February

Loko Hosi Hezekiya a vabyela ku fa, u kombele Yehovha leswaku a n’wi horisa. Yehovha u xi hlamurile xikhongelo xexo hi ku va a n’wi horisa. (2 Tih. 20:​1-6) Kambe Yehovha a nga xi susanga xiphiqo lexi muapostola Pawulo a a kombela leswaku a xi susa lexi kumbexana a xi fana ni ‘mutwa lowu a ri na wona enyameni’ yakwe. (2 Kor. 12:​7-9) Hosi Heroda a a lava ku dlaya muapostola Yakobo na Petro. Hambiswiritano, Yakobo u dlayiwile loko hi hala tlhelo Petro a ponisiwe hi singita. (Mit. 12:​1-11) Hi nga ha tivutisa leswi, ‘Hikwalahokayini Yehovha a ponise Petro kambe a tshika Yakobo a dlayiwa?’ Bibele a yi hlamuseli. Lexi hi tiyisekaka ha xona hileswaku mikarhi hinkwayo tindlela ta Yehovha a ti nge pfuki ti “hombolok[ile].” (Det. 32:4) Mikarhi yin’wana hi nga kuma nhlamulo leyi hi nga yi langutelangiki. Kambe a hi yi soli ndlela leyi Yehovha a hlawulaka ku hlamula swikhongelo swa hina hayona hikuva ha tshemba leswaku mikarhi hinkwayo u ta hi kombisa rirhandzu ni ku swi hlamula hi ndlela leyinene.—Yobo 33:13. w23.11 21 ¶6

Yakobo u huhuteriwe ku tsala leswaku vanhu vo tlhariha va “tiyimisela ku yingisa.” Ehleketa hi leswi sweswo swi vulaka swona. Hi fanele hi rhandza ni ku swi lava hi mbilu hinkwayo ku yingisa lava Yehovha a va nyikeke vulawuri byo karhi. I ntiyiso leswaku Yehovha a nga swi lavi leswaku hi yingisa munhu loyi a lavaka hi honisa milawu Yakwe. (Mit. 4:​18-20) Hi nga ha vona swi olova ku yingisa Yehovha ku ri ni ku yingisa vanhu. Phela, Yehovha u hi nyika nkongomiso lowu hetisekeke. (Ps. 19:7) Kambe a swi tano hi vanhu lava nyikiweke vulawuri. Nilokoswiritano, Tata wa hina la nge matilweni u nyike vatswari, mifumo ni vakulu vulawuri byo karhi. (Swiv. 6:20; 1 Tes. 5:12; 1 Pet. 2:​13, 14) Loko hi va yingisa, swi fana ni loko hi yingisa Yehovha. w23.10 6 ¶2-3

Ndlela yin’wana leyi hi nga tiyisaka ripfumelo ra hina hayona i ku ehleketisisa hi matimba ya Yehovha. U ni matimba yo endla hinkwaswo leswi a hi tshembiseke swona. Sweswo swa twisiseka hikuva i Xikwembu xa Matimba Hinkwawo. (Yobo 42:2; Mar. 10:27; Efe. 3:20) U tiyisekise Abrahama na Sara leswaku a va ta kuma n’wana va dyuharile. (Gen. 17:​15-17) U tlhele a byela Abrahama leswaku vatukulu vakwe a va ta nyikiwa tiko ra Kanana. Eka malembe yo tala lama vatukulu va Abrahama ku nga Vaisrayele va ma heteke va ri mahlonga eEgipta, swi fanele swi vonake onge xitshembiso xexo a xi nga ta endleka. Kambe xi endlekile. Xitshembiso xin’wana xi hetisekile loko Yehovha a byela Mariya loyi a a ri nhwana leswaku a a ta veleka N’wana wakwe loyi Yehovha a vuleke ka ha sale malembe ya magidi entangeni wa Edeni leswaku a a ta fika! (Gen. 3:15) Loko hi anakanyisisa hi switshembiso hinkwaswo leswi Yehovha a swi vuleke ni ndlela leyi swi hetisekeke hayona, hi tiyisa ripfumelo ra hina ra leswaku Yehovha u ni matimba yo tisa misava leyintshwa.—Yox. 23:14; Esa. 55:​10, 11. w23.04 28 ¶10-12

Yehovha u hlamule xikhongelo xa Davhida xa leswaku a n’wi ponisa. (1 Sam. 19:​10, 18-20; 2 Sam. 5:​17-25) Na hina hi nga tiyiseka hi sweswo. (Ps. 145:18) Yehovha a nga ha hlamula swikhongelo swa hina hi ndlela leyi a hi nga yi langutelanga. Pawulo u kombele Xikwembu leswaku xi n’wi susa “mutwa enyameni.” Kanharhu loku, Pawulo u khongele hi xiphiqo xakwe. Xana Yehovha u swi hlamurile swikhongelo sweswo? Ina, kambe ku nga ri hi ndlela leyi Pawulo a a langutele hayona. Ematshan’weni yo susa xiphiqo xexo, Yehovha u n’wi nyike matimba lama a a ma lava leswaku a ya emahlweni a N’wi tirhela hi ku tshembeka. (2 Kor. 12:​7-10) Na hina mikarhi yin’wana hi nga ha kuma nhlamulo leyi hambaneke ni leswi hi swi rindzeleke. Hi nga tiyiseka leswaku Yehovha u yi tiva kahle ndlela yo hi pfuna. A nga tlhela a “endla swo tala swinene ku tlula leswi hi swi kombelaka kumbe leswi hi swi ehleketaka.” (Efe. 3:20) Hikwalaho ka sweswo, a nga hlamula swikhongelo swa hina hi nkarhi kumbe hi ndlela leyi a hi nga yi langutelanga. w23.05 8-9 ¶4-6

Hi endla kahle loko nkarhi ni nkarhi hi anakanyisisa hi xitshembiso xa le Bibeleni xa leswaku vafi va ta pfuxiwa enkarhini lowu taka. Hikwalahokayini? Hikuva a hi swi tivi leswaku mundzuku u hi khomele yini, kumbexana hi nga ha khomiwa hi vuvabyi lebyi nga ni khombo kumbe hi feriwa hi munhu loyi hi n’wi rhandzaka hi xitshuketa. (Ekl. 9:11; Yak. 4:​13, 14) Loko hi ri ni ntshembo wo tano, wu nga hi pfuna leswaku hi tiyisela mitlhontlho yoleyo. (1 Tes. 4:13) Matsalwa ma hi tiyisekisa leswaku Tata wa hina la nge matilweni u hi tiva kahle nileswaku wa hi rhandza swinene. (Luka 12:7) Ehleketa ndlela leyi Yehovha Xikwembu a hi tivaka kahle hayona lerova a kota ku tlhela a hi vumba hi ri ni vumunhu bya hina ni vuswikoti byo tsundzuka swilo. Hakunene Yehovha wa hi rhandza hileswi a lavaka ku hi nyika vutomi lebyi nga heriki ni ku tlhela a hi pfuxa loko swi fanerile! Hikwalahokayini hi fanele hi tshemba leswaku vafi va ta pfuxiwa? Hikuva ha tiyiseka leswaku Loyi a hi tshembisaka wa swi navela, u ni matimba kumbe vuswikoti byo endla leswi a swi tshembiseke. w23.04 8-9 ¶2-4

Yosefa na Mariya va tirhisanile leswaku vuxaka bya vona na Yehovha byi tshama byi tiyile. A va wu twisisa nkoka wo gandzela Yehovha swin’we tanihi ndyangu. (Luka 2:​22-24; 4:16) Lexi i xikombiso lexinene lexi vatekani va nga xi tekelelaka namuntlha! Loko na wena u ri ni vana ku fana na Yosefa na Mariya, swi nga va swi nga olovi ku va kona etidyondzweni kumbe ku hlela nkarhi wa vugandzeri bya ndyangu. Swi nga tika swinene ku kuma nkarhi wo dyondza ni ku khongela swin’we tanihi vatekani. Kambe, tsundzukani leswaku loko mi gandzela Yehovha swin’we, mi ta ya mi rhandzana ni ku tlhela mi tshinela eka yena. Hikwalaho rhangisani ku gandzela Yehovha. Loko u ri ni swiphiqo evukatini bya wena ku gandzela swin’we tanihi ndyangu swi nga ha vonaka onge i ndzhwalo. Loko ku ve swi tano, sungulani hi ku komisa dyondzo ya ndyangu ni ku endla leswaku yi va leyi tsakisaka. Ku endla tano swi nga tiyisa vukati bya n’wina ni ku endla leswaku mi tsakela ku tiyisa vuxaka bya n’wina na Yehovha. w23.05 22 ¶7-8

Xana swi n’wi pfune njhani Obadiya ku chava Yehovha hi ndlela leyinene? Entiyisweni sweswo swi endle leswaku a tshembeka; hi yona mhaka leyi hosi yi n’wi vekeke leswaku a va mulanguteri wa yindlu ya yona. (Ringanisa Nehemiya 7:2.) Ku chava Xikwembu swi tlhele swi pfuna Obadiya leswaku a kombisa xivindzi xo hlamarisa ku nga nchumu lowu a wu laveka hi nkarhi wolowo. U hanye hi nkarhi lowu a ku fuma Akabu Hosi yo homboloka. (1 Tih. 16:30) Nakambe Yezabele nsati wa Akabu loyi a a gandzela Bali a a venga Yehovha swinene lerova u ringete ku herisa vugandzeri bya ntiyiso emfun’weni wa le n’walungwini. U dlaye hambi ku ri vaprofeta vo tala va Xikwembu. (1 Tih. 18:4) Loko Yezabele a sungula ku hlota vaprofeta va Xikwembu leswaku a ta va dlaya, Obadiya u teke vaprofeta va 100 a va tumbeta “hi mitlawa ya vanhu va 50 ebakweni, [a] hamba [a] va nyika xinkwa ni mati.” (1 Tih. 18:​13, 14) Loko leswi Obadiya a swi endleke a swi lo tiveka, a swi kanakanisi leswaku a a ta va a dlayiwile wanuna loyi wa xivindzi. I ntiyiso leswaku Obadiya a a ri munhu naswona a a nga swi lavi ku fa. Kambe Obadiya a a rhandza Yehovha ni vagandzeri Vakwe ku tlula vutomi byakwe. w23.06 16 ¶9-10

Yehovha u ya emahlweni a kongomisa vanhu vakwe namuntlha hilaha a endleke hakona enkarhini lowu hundzeke. U endla tano hi ku tirhisa Rito rakwe ni N’wana wakwe loyi a nga nhloko ya vandlha. Xana ha byi vona vumbhoni bya leswaku Xikwembu xi ya emahlweni xi tirhisa vanhu lava nga vayimeri va xona? Ina. Hi xikombiso, ehleketa hi leswi endlekeke endzhaku ka lembe ra 1870. Charles Taze Russell ni vanghana vakwe va sungule ku twisisa leswaku lembe ra 1914 a ku ta va lembe ra nkoka leri Mfumo wa Xikwembu wu nga ta simekiwa ha rona. (Dan. 4:​25, 26) Sweswo va swi tive hi leswi va endleke ndzavisiso eBibeleni ni ku tshemba leswaku a va ta vona vuprofeta bya yona byi endleka. Xana Yehovha a a ri eku va kongomiseni loko va endla ndzavisiso wolowo wa le Bibeleni? Ina. Swilo leswi endlekeke laha misaveni hi 1914, swi kombise leswaku Mfumo wa Xikwembu wu sungule ku fuma. Ku ve ni Nyimpi yo Sungula ya Misava naswona endzhaku ka sweswo ku ve ni mintungu, ku tsekatseka ka misava ni ku kayivela ka swakudya. (Luka 21:​10, 11) Hakunene Yehovha a a tirhisa Vakreste volavo vo tshembeka leswaku a pfuna vanhu vakwe. w24.02 22 ¶11

Tanihi vanhu va Yehovha, ha swi tiva leswaku wa hi rhandza naswona u lava hi tiphina hi vutomi hilaha swi nga kotekaka ha kona. (Rhom. 8:​35-39) Hi tlhela hi tiyiseka leswaku milawu ya Bibele ya hi vuyerisa mikarhi hinkwayo loko hi hanya hayona. (Esa. 48:​17, 18) Kambe ku vuriwa yini loko hi weriwa hi swiphiqo leswi a hi nga swi langutelanga? Hi xikombiso, un’wana endyangwini a nga hi twisa ku vava hi ndlela yo karhi. Hi nga khomiwa hi vuvabyi lebyi endlaka hi nga ha swi koti ku endla swo tala entirhweni wa Yehovha. Hi nga ha lahlekeriwa swinene hikwalaho ka mhangu ya ntumbuluko. Kumbe hi nga ha xanisiwa hikwalaho ka ripfumelo ra hina. Loko hi weriwa hi miringo yo tano, hi nga ha tivutisa leswi: ‘Hikwalahokayini ndzi weriwa hi maxangu lawa? Ndzi dyohe yini? Xana leswi swi endleka hikwalaho ka leswi Yehovha a ndzi lahleke?’ Xana u tshame u titwa hi ndlela yoleyo? Loko swi ri tano, u nga heli matimba. Malandza yo tala ya Yehovha yo tshembeka ma tshame ma titwa tano.—Ps. 22:​1, 2; Hab. 1:​2, 3. w23.04 14 ¶1-2

Loko hi langutana ni ndzingo, hi hatla hi papalata ku ehleketa kumbe ku endla nchumu lowu nga onhaka vuxaka bya hina na Xikwembu. Yehovha u lava leswaku hi ‘yingisa hi mbilu hinkwayo.’ (Rhom. 6:17) Mikarhi hinkwayo nkongomiso wakwe hi lowunene naswona milawu yakwe a hi nge yi cinci. (Esa. 48:​17, 18; 1 Kor. 6:​9, 10) Diyavulosi wa hi hlasela leswaku a hi wisa. U tiyimisele ku hi “dya,” hi xikongomelo xa leswaku hi onha vuxaka bya hina na Yehovha. (1 Pet. 5:8) Vakreste vo sungula a va chavisiwa, va biwa ni ku dlayiwa hikwalaho ka leswi a va tiyimisele ku yima va tiyile. (Mit. 5:​27, 28, 40; 7:​54-60) Sathana wa ha ya emahlweni a hi xanisa ninamuntlha. Leswi swi vonaka eka ndlela ya tihanyi leyi vamakwerhu va khomiwaka hayona eRhaxiya ni le matikweni man’wana ku katsa ni mihlaselo leyi humaka eka vakaneti. Sathana u tirhisa “miringo” leyi tumbeleke ni leyi kongomeke.—Efe. 6:11. w23.07 15-16 ¶6-9

Loko u ya emahlweni u ri karhi u dyondza Rito ra Xikwembu, ndlela leyi u rhandzaka Yehovha hayona yi ta ya yi kula. Rirhandzu rolero ri ta endla leswaku u tirhisa leswi u swi dyondzaka. U ta endla swiboho leswinene leswi fambisanaka ni milawu ya Bibele. U ta cinca vumunhu ni mahanyelo ya wena hileswi u lavaka ku tsakisa Xikwembu. Ku fana ni n’wana la tekelelaka mutswari wakwe la nga ni rirhandzu, na wena u ringeta ku tekelela Tata wa wena wa le tilweni. (Efe. 5:​1, 2) Hi nga tivutisa leswi: ‘Xana ndzi rhandza Yehovha swinene sweswi ku tlula eku sunguleni loko ndzi va Mukreste? Ku sukela loko ndzi khuvuriwile, xana ndlela leyi ndzi ehleketaka ni ku endla swilo hayona yi fana ni ya Yehovha ngopfungopfu loko swi ta eka ku rhandza vamakwerhu?’ Loko ku ve “rirhandzu leri a wu ri na rona eku sunguleni” ri horile hi ndlela yo karhi, u nga heli matimba. Vakreste vo sungula na vona va tshame va humeleriwa hi nchumu lowu fanaka. Yesu a nga va helelanga mbilu, na hina a nge hi heleli mbilu. (Nhlav. 2:​4, 7) Wa swi tiva leswaku hi nga tlhela hi va ni rirhandzu leri a hi ri na rona loko hi sungula ku dyondza ntiyiso. w23.07 8 ¶2-3

Muapostola Petro u endle swihoxo swo hlayanyana. Xo sungula, u ti tshembe ku tlula mpimo, a hlambanya a vula leswaku yena u ta tshama a tshembekile hambiloko vaapostola lavan’wana vo baleka va siya Yesu. (Mar. 14:​27-29) Xa vumbirhi, hi ku phindhaphindha Petro u tsandzeke ku tshama a rindzile. (Mar. 14:​32, 37-41) Xa vunharhu, loko ntshungu lowu a wu ri ni mabanga ni matlhari wu ta leswaku wu ta khoma Yesu, Petro u baleke a n’wi siya. (Mar. 14:50) Xo hetelela, Petro u ale kanharhu a ri karhi a hlambanya leswaku a nga n’wi tivi Yesu. (Mar. 14:​66-71) Petro u endle yini loko a vona vukulu bya xidyoho xakwe? U hele matimba ivi a rila hi xiviti. (Mar. 14:72) Ku ri ni ku va a byela munghana wakwe Petro xo mitiwa hi huku, Yesu u n’wi byele hi vutihlamuleri lebyikulu lebyi a a ta byi kuma. (Yoh. 21:​15-17) Petro a a swi tiva leswaku u endle xidyoho lexikulu kambe u ye emahlweni a ringeta ku endla leswinene. Hikwalahokayini? Hikuva a a tiyiseka leswaku N’wini wakwe Yesu a nga n’wi lahlelanga mavoko. Hi dyondza yini? Yehovha u lava hi tiyiseka leswaku wa hi rhandza naswona u tiyimisele ku hi rivalela.—Rhom. 8:​38, 39. w24.03 18-19 ¶13-15

Ku tikhoma ku biha hi swa masangu swi nga ha khomisa tingana, swi endla u titwa u ri xikangalafula, u hohlokeriwa hi ndyangu ni ku kuma n’wana u nga swi langutelanga. Swi le rivaleni leswaku i vutlhari ku papalata “yindlu” ya wansati wa xiphukuphuku. Ku engetela eka ku onhakeriwa hi vuxaka na Yehovha, vo tala lava tikhomaka ku biha hi swa masangu va khomiwa hi mavabyi lama endlaka leswaku va hatla va fa. (Swiv. 7:23) Ndzimana 18 ya Swivuriso ndzima 9 yi hetelela hi ku vula leswi: “Vaendzi vakwe va le Sirheni.” Kutani hikwalahokayini vo tala va amukela xirhambo xakwe lexi kanganyisaka lexi yisaka ekhombyeni? (Swiv. 9:​13-18) Nchumu lowu tolovelekeke lowu hi faneleke hi wu papalata i pornography. Van’wana va ehleketa leswaku ku hlalela pornography a swi na khombo. Ku ri ni sweswo, pornography yi na khombo, yi chicha xindzhuti naswona ya godzombela. Swifaniso swa vanhu va ku tikhoma ku biha hi swa masangu swi tshama nkarhi wo leha emiehleketweni; swa tika ku swi susa. Ku tlula kwalaho, pornography a yi ku dlayi ku navela ko biha; yo ku pfurhetela. (Kol. 3:5; Yak. 1:​14, 15) Vo tala lava va yi hlalelaka va hetelela va tikhome ku biha hi swa masangu. w23.06 23 ¶10-11

Hambiloko mikarhi yin’wana mifumo yin’wana yi nga ringetaka ku wu siva Mfumo wa Misava wa Manghezi ni Maamerika, a yi nge swi koti. Ha swi tiva leswi hikuva “ribye” leri yimelaka Mfumo wa Xikwembu ri ta faya mikondzo ku nga xiphemu xa xifaniso lexi fanekiseriwaka hi Mfumo wa Manghezi ni Maamerika. (Dan. 2:​34, 35, 44, 45) Xana wa tshemba leswaku vuprofeta bya Daniyele lebyi vulavulaka hi mikondzo ya nsimbhi ni vumba i ntiyiso? Loko u tshemba, sweswo swi ta khumba mahanyelo ya wena. A wu nge tikarhateli ku hlengeleta rifuwo ra misava leyi, leyi nga ta lovisiwa ku nga ri khale. (Luka 12:​16-21; 1 Yoh. 2:​15-17) Nakambe loko u twisisa vuprofeta lebyi, swi ta ku pfuna leswaku u teka ntirho wo chumayela ni ku dyondzisa vanhu wu ri wa nkoka. (Mat. 6:33; 28:​18-20) Endzhaku ko dyondza vuprofeta lebyi, tivutise leswi, ‘Xana swiboho swa mina swi kombisa leswaku ndza tshemba leswaku ku nga ri khale Mfumo wa Xikwembu wu ta herisa mifumo hinkwayo ya vanhu?’ w23.08 11 ¶13-14

Amukela leswaku malembe, rihanyo ni swiyimo swa wena swi nga ku sivela ku endla leswi engetelekeke sweswi. Ku fana na Barizilayi, u nga amukeli swiavelo loko rihanyo ni malembe ya wena swi ta endla swi ku tikela ku swi endla. (2 Sam. 19:​35, 36) Ku fana na Muxe, pfumela ku pfuniwa ni ku avela van’wana mitirho loko swi fanerile. (Eks. 18:​21, 22) Loko u endla leswi, swi ta ku pfuna leswaku u nga endli leswi nga ehenhla ka matimba ya wena ivi swi endla u karhala. A hi fanelanga hi titwa ku ri vutihlamuleri bya hina loko van’wana va endle swiboho leswi hoxeke. A hi nge va endleli vanhu swiboho naswona a hi nge va sirheleli eka vuyelo byo biha lebyi tisiwaka hi swiboho swa vona leswi hoxeke. Hi xikombiso, n’wana a nga endla xiboho xo tshika ku tirhela Yehovha. Xiboho xexo xi nga dyisa vatswari vakwe mbitsi. Hambiswiritano, vatswari lava tivonaka nandzu hikwalaho ka xiboho xo biha xa n’wana wa vona va ti tikisela. Yehovha a nga langutelanga leswaku va rhwala ndzhwalo wolowo. w23.08 29 ¶11-12

Samsoni a a ri munhu ku fana na hina kutani mikarhi yin’wana u endle swiboho swo biha. Xin’wana xa xiboho xa kona xi endle leswaku a hetelela a lahlekeriwe ni hi vutomi. Endzhaku ka loko Samsoni a ve muavanyisi ku ringana nkarhi wo karhi, u “rhandzan[e] ni wansati loyi vito rakwe a ku ri Delila loyi a tshama eNkoveni wa Soreke.” Eku sunguleni Samsoni a a tshembise wansati wa Mufilista leswaku u ta n’wi teka a va nsati wakwe kambe vukati byebyo “a ku ri xikongomelo xa Yehovha” loyi A A “lava ndlela yo lwa ni Vafilista.” Endzhaku ka sweswo, Samsoni u tshame endlwini ya nghwavava eGaza ku nga muti wa Vafilista. Hikwalaho ka sweswo, Xikwembu xi nyike Samsoni matimba yo susa tigede ta muti wolowo wu sala wu nga ha sirhelelekanga. (Vaav. 14:​1-4; 16:​1-3) Hambiswiritano, swi vonaka onge Delila a a ri Muisrayele, kutani ku va Samsoni a rhandzane na yena a swi nga ta endla a pfulekeriwa hi nkarhi wo lwa ni vafilista. Delila u teke mali yo tala ya Vafilista leswaku a xavisa Samsoni eka vona. w23.09 5 ¶12-13

Ku twisisa ku nga hi pfuna leswaku hi va lava rhuleke. Munhu la twisisaka wa tikhoma loko van’wana va n’wi tlhontlha hikwalaho ka leswi a swi pfumelaka. Mikarhi yo tala loko vanhu va hi vutisa swivutiso, a va hi byeli swivangelo leswi endlaka va hi vutisa. Kutani loko hi nga si hlamula, hi endla kahle ku xiya leswaku swi nga endleka hi nga xi tivi xivangelo lexi endlaka munhu a hi vutisa xivutiso xexo. (Swiv. 16:23) Xiya ndlela leyi Gidiyoni a hlamuleke Vaefrayimi hayona. Hi ku hlundzuka va n’wi vutisile leswaku hikwalahokayini a nga va vitananga loko a ya lwa ni valala va Vaisrayele. Xana a ku ri ni xivangelo xo karhi lexi tumbeleke lexi endleke va n’wi hlundzukela? Xana swi nga endleka va hlundzukisiwe hileswi a nga va tekelangiki enhlokweni? Swi nga ri na mhaka xivangelo xa kona, hi vutlhari Gidiyoni u va hlamule hi ndlela yo rhula. Xana ku ve ni vuyelo byihi? Bibele yi vula leswaku “a va ha n’wi karihelanga.”—Vaav. 8:​1-3. w23.09 16 ¶8-9

A ku na tatana na n’wana lava rhandzanaka swinene ku tlula ndlela leyi Yehovha na Yesu va rhandzanaka hayona. A swi kanakanisi leswaku Yehovha swi n’wi twise ku vava loko a vona N’wana wakwe a khomiwa ku biha, a ringiwa ni ku kanetiwa. Mutswari loyi a loveriweke hi n’wana u ri tiva kahle gome lerikulu leri vangiwaka hi sweswo. Hi ni ripfumelo lerikulu ra leswaku vafi va ta pfuxiwa kambe ripfumelo rero a ri ku susi ku vava loku hi ku twaka loko hi loveriwile. Xikombiso lexi xi hi pfuna ku twisisa ndlela leyi Yehovha a nga vaka a titwe hayona loko a vona N’wana wakwe loyi a n’wi rhandzaka a xaniseka ni ku fa hi ximun’wana xa 33 C.E. (Mat. 3:17) Ku sukela sweswi ku ya fika hi nkarhi wa Xitsundzuxo, swi nga va njhani eka dyondzo ya wena ya munhu hi yexe kumbe eka Vugandzeri bya Ndyangu, mi dyondza leswi engetelekeke hi nkutsulo? Hi siku ra Xitsundzuxo, u nga rivali ku hlalela Vugandzeri bya Nimixo byo hlawuleka. Loko hi lunghiselela timbilu ta hina leswaku ti vuyeriwa hi siku ra Xitsundzuxo, hi ta kota ku pfuna ni van’wana leswaku va vuyeriwa.—Ezra 7:10. w24.01 11 ¶10-12

Ndlela yin’wana leyi hi nga kumaka matimba ya Yehovha hayona i ku va hi khongela eka yena hi n’wi kombela. Yehovha u ta hlamula swikhongelo swa hina hi ku hi nyika “matimba lama tlulaka lama tolovelekeke.” (2 Kor. 4:7) Nakambe hi nga kuma matimba loko hi hlaya Rito rakwe ni ku anakanyisisa hi rona. (Ps. 86:11) Rungula leri Yehovha a hi tsaleleke rona eBibeleni “ri ni matimba.” (Hev. 4:12) Loko u khongela eka Yehovha ni ku hlaya Rito rakwe, u ta kuma matimba lawa u ma lavaka leswaku u kota ku tiyisela, u tshama u tsakile kumbe u endla xiavelo xo tika. Xiya ndlela leyi Yehovha a n’wi tiyiseke hayona muprofeta Yonasi. Yonasi u balekele xiavelo xo tika lexi Yehovha a n’wi nyikeke xona. Hikwalaho ka sweswo, a ku sale katsongo a dlayiwile hi xidzedze lexi nga ni matimba ni ku tlhela a byi veka ekhombyeni vutomi bya vanhu lava a a famba na vona hi xikepe. Loko a cukumeteriwa elwandle, u tikume a ri endhawini leyi a a nga si tshama a va eka yona, ku nga ekhwirini ra nhlampfi leyikulu. Xana Yonasi u endle yini leswaku a kuma matimba loko a ri yexe ekhwirini ra nhlampfi? U khongerile.—Yonasi 2:​1, 2, 7. w23.10 13 ¶4-6

Hambileswi muapostola Petro a a tsalela Vakreste va le nkarhini wakwe mapapila wolawo, Yehovha u endle leswaku ma katsiwa eRitweni Rakwe. Na hina ma hi pfuna mapapila wolawo. (Rhom. 15:4) Hi hanya ni vanhu lava nga byi tshembiki vuprofeta bya Bibele. Vahlekuri va nga hi hleka hileswi hi nga ni malembe yo tala hi rindzele makumu. Vanhu van’wana va nga vula leswaku a ma nge pfuki ma fikile. (2 Pet. 3:​3, 4) Loko hi twa vanhu lava hi va chumayelaka, lava hi tirhaka na vona kumbe swirho swa ndyangu swi hi byela sweswo, ripfumelo ra hina ri nga ha tsekatseka. Petro u hlamusele leswi nga hi pfunaka. Vanhu van’wana va nga vona onge Yehovha wa hlwela ku lovisa misava leyi yo homboloka. Marito ya Petro ma nga hi pfuna leswaku hi va ni langutelo lerinene, hi ku hi tsundzuxa leswaku ndlela leyi Yehovha a hlayelaka nkarhi hayona yi hambane swinene ni ya vanhu. (2 Pet. 3:​8, 9) Eka Yehovha malembe ya 1 000 ma fana ni siku rin’we. Yehovha u lehisa mbilu naswona a nga lavi leswaku ku lova ni un’we. Kambe loko siku rakwe ri fika, vanhu vo homboloka va ta lovisiwa. w23.09 26-27 ¶2-5

Hikwalahokayini muapostola Pawulo a tsalele Vakreste va Vaheveru lava a va tshama eYudiya papila? Kumbexana u endle tano hikwalaho ka swivangelo swimbirhi. Xo sungula, a a lava ku va khutaza. Vo tala va vona a va kulele evukhongerini bya Xiyuda. Swi nga endleka khale ka varhangeri va vona va le vukhongerini bya Xiyuda a va va sandza hikwalaho ka leswi va veke Vakreste. Hikwalahokayini? Hikuva Vakreste a va nga ri na tempele leyi a va gandzela eka yona, a va nga ri na alitari ya xiviri leyi a va endlela Xikwembu magandzelo eka yona naswona a va nga ri na Vaprista lava a va va rhangela. Leswi a swi ta va swi va hete matimba vadyondzisiwa va Kreste ni ku tlhela swi tsanisa ripfumelo ra vona. (Hev. 3:​12, 14) Kumbexana van’wana va vona va ehlekete ni ku tlhelela evukhongerini bya vona bya khale bya Xiyuda. Xa vumbirhi, Pawulo u byele Vakreste va Vaheveru leswaku a va nga tikarhateli ku twisisa tidyondzo letintshwa kumbe leti dzikeke, ku nga “swakudya leswi tiyeke” leswi kumekaka eRitweni ra Xikwembu. (Hev. 5:​11-14) Swi vonaka onge van’wana va vona a va nga tiyimiselanga ku tshika ku landzela Nawu wa Muxe. w23.10 24-25 ¶3-4

Vavasati van’wana va hlawula ku nga ngheneli vukati. (Mat. 19:​10-12) Tiyiseka leswaku Yehovha na Yesu a va va languteli ehansi Vakreste lava nga nghenelangiki vukati. Emisaveni hinkwayo, vamakwerhu va xisati lava nga nghenelangiki vukati i swikombiso leswinene evandlheni. Leswi va rhandzaka ni ku khathala hi un’wana ni un’wana, va va vamakwenu ni vamanana eka vo tala. (Mar. 10:​29, 30) Van’wana va nghenele ntirho wa nkarhi hinkwawo. Emisaveni hinkwayo, vavasati lava nga Vakreste va endla ntirho lowukulu entirhweni wo chumayela. (Ps. 68:11) Xana u nga swi kota ku kunguhata sweswi ku va eka ntirho wa nkarhi hinkwawo? U nga ha tirha tanihi phayona, u va eka ntirho wo aka kumbe ku tirha eBethele. Khongela hi leswi u swi lavaka. Burisana ni lava va swi fikeleleke ivi u vona leswi languteriweke eka wena leswaku u va eka ntirho wa nkarhi hinkwawo. Kutani u kunguhata leswi nga ku pfunaka leswaku u swi fikelela. Ku va eka ntirho wa nkarhi hinkwawo swi ta ku pfulela tindlela to tala to tsakisa entirhweni wa Yehovha. w23.12 22 ¶16-17

Loko nhlomulo lowukulu wu ya wu tshinela, ha swi xiya leswaku i swa xihatla leswaku hi yingisa xileriso lexi hi nyikiweke xona xo va hi chumayela. Hambiswiritano, swi nga hi tikela ku rhangisa ntirho wo chumayela loko hi langutane ni swiphiqo swa timali kumbe loko hi kanetiwa entirhweni wo chumayela. I yini leswi nga ta hi pfuna ku rhangisa ntirho wa Yehovha? Hi fanele hi tiyiseka leswaku “Yehovha wa mavuthu” u na hina. U ta hi seketela loko hi ya emahlweni hi rhangisa ntirho wakwe eka hinkwaswo. Kutani a hi chavi nchumu. (Hag. 2:4) Yehovha u lava leswaku hi rhangisa ntirho lowu ponisaka vutomi bya vanhu, ku nga ntirho wa ku endla vadyondzisiwa. Hagayi u khutaze vanhu va Yehovha leswaku va sungula hi vuntshwa ntirho lowu va wu endlelaka Yehovha ku fana ni loko va tlhela va aka masungulo ya tempele. Loko va endla tano, Yehovha u va tshembise ku va “katekisa.” (Hag. 2:​18, 19) Na hina ha tiyiseka leswaku Yehovha u ta katekisa matshalatshala ya hina loko hi rhangisa ntirho wakwe. w23.11 16 ¶8; 17 ¶11

Eka papila leri muapostola Pawulo a ri tsaleleke Varhoma, u vule leswaku vanhu hinkwavo i vadyohi. Kutani xana munhu a nga swi kotisa ku yini ku va la lulameke kumbe a pfumala nandzu ni ku tlhela a amukeriwa hi Xikwembu? Leswaku Pawulo a pfuna Vakreste hinkwavo lava nga ni timbilu letinene leswaku va kuma nhlamulo ya xivutiso xexo, u vulavule hi Abrahama. Yehovha u vule leswaku Abrahama u lulamile loko a ha tshama etikweni ra Kanana. Hikwalahokayini Yehovha a vule leswaku Abrahama u lulamile? Xana a ku ri hileswi Abrahama a wu yingiseke hi ku helela Nawu wa Muxe? Doo! (Rhom. 4:13) Nawu wolowo wu nyikiwe Vaisrayele endzhaku ka malembe ya 400 Xikwembu xi vule leswaku Abrahama u lulamile. Kutani xana a ku ri xivangelo xihi lexi endleke Xikwembu xi vula leswaku Abrahama u lulamile? Hikwalaho ka musa Wakwe lowukulu, Yehovha u vule leswaku Abrahama u lulamile hikwalaho ka ripfumelo rakwe.—Rhom. 4:​2-4. w23.12 3 ¶4-5

Hi vusiku lebyi muprofeta Nathani a byeleke Hosi Davhida marito lama nga laha henhla, Yehovha u byele Nathani leswaku tempele a yi nga ta akiwa hi Davhida. (1 Tikr. 17:​3, 4, 11, 12) Xana Davhida u endle yini loko a byeriwa mahungu lawa? U hlengelete mali ni swilo swo aka leswi n’wana wakwe Solomoni a a ta swi tirhisa. (1 Tikr. 29:​1-5) Endzhaku ka loko Yehovha a byele Davhida leswaku a ku nga ta va yena loyi a a ta aka tempele, hi ku hatlisa Yehovha u endle ntwanano na yena. Yehovha u tshembise Davhida leswaku un’wana wa vatukulu vakwe a a ta fuma hilaha ku nga heriki. (2 Sam. 7:16) Emisaveni leyintshwa, hi nkarhi wa Mfumo wa Gidi ra Malembe, Davhida u ta tsaka loko a tiva leswaku Yesu loyi a fumaka u huma eka rixaka rakwe! Mhaka leyi yi hi dyondzisa leswaku hambiloko hi nga swi koti ku endla hinkwaswo leswi hi navelaka ku swi endlela Yehovha, Xikwembu xa hina xi nga hi katekisa hi tindlela tin’wana leti a hi nga ti ehleketi. w23.04 16 ¶8-10

U nga ha kuma leswaku ku ni tindzimana tin’wana ta le Bibeleni leti nga ku chavelelaka loko u titwa u chava. Hi xikombiso, u nga ha chaveleriwa hi buku ya Yobo, Tipisalema, Swivuriso ni marito ya Yesu lama kumekaka eka Matewu ndzima 6. Loko u ri karhi u khongela eka Yehovha ni ku hlaya Rito rakwe, u ta swi vona leswaku wa ku chavelela. Hi nga tiyiseka hi ku helela leswaku Yehovha u ta hi khoma xikatla loko swilo swi hi fambela ximatsi. A nge pfuki a hi tshikile. (Ps. 23:4) Yehovha u tshembisa ku hi rindza, ku hi tiyisa, ku hi seketela ni ku hi chavelela. Esaya 26:3 yi vula leswi hi Yehovha: “U ta sirhelela lava tshembelaka eka wena hi mbilu hinkwayo; u ta va nyika ku rhula hi masiku, hikuva va tshembe wena.” Kutani tshemba Yehovha, u nga swi bakanyi swilo leswi a swi tirhisaka leswaku a ku pfuna. Loko u endla tano, u ta kuma matimba hambiloko swiyimo swi tika. w24.01 25 ¶16-17

Marito lama huhuteriweke ya ndzimana leyi nga laha henhla ma le ku endlekeni namuntlha. Marito lawa, lama chavelelaka ma tirha ni le nkarhini wa hina: “Vana va wena hinkwavo va ta dyondzisiwa hi Yehovha, ku rhula ka vana va wena ku ta va kukulu. U ta simekiwa u tiya hi ku lulama. . . . A wu nge he chavi nchumu naswona a ku na lexi nga ta ku chavisa, hikuva a xi nge tshineli eka wena.” (Esa. 54:​13, 14) Hambi ku ri Sathana hi yexe loyi a nga “xikwembu xa misava leyi,” a nge swi koti ku tshikisa malandza ya Yehovha ku chumayela. (2 Kor. 4:4) Vugandzeri lebyi tengeke byi pfuxetiwile naswona a byi nge pfuki byi thyakisiwile. Byi ta tshama hilaha ku nga heriki. A ku na tlhari leri nga ta hi hlasela ri hi hlula! w24.02 4 ¶10

Tanihi Vakreste, hi teka xihlambanyo lexi hi xi endleke loko hi tinyiketela eka Yehovha xi ri xa nkoka swinene. Sweswo swi khumba swiboho ni leswi hi swi endlaka loko swi ta eka timhaka ta ndyangu. Hi tikarhatela ku hetisisa vutihlamuleri lebyi Xikwembu xi hi nyikeke byona byo khathalela mindyangu ya hina kambe a hi pfumeli ku rhangisa ku endla leswi laviwaka hi swirho swa ndyangu eka leswi Yehovha a swi lavaka. (Mat. 10:​35, 36; 1 Tim. 5:8) Mikarhi yin’wana hi nga boheka ku endla swiboho leswi nga tsakisiki maxaka ya hina kambe swi tsakisaka Yehovha. Yehovha hi yena loyi a sunguleke ndyangu naswona u lava hi va ni mindyangu leyi tsakeke. (Efe. 3:​14, 15) Loko hi lava ntsako wa xiviri, hi fanele hi endla swilo hi ndlela ya Yehovha. Tiyiseka leswaku Yehovha wa swi tlangela leswi u titsonaka swona leswaku u kota ku n’wi gandzela loko u ri karhi u khathalela ndyangu wa wena, u wu khoma hi ndlela ya rirhandzu ni ku tlhela u wu xixima.—Rhom. 12:10. w24.02 18 ¶11, 13