September

Xikombiso lexi Yehovha na Yesu va xi vekeke xa ku tirha hi matimba, xana xi kombisa leswaku a hi fanelanga hi wisa? Doo! Yehovha a nga karhali hikwalaho a nga boheki ku wisa loko a endle ntirho wo karhi. Kambe Bibele yi vula leswaku endzhaku ka loko Yehovha a tumbuluxe matilo ni misava, “u tshike ku tirha a wisa.” (Eks. 31:17) Hikwalaho, sweswo swi kombisa leswaku Yehovha u yime ku tirha kutani a tiphina hi swilo leswi a swi endleke. Hambileswi Yesu a a tirha hi matimba loko a ha ri laha misaveni kambe a a tinyika nkarhi wo wisa ni wo tiphina hi swakudya ni vanghana vakwe. (Mat. 14:13; Luka 7:34) Bibele yi khutaza malandza ya Xikwembu leswaku ma fanele ma tirha. Ma fanele ma gingiriteka ematshan’weni yo va malolo. (Swiv. 15:19) Kumbexana wa tirha leswaku u ta wundla ndyangu wa wena. Vadyondzisiwa hinkwavo va Kreste va ni vutihlamuleri byo chumayela mahungu lamanene. Hambiswiritano, u fanele u tinyika nkarhi wo wisa. w19.12 2 ¶2; 3 ¶4-5

Papalata ku vulavula hi madimona. Emhakeni leyi, hi fanele hi tekelela xikombiso lexi Yesu a hi vekeleke xona. Loko a nga si ta laha misaveni, Yesu a a tshama etilweni naswona a a tiva swo tala hi Sathana ni madimona. Kambe a a nga vulavuli hileswi mimoya yoleyo yo biha yi swi endleke. Yesu a a lava ku dyondzisa vanhu hi Yehovha ku nga ri hi Sathana. Hi nga tekelela Yesu hi ku tshika ku hangalasa mahungu ya leswi ku vuriwaka leswaku madimona ma swi endlile. Ematshan’weni ya sweswo, hi swi kombisa hi marito leswaku “mbilu ya [hina] yi xalamukele mhaka leyinene ngopfu,” ku nga ntiyiso lowu nga eBibeleni. (Ps. 45:1) U nga chavisiwi hi mimoya yo biha. Namuntlha, hi nga ha humeleriwa hi swilo swo biha. Tinghozi, mavabyi kumbe rifu swi nga hi wela hi xitshuketa. Kambe a hi fanelanga hi anakanya leswaku mimoya yo biha leyi nga vonakiki hi yona yi swi vangeke. Bibele yi vula leswaku “nkarhi ni xiendlakalo lexi nga languteriwangiki” swi nga wela un’wana ni un’wana. (Ekl. 9:11) Yehovha u swi kombisile leswaku u ni matimba ku tlula madimona. w19.04 23-24 ¶13-14

Xana vakulu va landzela nawu wa tiko loko va mangala swihehlo swa milandzu ya ku xanisiwa ka vana hi swa masangu emaphoriseni? Ina. Etindhawini leti nga ni milawu yoleyo, vakulu va ringeta ku landzela milawu ya tiko yo mangala milandzu ya ku xanisiwa ka vana. Milawu yoleyo a yi lwisani ni nawu wa Xikwembu. (Mit. 5:28, 29) Loko vakulu va vikeriwe nandzu wo tano a va yimayimi, va lava nkongomiso erhavini leswaku va ta kota ku landzela nawu wa tiko. Vakulu va byela vahlaseriwa, vatswari va vona ni van’wana lava tivaka hi mhaka leyi leswaku va nga chavi ku ya mangala emaphoriseni. Ku fanele ku endliwa yini loko muhehliwa ku ri xirho xa vandlha kutani mhaka leyi yi tiveka emugangeni? Xana Mukreste loyi a mangaleke u tise xisandzu evitweni ra Xikwembu? Doo. Muxanisi hi yena la tiseke xisandzu evitweni ra Xikwembu. w19.05 10 ¶13-14

Bibele yi lerisa wanuna ni wansati lava tekaneke leswaku va xiximana ni ku hlayisa swihlambanyo leswi va swi endleke loko va tekana. Loko yi khutaza vatekani leswaku va tiyimisela ku tshama swin’we yi ri: “Wanuna [u] ta siya tata wakwe ni mana wakwe kutani a namarhela nsati wakwe naswona va ta va nyama yin’we.” (Gen. 2:24) Ku hambana ni sweswo, lava lawuriwaka hi vutlhari bya misava va vula leswaku un’wana ni un’wana u fanele a khathala hi swilaveko swa yena n’wini. Buku yin’wana leyi vulavulaka hi ku dlaya vukati yi te: “Ematikweni man’wana, loko vanhu va tekana xihlambanyo lexi nge, ‘loko havambirhi ha ha hanya’ va xi cince xi ku, ‘hi ta tshama swin’we ntsena loko ha ha rhandzana.’” Langutelo ro tano hi vukati ri endla leswaku mindyangu yi hohloka naswona ri vangele vanhu vo tala mabibi ya mbilu. Swi le rivaleni leswaku ndlela leyi misava yi byi tekaka hayona vukati i vuphukuphuku. w19.05 23 ¶12

Pawulo a a karhatekile hikuva Vakreste van’wana a va vonaka va kuceteriwa hi miehleketo ya Sathana leyi nga ni khombo. (Efe. 4:17-19) Sweswo swi nga ha endleka ni le ka un’wana ni un’wana wa hina. Sathana i mufumi wa misava leyi naswona a nga ha tirhisa marhengu yo hambanahambana leswaku a hi endla hi fularhela Yehovha. Hi xikombiso loko hi navela ku va ni ndhuma a nga ha tirhisa sweswo leswaku a hi endla hi fularhela Yehovha. A nga ha tlhela a tirhisa swilo leswi hi swi dyondzeke ekaya, exikolweni ni le ka vanhu lava hi tshamaka na vona, leswaku a hi endla hi ehleketa hi ndlela leyi a lavaka hayona. Xana hi nga swi kota ku tsuvula swilo “leswi simekiweke swi tiya” emiehleketweni ya hina? (2 Kor. 10:4) Xiya nhlamulo ya Pawulo: “Hi wisetela mianakanyo ni swihinga hinkwaswo leswi sivelaka vanhu ku tiva Xikwembu, hi hlula mianakanyo hinkwayo leswaku yi ta yingisa Kreste.” (2 Kor. 10:5) A swi kanakanisi leswaku hi ku pfuniwa hi Yehovha hi nga swi kota ku cinca ndlela leyi hi ehleketaka hayona. w19.06 8 ¶1-3

Hambileswi Hana, Davhida ni mupisalema a va tshikilelekile swinene a va titshega hi Yehovha. Va lahlele ku vilela hinkwako ka vona eka yena hi xikhongelo. A va nga chavi ku n’wi byela leswi a swi endla va titwa va tshikilelekile. A va tshikanga ku gandzela Yehovha endlwini yakwe. (1 Sam. 1:9, 10; Ps. 55:22; 73:17; 122:1) Yehovha u hlamule xikhongelo xa un’wana ni un’wana wa vona hi musa. Hana u kume ku rhula ka miehleketo. (1 Sam. 1:18) Davhida u tsale a ku: “Makhombo ya lowo lulama ma tele, kambe Yehovha wa n’wi kutsula eka wona hinkwawo.” (Ps. 34:19) Kasi mupisalema u titwe onge Yehovha u “khome voko ra [yena] ra xinene” naswona a n’wi tsundzuxa hi rirhandzu. (Ps. 73:23, 24) Hi dyondza yini eka swikombiso leswi? Mikarhi yin’wana hi nga ti kuma hi ri ni swiphiqo leswi nga hi vangelaka ntshikilelo. Kambe hi nga swi kota ku swi hlula loko hi anakanyisisa hi ndlela leyi Yehovha a va pfuneke hayona van’wana, loko hi titshega hi xikhongelo ni ku n’wi yingisa hi endla leswi a hi lerisaka swona.—Ps. 143:1, 4-8. w19.06 17 ¶14-15

U nga pfumeleli swilo leswi vanhu va swi vulaka kumbe va swi endlaka swi ku endla u khomiwa hi tingana hileswi u nga Mbhoni ya Yehovha. (Mik. 4:5) Xiya xikombiso xa leswi endliweke hi vaapostola lava a va ri eYerusalema endzhakunyana ka loko Yesu a dlayiwile. A va swi tiva leswaku varhangeri va vukhongeri bya Vayuda a va va venga swinene. (Mit. 5:17, 18, 27, 28) Hambiswiritano, siku ni siku a va ya etempeleni va ya chumayela va kombisa leswaku i vadyondzisiwa va Yesu. (Mit. 5:42) A a va nga ri matoya. Na hina hi nga tshika ku chava vanhu, loko hi nga titumbeti leswaku hi Timbhoni ta Yehovha laha hi tirhaka kona, exikolweni kumbe emugangeni wa ka hina. (Mit. 4:29; Rhom. 1:16) Hikwalahokayini vaapostola a va tsakile? Hikuva a va xi tiva xivangelo xa ku vengiwa ka vona naswona a va swi teka ku ri lunghelo ku xanisiwa hikwalaho ko endla ku rhandza ka Yehovha. (Luka 6:23; Mit. 5:41; 1 Pet. 2:19-21) Loko hi swi twisisa leswaku hi vengiwa hikwalaho ko endla leswinene a hi nge tshiki ku tirhela Yehovha hikwalaho ko vengiwa hi vanhu. w19.07 7 ¶19-20

Yesu ni valandzeri vakwe lava a va ri Vayuda a va wisa hi Savata hikuva a va ri ehansi ka Nawu wa Muxe. Yesu u swi kombise hi marito ni swiendlo leswaku a swi nga bihanga ku pfuna van’wana hi Savata. (Mat. 12:9-11) A a nga swi teki ku ri nandzu ku pfuna van’wana hi Savata. Swiendlo swakwe a swi kombisa leswaku a xi twisisa kahle xikongomelo xa Savata. Leswi hi siku rero vanhu va Xikwembu a va wisa eka mitirho ya vona ya siku ni siku, a va kota ku gandzela Xikwembu handle ko kavanyetiwa. Yesu u kulele endyangwini lowu siku ra Savata a wu ri tirhisela ku gandzela Xikwembu. Leswi hi swi vona kahle eka leswi hi swi hlayaka mayelana na Yesu loko a ri eka rikwavo eNazareta: “[Yesu] a nghena esinagogeni a fika a yima a hlaya Matsalwa, hilaha a a tolovele ku endla hakona hi siku ra Savata.” (Luka 4:15-19) Vadyondzisiwa a va wu xixima ngopfu nawu wa Savata lerova va tshike ku lunghiselela ntirho wo lahla Yesu ku kondza ku hundza siku ra Savata.—Luka 23:55, 56. w19.12 4 ¶10

Mukreste un’wana ni un’wana wa ntiyiso wa katseka eku laveni ka lava va lavaka ku va vadyondzisiwa. Ntirho wo lava vadyondzisiwa hi nga wu fanisa ni vanhu lava lavaka n’wana la lahlekeke. Hi ndlela yihi? Ehleketa hi leswi humeleleke xifanyetana xa malembe manharhu lexi a xi lahlekile. Vanhu va kwalomu ka 500 va fambe va xi lava. Endzhaku ka kwalomu ka tiawara ta 20 va ri eku laveni, un’wana wa vanhu lava a va ri eku laveni u hetelele a xi kume ensin’wini ya mavele. Munhu yoloye u ale ku themendheriwa. U te: “Xifanyatana xi kumeke hileswi a hi khomisane hi tele.” Vanhu vo tala va fana ni xifanyetana xexo lexi a xi lahlekile. A va na ntshembo naswona va lava ku pfuniwa. Hina lava tlulaka nhungu wa timiliyoni ha khomisana leswaku hi lava vanhu lava. Swi nga endleka wena u nga n’wi kumi munhu loyi u nga dyondzaka Bibele na yena. Kambe vahuweleri van’wana lava u tirhaka na vona ensin’wini, va nga ha n’wi kuma munhu loyi a lavaka ku dyondza ntiyiso lowu nga eRitweni ra Xikwembu. Loko makwerhu a kuma munhu kutani munhu wa kona a hundzuka mudyondzisiwa wa Kreste, hinkwavo lava katsekeke va tsaka. w19.07 16-17 ¶9-10

Muapostola Pawulo u tsundzuxe Vakreste va le Filipiya leswaku va ya emahlweni va tsutsuma hi ku tiyisela. Vakreste va le Filipiya va sungule ku xanisiwa ku sukela loko vandlha ra vona ri simekiwile. Sweswo swi sungule loko Pawulo na Silasi va fika eFilipiya kwalomu ka 50 C.E, endzhaku ko landzela nkongomiso wa Xikwembu wo “Pelela eMakedoniya.” (Mit. 16:9) Va fike va kuma Lidiya, wansati loyi ‘a va yingiseleke, kutani Yehovha a pfula mbilu yakwe swinene’ leswaku a yingisa mahungu lamanene. (Mit. 16:14) Swi nga si ya kwihi, Lidiya ni ndyangu wakwe va khuvuriwile. Kambe Diyavulosi a va langute hi tihlo ro tshwuka. Vavanuna va muti va kokakoke Pawulo na Silasi va va yisa etindhuneni ta tiko va fika va va hehla hi mavunwa, va vula leswaku va pfilunganya muti. Hikwalaho ka sweswo, Pawulo na Silasi va biwile kutani va pfaleriwa ejele, endzhakunyana va byeriwa leswaku va huma emutini. (Mit. 16:16-40) Xana va vhele va tshika? Nikatsongo! Xana ku endleke yini hi vamakwerhu va vandlha leri ra ha ku simekiwaka? Lexi tsakisaka na vona va tiyiserile! A swi kanakanisi leswaku xikombiso xa Pawulo na Silasi xi va khutazile swinene. w19.08 2 ¶1-2

A swi kanakanisi leswaku “mihandzu yo lulama” yi katsa ku rhandza Yehovha ni vanhu vakwe. Nakambe yi katsa leswaku hi byela van’wana hi Yesu ni hi ntshembo wa hina. Loko hi endla ntirho wo endla vadyondzisiwa, hi veka “mihandzu yo lulama.” (Mat. 28:18-20) Ku nga khathariseki swiyimo leswi hi nga eka swona hi nga voninga kukota mavoningo. Mikarhi yin’wana swilo leswi nga ha vonakaka swi ri xihinga, swi nga hi pfulela ndlela yo chumayela mahungu lamanene. Hi xikombiso, muapostola Pawulo a a ri xivochwa lexi pfaleriweke endlwini eRhoma loko a tsalela Vafilipiya papila. Hambileswi Pawulo a bohiwe hi tinketana a nga tshikanga ku chumayela varindzi vakwe ni vaendzi. Pawulo a a chumayela hi ku hiseka hambileswi a a ri ekhotsweni naswona sweswo swi nyike vamakwerhu xivindzi “xa ku chumayela rito ra Xikwembu va nga chavi nchumu.”—Filp. 1:12-14; 4:22. w19.08 12 ¶15-16

Lexi endlaka hi tikarhatela ku titsongahata hi leswi hi lavaka ku tsakisa Yehovha. Muapostola Petro u yi veke erivaleni mhaka leyi loko a tsala marito ya ndzimana ya siku ra namuntlha. Loko buku leyi nge, “Tana U Va Mulandzeri Wa Mina” yi vulavula hi leswi Petro a swi vuleke eka ndzima 3 ndzimana 23, yi ri: “Ku tikukumuxa ku fana ni chefu. Loko ho ku tshika ku hi nghena embilwini ku ta hi vavisa. Ku tikukumuxa ku nga endla munhu la nga ni nyiko leyinene a sala a ri la nga pfuniki nchumu eka Xikwembu. Hi hala tlhelo, ku titsongahata ku nga hi endla hi va vanhu va risima swinene eka Yehovha. . . . [U] ta . . . ku nyika hakelo loko na wena u titsongahata.” Onge hi nga tikarhatela ku tsakisa Yehovha! (Swiv. 23:15) Loko hi titsongahata a ho tsakisa Yehovha ntsena, na hina ha vuyeriwa swinene. Ku titsongahata swi endla vanhu va hi rhandza. Leswaku u yi twisisa kahle mhaka leyi, ehleketa hi vanhu lava u hetaka nkarhi wo tala u ri na vona.—Mat. 7:12. w19.09 4 ¶8-9

Vakulu va tirha hi matimba leswaku va pfuna vamakwerhu. A va tikukumuxi hikwalaho ka vulawuri lebyi va nga na byona. Kurinasweswo, va khathala swinene hi vamakwavo. (1 Tes. 2:7, 8) Leswi va titsongahataka naswona va nga ni rirhandzu va vulavurisana kahle ni vamakwavo. Andrew, loyi ku nga khale a ri nkulu, u ri: “Ndzi xiye leswaku vamakwerhu va tsaka loko nkulu a khathala hi vona. Sweswo swi endla leswaku vamakwerhu va tirhisana kahle ni vakulu.” Tony, loyi na yena ku nga khale a ri nkulu, u ri: “Ndzi ringeta ku tirhisa ndzayo leyi nga eka Vafilipiya 2:3 naswona ndzi teka van’wana va ri lava tlakukeke eka mina. Leswi swi endla ndzi papalata ku ti endla boso eka vamakwerhu.” Vakulu va fanele va titsongahata tanihi leswi Yehovha na yena a titsongahataka. Hambileswi Yehovha a nga Mufumi wa vuako hinkwabyo, “wa korhama” leswaku “a pfuxa loyi a pfumalaka entshurini.” (Ps. 18:35; 113:6, 7) Entiyisweni, Yehovha wa va nyenya lava titlakusaka ni ku tikukumuxa. w19.09 16-17 ¶11-12

Leswaku hi phyuphya ehansi ka joko ra Yesu, hi fanele hi tshama hi ri ni langutelo lerinene. Hi tirhela Yehovha kutani hi fanele hi n’wi tirhela hi ndlela leyi a lavaka hayona. Hi vatirhi naswona Yehovha i N’wini wa hina. (Luka 17:10) Loko ho ringeta ku endla ntirho wakwe hi ndlela ya hina hi ta tivavisa. Kambe loko hi endla ntirho wa Yehovha hi ndlela leyi a lavaka hi wu endla hayona, hi ta kuma matimba yo endla swo tala ku tlula leswi a hi swi ehleketa. Tsundzuka, a nga kona munhu loyi a nga endlaka leswaku ku rhandza ka Yehovha ku nga endleki. (Rhom. 8:31; 1 Yoh. 4:4) Xikongomelo xa hina i ku yisa ku dzuneka eka Yehovha, Tata wa hina la nga ni rirhandzu. Vanhu va le nkarhini wa Yesu lava a va ri ni makwanga naswona a va n’wi landzela hi xikongomelo xo lava ku vuyeriwa, va hatle va heleriwa hi ntsako kutani va tshika joko rakwe. (Yoh. 6:25-27, 51, 60, 66; Filp. 3:18, 19) Kambe, lava a va ri ni xikongomelo lexinene naswona a va rhandza Xikwembu ni vanhukulobye, va rhwale joko ra Yesu vutomi bya vona hinkwabyo, va ri ni ntshembo wo ya tirha na Kreste etilweni. Ku fana na vona, hi ta tshama hi tsakile loko hi rhwala joko ra Yesu hi xikongomelo lexinene. w19.09 20 ¶1; 24-25 ¶19-20

Ehleketa hi tshunxeko lowu u tiphinaka hi wona sweswi, wo tshunxiwa eka tidyondzo leti nga sekeriwangiki ematsalweni leti a wu pfumela eka tona khale. Mayana tshunxeko wo tsakisa swonghasi! Langutela tshunxeko lowukulu enkarhini lowu taka. Ku nga ri khale, Yesu u ta herisa vukhongeri bya mavunwa ni mifumo yo homboloka ya vanhu. Xikwembu xi ta sirhelela “ntshungu lowukulu,” lowu xi tirhelaka naswona xi ta endla leswaku wu tiphina hi mikateko emisaveni leyi nga paradeyisi. (Nhlav. 7:9, 14) Vanhu va ntsandzavahlayi, va ta pfuxiwa ekufeni naswona va ta tshunxiwa eka vuyelo byo biha lebyi vangiweke hi xidyoho xa Adamu. (Mit. 24:15) Hi nkarhi wa Mfumo wa Gidi ra Malembe, Yesu ni vafumikulobye va ta endla leswaku vanhu va va ni rihanyo lerinene va tlhela va va ni vuxaka lebyinene na Yehovha. Nkarhi wolowo wa ku vuyetela ni tshunxeko, wu ta fana ni Yubili ya le nkarhini wa Vaisrayele. Vanhu hinkwavo lava gandzelaka Yehovha hi ku tshembeka, va ta va lava hetisekeke. w19.12 12-13 ¶14-16

Hi nkarhi wa vaapostola, wanuna un’wana loyi a vuriwaka Yosefa loyi a thyiweke Barnaba naswona a ri ni malwandla u pfumele ku tirhisiwa hi Yehovha. (Mit. 4:36, 37) Endzhaku ka loko Sawulo a ve mupfumeri, Vakreste vo tala a va chava ku n’wi tshinelela hikwalaho ka leswi a dume hi ku xanisa Vakreste. Kambe Barnaba u pfune Sawulo naswona Sawulo u wu tlangerile swinene mpfuno wakwe. (Mit. 9:21, 26-28) Hi ku famba ka nkarhi, vakulu va le Yerusalema va vone swi fanerile ku ya khutaza vamakwavo ku ya fika ni le Antiyoka ya le Siriya. Xana va rhume mani? Va rhume Barnaba! Va hlawule munhu loyi a faneleka kahle. Hi byeriwa leswaku Barnaba “a sungula ku va khutaza leswaku va ya emahlweni va tirhela Hosi hi mbilu.” (Mit. 11:22-24) Hilaha ku fanaka, ninamuntlha Yehovha a nga hi pfuna leswaku hi va ‘vana va nchavelelo’ eka Vakrestekulorhi. Hi xikombiso, a nga hi tirhisa leswaku hi chavelela vanhu lava loveriweke. A nga tlhela a endla leswaku hi endzela kumbe hi fonela makwerhu loyi a vabyaka kumbe loyi a nga ni ntshikilelo leswaku hi n’wi chavelela. Xana u ta n’wi pfumelela Yehovha a ku tirhisa hilaha a n’wi tirhiseke hakona Barnaba?—1 Tes. 5:14. w19.10 22 ¶8

Mikarhi yin’wana loko hi tirha ni vanghana va hina, a hi voni swilo leswinene ntsena leswi va swi endlaka kambe hi vona ni swihoxo swa vona. I yini lexi nga hi pfunaka emhakeni leyi? Ha swi tiva leswaku vamakwerhu a va hetisekanga. Hikwalaho, loko hi endla xinghana na vona, hi nga khondli mavoko a hi tikarhateleni ku tiyisa vunghana byebyo. Loko vanghana va hina va endla swihoxo, a hi va tsundzuxeni hi ku tirhisa Rito ra Xikwembu. (Ps. 141:5) Loko va hi khunguvanyisa, a hi va rivaleleni. Loko hi va rivalerile, hi nga ha vulavuli hi swona swihoxo sweswo. I swa nkoka swinene ku languta swilo leswinene eka vamakwerhu ematshan’weni yo va xopaxopa swihoxo, ngopfungopfu emikarhini leyi ya mangava! Loko hi endla tano, vunghana bya hina na vona byi ta tiya naswona hi ta va lava hi nkarhi wa nhlomulo lowukulu. w19.11 6 ¶13, 16

Loko hi ri karhi hi dyondzisa vanhu Bibele, hi fanele hi tikarhatela ku “endla . . . vadyondzisiwa, . . . [hi] va dyondzisa ku yingisa hinkwaswo leswi [Yesu a hi] leriseke swona.” Hi fanele hi pfuna vanhu va xiya leswaku i swa nkoka swinene ku va va tirhela Yehovha ni ku seketela Mfumo wakwe. Leswi swi vula leswaku hi fanele hi tikarhatela ku pfuna vanhu va tirhisa leswi va swi dyondzaka, va tinyiketela eka Yehovha va tlhela va khuvuriwa. Loko va endla tano, va ta pona loko siku ra Yehovha ri fika. (1 Pet. 3:21) Nkarhi lowu saleke wa leswaku misava leyi yi lovisiwa i wutsongo swinene. Hikwalaho, a hi swi lavi ku tlanga hi nkarhi hi ku ya emahlweni hi dyondza Bibele ni vanhu lava nga tiyimiselangiki ku va vadyondzisiwa va Kreste. (1 Kor. 9:26) Ntirho wa hina i wa xihatla swinene! Ka ha ri ni vanhu vo tala lava faneleke va twa rungula ra Mfumo dyambu ri nga si va pelela. w19.10 11-12 ¶14-15

Lembe ni lembe hi Siku ro Kombela ku Rivaleriwa, Vaisrayele a va hlengeletana leswaku va endla switlhavelo hi swiharhi. Switlhavelo sweswo a swi tsundzuxa Vaisrayele leswaku va fanele va rivaleriwa swidyoho! Muprista lonkulu a fanele a rhanga a chulula murhi wa risuna wo kwetsima ehenhla ka makala lama pfurhaka ndzilo kutani kamara ri tala hi nun’hwelo wo nandziha. Hi nga dyondza yini emhakeni leyi? Bibele yi vula leswaku swikhongelo swa malandza yo tshembeka ya Yehovha swi fana ni murhi wa risuna. (Ps. 141:2; Nhlav. 5:8) Loko muprista lonkulu a hisa murhi wa risuna emahlweni ka Yehovha a a swi endla hi xichavo. Hilaha ku fanaka, loko hi khongela eka Yehovha, hi fanele hi kombisa xichavo. Ha swi tlangela swinene leswi Muvumbi wa hina a hi pfumelelaka hi tshinela eka yena, ku fana ni n’wana ni tata wakwe. (Yak. 4:8) U hi teka tanihi vanghana vakwe! (Ps. 25:14) Lowu i nkateko lowukulu eka hina naswona a hi swi lavi ku n’wi khomisa tingana ni siku ni rin’we. w19.11 20-21 ¶3-5

Vanhu vo tala va le ndhawini ya ka n’wina va wu languta njhani ntirho? Ematikweni yo tala, vanhu va tirha hi matimba naswona va tirha tiawara to tala ku tlula rini na rini. Hakanyingi vanhu lava tshamaka va khomekile hi ntirho, a va na nkarhi wo wisa, wo tshama ni mindyangu ya vona kumbe wo dyondza hi Xikwembu. (Ekl. 2:23) Hi hala tlhelo, vanhu van’wana i malolo a va lavi ku tirha naswona va tiyimelela hi ku nyikela swivangelo swo hambanahambana. (Swiv. 26:13, 14) Ku hambana ni langutelo leri vanhu va nga na rona, xiya ndlela leyi Yehovha na Yesu va wu langutaka hayona ntirho. Ha swi tiva leswaku Yehovha wa tirha. Yesu u veke mhaka yoleyo erivaleni loko a ku: “Tata wa mina wa ha tirha ku fikela sweswi, na mina ndzi ya emahlweni ndzi tirha.” (Yoh. 5:17) Ehleketa hi ntirho hinkwawo lowu Xikwembu xi wu endleke loko xi vumba tintsumi ta ntsandzavahlayi ni vuako hinkwabyo. Nakambe ntirho wa Xikwembu wu vonaka kahle eka swilo swo saseka leswi xi swi tumbuluxeke laha misaveni. w19.12 2 ¶1-2

Swi te njhani leswaku Davhida a va munghana lonkulu wa Yehovha? Davhida u dyondze hi Yehovha eka ntumbuluko. Loko Davhida a ha ri jaha, u hete nkarhi wo tala a ri enhoveni a risa tinyimpfu ta tata wakwe. Swi nga endleka u sungule ku anakanyisisa hi swilo leswi Yehovha a swi endleke. Hi xikombiso, loko Davhida a langutisa xibakabaka ni vusiku, u vone tinyeleti ta ntsandzavahlayi naswona u sungule ku xiya timfanelo ta Loyi a ti endleke. (Ps. 19:1, 2) Loko Davhida a xiya ndlela leyi vanhu va endliweke hayona, u vone vutlhari lebyi hlamarisaka bya Yehovha. (Ps. 139:14) Loko Davhida a ri karhi a anakanyisisa hi mitirho ya Yehovha, u swi xiyile leswaku a ngo va nchumu loko a tipimanisa na Yehovha. (Ps. 139:6) Hi dyondza yini? Siku ni siku anakanyisisa hi leswi ntumbuluko lowu u wu vonaka, lowu katsaka swimilana, swiharhi ni vanhu wu ku dyondzisaka swona hi Yehovha. Siku ni siku u ta dyondza swo tala hi Tata wa wena wa rirhandzu. (Rhom. 1:20) Naswona ndlela leyi u n’wi rhandzaka hayona yi ta ya yi kula. w19.12 19-20 ¶15-17

Muxe u hanye hi ku pfumelelana ni leswi a swi dyondzeke. Loko Muxe a ri ni malembe ya kwalomu ka 40, u hlawule ku tihlanganisa ni vanhu va Xikwembu, ku nga Vaheveru ematshan’weni yo tiviwa tanihi “n’wana wa N’wa-Faro.” Muxe u tshike xikhundlha lexi tlakukeke. Hi ku hlawula ku tihlanganisa ni Vaheveru lava a va ri mahlonga aEgipta, u hoxe vutomi byakwe ekhombyeni eka Faro, loyi a ri mufumi loyi a nga ni matimba naswona a a tekiwa tanihi xikwembu. Mayana ripfumelo ronghasi! Muxe a a tshemba Yehovha. Sweswo hi swona leswi endleke leswaku vuxaka bya yena na Yehovha byi tshama hilaha ku nga heriki. (Swiv. 3:5) Hi dyondza yini? Ku fana na Muxe, hinkwerhu ku ni xiboho lexi hi faneleke hi xi endla: Xana hi ta hlawula ku tirhela Xikwembu ni ku tihlanganisa ni vanhu va xona? Swi nga lava hi titsona swo karhi leswaku hi kota ku tirhela Xikwembu naswona vanhu lava nga n’wi tiviki Yehovha va ta hi kaneta. Kambe loko hi tshemba Tata wa hina wa le tilweni, hi nga tiyiseka leswaku u ta hi seketela! w19.12 17 ¶5-6

Hambileswi hi vumbiweke hi ntshuri wa misava, Yehovha u hi teka hi ri va nkoka swinene. Xiya swivangelo swin’wana leswi endlaka hi tiyiseka hi mhaka leyi. Yehovha u vumbe vanhu va ri ni vuswikoti byo tekelela timfanelo takwe. (Gen. 1:27) Hi ku endla tano, u kombise leswaku u hi teka hi ri va nkoka ku tlula swilo hinkwaswo leswi a swi vumbeke, u tlhele a hi nyika vutihlamuleri byo khathalela misava ni swiharhi. (Ps. 8:4-8) Ni loko Adamu a ta va a dyohile, Yehovha a nga tshikanga ku teka vanhu va ri va nkoka. U kombise leswaku u hi teka hi ri va nkoka hi ku rhumela N’wana wakwe loyi a tswariweke a ri swakwe Yesu leswaku a ta hi kutsula eka swidyoho swa hina. (1 Yoh. 4:9, 10) Hi ku tirhisa nkutsulo, Yehovha u ta pfuxa vanhu “lava lulameke ni . . . lava nga lulamangiki,” lava feke hikwalaho ka xidyoho xa Adamu. (Mit. 24:15) Bibele yi kombisa leswaku Yehovha u hi teka hi ri va nkoka, swi nga ri na mhaka leswaku ha vabya, hi swisiwana kumbe hi dyuharile.—Mit. 10:34, 35. w20.01 15 ¶5-6

Munhu a nga vi na ntshembo wo ya hanya etilweni hikwalaho ka leswi swirho swa ndyangu wa ka vona swi nga ni ntshembo wolowo. I Xikwembu lexi hlawulaka vanhu lava faneleke va ya hanya etilweni. (1 Tes. 2:12) Hikwalaho, papalata ku vutisa swivutiso leswi nga ta khunguvanyisa van’wana. Hi xikombiso, hi nga vutisi nsati wa makwerhu loyi a totiweke leswaku u titwa njhani leswi a nga ta hanya hilaha ku nga heriki laha misaveni nuna wakwe a nga ri kona. Lexi hi tiyisekaka hi xona hileswaku emisaveni leyintshwa, Yehovha u ta “enerisa ku navela ka swivumbiwa hinkwaswo leswi hanyaka.” (Ps. 145:16) Loko hi xixima vatotiwa ku fana ni ndlela leyi hi xiximaka vanhu van’wana hayona, ha tisirhelela. Njhani? Bibele yi vula leswaku swi nga endleka vatotiwa van’wana va nga tshembeki. (Mat. 25:10-12; 2 Pet. 2:20, 21) Kambe loko hi papalata ku “ndhundhuzela van’wana,” a hi nge va landzeli vanhu van’wana hambi ku ri vatotiwa kumbe vanhu lava dumeke kumbe lava tirheleke Yehovha malembe yo tala. (Yudha 16) Loko va tshika ku tshembeka kumbe va sukela vandlha, a hi nge tshiki ku tirhela Yehovha naswona hi ta tshama hi tshembekile eka yena. w20.01 29 ¶9-10

Leswi hi nga “vana lava rhandzekaka” va Yehovha, hi tikarhatela ku n’wi tekelela. Hi endla tano hi ku komba van’wana rirhandzu, musa ni ku va rivalela loko va hi dyoherile. Loko vanhu lava nga n’wi tiviki Yehovha va vona mahanyelo ya hina lamanene, va ta tsakela ku dyondza hi yena. (1 Pet. 2:12) Vatswari lava nga Vakreste va ni swivangelo leswi twalaka swo tekelela Yehovha, loko swi ta emhakeni ya ndlela leyi va va khomaka hayona vana va vona. Loko va endla tano, vana va vona va ta tsakela ku va ni vuxaka ni Tata wa hina la nga ni rirhandzu. Ha tinyungubyisa hi Yehovha Tata wa hina wa le tilweni naswona hi lava leswaku vanhu van’wana na vona va n’wi tiva. Hi titwa ku fana na Hosi Davhida, loyi a nga te: “Ndzi ta tibuma hi Yehovha.” (Ps. 34:2) Ku vuriwa yini loko hi ri ni tingana? Hi nga xi kuma njhani xivindzi? Hi ku ehleketa hi ndlela leyi Yehovha a nga ta tsaka hayona loko hi vulavula hi yena ni hi ndlela leyi vanhu va nga ta vuyeriwa hayona loko va dyondza hi yena. Yehovha u ta hi nyika xivindzi. U pfune Vakreste va le nkarhini wa vaapostola leswaku va va ni xivindzi, na hina u ta hi pfuna.—1 Tes. 2:2. w20.02 11 ¶12-13

Vanhu vo tala lava hi dyondzaka na vona Bibele va hetelela va khuvuriwile. Hambiswiritano, van’wana va kanakana ku va vadyondzisiwa va Kreste. Va swi tsakela ku dyondza kambe a va lavi ku khuvuriwa. Loko u dyondza ni munhu wo karhi Bibele, ha tiyiseka leswaku u lava ku n’wi pfuna a tirhisa leswi a swi dyondzaka kutani a va mudyondzisiwa wa Kreste. Yehovha u lava leswaku vanhu va n’wi tirhela hileswi va n’wi rhandzaka. Hi fanele hi pfuna vanhu lava hi dyondzaka na vona Bibele, va xiya leswaku Yehovha wa khathala hi vona naswona wa va rhandza swinene. Hi lava va teka Yehovha tanihi “tata wa vana lava nga riki na tatana ni musirheleri wa tinoni.” (Ps. 68:5) Loko va vona ndlela leyi Xikwembu xi va rhandzaka hayona, na vona va ta xi rhandza. Va tiyisekise leswaku Xikwembu xi lava va kuma vutomi lebyi nga heriki naswona xi lava ku va pfuna va byi kuma. w20.01 3 ¶7-8

Muapostola Pawulo a a titsongahata, hikwalaho a swi tiva leswaku u lava ku chaveleriwa hi vanghana vakwe. A a nga vileli hileswaku van’wana va ta n’wi teka tanihi munhu loyi a tsaneke hikwalaho ka leswi vanghana vakwe va n’wi chaveleleke loko a ri emaxangwini. (Kol. 4:7-11) Loko hi pfumela leswaku hi lava ku chaveleriwa, vamakwerhu va ta hi chavelela. Pawulo a a swi tiva leswaku Matsalwa ma ta n’wi chavelela. (Rhom. 15:4) A ma ta tlhela ma n’wi nyika vutlhari byo kota ku langutana ni maxangu. (2 Tim. 3:15, 16) Loko a pfaleriwe ra vumbirhi eRhoma, a a swi xiya leswaku u ta dlayiwa ku nga ri khale. U kombele Timotiya leswaku a ta eka yena ni “tibuku leti songiwaka” hi ku hatlisa. (2 Tim. 4:6, 7, 9, 13) Hikwalahokayini? Tibukunsongwa teto a ti ri ni xiphemu xa Matsalwa ya Xiheveru lawa Pawulo a ta ma tirhisa loko a dyondza Bibele. Loko hi hlaya Rito ra Xikwembu mikarhi hinkwayo ku fana na Pawulo, Yehovha u ta hi chavelela hi ku tirhisa Matsalwa, ku nga khathariseki maxangu lawa hi langutanaka na wona. w20.02 23-24 ¶14-15

Elifazi, Bilidadi na Sofara a va tinyikanga nkarhi wo ehleketa hi ndlela leyi va nga n’wi pfunaka hayona Yobo. Kurinasweswo, a va ehleketa hi ndlela leyi va nga n’wi kombaka hayona Yobo leswaku u dyohe swo karhi. Swin’wana leswi va swi vuleke a swi twala kambe swo tala leswi va swi vuleke hi Yobo na Yehovha a ku nga ri ntiyiso. Va hehle Yobo hi swihehlo swo tala. (Yobo 32:1-3) Yehovha u angule njhani? U karihele vavanuna volavo vanharhu. U va vitane swiphukuphuku a tlhela a va byela leswaku va ya kombela Yobo a va khongelela. (Yobo 42:7-9) Hi dyondza swo tala eka xikombiso xo biha lexi vekiweke hi Elifazi, Bilidadi na Sofara. Xo sungula, a hi fanelanga hi avanyisa vamakwerhu. (Mat. 7:2-5) Kurinasweswo, hi fanele hi va yingisela kahle hi nga si vulavula. Loko hi endla tano, hi ta xi twisisa kahle xiyimo xa vona. (1 Pet. 3:8) Xa vumbirhi, loko hi vulavula hi fanele hi tiyiseka leswaku a hi va tlhavi hi marito naswona leswi hi swi vulaka i ntiyiso. (Efe. 4:25) Xa vunharhu, Yehovha wa khathala hi leswi hi swi vulaka eka van’wana. w20.03 22-23 ¶15-16

Hakanyingi loko hi dyondzisa van’wana hi Yehovha, swi endla leswaku hi n’wi tiva ku antswa. Hi xikombiso, hi kota ku vona musa lowu Yehovha a nga na wona loko a hi kongomisa eka vanhu lava nga ni timbilu letinene. (Yoh. 6:44; Mit. 13:48) Hi vona ndlela leyi matimba ya Rito ra Xikwembu ma tirhaka hayona, loko hi vona vanhu lava hi dyondzaka na vona va tshika mikhuva yo biha kutani va ambala vumunhu lebyintshwa. (Kol. 3:9, 10) Nakambe, hi vona ndlela leyi Xikwembu xi lehisaka mbilu hayona hi ku nyika vanhu va le nsin’wini ya ka hina nkarhi wo dyondza hi xona leswaku va ta ponisiwa. (Rhom. 10:13-15) Swi nga ri na mhaka leswaku i khale ku fikela kwihi hi ri karhi hi tirhela Yehovha, a hi fanelanga hi tshika ku tiyisa vuxaka bya hina na yena. Ndlela yin’wana leyi hi nga swi kombisaka hayona leswaku hi byi teka byi ri bya nkoka vuxaka bya hina ni Xikwembu, i ku vulavula na xona hi xikhongelo. Ku vulavurisana swi tiyisa vunghana. Hikwalaho, tiyisa vunghana bya wena ni Xikwembu hi ku khongela nkarhi ni nkarhi, u xi phofulela ta le mbilwini. w19.12 19 ¶11, 13-14

Sweswo swa hi chavelela hakunene! Leswi a nga Hosi ya Mfumo wa Xikwembu, Yesu u ta herisa ku xaniseka hinkwako loku Sathana ni misava yakwe va hi vangeleke kona. (Esa. 65:17; 1 Yoh. 3:8; Nhlav. 21:3, 4) Sweswo swi endla hi va ni ntshembo wo tsakisa! Hambileswi Yesu a hi nyikeke ntirho wo tika, u na hina, wa hi seketela emasikwini lawa yo hetelela. (Mat. 28:19, 20) Hakunene sweswo swi endla hi va ni xivindzi! Ku chaveleriwa, ntshembo ni xivindzi i swilo swa nkoka leswi hi swi lavaka leswaku hi ta va ni ku rhula ka miehleketo. U nga va ni ku rhula ka mianakanyo hi ndlela yihi loko u ri karhi u tshikileriwa hi miringo? U nga endla tano hi ku tekelela swilo leswi Yesu a swi endleke. Xo sungula, khongela nkarhi ni nkarhi. Xa vumbirhi, yingisa Yehovha naswona u chumayela hi ku hiseka hambiloko swi tika ku endla tano. Xa vunharhu, titshege hi vanghana va wena leswaku va ku pfuna loko u weriwa hi miringo. Kutani ku rhula ka Xikwembu ku ta rindza mianakanyo ni mbilu ya wena. (Filp. 4:6, 7) Ku fana na Yesu, u ta hlula ndzingo wun’wana ni wun’wana.—Yoh 16:33. w19.04 13 ¶16-17