Watchtower LAYIBURARI YA LE KA WEB SITE
Watchtower
LAYIBURARI YA LE KA WEB SITE
Xitsonga
  • BIBELE
  • MIKANDZIYISO
  • TINHLENGELETANO TA VANDHLA
  • es24 matl. 78-88
  • August

A ku na vhidiyo.

Hi khomele, ku ve ni xiphiqo loko hi tlanga vhidiyo leyi.

  • August
  • Ku Kambisisa Matsalwa Siku Ni Siku—2024
  • Swihloko
  • Ravumune, August 1
  • Ravuntlhanu, August 2
  • Mugqivela, August 3
  • Sonto, August 4
  • Musumbhunuku, August 5
  • Ravumbirhi, August 6
  • Ravunharhu, August 7
  • Ravumune, August 8
  • Ravuntlhanu, August 9
  • Mugqivela, August 10
  • Sonto, August 11
  • Musumbhunuku, August 12
  • Ravumbirhi, August 13
  • Ravunharhu, August 14
  • Ravumune, August 15
  • Ravuntlhanu, August 16
  • Mugqivela, August 17
  • Sonto, August 18
  • Musumbhunuku, August 19
  • Ravumbirhi, August 20
  • Ravunharhu, August 21
  • Ravumune, August 22
  • Ravuntlhanu, August 23
  • Mugqivela, August 24
  • Sonto, August 25
  • Musumbhunuku, August 26
  • Ravumbirhi, August 27
  • Ravunharhu, August 28
  • Ravumune, August 29
  • Ravuntlhanu, August 30
  • Mugqivela, August 31
Ku Kambisisa Matsalwa Siku Ni Siku—2024
es24 matl. 78-88

August

Ravumune, August 1

Kutani ku tsariwa buku emahlweni ka yena leyi nga ni mavito ya lava nga ta tsundzukiwa hi Yehovha, lava n’wi chavaka va tlhela va anakanyisisa hi vito ra yena.—Mal. 3:16.

Hikwalahokayini Yehovha a tsala ‘ebukwini’ mavito ya lava mavulavulelo ya vona ma kombisaka ku n’wi chava ni ku ehleketisisa hi vito rakwe? Leswi hi swi vulaka hi milomu ya hina swi kombisa leswi nga etimbilwini ta hina. Yesu u te: “Nomu wu vulavula leswi mbilu yi taleke swona.” (Mat. 12:34) Yehovha u lava leswaku lava n’wi rhandzaka va tiphina hi vutomi emisaveni leyintshwa hilaha ku nga heriki. Ndlela leyi hi vulavulaka hayona yi nga endla leswaku Yehovha a amukela leswi hi n’wi endlelaka swona kumbe a nga swi amukeli. (Yak. 1:26) Van’wana lava nga xi rhandziki Xikwembu va vulavula hi ndlela ya tihanyi, yo hlundzuka ni ya ku tikukumuxa. (2 Tim. 3:​1-5) A hi swi lavi ku fana na vona. Hi lava ku tsakisa Yehovha hi mavulavulelo ya hina. Kambe xana Yehovha a nga tsaka loko hi vulavula hi ndlela ya musa loko hi ri etinhlengeletanweni ta vandlha kumbe loko hi chumayela kambe hi khahla ni ku khovolela loko hi vulavula ni mindyangu ya hina emakaya?—1 Pet. 3:7. w22.04 5 ¶4-5

Ravuntlhanu, August 2

Swi ta venga nghwavava, kutani swi ta yi tekela swilo swa yona hinkwaswo, yi ta sala yi nga ambalanga nchumu naswona swi ta dya nyama ya yona swi tlhela swi yi hisa hi ndzilo yi hela.—Nhlav. 17:16.

Xikwembu xi swi nghenise etimbilwini ta timhondzo ta khume ni ta xivandzana leswaku swi lovisa Babilona Lonkulu. Yehovha u ta endla matiko leswaku ma tirhisa xivandzana xo tshwuka, ku nga Nhlangano wa Matiko ku jikela mfumo wa misava wa vukhongeri bya mavunwa ni ku byi herisela makumu. (Nhlav. 18:​21-24) Leswi swi vula yini eka hina? Hi fanele hi tshama hi ri eka “vugandzeri lebyi baseke hi ku ya hi Xikwembu . . . [xa] hina.” (Yak. 1:27) A hi fanelanga hi pfumela ku kuceteriwa hi tidyondzo ta mavunwa, tiholideyi leti humaka eka vujagana, ku hohloka ka mahanyelo ni vungoma bya Babilona Lonkulu! Nakambe hi ya emahlweni hi byela vanhu leswaku va ‘huma eka yena’ leswaku va nga katseki eswidyohweni swa yena emahlweni ka Xikwembu.—Nhlav. 18:4. w22.05 11 ¶17; 14 ¶18

Mugqivela, August 3

Ndzi ta vulavula hi mitirho ya rirhandzu ra Yehovha.—Esa. 63:7.

Vatswari, lavani tindlela to dyondzisa vana va n’wina hi Yehovha ni hi swilo leswinene leswi a mi endleleke swona. (Det. 6:​6, 7) Leswi i swa nkoka swinene ngopfungopfu loko u nga koti ku dyondza na vona nkarhi ni nkarhi ekaya hileswi mutswari loyi un’wana a nga eka vukhongeri byakwe. Makwerhu waxisati loyi a vuriwaka Christine u ri: “Leswi a swi ndzi tikela ku dyondzisa vana va mina, ndzi tirhise nkarhi wun’wana ni wun’wana lowu a wu ndzi pfulekela leswaku ndzi vulavula na vona hi Yehovha.” Nakambe, vulavula kahle hi vamakwerhu ni hi nhlangano wa Yehovha. U nga vulavuli ku biha hi vakulu. Leswi u swi vulaka hi vona, swi nga endla vana va wena va ya eka vakulu loko va lava mpfuno kumbe va nga yi. Kondletela ku rhula ekaya. Tshama u ri karhi u kombisa vana ni nuna wa wena rirhandzu. Xixima nuna wa wena ni ku tlhela u vulavula kahle hi yena naswona dyondzisa vana va wena ku endla tano. Loko u endla tano, u ta endla leswaku ku va ni ku rhula ekaya ka wena naswona vana va wena swi ta va olovela ku dyondza hi Yehovha.—Yak. 3:18. w22.04 18 ¶10-11

Sonto, August 4

Ndzi tiva mitirho ya wena.—Nhlav. 3:1.

Rungula ra Yesu leri a ri ya evandlheni ra Efesa ri kombise ndlela leyi va tiyiseleke hayona ni ku ya emahlweni va tirhela Yehovha hambileswi a va langutane ni swiphiqo swo hambanahambana. Hambiswiritano, va tshike ku rhandza Yehovha hi ndlela leyi a va n’wi rhandza hayona eku sunguleni. A va fanele va pfuxeta rirhandzu rero, handle ka swona ndlela leyi a va n’wi gandzela hayona a nga ta yi amukeleka. Hilaha ku fanaka ni namuntlha, ku tiyisela a ku enelanga. Hi fanele hi tiyisela hikwalaho ka swivangelo leswi twalaka. Xikwembu xa hina a xo tsakisiwa ntsena hi leswi hi swi endlaka, kambe ni leswaku hikwalahokayini hi swi endla. Xikongomelo xa hina i xa nkoka eka xona hikuva xi lava leswaku hi xi gandzela hikwalaho ka leswi hi xi rhandzaka swinene ni leswi hi khensaka swilo leswi xi hi endlelaka swona. (Swiv. 16:2; Mar. 12:​29, 30) Hi fanele hi tshama hi xalamukile. Vandlha ra le Sarda a ri ri ni xiphiqo lexi hambaneke. Hambileswi ri tirheleke Yehovha hi ku hiseka enkarhini lowu hundzeke kambe sweswi a ri koka milenge entirhweni wa Xikwembu. Yesu u ri byele leswaku ri “xalamuka.” (Nhlav. 3:​1-3) I ntiyiso leswaku Yehovha a nge wu rivali ntirho wa hina.—Hev. 6:10. w22.05 3 ¶6-7

Musumbhunuku, August 5

Swa vuyerisa ku endla ntirho wun’wana ni wun’wana wo tika.—Swiv. 14:23.

Solomoni u vule leswaku ntsako lowu hi wu kumaka hikwalaho ko tirha hi matimba i “nyiko leyi humaka eka Xikwembu.” (Ekl. 5:​18, 19) Solomoni a a yi tiva kahle mhaka leyi. A a nga ri lolo! U ake tiyindlu, a rima masimu ya madiriva, a rima mintanga ni ku aka madamu. U tlhele a aka ni miti. (1 Tih. 9:19; Ekl. 2:​4-6) Wolowo a ku ri ntirho wo tika naswona handle ko kanakana wu endle leswaku a tsaka. Kambe Solomoni a a nga titsheganga hi mitirho yoleyo ntsena leswaku yi n’wi tisela ntsako. U tlhele a endlela Yehovha swilo swo tala. Hi xikombiso, u langutele ku akiwa ka tempele yo gandzela Yehovha yo xonga leyi tekeke malembe ya nkombo ku yi aka. (1 Tih. 6:38; 9:1) Endzhaku ka loko Solomoni a endle swilo swo hambanahambana, u xiye leswaku nchumu wa nkoka lowu munhu a nga wu endlaka i ku tirhela Yehovha. U tsale a ku: “Loko hinkwaswo se swi twiwile, makumu ya mhaka hi lawa: Chava Xikwembu xa ntiyiso u hlayisa swileriso swa xona.”—Ekl. 12:13. w22.05 22 ¶8

Ravumbirhi, August 6

Xikwembu . . . xi mi [rivalele] hi ku tshunxeka hi Kreste.—Efe. 4:32.

EBibeleni ku ni vanhu vo tala lava Yehovha a va rivaleleke. I mani loyi u n’wi ehleketaka? Kumbexana u ehleketa hi Hosi Manase. Hosi yoleyo yo homboloka yi dyohele Yehovha hi tindlela to nyenyetsa ngopfu. A yi rhangela eka vukhongeri bya mavunwa. Yi dlaye vana va yona, yi va nyikela leswaku va va magandzelo ya swikwembu swa mavunwa. Yi kale hi veka ni xifaniso lexi vatliweke xa mavunwa etempeleni yo kwetsima ya Yehovha. Bibele yi vula leswi hi Manase: “U endle swilo swo biha swinene emahlweni ka Yehovha leswaku a n’wi hlundzukisa.” (2 Tikr. 33:​2-7) Kambe loko Manase a hundzuka hi mbilu hinkwayo, Yehovha u n’wi rivalerile. (2 Tikr. 33:​12, 13) Kumbexana u ehleketa na hi Hosi Davhida loyi a dyoheleke Yehovha swinene hikuva a endle vuoswi ni ku dlaya. Kambe loko Davhida a hundzuke hi mbilu hinkwayo ni ku pfumela xidyoho xakwe, Yehovha u n’wi rivalerile na yena. (2 Sam. 12:​9, 10, 13, 14) Hakunene hi nga tiyiseka leswaku Yehovha u lunghekele ku rivalela. w22.06 3 ¶7

Ravunharhu, August 7

Lehisani mbilu; tiyisani timbilu ta n’wina.—Yak. 5:8.

Mikarhi yin’wana swa tika ku tshama hi ri ni ntshembo lowu tiyeke. Hi nga ha hela mbilu loko ha ha rindzele Xikwembu. Hambiswiritano, Yehovha i wa hilaha ku nga heriki naswona ndlela leyi a langutaka nkarhi ha yona yi hambanile ni ya hina. (2 Pet. 3:​8, 9) U ta hetisisa swikongomelo swakwe hi ndlela leyinene ngopfu kambe hi nkarhi wakwe ku nga ri wa hina. I yini leswi nga hi pfunaka leswaku hi tshama hi ri ni ntshembo lowu tiyeke loko ha ha rindzele Xikwembu leswaku xi hetisisa switshembiso swa xona? (Yak. 5:7) A hi tshameni hi ri ni vuxaka lebyinene na Yehovha loyi a nga ta endla leswaku ntshembo wa hina wu hetiseka. Entiyisweni Bibele yi hlamusela leswaku ntshembo ni ripfumelo ra leswaku Yehovha u kona swa fambisana naswona hi yena a “hakelaka lava [n’wi] lavaka hi mbilu hinkwayo.” (Hev. 11:​1, 6) Loko Yehovha a ya a va wa xiviri eka hina, hi ta ya hi tshemba leswaku u ta hetisisa hinkwaswo leswi a swi tshembiseke. Leswaku hi tshama hi ri ni ntshembo lowu tiyeke, hi fanele hi khongela eka Yehovha, hi tlhela hi hlaya Rito rakwe. Hambileswi hi nga swi koteki ku vona Yehovha, hi nga tshinela eka yena. Hi nga vulavula na yena hi xikhongelo hi nga kanakani leswaku u ta hi yingisa.—Yer. 29:​11, 12. w22.10 26-27 ¶11-13

Ravumune, August 8

Yobo a sungula ku vulavula a rhukana siku leri a velekiweke ha rona.—Yobo 3:1.

Ehleketa hi leswi. Yobo u tshame enkumeni naswona u twa ku vava swinene. (Yobo 2:8) Vanghana vakwe va tshamela ku n’wi byela leswaku i munhu wo biha nileswaku hinkwaswo leswi a tshameke a swi endla a swi pfuni nchumu. Miringo yakwe yi na kunene ku fana ni xihangu loko gome rakwe ro loveriwa hi vana ri n’wi dyisa mbitsi. Eku sunguleni Yobo a nga hlamuli nchumu. (Yobo 2:13) Loko ku ve vanghana va Yobo va ehleketa leswaku ku miyela kakwe ku kombisa leswaku u ta fularhela Muvumbi wakwe, va be hansi. Kutani Yobo a tlakusa nhloko a languta vanghana vakwe a ku: “Ndzi ta fa ndza ha tshembekile!” (Yobo 27:5) I yini leswi pfuneke Yobo a va ni xivindzi hambi a xaniseka? Hambiloko swilo swi n’wi fambela ximatsi, a nga heleriwanga hi ntshembo wa leswaku Xikwembu xakwe lexi nga ni rirhandzu, eku heteleleni xi ta n’wi twela vusiwana. A swi tiva leswaku hambiloko o fa, Yehovha a a ta n’wi pfuxa.—Yobo 14:​13-15. w22.06 22 ¶9

Ravuntlhanu, August 9

Kutani mi fanele mi khongela hi ndlela leyi: “Tata wa hina la nga matilweni, vito ra wena a ri kwetsimisiwe. Mfumo wa wena a wu te. Ku rhandza ka wena a ku endleke.”—Mat. 6:​9, 10.

Hi ni njombo yikulu ku nga ku vulavula ni Mutumbuluxi wa tilo ni misava hi xikhongelo. Ehleketa hi mhaka leyi: Hi nga phofulela Yehovha ta le mbilwini nkarhi wun’wana ni wun’wana hi ririmi rin’wana ni rin’wana. Hi nga khongela eka yena hi ri exibedlhele loko hi vabya kumbe loko hi ri ejele hi ri karhi hi tiyiseka leswaku Tata wa hina la nga ni rirhandzu u ta hi twa. Ha yi khensa swinene nyiko leyi. Hosi Davhida a a swi teka swi ri swa nkoka ku khongela. U yimbelelele Yehovha a ku: “Xikhongelo xa mina a xi fane ni murhi wo nun’hwela lowu endliweke kahle lowu nyikeriwaka eka wena.” (Ps. 141:​1, 2) Enkarhini wa Davhida, murhi wo nun’hwela wo kwetsima lowu a wu tirhisiwa evugandzerini bya ntiyiso hi vaprista a wu endliwa hi vukheta. (Eks. 30:​34, 35) Loko Davhida a fanisa xikhongelo xakwe ni murhi wo nun’hwela, a swi kombisa leswaku a a lava ku ehleketisisa hi vukheta hileswi a a lava ku swi byela Tata wakwe wa le tilweni. Na hina hi lava ku endla tano. Hi lava leswaku swikhongelo swa hina swi tsakisa Yehovha. w22.07 20 ¶1-2; 21 ¶4

Mugqivela, August 10

“Hi mina ndzi nga ta rihisela; ndzi ta va xupula,” ku vula Yehovha. —Rhom. 12:19.

Yehovha hi yena a nga ta rihisela. Yehovha a nga hi nyikanga mpfumelelo wo rihisela loko van’wana va hi dyohela. (Rhom. 12:​20, 21) Leswi hi nga ni xidyoho naswona hi nga kotiki ku vona matlhelo hinkwawo ya mhaka, a hi nge swi koti ku avanyisa hi ndlela leyinene ku fana ni Xikwembu. (Hev. 4:13) Nakambe mikarhi yin’wana ndlela leyi hi titwaka hayona yi nga endla hi nga avanyisi kahle. Yehovha u huhutele Yakobo ku tsala a ku: “ku hlundzuka ka munhu a ku n’wi endli a endla swo lulama eka Xikwembu.” (Yak. 1:20) Hi nga tiyiseka leswaku Yehovha u ta endla swilo leswinene naswona u ta avanyisa hi ndlela leyi lulameke. Loko hi rivalela van’wana hi kombisa leswaku ha byi tshemba vululami bya Yehovha. Loko hi swi tshikela Yehovha, hi kombisa leswaku ha tshemba ku u ta herisa swilo hinkwaswo swo biha leswi vangiweke hi xidyoho. Emisaveni leyintshwa leyi a hi tshembisaka yona, swilo swo biha leswi tshameke swi hi twisa ku vava “swi ta rivariwa, naswona a swi nge he ti emiehleketweni.”—Isa. 65:17. w22.06 10-11 ¶11-12

Sonto, August 11

Mi ta vengiwa hi matiko hinkwawo hikwalaho ka vito ra mina.”—Mat. 24:9.

Loko hi vengiwa, byebyo i vumbhoni bya leswaku Yehovha wa hi amukela. (Mat. 5:​11, 12) Diyavulosi hi yena a endlaka leswaku hi kanetiwa. Kambe Yesu u ni matimba ku n’wi tlula! Vanhu va matiko hinkwayo va chumayeriwa mahungu lamanene hileswi Yesu a seketelaka ntirho lowu. A hi kambisiseni vumbhoni bya sweswo. Tanihi vachumayeri va Mfumo hi tlhela hi langutana ni xihinga xin’wana xo chumayela vanhu va tindzimi tin’wana. Yesu u byele muapostola Yohane leswaku a hi ta xi hlula xihinga lexi enkarhini wa hina loko hi ri karhi hi chumayela mahungu lamanene. (Nhlav. 14:​6, 7) Njhani? Hi chumayela vanhu vo tala hilaha hi nga kotaka hakona leswaku va twa mahungu lamanene ya Mfumo ivi va tihlawulela. Namuntlha, vanhu emisaveni hinkwayo va kota ku hlaya rungula leri humaka eBibeleni eka website ya hina ya jw.org hikuva ri kumeka hi tindzimi to tlula 1 000. Huvo leyi Fumaka yi nyike mpfumelelo wa leswaku ku hundzuluxeriwa buku leyi nge, Tiphine Hi Vutomi Hilaha Ku Nga Heriki! hi tindzimi to tlula 700 leswaku ku va yona leyi hi yi tirhisaka ku dyondza na vanhu. w22.07 9 ¶6-7

Musumbhunuku, August 12

Laha ku nga ni vatsundzuxi vo tala swilo swi famba kahle.—Swiv. 11:14.

Yesu a a twela vanhu vusiwana. Muapostola Matewu u te: “Loko a vona mintshungu a yi twela vusiwana, hikuva a yi tshikileriwa yi nga khathaleriwi ku fana ni tinyimpfu leti nga riki na murisi.” (Mat. 9:36) Yehovha u titwa njhani? Yesu u te: “Tata wa mina la nga ematilweni a nga naveli leswaku un’wana wa lava lavatsongo a lova.” (Mat. 18:14) Leyi i mhaka yo tsakisa! Loko hi ya hi tiva Yesu ku antswa, ndlela leyi hi n’wi rhandzaka hayona Yehovha ya kula. U nga tlhela u dyondza ku rhandza van’wana ni ku ya emahlweni u va Mukreste la wupfeke hi ku heta nkarhi ni vamakwerhu lava nga ni ntokoto evandlheni ra ka n’wina. Xiya ndlela leyi va tsakeke hayona. A va tisoli nikatsongo hi xiboho xa vona xo tirhela Yehovha. Va kombele leswaku va ku byela hi mitokoto yin’wana leyi va veke na yona loko va ri karhi va tirhela Yehovha. Loko u lava ku endla xiboho xa nkoka, kombela xitsundzuxo xa vona. Tsundzuka leswaku “laha ku nga ni vatsundzuxi vo tala swilo swi famba kahle.” w22.08 3 ¶6-7

Ravumbirhi, August 13

Matihlo ya Yehovha ma langute lavo lulama.—1 Pet. 3:12.

Hinkwerhu hi ta langutana ni miringo. Kambe, a hi nge langutani ni miringo hi ri hexe. Ku fana ni tatana loyi a nga ni rirhandzu, Yehovha u tshama a ri karhi a hi sirhelela. U le kusuhi na hina naswona u lunghekele ku twa swirilo swa hina loko hi lava mpfuno ni ku hi seketela. (Esa. 43:2) A hi kanakani leswaku hi nga kota ku tiyisela miringo hikuva u hi nyika hinkwaswo leswi hi swi lavaka leswaku hi kota ku tiyisela. U hi nyike nyiko ya xikhongelo, Bibele, ndzalo ya swakudya leswi hi tiyisaka eripfumelweni ni vamakwerhu lava hi rhandzaka naswona va hi pfunaka loko swilo swi tika. Ha swi khensa swinene leswi Tata wa hina la nge matilweni a hi khathalelaka! “Ha tsaka hikwalaho ka yena.” (Ps. 33:21) Hi nga komba Yehovha leswaku ha swi khensa leswi a hi khathalelaka hi ku tirhisa hinkwaswo leswi a hi nyikaka swona leswaku a hi pfuna. Nakambe hi fanele hi endla swo karhi leswaku hi tshama hi ri ni vuxaka lebyinene na Xikwembu. Hi marito man’wana, loko hi ya emahlweni hi endla leswi hi nga swi kotaka ku yingisa ni ku endla leswi n’wi tsakisaka, u ta hi sirhelela hilaha ku nga heriki! w22.08 13 ¶15-16

Ravunharhu, August 14

Mongo wa rito ra wena i ntiyiso.—Ps.119:160.

Vanhu vo tala namuntlha a va swi tivi leswaku va nga tshemba mani. Va tivutisa loko vanhu lava va va xiximaka vo fana ni van’watipolitiki, van’wasayense ni van’wamabindzu loko hakunene va ri na mhaka na vona. Nakambe a va ha va tshembi vafundhisi. A swi hlamarisi leswi va kanakanaka Bibele, ku nga buku leyi vafundhisi va vulaka leswaku va kongomisiwa hi yona. Tanihi malandza ya Yehovha, ha tiyiseka leswaku hi yena “Xikwembu xa ntiyiso” naswona mikarhi hinkwayo u hi navelela leswinene. (Ps. 31:5; Esa. 48:17) Ha swi tiva leswaku hi nga tshemba leswi hi swi hlayaka eBibeleni. Hi pfumelelana ni leswi xidyondzeki xin’wana xa Bibele xi swi tsaleke, xi te: “A ku na leswi nga mavunwa eka leswi Xikwembu xi swi vuleke kumbe swi nga endleki. Vanhu va Xikwembu va nga tshemba leswi xi swi vulaka hikuva va tshemba Xikwembu lexi swi vuleke.” w23.01 2 ¶1-2

Ravumune, August 15

A hi khathalelaneni.—Hev. 10:24.

Hi aka vamakwerhu loko hi endla leswaku ripfumelo ra vona eka Yehovha ri tiya. Van’wana va hlekuriwa hi vanhu lava nga riki vapfumeri. Van’wana va ni swiphiqo leswikulu swa rihanyo kasi van’wana swa va tikela ku rivalela lava va twiseke ku vava. Kasi van’wana se i khale va rindzele leswaku ku lovisiwa misava leyi. Swiyimo leswi swi nga ringa ripfumelo ra Vakreste namuntlha. Vakreste va le mikarhini ya ku tsariwa ka Bibele va langutane ni mitlhontlho leyi fanaka. Muapostola Pawulo u tirhise Matsalwa ku aka ripfumelo ra vamakwavo. Hi xikombiso, swi nga ha endleka Vakreste lava nga Vayuda a va nga swi tivi leswaku va ta ma hlamurisa ku yini maxaka ya vona lama a ma nga ri Vakreste, lama a ma vula leswaku vukhongeri bya Xiyuda byi tlakuke ku tlula bya Vakreste. A swi kanakanisi leswaku papila leri Pawulo a ri tsaleleke Vaheveru ri va tiyise swinene Vakreste volavo. (Hev. 1:​5, 6; 2:​2, 3; 9:​24, 25) Va tirhise leswi a swi vuleke leswaku va miyeta lava a va va kaneta. w22.08 23-24 ¶12-14

Ravuntlhanu, August 16

U katekile munhu loyi a tshembaka Yehovha.—Yer. 17:7.

Vanhu emisaveni leyi ya Sathana a va ha swi tivi leswaku va nga tshemba mani. Van’wamabindzu, van’watipolitiki ni vafundhisi va tshamela ku xisa vanhu. Sweswo swi endla va nga ha va tshembi vanghana, vaakelani hambi ku ri swirho swa ndyangu. Leswi a swi fanelanga swi hi hlamarisa. Bibele yi profete leswi: “Emasikwini yo hetelela . . . , vanhu va ta va . . . lava nga tshembekiki, . . . valumbeti, . . . vaxengi.” Hi marito man’wana, vanhu a va ta tikhoma ku fana ni xikwembu xa misava leyi, lexi nga tshembekiki. (2 Tim. 3:​1-4; 2 Kor. 4:4) Hina Vakreste ha swi tiva leswaku hi nga n’wi tshemba hi ku helela Yehovha. Ha tiyiseka leswaku wa hi rhandza naswona a “nge pfuki [a] va tshikile” vanghana vakwe. (Ps. 9:10) Hi nga tlhela hi tshemba Yesu Kreste hikuva u hi ferile. (1 Pet. 3:18) Hi tlhele hi tivonela hi ya hina leswaku nkongomiso wa le Bibeleni wa tshembeka.—2 Tim. 3:​16, 17. w22.09 2 ¶1-2

Mugqivela, August 17

Wa tsaka un’wana ni un’wana la chavaka Yehovha, la fambaka etindleleni ta Yena.—Ps. 128:1.

Ntsako wa xiviri a hi ntsako wa xinkarhana lowu hatlaka wu hela. Munhu a nga va na wona vutomi hinkwabyo. Njhani? Eka Dyondzo ya Yesu ya le Ntshaveni u te: “Va tsaka lava tikarhatelaka ku va ni vuxaka ni Xikwembu.” (Mat. 5:3) Yesu a a swi tiva leswaku vanhu va vumbiwe va ri ni ku navela ku tiva ni ku gandzela Muvumbi wa vona Yehovha Xikwembu. Leswi Yehovha a nga “Xikwembu lexi tsakeke,” ni lava n’wi gandzelaka va nga tsaka. (1 Tim. 1:11) Xana swilo swi fanele swi khuluka kunene evuton’wini bya hina leswaku hi kota ku tsaka? Doo! Eka dyondzo yakwe, Yesu u vule leswaku hambi ku ri “lava rilaka” va nga tsaka. Yesu u vule leswi fanaka hi “lava xanisiweke hikwalaho ka leswo lulama.” (Mat. 5:​4, 10, 11) Yesu u hi dyondzise leswaku a hi kumi ntsako hileswi swilo swi hi fambelaka kahle evuton’wini kambe hi kuma ntsako loko hi ri ni vuxaka lebyinene na Xikwembu ni ku tshinela eka xona.—Yak. 4:8. w22.10 6 ¶1-3

Sonto, August 18

Munhu loyi a nga ni ku twisisa u tshama a miyerile.—Swiv. 11:12.

Ku twisisa ku ta pfuna Mukreste a tiva leswaku ku ni “nkarhi wa ku miyela ni nkarhi wa ku vulavula.” (Ekl. 3:7) Xiga lexi nge, “ku vulavula swi fana ni silivhere, kasi ku miyela swi fana ni nsuku” xi tolovelekile eka mindhavuko yin’wana. Hi marito man’wana, mikarhi yin’wana swa antswa ku miyela ku ri ni ku vulavula. Xiya ntokoto lowu. Nkulu wo karhi loyi a nga ni ntokoto mikarhi yo tala u komberiwa ku pfuna mavandlha lama nga ni swiphiqo. Nkulu wa le vandlheni rakwe loko a vulavula hi nkulu loyi u ri: “A nga si tshama a hi byela hi timhaka leti nga ta xihundla ta le mavandlheni man’wana.” Sweswo swi endle leswaku ni vakulu lava a nga na vona evandlheni va n’wi xixima swinene. Va tiyiseka leswaku a nga byeli munhu timhaka ta vona leti nga ta xihundla. Leswaku van’wana va kota ku hi tshemba, swi lava hi tshembeka. Hi tshemba munhu la tshembekaka hikuva ha swi tiva leswaku u vulavula ntiyiso mikarhi hinkwayo.—Efe. 4:25; Hev. 13:18. w22.09 12 ¶14-15

Musumbhunuku, August 19

A ku na vutlhari, kumbe ku twisisa kumbe ndzayo leswi nga lwaka na Yehovha.—Swiv. 21:30.

Vo tala a va byi yingisi vutlhari bya ntiyiso loko “by[i] huwelela exitarateni.” (Swiv. 1:20) Hi ku ya hi Bibele, ku ni mixaka yinharhu ya vanhu lava alaka vutlhari: ku nga “lava nga riki na ntokoto,” “lava hlekulaka” ni “swiphukuphuku.” (Swiv. 1:​22-25) “Lava nga riki na ntokoto” hi lava yengekaka kumbe ku xiseka hi ku olova. (Swiv. 14:15) Hi xikombiso, ehleketa hi vanhu va timiliyoni lava kanganyisiwaka hi vafundhisi kumbe varhangeri va tipolitiki. Van’wana swi va tsema nhlana loko va xiya leswaku vafundhisi ni varhangeri va tipolitiki va va hemberile. Kambe vanhu lava ku vulavuriweke ha vona eka Swivuriso 1:22 va hlawula ku tshamisa xisweswo va nga ri na ntokoto hileswi swi va tsakisaka. (Yer. 5:31) A va swi lavi ku dyondza leswi Bibele yi swi vulaka kumbe va tihlamulela hikwalaho ka mahanyelo ya vona. A hi swi lavi ku tekelela vanhu vo tano lava honisaka swilo naswona swi nga va vaviki!—Swiv. 1:32; 27:12. w22.10 19 ¶5-7

Ravumbirhi, August 20

Tivekeni ehansi ka vulawuri hinkwabyo bya vanhu.—1 Pet. 2:13.

Nhlangano wa Xikwembu na wona wu hi nyika nkongomiso leswaku hi sirheleleka. Nkarhi ni nkarhi hi tsundzuxiwa leswaku hi nyika vakulu tinomboro ta hina leswaku va ta kota ku hi kuma loko ku ri ni xiyimo xa xihatla. Hi nga tlhela hi nyikiwa nkongomiso mayelana ni ndhawu yo chavela eka yona, ku baleka ni ku kuma mphalalo kumbe leswaku hi nga va pfuna rini van’wana kumbe njhani. Loko hi honisa, hi nga ha veka vutomi bya hina ni bya vakulu ekhombyeni lava hi khathalelaka. (Hev. 13:17) Vamakwerhu lava bohekeke ku rhurhela ematikweni man’wana hikwalaho ka mhangu ya ntumbuluko kumbe titoyitoyi, va endle leswi va nga swi kotaka leswaku va amukela xiyimo xa vona lexintshwa ni ku ya emahlweni va gingiriteka entirhweni wa Yehovha. Ku fana ni Vakreste vo sungula lava hangalakeke hikwalaho ka nxaniso, va ye emahlweni va “chumayela mahungu lamanene ya rito ra Xikwembu.” (Mit. 8:4) Ku chumayela ku va pfuna leswaku va ehleketa ngopfu hi Mfumo wa Xikwembu ku nga ri swiyimo swa vona swo tika. Hikwalaho ka sweswo, va tshama va tsakile naswona va ni ku rhula. w22.12 19 ¶12-13

Ravunharhu, August 21

Yehovha u le kusuhi na mina; a ndzi nge chavi.—Ps. 118:6.

Yehovha u teka un’wana ni un’wana wa hina a ri wa nkoka. Loko Yesu a nga si rhuma vaapostola vakwe leswaku va ya chumayela, u va pfune leswaku va nga chavi ku kanetiwa. (Mat. 10:​29-31) U endle tano hi ku vulavula hi xin’wana xa swinyenyana leswi tolovelekeke ngopfu eIsrayele: ku nga xindzingiri. Enkarhini wa Yesu swinyenyana leswi a swi nga durhi. Kambe u byele vadyondzisiwa vakwe a ku: “Ku hava ni xin’we xa swona lexi nga welaka ehansi Tata wa n’wina a nga swi tivi.” U tlhele a ku: “Mi va nkoka ku tlula swindzingiri swo tala.” Hikwalaho, Yesu u tiyisekise vadyondzisiwa vakwe leswaku Yehovha u teka un’wana ni un’wana wa vona a ri wa nkoka kutani a va nga ri na xona xivangelo xo chava ku xanisiwa. A swi kanakanisi leswaku vadyondzisiwa va tsundzuke marito ya Yesu loko va vona swindzingiri loko va ri karhi va chumayela emadorobeni ni le mitini. Mikarhi hinkwayo loko u vona xinyenyana lexitsongo, tsundzuka leswaku Yehovha u ku teka u ri wa nkoka hikuva na wena u wa “nkoka ku tlula swindzingiri swo tala.” Hi ku pfuniwa hi yena, u nga tiyisela ku xanisiwa u nga chavi. w23.03 18 ¶12

Ravumune, August 22

Mi [endle] leswaku Faro ni malandza yakwe va hi venga naswona mi veke banga evokweni ra vona leswaku va hi dlaya.—Eks. 5:21.

Mikarhi yin’wana hi langutana ni swiphiqo swo tanihi ku kanetiwa hi maxaka kumbe ku lahlekeriwa hi ntirho. Loko hi langutana ni swiphiqo nkarhi wo leha hi nga hela matimba ni ku titwa hi nga ri na ntshembo. Sathana u tirhisa nkarhi wolowo ku hi endla hi kanakana leswaku Yehovha wa hi rhandza. Diyavulosi u lava hi ehleketa leswaku ha xaniseka hikwalaho ka leswi hi nga na vuxaka na Yehovha kumbe hileswi hi nga eka nhlangano Wakwe. Swo fana ni sweswo swi endlekile eka Vaisrayele van’wana lava a va ri eEgipta. Loko swa ha sungula a va tshemba leswaku Yehovha u hlawule Muxe na Aroni leswaku va va tshunxa evuhlongeni. (Eks. 4:​29-31) Kambe hi ku famba ka nkarhi loko Faro a va tikisela vutomi, va sole Muxe na Aroni. (Eks. 5:​19, 20) Va sole malandza ya Xikwembu yo tshembeka. Ku vava ka swona! Loko ku ve i khale u ri karhi u tiyisela swiphiqo, chululela Yehovha ta le mbilwini hi xikhongelo ni ku lava ku seketeriwa hi yena. w22.11 15 ¶5-6

Ravuntlhanu, August 23

Hakunene ndzi tiyisile ndzi ri eka n’wina, nkarhi wa ta naswona se wu fikile, lowu vafi va nga ta twa rito ra N’wana wa Xikwembu, kutani lava n’wi yingiseke va ta kuma vutomi.—Yoh. 5:25.

Yehovha i Munyiki wa Vutomi naswona u ni matimba yo pfuxa vanhu eku feni. U nyike muprofeta Eliya matimba yo pfuxa n’wana wa noni ya le Serapta. (1 Tih. 17:​21-23) Hi ku famba ka nkarhi, muprofeta Elixa hi ku pfuniwa hi Xikwembu u pfuxe n’wana wa wansati wa Muxunemi. (2 Tih. 4:​18-20, 34-37) Ku pfuxiwa koloko ni kun’wana ka hi tiyisekisa leswaku Yehovha u ni matimba yo pfuxa vanhu. Loko a ri laha misaveni, Yesu u swi kombisile leswaku Tata wakwe u n’wi nyike matimba yo endla tano. (Yoh. 11:​23-25, 43, 44) Sweswi Yesu u le tilweni naswona u nyikiwe “matimba yo lawula swilo hinkwaswo etilweni ni le misaveni.” Hikwalaho, u le xiyin’weni xo hetisisa xitshembiso xa leswaku “hinkwavo lava nga emasirheni” va ta pfuxiwa va ri ni ntshembo wo hanya hilaha ku nga heriki.—Mat. 28:18; Yoh. 5:​26-29. w22.12 5 ¶10

Mugqivela, August 24

Vaisrayele va ta ala ku ku yingisa hikuva a va swi lavi ku ndzi yingisa.—Ezek. 3:7.

Loko vanhu va bakanya Ezekiyele a va bakanya Yehovha. Marito ya ndzimana ya namuntlha ma tiyisekise Ezekiyele leswaku a a nga tsandzekanga tanihi muprofeta loko vanhu va nga n’wi yingisi. Yehovha u tlhele a tiyisekisa Ezekiyele leswaku loko vuavanyisi lebyi a byi vuleke byi hetiseka, vanhu a va ta “swi tiva leswaku a ku ri ni muprofeta exikarhi ka vona.” (Ezek. 2:5; 33:33) A swi kanakanisi leswaku marito wolawo lama chavelelaka ma nyike Ezekiyele matimba lama a a ma lava leswaku a hetisisa ntirho wakwe wo chumayela. Ku fana na Ezekiyele, na hina hi kuma matimba hi ku tiva leswaku hi rhumiwe hi Yehovha. Wa hi hlawulekisa hi ku hi vitana “timbhoni” takwe. (Esa. 43:10) Mawaku nkateko wonghasi! Hilaha Yehovha a byeleke Ezekiyele a ku: “U nga chavi,” ni le ka hina u ri: “Mi nga chavi.” (Ezek. 2:6) Hikwalahokayini hi nga fanelanga hi chava vakaneti va hina? Ku fana na Ezekiyele, hi rhumiwe hi Yehovha naswona wa hi seketela.—Esa. 44:8. w22.11 3-4 ¶4-5

Sonto, August 25

Loyi a tshembekaka u hlayisa mhaka leyi nga xihundla.—Swiv. 11:13.

Ha va khensa namuntlha vakulu ni malandza ya vutirheli hileswi va tshembekaka. Vamakwerhu lava vo tshembeka va hi khathalela swinene naswona ha n’wi khensa Yehovha hikwalaho ka vona! Hi tihi tindlela leti hi nga swi kombisaka ha tona leswaku hi tshembekile? Ha va rhandza vamakwerhu naswona ha khathala hileswi endlekaka evuton’wini bya vona. Kambe hi fanele hi va xixima, hi nga lavi ku tiva leswi swi nga hi khumbiki. Van’wana evandlheni ra Vukreste enkarhini wa ku tsariwa ka Bibele a va “hleva ni ku nghenelela etimhakeni ta van’wana, [va] vulavula hi swilo leswi [va] nga fanelangiki [va] vulavula ha swona.” (1 Tim. 5:13) A hi swi lavi ku fana na vona nikatsongo. A hi nge makwerhu u ku byela mhaka ya xihundla hi ku tshemba leswaku a wu nge byeli van’wana. Hi xikombiso, makwerhu waxisati a nga ha hi byela hi mavabyi lawa a nga na wona kumbe ndzingo wun’wana lowu a langutaneke na wona a tlhela a hi kombela leswaku hi nga byeli munhu. Hi fanele hi endla leswi a nga hi kombela swona. w22.09 10 ¶7-8

Musumbhunuku, August 26

Mi hundzuka mi cinca ndlela leyi mi anakanyaka ha yona.—Rhom. 12:2.

Xiga xa Xigriki lexi hundzuluxeriweke xi va “cinca ndlela leyi mi anakanyaka ha yona” xi nga tlhela xi hundzuluxeriwa xi vula “ku pfuxeta mianakanyo ya n’wina.” Hikwalaho, a swi enelanga ku cinca swilo switsongo evuton’wini bya hina. Ematshan’weni ya sweswo, hi fanele hi tikambisisa leswaku hi vanhu va njhani ivi hi cinca loko swi fanerile leswaku hi ta kota ku hanya hi milawu ya Yehovha hilaha hi nga kotaka hakona. Hi fanele hi ya emahlweni hi endla sweswo. Loko hi nga ha ri na xidyoho, mikarhi hinkwayo hi ta swi kota ku tsakisa Yehovha eka hinkwaswo leswi hi swi endlaka. Kambe sweswi, hi fanele hi tirha hi matimba leswaku hi n’wi tsakisa. Xiya leswaku eka Varhoma 12:​2, Pawulo u vula leswaku hi fanele hi cinca ndlela leyi hi anakanyaka hayona leswaku hi ta kota ku tiva leswi Xikwembu xi lavaka hi swi endla. Ematshan’weni yo titwananisa ni misava leyi, hi fanele hi rhanga hi tikambisisa leswaku hi tiyimisele ku fikela kwihi ku pfumela ku lawuriwa hi mianakanyo ya Xikwembu, ku nga ri ya misava yi kucetela swiboho swa hina ni leswi hi lavaka ku swi fikelela. w23.01 8-9 ¶3-4

Ravumbirhi, August 27

Lahlela ndzhwalo wa wena eka Yehovha, u ta ku seketela. A nge pfuki a pfumerile leswaku la lulameke a wa.—Ps. 55:22.

Xana Yehovha wa nghenelela eka xiyimo xin’wana ni xin’wana lexi hi langutanaka na xona? Xana u lawula xiyimo xin’wana ni xin’wana evuton’wini bya hina leswaku swilo hinkwaswo swo biha leswi hi endlekelaka swi cinca swi va leswinene? Doo, Bibele a yi ma seketeli mavonelo wolawo. (Ekl. 8:9; 9:11) Hambiswiritano, hi tiva leswi: Loko hi ri endzingweni, Yehovha wa swi tiva naswona wa hi twa loko hi kombela mpfuno eka yena. (Ps. 34:15; Esa. 59:1) Xa nkoka swinene, Yehovha a nga hi pfuna hi kota ku tiyisela maxangu. Njhani? Ndlela yin’wana leyi Yehovha a yi tirhisaka ku hi pfuna i ku hi chavelela ni ku hi khutaza, mikarhi yo tala hi nkarhi lowu faneleke. (2 Kor. 1:​3, 4) Xana ku ni nkarhi lowu u nga ehleketaka ha wona evuton’wini bya wena laha Yehovha a ku chaveleleke ni ku ku khutaza hi nkarhi lowu a wu swi lava ngopfu? Mikarhi yo tala hi vona ndlela leyi Yehovha a hi pfuneke hayona loko hi anakanyisisa hi miringo leyi hi hundzeke eka yona. w23.01 17-18 ¶13-15

Ravunharhu, August 28

Xivandzana lexi a xi ri kona kambe xi nga ha riki kona . . . xi ya eku lovisiweni.—Nhlav. 17:11.

Xivandzana lexi a xi lava ku fana ni xivandzana xa tinhloko ta nkombo kambe xona xi ni muvala wo tshwuka. Xi vitaniwa “xifaniso xa xivandzana” naswona xi hlamuseriwa tanihi “hosi ya vunhungu.” (Nhlav. 13:​14, 15; 17:​3, 8) “Hosi” leyi ku vuriwa leswaku ya humelela ivi yi nyamalala kutani hi ku famba ka nkarhi yi tlhela yi humelela. Nhlamuselo leyi yi wu fanela kahle Nhlangano wa Matiko lowu seketelaka mifumo ya tipolitiki ta misava hinkwayo! Eku sunguleni a wu vitaniwa Ntwanano wa Matiko. Kutani hi nkarhi wa Nyimpi ya Vumbirhi ya Misava wu nyamalarile. Wu tlhele wu humelela tanihi Nhlangano wa Matiko. Hi ku tirhisa mavunwa, swivandzana leswi swi endla leswaku vanhu va kaneta Yehovha ni vanhu vakwe. Hi ndlela yo fanekisela swi hlengeleta “tihosi ta misava hinkwayo” ku ya enyimpini ya Armagedoni leyi ku nga “siku lerikulu ra Xikwembu xa Matimba Hinkwawo.”—Nhlav. 16:​13, 14, 16. w22.05 10 ¶10-11

Ravumune, August 29

Xana u hlayisa ku yini?—Luka 10:26.

Loko Yesu a dyondze ku tihlayela Matsalwa wolawo yo Kwetsima, a ngo lo tiva Matsalwa ntsena kambe u tlhele a ma rhandza ni ku ma pfumelela leswaku ma n’wi kongomisa. Hi xikombiso, tsundzuka leswi endlekeke etempeleni loko a ri ni malembe ya 12 ntsena. Vadyondzisi lava a va wu tiva kahle Nawu wa Muxe va “[hlamarile] hikwalaho ka ku twisisa [ka Yesu] ni tinhlamulo takwe.” (Luka 2:​46, 47, 52) Na hina hi nga rhandza ni ku tiva Rito ra Xikwembu loko hi hlaya Matsalwa nkarhi ni nkarhi. Hi nga dyondza eka leswi Yesu a swi byeleke lava a va tiva Nawu ku katsa ni vatsari, Vafarisi ni Vasaduki. Mikarhi yo tala, varhangeri volavo a va ma hlaya Matsalwa kambe a va nga vuyeriwi eka leswi va swi hlayaka. Yesu u boxe swilo swinharhu leswi vavanuna lava a va fanele va swi endlile leswaku va vuyeriwa loko va hlaya Matsalwa. Leswi a va byeleke swona swi ta hi pfuna hi antswisa vuswikoti bya hina byo (1) twisisa leswi hi swi hlayaka, (2) byo kuma tidyondzo ta nkoka ni (3) ku pfumelela Rito ra Xikwembu ri hi kongomisa. w23.02 8-9 ¶2-3

Ravuntlhanu, August 30

Lowo tlhariha u vona khombo kutani a tumbela.—Swiv. 22:3.

Makhombo man’wana lama hi faneleke hi ma papalata ma katsa ku tlanga hi rirhandzu, ku dakwa, makolo, mavulavulelo lama tlhavaka, ku hlalela vuhungasi lebyi nga ni madzolonga, swifaniso leswi pfuxaka ku navela timhaka ta masangu ni swin’wana swo fana ni sweswo. (Ps. 101:3) Diyavulosi u tshama a ri karhi a lava tindlela to onha vuxaka bya hina na Yehovha. (1 Pet. 5:8) Loko hi nga swi xiyi, Sathana a nga byala etimbilwini ta hina ni le miehleketweni mbewu ya mona, ku nga tshembeki, makwanga, rivengo, ku tikukumuxa ni ku va ni xikhomela. (Gal. 5:​19-21) Loko hi nga swi papalati hi ku hatlisa, swi ta mila ku fana ni ximilana xa chefu naswona swi nga vanga khombo. (Yak. 1:​14, 15) Khombo rin’wana leri nga vonakiki hi ku olova i vanghana vo biha. Hi fanele hi tsundzuka leswaku hi ta kuceteriwa ngopfu hi lava hi hlawulaka ku heta nkarhi wa hina na vona. (1 Kor. 15:33) Loko hi va ni vuxiyaxiya, hi ta papalata ku endla xinghana ni lava nga hanyiki hi milawu ya Yehovha. (Luka 21:34; 2 Kor. 6:15) Hi ta vona khombo kutani hi ri papalata. w23.02 16 ¶7; 17 ¶10-11

Mugqivela, August 31

Ku rhandza Xikwembu swi vula ku yingisa swileriso swa xona.—1 Yoh. 5:3.

U ye u rhandza Yehovha swinene loko u ri karhi u dyondza hi yena. A swi kanakanisi leswaku u lava ku va munghana wa yena sweswi ni hilaha ku nga heriki. Sweswo swa koteka. U ku khutaza leswaku u tsakisa mbilu yakwe. (Swiv. 23:​15, 16) U nga endla leswi hi marito ni hi swiendlo. Mahanyelo ya wena ma ta swi kombisa loko u rhandza Yehovha hi mbilu hinkwayo. Lowu i nchumu wa nkoka swinene lowu u nga wu endlaka evuton’wini. U nga swi kombisa njhani leswaku wa n’wi rhandza Yehovha? Rhanga hi ku khongela u tinyiketela eka Xikwembu xa ntiyiso. (Ps. 40:8) Endzhaku ka sweswo, u khuvuriwa u komba vanhu leswaku u tinyiketerile. Ku khuvuriwa i swa nkoka swinene naswona swa tsakisa. Sweswi a wa ha tihanyeli kambe u hanyela Yehovha. (Rhom. 14:8; 1 Pet. 4:​1, 2) Lexi i xiboho xa nkoka swinene. Kambe xi endla leswaku u tiphina hi vutomi. w23.03 5-6 ¶14-15

    Minkandziyiso Ya Xitsonga (1987-2025)
    Huma
    Nghena
    • Xitsonga
    • Rhumela
    • Leswi u swi tsakelaka
    • Copyright © 2025 Watch Tower Bible and Tract Society of Pennsylvania
    • Swipimelo Swo Tirhisa Website Leyi
    • Milawu Yo Sirhelela Rungula Ra Xihundla
    • Seta Swa Xihundla
    • JW.ORG
    • Nghena
    Rhumela