Xiviko Xa Vahuweleri Va Mfumo

Yehova ‘U Mirisile’ eFiji

MIKATEKO ya Yehova ya vonaka eka vahuweleri lava tshembekaka va Mfumo eswihlaleni swo xonga swa Fiji. Sweswi ku na timbhoni ta Yehova ta 1 049 eswihlaleni, ku nga ku andza ka 10 wa tiphesente ku tlula n’waxemu. Va byarile va tlhela va cheleta, kutani Xikwembu xi mirisile.a—1 Vakorinto 3:6, 7.

Hofisi ya rhavi ya Sosayiti ya Watch Tower yi vula leswaku “vanhu va tsakela dyondzo ya Bibele swi nga rindzeriwanga.” Swirho swa bandlha rin’wana swi tirhe muti lowu nga etlhelweni lowu enkarhini lowu hundzeke swi nga amukeriwangiki hi malwandla eka wona. Kambe eka nkarhi wa sweswi hosi ya muti yi tivise leswaku vaaki va muti hinkwavo va fanele ku tshama ekaya leswaku va yingisela Timbhoni ta Yehova ni leswaku endzhaku vavasati va fanele ku nyika vamakwerhu swakudya eholweni ya ndhawu yoleyo. Loko va tlhelela endzhakunyana ka mavhiki mambirhi, phayona ra nkarhi hinkwawo ri kume vanhu va 28 va tiyimisele ku dyondza Bibele. Ku sukela kwalaho, muti lowu wu endzeriwile hi mahungu lamanene mavhiki man’wana ni man’wana mambirhi ku pfuna vanhu lava tsakelaka. Eka pfhumba rin’wana ni rin’wana, “vanhu lava tlhandlhekelaka va engeteriwa etidyondzweni.”

Un’wana wa lava 68 lavantshwa lava khuvuriweke eka nhlengeletano ya sweswinyana ya muganga a a ri mudyondzisi wa xikolo xa Sonto hi malembe ya kaye. A a huma endyangwini wa vukhongeri. U hlangane ni Timbhoni timbirhi evutirhelini bya tona bya yindlu na yindlu, kutani “endzhaku ka ku burisana ko leha ni maendzo yo tala yo vuyela, eku heteleleni dyondzo yi sunguriwile.” Endzhaku ka tin’hweti timbirhi ta dyondzo ya Bibele, u tshikile xiyimo xakwe tanihi mudyondzisi wa xikolo xa Sonto, a yimela ntiyiso, naswona u khuvuriwile endzhaku ka lembe. Loko a tirhisa marito ya muapostola Pawulo, u te: “Mi nga ha va mi twile ntirho wa mina wa ku hiseka evukhongerini bya mavunwa loko ndzi hisekele mikhuva ya vatata wa mina. Kambe sweswi ndzi kume ntiyiso, kutani ndzi tsakile ku tirhela Yehova na n’wina.”—Ringanisa Vagalatiya 1:13, 14.

Hi 1984 Fiji a ri ri na tinhlengeletano timbirhi ta muganga ro sungula. Vakulu va makumembirhi mbirhi lava humaka eka xihlalankulu, va nyikele mali ya vona vini, leswaku va seketela nongonoko eka nhlengeletano ya vumbirhi leyintsongo eka xihlala xin’wana. Hofisi ya rhavi yi lunghiselele riendzo ivi yi rindzela vamakwerhu va 90 leswaku va va kona eka xihlala-nkulu lexi. Hambi swi ri tano, lava ringanaka 115 va fambe hi xihahampfhuka xo hlawuleka ivi 320 hi xikepe lexi hirhiweke. Hikwalaho ka mahanyelo lamanene ya Timbhoni, mufambisi un’wana wa xihahampfhuka u te: “Ndzi hlamarisiwe hi mahanyelo ya vona, va tiyimisele ku yingisa swiletelo. Loko ndzi tivise leswaku va fanele ku chika exihahampfhukeni hikwalaho ka xihoxo xa muchini, va chike hi ku rhula handle ka ku n’unun’uta kumbe ku vilela. Loko va tlhela va khandziya, va endle tano hi ntsako, hi ku rhula, handle ka pongo. Loko vakhandziyi hinkwavo va swihahampfhuka a vo fana na n’wina.”

Mulunghisi-nkulu wa xikepe lexi hirhiweke u te: “I swinene ku va na n’wina tanihi vakhandziyi, hikuva mi hambanile hi laha ku heleleke ni ntlawa wa vantshwa va Vakriste lava ha ha ku va yisaka eka xihlala xin’wana. . . . Mi tengile naswona swa mi olovela ku hanyisana ni vanhu van’wana.” Mukhandziyikulobye u te: “Ndzi vone nchumu lowu a ndzi nga si tshama ndzi wu tokota. . . . A ndzi etlele efilorweni ya xikepe lexi titimelaka loko un’wana wa vamakwenu wa xisati a nyike nsati wa mina xikan’we na mina matrasi wo etlela eka wona. A ndzi ri eku lavisiseni ka vukhongeri byo fana ni lebyi.” Munhu loyi u ve kona enhlengeletanweni leswaku a ta vona ni ku dyondza swo tala.

Kahle-kahle, mahanyelo lamanene ya vamakwerhu lava hinkwavo hi wona lawa munhu a nga ma rindzelaka eka Vakriste va ntiyiso. Yesu u te: “Murhi lowunene wu tswala mihandzu leyo nandziha.” (Matewu 7:17) I ntsako ku vona ku andza loku Yehova a ku nyikaka vagandzeri vakwe lava tshembekaka eFiji. Kutani ku hava ku kanakana leswaku vo tala va ta amukela mahungu lamanene loko va ri karhi va yingisa ku ya emahlweni ni ku hambeta va xiya mahanyelo lamanene ya vanhu va Yehova.

[Nhlamuselo ya le hansi]