November

Loko u ri mutswari, pfuna vana va wena va lunghiselela tinhlamulo leti ringaneke malembe ya vona. Mikarhi yin’wana, nhlokomhaka leyi dyondziwaka evandlheni yi nga ha vulavula hi timhaka ta nkoka leti khumbaka vanhu lavakulu to fana ni swiphiqo swa vukati kumbe ku tikhoma ku biha kambe ku nga ha va ni tindzimana ti nga ri tingani leti vana va nga hlamulaka eka tona. Tlhela u pfuna vana va wena va twisisa leswaku a hi mikarhi hinkwayo laha va nga ta va komba leswaku va hlamula. Ku endla tano swi ta va pfuna va nga khunguvanyeki loko ku kombiwa van’wana. (1 Tim. 6:18) Hinkwerhu hi nga lunghiselela tinhlamulo leti khutazaka vamakwerhu ni ku dzunisa Yehovha. (Swiv. 25:11) Hambileswi mikarhi yin’wana hi nga vulaka ntokoto wo karhi wo koma lowu hi veke na wona kambe hi fanele hi papalata ku vulavula ngopfu hi hina vini. (Swiv. 27:2; 2 Kor. 10:18) Ematshan’weni ya sweswo, hi tikarhatela ku vulavula hi Yehovha, Rito rakwe ni vanhu vakwe mikarhi hinkwayo.—Nhlav. 4:11. w23.04 24-25 ¶17-18

Leswaku hi tshama hi xalamukile ni ku yi tirhisa kahle mianakanyo ya hina i swa nkoka leswaku hi va ni rirhandzu. (Mat. 22:​37-39) Ku rhandza Xikwembu swi hi pfuna leswaku hi tiyisela entirhweni wo chumayela hambiloko hi xanisiwa hikwalaho ka wona. (2 Tim. 1:​7, 8) Leswi hi rhandzaka ni lava nga riki Timbhoni, a hi tshiki ku chumayela naswona hi tlhela hi chumayela hi ku tirhisa mapapila ni foni. Hi tshama hi ri ni ntshembo wa leswaku siku rin’wana vanhu lava hi va chumayelaka va ta cinca ivi va sungula ku endla leswinene. (Ezek. 18:​27, 28) Van’wana lava hi va rhandzaka i vamakwerhu. Hi kombisa leswaku ha va rhandza hi ku va hi “khutazana ni ku akana.” (1 Tes. 5:11) Ku fana ni masocha lama yimaka swin’we enyimpini, ha khutazana. A hi nge pfuki hi twise vamakwerhu ku vava hi vomu kumbe hi tirihisela eka vona. (1 Tes. 5:​13, 15) Hi tlhela hi kombisa leswaku hi rhandza ni ku xixima vamakwerhu lava rhangelaka evandlheni.—1 Tes. 5:12. w23.06 9 ¶6; 10-11 ¶10-11

Ndlela yo sungula leyi hi nga tiyisaka ripfumelo ra hina hayona i ku anakanyisisa hi nkutsulo. Nkutsulo wu hi tiyisekisa leswaku switshembiso swa Xikwembu swi ta endleka. Loko hi ehleketisisa kahle hi leswi katsekeke nileswaku hikwalahokayini nkutsulo a wu boha, hi tiyisa ripfumelo ra hina ra leswaku xitshembiso xa Xikwembu xa leswaku vanhu va hanya hilaha ku nga heriki emisaveni leyinene xi ta endleka. Hikwalahokayini hi vula tano? I yini leswi katsekeke leswaku ku va ni nkutsulo? Yehovha u rhumele N’wana wakwe wa mativula la n’wi rhandzaka tlhelo munghana wakwe lonkulu leswaku a suka etilweni a ta laha misaveni a ta tswariwa a ri munhu la nga riki na xidyoho. Loko Yesu a ri laha misaveni, u tiyisele maxangu ya mixaka hinkwayo. U xanisiwile naswona u fe ku vava. Yehovha swi n’wi koxe swo tala! Xikwembu xa hina lexi nga ni rirhandzu a xi ta va xi nga pfumelanga leswaku N’wana wa xona a xaniseka ni ku dlayiwa leswaku hina hi hanya vutomi byo tsakisa ntsena kambe byo koma swinene. (Yoh. 3:16; 1 Pet. 1:​18, 19) Leswi Yehovha a nyikeleke hi N’wana wakwe la n’wi rhandzaka hikwalaho ka hina, u ta tiyiseka leswaku hi kuma vutomi lebyi nga heriki emisaveni leyintshwa. w23.04 27 ¶8-9

Xana Yehovha wa swi lava ku pfuxa lava feke? A hi kanakani leswaku wa swi lava ku va pfuxa. U endle leswaku vatsari va Bibele vo hlayanyana va tsala hi mhaka leyi ya ku pfuxiwa ka vafi. (Esa. 26:19; Nhlav. 20:​11-13) Loko Yehovha a tshembisa xo karhi, mikarhi hinkwayo wa swi endla. (Yox. 23:14) Entiyisweni Yehovha u swi langutele hi mahlongati ku pfuxa lava feke. Ehleketa hi marito ya Yobo wanuna wo tshembeka. A a tiyiseka leswaku hambiloko o fa, Yehovha a a ta navela ku tlhela a n’wi vona a hanya. (Yobo 14:​14, 15) Yehovha u titwa tano hi vagandzeri vakwe hinkwavo lava feke. U swi langutele emahlweni ku va pfuxa, va hanye kahle naswona va tsakile. Ku vuriwa yini hi vanhu va tibiliyoni lava feke va nga wu kumanga nkarhi wo dyondza ntiyiso hi Yehovha? Xikwembu xa hina lexi nga ni rirhandzu xi lava ku va pfuxa na vona. (Mit. 24:15) Xi lava leswaku na vona va kuma nkarhi wo va vanghana va xona naswona va hanya hilaha ku nga heriki emisaveni.—Yoh. 3:16. w23.04 9 ¶5-6

U nga endla yini leswaku u va ni ntshembo lowu tiyeke? Hi xikombiso, loko ku ve u ni ntshembo wo hanya hilaha ku nga heriki laha misaveni, hlaya ni ku tlhela u anakanyisisa hi Matsalwa lama vulavulaka hi Paradeyisi. (Esa. 25:8; 32:​16-18) Ehleketa ndlela leyi vutomi byi nga ta va hayona emisaveni leyintshwa. Tivone u hanya eka yona. Loko ntshembo wa hina wa ku hanya emisaveni leyintshwa wu ri wa xiviri eka hina, swiphiqo swa hina swi ta va swa ‘nkarhinyana naswona swi va switsongo.’ (2 Kor. 4:17) Yehovha u ta ku tiyisa hi ku tirhisa ntshembo lowu a ku nyikeke wona. Se u ku nyike leswi u swi lavaka leswaku u kuma matimba lama humaka eka yena. Hikwalaho loko u lava mpfuno leswaku u kota ku endla xiavelo, u tiyisela ndzingo kumbe leswaku u tshama u tsakile, khongela eka Yehovha hi mbilu hinkwayo ni ku endla dyondzo ya munhu hi yexe leswaku a ku kongomisa. Pfumela loko vamakwerhu va ku khutaza. Nkarhi ni nkarhi tinyike nkarhi wo anakanyisisa hi ntshembo lowu u nga na wona hi vumundzuku. Kutani “Xikwembu xi [ta] tirhisa matimba ya xona lama vangamaka leswaku xi [ku] nyika matimba lama engetelekeke [u] ta kota ku tiyisela hilaha ku heleleke [u] nga heli mbilu naswona [u] tsakile.”—Kol. 1:11. w23.10 17 ¶19-20

Hi ni swivangelo swo tala leswi endlaka hi khensa Yehovha hi xikhongelo. Hi nga n’wi khensa hikwalaho ka swilo hinkwaswo leswinene leswi hi nga na swona hikuva nyiko yin’wana ni yin’wana leyinene yi huma eka yena. (Yak. 1:17) Hi xikombiso, hi nga n’wi byela ndlela leyi hi tlangelaka ku xonga ka misava leyi ni swilo swo hlamarisa leswi hi swi vonaka eka ntumbuluko. Nakambe hi nga n’wi khensa hikwalaho ka vutomi, ndyangu, vanghana ni ntshembo wa hina. Hi lava ku khensa Yehovha hileswi a hi pfumelelaka hi tiphina hi ku va vanghana vakwe. Swi nga ha lava hi tikarhata leswaku hi ehleketa hi swivangelo leswi hi nga na swona swo khensa Yehovha. Hi hanya ni vanhu lava nga khensiki. Mikarhi yo tala vanhu va ehleketa hi leswi va swi lavaka ematshan’weni yo khensa leswi va nga na swona. Loko ho va tekelela, swikhongelo swa hina swi nga hundzuka swikombelo ntsena. Leswaku sweswo swi nga endleki, hi fanele hi tikarhatela ku ya emahlweni hi khensa hinkwaswo leswi Yehovha a hi endlelaka swona.—Luka 6:45. w23.05 4 ¶8-9

Leswi a nga Tata wa hina la hi rhandzaka, Yehovha a nga swi lavi ku hi vona hi xaniseka. (Esa. 63:9) Nilokoswiritano, a nga hi sirheleli emiringweni ya hina hinkwayo leyi nga fanisiwaka ni milambu ni malangavi. (Esa. 43:2) Hambiswiritano, u tshembisa ku hi pfuna hi “hundza exikarhi” ka miringo yoleyo. Nakambe a nge yi pfumeleli miringo yi hi vavisa hilaha ku nga heriki. Yehovha u tlhela a hi nyika moya wakwe lowo kwetsima lowu nga ni matimba leswaku wu hi pfuna hi kota ku tiyisela. (Luka 11:13; Filp. 4:13) Hikwalaho ka sweswo, hi nga tiyiseka leswaku mikarhi hinkwayo u ta hi nyika leswi hi swi lavaka leswaku hi kota ku tiyisela ni ku tshama hi tshembekile eka yena. Yehovha u langutele leswaku hi n’wi tshemba. (Hev. 11:6) Mikarhi yin’wana, miringo ya hina yi nga vonaka yi fana ni ntshava. Hi nga ha tlhela hi kanakana loko Yehovha a ta hi pfuna. Kambe Bibele yi hi tiyisekisa leswaku hi ku pfuniwa hi matimba ya Xikwembu hi nga “khandziya khumbi.” (Ps. 18:29) Kutani ematshan’weni yo va hi kanakana, hi fanele hi khongela hi ri ni ripfumelo, hi tshemba leswaku Yehovha u ta swi hlamula swikhongelo swa hina.—Yak. 1:​6, 7. w23.11 22 ¶8-9

Mawaku nhlamuselo yo xonga ya rirhandzu ra ntiyiso! Marito lawa ma khutaza vatekani leswaku: Va nga swi kota ku tshama va ri karhi va rhandzana. Vatekani va ni vutihlamuleri byo endla leswaku rirhandzu ra vona ri nga holi. Hi xikombiso, ndzilo wu nga swi kota ku pfurha wu nga timeki ntsena loko wu hlanganyetiwa. Kambe loko wo ka wu nga hlanganyetiwi, wu ta hetelela wu timeka. Hilaha ku fanaka, swi nga koteka leswaku nuna na nsati va tshama va ri karhi va rhandzana ntsena loko va hlanganyeta rirhandzu ra vona. Mikarhi yin’wana rirhandzu ra vatekani ri nga ha hola, ngopfungopfu loko va tikeriwa hi swa timali, un’wana wa vona a vabya kumbe va tshikileriwa hi vutihlamuleri byo kurisa vana. Leswaku “langavi ra Yehovha” ri nga timeki, nuna na nsati va fanele va tirha hi matimba leswaku va va ni vuxaka lebyi tiyeke na Yehovha. w23.05 20-21 ¶1-3

Hi fanele hi endla yini leswaku hi va ni xivindzi? Vatswari va hina va nga hi khutaza leswaku hi va ni xivindzi kambe a ve nge swi koti ku hi siyela xona ku fana ni ndzhaka. Ku va ni xivindzi swi fana ni ku dyondza vutshila byo karhi. Ndlela yin’wana yo dyondza vutshila i ku languta leswi mudyondzisi a swi endlaka ivi u n’wi tekelela. Hilaha ku fanaka, hi dyondza ku va ni xivindzi hi ku langutisisa lava nga na xona ivi hi va tekelela. Ku fana na Daniyele, hi fanele hi ri tiva kahle Rito ra Xikwembu. Hi fanele hi va vanghana lavakulu na Yehovha hi ku va nkarhi na nkarhi hi vulavula na yena hi tshunxekile. Hi fanele hi tshemba Yehovha, hi tiyiseka leswaku wa hi seketela. Kutani loko ripfumelo ra hina ri ringiwa, hi ta va ni xivindzi. Vanhu lava nga ni xivindzi mikarhi yo tala va xiximiwa. Va nga tlhela va kokela vanhu lava nga ni timbilu letinene eka Yehovha. Entiyisweni hi ni swivangelo leswi twalaka swo lava ku va ni xivindzi. w23.08 2 ¶2; 4 ¶8-9

Rito ra Xigriki leri hundzuluxeriweke ri va “kambisisani” a ri tirhisiwa ku hlamusela ndlela leyi vanhu a va swi vona hayona loko nsuku kumbe silivhere swi ri swa xiviri. Hikwalaho, hi fanele hi kambisisa ku vona loko leswi hi swi twaka kumbe leswi hi swi hlayaka ku ri ntiyiso. Swi ta va swa nkoka swinene ni le ka hina tanihi leswi nhlomulo lowukulu wu tshinelaka. Ematshan’weni yo tshemba swin’wana ni swin’wana leswi vanhu va swi vulaka, hi tirhisa miehleketo ya hina ku vona loko leswi hi swi hlayaka kumbe hi swi twaka swi fambisana ni leswi Bibele ni nhlangano wa Yehovha wu swi vulaka. Loko hi endla tano, a hi nge humbiwi mano hi mavunwa ya madimona. (Swiv. 14:15; 1 Tim. 4:1) Tanihi ntlawa, malandza ya Xikwembu ma ta pona nhlomulo lowukulu. Kambe ha un’we wa hina a hi swi tivi leswaku mundzuku wu hi khomele yini. (Yak. 4:14) Nilokoswiritano, swi nga ri na mhaka leswaku hi ta pona nhlomulo lowukulu kumbe hi fa wu nga si fika, Yehovha u ta hi katekisa hi ku hi nyika vutomi lebyi nga heriki loko hi tshama hi tshembekile. Onge hi nga tshama hi ri karhi hi anakanyisisa hi ntshembo wa hina wo tsakisa ni ku lunghekela siku ra Yehovha! w23.06 13 ¶15-16

A hi swi tivi leswaku vuprofeta byin’wana bya Bibele byi ta hetiseka njhani. (Dan. 12:​8, 9) Kambe ku va hi nga swi tivi leswaku vuprofeta byo karhi byi ta hetiseka njhani, a swi vuli swona leswaku a byi nge hetiseki. A hi kanakani leswaku ku fana ni le nkarhini lowu hundzeke, Yehovha u ta hi paluxela leswi hi faneleke hi swi tiva hi nkarhi lowu faneleke. Ku ta vuriwa marito lama nge, “ku ni ku rhula ni nsirhelelo.” (1 Tes. 5:3) Kutani varhangeri va tipolitiki va ta hlasela vukhongeri bya mavunwa va byi herisa. (Nhlav. 17:​16, 17) Endzhaku ka sweswo, va ta hlasela vanhu va Xikwembu. (Ezek. 38:​18, 19) Swiendlakalo leswi swi ta hi yisa eka nyimpi yo hetelela ya Armagedoni. (Nhlav. 16:​14, 16) Ha tiyiseka leswaku swilo leswi swi ta endleka hi ku hatlisa. Kambe sweswi, a hi yeni emahlweni hi khensa Tata wa hina wa le tilweni la nga ni rirhandzu hi ku yingisa vuprofeta bya Bibele ni ku pfuna van’wana leswaku va endla leswi fanaka. w23.08 13 ¶19-20

Loko muapostola Pawulo a vulavula hi ripfumelo, ntshembo ni rirhandzu u gimete hi ku vula leswaku “lexikulu eka leswi hinkwaswo i rirhandzu.” (1 Kor. 13:13) Hikwalahokayini Pawulo a vule leswi? Enkarhini lowu taka a swi nge he lavi leswaku hi va ni ripfumelo eka switshembiso swa Xikwembu mayelana ni misava leyintshwa kumbe hi va ni ntshembo eka switshembiso sweswo hikuva se swi ta va swi hetisekile. Kambe swi ta lava leswaku mikarhi hinkwayo hi rhandza Yehovha ni vanhu. Entiyisweni ndlela leyi hi va rhandzaka hayona yi ta ya yi kula hilaha ku nga heriki. Nakambe rirhandzu ri kombisa leswaku hi Vakreste va ntiyiso. Yesu u byele vaapostola vakwe a ku: “Hinkwavo va ta tiva leswaku mi vadyondzisiwa va mina loko mi rhandzana.” (Yoh. 13:35) Nakambe loko hi rhandzana swi endla leswaku hi va ni vun’we. Pawulo u vule leswaku rirhandzu “ri endla leswaku vanhu hinkwavo va va ni vun’we hilaha ku heleleke.” (Kol. 3:14) Muapostola Yohane u tsalele vapfumerikulobye a ku: “Loyi a rhandzaka Xikwembu u fanele a rhandza ni makwavo.” (1 Yoh. 4:21) Loko hi rhandzana, hi kombisa leswaku hi rhandza Xikwembu. w23.11 8 ¶1, 3

Bibele yi fanisa vutomi bya hina tanihi Vakreste ni mphikizano. Lava tsutsumaka ku ya fika emakumu va kuma vutomi lebyi nga heriki. (2 Tim. 4:​7, 8) Hi fanele hi endla hinkwaswo leswi hi nga swi kotaka leswaku hi ya emahlweni hi tsutsuma, ngopfungopfu leswi hi yaka eku chaputeni. Muapostola Pawulo u hi byela leswi nga ta hi pfuna hi wu heta. U hi lerise leswaku ‘hi cukumeta xin’wana ni xin’wana lexi hi tikelaka ivi hi tsutsuma hi ku tiyisela eka mphikizano lowu vekiweke emahlweni ka hina.’ Xana Pawulo a a vula leswaku Mukreste a nga fanelanga a rhwala nchumu? Doo, a a nga vuli swona. Kambe a a vula leswaku hi fanele hi cukumeta hinkwaswo leswi nga bohiki ku swi rhwala. Swilo leswi swi nga hi sivela ku tsutsuma kahle ni ku hi karharisa. Leswaku hi tiyisela, hi fanele hi hatla hi xiya ni ku cukumeta nchumu wun’wana ni wun’wana lowu nga lavekiki lowu nga hi endlaka hi nonoka. Kambe hi hala tlhelo, a hi swi lavi ku cukumeta mindzhwalo leyi hi faneleke hi yi rhwala. Handle ka swona, hi nga tihumesa hi hexe emphikizanweni.—2 Tim. 2:5. w23.08 26 ¶1-2

Ku anakanyela swi hi pfuna leswaku hi xixima mavonelo ya van’wana. Hi xikombiso, vamakwerhu van’wana vaxisati va swi rhandza ku tiphoxonga kasi van’wana a va swi rhandzi. Vakreste van’wana va nwa byala hi ku ringanisela kasi van’wana a va byi khumbi nikatsongo. Vakreste hinkwavo va swi lava ku va ni rihanyo lerinene kambe va hlawula ku khathalela rihanyo ra vona hi tindlela to hambanahambana. Loko ho tibyela leswaku mikarhi hinkwayo mavonelo ya hina i manene naswona hi sindzisa vamakwerhu leswaku va ma tirhisa, hi nga va khunguvanyisa naswona hi nga endla leswaku ku nga vi ni vun’we. (1 Kor. 8:9; 10:​23, 24) Hi xikombiso, Yehovha a nga hi byeli ndlela leyi hi faneleke hi ambala hayona kambe Rito rakwe ra hi kongomisa loko swi ta eka maambalelo. Hi ambala hi ndlela leyi fanelaka malandza ya Xikwembu, hi kombisa leswaku ha anakanyela, ha ringanisela naswona hi ni “mianakanyo leyinene.” (1 Tim. 2:​9, 10) Hikwalaho, a hi tikokeli matihlo hikwalaho ka ndlela leyi hi ambalaka hayona. Rito ra Xikwembu ri tlhela ri pfuna vakulu leswaku va papalata ku veka swinawanawana loko swi ta emhakeni ya maambalelo ni switayele swa misisi. w23.07 23-24 ¶13-14

Yehovha u hi komba ndlela leyi hi nga tiphinaka hi ntsako hayona enkarhini lowu taka. Lava amukelaka xirhambo xa “wansati wa xiphukuphuku” loyi a huwelelaka, va tiyimisele ku tiphina hi ku “tsokombela” ka ku tikhoma ku biha hi swa masangu exihundleni. Vuyelo bya vona byi “le Sirheni.” (Swiv. 9:​13, 17, 18) Lava amukelaka xirhambo xa wansati la yimelaka “vutlhari bya ntiyiso” va ta va ni vumundzuku lebyi hambaneke! (Swiv. 9:1) Hi dyondza ku rhandza leswi Yehovha a swi rhandzaka ni ku venga leswi a swi vengaka. (Ps. 97:10) Swa hi tsakisa ku rhamba van’wana leswaku va vuyeriwa eka “vutlhari bya ntiyiso.” Hi fana ni malandza lama “huwelela[ka] ma ri ehenhla ka muti ma ku: ‘Loyi a nga riki na ntokoto, a a te haleno.’” Mikateko ya hina ni lava amukelaka xirhambo a hi ya sweswi ntsena. Mikateko leyi yi endla leswaku hi “hanya” hilaha ku nga heriki loko hi ri karhi hi “famba hi ndlela ya ku twisisa.”—Swiv. 9:​3, 4, 6. w23.06 24 ¶17-18

U titwa njhani loko mutirhikuloni kumbe xichudenikuloni xi ku vutisa hileswi u pfumelaka eka swona? Xana wa chuha? Vo tala va hina ha chuha. Kambe swivutiso swo tano swi nga hi pfuna hi tiva leswi loyi a hi vutisaka a swi ehleketaka kumbe a swi tshembaka kutani hi kuma nkarhi wo n’wi chumayela mahungu lamanene. Kambe mikarhi yin’wana munhu a nga hi vutisa hileswi a nga pfumelelaniki na hina kumbe hileswi a lavaka hi phikizana. Sweswo a swi fanelanga swi hi hlamarisa. Phela van’wana va byeriwe mavunwa hi leswi hi swi pfumelaka. (Mit. 28:22) Nakambe, hi hanya “emasikwini yo hetelela” ku nga nkarhi lowu vanhu vo tala va nga “tiyimiselangiki ku pfumelelana ni van’wana” naswona va ni “tihanyi.” (2 Tim. 3:​1, 3) U nga ha tivutisa leswi, ‘Ndzi nga swi kotisa ku yini ku va la rhuleke ni ku va ni musa loko un’wana a ndzi tlhontlha hikwalaho ka leswi ndzi pfumelaka eka swona?’ I yini leswi nga ku pfunaka? Swi nga ku pfuna ku va la rhuleke. Munhu la rhuleke a nga hatli a hlundzuka kambe u kota ku tikhoma loko vanhu va n’wi holovisa kumbe loko a nga tiyiseki leswaku u fanele a hlamula njhani. w23.09 14 ¶1-2

Mikarhi yin’wana nhlangano wa Yehovha wu hi tsundzuxa leswaku hi papalata ku rhandza mali ku katsa ni swilo leswi nga endlaka hi tlula milawu ya Xikwembu. Loko hi yingisa nkongomiso lowu wa Yehovha swa hi vuyerisa. (Esa. 48:​17, 18; 1 Tim. 6:​9, 10) A hi kanakani leswaku Yehovha u ta ya emahlweni a tirhisa vanhu lava n’wi yimelaka leswaku va hi nyika nkongomiso hi nkarhi wa nhlomulo lowukulu ni ku ya fika hi nkarhi wa Mfumo wa Gidi ra Malembe. Xana hi ta ya emahlweni hi yingisa nkongomiso wolowo? Swi ta hi olovela ku endla tano loko ntsena hi tikarhatela ku yingisa nkongomiso wa Yehovha sweswi. Hikwalaho, mikarhi hinkwayo a hi tiyimiseleni ku yingisa nkongomiso wa Yehovha ku katsa ni lowu hi wu kumaka eka vamakwerhu lava hlawuriweke leswaku va hi kongomisa. (Esa. 32:​1, 2; Hev. 13:17) Loko hi endla tano, hi ta n’wi tshemba hi ku helela Yehovha Mukongomisi wa hina, loyi a hi yisaka ekule ni makhombo lama nga dlayaka vuxaka bya hina na yena ivi a hi fambisa endleleni leyi yisaka emisaveni leyintshwa, laha hi nga ta hanya hilaha ku nga heriki. w24.02 25 ¶17-18

Muapostola Pawulo u tiphinile hi ku tirhela Yehovha kambe a ku ri ni swihinga swo tala leswi a a fanele a swi hlula. Mikarhi yo tala Pawulo a a fanele a famba mpfhuka wo leha naswona a swi nga olovi ku endla tano emikarhini yoleyo. Eka maendzo wolawo, mikarhi yin’wana Pawulo a a ri “emakhombyeni ya milambu” ni le “makhombyeni ya swigevenga.” Mikarhi yin’wana a a pfa a biwa hi vakaneti. (2 Kor. 11:​23-27) Nakambe mikarhi yin’wana, Vakrestekulobye va Pawulo a va nga ma tlangeli matshalatshala yakwe yo va pfuna. (2 Kor. 10:10; Filp. 4:15) I yini leswi pfuneke Pawulo leswaku a ya emahlweni a tirhela Yehovha? Pawulo u dyondze swo tala hi vumunhu bya Yehovha eMatsalweni ni le ka leswi n’wi endlekeleke. Yehovha Xikwembu a a rhandza Pawulo naswona Pawulo a a nga swi kanakani sweswo. (Rhom. 8:​38, 39; Efe. 2:​4, 5) Sweswo swi endle leswaku Pawulo a rhandza Yehovha swinene. Pawulo u kombise leswaku u rhandza Yehovha ‘hi ku tirhela vakwetsimi naswona u ye emahlweni a va tirhela.’—Hev. 6:10. w23.07 9 ¶5-6

Vanhu vo tala va swi twisisa leswaku ha swi lava ku fumiwa hi mfumo naswona hi fanele hi yingisa yin’wana ya milawu leyi vekiwaka hi “lava fumaka.” Kambe vanhu volavo va koka milenge loko va fanele va yingisa nawu lowu va vonaka wu nga twali kumbe wu lavaka va endla swo tala. Bibele ya pfumela leswaku mifumo yi xanisa vanhu, yi lawuriwa hi Sathana naswona yi ta lovisiwa ku nga ri khale. (Ps. 110:​5, 6; Ekl. 8:9; Luka 4:​5, 6) Yi tlhela yi vula leswaku “loyi a lwisanaka ni vafumi u lwisana ni lunghiselelo ra Xikwembu.” Loko hi yingisa mifumo hi va hi fambisana ni lunghiselelo leri Yehovha a ri vekeke swa xinkarhana leswaku ku va ni ku hleleka. Hikwalaho, hi fanele hi “[nyika] hinkwavo timfanelo ta vona,” leswi katsaka ku hakela swibalo, hi va xixima ni ku va yingisa. (Rhom. 13:​1-7) Hi nga vona onge nawu wo karhi a wu twali kumbe wu koxa swo tala. Kambe hi yingisa Yehovha naswona u hi byela leswaku hi yingisa vafumi ntsena loko va nga hi byeli leswaku hi tlula milawu yakwe.—Mit. 5:29. w23.10 8 ¶9-10

Loko Samsoni a velekiwa, Vafilista a va fuma tiko ra Israyele naswona a va ri tshikilela. (Vaav. 13:1) Leswi a va fumiwa hi voko ra nsimbi, Vaisrayele a va xaniseka swinene. Yehovha u hlawule Samsoni leswaku a “ponisa Vaisrayele eka Vafilista.” (Vaav. 13:5) Leswaku a hetisisa xiavelo xakwe xo tika, Samsoni a a fanele a titshega hi Yehovha. Siku rin’wana masocha ya Vafilista ma tile eLehi ku nga muti lowu kumbexana a wu ri eYuda leswaku ma ta khoma Samsoni. Vavanuna va Yuda a va chava kutani va n’wi nyikete eka valala. Vanhu va ka vona va n’wi bohe hi tintambu timbirhi letintshwa va n’wi yisa eka Vafilista. (Vaav. 15:​9-13) Hambiswiritano, “moya wa Yehovha wu tirh[e]” eka Samsoni hiloko a titshunxa. Kutani a “kuma rihlaya ra mbhongolo ya xinuna leya ha ku faka” a ri teka ivi a dlaya Vafilista va 1 000 hi rona!—Vaav. 15:​14-16. w23.09 2-3 ¶3-4

Hakatsongotsongo Yehovha u hi byele ‘xikongomelo xakwe lexi nga heriki’ lexi kumekaka eBibeleni. Yehovha a nga hlawula tindlela to hambanahambana leswaku a hetisisa xikongomelo xakwe ni ku tlhela a “endl[a] swilo hinkwaswo hikwalaho ka xikongomelo xakwe.” (Swiv. 16:4) Nakambe vuyelo bya leswi Yehovha a nga ta swi endla byi ta tshama hilaha ku nga heriki. I yini xikongomelo xa Yehovha naswona hi kwihi ku cinca loku a ku endleke leswaku a xi hetisisa? Xikwembu xi byele vanhu vo sungula hi xikongomelo xa xona mayelana na vona. A va fanele va ‘tswalana va andza va tata misava, va fuma hinkwaswo leswi fambafambaka’ emisaveni. (Gen. 1:28) Loko Adamu na Evha va xandzukile ni ku endla leswaku xidyoho xi tlulela vanhu hinkwavo, sweswo a swi sivelanga xikongomelo xa Yehovha leswaku xi nga hetiseki. U cince ndlela leyi a xi ta hetiseka hayona. Hi ku hatlisa, u kunguhate ku veka Mfumo etilweni lowu a wu ta hetisisisa xikongomelo xakwe xo sungula hi vanhu ni hi misava.—Mat. 25:34. w23.10 20 ¶6-7

Yehovha a nga hi pfuna leswaku hi nga tshiki ku n’wi gandzela. Swi nga hi tikela ku endla tano ngopfungopfu loko hi langutane ni ku tsana ko karhi ku ringana nkarhi wo leha. Mikarhi yin’wana hi nga vona onge ku tsana ka hina ku tika ngopfu ku tlula ka muapostola Petro. Kambe Yehovha a nga hi tiyisa leswaku hi nga tshiki. (Ps. 94:​18, 19) Hi xikombiso, makwerhu un’wana a a rhandzana ni vanhu va rimbewu leri fanaka ni ra yena ku ringana malembe yo hlayanyana a nga si dyondza ntiyiso. U cince hi ku helela kutani a hanya hi milawu ya Bibele. Hambiswiritano, mikarhi yin’wana a karhatiwa hi ku navela ko biha. I yini leswi n’wi pfuneke leswaku a nga tshiki ku hanya hi milawu ya Bibele? Loko a hlamusela u ri: “Yehovha wa hi tiyisa.” U tlhela a ku: “Hi ku pfuniwa hi moya wa Yehovha . . . , ndzi dyondze leswaku swa koteka [ku ya emahlweni] ndzi hanya hi ntiyiso . . . Yehovha wa ndzi tirhisa naswona u ya emahlweni a ndzi tiyisa swi nga ri na mhaka ku tsana ka mina.” w23.09 23 ¶12

Vamakwerhu va xinuna lava ha riki vantshwa, ku va wanuna wa Mukreste loyi a wupfeke a swi to pfuketana swi ti endlekela. U fanele u hlawula swikombiso leswinene leswi u nga swi tekelelaka, u va ni vuswikoti bya ku ehleketa, u va munhu loyi vanhu va nga tshembelaka eka yena, u va ni vuswikoti lebyi nga ku pfunaka evuton’wini ni ku tilunghiselela vutihlamuleri bya le nkarhini lowu taka. Loko u ehleketa hi swilo hinkwaswo leswi u faneleke u tirhela eka swona, u nga ha vona onge swi nga ku tikela. Kambe u nga swi kota ku swi fikelela. Tsundzuka leswaku Yehovha u tiyimisele ku ku pfuna. (Esa. 41:​10, 13) Vamakwerhu evandlheni na vona va tiyimisele ku ku pfuna. Loko u va wanuna wa Mukreste loyi a wupfeke loyi Yehovha a lavaka leswaku u va yena, u ta tiphina hi vutomi. Ha mi rhandza swinene n’wina vamakwerhu va xinuna lava ha riki vantshwa! Onge Yehovha a nga mi katekisa swinene loko enkarhini wa sweswi mi tikarhatela ku wa mi pfuka leswaku mi va Vakreste lava wupfeke. w23.12 29 ¶19-20

A hi nge u le xinkhubyanini ni vamakwerhu vo karhi. Mi le ku tiphineni naswona mi teka xifaniso mi ri hi ntlawa. Mi tlhela mi teka swifaniso swin’wana swimbirhi leswaku loko xo tshuka xi nga humanga kahle xo sungula mi sala ni leswin’wana. Sweswi mi teke swifaniso swinharhu. Kambe eka xin’we xa swona, u xiya leswaku makwerhu wo karhi a nga humanga kahle. Wa xi susa hikuva u na swifaniso swimbirhi leswi humeke kahle laha vanhu hinkwavo exifanisweni ku katsa ni makwerhu yoloye va nga le ku n’wayiteleni. Hi ntolovelo hi tiphina hi mikarhi yo tsakisa ni vamakwerhu. Kambe a hi nge eka mikarhi yoleyo, makwerhu u vula kumbe ku endla nchumu lowu nga hi khomiki kahle. Hi endla yini loko hi tsundzuka leswi endlekeke? Hi fanele hi ringeta ku swi susa emiehleketweni ya hina hilaha a hi ta susa xifaniso lexi nga humangiki kahle. (Efe. 4:32) Hi nga swi kota ku endla tano hikuva hi ni mikarhi yo tsakisa leyi hi tiphineke swin’we na yena. Yoleyo i mikarhi leyinene leyi hi lavaka ku tshama hi ri karhi hi yi tsundzuka ni ku yi tlangela. w23.11 12-13 ¶16-17

Marito ya Xigriki lama tirhisiweke laha, ma kombisa leswaku ndlela leyi wansati wa Mukreste a ambalaka hayona a yi ta va leyi xiximekaka naswona a yi ta kombisa leswaku u anakanyela mavonelo kumbe ndlela leyi van’wana va titwaka hayona. Hi ti ba xifuva hi vamakwerhu va xisati lava rhandzekaka naswona va kombisaka leswaku va ringanisela loko swi ta eka maambalelo! Ku twisisa i byin’wana bya vumunhu lebyi vamakwerhu va xisati lava wupfeke va faneleke va va na byona. I yini ku twisisa? I vuswikoti bya ku tiva leswinene ni leswo biha ivi u hlawula ku endla leswi nga swinene. Xiya xikombiso xa Abigayele. Nuna wakwe u endle xiboho lexi a xi ta endla leswaku ndyangu wakwe hinkwawo wu lovisiwa. Hi ku hatlisa, Abigayele u endle swo karhi. Ku twisisa kakwe ku ponise vutomi bya vanhu vo tala. (1 Sam. 25:​14-23, 32-35) Ku twisisa ku hi pfuna hi tiva nkarhi lowunene wo vulavula ni wo miyela. Ku tlhela ku hi pfuna hi va ni vuxaka lebyinene ni vanhu van’wana naswona a hi va endli va titwa va nga tshunxekanga.—1 Tes. 4:11. w23.12 20 ¶8-9

Muapostola Pawulo u tsalele vandlha ra le Rhoma marito wolawo. Vamakwerhu va kwalaho va dyondze hi Yehovha na Yesu, va kombise ripfumelo ni ku tlhela va va Vakreste. Kutani Xikwembu xi va “[vule] lava lulameke hikwalaho ka ripfumelo” ni ku tlhela xi va hlawula hi moya lowo kwetsima. (Rhom. 5:1) A va ri ni ntshembo wo tsakisa. Hi ku famba ka nkarhi Pawulo u tsalele Vakreste lava hlawuriweke va le Efesa a va byela hi ntshembo lowu Xikwembu xi va nyikeke wona. Ntshembo wolowo a wu katsa ku kuma leswi ‘tshembisiweke vakwetsimi.’ (Efe. 1:18) Nakambe Pawulo u tsalele Vakolosa leswaku a va hlamusela laha a va ta yi kuma kona hakelo ya vona. U yi vitane “ntshembo lowu mi vekeriweke wona ematilweni.” (Kol. 1:​4, 5) Ntshembo wa Vakreste lava hlawuriweke i wa ku pfuxeriwa ku hanya hilaha ku nga heriki etilweni laha va nga ta fuma na Kreste.—1 Tes. 4:​13-17; Nhlav. 20:6. w23.12 9 ¶4-5

Rito leri nge “rindza,” a ku ri xiga lexi a xi tirhisiwa hi masocha naswona a xi vula ku va masocha ma rindza muti ni ku wu sirhelela eka vahlaseri. Vanhu lava a va tshama emutini wolowo a va etlela bya n’wantenyani hileswi a va swi tiva leswaku masocha ma va sirhelerile. Hilaha ku fanaka, loko ku rhula ka Xikwembu ku rindza timbilu ni miehleketo ya hina, hi va ni ku rhula hi ku tiva leswaku hi sirhelelekile. (Ps. 4:8) Hilaha swi veke hakona eka Hana, hi nga swi kota ku va ni ku rhula hambiloko swiyimo swa hina swi nga cinci hi ku hatlisa. (1 Sam. 1:​16-18) Loko hi va ni ku rhula, swa olova ku ehleketa kahle ni ku endla swiboho. I yini leswi hi nga swi endlaka? Ku fana ni vaakatiko lava nga vitanaka murindzi leswaku a va sirhelela, na hina hi nga vitana Yehovha leswaku a hi rindza. Njhani? Khongela kukondza u va ni ku rhula ka Xikwembu. (Luka 11:9; 1 Tes. 5:17) Loko u langutane ni maxangu, phikelela eswikhongelweni kutani u ta vona ndlela leyi ku rhula ka Yehovha ku nga ta rindza miehleketo ni mbilu ya wena hayona.—Rhom. 12:12. w24.01 21 ¶5-6

Leswaku Yesu a kota ku kwetsimisa vito ra Tata wakwe, u tiyisele ku xanisiwa hi tindlela hinkwato, a rhukaniwa ni ku hehliwa hi mavunwa. A a swi tiva leswaku u yingise Tata wakwe eka swilo hinkwaswo naswona a ku nga ri na lexi a xi ta n’wi khomisa tingana. (Hev. 12:2) Nakambe a a swi tiva leswaku enkarhini wolowo wo tika, Sathana a a ri eku n’wi hlaseleni. (Luka 22:​2-4; 23:​33, 34) Sathana a a tiyimisele ku tshikisa Yesu ku tshembeka; kambe swi n’wi tsandzile. Yesu u kombise leswaku Sathana i muhembi lonkulu nileswaku Yehovha u na wona malandza lama tshamaka ma tshembekile hambiloko ma ringiwa swinene! Xana wa swi lava ku tsakisa Hosi ya wena leyi nga eku fumeni sweswi? Yana emahlweni u dzunisa vito ra Yehovha, u pfuna van’wana va tiva vumunhu byakwe lebyinene. Loko u endla tano, u tekelela Yesu. (1 Pet. 2:21) Ku fana na Yesu, u ta tsakisa Yehovha ni ku kombisa leswaku nala Wakwe Sathana i muhembi lonkulu! w24.02 11-12 ¶11-13

Eka malembe ya ntlhanu lama hundzeke, vanhu vo tlula miliyoni va khuvuriwile va va Timbhoni ta Yehovha. Loko u tinyiketela eka Yehovha, u hlawula ku va mudyondzisiwa wa Yesu Kreste ni ku rhangisa ku endla ku rhandza ka Xikwembu evuton’wini bya wena. Xana sweswo swi katsa yini? Yesu u te: “Loyi a lavaka ku ndzi landzela, a a titshike.” (Mat. 16:24) Xiga xa Xigriki lexi hundzuluxeriweke xi va “a a titshike,” xi nga tlhela xi hundzuluxeriwa xi va “a nga ha tihanyeli.” Tanihi nandza wa Yehovha la tinyiketeleke, swi ta lava u ala swilo hinkwaswo leswi nga tsakisiki Yehovha. (2 Kor. 5:​14, 15) Sweswo swi katsa ku fambela ekule ni “mitirho ya nyama,” yo fana ni ku tikhoma ku biha hi swa masangu. (Gal. 5:​19-21; 1 Kor. 6:18) Xana ku yingisa milawu leyi swi ta ku tikisela vutomi? A swi tano loko u rhandza Yehovha na loko u tiyiseka leswaku swa ku vuyerisa ku yingisa milawu yakwe.—Ps. 119:97; Esa. 48:​17, 18. w24.03 2 ¶1; 3 ¶4

Yehovha u nyika lava a va amukelaka moya wakwe wo kwetsima. (Mat. 12:18) Hi nga tivutisa leswi, ‘Xana ndza yi kombisa yin’wana ya mihandzu ya moya wo kwetsima wa Xikwembu?’ Xana wa swi xiya leswaku se u ya u lehisa mbilu ku tlula leswi a wu ri xiswona loko u nga si tiva Yehovha? Entiyisweni, loko u ya u dyondza ku kombisa mihandzu ya moya wo kwetsima wa Xikwembu, u ta ya u swi xiya leswaku Yehovha wa ku amukela! Yehovha u tirhisa nkutsulo eka lava a va amukelaka. (1 Tim. 2:​5, 6) Kambe ku vuriwa yini loko timbilu ta hina ti nga pfumeli leswaku Yehovha wa hi amukela hambiloko hi ri ni ripfumelo eka yena naswona hi khuvuriwile? Tsundzuka leswaku a hi nge yi tshembi ndlela leyi hi titwaka hayona kambe hi nga n’wi tshemba Yehovha. U va teka va lulamile lava nga ni ripfumelo eka nkutsulo naswona u tshembisa ku va katekisa.—Ps. 5:12; Rhom. 3:26. w24.03 30 ¶15; 31 ¶17