March

Muapostola Petro u khutaze vamakwavo leswaku va tirhisa tinyiko ni vuswikoti lebyi va nga na byona ku khutazana. Petro u tsale a ku: “Hilaha un’wana ni un’wana a amukeleke nyiko, tirhisani nyiko yoleyo ku pfuna van’wana hi leswi mi nga malandza ya Xikwembu lawa xi ma kombeke musa lowukulu.” (1 Pet. 4:10) A hi fanelanga hi chava ku tirhisa tinyiko ta hina hi tibyela leswaku van’wana va ta hi vondzoka kumbe va hela matimba. Kambe hi fanele hi tivonela leswaku hi nga ti bi xifuva hikwalaho ka tona. (1 Kor. 4:6) Hi fanele hi tsundzuka leswaku vuswikoti byin’wana ni byin’wana lebyi hi nga na byona hi nyikiwe hi Xikwembu. Hi fanele hi tirhisa tinyiko leti ku aka vandlha, hi nga bombiseli van’wana. (Filp. 2:3) Loko hi tirhisa matimba ni vuswikoti bya hina leswaku hi endla ku rhandza ka Xikwembu, hi ta tsaka ku nga ri hileswi hi tlulaka van’wana kambe hileswi hi ti tirhiselaka ku dzunisa Yehovha. w22.04 11-12 ¶7-9

Yesu a a rhandza Matsalwa yo Kwetsima naswona ndlela leyi a titweke hayona yi hlamuseriwe eka vuprofeta lebyi nga eka Pisalema 40:8 leyi nge: “Ndzi tsakisiwa hi ku endla ku rhandza ka wena Xikwembu xanga, nawu wa wena wu le ndzeni ka mbilu ya mina.” Hikwalaho ka sweswo, swi n’wi fambele kahle loko a ri karhi a tirhela Yehovha naswona a a tsakile. Na hina hi nga tsaka ni ku humelela loko hi dyondza ni ku hlaya Rito ra Xikwembu. (Ps. 1:​1-3) Hi ku pfumelelana ni marito ya Yesu ni xikombiso lexi a hi vekeleke xona, a hi antswiseni vuswikoti bya hina byo hlaya Bibele. Hi nga antswisa ndlela leyi hi twisisaka Bibele hayona hi ku khongela, hi nga tsutsumi loko hi ri karhi hi hlaya, hi tivutisa swivutiso ni ku tsala tinhla to koma. Hi nga twisisa leswi hi swi hlayaka hi ku kambisisa hi vukheta tibuku leti hi pfunaka ku twisisa Bibele. Hi nga pfumela ku kongomisiwa hi Rito ra Xikwembu hi ku tshama hi ri ni langutelo lerinene loko hi ri karhi hi hlaya. Loko hi tirhisa tindlela leti, hi ta vuyeriwa swinene loko hi hlaya Bibele naswona hi ta ya hi tshinela eka Yehovha.—Ps. 119:17; Yak. 4:8. w23.02 13 ¶15-16

Hlawula leswi u lavaka ku swi fikelela kutani u endla swo karhi leswaku u fikelela leswi u lavaka ku swi endla. U nga swi endla njhani leswi? A hi nge u lava ku antswisa vuswikoti bya wena byo dyondzisa. U nga ha tinyika nkarhi wo dyondza broxara leyi nge, Tinyiketele Eku Hlayeni Ni Le Ku Dyondziseni. Loko u averiwe mbulavulo eka nhlengeletano ya le xikarhi ka vhiki, u nga ha kombela makwerhu la nga ni ntokoto leswaku a ku yingisela ni ku tlhela a ku nyika swiringanyeto swa ndlela leyi u nga antswisaka hayona. Lunghiselela swiavelo swa wena ka ha ri ni nkarhi leswaku vamakwerhu va ta swi vona leswaku u tirha hi matimba ni leswaku wa swi endla swiavelo swa wena. (2 Kor. 8:22) Ku vuriwa yini loko u lava ku va ni vuswikoti lebyi u nga riki na byona hi ntumbuluko? U nga wi mapa! Xana Timotiya u ve xivulavuri lexi nga ni vuswikoti kumbe mudyondzisi la nga ni vutshila? Bibele a yi hi byeli. Kambe a swi kanakanisi leswaku hi ku famba ka nkarhi Timotiya u antswise ndlela leyi a a swi endla hayona swiavelo swakwe hileswi a yingiseke xitsundzuxo xa Pawulo.—2 Tim. 3:10. w22.04 24-25 ¶8-11

I yini xivandzana xa tinhloko ta nkombo? Hi xiya leswaku xivandzana lexi xi ni xivumbeko xa yingwe kambe milenge ya xona yi fana ni ya bere naswona nomu wa xona wu fana ni wa nghala, xi tlhela xi va ni timhondzo ta khume. Swivumbeko leswi nga eka xivandzana lexi swi fana ni leswi nga eka swivandzana swa mune leswi hlamuseriweke ebukwini ya Daniyele ndzima 7. Kambe, ebukwini ya Nhlavutelo swivumbeko leswi swi kumeka eka xivandzana xin’we ku nga ri eka swivandzana swa mune leswi hambaneke. Xivandzana lexi a xi yimeli mfumo wun’we ntsena kumbe mfumo wa misava. Ku vuriwa leswaku xi fuma “tinyimba hinkwato ni vanhu hinkwavo ni tindzimi hinkwato ni matiko hinkwawo.” Hikwalaho xi fanele xi tlula mfumo wihi na wihi wa tiko ro karhi. (Nhlav. 13:7) Xivandzana lexi xi fanele xi yimela mifumo hinkwayo ya tipolitiki leyi tshameke yi fuma vanhu ku ta fikela sweswi. (Ekl. 8:9) Nhlayo ya khume yi tala ku tirhisiwa eBibeleni ku kombisa leswaku nchumu wo karhi wu helerile. w22.05 9 ¶6

I vamani lava nga ta kuma mikateko leyi? Ntshungu lowukulu lowu poneke Armagedoni swin’we ni vana lava nga ha tswariwaka emisaveni leyintshwa hi vona lava nga ta rhanga va kuma mikateko leyi. Kambe Nhlavutelo ndzima 20 yi tlhela yi tshembisa leswaku vafi va ta pfuxiwa. (Nhlav. 20:​11-13) Vanhu lava “lulameke” vo tshembeka lava feke enkarhini lowu nga hundza swin’we ni “lava nga lulamangiki” lava nga kumangiki nkarhi wo dyondza hi Yehovha va ta pfuxeriwa kona kwala misaveni. (Mit. 24:15; Yoh. 5:​28, 29) Xana leswi swi vula leswaku munhu un’wana ni un’wana u ta pfuxiwa hi nkarhi wa Mfumo wa Gidi ra Malembe? Doo! Vanhu vo homboloka lava aleke ku tirhela Yehovha loko va ha hanya a va nge pfuxiwi. A va ri na wona nkarhi kambe va swi kombisile leswaku a va faneleki ku hanya eParadeyisini laha misaveni.—Mat. 25:46; 2 Tes. 1:9; Nhlav. 17:8; 20:15. w22.05 18 ¶16-17

Hi ku tirhisa “nandza wo tshembeka ni wo tlhariha,” Yesu u simeke nhlangano wo hlamarisa laha misaveni leswaku vugandzeri byo tenga byi ya emahlweni. (Mat. 24:45) U titwa njhani hi nhlangano wolowo? Kumbexana u ehleketa hi marito ya muapostola Petro loyi a vuleke marito ya ndzimana ya namuntlha. A hi ta va hi ri kwihi namuntlha loko a hi nga ri enhlanganweni wa Yehovha? Hi ku tirhisa nhlangano lowu, Kreste wa tiyiseka ku hi kuma swilo hinkwaswo leswi hi swi lavaka leswaku hi tiyisa ripfumelo ra hina eka Xikwembu. U tlhela a hi letela leswaku hi va ni vuswikoti entirhweni wo chumayela. Nakambe u hi pfuna leswaku hi ambala “vumunhu lebyintshwa” leswaku hi tsakisa Yehovha. (Efe. 4:24) Yesu wa hi kongomisa hi ndlela ya vutlhari hi nkarhi wa maxangu. Hi vone vuyelo bya nkongomiso wolowo loko ku sungula ntungu wa COVID-19. Hambileswi vanhu vo tala emisaveni a va nga swi tivi leswaku va khoma kwihi va tshika kwihi, Yesu u tiyisekise leswaku hi kuma nkongomiso lowu nga ta hi pfuna hi tshama hi sirhelelekile. w22.07 12 ¶13-14

Yehovha u lerise Vaisrayele leswaku va dyondzisa vana va vona hi yena nkarhi ni nkarhi. (Det. 6:​6, 7) Vatswari lava a va pfulekeriwa hi nkarhi wo tala esikwini wo vulavula ni vana va vona ni ku va pfuna va rhandza Yehovha hi mbilu hinkwayo. Hi xikombiso, xifanyetana xa Muisrayele a xi heta nkarhi wo tala xi pfuna tata wa xona ku byala kumbe ku vuya ni ntshovelo ekaya. Kasi sesi wa xona a ta heta nkarhi wo tala a pfuna mhani wa yena ku rhunga ni ku endla mitirho yin’wana ya le kaya. Loko va ri karhi va tirha swin’we, vatswari ni vana a va kota ku vulavurisana hi timhaka to tala ta nkoka. Hi xikombiso, a va kota ku vulavula hi vunene bya Yehovha ni ndlela leyi a va pfunaka hayona tanihi ndyangu. Ematikweni yo tala, vatswari a va wu kumi nkarhi wa ku va ni vana va vona. Vatswari va va va ri emitirhweni kasi vana va va va ri eswikolweni. Hikwalaho ka sweswo, vatswari va fanele va tinyika nkarhi wa ku bula ni vana va vona.—Efe. 5:​15, 16. w22.05 28 ¶10-11

Loko munhu a endla xidyoho lexikulu u va a tlula nawu wa Xikwembu. Loko Mukreste a endle xidyoho xo tano, u fanele a khongela eka Yehovha Xikwembu ni ku tlhela a ya byela vakulu va vandlha. (Ps. 32:5; Yak. 5:14) Vakulu va endla yini eka xiyimo xo tano? I Yehovha ntsena la kotaka ku rivalela swidyoho hilaha ku heleleke naswona sweswo swi koteka hikwalaho ka gandzelo ra nkutsulo. Hambiswiritano, Yehovha u nyike vakulu vutihlamuleri hi ku ya hi Matsalwa bya ku kambisisa loko mudyohi a fanele a susiwa evandlheni kumbe doo! (1 Kor. 5:12) Swin’wana swa swilo leswi va swi endlaka, i ku ringeta ku kuma tinhlamulo ta swivutiso leswi landzelaka: Xana u dyohe hi vomu? Xana u lo xi kunguhata? Xana u xi endle nkarhi wo leha? Xa nkoka swinene, xana wa swi kombisa leswaku u hundzukile hi mbilu hinkwayo? Xana ku ni leswi kombisaka leswaku Yehovha u n’wi rivalerile?—Mit. 3:19. w22.06 9 ¶4

Yesu u khutaze valandzeri vakwe leswaku va endla leswo lulama. (Mat. 5:6) Leswi swi vula leswaku munhu u fanele a swi lava hi mbilu hinkwayo ku endla leswinene ni leswi tengeke ematihlweni ya Xikwembu. Xana wa wu rhandza ntiyiso ni leswi lulameke? Ha tshemba leswaku wa swi rhandza. U venga mavunwa ni swilo hinkwaswo swo biha. (Ps. 119:​128, 163) Mavunwa na Sathana mufumi wa misava leyi i bandhi na buruku. (Yoh. 8:44; 12:31) Mikarhi hinkwayo Sathana u lava ku thyakisa vito ro kwetsima ra Yehovha Xikwembu. Ku sukela loko vanhu va xandzukile eEdeni, Sathana u hangalasa mavunwa hi Xikwembu xa hina. U vula leswaku Yehovha i Mufumi loyi a nga riki na mhaka ni vanhu, a nga tshembeki naswona wa tsonana. (Gen. 3:​1, 4, 5) Ku ta fikela namuntlha Sathana u ya emahlweni a hembela Yehovha naswona vanhu va n’wi tshemba. Loko vanhu va hlawula ku nga wu ‘rhandzi ntiyiso,’ Sathana u endla leswaku va endla swilo hinkwaswo swo homboloka ni ku tikhoma ku biha.—Rhom. 1:​25-31. w23.03 2 ¶3

Loko u ri karhi u wa u pfuka leswaku u tshika mukhuva wo biha, mikarhi yin’wana u nga ha tikuma u tlhelerile eka wona. Kumbe u nga ha hela mbilu hileswi u vonaka onge leswi u lavaka ku swi fikelela a swi fikeleleki. I yini lexi nga ta ku pfuna u tiyisela? I ku rhandza Yehovha. Ku rhandza Yehovha hi swona swa nkoka eka hinkwaswo. (Swiv. 3:​3-6) Loko u rhandza Xikwembu swinene u nga swi kota ku hlula mitlhontlho. Mikarhi yo tala Bibele yi vulavula hi rirhandzu lerikulu leri Yehovha a nga na rona eka malandza yakwe. Hikwalaho ka rirhandzu leri, a nge pfuki a fularhele malandza yakwe kumbe a tshika ku ma rhandza. U endliwe hi xifaniso xa Xikwembu. (Gen. 1:26) U nga ri kombisa njhani rirhandzu ro tano? Sungula hi ku va la khensaka. (1 Tes. 5:18) Siku rin’wana ni rin’wana tivutise leswi, ‘Yehovha u ndzi endlele yini ku kombisa leswaku wa ndzi rhandza?’ Tiyiseka leswaku u khensa Yehovha loko u khongela naswona u swi boxa hi ku kongoma leswi a ku endleleke swona. Swilo leswi Yehovha a ku endleleke swona swi teke ku ri ndlela yakwe yo ku byela leswaku wa ku rhandza. w23.03 12 ¶17-19

Yesu u pfune vaapostola hinkwavo va 12 hi ndlela ya rirhandzu ni musa. Xana hi dyondza yini? Leswi nga swa nkoka, a hi leswi van’wana va hi endlaka swona ntsena kambe ni ndlela leyi hina hi endlaka swilo hayona hikwalaho ka swihoxo swa vona. Loko makwerhu a hi kwatisile, hi nga tivutisa leswi: ‘Hikwalahokayini leswi a swi endleke swi ndzi karhata swinene? Xana swi kombisa vumunhu byo biha lebyi ndzi faneleke ndzi byi antswisa? Xana swi nga endleka makwerhu la ndzi kwatiseke a langutane ni xiyimo xo tika? Hambiloko ndzi ri ni xivangelo lexi twalaka xo va ndzi hlundzuka, xana ndzi kombisa rirhandzu ra ntiyiso hi ku swi ba hi makatla leswi a ndzi endleleke swona?’ Loko hi ya emahlweni hi khoma vamakwerhu hi ndlela ya rirhandzu, hi ya hi kombisa leswaku hi valandzeri va Yesu va ntiyiso. Xikombiso xa Yesu xi tlhela xi hi dyondzisa leswaku hi ringeta ku twisisa vamakwerhu. (Swiv. 20:5) I ntiyiso leswaku Yesu a a kota ku vona leswi nga etimbilwini ta vanhu. Hina a hi swi koti. Kambe hi nga va lehisela mbilu vamakwerhu loko va hi endlela swihoxo. (Efe. 4:​1, 2; 1 Pet. 3:8) Swa olova ku endla leswi loko hi va tiva kahle vamakwerhu. w23.03 30 ¶14-16

Loko rihanyo ra hina ri ri ekhombyeni, Sathana a nga ha tirhisa nkarhi wolowo leswaku a hi endla hi tlula milawu ya Yehovha Xikwembu. Madokodela kumbe maxaka lama nga riki Timbhoni ma nga hi sindzisa ku cheriwa ngati ku nga leswi lwisanaka ni nawu wa Xikwembu. Kumbexana munhu un’wana a nga hi wonga leswaku hi tirhisa vutshunguri lebyi nga fambisaniki ni Matsalwa. Hambileswi hi nga laviki ku fa, ha swi tiva leswaku Yehovha a nge tshiki ku hi rhandza hambiloko ho fa. (Rhom. 8:​37-39) Loko vanghana va Yehovha va fa, a nga va rivali naswona eka yena swi fana niloko va nga fanga. (Luka 20:37) Wa swi navela ku va pfuxa. (Yobo 14:15) Swi n’wi koxe swo tala Yehovha “leswaku . . . [hi] kuma vutomi lebyi nga heriki.” (Yoh. 3:16) Ha swi tiva leswaku Yehovha u hi rhandza ni ku khathala ha hina ku fikela kwihi. Ematshan’weni yo fularhela Yehovha loko hi vabya kumbe loko hi xungetiwa ku dlayiwa, hi ya eka yena leswaku a hi nyika vutlhari, a hi chavelela ni ku hi tiyisa.—Ps. 41:3. w22.06 18 ¶16-17

Bibele yi ri: “Ku chava Yehovha i masungulo ya vutlhari, naswona ku twisisa i ku tiva Lowo Kwetsima Ngopfu.” (Swiv. 9:10) Loko hi lava ku endla xiboho xa nkoka, hi fanele hi titshega hi “ku tiva Lowo Kwetsima Ngopfu” ku nga ku endla swilo hi ku ya hi langutelo ra Yehovha. Hi nga endla tano hi ku va hi hlaya Bibele ni ku tlhela hi kambisisa tibuku ta hina leti hi pfunaka ku twisisa Bibele. Loko hi endla tano, hi kombisa leswaku hi ni vutlhari bya ntiyiso. (Swiv. 2:​5-7) I Yehovha ntsena loyi a nga hi nyikaka vutlhari bya ntiyiso? (Rhom. 16:27) Hikwalahokayini ku ri yena Xihlovo xa vutlhari? Xo sungula, tanihi Muvumbi, u ni vutivi lebyi nga pimekiki naswona u wu tiva kahle ntumbuluko wakwe. (Ps. 104:24) Xa vumbirhi, hinkwaswo leswi Yehovha a swi endlaka, swi kombisa vutlhari byakwe. (Rhom. 11:33) Xa vunharhu, lava tirhisaka switsundzuxo swa Yehovha mikarhi hinkwayo swa va vuyerisa. (Swiv. 2:​10-12) Loko hi lava ku kuma vutlhari bya ntiyiso, hi fanele hi amukela ntiyiso ni ku wu pfumelela loko hi endla swiboho niloko hi lava ku endla swo karhi. w22.10 19 ¶3-4

Sathana u hluriwile hilaha swi profetiweke hakona eka Nhlavutelo ndzima 12, naswona yena ni madimona yakwe va lahleriwe emisaveni. Leswi a dyeke makala, Sathana u sungule ku karihela vanhu lava nga emisaveni leswi nga endla leswaku ku va ni ‘khombo emisaveni.’ (Nhlav. 12:​9-12) Vuprofeta lebyi byi nga hi vuyerisa njhani? Swiyimo swa misava ni mahanyelo ya vanhu lama nga lo tlangandla, swi hi pfuna leswaku hi vona ku Yesu i Hosi. Ematshan’weni yo nyangatseka loko hi vona vanhu va nga ri na mhaka ni vanhu van’wana naswona va ri ni rivengo, hi fanele hi tsundzuka leswaku swiendlo swa vona swi hetisisa vuprofeta bya Bibele. Mfumo wa Xikwembu wu le ku fumeni! (Ps. 37:1) Hikwalaho, hi nga rindzela leswaku xiyimo xa misava xi ya xi nyanya ku biha loko Armagedoni yi ya yi tshinela. (Mar. 13:8; 2 Tim. 3:13) Ha n’wi khensa Tata wa hina wa le tilweni la nga ni rirhandzu loyi a hi pfunaka hi twisisa leswaku hikwalahokayini misava yi tele hi swiphiqo. w22.07 3-4 ¶7-8

Hi nga kombela Yehovha leswaku a pfuna vamakwerhu va tiyisela mavabyi, timhangu ta ntumbuluko, tinyimpi, ku xanisiwa kumbe swiphiqo swin’wana. Nakambe hi nga khongelela vamakwerhu lava titsonaka swo karhi leswaku va pfuna lava lavaka ku pfuniwa. Kumbexana u tiva van’wana lava langutaneke ni swiyimo swo tika. Swi nga va kahle loko wo va vula hi mavito eswikhongelweni swa wena. Hi kombisa leswaku ha va rhandza vamakwerhu hi mbilu hinkwayo loko hi kombela Yehovha leswaku a va pfuna va tiyisela. Lava rhangelaka evandlheni va swi tlangela swinene swikhongelo swa van’wana naswona swa va pfuna. Muapostola Pawulo na yena u swi tlangerile. U tsale a ku: “Na mina mi ndzi khongelela, leswaku ndzi nyikiwa marito yo ma vula loko ndzi pfula nomu, leswaku ndzi kota ku vulavula hi xivindzi loko ndzi twarisa xihundla xo kwetsima xa mahungu lamanene.” (Efe. 6:19) Namuntlha ku na vamakwerhu vo tala lava tirhaka hi matimba lava hi rhangelaka. Hi kombisa leswaku ha va rhandza hi ku kombela Yehovha leswaku a katekisa ntirho wa vona. w22.07 23-24 ¶14-16

Socha ri ambala xihuku leswaku ri nga vaviseki nhloko. Eka nyimpi leyi hi yi lwaka na Sathana, hi fanele hi sirhelela miehleketo ya hina eka mihlaselo yakwe. U tirhisa swilo swo hambanahambana leswaku a hi ringa ni ku hi onha miehleketo. Ku fana ni leswi xihuku xi sirhelelaka nhloko ya socha, ntshembo wa hina wu sirhelela miehleketo ya hina leswaku hi tshama hi tshembekile eka Yehovha. Loko ho heleriwa hi ntshembo ivi hi sungula ku ehleketa ku fana ni vanhu lava nga gandzeriki Yehovha, hi nga ha rivala ntshembo wa hina wo hanya hilaha ku nga heriki. Ehleketa leswi endlekeleke Vakreste van’wana va le Korinto. A va nga ha xi tshembi xitshembiso xa nkoka xa Xikwembu xa leswaku vafi va ta pfuxiwa. (1 Kor. 15:12) Pawulo u vule leswaku vanhu lava nga riki na ntshembo va hanyela bya namuntlha ntsena. (1 Kor. 15:32) Vanhu vo tala namuntlha lava nga swi tshembiki switshembiso swa Xikwembu va hanyela bya namuntlha ntsena, va endla swin’wana ni swin’wana leswi va tsakisaka. Hambiswiritano, hina ha swi tshemba switshembiso swa Xikwembu. w22.10 25-26 ¶8-9

Yehovha u lava u khongela eka yena. Wa swi vona leswi ku karhataka naswona wa ku tiyisekisa leswaku u ta yingisela swikhongelo swa wena nkarhi wun’wana ni wun’wana. Swa n’wi tsakisa ku yingisela swikhongelo swa vagandzeri vakwe. (Swiv. 15:8) U nga khongelela yini loko u titwa u ri wexe? Chululela Yehovha ta le mbilwini. (Ps. 62:8) N’wi byele leswi nga ku dyisiki byi rhelela ni leswaku u titwa njhani hi swona. Kombela Yehovha a ku pfuna u kota ku swi tiyisela ni leswaku a ku pfuna u kota ku chumayela. U nga ha tlhela u n’wi kombela vutlhari leswaku u kota ku hlamusela van’wana leswi u pfumelaka eka swona. (Luka 21:​14, 15) Loko nkarhi ni nkarhi ku ri ni leswi ku karhataka emoyeni, kombela Yehovha a ku pfuna leswaku u vulavula ni Mukreste loyi a nga ni ntokoto. U nga kombela Yehovha a pfuna Mukreste loyi u n’wi chululelaka ta le mbilwini leswaku a kota ku ku twisisa. Vona ndlela leyi a swi hlamulaka hayona swikhongelo swa wena naswona pfumela loko van’wana va ku pfuna; kutani u ta titwa u nga ri wexe. w22.08 10 ¶6

Vandlha lerintshwa ra le Tesalonika ri xanisiwile swinene. Vakaneti lava nga ni nsele swinene va kokakoke “vamakwavo van’wana va va yisa eka vafumi va muti.” (Mit. 17:​6, 7) Ehleketa ndlela leyi lava a va ha ku va Vakreste a va chuhe hayona. A va ta va va debyise mavoko entirhweni wa Yehovha, kambe muapostola Pawulo a a nga swi lavi leswaku sweswo swi endleka. U tiyisekile leswaku vandlha lerintshwa ri sala ri khathaleriwa kahle. Pawulo u tsundzuxe Vatesalonika a ku: “Hi rhumele Timotiya, makwerhu . . . , leswaku a mi tiyisa ni ku mi chavelela hikwalaho ka ripfumelo ra n’wina, leswaku ku nga vi na munhu loyi a chavisiwaka hi mahlomulo lawa.” (1 Tes. 3:​2, 3) Timotiya u vone ndlela leyi Pawulo a va tiyiseke hayona vamakwerhu va le Listra. Leswi a voneke vuyelo lebyinene lebyi humaka eka Yehovha, Timotiya u tiyisekise lava a va ha ku va vamakwavo leswaku na vona swilo hinkwaswo a swi ta va fambela kahle.—Mit. 14:​8, 19-22; Hev. 12:2. w22.08 21 ¶4

Hi va-1870, ntlawa wa swichudeni swa Bibele lowu a wu rhangeriwa hi Charles Taze Russell wu sungule ku kambisisa Matsalwa hi vukheta. A wu lava ku tiva ntiyiso hi nkoka wa xitlhavelo xa Yesu ni ndlela leyi rifu rakwe ri faneleke ri tsundzukiwa hayona. Namuntlha ha vuyeriwa hikwalaho ka ndzavisiso wa vona. Njhani? Hi kota ku twisisa ntiyiso mayelana ni gandzelo ra Yesu ni leswi ri swi hetisisaka. (1 Yoh. 2:​1, 2) Hi tlhele hi dyondza leswaku Bibele yi vulavula hi mitlawa yimbirhi ya vanhu lava tsakisaka Xikwembu ni ndlela leyi va nga ta vuyeriwa hayona, ku nga lava nga ta hanya etilweni va nga fi ni van’wana lava nga ta hanya hilaha ku nga heriki laha misaveni. Hi ya hi rhandza Yehovha loko hi kambisisa ndlela leyi a hi rhandzaka hayona ni ndlela leyi hi vuyeriwaka hayona eka xitlhavelo xa Yesu. (1 Pet. 3:18) Ku fana ni vamakwerhu vo tshembeka enkarhini lowu hundzeke, hi rhamba van’wana leswaku va va na hina loko hi endla Xitsundzuxo hi ndlela leyi Yesu a xi endleke hayona. w23.01 21 ¶6-7

Yesu u dyondzise vanhu hi mikateko leyi a yi ta tisiwa hi Mfumo wa Xikwembu. Ha wu khensa nkutsulo hikuva wu hi pfulela ndlela yo tiphina hi vuxaka lebyinene na Yehovha na Yesu. Lava pfumelaka eka Yesu va ni ntshembo wo hanya hilaha ku nga heriki ni ku tlhela va vona maxaka ya vona lama feke. (Yoh. 5:​28, 29; Rhom. 6:23) Mikateko leyi a yi hi faneli nikatsongo naswona a hi nge swi koti ku hakela Xikwembu na Kreste leswi va hi endleleke swona. (Rhom. 5:​8, 20, 21) Kambe hi nga va kombisa ndlela leyi hi tlangelaka hayona. Njhani? Hi ku tirhisa swilo leswi hi nga na swona leswaku hi seketela migingiriko ya Mfumo wa Xikwembu. Hi xikombiso, hi nga tinyika nkarhi wo seketela mitirho yo aka ni ku khathalela miako ya vugandzeri lebyi tengeke. w23.01 26 ¶3; 28 ¶5

Lava fumaka eMfun’weni wa Xikwembu va ta khathalela tibiliyoni ta vanhu emisaveni hinkwayo. Ku fana na Yesu, lava 144 000 va ta va tihosi ni vaprista. (Nhlav. 5:10) Eka Nawu wa Muxe, vaprista a va ri ni vutihlamuleri bya nkoka byo sirhelela rihanyo ra vanhu ni vuxaka bya vona ni Xikwembu. Leswi Nawu a wu ri “ndzhuti ntsena wa swilo leswinene leswa ha taka,” swa twisiseka ku vula leswaku lava nga ta fuma na Yesu va ta endla ntirho wo hlawuleka wa ku khathalela rihanyo ra vanhu va Xikwembu ni ku va pfuna va va ni vuxaka lebyinene na xona. (Hev. 10:1) A hi swi tivi leswaku tihosi tlhelo vaprista lava, va ta vulavurisana njhani ni lava nga ta fumiwa laha misaveni. Hi nga tiyiseka leswaku eParadeyisini leyi taka, lava nga emisaveni va ta kuma nkongomiso lowu va wu lavaka.—Nhlav. 21:​3, 4. w22.12 11 ¶11-13

Xivangelo xin’wana lexi endlaka hi rhamba vanhu eXitsundzuxweni hileswi hi lavaka vanhu lava taka ro sungula va dyondza ntiyiso mayelana ni leswi Yehovha na Yesu va hi endleleke swona. (Yoh. 3:16) Hi tshemba leswaku leswi va nga ta swi twa ni ku swi vona eXitsundzuxweni, swi ta endla va lava ku dyondza leswi engetelekeke ni ku va malandza ya Yehovha. Hi tlhela hi rhamba ni lava nga ha n’wi tirheliki Yehovha. Hi endla tano leswaku hi va tsundzuxa leswaku Xikwembu xa ha va rhandza. Vo tala va va kona naswona ha tsaka loko hi va vona. Loko va va kona eXitsundzuxweni, swi va tsundzuxa ndlela leyi a va tiphina hayona loko va ha tirhela Yehovha. (Ps. 103:​1-4) Swi nga ri na mhaka leswaku vanhu va swi amukela swirhambo swa hina kumbe doo, hi endla leswi hi nga swi kotaka leswaku hi rhamba vanhu eXitsundzuxweni hi ku tiva leswaku Yehovha wa khathala hi un’wana ni un’wana la vaka kona.—Luka 15:7; 1 Tim. 2:​3, 4. w23.01 20 ¶1; 22-23 ¶9-11

Hi vusiku byo hetelela Yesu a nga si fa, u endle xikombelo xa nkoka eka Tata wakwe wa le tilweni. U kombele Yehovha leswaku a sirhelela valandzeri vakwe. (Yoh. 17:​15, 20) Yehovha i khale a languta, a khathalela ni ku sirhelela vanhu vakwe. Hambiswiritano, Yesu a a swi tiva leswaku Sathana a a ta kaneta valandzeri vakwe hi ndlela ya tihanyi. Yesu u tlhele a swi xiya leswaku a va ta lava mpfuno wa Yehovha leswaku va hlula minhlaselo yo homboloka ya Diyavulosi. Misava leyi ya Sathana yi vangela Vakreste swiphiqo swo tala namuntlha. Hi langutana ni swiphiqo leswi nga hi hetaka matimba ni ku tlhela swi ringa ku tshembeka ka hina eka Yehovha. Kambe a hi fanelanga hi chava. Yehovha wa hi sirhelela, wa yi vona mitlhontlho leyi hi langutanaka na yona naswona u tshama a lunghekele ku hi pfuna hi langutana na yona. Hakunene, Yehovha “u languta lava n’wi chavaka.”—Ps. 33:​18-20. w22.08 8 ¶1-2

Lembe ni lembe hi nkarhi wa Xitsundzuxo, hi khensa leswi Yesu a hi endleleke swona hi ku khongela ni ku anakanyisisa hi ndlela leyi rifu rakwe ri vulaka swona eka hina. Nakambe hi khutaza vo tala hilaha hi nga kotaka hakona leswaku va va na hina eka xiendlakalo lexi xo hlawuleka. Nakambe hi tiyimisele ku nga pfumeleli nchumu wu hi sivela ku va kona eXitsundzuxweni. EXitsundzuxweni hi dyondza leswaku hikwalahokayini vanhu va lava nkutsulo ni ndlela leyi rifu ra munhu un’we ri endlaka leswaku vanhu vo tala va rivaleriwa swidyoho. Hi tsundzuxiwa leswi xinkwa ni vhinyo swi yimelaka swona ni leswaku i vamani lava faneleke va dya ni ku nwa. (Luka 22:​19, 20) Hi tlhela hi anakanyisisa hi mikateko leyi nga ta kumiwa hi lava nga ni ntshembo wo hanya laha misaveni. (Esa. 35:​5, 6; 65:​17, 21-23) Leswi a hi fanelanga hi swi tekela ehansi. w23.01 20 ¶2; 21 ¶4

Hi ku va xi nyikele hi N’wana wa xona tanihi nkutsulo leswaku hi rivaleriwa swidyoho, Xikwembu xi endle leswaku swi koteka ku hi kuma vutomi lebyi nga heriki. (Mat. 20:28) Muapostola Pawulo u tsale a ku: “Tanihi leswi rifu ri veke kona hikwalaho ka munhu, ni ku pfuka ka vafi ku va kona hikwalaho ka munhu. Tanihi leswi hinkwavo va faka hikwalaho ka Adamu, hinkwavo va ta tlhela va pfuxiwa hikwalaho ka Kreste.” (1 Kor. 15:​21, 22) Yesu u dyondzise valandzeri vakwe ku khongelela Mfumo wa Xikwembu leswaku wu ta ni leswaku ku rhandza ka xona ku endleka laha misaveni. (Mat. 6:​9, 10) Xikongomelo xa Xikwembu i xa leswaku vanhu va hanya hilaha ku nga heriki laha misaveni. Leswaku a xi hetisisa, Yehovha u hlawule N’wana wakwe leswaku a va Hosi ya Mfumo wa Mesiya. Xikwembu xi le ku hlengeleteni ka vanhu va 144 000 laha misaveni, leswaku va tirha na Yesu ku hetisisa ku rhandza ka xona.—Nhlav. 5:​9, 10. w22.12 5 ¶11-12

Loko hi feriwe hi munhu loyi hi n’wi rhandzaka, ha n’wi tsundzuka swinene! Hi nga ha twa ku vava swinene loko munhu loyi hi n’wi rhandzaka a xanisekile ngopfungopfu loko a ri kusuhi ni ku fa. Hambiswiritano, hi ku famba ka nkarhi hi nga ha sungula ku tsaka loko hi ehleketa hi leswi a hi dyondziseke swona kumbe leswi a swi endleke kumbe leswi a swi vuleke ku hi khutaza kumbe ku hi endla hi tsaka. Hilaha ku fanaka, swi hi twisa ku vava loko hi hlaya hi ndlela leyi Yesu a xanisekeke ni ku dlayiwa hayona. Hi nkarhi wa Xitsundzuxo, hi anakanyisisa ngopfu hi ndlela leyi gandzelo ra nkutsulo ri nga ra nkoka hayona. (1 Kor. 11:​24, 25) Hambiswiritano, ha tsaka swinene loko hi anakanyisisa hi swilo hinkwaswo leswi Yesu a swi vuleke ni ku swi endla loko a ri laha misaveni. Swi tlhela swi hi khutaza ku ehleketa hi leswi a nga le ku swi endleni sweswi ni leswi a nga ta hi endlela swona enkarhini lowu taka. w23.01 26 ¶1-2

Vadyondzisiwa a va ri ni gome loko Yesu a fa. A va lahlekeriwe hi munghana wa vona naswona a va titwa va heleriwe hi ntshembo. (Luka 24:​17-21) Hambiswiritano, loko Yesu a humelela eka vona u va pfune va twisisa ndlela leyi a hetisiseke vuprofeta bya le Bibeleni. U tlhele a va nyika ntirho wa nkoka. (Luka 24:​26, 27, 45-48) Loko Yesu a tlhandlukela etilweni, gome leri vadyondzisiwa a va ri na rona se a ri hundzuke ntsako. A swi va tsakisa ku tiva leswaku N’wini wa vona wa hanya naswona u tiyimisele ku va pfuna va endla ntirho lowu a va nyikeke wona. Ntsako wa vona wu endle leswaku va nga tshiki ku dzunisa Yehovha. (Luka 24:​52, 53; Mit. 5:42) Leswaku hi tekelela vadyondzisiwa va Yesu hi fanele hi rhangisa Mfumo wa Xikwembu evuton’wini bya hina ku sungula. Hambileswi swi lavaka leswaku hi tiyisela loko hi ri karhi hi ya emahlweni hi tirhela Yehovha, u hi tshembisa leswaku u ta hi katekisa swinene loko hi endla tano.—Swiv. 10:22. w23.01 30-31 ¶15-16

Hakunene a hi swi lavi ku endla xihoxo lexi endliweke hi Adamu na Evha. Hi nga papalata xihoxo xo tano loko hi ya emahlweni hi dyondza hi Yehovha, hi tlangela vumunhu byakwe naswona hi ringeta ku twisisa ndlela leyi a ehleketaka hayona. Loko hi endla tano, hi ta n’wi rhandza swinene Yehovha. Ehleketa hi Abrahama. A n’wi rhandza swinene Yehovha. Hambileswi mikarhi yin’wana a swi n’wi tikela ku twisisa swiboho swa Yehovha, Abrahama a nga xandzukanga. Ku ri na sweswo, u ringete ku n’wi tiva ku antswa Yehovha. Hi xikombiso, loko a twa xiboho xa Yehovha xo lovisa Sodoma na Gomora, eku sunguleni Abrahama a a chava leswaku “Muavanyisi wa misava hinkwayo” a a ta lovisa lavo lulama ku katsa ni lavo homboloka. Sweswo a swi nga twali eka Abrahama, kutani hi ku titsongahata u vutise Yehovha swivutiso swo tala. Yehovha u n’wi hlamule handle ko hela mbilu. Eku heteleleni, Abrahama u swi vonile leswaku Yehovha u kambela mbilu ya munhu un’wana ni un’wana naswona A nga va xupuli lavanene loko a xupula lavo biha.—Gen. 18:​20-32. w22.08 28 ¶9-10

Hi 455 B.C.E., endzhaku ka loko Ndhuna Nehemiya a pfuxete makhumbi ya Yerusalema, u lave vavanuna vo tshembeka leswaku va ta langutela muti. Nehemiya u hlawule na Hananiya ndhuna ya Yindlu ya Vuhosi. Bibele yi hlamusela Hananiya tanihi “munhu wo tshembeka ni la chavaka Xikwembu xa ntiyiso ku tlula vanhu vo tala.” (Neh. 7:2) Leswi Hananiya a a rhandza Yehovha ni ku chava ku n’wi khunguvanyisa, sweswo swi endle leswaku ntirho wun’wana ni wun’wana lowu a a nyikiwa wona a tiyimisela ku wu endla kahle. Na hina sweswo swi ta hi pfuna leswaku hi wu endla kahle ntirho wa Xikwembu. Xiya leswi hi nga swi dyondzaka eka Tixiko munghana wo tshembeka wa muapostola Pawulo. Pawulo a a pfuniwa hi Tixiko naswona u vule leswaku i “nandza wo tshembeka.” (Efe. 6:​21, 22) Pawulo a a tshemba leswaku a a ta yisela vamakwerhu va le Efesa ni le Kolosa mapapila ni ku tlhela a va khutaza ni ku va chavelela. Tixiko u hi tsundzuxa hi vavanuna vo tshembeka lava hi pfunaka leswaku hi tshama hi ri ni vuxaka lebyinene na Xikwembu namuntlha.—Kol. 4:​7-9. w22.09 9-10 ¶5-6

Yosefa u langutane ni miringo yo tika ku ringana malembe ya 13. Yosefa a a ta va a tivutisile loko Yehovha a n’wi rhandza hakunene. Nakambe a a ta va a tivutisile loko Yehovha a n’wi tshikile hi nkarhi lowu a a lava mpfuno. Kambe Yosefa a nga vanga ni xikhomela. Ku ri ni sweswo, u tirhise mianakanyo yakwe hi ku nga hatliseli ku hlundzuka. Loko a pfulekeriwe hi nkarhi wa leswaku a tirihisela, a nga swi endlanga sweswo kambe u kombise vamakwavo rirhandzu ivi a va rivalela. (Gen. 45:​4, 5) Yosefa u tikhome hi ndlela leyi hileswi a koteke ku ehleketa kahle. Ematshan’weni yo ehleketisisa ngopfu hi swiphiqo swakwe, u ehlekete hi mhaka ya nkoka, ku nga xikongomelo xa Yehovha. (Gen. 50:​19-21) Hi dyondza yini? Loko ku ri ku a wu khomiwanga kahle, u nga hlundzukeli Yehovha kumbe u ehleketa leswaku u ku lahlile. Ku ri ni sweswo, anakanyisisa hi ndlela leyi Yehovha a ku pfunaka hayona leswaku u tiyisela ndzingo. Ku engetela kwalaho, loko van’wana va ku twisa ku vava, ringeta ku funengeta swidyoho swa vona hi rirhandzu. w22.11 21 ¶4

Muprofeta Daniyele u vone swivono leswi kombiseke ku tlakuka ka Yehovha loku tlulaka ka vafumi lavan’wana. Daniyele u sungule hi ku vona swivandzana swa mune leswikulu leswi yimelaka mimfumo leyi fumeke khale ku nga Babilona, Meda-Peresiya, Grikiya, Rhoma ni mfumo lowu sweswi wu nga le ku fumeni ku nga wa Manghezi ni Maamerika. (Dan. 7:​1-3, 17) Hiloko Daniyele a vona Yehovha Xikwembu a tshame exiluvelweni xakwe ehubyeni ya le tilweni. (Dan. 7:​9, 10) Xikwembu xi tekela vanhu vuhosi xi byi nyika lava byi va faneleke ni lava nga ni matimba. Xi byi nyika vamani? Xi byi nyika “loyi a fanaka ni n’wana wa munhu” ku nga Yesu Kreste ni “vakwetsimi va Loyi a Tlakukeke” ku nga lava 144 000 lava nga ta “fuma hilaha ku nga heriki.” (Dan. 7:​13, 14, 18) Swi le rivaleni leswaku Yehovha hi yena “Loyi a Tlakukeke.” Leswi Daniyele a swi voneke exivonweni swi fambisana ni nchumu wun’wana a nga wu vula eku sunguleni. Daniyele u te, “Xikwembu xa le tilweni . . . , xi susa tihosi xi tlhela xi veka tin’wana.”—Dan. 2:​19-21. w22.10 14-15 ¶9-11