ¶7-8

Xana u ni swiphiqo leswi ku tshikilelaka? Swa chavelela ku tiva leswaku Yehovha wa yi twisisa ndlela leyi hi titwaka hayona loko hi ri emaxangwini. Wa swi tiva leswi hi tsandzekaka ku swi endla naswona wa swi tiva leswi hi swi ehleketaka ni ndlela leyi hi titwaka hayona. (Ps. 103:14; 139:3, 4) Loko hi titshega hi Yehovha ku fana na Eliya, u ta hi pfuna hi tiyisela swiphiqo leswi hi tshikilelaka. Loko u tshikilelekile u nga ehleketa leswaku swiphiqo swa wena a swi nge pfuki swi herile naswona sweswo swi nga ku heta matimba. Loko u titwa hi ndlela yoleyo, tsundzuka leswaku Yehovha u ta ku pfuna. U ta ku pfuna hi ndlela yihi? Wa ku rhamba leswaku u lahlela ku vilela hinkwako eka yena. Naswona u ta hlamula swirilo swa wena swo kombela ku pfuniwa. (Ps. 5:3; 1 Pet. 5:7) Kutani tivisa Yehovha swiphiqo swa wena hi xikhongelo. A nge vulavuli na wena hi ku kongoma kambe u ta ku pfuna hi ku tirhisa Rito ra yena ku nga Bibele, ni hi ku tirhisa nhlangano wakwe. Rungula leri nga eBibeleni ri nga ku chavelela ri tlhela ri ku nyika ntshembo. Nakambe vamakwerhu va nga ku chavelela.—Rhom. 15:4; Hev. 10:24, 25. w19.06 16 ¶7-8

Loko u xanisiwa, khongela eka Yehovha, u vula “hinkwaswo leswi nga embilwini ya wena u ri karhi u rila” u byela Tata wa wena hinkwaswo leswi ku chavisaka ni leswi ku karhataka. (Swir. 2:19) Loko u khongela hi ndlela leyi, u ta titwa u ri ekusuhi na Yehovha. (Rhom. 8:38, 39) Swi tive leswaku hinkwaswo leswi Mfumo wa Xikwembu wu hi tshembisaka swona swi ta endleka. (Tinhl. 23:19) Loko u nga swi tshembi kahle switshembiso sweswo, Sathana ni vanhu vakwe va ta ku chavisa hi ku olova. (Swiv. 24:10; Hev. 2:15) Tinyike nkarhi wo dyondza ni ku kambisisa switshembiso swa Xikwembu mayelana ni Mfumo wa xona ni leswaku hikwalahokayini u tshemba leswaku swi ta humelela. Sweswo swi ta ku pfuna njhani? Xiya xikombiso xa Stanley Jones, loyi a a pfaleriwe ekhotsweni malembe ya nkombo hikwalaho ka ripfumelo ra yena. I yini leswi n’wi pfuneke leswaku a tiyisela hi ku tshembeka? U te: “Leswi a ndzi swi tiva kahle switshembiso swa Mfumo wa Xikwembu ni ku swi tshemba naswona ndzi nga swi kanakani nikatsongo, a ku nga ri na lexi nga ta ndzi tsekatsekisa.” Loko u ri ni ripfumelo leri tiyeke eka switshembiso swa Xikwembu, a wu nge chavi nchumu.—Swiv. 3:25, 26. w19.07 2 ¶1; 3 ¶6-7

Hikwalahokayini ntirho wo endla vadyondzisiwa wu ri wa nkoka? Hikuva vanhu lava vaka vanghana va Xikwembu va fanele va rhanga va va vadyondzisiwa va Kreste. Ku engetela kwalaho, lava va landzelaka Kreste va cinca vutomi bya vona naswona va ni ntshembo wo kuma vutomi lebyi nga heriki. (Yoh. 14:6; 17:3) Handle ko kanakana, Yesu u hi nyike vutihlamuleri bya nkoka, kambe ntirho lowu a hi wu endli hi ri hexe. Loko muapostola Pawulo a tsala hi ta ntirho lowu yena ni vanghana vakwe va wu endlaka u te: “Hina hi vatirhikulobye ni Xikwembu.” (1 Kor. 3:9) Hakunene leri i lunghelo lerikulu leri Yehovha na Kreste va ri nyikeke vanhu lava nga hetisekangiki! Ntirho wo endla vadyondzisiwa wu nga hi tisela ntsako lowukulu. Xo sungula lexi hi xi endlaka leswaku hi kota ku endla vadyondzisiwa i ku ‘lavisisa’ lava navelaka ku dyondza hi Yehovha. Loko hi chumayela vanhu hinkwavo lava hi hlanganaka na vona, hi kombisa leswaku hi Timbhoni ta Yehovha. Nakambe loko hi landzela xileriso xa Kreste xo chumayela hi kombisa leswaku hi Vakreste va ntiyiso. w19.07 15 ¶3-5

Vanhu vo tala va sungula ku tsakela loko va vona ndlela leyi Bibele yi pfunaka vanhu hayona. Makwerhu wa xisati wa le New York, loyi a endzelaka vanhu lava vulavulaka Ximandarin u ri: “Ndzi ringeta ku va komba leswaku ndza va rhandza naswona ndzi rhiya ndleve loko va vulavula. Loko ndzi xiya leswaku i vahlapfa, ndzi va vutisa ndzi ku: ‘Xana ma karhi ma byi tolovela vutomi bya tiko leri? Se mi wu kumile ntirho? Va mi khome njhani vanhu va ndhawu leyi?’” Nkarhi wun’wana leswi swi pfula ndlela yo chumayela. Loko swi fanerile, makwerhu loyi u ya emahlweni a ku: “U ehleketa leswaku i yini lexi nga pfunaka vanhu leswaku va hanyisana kahle? Xana ndzi nga ku komba xivuriso xin’wana xa le Bibeleni? Xi ri: ‘Ku sungula nyimpi swi fana ni ku pfulela mati; loko mholovo yi nga si sungula suka u famba.’ Xana u ehleketa leswaku xitsundzuxo lexi, xi nga hi pfuna ku hanyisana ni van’wana?” (Swiv. 17:14) Mabulo yo tano ma nga hi pfuna ku xiya vanhu lava nga tsakelaka leswaku hi tlhela hi vuya hi ta yisa bulo emahlweni. w19.07 23 ¶13

Lava va ha ku kumaka swiavelo leswintshwa va lava mi twisisa xiyimo xa vona, ku nga ri ku va puta vusiwana. Swi nga endleka va ri eku vabyeni kumbe va khathalela xirho xa ndyangu lexi vabyaka. Kumbexana va ri ni gome hikwalaho ka leswi va nga feriwa. Swi nga ha endleka va twa ku vava hikwalaho ka leswi va siyeke vanghana va vona exiavelweni xa vona xa khale. Swi nga ha va tekela nkarhi ku tolovela leswaku va sukile exiavelweni xa vona. Loko u chumayela na vona ni ku va khutaza hi xikombiso xa wena lexinene, u nga va pfuna leswaku va tolovela. Makwerhu wa xisati loyi a chumayeleke malembe yo tala etikweni rimbe u ri: “Exiavelweni xa mina xa khale a ndzi fambisa tidyondzo ta Bibele siku ni siku. Kambe eka lexintshwa a swi tika hambi ku ri ku hlayela munhu tsalwa ensin’wini kumbe ku n’wi komba vhidiyo. Kambe vamakwerhu a va famba na mina eka maendzo yo vuyela ni le ka tidyondzo ta vona ta Bibele. Loko ndzi vona ku hiseka ka vamakwerhu lava, loko va ri karhi va fambisa tidyondzo ta Bibele, swi ndzi endle ndzi hatla ndzi tolovela nsimu ya hina. Ndzi dyondze ndlela yo sungula mabulo ensin’wini. Sweswo swi ndzi pfune leswaku ndzi tlhela ndzi va ni ntsako.” w19.08 22 ¶10; 24 ¶13-14

Swi nga ha hi tikela ku rhandza vamakwerhu loko hi ri ni mukhuva wo va xopaxopa swihoxo ku fana na Efodiya na Sintika. Siku ni siku hinkwerhu hi endla swihoxo. Loko hi tshamela ku ehleketa hi swihoxo swa van’wana swi ta hi tikela ku va rhandza. Hi xikombiso, loko makwerhu a rivala ku ta hi pfuna ku basisa Holo ya Mfumo hi nga ha khunguvanyeka. Kutani loko hi sungula ku longoloxa swihoxo swakwe hi ta ya hi khunguvanyeka ku tlula mpimo, ivi hi nga ha n’wi rhandzi. Loko u ri ni xiphiqo xo fana ni lexi, ehleketa hi leswi: Yehovha wa swi vona swihoxo swa hina ni swa makwerhu yoloye. Hambileswi a vonaka swihoxo leswi, wa n’wi rhandza makwerhu yoloye, na hina wa hi rhandza. Leswi Yehovha a hi rhandzaka, na hina hi fanele hi tekelela rirhandzu rakwe hi ku languta leswinene eka vamakwerhu. Loko hi tikarhatela ku rhandza vamakwerhu hi ta va ni vun’we.—Filp. 2:1, 2. w19.08 9-10 ¶7-8

Yehovha wa va rhandza vanhu lava titsongahataka naswona hi vona ntsena va nga va ka ni vuxaka lebyinene na yena. Kambe “u fambela ekule ni loyi a tikukumuxaka.” Hinkwerhu hi lava ku tsakisa Yehovha naswona hi lava ku va ni vuxaka lebyinene na yena, hi swona leswi endlaka hi lava ku titsongahata. Ku titsongahata swi vula ku nga tikukumuxi ni ku nga titeki u antswa ku tlula van’wana. Hi ku ya hi Bibele, munhu loyi a titsongahataka a nga titeki a tlakukile eka Yehovha Xikwembu ni le ka vanhu van’wana. Munhu loyi a titsongahataka wa swi twisisa leswaku ku na leswi van’wana va n’wi tlulaka ha swona. (Filp. 2:3, 4) Vanhu van’wana va vonaka onge va titsongahata hileswi va miyeleke kumbe va nga ni tingana. Van’wana va xixima hikwalaho ka leswi va dyondzisiweke va ha ri vatsongo. Kambe u nga kuma leswaku kahlekahle a va titsongahati nikatsongo. Hi ku famba ka nkarhi, loko u ya u va tiva u ta ma vona mavala ya vona.—Luka 6:45. w19.09 2 ¶1, 3-4

“Mahungu lamanene mayelana ni Hosi ya hina Yesu” ma katsa ntiyiso lowu Yesu a wu dyondziseke. Hi yingisa mahungu lamanene loko hi hanya hi wona. Ku yingisa swi katsa ku rhangisa Mfumo evuton’wini bya hina, ku hanya hi milawu ya Xikwembu ni ku chumayela hi Mfumo wa xona. (Mat. 6:33; 24:14) Swi tlhela swi katsa ku seketela vamakwavo va Kreste lava totiweke loko va ri karhi va endla ntirho wa vona wa nkoka swinene. (Mat. 25:31-40) Ku nga ri khale va ta kombisa leswaku va wu tlangela nseketelo lowu lava “tinyimpfu tin’wana” va wu kombiseke. (Yoh. 10:16) Njhani? Loko nyimpi ya Armagedoni yi nga si sungula, hinkwavo lava 144 000 va ta va va ri etilweni naswona a va nge he fi. Va ta va xiphemu xa mavuthu ya le tilweni lama nga ta lovisa Gogo ni ku sirhelela “ntshungu lowukulu” wa tinyimpfu tin’wana. (Nhlav. 2:26, 27; 7:9, 10) Mayana nkateko lowu lava ntshungu lowukulu va nga ta va va tiphine ha wona hi ku seketela malandza ya Yehovha lama totiweke! w19.09 12-13 ¶16-18

Hikwalahokayini swi hi phyuphyisa ku endla ntirho lowu Yesu a hi nyikeke wona? Hikuva hi ni valanguteri lavanene ngopfu. Yehovha, Mulanguteri wa hina la Tlakukeke, a nga na tihanyi naswona u ni moya wo tlangela. Wa wu tlangela ntirho lowu hi wu endlaka. (Hev. 6:10) U hi nyika matimba yo kota ku endla ntirho lowu a hi nyikeke wona. (2 Kor. 4:7; Gal. 6:5) Hosi ya hina Yesu, u hi vekele xikombiso lexinene. (Yoh. 13:15) Vakulu lava hi khathalelaka emavandlheni va tikarhatela ku tekelela Yesu, “murisi lonkulu.” (Hev. 13:20; 1 Pet. 5:2) Va tikarhatela ku va ni musa, ku hi khutaza ni ku va ni xivindzi loko va ri karhi va hi wundla ni ku hi sirhelela. Nakambe hi ni vanghana lavanene ngopfu. A va kona vanhu van’wana lava nga ni vun’we kumbe lava rhandzanaka ku fana na hina. Ehleketa hi leswi: Hi tirha ni vanhu lava nga ni mahanyelo lamanene kambe a va titlakusi. Va teka van’wana va ri lava tlakukeke eka vona. A va hi teki tanihi vatirhikulobye kambe va hi teka tanihi vanghana va vona. Ndlela leyi va hi rhandzaka hayona i yikulu swinene lerova va tiyimisele hambi ku ri ku hi fela! w19.09 20 ¶1; 23 ¶12-14

Eka xikhutazo xa yena, muapostola Pawulo u boxe “siku ra Yehovha.” (1 Tes. 5:1-6) Tindzimana leti ti vulavula hi nkarhi lowu nga ta sungula hi ku hlaseriwa ka “Babilona Lonkulu,” ku nga mfumo wa misava wa vukhongeri bya mavunwa kutani wu hela hi ku fika ka Armagedoni. (Nhlav. 16:14, 16; 17:5) Pawulo u tlhela a hi byela leswi hi faneleke hi swi endla leswaku hi lunghekela “siku ra Yehovha.” A hi fanelanga hi “[etlela] ku fana ni lavan’wana hinkwavo lava etlelaka.” Hi fanele hi ‘tshama hi xalamukile’ leswaku hi nga tikumi hi hoxe nhompfu eka swa tipolitiki. Loko ho nghenelela eka swa tipolitiki, hi ta va “xiphemu xa misava.” (Yoh. 15:19) Ha swi tiva leswaku Mfumo wa Xikwembu hi wona ntsena lowu nga ta tisa ku rhula laha misaveni. Hi lava ku pfuna van’wana leswaku na vona va tiva leswi Bibele yi swi profeteke hi misava leyi. Loko nhlomulo lowukulu wo kala wu sungula, a swi nge he koteki leswaku vanhu va sungula ku tirhela Yehovha. Leswi hi swona swi endlaka leswaku ntirho wa hina wo chumayela wu va wa xihatla swinene! w19.10 8 ¶3; 9 ¶5-6

Loko va hetile ku tsala rungula rero eka bukunsongwa, Yeremiya u kombele munghana wakwe Baruku leswaku a ri hlayela vanhu. (Yer. 36:5, 6) Hi xivindzi Baruku u wu endlile ntirho wolowo hambileswi a wu ri ni khombo. A swi kanakanisi leswaku Yeremiya a tsake ngopfu loko a twa leswaku Baruku u ye exivaveni xa tempele kutani a endla leswi a n’wi kombeleke swona. (Yer. 36:8-10) Tihosana ta le Yuda titwe leswi Baruku a swi endleke naswona ti n’wi kombele leswaku a ti hlayela bukunsongwa yoleyo hi rito leri tlakukeke! (Yer. 36:14, 15) Tihosana teto ti byele Hosi Yoyakimi leswi Yeremiya a swi vuleke. Hosi Yoyakimi u dye makala loko a twa marito lama tsariweke hi Yeremiya lerova a hisa bukunsongwa a tlhela a lerisa leswaku ku khomiwa Yeremiya na Baruku. Hambiswiritano, Yeremiya u teke bukunsongwa yin’wana a yi nyika Baruku leswaku a tlhela a tsala rungula leri humaka eka Yehovha, Baruku u tsale “marito hinkwawo lawa a ma ri ebukwini leyi Hosi Yoyakimi wa le Yuda a yi hiseke hi ndzilo.”—Yer. 36:26-28, 32. w19.11 3-4 ¶4-6

Yehovha a nga tiendla nchumu wun’wana ni wun’wana leswaku a hetisisa xikongomelo xakwe. Hi xikombiso, ku ni swilo swo tala swinene leswi Yehovha a swi endlaka, swin’wana swa swona hi leswi landzelaka: i Mudyondzisi, Muchaveleri ni Muchumayeri wa mahungu lamanene. (Esa. 48:17; 2 Kor. 7:6; Gal. 3:8) Hambiswiritano, mikarhi yo tala u tirhisa vanhu leswaku a hetisisa swikongomelo swakwe. (Mat. 24:14; 28:19, 20; 2 Kor. 1:3, 4) Nakambe, Yehovha a nga nyika un’wana ni un’wana wa hina vutlhari ni matimba yo endla xin’wana ni xin’wana leswaku a hetisisa xikongomelo xakwe. Leswi swi fambisana kahle ni nhlamuselo ya vito ra Yehovha, hilaha swidyondzi swo tala swi ri twisisaka hakona. Hinkwerhu ha swi lava ku tirhisiwa hi Yehovha kambe van’wana va kanakana leswaku wa va tirhisa. Hikwalahokayini? Va tibyela leswaku a va nge swi koti ku n’wi tirhela hilaha ku faneleke hikwalaho ka malembe, swiyimo kumbe vuswikoti bya vona. Kasi van’wana va titwa va enerisekile hi leswi va swi endlaka sweswi naswona a va voni ku ri na xivangelo xo endla leswi engetelekeke. w19.10 20 ¶1-2

Rifuwo ri nga endla leswaku hi kavanyeteka ni ku honisa xitlhangu xa ripfumelo ra hina. Muapostola Pawulo u te: “A ri kona socha leri nga tinghenisaka emabindzwini, loko ri lava ku rhandziwa hi loyi a ri tholeke.” (2 Tim. 2:4) Masocha ya le Rhoma a ma nga pfumeleriwi ku endla mitirho yin’wana. Ku fana ni masocha lama lunghekeke, a hi swi lavi ku kavanyeteka leswaku hi nga xi fikeleli xikongomelo xa hina, xa ku tsakisa Varhangeri va hina ku nga Yehovha na Kreste. Sweswo i swa nkoka eka hina ku tlula swilo hinkwaswo leswi hi nga swi kumaka emisaveni leyi yi lawuriwaka hi Sathana. Hi tirhisa nkarhi ni matimba ya hina entirhweni wa Yehovha naswona hi tikarhatela ku khathalela xitlhangu xa ripfumelo ra hina ni mahavelo ya hina hinkwawo ya moya. Hi fanele hi tshama hi xalamukile! Hikwalahokayini? Muapostola Pawulo u hi lemukisile a ku, “lava tiyimiseleke ku fuwa” va ta ‘hambukisiwa eripfumelweni.’—1 Tim. 6:9, 10. w19.11 17 ¶12, 14-15

Xitiviso lexi nge “ku ni ku rhula ni nsirhelelo” xi ta endliwa ku nga si fika “siku ra Yehovha.” (1 Tes. 5:1-6) Eka 1 Vatesalonika 5:2, “siku ra Yehovha” ri vula ‘nhlomulo lowukulu.’ (Nhlav. 7:14) Hi ta swi tiva njhani loko nhlomulo lowukulu se wu ri kwala nyongeni? Bibele yi hi byela hi xitiviso lexi nga tolovelekangiki lexi nga ta endliwa. Xitiviso xexo xi ta va xi kombisa leswaku nhlomulo lowukulu se wu fikile. Xexo ku ta va ku ri xitiviso xa leswaku “ku ni ku rhula ni nsirhelelo” lexi ku profetiweke ha xona. Xana vafundhisi va ta katseka? Kumbexana. Hambiswiritano, ha swi tiva leswaku xitiviso xexo xi ta va xi ri mavunwa lama humaka eka madimona. Xitiviso xexo xi ta va xi ri ni khombo hikuva xi ta endla vanhu va titwa va sirhelelekile, kasi koloko ku ta va ku sungula ka nhlomulo lowukulu. Entiyisweni, “ndzoviso wa xitshuketa wu ta va wela hi xihatla kukotisa xitlhavi xa maxangu eka wansati la tikeke.” Ku ta endleka yini hi malandza yo tshembeka ya Yehovha? Na wona ma ta hlamala kambe ma ta va ma vambe ngoma. w19.09 9 ¶7-8

Loko u endla swiboho veka siku kumbe nkarhi. Loko u tiva siku kumbe nkarhi, swi ta ku olovela ku heta leswi u swi sungulaka. Hi xikombiso, u nga endla xiboho xo hlaya Bibele nkarhi ni nkarhi. Kambe loko u nga vekanga nkarhi lowu u nga ta yi hlaya ha wona, a wu nge swi koti ku fikelela xikongomelo xa wena. Kumbe vakulu va nga endla xiboho xo endla maendzo ya vurisi kambe ku hela tin’hweti to tala va nga si xi hetisisa xiboho xa vona. Leswaku va kota ku hetisisa leswi va swi sunguleke, va fanele va tivutisa swivutiso swo tanihi leswi: “Xana se ha va tiva vamakwerhu lava hi faneleke hi va endzela? Xana se hi ri vekile siku ni nkarhi lowu hi nga ta va endzela ha wona?” Ringanisela. A nga kona munhu loyi a nga ni nkarhi, switirhisiwa ni matimba yo endla swilo hinkwaswo leswi a swi lavaka. Hikwalaho, u fanele u ringanisela. Loko swi fanela, u nga boheka ku cinca xiboho lexi u xi endleke lexi u nga ta ka u nga swi koti ku xi hetisisa. w19.11 29 ¶11-12

Vuprofeta lebyi hlamuselaka ndlela leyi vutomi byi nga ta va hayona laha misaveni byi kumeka eka Esaya 65:21-23. A swi vuli swona leswaku vanhu va ta khondla mavoko kutani swakudya swi titela va lo gee! Kurinasweswo, Bibele yi vula leswaku hi nkarhi wolowo, vanhu va Xikwembu va ta endla ntirho lowu va nga ta wu tsakela. Loko nkarhi wolowo wu hela, ha tiyiseka leswaku “ntumbuluko wu ta tshunxiwa evuhlongeni bya ku onhaka kutani wu va ni tshunxeko lowu vangamaka wa vana va Xikwembu.” (Rhom. 8:21) Tanihi leswi Yehovha a endlele Vaisrayele lunghiselelo ra ku ringanisela loko swi ta emhakeni ya ntirho ni ku wisa, swi ta va tano ni le ka vanhu vakwe hi nkarhi wa Mfumo wa Kreste wa Gidi ra Malembe. Va ta kuma nkarhi wo gandzela Yehovha. Namuntlha ku gandzela Xikwembu swi endla leswaku vanhu va tsaka, swi ta va tano ni le misaveni leyintshwa. Hakunene, hi ni swivangelo leswi twalaka swo tsaka loko hi ehleketa hi ntirho lowunene ni ndlela leyi hi nga ta tiphina hayona hi ku gandzela Yehovha hi nkarhi wa Mfumo wa Kreste wa Gidi ra Malembe. w19.12 12 ¶15; 13 ¶17-18

Ku “dyondzisa” swi vula ku “letela ni ku tsundzuxa hi ku phindhaphindha.” Leswaku vatswari va kota ku endla leswi, nkarhi ni nkarhi va fanele va tinyika nkarhi wo tshama ni vana va vona. Mikarhi yin’wana swi nga vonaka swi heta matimba ku tshamela ku tsundzuxa vana xilo xin’we. Kambe vatswari va ta teka leswi tanihi ndlela yo pfuna vana va vona leswaku va twisisa ni ku hanya hi Rito ra Xikwembu. Va tive kahle. Pisalema 127 yi fanisa vana ni miseve. (Ps. 127:4) Tanihi leswi miseve yi endliwaka hi swilo swo hambanahambana naswona yi nga ringaniki, ni vana a va fani. Hikwalaho, vatswari va fanele va tirhisa vutlhari loko swi ta eku dyondziseni ka n’wana ha un’we. Vatekani van’wana va le Israel, lava pfuneke vana va vona vambirhi leswaku va tirhela Yehovha, va hlamusela leswi va pfuneke, va ri: “A hi dyondzisa n’wana ha un’we Bibele a ri yexe.” Nhloko ya ndyangu yi ta endla xiboho loko swi fanerile ku dyondzisa vana hi ndlela leyi. w19.12 26-27 ¶18-20

Loko hi ri emaxangwini, ha wu tlangela nchavelelo lowu hi kombiwaka wona hi tindlela to hambanahambana! Ryan loyi tata wakwe a loveke emhangwini swi nga languteriwanga, u ri: “Loko u ri emaxangwini swilo swo tala leswi u toloveleke ku swi endla u swi vona swi ri ndzhwalo. Ku pfuniwa hi swilo swo karhi hambiloko swilo swa kona swi nga nyawuli swa chavelela.” U nga swi tekeli hansi swilo leswi u swi endlelaka van’wana hambiloko swi nga nyawuli swi nga va chavelela swinene. Mudyondzisiwa Marka loyi a hanyeke hi nkarhi wa Yesu, a a ri Mukreste loyi a gingiritekaka. Hambiswiritano, Marka u tinyike nkarhi wo chavelela muapostola Pawulo naswona Pawulo a a titwa a ntshunxekile ku kombela mpfuno eka Marka. Angela, loyi a a ri ni gome hikwalaho ka leswi xaka rakwe ri dlayiweke, u wu tlangerile swinene nchavelelo lowu a wu kumeke. U ri: “Swa olova ku vulavurisana ni vanhu lava tiyimiseleke ku pfuna hi mbilu hinkwayo naswona va nga chaviki ku endla tano.” Hi nga tivutisa leswi: ‘Xana ndzi tiveka hi ku chavelela Vakrestekulorhi?’ w20.01 11-12 ¶14-16

Mutotiwa a nga dya swifanekiselo “swi nga fanelanga” eXitsundzuxweni hi ndlela yihi? Hi ku dya swifanekiselo a ri karhi a swi tiva leswaku mahanyelo yakwe a ma fambisani ni milawu ya Yehovha. (Hev. 6:4-6; 10:26-29) Vatotiwa va swi tiva leswaku va fanele va tshama va tshembekile loko va lava ku kuma “hakelo ya ku vitaneriwa etilweni hi Xikwembu hi ku tirhisa Kreste Yesu.” (Filp. 3:13-16) Hi ku tirhisa moya lowo kwetsima, Yehovha u pfuna malandza yakwe leswaku ma titsongahata naswona ma nga tikukumuxi. (Efe. 4:1-3; Kol. 3:10, 12) Hikwalaho, vatotiwa a va titeki va tlakukile ku tlula van’wana. Va swi tiva leswaku Yehovha a nga va nyiki moya wo tala wo kwetsima ku tlula malandza yakwe laman’wana. A va titeki va tiva Bibele ku antswa ku tlula vanhu hinkwavo. Nakambe a va nge byeli munhu leswaku u totiwile naswona u fanele a sungula ku dya swifanekiselo eXitsundzuxweni. Kurinasweswo, hi ku titsongahata va swi tiva leswaku i Yehovha ntsena loyi a hlawulaka vanhu lava yaka etilweni. w20.01 27-28 ¶4-5

Yehovha u lava leswaku hi tshinela eka yena hi tlhela hi vulavurisana na yena. U hi khutaza leswaku hi “phikelela exikhongelweni” naswona wa hi yingisa mikarhi hinkwayo. (Rhom. 12:12) A nga tshami a khomekile kumbe ku karhala lerova a nga tsandzeka ku hi yingisa. Hi kombisa leswaku ha n’wi yingisa hi ku hlaya Bibele ni tibuku leti hi pfunaka ku yi twisisa. Nakambe hi kombisa leswaku ha n’wi yingisa hi ku rhiya ndleve loko hi ri etinhlengeletanweni ta vandlha. Loko hi vulavurisana na Yehovha nkarhi ni nkarhi hi ta va ni vuxaka lebyinene na yena. Yehovha u lava hi n’wi chululela leswi nga etimbilwini ta hina hi xikhongelo. (Ps. 62:8) Hi fanele hi tivutisa xivutiso lexi: ‘Xana loko ndzi khongela ndzi vula swilo swin’we nkarhi ni nkarhi kumbe ndzi khongela swi huma embilwini?’ A swi kanakanisi leswaku wa n’wi rhandza swinene Yehovha naswona u lava ku tshama u ri ni vuxaka lebyinene na yena. Sweswo swi ta endleka ntsena loko u vulavurisana na yena nkarhi ni nkarhi. N’wi phofulele ta le mbilwini. N’wi byele swilo leswi ku tsakisaka ni leswi ku twisaka ku vava. Tiyiseka leswaku loko u kombela mpfuno eka yena u ta ku pfuna. w20.02 9 ¶4-5

Yehovha u nyike vakulu vutihlamuleri bya nkoka byo khathalela vanhu va yena. Vakulu va nga dyondza swo tala loko va kambisisa ndlela leyi Nehemiya a a tirhisana hayona ni vanhu va Yehovha. Leswi Nehemiya a ri ndhunankulu eYuda, a ri ni vulawuri byo karhi. (Neh. 1:11; 2:7, 8; 5:14) Ehleketa hi mitlhontlho yin’wana leyi Nehemiya a langutane na yona. U kume leswaku Vayuda a va nga yi tirhisi hi ndlela leyinene tempele naswona a va nga va seketeli Valevhi hi timali hilaha Nawu a wu lava hakona. Vayuda a va nga ha wu xiximi nawu wa Savata naswona vavanuna van’wana a va teke vavasati vamatiko mambe. Ndhunankulu Nehemiya a a fanele a lulamisa xiyimo lexi xo tika. (Neh. 13:4-30) Nehemiya a nga byi tirhisanga hi ndlela yo biha vulawuri byakwe hi ku vekela vanhu va Xikwembu swinawanawana. Ematshan’weni ya sweswo, u kombele Yehovha hi xikhongelo leswaku a n’wi kongomisa, a tlhela a dyondzisa vanhu Nawu wa Yehovha. (Neh. 1:4-10; 13:1-3) Hi ku titsongahata Nehemiya u tirhe ni vamakwavo ni ku va pfuna ku pfuxeta makhumbi ya Yerusalema.—Neh. 4:15. w19.09 16 ¶9-10