June

Yobo a a ri ni vuxaka lebyinene na Yehovha. A a ri ni ndyangu lowukulu lowu twananaka naswona a a ri xigwili. (Yobo 1:​1-5) Kambe hi siku rin’we ntsena, sweswo swi xaxile hinkwaswo. U rhange a lahlekeriwa hi rifuwo rakwe. (Yobo 1:​13-17) Ivi ku landzela vana vakwe hinkwavo lava a va rhandzaka. Ehleketa ndlela leyi Yobo ni nsati wakwe va tsemekeke nhlana ni ku twa ku vava hayona loko va twa leswaku vana va vona hinkwavo va khume va file. A swi hlamarisi leswi Yobo a handzuleke swiambalo ni ku tlhela a wela ehansi a rila! (Yobo 1:​18-20) Endzhaku ka sweswo Sathana u hlasele Yobo hi vuvabyi byo vava swinene lebyi n’wi chicheke ni xindzhuti. (Yobo 2:​6-8) Phela Yobo a a xiximiwa swinene emugangeni wa ka vona. Vanhu a va ta eka yena va ta lava switsundzuxo. (Yobo 31:18) Sweswi se a va sungula ku n’wi papalata. A a nga ha laviwi, vamakwavo, vanghana hambi ku ri malandza yakwe se a va n’wi komba xikosi.—Yobo 19:​13, 14, 16. w22.06 21 ¶5-6

Endzhaku ka loko hi khuvuriwile, hinkwerhu hi fanele hi yingisa xitsundzuxo lexi muapostola Pawulo a xi nyikeke Vakreste va le Efesa. U va khutaze leswaku va va Vakreste lava “wupfeke.” (Efe. 4:13) Sweswo a swi fana ni loko a ku, ‘Yanani emahlweni mi antswisa vuxaka bya n’wina na Yehovha.’ Sweswi se wa n’wi rhandza Yehovha swinene. Kambe ndlela leyi u n’wi rhandzaka hayona yi nga kula. Njhani? Muapostola Pawulo u hi byela ndlela leyi sweswo hi nga swi endlaka hayona eka Vafilipiya 1:9. Pawulo u khongelele leswaku rirhandzu ra Vafilipiya “ri ya ri kula swinene.” Kutani yi nga kula ndlela leyi hi n’wi rhandzaka hayona Yehovha. Hi nga endla tano hi ku kuma “vutivi bya ntiyiso ni ku twisisa loku enteke.” Loko hi ya hi tiva Yehovha, hi ta n’wi rhandza swinene naswona hi ta tlangela vumunhu byakwe ni ndlela leyi a endlaka swilo hayona. Hi ta ya hi swi lava ngopfu ku n’wi tsakisa naswona a hi nge lavi ku endla nchumu lowu nga ta n’wi twisa ku vava. Hi tikarhatela ku twisisa leswi a lavaka hi swi endla ni ndlela leyi hi nga swi endlaka hayona. w22.08 2-3 ¶3-4

Leswi tsariweke eka buku ya Nhlavutelo a swi tsaleriwanga mani na mani, kambe swi tsaleriwe hina malandza ya Xikwembu lama tinyiketeleke. Tanihi vanhu va Xikwembu a swi fanelanga swi hi hlamarisa ku tiva leswaku ha katseka eku hetisekeni ka vuprofeta lebyi kumekaka ebukwini leyi yo tsakisa. Muapostola Yohane loyi a a dyuharile u vulavule hi nkarhi lowu vuprofeta lebyi byi nga ta hetiseka ha wona. U te: “Moya lowo kwetsima wu ndzi yise esikwini ra Hosi.” (Nhlav. 1:10) ‘Siku ra hosi’ a ra ha ri ekule loko Yohane a tsala marito wolawo hi va-96 C.E. (Mat. 25:​14, 19; Luka 19:12) Hi ku ya hi vuprofeta bya Bibele, siku rero ri sungule hi 1914 loko Yesu a va Hosi etilweni. Ku sukela hi lembe rero, vuprofeta bya le ka Nhlavutelo lebyi khumbaka vanhu va Xikwembu byi sungule ku hetiseka. Sweswi hi hanya “esikwini ra Hosi”!—Nhlav. 1:3. w22.05 2 ¶2-3

Havumbirhi bya vona va lahleriwa etiveni ra ndzilo ni xivavula va ri karhi va hanya. Hikwalaho, loko mifumo leyi ya valala va Xikwembu ya ha ri eku fumeni, yi ta heriseriwa makumu. Xana leswi swi vula yini eka hina? Tanihi Vakreste, hi fanele hi tshembeka eka Xikwembu ni le ka Mfumo wa xona. (Yoh. 18:36) Leswaku hi endla tano hi fanele hi nga katseki eka timhaka ta tipolitiki ta misava leyi. Kambe ku nga katseki a hi matlangwana hikuva mifumo ya misava leyi yi lava leswaku hi yi seketela hi marito ni hi swiendlo. Lava tsandzekaka ku yima va tiyile va kuma mfungho wa xivandzana. (Nhlav. 13:​16, 17) Lava amukelaka mfungho wolowo, Yehovha a nge va amukeli naswona a va nge byi kumi vutomi lebyi nga heriki. (Nhlav. 14:​9, 10; 20:4) Hikwalaho i swa nkoka leswaku hi nga katseki hi ku helela eka swa tipolitiki hambi va hi sindzisa ku fikela kwihi leswaku hi va seketela. w22.05 10-11 ¶12-13

Swin’wana leswi u nga tiyimiselaka ku swi fikelela i ku dyondza ku va ni vuswikoti byo karhi. Loko hi ya hi va ni vuswikoti hi ta kota ku endla mitirho leyi engetelekeke entirhweni wa Yehovha. Ehleketa hi vatirhi vo tala lava lavekaka leswaku va pfuneta ku aka miako ya Bethele, Tiholo ta Tinhlengeletano ni Tiholo ta Mfumo. Vo tala va vatirhi lava, va ve ni vuswikoti byolebyo byo aka hileswi va tirheke ni vamakwerhu lava nga ni ntokoto. Namuntlha, vamakwerhu lava va dyondza ku va ni vuswikoti leswaku va ta pfuneta ku lunghisa Tiholo ta Tinhlengeletano ni Tiholo ta Mfumo. Hi ku tirhisa tindlela leti ni tin’wana, Yehovha Xikwembu, “Hosi ya hilaha ku nga heriki” na Yesu Kreste “Hosi ya . . . tihosi,” va endla swilo swo hlamarisa hi ku tirhisa vatirhi lava nga ni vuswikoti. (1 Tim. 1:17; 6:15) Hi lava ku tirha hi matimba ni ku tirhisa vuswikoti bya hina leswaku hi dzunisa Yehovha ku nga ri hina vini.—Yoh. 8:54. w22.04 24 ¶7; 25 ¶11

Solomoni a a fume ni swikunwana naswona a a hanya vutomi bya le ka byandlana. (1 Tih. 10:​7, 14, 15) Kasi Yesu a a nga ri na swilo swo tala naswona a a pfumala ni ndhawu yo tumbeta nhloko. (Mat. 8:20) Kambe vavanuna lava a va ri ni langutelo lerinene hi swilo leswi a va ri na swona hikuva vutlhari bya vona havambirhi a byi huma eka Xihlovo xin’we ku nga Yehovha Xikwembu. Solomoni a a pfumela leswaku mali yi endla hi kota ku xava swilo leswi hi bohekaka ku va na swona leswaku hi kota ku hanya ni swin’wana leswi hi swi lavaka. Hambileswi a a ri xigwili, Solomoni u swi xiyile leswaku ku ni swilo swa nkoka ku tlula mali. Hi xikombiso, u tsale a ku: “Ku fanele ku hlawuriwa vito lerinene [kumbe “ndhuma leyinene,” nhlamuselo ya le hansi.] ematshan’weni ya rifuwo ro tala.” (Swiv. 22:1) Solomoni u tlhele a xiya leswaku vanhu lava rhandzaka mali a va tsakanga hi swilo leswi va nga na swona. (Ekl. 5:​10, 12) Nakambe u hi tsundzuxe leswaku a hi fanelanga hi veka ntshembo wa hina eka mali tanihi leswi yi hatlaka hi hela.—Swiv. 23:​4, 5. w22.05 21 ¶4-5

Loko hi anakanyisisa hi mikateko leyi hi yi kumaka sweswi, hi tiyisa vuxaka bya hina na Yehovha. Nakambe loko hi anakanyisisa hi mikateko leyi Yehovha a nga ta hi nyika yona enkarhini lowu taka, swi ta endla leswaku ntshembo lowu hi nga na wona wo n’wi tirhela hilaha ku nga heriki wu va wa xiviri eka hina. Hinkwaswo leswi swi ta endla leswaku hi tirhela Yehovha hi tsakile sweswi. Yehovha “u ta” hi yimela loko a herisa misava leyi yo homboloka. Ha tiyiseka leswaku Yehovha “Xikwembu xo lulama” a nge pfumeli leswaku misava ya Sathana yi ya emahlweni yi va kona loko nkarhi wa leswaku yi lovisiwa wu fika. (Esa. 25:9) Hilaha Yehovha a endlaka hakona hi lehisa mbilu, hi rindza leswaku siku ra tshunxeko ri fika. Nilokoswiritano hi tiyimisele ku ya emahlweni hi tlangela nkateko lowu hi nga na wona wo khongela, ku dyondza ni ku hanya hi leswi hi swi dyondzaka eRitweni ra Xikwembu naswona hi anakanyisisa hi mikateko ya hina. Loko hi endla tano, Yehovha u ta hi pfuna leswaku hi tiyisela hi tsakile loko hi ri karhi hi n’wi gandzela. w22.11 13 ¶18-19

Hambileswi Bibele yi nga boxiki leswi endlekeke loko Timotiya a khuvuriwa kambe a swi kanakanisi leswaku mana wakwe Yunisi a a tsake ngopfu siku rero. (Swiv. 23:25) Yunisi u yi lwile ya ku dyondzisa n’wana wakwe ku rhandza Yehovha ni N’wana wakwe Yesu Kreste. Vatswari va Timotiya a va ri eka vukhongeri byo hambana. Tata wakwe a a ri Mugriki naswona mana wakwe ni kokwa wakwe a va ri Vayuda. (Mit. 16:1) Swi tikomba onge a ha ri muntshwa loko Yunisi na Luwisa va va Vakreste. Nilokoswiritano, Tata wakwe a nga va joyinanga eka vukhongeri bya vona. Xana Timotiya a a ta hlawula vukhongeri byihi? Vamanana lava nga Vakreste va rhandza mindyangu ya vona. Xa nkoka swinene, va lava ku pfuna vana va vona leswaku va va ni vuxaka lebyinene na Yehovha. Xikwembu xa ma tlangela matshalatshala ya vona. (Swiv. 1:​8, 9) Yehovha u pfune vatswari vo tala leswaku va pfuna vana va vona leswaku va dyondza ntiyiso. w22.04 16 ¶1-3

Ku nga ri khale, Yehovha u ta swi nghenisa etimbilwini ta vafumi va misava leyi leswaku va “endla ku rhandza ka [yena].” Ku ta endleka yini endzhaku ka sweswo? Vafumi lava va misava ku nga, “tihosi ta khume” va ta jikela mihlangano ya vukhongeri bya mavunwa va yi lovisa. (Nhlav. 17:​1, 2, 12, 16) Hi swi tivisa ku yini leswaku nkarhi wa ku lovisiwa ka Babilona Lonkulu wu tshinele? Leswaku hi kota ku hlamula xivutiso lexi hi fanele hi tsundzuka leswaku muti wa khale wa Babilona a wu sirheleriwa ni hi Nambu lowukulu wa Yufrata. Buku ya Nhlavutelo yi fanisa vaseketeri va timiliyoni va Babilona Lonkulu ni “mati.” (Nhlav. 17:15) Kambe yi tlhela yi paluxa leswaku mati lama a ma ta “phya,” leswi kombisaka leswaku mfumo wa misava wa vukhongeri bya mavunwa a wu ta lahlekeriwa hi vaseketeri vo tala. (Nhlav. 16:12) Namuntlha hi vona ku hetiseka ka vuprofeta lebyi hikuva vanhu vo tala lava a va seketela vukhongeri bya mavunwa se va byi fularhela ivi va sungula ku lava tinhlamulo etindhawini tin’wana. w22.07 5-6 ¶14-15

Loko hi rivalela van’wana hi kombisa leswaku ha ti tlangela tintswalo ta Yehovha. Eka xikombiso xin’wana, Yesu u fanise Yehovha ni n’wini wa malandza loyi a suleke xikweleti lexikulu xa nandza loyi a a nga ta kota ku xi hakela. Kambe nandza loyi a rivaleriweke u tsandzeke ku kombisa nandzakulobye tintswalo loyi a a n’wi kolota swimalana. (Mat. 18:​23-35) Yesu a hi dyondzisa yini? Loko hi tlangela tintswalo letikulu ta Yehovha leti a hi kombeke tona, na hina hi ta lava ku rivalela van’wana. (Ps. 103:9) Eka malembe lama nga hundza, Xihondzo xo Rindza xi tshame xi ku: “Hambi hi va rivalela kangani vanhu van’wana, a hi nge pfuki hi va rivalele ku fana ni ndlela leyi Xikwembu xi rivaleleke un’wana ni un’wana wa hina hi ku tirhisa gandzelo ra Kreste.” Lava rivalelaka na vona va ta rivaleriwa. Yehovha u va komba tintswalo lava nga ni tintswalo. (Mat. 5:7) Yesu u swi veke rivaleni leswi loko a dyondzisa vadyondzisiwa vakwe ku khongela.—Mat. 6:​14, 15. w22.06 10 ¶8-9

Yesu u tile emisaveni a ri munhu wa nyama. U tekelele vumunhu bya Tata wakwe hilaha ku heleleke. (Yoh. 14:9) Hikwalaho ka yena hi kote ku tiva ni ku rhandza Yehovha Xikwembu. Nakambe ha vuyeriwa eka tidyondzo ta Yesu ni ndlela leyi a hi kongomisaka hayona loko a ri karhi a kongomisa vandlha ra Vukreste namuntlha. U hi dyondzise ku hanya hi ndlela leyi nga ta endla leswaku hi tsakisa Yehovha. Leswi Yesu a feke, ha vuyeriwa hikwalaho ka sweswo. Loko Yesu a pfuxiwa, u nyikele hi ngati yakwe leyi nga ya risima leswaku yi va gandzelo leri hi “basisa[ka] eka swidyoho hinkwaswo.” (1 Yoh. 1:7) Sweswi i Hosi leyi nga ni matimba, leyi nga fiki. Ku nga ri khale u ta pfotlosa nhloko ya nyoka. (Gen. 3:15) Vanhu vo tshembeka va ta ku hefu, loko Sathana a loviseriwa makumu. Loko ha ha rindzele sweswo, u nga karhali. Xikwembu xa hina xa tshembeka. Xi ta katekisa “tinxaka hinkwato leti nga emisaveni” hi mikateko ya tsandzavahlayi. w22.07 18 ¶13; 19 ¶19

Hi fanele hi fambisana na swiyimo loko hi hlela leswi hi lavaka ku swi fikelela. Hikwalahokayini? Hikuva a hi mikarhi hinkwayo hi kotaka ku lawula swiyimo swa hina. Hi lexi xikombiso: Muapostola Pawulo u hoxe xandla leswaku ku sunguriwa vandlha emutini wa Tesalonika. Kambe vakaneti va endle leswaku Pawulo a boheka ku suka emutini wolowo. (Mit. 17:​1-5, 10) Loko Pawulo a lo hlawula ku tshama a a ta va a veke vamakwavo ekhombyeni. Kambe a nga helanga matimba. Ku ri na sweswo u fambisane ni xiyimo. Hi ku famba ka nkarhi, u rhumele Timotiya eTesalonika leswaku a ya tiyisa vamakwerhu. (1 Tes. 3:​1, 2) Swi fanele swi va tsakisile Vatesalonika. Hi nga dyondza swo karhi eka leswi endlekeleke Pawulo eTesalonika. Hi nga ha va hi ri karhi hi wa hi pfuka leswaku hi kuma vutihlamuleri lebyi engetelekeke entirhweni wa Xikwembu, kambe swiyimo leswi hi nga kotiki ku swi lawula swa hi sivela. (Ekl. 9:11) Loko swi ri tano ni le ka wena, hlawula swin’wana leswi u nga kotaka ku swi fikelela. w22.04 25-26 ¶14-15

Yehovha u hi chavelela hi ku hi tshembisa vumundzuku lebyinene. Kambisisa Matsalwa ma nga ri mangani lama nga hi chavelelaka loko hi ri emiringweni. Hi ku tirhisa Matsalwa, Yehovha u hi tiyisekisa leswaku a ku na nchumu hambi ku ri miringo leyikulu leyi nga “[kotaka] ku hi hambanisa ni rirhandzu” ra yena. (Rhom. 8:​38, 39) U tlhela a hi tiyisekisa leswaku “u le kusuhi ni hinkwavo lava n’wi vitanaka” hi xikhongelo. (Ps. 145:18) Yehovha u hi byela leswaku loko hi titshega hi yena, hi nga kota ku tiyisela ndzingo wun’wana ni wun’wana ni ku tlhela hi tsaka hambiloko hi xaniseka. (1 Kor. 10:13; Yak. 1:2) Rito ra Xikwembu ri tlhela ri hi tsundzuxa leswaku miringo ya hina i ya xinkarhana loko yi pimanisiwa ni mikateko ya hilaha ku nga heriki leyi a nga ta hi nyika yona. (2 Kor. 4:​16-18) Yehovha wa hi tiyisekisa leswaku u ta herisa hinkwavo lava hi vangelaka maxangu, ku nga Sathana Diyavulosi ni hinkwavo lava n’wi tekelelaka. (Ps. 37:10) Xana ku ni Matsalwa lama u ma khomeke hi nhloko lama nga ta ku pfuna loko u ri emiringweni enkarhini lowu taka? w22.08 11 ¶11

Xana wa vilela leswaku u ta swi kota ku ya emahlweni u hanya hi milawu ya Yehovha yo lulama masiku hinkwawo? Yehovha u hi tshembisa leswaku ku lulama ka hina ku ta “fana ni magandlati ya lwandle.” (Esa. 48:18) Ehleketa u yime eribuweni ra lwandle ro anama, u ri karhi u vona magandlati ma ya hala ni hala. Eka xiyimo xolexo xo rhula, xana u nga vilerisiwa hileswaku siku rin’wana magandlati wolawo ma to na swi pfuketana ma yima? Doo! Ma ta ya emahlweni ma ri kwalaho. Ku lulama ka wena ku nga fana ni magandlati ya lwandle! Njhani? Loko u fanele u endla xiboho, rhanga u anakanyisisa hileswi Yehovha a lavaka leswaku u swi endla. Kutani u swi endla. Swi nga ri na mhaka leswaku xiboho xexo xi tika ku fikela kwihi, mikarhi hinkwayo Tata wa wena wa rirhandzu u ta ku nyika matimba a tlhela a ku pfuna leswaku u endla leswinene masiku hinkwayo, hi ku fambisana ni milawu Yakwe ya leswo lulama.—Esa. 40:​29-31. w22.08 30 ¶15-17

Loko malembe ya 1 000 ma hela, Sathana u ta tshunxiwa. U ta ringeta ku hambukisa vanhu lava nga riki na xidyoho. Hi nkarhi wa ndzingo, vanhu hinkwavo emisaveni va ta va ni nkarhi wo kombisa leswaku va seketela mani loko swi ta emhakeni ya vito ra Xikwembu ni vuhosi bya xona. (Nhlav. 20:​8-10) Leswi va nga ta swi endla loko va ringiwa hi Sathana, swi ta kombisa loko mavito ya vona ma ta tsariwa hi inki ebukwini ya vutomi ma nga ha suriwi. Vanhu va nhlayo yo karhi leyi nga boxiwangiki va ta kombisa leswaku va fana na Adamu na Evha, hi ku ala ku seketela vuhosi bya Yehovha. Ku ta endleka yini eka vona? Nhlavutelo 20:15 yi ri: “Mani na mani loyi a nga kumeka a nga tsariwanga ebukwini ya vutomi a lahleriwa etiveni ra ndzilo.” Va ta loviseriwa makumu vaxandzuki volavo. Kambe vanhu vo tala lava nga riki na xidyoho va ta wu hlula ndzingo wolowo wo hetelela. w22.09 23-24 ¶15-16

Van’wana evandlheni va sindzise leswaku Vakreste lava nga riki Vayuda va fanele va yimbisiwa, kumbexana hileswi a va lava ku papalata ku xopaxopiwa hi Vayuda. (Gal. 6:12) Muapostola Pawulo a a nga yimi na yona mhaka yoleyo nikatsongo, kambe ku ri ni ku sindzisa leswaku ku landzeriwa mavonelo yakwe, hi ku titsongahata u kombele nkongomiso eka vaapostola ni vakulu eYerusalema. (Mit. 15:2) Leswi Pawulo a tameleke timhaka hi ndlela yoleyo, u pfune Vakreste leswaku va tshama va tsakile nileswaku ku va ni ku rhula evandlheni. (Mit. 15:​30, 31) Loko ku va ni timholovo letikulu, hi endla leswaku ku va ni ku rhula hi ku kombela nkongomiso eka lava Yehovha a va hlawuleke leswaku va rhangela vandlha. Hi ntolovelo, nkongomiso wa le Bibeleni hi nga wu kuma eka tibuku ta hina kumbe eka swiletelo leswi nhlangano wu hi nyikaka swona. Loko hi landzela swiletelo sweswo ematshan’weni yo rhangisa mavonelo ya hina, hi ta kondletela ku rhula evandlheni. w22.08 22 ¶8-9

Mikarhi yin’wana vo tala va hina hi lava ku phofulela vanghana va hina ta le mbilwini. Mikarhi yin’wana sweswo swi nga ha tika. Hi nga ha va hi nga swi tolovelanga ku phofulela van’wana timhaka ta hina naswona swi nga hi twisa ku vava loko hi ku famba ka nkarhi hi twa leswaku munghana wa hina u byele van’wana timhaka ta hina. Kambe ha tsaka swinene loko hi ri na munghana loyi a nga ni xifuva! Vakulu lava tiviwaka hi ku khoma xihundla i “ndhawu yo tumbela eka yona loko ku ri ni moya, ndhawu yo tifihla” eka vamakwavo. (Esa. 32:2) Ha swi tiva leswaku hi nga va byela xin’wana ni xin’wana hi tshunxekile vavanuna lava, hikuva ha swi tiva leswaku leswi hi va byelaka swona a hi nge swi twi kun’wana. A hi va sindzisi leswaku va hi byela timhaka leti nga xihundla. Ha va khensa vasati va vakulu hikuva a va ringeti ku celacela timhaka eka vanuna va vona. I swinene leswaku nkata nkulu a nga byeriwi timhaka ta xihundla ta vamakwerhu. w22.09 11 ¶10-11

Hi nga tiyiseka leswaku Yehovha u ta ponisa malandza yakwe yo tshembeka hi nkarhi wa “nhlomulo lowukulu.” (Mat. 24:21; Dan. 12:1) U ta endla leswi loko Gogo wa Magogo ku nga matiko lama hlanganeke a hlasela malandza yo tshembeka ya Yehovha emisaveni hinkwayo. Hambiloko matiko wolawo lama hlanganeke ma katsa swirho wa 193 swa Nhlangano wa Matiko, a ma nge wu voni ntlangu eka Loyi a Tlakukeke ni mavuthu yakwe ya le tilweni! Yehovha u tshembisa leswi: “Ndzi ta titlakusa ndzi tikwetsimisa, ndzi titivisa emahlweni ka matiko yo tala; ma ta swi tiva leswaku hi mina Yehovha.” (Ezek. 38:​14-16, 23) Armagedoni yi ta va kona endzhaku ka loko Gogo a hlasele vanhu va Xikwembu naswona Yehovha u ta lovisa “tihosi ta misava hinkwayo.” (Nhlav. 16:​14, 16; 19:​19-21) Kutani “lavo lulama hi vona ntsena lava nga ta tshama emisaveni kutani lava tshamaka va tshembekile va ta sala eka yona.”—Swiv. 2:21. w22.10 16-17 ¶16-17

A hi swi tivi leswi nga etimbilwini ta vanhu; i Yehovha ntsena loyi a “[kambisisaka] swikongomelo swa munhu.” (Swiv. 16:2) U rhandza vanhu hinkwavo lava humaka eka swiyimo ni mindhavuko yo hambanahambana. Naswona Yehovha u hi khutaza leswaku hi “[rhandzana] hi mbilu yo basa.” (2 Kor. 6:13) Hi fanele hi rhandza vamakwerhu hinkwavo, ku nga ri ku va avanyisa. Nakambe leswi swi vula leswaku ni vanhu lava nga riki Timbhoni a hi fanelanga hi va avanyisa. Xana u nga avanyisa xaka ra wena leri nga riki Mbhoni hi ku vula u ku, “Loyi a nge pfuki a amukele ntiyiso”? Doo, sweswo ku ta va ku ri nsele ni ku tiendla n’wamunene. Yehovha u ya emahlweni a nyika “vanhu hinkwavo hinkwako-nkwako” nkarhi wa leswaku va hundzuka. (Mit. 17:30) Mikarhi hinkwayo tsundzuka leswaku eka Yehovha lava ehleketaka onge va lulame swinene ku tlula van’wana u va teka va nga lulamanga. Onge ndlela leyi hi rhandzaka milawu ya Yehovha yo lulama yi nga endla leswaku hi tsaka, yi tlhela yi pfuna van’wana leswaku va tshinela ekusuhi na hina ni le ka Xikwembu xa hina. w22.08 31 ¶20-22

Hi nga langutela ku kanetiwa loko hi ri karhi hi endla ntirho wa hina wo chumayela. Ku kanetiwa koloko ku nga ha nyanya enkarhini lowu taka. (Dan. 11:44; 2 Tim. 3:12; Nhlav. 16:21) Hambiswiritano, hi nga tiyiseka leswaku Yehovha u ta hi nyika mpfuno lowu hi wu lavaka. Hikwalahokayini? Mikarhi hinkwayo Yehovha u pfune malandza yakwe leswaku ma hetisisa swiavelo swa wona swi nga ri na mhaka leswaku swi tika ku fikela kwihi. Xiya leswi humeleleke muprofeta Ezekiyele loko a chumayela Vayuda lava a va ri evuhlongeni eBabilona. A ku ri vanhu va njhani lava Ezekiyele a a fanele a va chumayela? Yehovha u va hlamusele tanihi “lava nga yingisiki,” “lava omeke tinhloko” ni “lava xandzukeke.” A va tlhava ku fana ni mitwa naswona a va ri ni khombo ku fana ni swipame. A swi hlamarisi leswi Yehovha hi ku phindhaphindha a byeleke Ezekiyele a ku: “U nga va chavi”! (Ezek. 2:​3-6) Ezekiyele u kote ku hetisisa ntirho wakwe hikuva (1) a a rhumiwe hi Yehovha, (2) moya wa Xikwembu a wu n’wi tiyisa na (3) a a titiyisa hi marito ya Xikwembu. w22.11 2 ¶1-2

Swilo hinkwaswo leswi hanyaka leswi Yehovha a swi tumbuluxeke laha misaveni eku heteleleni a swi ta fa, handle ka vanhu. U va nyike nkateko wo hlawuleka wa ku hanya hilaha ku nga heriki. Yehovha u tlhele a hi vumba hi ri ni ku navela lokukulu ko ya emahlweni hi hanya. Loko yi vulavula hi vanhu, Bibele yi ri Xikwembu xi “endl[e] leswaku vanhu va navela ku hanya hilaha ku nga heriki.” (Ekl. 3:11) Xexo i xin’wana xa swivangelo lexi endlaka hi teka rifu tanihi nala. (1 Kor. 15:26) Loko hi vabya ngopfu, xana hi amukela xiyimo ivi hi nga endli nchumu? Nikatsongo. Hi ntolovelo, hi ya eka dokodela kumbexana hi nwa mirhi leyi lwisanaka ni mavabyi. Kahlekahle, hi endla xin’wana ni xin’wana leswaku hi nga fi. Loko munhu loyi hi n’wi rhandzaka a fa, hambi hi lonkulu kumbe lontsongo, ku ringana nkarhi wo leha hi twa ku vava swinene. (Yoh. 11:​32, 33) Entiyisweni, Muvumbi wa hina la nga ni rirhandzu, a a ta va a nga hi endlanga hi ri ni ku navela ku hanya hilaha ku nga heriki loko a ku nga ri xona xikongomelo xakwe. w22.12 3 ¶5; 4 ¶7

Emikarhini leyi yo tika vamakwerhu vo tala va vabya, va chava naswona va titwa va ri voxe. Endla matshalatshala yo tihlanganisa ni vamakwerhu. Ntungu wu nga ha endla leswaku hi nga tshinelelani ni vamakwerhu loko hi ri na vona. Hi nkarhi wolowo, u nga ha titwa ku fana na muapostola Yohane. A a lava ku vona munghana wakwe Gayo hi xiviri. (3 Yoh. 13, 14) Hambiswiritano, Yohane u swi xiyile leswaku a a nga ta swi kota ku vona Gayo hi nkarhi wolowo. Hikwalaho, u endle leswi a nga swi kotaka, u n’wi tsalele papila. Loko swi nga koteki leswaku u vona vamakwerhu hi xiviri mikarhi hinkwayo, ringeta ku tirhisa tindlela tin’wana to tihlanganisa na vona. Loko u tihlanganisa ni vamakwerhu u ta titwa u ntshunxekile ni ku va ni ku rhula. Loko ku ri ni swin’wana swi ku karhataka, tihlanganise ni vakulu naswona u swi amukela loko va ku khutaza.—Esa. 32:​1, 2. w22.12 17-18 ¶6-7

Bibele yi kombisa leswaku ku ringana nkarhi wo karhi, milenge ya Yosefa a yi bohiwe hi tinketana naswona nhamu yakwe a yi bohiwe hi tinsimbi. (Ps. 105:​17, 18) Swilo a swi n’wi fambela ximatsi Yosefa. U suke eka ku va hlonga leri tshembiwaka a ya va xivochwa. Xana u tshame u va eka xiyimo xo tika lexi nyanyeke hambiloko u khongela hi mbilu hinkwayo? Sweswo swi nga endleka. Yehovha a nga hi sirheleli eka miringo emisaveni leyi fumiwaka hi Sathana. (1 Yoh. 5:19) Nilokoswiritano, u nga tiyiseka hi leswi: Yehovha wa swi vona hinkwaswo leswi u langutaneke na swona naswona wa khathala ha wena. (Mat. 10:​29-31; 1 Pet. 5:​6, 7) U hi tshembise leswi: “Ndzi nga ka ndzi nga ku tshiki naswona ndzi nga ka ndzi nga ku fularheli.” (Hev. 13:5) Yehovha a nga ku pfuna u tiyisela hambiloko u vona onge a ku na ndlela yo huma. w23.01 16 ¶7-8

Matsalwa ma hi tiyisekisa leswaku Xikwembu xa hina a xi nge hi lahli loko hi endla swihoxo. Hi ku phindhaphindha Vaisrayele va dyohele Yehovha; kambe loko va hundzukile, u va rivalerile. Vakreste vo sungula a va swi tiva leswaku na vona Xikwembu xa va rhandza swinene. Hi ku kongomisiwa hi moya lowo kwetsima, muapostola Pawulo u khutaze vapfumerikulobye leswaku va ‘rivalela ni ku chavelela’ wanuna la endleke xidyoho lexikulu kambe a hundzukeke. (2 Kor. 2:​6, 7; 1 Kor. 5:​1-5) Swa hlamarisa leswi Yehovha a nga va tshikangiki vagandzeri vakwe hikwalaho ka leswi va endleke swidyoho! Ematshan’weni ya sweswo, u va pfunile hi ndlela ya rirhandzu, a va lulamisa ni ku tlhela a va amukela. U tshembisa ku endla leswi fanaka eka vadyohi lava hundzukaka namuntlha. (Yak. 4:​8-10) Bibele yi kombisa vutlhari bya Xikwembu, vululami ni rirhandzu ra xona. Buku leyi yi kombisa leswaku Yehovha u lava hi n’wi tiva. U lava leswaku hi va vanghana vakwe. w23.02 7 ¶16-17

Hi na xivangelo lexi twalaka xo lava ku vona ndlela leyi swiendlakalo swa misava swi hetisisaka vuprofeta bya Bibele hayona. Hi xikombiso, Yesu u hi byele hi swilo leswi a swi ta endleka leswi a swi ta hi pfuna hi tiva loko makumu ya misava ya Sathana ya ri kwala nyongeni. (Mat. 24:​3-14) Muapostola Petro u hi khutaze leswaku hi byi tekela enhlokweni vuprofeta lebyi hetisekaka leswaku ripfumelo ra hina ri ta tshama ri tiyile. (2 Pet. 1:​20, 21) U lava leswaku hi va ni langutelo lerinene loko hi ri karhi hi kambisisa vuprofeta bya Bibele. U hi khutaza leswaku hi “anakanyisisa hi siku ra Yehovha.” (2 Pet. 3:​11-13) Hikwalahokayini? A ho lava ku tiva “siku ra kona ni nkarhi” lowu Yehovha a nga ta tisa Armagedoni ntsena kambe hi lava ku tirhisa nkarhi lowu saleke leswaku hi ‘tikhoma hi ndlela yo kwetsima ni ku tinyiketela eka Xikwembu.’ (Mat. 24:36; Luka 12:40) Hi lava ku tikhoma kahle mikarhi hinkwayo ni ku tiyiseka leswaku matshalatshala lama hi ma endlaka entirhweni wa Yehovha ma kombisa leswaku ha n’wi rhandza swinene. Leswaku hi endla tano, hi fanele hi tivonela. w23.02 16 ¶4, 6

Ku ni leswi lava “tinyimpfu tin’wana” va faneleke va swi endla sweswi leswaku va fanelekela ku hanya eParadeyisini. Hi fanele hi kombisa ndlela leyi hi titwaka hayona hi Yesu. Hi xikombiso, hi kombisa leswaku ha n’wi rhandza hi ndlela leyi hi va khomaka hayona vamakwavo wakwe. Yesu u vule leswaku a a ta avanyisa tinyimpfu hi ku ya hi ndlela leyi ti khomaka vamakwavo wakwe hayona. (Mat. 25:​31-40) Hi nga va seketela entirhweni wo chumayela ni wo endla vadyondzisiwa. (Mat. 28:​18-20) Swi lava leswaku hi endla swo karhi sweswi leswaku hi va muxaka wa vanhu lava Yehovha a va lavaka eParadeyisini. Hi nga tirha hi matimba leswaku hi va ni mahanyelo lamanene ni ku ringanisela evuton’wini. Nakambe hi nga tshembeka eka Yehovha, vamakwerhu ni le ka loyi hi tekaneke na yena. Loko hi ya hi hanya hi milawu ya Xikwembu emisaveni leyi yo homboloka swi ta hi olovela ku hanya hayona eParadeyisini. Hi nga tlhela hi kuma vutshila ni maendlelo ya swilo lama kombisaka leswaku hi tilulamisela ku ya hanya kona. w22.12 11-12 ¶14-16

Ha n’wi rhandza Yesu tanihi Hosi ya hina hikuva i Mufumi lonene. Yehovha u letele N’wana wakwe naswona u n’wi hlawurile leswaku a fuma. (Esa. 50:​4, 5) Nakambe ehleketa hi ndlela leyi Yesu a hi rhandzeke hayona. (Yoh. 13:1) Swa fanela leswaku Yesu u n’wi rhandza tanihi Hosi ya wena. U vule leswaku lava n’wi rhandzaka hi mbilu hinkwayo, ku nga lava a va tekaka va ri vanghana vakwe, va kombisa ndlela leyi va n’wi rhandzaka hayona hi ku yingisa swileriso swakwe. (Yoh. 14:15; 15:​14, 15) I nkateko lowukulu ku va munghana wa N’wana wa Yehovha! Wa swi tiva leswaku Yesu wa titsongahata naswona u tekelela Tata wakwe hilaha ku heleleke. U dyondzile leswaku u phamele lava a va ri ni ndlala, a chavelela lava heleke matimba ni ku horisa lava vabyaka. (Mat. 14:​14-21) U yi vonile ndlela leyi a ri kongomisaka hayona vandlha namuntlha. (Mat. 23:10) Nakambe wa swi tiva leswaku u ta endla swo tala ngopfu ku nga ri khale tanihi Hosi ya Mfumo wa Xikwembu. U nga swi kombisa njhani leswaku wa n’wi rhandza? U nga swi kombisa hi ku n’wi tekelela. U nga sungula ku endla sweswo hi ku tinyiketela eka Yehovha ivi u khuvuriwa. w23.03 4 ¶8, 10

Yehovha u tate matilo, misava ni lwandle hi swivumbiwa swo hlamarisa leswi hi nga dyondzaka eka swona. (Ps. 104:​24, 25) Ehleketa hi ndlela leyi Xikwembu xi hi vumbeke hayona. Xi hi endle hi kota ku tsakela ntumbuluko wa xona wo xonga. Xi tlhele xi endla swi koteka leswaku hi tiphina hi swilo swo hambanahambana leswi xi swi tumbuluxeke hi ku tirhisa switwi swa hina swa ntlhanu ku nga ku vona, ku twa, ku khumba, ku kota ku twa nantswo ni nun’hwelo. Bibele yi hi nyika xivangelo xin’wana xa nkoka lexi endlaka hi lava ku kambisisa ntumbuluko. Ntumbuluko wu hi dyondzisa hi vumunhu bya Yehovha. (Rhom. 1:20) Hi xikombiso, xiyisisa swilo leswi Yehovha a swi tumbuluxeke hi ndlela yo hlamarisa. Xana a swi kombisi vutlhari bya Xikwembu? Ehleketa hi swakudya swo hambanahambana leswi hi tiphinaka ha swona. Swi le rivaleni leswaku Xikwembu xi rhandza vanhu. Loko hi vona vumunhu bya Yehovha eka leswi a swi tumbuluxeke, hi ya hi n’wi tiva ku antswa ni ku tlhela hi tshinela eka yena. w23.03 16 ¶4-5

Loko misava leyi yi ya yi nyanya ku biha, ndlela leyi hi tshembaka ntiyiso hayona yi ta ringiwa. Vanhu va nga ha ringeta ku hi endla hi kanakana loko rungula leri nga eBibeleni ku ri ntiyiso kumbe loko namuntlha Yehovha a hlawule nandza wo tshembeka ni wo tlhariha leswaku a kongomisa vagandzeri vakwe. Kambe loko hi nga kanakani leswaku mikarhi hinkwayo Rito ra Yehovha i ntiyiso, a hi nge yi pfumeleli mihlaselo yoleyo yi hi tsanisa ripfumelo. Hi ta ‘endla xiboho xo yingisa milawu ya Yehovha hilaha ku nga heriki, kukondza hi fa.’ (Ps. 119:112) A hi “nge khomiwi hi tingana” ku byela van’wana ntiyiso ni ku va khutaza leswaku va hanya hi wona. (Ps. 119:46) Hi ta kota ku tiyisela swiyimo swo tika swinene hambi ku ri ku xanisiwa hi “nga heli mbilu naswona [hi] tsakile.” (Kol. 1:11; Ps. 119:​143, 157) Ntiyiso wa hi tiyisa, wu endla hi swi tiva leswaku hi hanyela yini naswona wa hi kongomisa. Wu hi nyika ntshembo wa leswaku hi ta va ni vumundzuku lebyinene loko ku fuma Mfumo wa Xikwembu. w23.01 7 ¶16-17

Hi vusiku byo hetelela a nga si dlayiwa, Yesu u khongelele vadyondzisiwa vakwe nkarhi wo leha a kombela Tata wakwe leswaku a “va sirhelela eka lowo homboloka.” (Yoh. 17:15) Hakunene Yesu a a va rhandza. Hambileswi a a ta langutana ni ndzingo lowukulu ku nga ri khale kambe a a karhateka hi vaapostola vakwe. Ku fana na Yesu a hi khathali hi swilaveko swa hina ntsena. Ematshan’weni ya sweswo, nkarhi ni nkarhi ha va katsa vamakwerhu eswikhongelweni swa hina. Loko hi endla tano, hi yingisa xileriso xa Yesu xa leswaku hi rhandzana naswona hi komba Yehovha ndlela leyi hi va rhandzaka hayona vamakwerhu. A hi tlangi hi nkarhi loko hi khongelela vamakwerhu. Rito ra Xikwembu ri hi byela leswaku “xikhongelo xa munhu la lulameke xi ni matimba.” (Yak. 5:16) Vamakwerhu va swi lava swikhongelo swa hina hikuva va langutana ni miringo yo tala. w22.07 23-24 ¶13-15